੭. ਕਾਲ਼ਿਗੋਧਾਪੁਤ੍ਤਭਦ੍ਦਿਯਤ੍ਥੇਰਗਾਥਾਵਣ੍ਣਨਾ

ਯਾਤਂ ਮੇ ਹਤ੍ਥਿਗੀਵਾਯਾਤਿਆਦਿਕਾ ਆਯਸ੍ਮਤੋ ਭਦ੍ਦਿਯਤ੍ਥੇਰਸ੍ਸ ਗਾਥਾ. ਕਾ ਉਪ੍ਪਤ੍ਤਿ? ਅਯਮ੍ਪਿ ਪੁਰਿਮਬੁਦ੍ਧੇਸੁ ਕਤਾਧਿਕਾਰੋ ਪਦੁਮੁਤ੍ਤਰਸ੍ਸ ਭਗਵਤੋ ਕਾਲੇ ਮਹਾਭੋਗਕੁਲੇ ਨਿਬ੍ਬਤ੍ਤਿਤ੍ਵਾ ਵਿਞ੍ਞੁਤਂ ਪਤ੍ਤੋ ਏਕਦਿਵਸਂ ਸਤ੍ਥੁ ਸਨ੍ਤਿਕੇ ਧਮ੍ਮਂ ਸੁਣਨ੍ਤੋ ਸਤ੍ਥਾਰਾ ਏਕਂ ਭਿਕ੍ਖੁਂ ਉਚ੍ਚਾਕੁਲਿਕਾਨਂ ਅਗ੍ਗਟ੍ਠਾਨੇ ਠਪਿਯਮਾਨਂ ਦਿਸ੍ਵਾ ਸਯਮ੍ਪਿ ਤਂ ਠਾਨਨ੍ਤਰਂ ਪਤ੍ਥੇਤ੍ਵਾ ਸਤ੍ਤਾਹਂ ਬੁਦ੍ਧਪ੍ਪਮੁਖਸ੍ਸ ਭਿਕ੍ਖੁਸਙ੍ਘਸ੍ਸ ਮਹਾਦਾਨਂ ਦਤ੍ਵਾ ਪਣਿਧਾਨਂ ਅਕਾਸਿ. ਸਤ੍ਥਾਪਿਸ੍ਸ ਅਨਨ੍ਤਰਾਯੇਨ ਸਮਿਜ੍ਝਨਭਾਵਂ ਦਿਸ੍ਵਾ ਬ੍ਯਾਕਾਸਿ. ਸੋਪਿ ਤਂ ਬ੍ਯਾਕਰਣਂ ਸੁਤ੍ਵਾ ਉਚ੍ਚਾਕੁਲਿਕਸਂਵਤ੍ਤਨਿਕਂ ਕਮ੍ਮਂ ਪੁਚ੍ਛਿਤ੍ਵਾ ਧਮ੍ਮਸ੍ਸਵਨਸ੍ਸ ਕਾਰਾਪਨਂ, ਧਮ੍ਮਮਣ੍ਡਪੇ ਆਸਨਦਾਨਂ, ਬੀਜਨੀਦਾਨਂ, ਧਮ੍ਮਕਥਿਕਾਨਂ ਪੂਜਾਸਕ੍ਕਾਰਕਰਣਂ, ਉਪੋਸਥਾਗਾਰੇ ਪਟਿਸ੍ਸਯਦਾਨਨ੍ਤਿ ਏਵਮਾਦਿਂ ਯਾਵਜੀਵਂ ਬਹੁਪੁਞ੍ਞਂ ਕਤ੍ਵਾ ਤਤੋ ਚੁਤੋ ਦੇਵਮਨੁਸ੍ਸੇਸੁ ਸਂਸਰਨ੍ਤੋ ਕਸ੍ਸਪਸ੍ਸ ਭਗਵਤੋ ਅਪਰਭਾਗੇ ਅਮ੍ਹਾਕਂ ਭਗਵਤੋ ਉਪ੍ਪਤ੍ਤਿਯਾ ਪੁਰੇਤਰਂ ਬਾਰਾਣਸਿਯਂ ਕੁਟੁਮ੍ਬਿਯਘਰੇ ਨਿਬ੍ਬਤ੍ਤੋ ਸਮ੍ਬਹੁਲੇ ਪਚ੍ਚੇਕਬੁਦ੍ਧੇ ਪਿਣ੍ਡਾਯ ਚਰਿਤ੍ਵਾ ਏਕਸ੍ਮਿਂਯੇਵ ਠਾਨੇ ਸਮਾਗਨ੍ਤ੍ਵਾ ਭਤ੍ਤਵਿਸ੍ਸਗ੍ਗਂ ਕਰੋਨ੍ਤੇ ਦਿਸ੍ਵਾ ਤਤ੍ਥ ਪਾਸਾਣਫਲਕਾਨਿ ਅਤ੍ਥਰਿਤ੍ਵਾ ਪਾਦੋਦਕਾਦਿਂ ਉਪਟ੍ਠਪੇਨ੍ਤੋ ਯਾਵਜੀਵਂ ਉਪਟ੍ਠਹਿ.

ਸੋ ਏਕਂ ਬੁਦ੍ਧਨ੍ਤਰਂ ਦੇਵਮਨੁਸ੍ਸੇਸੁ ਸਂਸਰਿਤ੍ਵਾ ਇਮਸ੍ਮਿਂ ਬੁਦ੍ਧੁਪ੍ਪਾਦੇ ਕਪਿਲਵਤ੍ਥੁਨਗਰੇ ਸਾਕਿਯਰਾਜਕੁਲੇ ਨਿਬ੍ਬਤ੍ਤਿ, ਭਦ੍ਦਿਯੋਤਿਸ੍ਸ ਨਾਮਂ ਅਹੋਸਿ. ਸੋ ਵਯਪ੍ਪਤ੍ਤੋ ਅਨੁਰੁਦ੍ਧਾਦੀਹਿ ਪਞ੍ਚਹਿ ਖਤ੍ਤਿਯੇਹਿ ਸਦ੍ਧਿਂ ਸਤ੍ਥਰਿ ਅਨੁਪਿਯਮ੍ਬਵਨੇ ਵਿਹਰਨ੍ਤੇ ਸਤ੍ਥੁ ਸਨ੍ਤਿਕੇ ਪਬ੍ਬਜਿਤ੍ਵਾ ਅਰਹਤ੍ਤਂ ਪਾਪੁਣਿ. ਤਂ ਸਤ੍ਥਾ ਅਪਰਭਾਗੇ ਜੇਤਵਨੇ ਅਰਿਯਗਣਮਜ੍ਝੇ ਨਿਸਿਨ੍ਨੋ ਉਚ੍ਚਾਕੁਲਿਕਾਨਂ ਭਿਕ੍ਖੂਨਂ ਅਗ੍ਗਟ੍ਠਾਨੇ ਠਪੇਸਿ. ਸੋ ਫਲਸੁਖੇਨ ਨਿਬ੍ਬਾਨਸੁਖੇਨ ਚ ਵੀਤਿਨਾਮੇਨ੍ਤੋ ਅਰਞ੍ਞਗਤੋਪਿ ਰੁਕ੍ਖਮੂਲਗਤੋਪਿ ਸੁਞ੍ਞਾਗਾਰਗਤੋਪਿ ‘‘ਅਹੋ ਸੁਖਂ, ਅਹੋ ਸੁਖ’’ਨ੍ਤਿ ਅਭਿਕ੍ਖਣਂ ਉਦਾਨਂ ਉਦਾਨੇਸਿ. ਤਂ ਸੁਤ੍ਵਾ ਭਿਕ੍ਖੂ ਸਤ੍ਥੁ ਆਰੋਚੇਸੁਂ – ‘‘ਆਯਸ੍ਮਾ ਭਦ੍ਦਿਯੋ ਕਾਲ਼ਿਗੋਧਾਯ ਪੁਤ੍ਤੋ ਅਭਿਕ੍ਖਣਂ ‘ਅਹੋ ਸੁਖਂ, ਅਹੋ ਸੁਖ’ਨ੍ਤਿ ਵਦਤਿ, ਅਨਭਿਰਤੋ ਮਞ੍ਞੇ ਬ੍ਰਹ੍ਮਚਰਿਯਂ ਚਰਤੀ’’ਤਿ. ਸਤ੍ਥਾ ਤਂ ਪਕ੍ਕੋਸਾਪੇਤ੍ਵਾ ‘‘ਸਚ੍ਚਂ ਕਿਰ ਤ੍ਵਂ, ਭਦ੍ਦਿਯ, ਅਭਿਕ੍ਖਣਂ ‘ਅਹੋ ਸੁਖਂ, ਅਹੋ ਸੁਖ’ਨ੍ਤਿ ਵਦਸੀ’’ਤਿ ਪੁਚ੍ਛਿ. ਸੋ ‘‘ਸਚ੍ਚਂ ਭਗਵਾ’’ਤਿ ਪਟਿਜਾਨਿਤ੍ਵਾ ‘‘ਪੁਬ੍ਬੇ ਮੇ, ਭਨ੍ਤੇ, ਰਜ੍ਜਂ ਕਾਰੇਨ੍ਤਸ੍ਸ ਸੁਸਂਵਿਹਿਤਾਰਕ੍ਖੋ ਅਹੋਸਿਂ, ਤਥਾਪਿ ਭੀਤੋ ਉਬ੍ਬਿਗ੍ਗੋ ਉਸ੍ਸਙ੍ਕਿਤੋ ਵਿਹਾਸਿਂ. ਇਦਾਨਿ ਪਨ ਪਬ੍ਬਜਿਤੋ ਅਭੀਤੋ ਅਨੁਬ੍ਬਿਗ੍ਗੋ ਅਨੁਸ੍ਸਙ੍ਕਿਤੋ ਵਿਹਰਾਮੀ’’ਤਿ ਵਤ੍ਵਾ –

੮੪੨. ‘‘ਯਾਤਂ ਮੇ ਹਤ੍ਥਿਗੀਵਾਯ, ਸੁਖੁਮਾ ਵਤ੍ਥਾ ਪਧਾਰਿਤਾ;

ਸਾਲੀਨਂ ਓਦਨੋ ਭੁਤ੍ਤੋ, ਸੁਚਿਮਂਸੂਪਸੇਚਨੋ.

੮੪੩. ‘‘ਸੋਜ੍ਜ ਭਦ੍ਦੋ ਸਾਤਤਿਕੋ, ਉਞ੍ਛਾਪਤ੍ਤਾਗਤੇ ਰਤੋ;

ਝਾਯਤਿ ਅਨੁਪਾਦਾਨੋ, ਪੁਤ੍ਤੋ ਗੋਧਾਯ ਭਦ੍ਦਿਯੋ.

੮੪੪. ‘‘ਪਂਸੁਕੂਲੀ ਸਾਤਤਿਕੋ, ਉਞ੍ਛਾਪਤ੍ਤਾਗਤੇ ਰਤੋ;

ਝਾਯਤਿ ਅਨੁਪਾਦਾਨੋ, ਪੁਤ੍ਤੋ ਗੋਧਾਯ ਭਦ੍ਦਿਯੋ.

੮੪੫.

‘‘ਪਿਣ੍ਡਪਾਤੀ ਸਾਤਤਿਕੋ…ਪੇ….

੮੪੬. ‘‘ਤੇਚੀਵਰੀ ਸਾਤਤਿਕੋ…ਪੇ….

੮੪੭. ‘‘ਸਪਦਾਨਚਾਰੀ ਸਾਤਤਿਕੋ…ਪੇ….

੮੪੮. ‘‘ਏਕਾਸਨੀ ਸਾਤਤਿਕੋ…ਪੇ….

੮੪੯. ‘‘ਪਤ੍ਤਪਿਣ੍ਡੀ ਸਾਤਤਿਕੋ…ਪੇ….

੮੫੦. ‘‘ਖਲੁਪਚ੍ਛਾਭਤ੍ਤੀ ਸਾਤਤਿਕੋ…ਪੇ….

੮੫੧. ‘‘ਆਰਞ੍ਞਿਕੋ ਸਾਤਤਿਕੋ…ਪੇ….

੮੫੨. ‘‘ਰੁਕ੍ਖਮੂਲਿਕੋ ਸਾਤਤਿਕੋ…ਪੇ….

੮੫੩. ‘‘ਅਬ੍ਭੋਕਾਸੀ ਸਾਤਤਿਕੋ…ਪੇ….

੮੫੪. ‘‘ਸੋਸਾਨਿਕੋ ਸਾਤਤਿਕੋ…ਪੇ….

੮੫੫. ‘‘ਯਥਾਸਨ੍ਥਤਿਕੋ ਸਾਤਤਿਕੋ…ਪੇ….

੮੫੬. ‘‘ਨੇਸਜ੍ਜਿਕੋ ਸਾਤਤਿਕੋ…ਪੇ….

੮੫੭. ‘‘ਅਪ੍ਪਿਚ੍ਛੋ ਸਾਤਤਿਕੋ…ਪੇ….

੮੫੮. ‘‘ਸਨ੍ਤੁਟ੍ਠੋ ਸਾਤਤਿਕੋ…ਪੇ….

੮੫੯. ‘‘ਪਵਿਵਿਤ੍ਤੋ ਸਾਤਤਿਕੋ…ਪੇ….

੮੬੦. ‘‘ਅਸਂਸਟ੍ਠੋ ਸਾਤਤਿਕੋ…ਪੇ….

੮੬੧. ‘‘ਆਰਦ੍ਧਵੀਰਿਯੋ ਸਾਤਤਿਕੋ…ਪੇ….

੮੬੨. ‘‘ਹਿਤ੍ਵਾ ਸਤਪਲਂ ਕਂਸਂ, ਸੋਵਣ੍ਣਂ ਸਤਰਾਜਿਕਂ;

ਅਗ੍ਗਹਿਂ ਮਤ੍ਤਿਕਾਪਤ੍ਤਂ, ਇਦਂ ਦੁਤਿਯਾਭਿਸੇਚਨਂ.

੮੬੩. ‘‘ਉਚ੍ਚੇ ਮਣ੍ਡਲਿਪਾਕਾਰੇ, ਦਲ਼੍ਹਮਟ੍ਟਾਲਕੋਟ੍ਠਕੇ;

ਰਕ੍ਖਿਤੋ ਖਗ੍ਗਹਤ੍ਥੇਹਿ, ਉਤ੍ਤਮਂ ਵਿਹਰਿਂ ਪੁਰੇ.

੮੬੪. ‘‘ਸੋਜ੍ਜ ਭਦ੍ਦੋ ਅਨੁਤ੍ਰਾਸੀ, ਪਹੀਨਭਯਭੇਰਵੋ;

ਝਾਯਤਿ ਵਨਮੋਗਯ੍ਹ, ਪੁਤ੍ਤੋ ਗੋਧਾਯ ਭਦ੍ਦਿਯੋ.

੮੬੫. ‘‘ਸੀਲਕ੍ਖਨ੍ਧੇ ਪਤਿਟ੍ਠਾਯ, ਸਤਿਂ ਪਞ੍ਞਞ੍ਚ ਭਾਵਯਂ;

ਪਾਪੁਣਿਂ ਅਨੁਪੁਬ੍ਬੇਨ, ਸਬ੍ਬਸਂਯੋਜਨਕ੍ਖਯ’’ਨ੍ਤਿ. –

ਇਮਾਹਿ ਗਾਥਾਹਿ ਸਤ੍ਥੁ ਪੁਰਤੋ ਸੀਹਨਾਦਂ ਨਦਿ.

ਤਤ੍ਥ ਯਾਤਂ ਮੇ ਹਤ੍ਥਿਗੀਵਾਯਾਤਿ, ਭਨ੍ਤੇ, ਪੁਬ੍ਬੇ ਮਯਾ ਗਚ੍ਛਨ੍ਤੇਨਾਪਿ ਹਤ੍ਥਿਗੀਵਾਯ ਹਤ੍ਥਿਕ੍ਖਨ੍ਧੇ ਨਿਸੀਦਿਤ੍ਵਾ ਯਾਤਂ ਚਰਿਤਂ. ਵਤ੍ਥਾਨਿ ਪਰਿਹਰਨ੍ਤੇਨਾਪਿ ਸੁਖੁਮਾ ਸੁਖਸਮ੍ਫਸ੍ਸਾ ਕਾਸਿਕਵਤ੍ਥਵਿਸੇਸਾ ਧਾਰਿਤਾ. ਓਦਨਂ ਭੁਞ੍ਜਨ੍ਤੇਨਾਪਿ ਤਿਵਸ੍ਸਿਕਾਨਂ ਪੁਰਾਣਗਨ੍ਧਸਾਲੀਨਂ ਓਦਨੋ ਤਿਤ੍ਤਿਰਕਪਿਞ੍ਜਰਾਦਿਨਾ ਸੁਚਿਨਾ ਮਂਸੇਨ ਉਪਸਿਤ੍ਤਤਾਯ ਸੁਚਿਮਂਸੂਪਸੇਚਨੋ ਭੁਤ੍ਤੋ, ਤਥਾਪਿ ਤਂ ਸੁਖਂ ਨ ਮਯ੍ਹਂ ਚਿਤ੍ਤਪਰਿਤੋਸਕਰਂ ਅਹੋਸਿ, ਯਥਾ ਏਤਰਹਿ ਵਿਵੇਕਸੁਖਨ੍ਤਿ ਦਸ੍ਸੇਨ੍ਤੋ ਆਹ ‘‘ਸੋਜ੍ਜ ਭਦ੍ਦੋ’’ਤਿਆਦਿ. ਏਤ੍ਥ ਚ ਹਤ੍ਥਿਗ੍ਗਹਣੇਨੇਵ ਅਸ੍ਸਰਥਯਾਨਾਨਿ, ਵਤ੍ਥਗ੍ਗਹਣੇਨ ਸਬ੍ਬਰਾਜਾਲਙ੍ਕਾਰਾ, ਓਦਨਗ੍ਗਹਣੇਨ ਸਬ੍ਬਭੋਜਨਵਿਕਤਿ ਗਹਿਤਾਤਿ ਵੇਦਿਤਬ੍ਬਂ. ਸੋਜ੍ਜਾਤਿ ਸੋ ਅਜ੍ਜ ਏਤਰਹਿ ਪਬ੍ਬਜ੍ਜਾਯਂ ਠਿਤੋ. ਭਦ੍ਦੋਤਿ ਸੀਲਾਦਿਗੁਣੇਹਿ ਸਮਨ੍ਨਾਗਤਤ੍ਤਾ ਭਦ੍ਦੋ. ਸਾਤਤਿਕੋਤਿ ਸਮਣਧਮ੍ਮੇ ਦਿਟ੍ਠਧਮ੍ਮਸੁਖਵਿਹਾਰੇ ਸਾਤਚ੍ਚਯੁਤ੍ਤੋ. ਉਞ੍ਛਾਪਤ੍ਤਾਗਤੇ ਰਤੋਤਿ ਉਞ੍ਛਾਚਰਿਯਾਯ ਪਤ੍ਤੇ ਆਗਤੇ ਪਤ੍ਤਪਰਿਯਾਪਨ੍ਨੇ ਅਭਿਰਤੋ, ਤੇਨੇਵ ਸਨ੍ਤੁਟ੍ਠੋਤਿ ਅਧਿਪ੍ਪਾਯੋ. ਝਾਯਤੀਤਿ ਫਲਸਮਾਪਤ੍ਤਿਝਾਨੇਨ ਝਾਯਤਿ. ਪੁਤ੍ਤੋ ਗੋਧਾਯਾਤਿ ਕਾਲ਼ਿਗੋਧਾਯ ਨਾਮ ਖਤ੍ਤਿਯਾਯ ਪੁਤ੍ਤੋ. ਭਦ੍ਦਿਯੋਤਿ ਏਵਂਨਾਮੋ ਅਤ੍ਤਾਨਮੇਵ ਥੇਰੋ ਅਞ੍ਞਂ ਵਿਯ ਕਤ੍ਵਾ ਵਦਤਿ.

ਗਹਪਤਿਚੀਵਰਂ ਪਟਿਕ੍ਖਿਪਿਤ੍ਵਾ ਪਂਸੁਕੂਲਿਕਙ੍ਗਸਮਾਦਾਨੇਨ ਪਂਸੁਕੂਲਿਕੋ. ਸਙ੍ਘਭਤ੍ਤਂ ਪਟਿਕ੍ਖਿਪਿਤ੍ਵਾ ਪਿਣ੍ਡਪਾਤਿਕਙ੍ਗਸਮਾਦਾਨੇਨ ਪਿਣ੍ਡਪਾਤਿਕੋ. ਅਤਿਰੇਕਚੀਵਰਂ ਪਟਿਕ੍ਖਿਪਿਤ੍ਵਾ ਤੇਚੀਵਰਿਕਙ੍ਗਸਮਾਦਾਨੇਨ ਤੇਚੀਵਰਿਕੋ. ਲੋਲੁਪ੍ਪਚਾਰਂ ਪਟਿਕ੍ਖਿਪਿਤ੍ਵਾ ਸਪਦਾਨਚਾਰਿਕਙ੍ਗਸਮਾਦਾਨੇਨ ਸਪਦਾਨਚਾਰੀ. ਨਾਨਾਸਨਭੋਜਨਂ ਪਟਿਕ੍ਖਿਪਿਤ੍ਵਾ ਏਕਾਸਨਿਕਙ੍ਗਸਮਾਦਾਨੇਨ ਏਕਾਸਨਿਕੋ. ਦੁਤਿਯਕਭਾਜਨਂ ਪਟਿਕ੍ਖਿਪਿਤ੍ਵਾ ਪਤ੍ਤਪਿਣ੍ਡਿਕਙ੍ਗਸਮਾਦਾਨੇਨ ਪਤ੍ਤਪਿਣ੍ਡਿਕੋ. ਅਤਿਰਿਤ੍ਤਭੋਜਨਂ ਪਟਿਕ੍ਖਿਪਿਤ੍ਵਾ ਖਲੁਪਚ੍ਛਾਭਤ੍ਤਿਕਙ੍ਗਸਮਾਦਾਨੇਨ ਖਲੁਪਚ੍ਛਾਭਤ੍ਤਿਕੋ. ਗਾਮਨ੍ਤਸੇਨਾਸਨਂ ਪਟਿਕ੍ਖਿਪਿਤ੍ਵਾ ਆਰਞ੍ਞਿਕਙ੍ਗਸਮਾਦਾਨੇਨ ਆਰਞ੍ਞਿਕੋ. ਛਨ੍ਨਵਾਸਂ ਪਟਿਕ੍ਖਿਪਿਤ੍ਵਾ ਰੁਕ੍ਖਮੂਲਿਕਙ੍ਗਸਮਾਦਾਨੇਨ ਰੁਕ੍ਖਮੂਲਿਕੋ. ਛਨ੍ਨਰੁਕ੍ਖਮੂਲਾਨਿ ਪਟਿਕ੍ਖਿਪਿਤ੍ਵਾ ਅਬ੍ਭੋਕਾਸਿਕਙ੍ਗਸਮਾਦਾਨੇਨ ਅਬ੍ਭੋਕਾਸਿਕੋ. ਨਸੁਸਾਨਂ ਪਟਿਕ੍ਖਿਪਿਤ੍ਵਾ ਸੋਸਾਨਿਕਙ੍ਗਸਮਾਦਾਨੇਨ ਸੋਸਾਨਿਕੋ. ਸੇਨਾਸਨਲੋਲੁਪ੍ਪਂ ਪਟਿਕ੍ਖਿਪਿਤ੍ਵਾ ਯਥਾਸਨ੍ਥਤਿਕਙ੍ਗਸਮਾਦਾਨੇਨ ਯਥਾਸਨ੍ਥਤਿਕੋ. ਸਯਨਂ ਪਟਿਕ੍ਖਿਪਿਤ੍ਵਾ ਨੇਸਜ੍ਜਿਕਙ੍ਗਸਮਾਦਾਨੇਨ ਨੇਸਜ੍ਜਿਕੋ. ਅਯਮੇਤ੍ਥ ਸਙ੍ਖੇਪੋ. ਵਿਤ੍ਥਾਰਤੋ ਪਨ ਧੁਤਙ੍ਗਕਥਾ ਵਿਸੁਦ੍ਧਿਮਗ੍ਗੇ (ਵਿਸੁਦ੍ਧਿ. ੧.੨੨ ਆਦਯੋ) ਵੁਤ੍ਤਨਯੇਨੇਵ ਗਹੇਤਬ੍ਬਾ.

ਉਚ੍ਚੇਤਿ ਉਚ੍ਚਾਦਿਟ੍ਠਾਨੇ, ਉਪਰਿਪਾਸਾਦਤਾਯ ਵਾ ਉਚ੍ਚੇ. ਮਣ੍ਡਲਿਪਾਕਾਰੇਤਿ ਮਣ੍ਡਲਾਕਾਰੇਨ ਪਾਕਾਰਪਰਿਕ੍ਖਿਤ੍ਤੇ. ਦਲ਼੍ਹਮਟ੍ਟਾਲਕੋਟ੍ਠਕੇਤਿ ਥਿਰੇਹਿ ਅਟ੍ਟਾਲੇਹਿ ਦ੍ਵਾਰਕੋਟ੍ਠਕੇਹਿ ਚ ਸਮਨ੍ਨਾਗਤੇ, ਨਗਰੇਤਿ ਅਤ੍ਥੋ.

ਸਤਿਂ ਪਞ੍ਞਞ੍ਚਾਤਿ ਏਤ੍ਥ ਸਤਿਸੀਸੇਨ ਸਮਾਧਿਂ ਵਦਤਿ. ਫਲਸਮਾਪਤ੍ਤਿਨਿਰੋਧਸਮਾਪਤ੍ਤਿਯੋ ਸਨ੍ਧਾਯ ‘‘ਸਤਿਂ ਪਞ੍ਞਞ੍ਚ ਭਾਵਯ’’ਨ੍ਤਿ ਵੁਤ੍ਤੋ. ਸੇਸਂ ਤਤ੍ਥ ਤਤ੍ਥ ਵੁਤ੍ਤਨਯਤ੍ਤਾ ਉਤ੍ਤਾਨਮੇਵ.

ਏਵਂ ਥੇਰੋ ਸਤ੍ਥੁ ਸਮ੍ਮੁਖਾ ਸੀਹਨਾਦਂ ਨਦਿ. ਤਂ ਸੁਤ੍ਵਾ ਭਿਕ੍ਖੂ ਅਭਿਪ੍ਪਸਨ੍ਨਾ ਅਹੇਸੁਂ.

ਕਾਲ਼ਿਗੋਧਾਪੁਤ੍ਤਭਦ੍ਦਿਯਤ੍ਥੇਰਗਾਥਾਵਣ੍ਣਨਾ ਨਿਟ੍ਠਿਤਾ.