੬. ਸੇਲਤ੍ਥੇਰਗਾਥਾਵਣ੍ਣਨਾ

ਪਰਿਪੁਣ੍ਣਕਾਯੋਤਿਆਦਿਕਾ ਆਯਸ੍ਮਤੋ ਸੇਲਤ੍ਥੇਰਸ੍ਸ ਗਾਥਾ. ਕਾ ਉਪ੍ਪਤ੍ਤਿ? ਅਯਂ ਕਿਰ ਪਦੁਮੁਤ੍ਤਰਭਗਵਤੋ ਕਾਲੇ ਕੁਲਗੇਹੇ ਨਿਬ੍ਬਤ੍ਤਿਤ੍ਵਾ ਵਿਞ੍ਞੁਤਂ ਪਤ੍ਤੋ ਗਣਪਾਮੋਕ੍ਖੋ ਹੁਤ੍ਵਾ ਤੀਣਿ ਪੁਰਿਸਸਤਾਨਿ ਸਮਾਦਪੇਤ੍ਵਾ ਤੇਹਿ ਸਦ੍ਧਿਂ ਸਤ੍ਥੁ ਗਨ੍ਧਕੁਟਿਂ ਕਾਰੇਤ੍ਵਾ ਕਤਪਰਿਯੋਸਿਤਾਯ ਗਨ੍ਧਕੁਟਿਯਾ ਸਭਿਕ੍ਖੁਸਙ੍ਘਸ੍ਸ ਭਗਵਤੋ ਮਹਾਦਾਨਂ ਪਵਤ੍ਤੇਤ੍ਵਾ ਸਤ੍ਥਾਰਂ ਭਿਕ੍ਖੂ ਚ ਤਿਚੀਵਰੇਨ ਅਚ੍ਛਾਦੇਸਿ. ਸੋ ਤੇਨ ਪੁਞ੍ਞਕਮ੍ਮੇਨ ਏਕਂ ਬੁਦ੍ਧਨ੍ਤਰਂ ਦੇਵਲੋਕੇ ਏਵ ਵਸਿਤ੍ਵਾ ਤਤੋ ਚੁਤੋ ਦੇਵਮਨੁਸ੍ਸੇਸੁ ਸਂਸਰਨ੍ਤੋ ਇਮਸ੍ਮਿਂ ਬੁਦ੍ਧੁਪ੍ਪਾਦੇ ਅਙ੍ਗੁਤ੍ਤਰਾਪੇਸੁ ਆਪਣੇ ਨਾਮ ਬ੍ਰਾਹ੍ਮਣਗਾਮੇ ਬ੍ਰਾਹ੍ਮਣਕੁਲੇ ਨਿਬ੍ਬਤ੍ਤਿਤ੍ਵਾ ਸੇਲੋਤਿ ਲਦ੍ਧਨਾਮੋ ਅਹੋਸਿ. ਸੋ ਵਯਪ੍ਪਤ੍ਤੋ ਤੀਸੁ ਵੇਦੇਸੁ, ਬ੍ਰਾਹ੍ਮਣਸਿਪ੍ਪੇਸੁ ਚ ਨਿਪ੍ਫਤ੍ਤਿਂ ਗਨ੍ਤ੍ਵਾ ਤੀਣਿ ਮਾਣਵਕਸਤਾਨਿ ਮਨ੍ਤੇ ਵਾਚੇਨ੍ਤੋ ਆਪਣੇ ਪਟਿਵਸਤਿ. ਤੇਨ ਚ ਸਮਯੇਨ ਸਤ੍ਥਾ ਸਾਵਤ੍ਥਿਤੋ ਨਿਕ੍ਖਮਿਤ੍ਵਾ ਅਡ੍ਢਤੇਲ਼ਸਹਿ ਭਿਕ੍ਖੁਸਤੇਹਿ ਸਦ੍ਧਿਂ ਅਙ੍ਗੁਤ੍ਤਰਾਪੇਸੁ ਚਾਰਿਕਂ ਚਰਨ੍ਤੋ ਸੇਲਸ੍ਸ, ਅਨ੍ਤੇਵਾਸਿਕਾਨਞ੍ਚ ਞਾਣਪਰਿਪਾਕਂ ਦਿਸ੍ਵਾ ਅਞ੍ਞਤਰਸ੍ਮਿਂ ਵਨਸਣ੍ਡੇ ਵਿਹਰਤਿ. ਅਥ ਕੇਣਿਯੋ ਨਾਮ ਜਟਿਲੋ ਸਤ੍ਥੁ ਆਗਮਨਂ ਸੁਤ੍ਵਾ ਤਤ੍ਥ ਗਨ੍ਤ੍ਵਾ ਸਦ੍ਧਿਂ ਭਿਕ੍ਖੁਸਙ੍ਘੇਨ ਸਤ੍ਥਾਰਂ ਸ੍ਵਾਤਨਾਯ ਨਿਮਨ੍ਤੇਤ੍ਵਾ ਸਕੇ ਅਸ੍ਸਮੇ ਪਹੂਤਂ ਖਾਦਨੀਯਂ ਭੋਜਨੀਯਂ ਪਟਿਯਾਦੇਤਿ. ਤਸ੍ਮਿਞ੍ਚ ਸਮਯੇ ਸੇਲੋ ਬ੍ਰਾਹ੍ਮਣੋ ਸਦ੍ਧਿਂ ਤੀਹਿ ਮਾਣਵਕਸਤੇਹਿ ਜਙ੍ਘਾਵਿਹਾਰਂ ਅਨੁਵਿਚਰਨ੍ਤੋ ਕੇਣਿਯਸ੍ਸ ਅਸ੍ਸਮਂ ਪਵਿਸਿਤ੍ਵਾ ਜਟਿਲੇ ਕਟ੍ਠਫਾਲਨੁਦ੍ਧਨਸਮ੍ਪਾਦਨਾਦਿਨਾ ਦਾਨੂਪਕਰਣਂ ਸਜ੍ਜੇਨ੍ਤੇ ਦਿਸ੍ਵਾ, ‘‘ਕਿਂ ਨੁ ਖੋ ਤੇ, ਕੇਣਿਯ, ਮਹਾਯਞ੍ਞੋ ਪਚ੍ਚੁਪਟ੍ਠਿਤੋ’’ਤਿਆਦਿਂ ਪੁਚ੍ਛਿਤ੍ਵਾ ਤੇਨ ‘‘ਬੁਦ੍ਧੋ ਭਗਵਾ ਮਯਾ ਸ੍ਵਾਤਨਾਯ ਨਿਮਨ੍ਤਿਤੋ’’ਤਿ ਵੁਤ੍ਤੇ ‘‘ਬੁਦ੍ਧੋ’’ਤਿ ਵਚਨਂ ਸੁਤ੍ਵਾਵ ਹਟ੍ਠੋ ਉਦਗ੍ਗੋ ਪੀਤਿਸੋਮਨਸ੍ਸਜਾਤੋ ਤਾਵਦੇਵ ਮਾਣਵਕੇਹਿ ਸਦ੍ਧਿਂ ਸਤ੍ਥਾਰਂ ਉਪਸਙ੍ਕਮਿਤ੍ਵਾ ਕਤਪਟਿਸਨ੍ਥਾਰੋ ਏਕਮਨ੍ਤਂ ਨਿਸਿਨ੍ਨੋ ਭਗਵਤੋ ਕਾਯੇ ਬਾਤ੍ਤਿਂਸਮਹਾਪੁਰਿਸਲਕ੍ਖਣਾਨਿ ਦਿਸ੍ਵਾ ‘‘ਇਮੇਹਿ ਲਕ੍ਖਣੇਹਿ ਸਮਨ੍ਨਾਗਤੋ ਰਾਜਾ ਵਾ ਹੋਤਿ ਚਕ੍ਕਵਤ੍ਤੀ, ਬੁਦ੍ਧੋ ਵਾ ਲੋਕੇ ਵਿਵਟ੍ਟਚ੍ਛਦੋ, ਅਯਂ ਪਨ ਪਬ੍ਬਜਿਤੋ, ਨੋ ਚ ਖੋ ਨਂ ਜਾਨਾਮਿ ‘ਬੁਦ੍ਧੋ ਵਾ, ਨੋ ਵਾ’, ਸੁਤਂ ਖੋ ਪਨ ਮੇਤਂ ਬ੍ਰਾਹ੍ਮਣਾਨਂ ਵੁਦ੍ਧਾਨਂ ਮਹਲ੍ਲਕਾਨਂ ਆਚਰਿਯਪਾਚਰਿਯਾਨਂ ਭਾਸਮਾਨਾਨਂ ‘ਯੇ ਤੇ ਭਵਨ੍ਤਿ ਅਰਹਨ੍ਤੋ ਸਮ੍ਮਾਸਮ੍ਬੁਦ੍ਧਾ, ਤੇ ਸਕੇ ਵਣ੍ਣੇ ਭਞ੍ਞਮਾਨੇ ਅਤ੍ਤਾਨਂ ਪਾਤੁਕਰੋਨ੍ਤੀ’ਤਿ ਅਸਮ੍ਮਾਸਮ੍ਬੁਦ੍ਧੋ ਹਿ ਸਮ੍ਮੁਖੇ ਠਤ੍ਵਾ ਬੁਦ੍ਧਗੁਣੇਹਿ ਅਭਿਤ੍ਥਵੀਯਮਾਨੋ ਸਾਰਜ੍ਜਤਿ ਮਙ੍ਕੁਭਾਵਂ ਆਪਜ੍ਜਤਿ ਅਵੇਸਾਰਜ੍ਜਪ੍ਪਤ੍ਤਤਾਯ ਅਨਨੁਯੋਗਕ੍ਖਮਤ੍ਤਾ, ਯਂਨੂਨਾਹਂ ਸਮਣਂ ਗੋਤਮਂ ਸਮ੍ਮੁਖਾ ਸਾਰੁਪ੍ਪਾਹਿ ਗਾਥਾਹਿ ਅਭਿਤ੍ਥਵੇਯ੍ਯ’’ਨ੍ਤਿ ਏਵਂ ਪਨ ਚਿਨ੍ਤੇਤ੍ਵਾ –

੮੧੮. ‘‘ਪਰਿਪੁਣ੍ਣਕਾਯੋ ਸੁਰੁਚਿ, ਸੁਜਾਤੋ ਚਾਰੁਦਸ੍ਸਨੋ;

ਸੁਵਣ੍ਣਵਣ੍ਣੋਸਿ ਭਗਵਾ, ਸੁਸੁਕ੍ਕਦਾਠੋਸਿ ਵੀਰਿਯਵਾ.

੮੧੯. ‘‘ਨਰਸ੍ਸ ਹਿ ਸੁਜਾਤਸ੍ਸ, ਯੇ ਭਵਨ੍ਤਿ ਵਿਯਞ੍ਜਨਾ;

ਸਬ੍ਬੇ ਤੇ ਤਵ ਕਾਯਸ੍ਮਿਂ, ਮਹਾਪੁਰਿਸਲਕ੍ਖਣਾ.

੮੨੦. ‘‘ਪਸਨ੍ਨਨੇਤ੍ਤੋ ਸੁਮੁਖੋ, ਬ੍ਰਹਾ ਉਜੁ ਪਤਾਪਵਾ;

ਮਜ੍ਝੇ ਸਮਣਸਙ੍ਘਸ੍ਸ, ਆਦਿਚ੍ਚੋਵ ਵਿਰੋਚਸਿ.

੮੨੧. ‘‘ਕਲ੍ਯਾਣਦਸ੍ਸਨੋ ਭਿਕ੍ਖੁ, ਕਞ੍ਚਨਸਨ੍ਨਿਭਤ੍ਤਚੋ;

ਕਿਂ ਤੇ ਸਮਣਭਾਵੇਨ, ਏਵਂ ਉਤ੍ਤਮਵਣ੍ਣਿਨੋ.

੮੨੨. ‘‘ਰਾਜਾ ਅਰਹਸਿ ਭਵਿਤੁਂ, ਚਕ੍ਕਵਤ੍ਤੀ ਰਥੇਸਭੋ;

ਚਾਤੁਰਨ੍ਤੋ ਵਿਜਿਤਾਵੀ, ਜਮ੍ਬੁਸਣ੍ਡਸ੍ਸ ਇਸ੍ਸਰੋ.

੮੨੩. ‘‘ਖਤ੍ਤਿਯਾ ਭੋਗੀ ਰਾਜਾਨੋ, ਅਨੁਯਨ੍ਤਾ ਭਵਨ੍ਤਿ ਤੇ;

ਰਾਜਾਭਿਰਾਜਾ ਮਨੁਜਿਨ੍ਦੋ, ਰਜ੍ਜਂ ਕਾਰੇਹਿ ਗੋਤਮਾ’’ਤਿ. –

ਛਹਿ ਗਾਥਾਹਿ ਭਗਵਨ੍ਤਂ ਅਭਿਤ੍ਥਵਿ.

ਤਤ੍ਥ ਪਰਿਪੁਣ੍ਣਕਾਯੋਤਿ ਅਭਿਬ੍ਯਤ੍ਤਰੂਪਾਨਂ ਦ੍ਵਤ੍ਤਿਂਸਾਯ ਮਹਾਪੁਰਿਸਲਕ੍ਖਣਾਨਂ ਪਰਿਪੁਣ੍ਣਤਾਯ ਅਹੀਨਙ੍ਗਪਚ੍ਚਙ੍ਗਤਾਯ ਚ ਪਰਿਪੁਣ੍ਣਸਰੀਰੋ. ਸੁਰੁਚੀਤਿ ਸੁਨ੍ਦਰਸਰੀਰਪ੍ਪਭੋ. ਸੁਜਾਤੋਤਿ ਆਰੋਹਪਰਿਣਾਹਸਮ੍ਪਤ੍ਤਿਯਾ, ਸਣ੍ਠਾਨਸਮ੍ਪਤ੍ਤਿਯਾ ਚ ਸੁਨਿਬ੍ਬਤ੍ਤੋ. ਚਾਰੁਦਸ੍ਸਨੋਤਿ ਸੁਚਿਰਮ੍ਪਿ ਪਸ੍ਸਨ੍ਤਾਨਂ ਅਤਿਤ੍ਤਿਜਨਕਂ ਅਪ੍ਪਟਿਕ੍ਕੂਲਂ ਰਮਣੀਯਂ ਚਾਰੁ ਏਵ ਦਸ੍ਸਨਂ ਅਸ੍ਸਾਤਿ ਚਾਰੁਦਸ੍ਸਨੋ. ਕੇਚਿ ਪਨਾਹੁ ‘‘ਚਾਰੁਦਸ੍ਸਨੋਤਿ ਸੁਨ੍ਦਰਨੇਤ੍ਤੋ’’ਤਿ. ਸੁਵਣ੍ਣਵਣ੍ਣੋਤਿ ਸੁਵਣ੍ਣਸਦਿਸਵਣ੍ਣੋ. ਅਸੀਤਿ ਭਵਸਿ, ਇਦਂ ਪਦਂ ‘‘ਪਰਿਪੁਣ੍ਣਕਾਯੋ ਅਸੀ’’ਤਿਆਦਿਨਾ ਸਬ੍ਬਪਦੇਹਿ ਯੋਜੇਤਬ੍ਬਂ. ਸੁਸੁਕ੍ਕਦਾਠੋਤਿ ਸੁਟ੍ਠੁ ਸੁਕ੍ਕਦਾਠੋ. ਭਗਵਤੋ ਹਿ ਦਾਠਾਹਿ ਚਨ੍ਦਕਿਰਣਾ ਵਿਯ ਧਵਲਰਸ੍ਮਿਯੋ ਨਿਚ੍ਛਰਨ੍ਤਿ. ਵੀਰਿਯਵਾਤਿ ਵੀਰਿਯਪਾਰਮੀਪਾਰਿਪੂਰਿਯਾ ਚਤੁਰਙ੍ਗਸਮਨ੍ਨਾਗਤਵੀਰਿਯਾਧਿਟ੍ਠਾਨਤੋ ਚਤੁਬ੍ਬਿਧਸ੍ਸ ਸਮ੍ਮਪ੍ਪਧਾਨਸ੍ਸ ਸਮ੍ਪਤ੍ਤਿਯਾ ਚ ਅਤਿਸਯਯੁਤ੍ਤੋ.

ਨਰਸ੍ਸ ਹਿ ਸੁਜਾਤਸ੍ਸਾਤਿ ਸਮਤਿਂਸਾਯ ਪਾਰਮੀਨਂ, ਅਰਿਯਸ੍ਸ ਵਾ ਚਕ੍ਕਵਤ੍ਤੀਵਤ੍ਤਸ੍ਸ ਪਰਿਪੂਰਿਤਤ੍ਤਾ ਸੁਟ੍ਠੁ ਸਮ੍ਮਦੇਵ ਜਾਤਸ੍ਸ ਨਰਸ੍ਸ, ਮਹਾਪੁਰਿਸਸ੍ਸਾਤਿ ਅਤ੍ਥੋ. ਸਬ੍ਬੇ ਤੇਤਿ ਯੇ ਮਹਾਪੁਰਿਸਭਾਵਂ ਲੋਕੇ ਅਗ੍ਗਪੁਗ੍ਗਲਭਾਵਂ ਬ੍ਯਞ੍ਜਯਨ੍ਤੀਤਿ ਬ੍ਯਞ੍ਜਨਾਤਿ ਲਦ੍ਧਵੋਹਾਰਸੁਪ੍ਪਤਿਟ੍ਠਿਤਪਾਦਤਾਦਿਬਾਤ੍ਤਿਂਸਮਹਾਪੁਰਿਸਲਕ੍ਖਣਸਙ੍ਖਾਤਾ ਤਮ੍ਬਨਖਤੁਙ੍ਗਨਖਤਾਦਿਅਸੀਤਿਅਨੁਬ੍ਯਞ੍ਜਨਸਙ੍ਖਾਤਾ ਚ ਰੂਪਗੁਣਾ, ਤੇ ਅਨਵਸੇਸਾ, ਤਵ ਕਾਯਸ੍ਮਿਂ ਸਨ੍ਤੀਤਿ ਵਚਨਸੇਸੋ.

ਮਹਾਪੁਰਿਸਲਕ੍ਖਣਾਤਿ ਪੁਬ੍ਬੇ ਵੁਤ੍ਤਬ੍ਯਞ੍ਜਨਾਨੇਵ ਵਚਨਨ੍ਤਰੇਨ ਨਿਗਮੇਨ੍ਤੋ ਆਹ.

ਇਦਾਨਿ ਤੇਸੁ ਲਕ੍ਖਣੇਸੁ ਅਤ੍ਤਨਾ ਅਭਿਰੁਚਿਤੇਹਿ ਲਕ੍ਖਣੇਹਿ ਭਗਵਨ੍ਤਂ ਥੋਮੇਨ੍ਤੋ ‘‘ਪਸਨ੍ਨਨੇਤ੍ਤੋ’’ਤਿਆਦਿਮਾਹ. ਭਗਵਾ ਹਿ ਪਞ੍ਚ ਵਣ੍ਣਪਸਾਦਸਮ੍ਪਤ੍ਤਿਯਾ ਪਸਨ੍ਨਨੇਤ੍ਤੋ. ਪਰਿਪੁਣ੍ਣਚਨ੍ਦਮਣ੍ਡਲਸਦਿਸਮੁਖਤਾਯ ਸੁਮੁਖੋ. ਆਰੋਹਪਰਿਣਾਹਸਮ੍ਪਤ੍ਤਿਯਾ ਬ੍ਰਹਾ. ਬ੍ਰਹ੍ਮੁਜੁਗਤ੍ਤਤਾਯ ਉਜੁ. ਜੁਤਿਮਨ੍ਤਤਾਯ ਪਤਾਪਵਾ.

ਇਦਾਨਿ ਤਮੇਵ ਪਤਾਪਵਨ੍ਤਤਂ ਆਦਿਚ੍ਚੂਪਮਾਯ ਵਿਭਾਵੇਨ੍ਤੋ ‘‘ਮਜ੍ਝੇ ਸਮਣਸਙ੍ਘਸ੍ਸਾ’’ਤਿਆਦਿਮਾਹ. ਤਤ੍ਥ ਆਦਿਚ੍ਚੋਵ ਵਿਰੋਚਸੀਤਿ ਯਥਾ ਆਦਿਚ੍ਚੋ ਉਗ੍ਗਚ੍ਛਨ੍ਤੋ ਸਬ੍ਬਂ ਤਮਗਤਂ ਵਿਧਮੇਤ੍ਵਾ ਆਲੋਕਂ ਕਰੋਨ੍ਤੋ ਵਿਰੋਚਤਿ, ਏਵਂ ਤ੍ਵਮ੍ਪਿ ਅਨ੍ਤੋ ਚੇਵ ਬਹਿ ਚ ਸਬ੍ਬਂ ਅਵਿਜ੍ਜਾਤਮਂ ਵਿਦ੍ਧਂਸੇਤ੍ਵਾ ਞਾਣਾਲੋਕਂ ਕਰੋਨ੍ਤੋ ਵਿਰੋਚਸਿ.

ਦਸ੍ਸਨੀਯਰੂਪਤਾਯ ਅਙ੍ਗੀਗਤਾਨਂ ਦਸ੍ਸਨਸਮ੍ਪਤ੍ਤੀਨਂ ਆਵਹਨਤੋ, ਕਲ੍ਯਾਣੇਹਿ ਪਞ੍ਚਹਿ ਦਸ੍ਸਨੇਹਿ ਸਮਨ੍ਨਾਗਤਤ੍ਤਾ ਚ ਕਲ੍ਯਾਣਦਸ੍ਸਨੋ. ਉਤ੍ਤਮਵਣ੍ਣਿਨੋਤਿ ਉਤ੍ਤਮਵਣ੍ਣਸਮ੍ਪਨ੍ਨਸ੍ਸ.

ਚਕ੍ਕਵਤ੍ਤੀਤਿ ਚਕ੍ਕਰਤਨਂ ਵਤ੍ਤੇਤਿ, ਚਤੂਹਿ ਸਮ੍ਪਤ੍ਤਿਚਕ੍ਕੇਹਿ ਵਤ੍ਤੇਤਿ, ਤੇਹਿ ਚ ਪਰੇ ਵਤ੍ਤੇਤਿ. ਪਰਹਿਤਾਯ ਇਰਿਯਾਪਥਚਕ੍ਕਾਨਂ ਵਤ੍ਤੋ ਏਤਸ੍ਮਿਂ ਅਤ੍ਥੀਤਿ ਚਕ੍ਕਵਤ੍ਤੀ. ਅਥ ਵਾ ਚਤੂਹਿ ਅਚ੍ਛਰਿਯਧਮ੍ਮੇਹਿ ਚ ਸਙ੍ਗਹਵਤ੍ਥੂਹਿ ਚ ਸਮਨ੍ਨਾਗਮੇਨ ਪਰੇਹਿ ਅਨਭਿਭਵਨੀਯਸ੍ਸ ਆਣਾਚਕ੍ਕਸ੍ਸ ਵਤ੍ਤੋ ਏਤਸ੍ਮਿਂ ਅਤ੍ਥੀਤਿਪਿ ਚਕ੍ਕਵਤ੍ਤੀ. ਰਥੇਸਭੋਤਿ ਰਥਿਕੇਸੁ ਆਜਾਨੀਯਉਸਭਪੁਰਿਸੋ, ਮਹਾਰਥਿਕੋਤਿ ਅਤ੍ਥੋ. ਚਾਤੁਰਨ੍ਤੋਤਿ ਚਤੁਸਮੁਦ੍ਦਨ੍ਤਾਯ ਪਥਵਿਯਾ ਇਸ੍ਸਰੋ. ਵਿਜਿਤਾਵੀਤਿ ਵਿਜਿਤਵਿਜਯੋ. ਜਮ੍ਬੁਸਣ੍ਡਸ੍ਸਾਤਿ ਜਮ੍ਬੁਦੀਪਸ੍ਸ, ਪਾਕਟੇਨ ਹਿ ਇਸ੍ਸਰਿਯਾਨਿ ਦਸ੍ਸੇਨ੍ਤੋ ਏਵਮਾਹ. ਚਕ੍ਕਵਤ੍ਤੀ ਪਨ ਸਪਰਿਤ੍ਤਦੀਪਾਨਂ ਚਤੁਨ੍ਨਮ੍ਪਿ ਮਹਾਦੀਪਾਨਂ ਇਸ੍ਸਰੋਵ.

ਖਤ੍ਤਿਯਾਤਿ ਜਾਤਿਖਤ੍ਤਿਯਾ. ਭੋਗੀਤਿ ਭੋਗਿਯਾ. ਰਾਜਾਨੋਤਿ ਯੇ ਕੇਚਿ ਰਜ੍ਜਂ ਕਾਰੇਨ੍ਤਾ. ਅਨੁਯਨ੍ਤਾਤਿ ਅਨੁਗਾਮਿਨੋ ਸੇਵਕਾ. ਰਾਜਾਭਿਰਾਜਾਤਿ ਰਾਜੂਨਂ ਪੂਜਨੀਯੋ ਰਾਜਾ ਹੁਤ੍ਵਾ, ਚਕ੍ਕਵਤ੍ਤੀਤਿ ਅਧਿਪ੍ਪਾਯੋ. ਮਨੁਜਿਨ੍ਦੋਤਿ ਮਨੁਸ੍ਸਾਧਿਪਤਿ, ਮਨੁਸ੍ਸਾਨਂ ਪਰਮਿਸ੍ਸਰੋਤਿ ਅਤ੍ਥੋ.

ਏਵਂ ਸੇਲੇਨ ਵੁਤ੍ਤੇ ਭਗਵਾ ‘‘ਯੇ ਤੇ ਭਵਨ੍ਤਿ ਅਰਹਨ੍ਤੋ ਸਮ੍ਮਾਸਮ੍ਬੁਦ੍ਧਾ, ਤੇ ਸਕੇ ਵਣ੍ਣੇ ਭਞ੍ਞਮਾਨੇ ਅਤ੍ਤਾਨਂ ਪਾਤੁਕਰੋਨ੍ਤੀ’’ਤਿ ਇਮਂ ਸੇਲਸ੍ਸ ਮਨੋਰਥਂ ਪੂਰੇਨ੍ਤੋ –

੮੨੪. ‘‘ਰਾਜਾਹਮਸ੍ਮਿ ਸੇਲ, (ਸੇਲਾਤਿ ਭਗਵਾ) ਧਮ੍ਮਰਾਜਾ ਅਨੁਤ੍ਤਰੋ;

ਧਮ੍ਮੇਨ ਚਕ੍ਕਂ ਵਤ੍ਤੇਮਿ, ਚਕ੍ਕਂ ਅਪ੍ਪਟਿਵਤ੍ਤਿਯ’’ਨ੍ਤਿ. – ਇਮਂ ਗਾਥਮਾਹ;

ਤਤ੍ਰਾਯਂ ਅਧਿਪ੍ਪਾਯੋ – ਯਂ ਮਂ ਤ੍ਵਂ, ਸੇਲ, ਯਾਚਸਿ, ‘‘ਰਾਜਾ ਅਰਹਸਿ ਭਵਿਤੁਂ ਚਕ੍ਕਵਤ੍ਤੀ’’ਤਿ, ਏਤ੍ਥ ਅਪ੍ਪੋਸ੍ਸੁਕ੍ਕੋ ਹੋਹਿ, ਰਾਜਾਹਮਸ੍ਮਿ, ਸਤਿ ਚ ਰਾਜਤ੍ਤੇ ਯਥਾ ਅਞ੍ਞੋ ਰਾਜਾ ਸਮਾਨੋਪਿ ਯੋਜਨਸਤਂ ਵਾ ਅਨੁਸਾਸਤਿ, ਦ੍ਵੇ ਤੀਣਿ ਚਤ੍ਤਾਰਿ ਪਞ੍ਚ ਯੋਜਨਸਤਾਨਿ ਵਾ ਯੋਜਨਸਹਸ੍ਸਂ ਵਾ ਚਕ੍ਕਵਤ੍ਤੀ ਹੁਤ੍ਵਾਪਿ ਚਤੁਦੀਪਪਰਿਯਨ੍ਤਮਤ੍ਤਂ ਵਾ, ਨਾਹਮੇਵਂ ਪਰਿਚ੍ਛਿਨ੍ਨਵਿਸਯੋ. ਅਹਞ੍ਹਿ ਧਮ੍ਮਰਾਜਾ ਅਨੁਤ੍ਤਰੋ ਭਵਗ੍ਗਤੋ ਅਵੀਚਿਪਰਿਯਨ੍ਤਂ ਕਤ੍ਵਾ ਤਿਰਿਯਂ ਅਪਰਿਮੇਯ੍ਯਲੋਕਧਾਤੁਯੋ ਅਨੁਸਾਸਾਮਿ. ਯਾਵਤਾ ਹਿ ਅਪਦਾਦਿਭੇਦਾ ਸਤ੍ਤਾ, ਅਹਂ ਤੇਸਂ ਅਗ੍ਗੋ. ਨ ਹਿ ਮੇ ਕੋਚਿ ਸੀਲੇਨ ਵਾ…ਪੇ… ਵਿਮੁਤ੍ਤਿਞਾਣਦਸ੍ਸਨੇਨ ਵਾ ਸਦਿਸੋ ਨਤ੍ਥਿ, ਕੁਤੋ ਭਿਯ੍ਯੋ. ਸ੍ਵਾਹਂ ਏਵਂ ਧਮ੍ਮਰਾਜਾ ਅਨੁਤ੍ਤਰੋ, ਅਨੁਤ੍ਤਰੇਨੇਵ ਚਤੁਸਤਿਪਟ੍ਠਾਨਾਦਿਭੇਦਬੋਧਿਪਕ੍ਖਿਯਸਙ੍ਖਾਤੇਨ ਧਮ੍ਮੇਨ ਚਕ੍ਕਂ ਵਤ੍ਤੇਮਿ, ‘‘ਇਦਂ ਪਜਹਥ, ਇਦਂ ਉਪਸਮ੍ਪਜ੍ਜ ਵਿਹਰਥਾ’’ਤਿਆਦਿਨਾ ਆਣਾਚਕ੍ਕਂ. ‘‘ਇਦਂ ਖੋ ਪਨ, ਭਿਕ੍ਖਵੇ, ਦੁਕ੍ਖਂ ਅਰਿਯਸਚ੍ਚ’’ਨ੍ਤਿਆਦਿਨਾ (ਮਹਾਵ. ੧੪; ਸਂ. ਨਿ. ੫.੧੦੮੧) ਪਰਿਯਤ੍ਤਿਧਮ੍ਮੇਨ ਧਮ੍ਮਚਕ੍ਕਮੇਵ ਵਾ. ਚਕ੍ਕਂ ਅਪ੍ਪਟਿਵਤ੍ਤਿਯਨ੍ਤਿ ਯਂ ਚਕ੍ਕਂ ਅਪ੍ਪਟਿਵਤ੍ਤਿਯਂ ਹੋਤਿ ਸਮਣੇਨ ਵਾ…ਪੇ… ਕੇਨਚਿ ਵਾ ਲੋਕਸ੍ਮਿਨ੍ਤਿ.

ਏਵਂ ਅਤ੍ਤਾਨਮਾਵਿਕਰੋਨ੍ਤਂ ਭਗਵਨ੍ਤਂ ਦਿਸ੍ਵਾ ਪੀਤਿਸੋਮਨਸ੍ਸਜਾਤੋ ਸੇਲੋ ਪੁਨ ਦਲ਼੍ਹੀਕਰਣਤ੍ਥਂ –

੮੨੫. ‘‘ਸਮ੍ਬੁਦ੍ਧੋ ਪਟਿਜਾਨਾਸਿ, (ਇਤਿ ਸੇਲੋ ਬ੍ਰਾਹ੍ਮਣੋ) ਧਮ੍ਮਰਾਜਾ ਅਨੁਤ੍ਤਰੋ;

ਧਮ੍ਮੇਨ ਚਕ੍ਕਂ ਵਤ੍ਤੇਮਿ, ਇਤਿ ਭਾਸਥ ਗੋਤਮ.

੮੨੬. ‘‘ਕੋ ਨੁ ਸੇਨਾਪਤਿ ਭੋਤੋ, ਸਾਵਕੋ ਸਤ੍ਥੁਰਨ੍ਵਯੋ;

ਕੋ ਤੇਤਮਨੁਵਤ੍ਤੇਤਿ, ਧਮ੍ਮਚਕ੍ਕਂ ਪਵਤ੍ਤਿਤ’’ਨ੍ਤਿ. – ਗਾਥਾਦ੍ਵਯਮਾਹ;

ਤਤ੍ਥ ਕੋ ਨੁ ਸੇਨਾਪਤੀਤਿ ਧਮ੍ਮਰਞ੍ਞੋ ਭੋਤੋ ਧਮ੍ਮੇਨ ਪਵਤ੍ਤਿਤਸ੍ਸ ਚਕ੍ਕਸ੍ਸ ਅਨੁਪਵਤ੍ਤਨਕੋ ਸੇਨਾਪਤਿ ਕੋ ਨੂਤਿ ਪੁਚ੍ਛਿ.

ਤੇਨ ਚ ਸਮਯੇਨ ਭਗਵਤੋ ਦਕ੍ਖਿਣਪਸ੍ਸੇ ਆਯਸ੍ਮਾ ਸਾਰਿਪੁਤ੍ਤੋ ਨਿਸਿਨ੍ਨੋ ਹੋਤਿ, ਸੁਵਣ੍ਣਪੁਞ੍ਜੋ ਵਿਯ ਸਿਰਿਯਾ ਸੋਭਮਾਨੋ. ਤਂ ਦਸ੍ਸੇਨ੍ਤੋ ਭਗਵਾ –

੮੨੭. ‘‘ਮਯਾ ਪਵਤ੍ਤਿਤਂ ਚਕ੍ਕਂ, (ਸੇਲਾਤਿ ਭਗਵਾ) ਧਮ੍ਮਚਕ੍ਕਂ ਅਨੁਤ੍ਤਰਂ;

ਸਾਰਿਪੁਤ੍ਤੋ ਅਨੁਵਤ੍ਤੇਤਿ, ਅਨੁਜਾਤੋ ਤਥਾਗਤ’’ਨ੍ਤਿ. – ਗਾਥਮਾਹ;

ਤਤ੍ਥ ਅਨੁਜਾਤੋ ਤਥਾਗਤਨ੍ਤਿ, ਤਥਾਗਤਂ ਅਨੁਜਾਤੋ, ਤਥਾ ਗਤੇਨ ਹੇਤੁਨਾ ਅਰਿਯਾਯ ਜਾਤਿਯਾ ਜਾਤੋਤਿ ਅਤ੍ਥੋ.

ਏਵਂ ‘‘ਕੋ ਨੁ ਸੇਨਾਪਤਿ ਭੋਤੋ’’ਤਿ ਸੇਲੇਨ ਵੁਤ੍ਤਪਞ੍ਹਂ ਬ੍ਯਾਕਰਿਤ੍ਵਾ ਯਂ ਸੇਲੋ ਆਹ ‘‘ਸਮ੍ਬੁਦ੍ਧੋ ਪਟਿਜਾਨਾਸੀ’’ਤਿ ਤਤ੍ਥ ਨਂ ਨਿਕ੍ਕਙ੍ਖਂ ਕਾਤੁਕਾਮੋ ‘‘ਨਾਹਂ ਪਟਿਞ੍ਞਾਮਤ੍ਤੇਨੇਵ ਪਟਿਜਾਨਾਮਿ, ਅਪਿ ਚਾਹਂ ਇਮਿਨਾ ਕਾਰਣੇਨ ਬੁਦ੍ਧੋ’’ਤਿ ਞਾਪੇਤੁਂ –

੮੨੮. ‘‘ਅਭਿਞ੍ਞੇਯ੍ਯਂ ਅਭਿਞ੍ਞਾਤਂ, ਭਾਵੇਤਬ੍ਬਞ੍ਚ ਭਾਵਿਤਂ;

ਪਹਾਤਬ੍ਬਂ ਪਹੀਨਂ ਮੇ, ਤਸ੍ਮਾ ਬੁਦ੍ਧੋਸ੍ਮਿ ਬ੍ਰਾਹ੍ਮਣਾ’’ਤਿ. – ਗਾਥਮਾਹ;

ਤਤ੍ਥ ਅਭਿਞ੍ਞੇਯ੍ਯਨ੍ਤਿ ਚਤ੍ਤਾਰਿ ਸਚ੍ਚਾਨਿ ਚਤ੍ਤਾਰਿ ਅਰਿਯਸਚ੍ਚਾਨਿ. ਚਤੁਨ੍ਨਞ੍ਹਿ ਸਚ੍ਚਾਨਂ ਅਰਿਯਸਚ੍ਚਾਨਞ੍ਚ ਸਾਮਞ੍ਞਗ੍ਗਹਣਮੇਤਂ ਯਦਿਦਂ ਅਭਿਞ੍ਞੇਯ੍ਯਨ੍ਤਿ. ਤਤ੍ਥ ਅਰਿਯਸਚ੍ਚੇਸੁ ਯਂ ਭਾਵੇਤਬ੍ਬਂ ਮਗ੍ਗਸਚ੍ਚਂ, ਯਞ੍ਚ ਪਹਾਤਬ੍ਬਂ ਸਮੁਦਯਸਚ੍ਚਂ, ਤਦੁਭਯਗ੍ਗਹਣੇਨ ਤੇਸਂ ਫਲਭੂਤਾਨਿ ਨਿਰੋਧਸਚ੍ਚਦੁਕ੍ਖਸਚ੍ਚਾਨਿਪਿ ਗਹਿਤਾਨੇਵ ਹੋਨ੍ਤਿ ਹੇਤੁਗ੍ਗਹਣੇਨੇਵ ਫਲਸਿਦ੍ਧਿਤੋ. ਤੇਨ ਤਤ੍ਥ ‘‘ਸਚ੍ਛਿਕਾਤਬ੍ਬਂ ਸਚ੍ਛਿਕਤਂ, ਪਰਿਞ੍ਞੇਯ੍ਯਂ ਪਰਿਞ੍ਞਾਤ’’ਨ੍ਤਿ ਇਦਮ੍ਪਿ ਵੁਤ੍ਤਮੇਵ ਹੋਤਿ. ‘‘ਅਭਿਞ੍ਞੇਯ੍ਯਂ ਅਭਿਞ੍ਞਾਤ’’ਨ੍ਤਿ ਵਾ ਇਮਿਨਾ ਚ ਸਬ੍ਬਸ੍ਸਪਿ ਞੇਯ੍ਯਸ੍ਸ ਅਭਿਞ੍ਞਾਤਸਮ੍ਬੁਦ੍ਧਭਾਵਂ ਉਦ੍ਦੇਸਵਸੇਨ ਪਕਾਸੇਤ੍ਵਾ ਤਦੇਕਦੇਸਂ ਨਿਦ੍ਦੇਸਵਸੇਨ ਦਸ੍ਸੇਨ੍ਤੋ ‘‘ਭਾਵੇਤਬ੍ਬਞ੍ਚ ਭਾਵਿਤ’’ਨ੍ਤਿਆਦਿਮਾਹ. ਅਥ ਵਾ ‘‘ਭਾਵੇਤਬ੍ਬਂ ਭਾਵਿਤਂ, ਪਹਾਤਬ੍ਬਂ ਪਹੀਨ’’ਨ੍ਤਿ ਇਮਿਨਾ ਅਤ੍ਤਨੋ ਞਾਣਪਹਾਨਸਮ੍ਪਦਾਕਿਤ੍ਤਨਮੁਖੇਨ ਤਂਮੂਲਕਤ੍ਤਾ ਸਬ੍ਬੇਪਿ ਬੁਦ੍ਧਗੁਣਾ ਕਿਤ੍ਤਿਤਾ ਹੋਨ੍ਤੀਤਿ ਆਹ ‘‘ਤਸ੍ਮਾ ਬੁਦ੍ਧੋਸ੍ਮਿ, ਬ੍ਰਾਹ੍ਮਣਾ’’ਤਿ. ਅਭਿਞ੍ਞੇਯ੍ਯਅਭਿਞ੍ਞਾਤਗ੍ਗਹਣੇਨ ਹਿ ਸਬ੍ਬਸੋ ਵਿਜ੍ਜਾਵਿਮੁਤ੍ਤੀਨਂ ਗਹਿਤਤ੍ਤਾ ਸਫਲਂ ਚਤੁਸਚ੍ਚਭਾਵਂ ਸਦ੍ਧਿਂ ਹੇਤੁਸਮ੍ਪਤ੍ਤਿਯਾ ਦਸ੍ਸੇਨ੍ਤੋ ਬੁਜ੍ਝਿਤਬ੍ਬਂ ਸਬ੍ਬਂ ਬੁਜ੍ਝਿਤ੍ਵਾ ਬੁਦ੍ਧੋ ਜਾਤੋਸ੍ਮੀਤਿ ਞਾਯੇਨ ਹੇਤੁਨਾ ਅਤ੍ਤਨੋ ਬੁਦ੍ਧਭਾਵਂ ਵਿਭਾਵੇਤਿ.

ਏਵਂ ਨਿਪ੍ਪਰਿਯਾਯੇਨ ਅਤ੍ਤਾਨਂ ਪਾਤੁਕਰਿਤ੍ਵਾ ਅਤ੍ਤਨਿ ਕਙ੍ਖਾਵਿਤਰਣਤ੍ਥਂ ਬ੍ਰਾਹ੍ਮਣਂ ਉਸ੍ਸਾਹੇਨ੍ਤੋ –

੮੨੯. ‘‘ਵਿਨਯਸ੍ਸੁ ਮਯਿ ਕਙ੍ਖਂ, ਅਧਿਮੁਚ੍ਚਸ੍ਸੁ ਬ੍ਰਾਹ੍ਮਣ;

ਦੁਲ੍ਲਭਂ ਦਸ੍ਸਨਂ ਹੋਤਿ, ਸਮ੍ਬੁਦ੍ਧਾਨਂ ਅਭਿਣ੍ਹਸੋ.

੮੩੦. ‘‘ਯੇਸਂ ਵੇ ਦੁਲ੍ਲਭੋ ਲੋਕੇ, ਪਾਤੁਭਾਵੋ ਅਭਿਣ੍ਹਸੋ;

ਸੋਹਂ ਬ੍ਰਾਹ੍ਮਣ ਬੁਦ੍ਧੋਸ੍ਮਿ, ਸਲ੍ਲਕਤ੍ਤੋ ਅਨੁਤ੍ਤਰੋ.

੮੩੧. ‘‘ਬ੍ਰਹ੍ਮਭੂਤੋ ਅਤਿਤੁਲੋ, ਮਾਰਸੇਨਪ੍ਪਮਦ੍ਦਨੋ;

ਸਬ੍ਬਾਮਿਤ੍ਤੇ ਵਸੇ ਕਤ੍ਵਾ, ਮੋਦਾਮਿ ਅਕੁਤੋਭਯੋ’’ਤਿ. – ਗਾਥਤ੍ਤਯਮਾਹ;

ਤਤ੍ਥ ਵਿਨਯਸ੍ਸੂਤਿ ਵਿਨੇਹਿ ਛਿਨ੍ਦ. ਕਙ੍ਖਨ੍ਤਿ ਵਿਚਿਕਿਚ੍ਛਂ. ਅਧਿਮੁਚ੍ਚਸ੍ਸੂਤਿ ਅਧਿਮੋਕ੍ਖਂ ਕਰ ‘‘ਸਮ੍ਮਾਸਮ੍ਬੁਦ੍ਧੋ’’ਤਿ ਸਦ੍ਦਹ. ਦੁਲ੍ਲਭਂ ਦਸ੍ਸਨਂ ਹੋਤਿ, ਸਮ੍ਬੁਦ੍ਧਾਨਨ੍ਤਿ ਯਤੋ ਕਪ੍ਪਾਨਂ ਅਸਙ੍ਖ੍ਯੇਯ੍ਯਮ੍ਪਿ ਬੁਦ੍ਧਸੁਞ੍ਞੋ ਲੋਕੋ ਹੋਤਿ. ਸਲ੍ਲਕਤ੍ਤੋਤਿ, ਰਾਗਾਦਿਸਲ੍ਲਕਤ੍ਤਨੋ. ਬ੍ਰਹ੍ਮਭੂਤੋਤਿ ਸੇਟ੍ਠਭੂਤੋ. ਅਤਿਤੁਲੋਤਿ ਤੁਲਂ ਅਤੀਤੋ, ਨਿਰੁਪਮੋਤਿ ਅਤ੍ਥੋ. ਮਾਰਸੇਨਪ੍ਪਮਦ੍ਦਨੋਤਿ ‘‘ਕਾਮਾ ਤੇ ਪਠਮਾ ਸੇਨਾ’’ਤਿ (ਸੁ. ਨਿ. ੪੩੮; ਮਹਾਨਿ. ੨੮; ਚੂਲ਼ਨਿ. ਨਨ੍ਦਮਾਣਵਪੁਚ੍ਛਾਨਿਦ੍ਦੇਸ ੪੭) ਏਵਂ ਆਗਤਾਯ ਮਾਰਸੇਨਾਯ ਪਮਦ੍ਦਨੋ. ਸਬ੍ਬਾਮਿਤ੍ਤੇਤਿ ਖਨ੍ਧਕਿਲੇਸਾਭਿਸਙ੍ਖਾਰਮਚ੍ਚੁਦੇਵਪੁਤ੍ਤਮਾਰਸਙ੍ਖਾਤੇ ਸਬ੍ਬਪਚ੍ਚਤ੍ਥਿਕੇ. ਵਸੇ ਕਤ੍ਵਾਤਿ ਅਤ੍ਤਨੋ ਵਸੇ ਕਤ੍ਵਾ. ਮੋਦਾਮਿ ਅਕੁਤੋਭਯੋਤਿ ਕੁਤੋਚਿ ਨਿਬ੍ਭਯੋ ਸਮਾਧਿਸੁਖੇਨ, ਫਲਨਿਬ੍ਬਾਨਸੁਖੇਨ ਚ ਮੋਦਾਮਿ.

ਏਵਂ ਵੁਤ੍ਤੇ ਸੇਲੋ ਬ੍ਰਾਹ੍ਮਣੋ ਤਾਵਦੇਵ ਭਗਵਤਿ ਸਞ੍ਜਾਤਪਸਾਦੋ ਪਬ੍ਬਜ੍ਜਾਪੇਕ੍ਖੋ ਹੁਤ੍ਵਾ –

੮੩੨. ‘‘ਇਦਂ ਭੋਨ੍ਤੋ ਨਿਸਾਮੇਥ, ਯਥਾ ਭਾਸਤਿ ਚਕ੍ਖੁਮਾ;

ਸਲ੍ਲਕਤ੍ਤੋ ਮਹਾਵੀਰੋ, ਸੀਹੋਵ ਨਦਤੀ ਵਨੇ.

੮੩੩. ‘‘ਬ੍ਰਹ੍ਮਭੂਤਂ ਅਤਿਤੁਲਂ, ਮਾਰਸੇਨਪ੍ਪਮਦ੍ਦਨਂ;

ਕੋ ਦਿਸ੍ਵਾ ਨਪ੍ਪਸੀਦੇਯ੍ਯ, ਅਪਿ ਕਣ੍ਹਾਭਿਜਾਤਿਕੋ.

੮੩੪. ‘‘ਯੋ ਮਂ ਇਚ੍ਛਤਿ ਅਨ੍ਵੇਤੁ, ਯੋ ਵਾ ਨਿਚ੍ਛਤਿ ਗਚ੍ਛਤੁ;

ਇਧਾਹਂ ਪਬ੍ਬਜਿਸ੍ਸਾਮਿ, ਵਰਪਞ੍ਞਸ੍ਸ ਸਨ੍ਤਿਕੇ’’ਤਿ. –

ਗਾਥਤ੍ਤਯਮਾਹ. ਯਥਾ ਤਂ ਪਰਿਪਾਕਗਤਾਯ ਉਪਨਿਸ੍ਸਯਸਮ੍ਪਤ੍ਤਿਯਾ ਚੋਦਿਯਮਾਨੋ.

ਤਤ੍ਥ ਕਣ੍ਹਾਭਿਜਾਤਿਕੋਤਿ, ਨੀਚਜਾਤਿਕੋ, ਤਮੋਤਮਪਰਾਯਣਭਾਵੇ ਠਿਤੋ.

ਤਤੋ ਤੇਪਿ ਮਾਣਵਕਾ ਹੇਤੁਸਮ੍ਪਨ੍ਨਤਾਯ ਤਤ੍ਥੇਵ ਪਬ੍ਬਜ੍ਜਾਪੇਕ੍ਖਾ ਹੁਤ੍ਵਾ –

੮੩੫. ‘‘ਏਤਂ ਚੇ ਰੁਚ੍ਚਤਿ ਭੋਤੋ, ਸਮ੍ਮਾਸਮ੍ਬੁਦ੍ਧਸਾਸਨਂ;

ਮਯਮ੍ਪਿ ਪਬ੍ਬਜਿਸ੍ਸਾਮ, ਵਰਪਞ੍ਞਸ੍ਸ ਸਨ੍ਤਿਕੇ’’ਤਿ. –

ਗਾਥਮਾਹਂਸੁ, ਯਥਾ ਤਂ ਤੇਨ ਸਦ੍ਧਿਂ ਕਤਾਧਿਕਾਰਾ ਕੁਲਪੁਤ੍ਤਾ.

ਅਥ ਸੇਲੋ ਤੇਸੁ ਮਾਣਵਕੇਸੁ ਤੁਟ੍ਠਚਿਤ੍ਤੋ ਤੇ ਦਸ੍ਸੇਨ੍ਤੋ ਪਬ੍ਬਜ੍ਜਞ੍ਚ ਯਾਚਮਾਨੋ –

੮੩੬. ‘‘ਬ੍ਰਾਹ੍ਮਣਾ ਤਿਸਤਾ ਇਮੇ, ਯਾਚਨ੍ਤਿ ਪਞ੍ਜਲੀਕਤਾ;

ਬ੍ਰਹ੍ਮਚਰਿਯਂ ਚਰਿਸ੍ਸਾਮ, ਭਗਵਾ ਤਵ ਸਨ੍ਤਿਕੇ’’ਤਿ. – ਗਾਥਮਾਹ;

ਤਤੋ ਭਗਵਾ ਯਸ੍ਮਾ ਸੇਲੋ ਹੇਟ੍ਠਾ ਵੁਤ੍ਤਨਯੇਨ ਪਦੁਮੁਤ੍ਤਰਸ੍ਸ ਭਗਵਤੋ ਕਾਲੇ ਤੇਸਂਯੇਵ ਤਿਣ੍ਣਂ ਪੁਰਿਸਸਤਾਨਂ ਗਣਜੇਟ੍ਠੋ ਹੁਤ੍ਵਾ ਰੋਪਿਤਕੁਸਲਮੂਲੋ, ਇਦਾਨਿ ਪਚ੍ਛਿਮਭਵੇਪਿ ਤੇਸਂਯੇਵ ਆਚਰਿਯੋ ਹੁਤ੍ਵਾ ਨਿਬ੍ਬਤ੍ਤੋ, ਞਾਣਞ੍ਚਸ੍ਸ ਤੇਸਞ੍ਚ ਪਰਿਪਕ੍ਕਂ, ਏਹਿਭਿਕ੍ਖੁਭਾਵਸ੍ਸ ਚ ਉਪਨਿਸ੍ਸਯੋ ਅਤ੍ਥਿ, ਤਸ੍ਮਾ ਤੇ ਸਬ੍ਬੇਵ ਏਹਿਭਿਕ੍ਖੁਭਾਵੇਨ ਪਬ੍ਬਜ੍ਜਾਯ ਪਬ੍ਬਾਜੇਨ੍ਤੋ –

੮੩੭. ‘‘ਸ੍ਵਾਖਾਤਂ ਬ੍ਰਹ੍ਮਚਰਿਯਂ, (ਸੇਲਾਤਿ ਭਗਵਾ) ਸਨ੍ਦਿਟ੍ਠਿਕਮਕਾਲਿਕਂ;

ਯਤ੍ਥ ਅਮੋਘਾ ਪਬ੍ਬਜ੍ਜਾ, ਅਪ੍ਪਮਤ੍ਤਸ੍ਸ ਸਿਕ੍ਖਤੋ’’ਤਿ. – ਗਾਥਮਾਹ;

ਤਤ੍ਥ ਸਨ੍ਦਿਟ੍ਠਿਕਨ੍ਤਿ ਪਚ੍ਚਕ੍ਖਂ. ਅਕਾਲਿਕਨ੍ਤਿ ਮਗ੍ਗਾਨਨ੍ਤਰਫਲੁਪ੍ਪਤ੍ਤਿਤੋ ਨ ਕਾਲਨ੍ਤਰੇ ਪਤ੍ਤਬ੍ਬਫਲਂ. ਯਤ੍ਥਾਤਿ ਯਂਨਿਮਿਤ੍ਤਾ. ਮਗ੍ਗਬ੍ਰਹ੍ਮਚਰਿਯਨਿਮਿਤ੍ਤਾ ਹਿ ਪਬ੍ਬਜ੍ਜਾ ਅਮੋਘਾ ਅਨਿਪ੍ਫਲਾ, ਯਤ੍ਥਾਤਿ ਵਾ ਯਸ੍ਮਿਂ ਸਾਸਨੇ ਅਪ੍ਪਮਤ੍ਤਸ੍ਸ ਸਤਿਵਿਪ੍ਪਵਾਸਰਹਿਤਸ੍ਸ ਤੀਸੁ ਸਿਕ੍ਖਾਸੁ ਸਿਕ੍ਖਤੋ.

ਏਵਞ੍ਚ ਵਤ੍ਵਾ ‘‘ਏਥ, ਭਿਕ੍ਖਵੋ’’ਤਿ ਭਗਵਾ ਅਵੋਚ. ਤਾਵਦੇਵ ਤੇ ਸਬ੍ਬੇ ਇਦ੍ਧਿਮਯਪਤ੍ਤਚੀਵਰਧਰਾ ਹੁਤ੍ਵਾ ਸਟ੍ਠਿਵਸ੍ਸਿਕਤ੍ਥੇਰਾ ਵਿਯ ਭਗਵਨ੍ਤਂ ਅਭਿਵਾਦੇਤ੍ਵਾ ਪਰਿਵਾਰੇਸੁਂ. ਸੋ ਏਵਂ ਪਬ੍ਬਜਿਤ੍ਵਾ ਵਿਪਸ੍ਸਨਾਯ ਕਮ੍ਮਂ ਕਰੋਨ੍ਤੋ ਸਤ੍ਤਮੇ ਦਿਵਸੇ ਸਪਰਿਸੋ ਅਰਹਤ੍ਤਂ ਪਾਪੁਣਿ. ਤੇਨ ਵੁਤ੍ਤਂ ਅਪਦਾਨੇ (ਅਪ. ਥੇਰ ੧.੪੦.੨੦੮-੩੦੩) –

‘‘ਨਗਰੇ ਹਂਸਵਤਿਯਾ, ਵੀਥਿਸਾਮੀ ਅਹੋਸਹਂ;

ਮਮ ਞਾਤੀ ਸਮਾਨੇਤ੍ਵਾ, ਇਦਂ ਵਚਨਮਬ੍ਰਵਿਂ.

‘‘ਬੁਦ੍ਧੋ ਲੋਕੇ ਸਮੁਪ੍ਪਨ੍ਨੋ, ਪੁਞ੍ਞਕ੍ਖੇਤ੍ਤੋ ਅਨੁਤ੍ਤਰੋ;

ਆਸਿ ਸੋ ਸਬ੍ਬਲੋਕਸ੍ਸ, ਆਹੁਤੀਨਂ ਪਟਿਗ੍ਗਹੋ.

‘‘ਖਤ੍ਤਿਯਾ ਨੇਗਮਾ ਚੇਵ, ਮਹਾਸਾਲਾ ਚ ਬ੍ਰਾਹ੍ਮਣਾ;