੩. ਤੇਲਕਾਨਿਤ੍ਥੇਰਗਾਥਾਵਣ੍ਣਨਾ

ਚਿਰਰਤ੍ਤਂ ਵਤਾਤਾਪੀਤਿਆਦਿਕਾ ਆਯਸ੍ਮਤੋ ਤੇਲਕਾਨਿਤ੍ਥੇਰਸ੍ਸ ਗਾਥਾ. ਕਾ ਉਪ੍ਪਤ੍ਤਿ? ਅਯਮ੍ਪਿ ਪੁਰਿਮਬੁਦ੍ਧੇਸੁ ਕਤਾਧਿਕਾਰੋ ਤਤ੍ਥ ਤਤ੍ਥ ਭਵੇ ਵਿਵਟ੍ਟੂਪਨਿਸ੍ਸਯਂ ਕੁਸਲਂ ਉਪਚਿਨਿਤ੍ਵਾ ਇਮਸ੍ਮਿਂ ਬੁਦ੍ਧੁਪ੍ਪਾਦੇ ਸਤ੍ਥੁ ਅਭਿਜਾਤਿਤੋ ਪੁਰੇਤਰਂਯੇਵ ਸਾਵਤ੍ਥਿਯਂ ਅਞ੍ਞਤਰਸ੍ਮਿਂ ਬ੍ਰਾਹ੍ਮਣਕੁਲੇ ਨਿਬ੍ਬਤ੍ਤਿਤ੍ਵਾ ਤੇਲਕਾਨੀਤਿ ਲਦ੍ਧਨਾਮੋ ਵਯਪ੍ਪਤ੍ਤੋ ਹੇਤੁਸਮ੍ਪਨ੍ਨਤਾਯ ਕਾਮੇ ਜਿਗੁਚ੍ਛਨ੍ਤੋ ਘਰਾਵਾਸਂ ਪਹਾਯ ਪਰਿਬ੍ਬਾਜਕਪਬ੍ਬਜ੍ਜਂ ਪਬ੍ਬਜਿਤ੍ਵਾ ਵਿਵਟ੍ਟਜ੍ਝਾਸਯੋ ‘‘ਕੋ ਸੋ ਪਾਰਙ੍ਗਤੋ ਲੋਕੇ’’ਤਿਆਦਿਨਾ ਵਿਮੋਕ੍ਖਪਰਿਯੇਸਨਂ ਚਰਮਾਨੋ ਤੇ ਤੇ ਸਮਣਬ੍ਰਾਹ੍ਮਣੇ ਉਪਸਙ੍ਕਮਿਤ੍ਵਾ ਪਞ੍ਹਂ ਪੁਚ੍ਛਤਿ, ਤੇ ਨ ਸਮ੍ਪਾਯਨ੍ਤਿ. ਸੋ ਤੇਨ ਅਨਾਰਾਧਿਤਚਿਤ੍ਤੋ ਵਿਚਰਤਿ. ਅਥ ਅਮ੍ਹਾਕਂ ਭਗਵਤਿ ਲੋਕੇ ਉਪ੍ਪਜ੍ਜਿਤ੍ਵਾ ਪਵਤ੍ਤਿਤਵਰਧਮ੍ਮਚਕ੍ਕੇ ਲੋਕਹਿਤਂ ਕਰੋਨ੍ਤੇ ਏਕਦਿਵਸਂ ਸਤ੍ਥਾਰਂ ਉਪਸਙ੍ਕਮਿਤ੍ਵਾ ਧਮ੍ਮਂ ਸੁਤ੍ਵਾ ਪਟਿਲਦ੍ਧਸਦ੍ਧੋ ਪਬ੍ਬਜਿਤ੍ਵਾ ਵਿਪਸ੍ਸਨਾਯ ਕਮ੍ਮਂ ਕਰੋਨ੍ਤੋ ਨਚਿਰਸ੍ਸੇਵ ਅਰਹਤ੍ਤੇ ਪਤਿਟ੍ਠਾਤਿ. ਸੋ ਏਕਦਿਵਸਂ ਭਿਕ੍ਖੂਹਿ ਸਦ੍ਧਿਂ ਨਿਸਿਨ੍ਨੋ ਅਤ੍ਤਨਾ ਅਧਿਗਤਵਿਸੇਸਂ ਪਚ੍ਚਵੇਕ੍ਖਿਤ੍ਵਾ ਤਦਨੁਸਾਰੇਨ ਅਤ੍ਤਨੋ ਪਟਿਪਤ੍ਤਿਂ ਅਨੁਸ੍ਸਰਿਤ੍ਵਾ ਤਂ ਸਬ੍ਬਂ ਭਿਕ੍ਖੂਨਂ ਆਚਿਕ੍ਖਨ੍ਤੋ –

੭੪੭. ‘‘ਚਿਰਰਤ੍ਤਂ ਵਤਾਤਾਪੀ, ਧਮ੍ਮਂ ਅਨੁਵਿਚਿਨ੍ਤਯਂ;

ਸਮਂ ਚਿਤ੍ਤਸ੍ਸ ਨਾਲਤ੍ਥਂ, ਪੁਚ੍ਛਂ ਸਮਣਬ੍ਰਾਹ੍ਮਣੇ.

੭੪੮. ‘‘ਕੋ ਸੋ ਪਾਰਙ੍ਗਤੋ ਲੋਕੇ, ਕੋ ਪਤ੍ਤੋ ਅਮਤੋਗਧਂ;

ਕਸ੍ਸ ਧਮ੍ਮਂ ਪਟਿਚ੍ਛਾਮਿ, ਪਰਮਤ੍ਥਵਿਜਾਨਨਂ.

੭੪੯. ‘‘ਅਨ੍ਤੋਵਙ੍ਕਗਤੋ ਆਸਿ, ਮਚ੍ਛੋਵ ਘਸਮਾਮਿਸਂ;

ਬਦ੍ਧੋ ਮਹਿਨ੍ਦਪਾਸੇਨ, ਵੇਪਚਿਤ੍ਯਸੁਰੋ ਯਥਾ.

੭੫੦. ‘‘ਅਞ੍ਛਾਮਿ ਨਂ ਨ ਮੁਞ੍ਚਾਮਿ, ਅਸ੍ਮਾ ਸੋਕਪਰਿਦ੍ਦਵਾ;

ਕੋ ਮੇ ਬਨ੍ਧਂ ਮੁਞ੍ਚਂ ਲੋਕੇ, ਸਮ੍ਬੋਧਿਂ ਵੇਦਯਿਸ੍ਸਤਿ.

੭੫੧. ‘‘ਸਮਣਂ ਬ੍ਰਾਹ੍ਮਣਂ ਵਾ ਕਂ, ਆਦਿਸਨ੍ਤਂ ਪਭਙ੍ਗੁਨਂ;

ਕਸ੍ਸ ਧਮ੍ਮਂ ਪਟਿਚ੍ਛਾਮਿ, ਜਰਾਮਚ੍ਚੁਪਵਾਹਨਂ.

੭੫੨. ‘‘ਵਿਚਿਕਿਚ੍ਛਾਕਙ੍ਖਾਗਨ੍ਥਿਤਂ, ਸਾਰਮ੍ਭਬਲਸਞ੍ਞੁਤਂ;

ਕੋਧਪ੍ਪਤ੍ਤਮਨਤ੍ਥਦ੍ਧਂ, ਅਭਿਜਪ੍ਪਪ੍ਪਦਾਰਣਂ.

੭੫੩. ‘‘ਤਣ੍ਹਾਧਨੁਸਮੁਟ੍ਠਾਨਂ, ਦ੍ਵੇ ਚ ਪਨ੍ਨਰਸਾਯੁਤਂ;

ਪਸ੍ਸ ਓਰਸਿਕਂ ਬਾਲ਼੍ਹਂ, ਭੇਤ੍ਵਾਨ ਯਦਿ ਤਿਟ੍ਠਤਿ.

੭੫੪. ‘‘ਅਨੁਦਿਟ੍ਠੀਨਂ ਅਪ੍ਪਹਾਨਂ, ਸਙ੍ਕਪ੍ਪਪਰਤੇਜਿਤਂ;

ਤੇਨ ਵਿਦ੍ਧੋ ਪਵੇਧਾਮਿ, ਪਤ੍ਤਂਵ ਮਾਲੁਤੇਰਿਤਂ.

੭੫੫. ‘‘ਅਜ੍ਝਤ੍ਤਂ ਮੇ ਸਮੁਟ੍ਠਾਯ, ਖਿਪ੍ਪਂ ਪਚ੍ਚਤਿ ਮਾਮਕਂ;

ਛਫਸ੍ਸਾਯਤਨੀ ਕਾਯੋ, ਯਤ੍ਥ ਸਰਤਿ ਸਬ੍ਬਦਾ.

੭੫੬. ‘‘ਤਂ ਨ ਪਸ੍ਸਾਮਿ ਤੇਕਿਚ੍ਛਂ, ਯੋ ਮੇਤਂ ਸਲ੍ਲਮੁਦ੍ਧਰੇ;

ਨਾਨਾਰਜ੍ਜੇਨ ਸਤ੍ਥੇਨ, ਨਾਞ੍ਞੇਨ ਵਿਚਿਕਿਚ੍ਛਿਤਂ.

੭੫੭. ‘‘ਕੋ ਮੇ ਅਸਤ੍ਥੋ ਅਵਣੋ, ਸਲ੍ਲਮਬ੍ਭਨ੍ਤਰਪਸ੍ਸਯਂ;

ਅਹਿਂਸਂ ਸਬ੍ਬਗਤ੍ਤਾਨਿ, ਸਲ੍ਲਂ ਮੇ ਉਦ੍ਧਰਿਸ੍ਸਤਿ.

੭੫੮. ‘‘ਧਮ੍ਮਪ੍ਪਤਿ ਹਿ ਸੋ ਸੇਟ੍ਠੋ, ਵਿਸਦੋਸਪ੍ਪਵਾਹਕੋ;

ਗਮ੍ਭੀਰੇ ਪਤਿਤਸ੍ਸ ਮੇ, ਥਲਂ ਪਾਣਿਞ੍ਚ ਦਸ੍ਸਯੇ.

੭੫੯. ‘‘ਰਹਦੇਹਮਸ੍ਮਿ ਓਗਾਲ਼੍ਹੋ, ਅਹਾਰਿਯਰਜਮਤ੍ਤਿਕੇ;

ਮਾਯਾਉਸੂਯਸਾਰਮ੍ਭ, ਥਿਨਮਿਦ੍ਧਮਪਤ੍ਥਟੇ.

੭੬੦. ‘‘ਉਦ੍ਧਚ੍ਚਮੇਘਥਨਿਤਂ, ਸਂਯੋਜਨਵਲਾਹਕਂ;

ਵਾਹਾ ਵਹਨ੍ਤਿ ਕੁਦ੍ਦਿਟ੍ਠਿਂ, ਸਙ੍ਕਪ੍ਪਾ ਰਾਗਨਿਸ੍ਸਿਤਾ.

੭੬੧. ‘‘ਸਵਨ੍ਤਿ ਸਬ੍ਬਧਿ ਸੋਤਾ, ਲਤਾ ਉਬ੍ਭਿਜ੍ਜ ਤਿਟ੍ਠਤਿ;

ਤੇ ਸੋਤੇ ਕੋ ਨਿਵਾਰੇਯ੍ਯ, ਤਂ ਲਤਂ ਕੋ ਹਿ ਛੇਚ੍ਛਤਿ.

੭੬੨. ‘‘ਵੇਲਂ ਕਰੋਥ ਭਦ੍ਦਨ੍ਤੇ, ਸੋਤਾਨਂ ਸਨ੍ਨਿਵਾਰਣਂ;

ਮਾ ਤੇ ਮਨੋਮਯੋ ਸੋਤਾ, ਰੁਕ੍ਖਂਵ ਸਹਸਾ ਲੁਵੇ.

੭੬੩. ‘‘ਏਵਂ ਮੇ ਭਯਜਾਤਸ੍ਸ, ਅਪਾਰਾ ਪਾਰਮੇਸਤੋ;

ਤਾਣੋ ਪਞ੍ਞਾਵੁਧੋ ਸਤ੍ਥਾ, ਇਸਿਸਙ੍ਘਨਿਸੇਵਿਤੋ.

੭੬੪. ‘‘ਸੋਪਾਨਂ ਸੁਗਤਂ ਸੁਦ੍ਧਂ, ਧਮ੍ਮਸਾਰਮਯਂ ਦਲ਼੍ਹਂ;

ਪਾਦਾਸਿ ਵੁਯ੍ਹਮਾਨਸ੍ਸ, ਮਾ ਭਾਯੀਤਿ ਚ ਮਬ੍ਰਵਿ.

੭੬੫. ‘‘ਸਤਿਪਟ੍ਠਾਨਪਾਸਾਦਂ, ਆਰੁਯ੍ਹ ਪਚ੍ਚਵੇਕ੍ਖਿਸਂ;

ਯਂ ਤਂ ਪੁਬ੍ਬੇ ਅਮਞ੍ਞਿਸ੍ਸਂ, ਸਕ੍ਕਾਯਾਭਿਰਤਂ ਪਜਂ.

੭੬੬. ‘‘ਯਦਾ ਚ ਮਗ੍ਗਮਦ੍ਦਕ੍ਖਿਂ, ਨਾਵਾਯ ਅਭਿਰੂਹਨਂ;

ਅਨਧਿਟ੍ਠਾਯ ਅਤ੍ਤਾਨਂ, ਤਿਤ੍ਥਮਦ੍ਦਕ੍ਖਿਮੁਤ੍ਤਮਂ.

੭੬੭. ‘‘ਸਲ੍ਲਂ ਅਤ੍ਤਸਮੁਟ੍ਠਾਨਂ, ਭਵਨੇਤ੍ਤਿਪ੍ਪਭਾਵਿਤਂ;

ਏਤੇਸਂ ਅਪ੍ਪਵਤ੍ਤਾਯ, ਦੇਸੇਸਿ ਮਗ੍ਗਮੁਤ੍ਤਮਂ.

੭੬੮. ‘‘ਦੀਘਰਤ੍ਤਾਨੁਸਯਿਤਂ, ਚਿਰਰਤ੍ਤਮਧਿਟ੍ਠਿਤਂ;

ਬੁਦ੍ਧੋ ਮੇਪਾਨੁਦੀ ਗਨ੍ਥਂ, ਵਿਸਦੋਸਪ੍ਪਵਾਹਨੋ’’ਤਿ. – ਇਮਾ ਗਾਥਾ ਅਭਾਸਿ;

ਤਤ੍ਥ ਚਿਰਰਤ੍ਤਂ ਵਤਾਤਿ ਚਿਰਕਾਲਂ ਵਤ. ਆਤਾਪੀਤਿ ਵੀਰਿਯਵਾ ਵਿਮੋਕ੍ਖਧਮ੍ਮਪਰਿਯੇਸਨੇ ਆਰਦ੍ਧਵੀਰਿਯੋ. ਧਮ੍ਮਂ ਅਨੁਵਿਚਿਨ੍ਤਯਨ੍ਤਿ ‘‘ਕੀਦਿਸੋ ਨੁ ਖੋ ਵਿਮੋਕ੍ਖਧਮ੍ਮੋ, ਕਥਂ ਵਾ ਅਧਿਗਨ੍ਤਬ੍ਬੋ’’ਤਿ ਵਿਮੁਤ੍ਤਿਧਮ੍ਮਂ ਅਨੁਵਿਚਿਨਨ੍ਤੋ ਗਵੇਸਨ੍ਤੋ. ਸਮਂ ਚਿਤ੍ਤਸ੍ਸ ਨਾਲਤ੍ਥਂ, ਪੁਚ੍ਛਂ ਸਮਣਬ੍ਰਾਹ੍ਮਣੇਤਿ ਤੇ ਤੇ ਨਾਨਾਤਿਤ੍ਥਿਯੇ ਸਮਣਬ੍ਰਾਹ੍ਮਣੇ ਵਿਮੁਤ੍ਤਿਧਮ੍ਮਂ ਪੁਚ੍ਛਨ੍ਤੋ ਪਕਤਿਯਾ ਅਨੁਪਸਨ੍ਤਸਭਾਵਸ੍ਸ ਚਿਤ੍ਤਸ੍ਸ ਸਮਂ ਵੂਪਸਮਭੂਤਂ ਵਟ੍ਟਦੁਕ੍ਖਵਿਸ੍ਸਰਣਂ ਅਰਿਯਧਮ੍ਮਂ ਨਾਲਤ੍ਥਂ ਨਾਧਿਗਚ੍ਛਨ੍ਤਿ ਅਤ੍ਥੋ.

ਕੋ ਸੋ ਪਾਰਙ੍ਗਤੋਤਿਆਦਿ ਪੁਚ੍ਛਿਤਾਕਾਰਦਸ੍ਸਨਂ. ਤਤ੍ਥ ਕੋ ਸੋ ਪਾਰਙ੍ਗਤੋ ਲੋਕੇਤਿ ਇਮਸ੍ਮਿਂ ਲੋਕੇ ਤਿਤ੍ਥਕਾਰਪਟਿਞ੍ਞੇਸੁ ਸਮਣਬ੍ਰਾਹ੍ਮਣੇਸੁ ਕੋ ਨੁ ਖੋ ਸੋ ਸਂਸਾਰਸ੍ਸ ਪਾਰਂ ਨਿਬ੍ਬਾਨਂ ਉਪਗਤੋ. ਕੋ ਪਤ੍ਤੋ ਅਮਤੋਗਧਨ੍ਤਿ ਨਿਬ੍ਬਾਨਪਤਿਟ੍ਠਂ ਵਿਮੋਕ੍ਖਮਗ੍ਗਂ ਕੋ ਪਤ੍ਤੋ ਅਧਿਗਤੋਤਿ ਅਤ੍ਥੋ. ਕਸ੍ਸ ਧਮ੍ਮਂ ਪਟਿਚ੍ਛਾਮੀਤਿ ਕਸ੍ਸ ਸਮਣਸ੍ਸ ਵਾ ਬ੍ਰਾਹ੍ਮਣਸ੍ਸ ਵਾ ਓਵਾਦਧਮ੍ਮਂ ਪਟਿਗ੍ਗਣ੍ਹਾਮਿ ਪਟਿਪਜ੍ਜਾਮਿ. ਪਰਮਤ੍ਥਵਿਜਾਨਨਨ੍ਤਿ ਪਰਮਤ੍ਥਸ੍ਸ ਵਿਜਾਨਨਂ, ਅਵਿਪਰੀਤਪ੍ਪਵਤ੍ਤਿਨਿਵਤ੍ਤਿਯੋ ਪਵੇਦੇਨ੍ਤਨ੍ਤਿ ਅਤ੍ਥੋ.

ਅਨ੍ਤੋਵਙ੍ਕਗਤੋ ਆਸੀਤਿ ਵਙ੍ਕਂ ਵੁਚ੍ਚਤਿ ਦਿਟ੍ਠਿਗਤਂ ਮਨੋਵਙ੍ਕਭਾਵਤੋ, ਸਬ੍ਬੇਪਿ ਵਾ ਕਿਲੇਸਾ, ਅਨ੍ਤੋਤਿ ਪਨ ਹਦਯਵਙ੍ਕਸ੍ਸ ਅਨ੍ਤੋ, ਹਦਯਬ੍ਭਨ੍ਤਰਗਤਕਿਲੇਸਵਙ੍ਕੋ ਵਾ ਅਹੋਸੀਤਿ ਅਤ੍ਥੋ. ਮਚ੍ਛੋਵ ਘਸਮਾਮਿਸਨ੍ਤਿ ਆਮਿਸਂ ਘਸਨ੍ਤੋ ਖਾਦਨ੍ਤੋ ਮਚ੍ਛੋ ਵਿਯ, ਗਿਲਬਲ਼ਿਸੋ ਮਚ੍ਛੋ ਵਿਯਾਤਿ ਅਧਿਪ੍ਪਾਯੋ. ਬਦ੍ਧੋ ਮਹਿਨ੍ਦਪਾਸੇਨ, ਵੇਪਚਿਤ੍ਯਸੁਰੋ ਯਥਾਤਿ ਮਹਿਨ੍ਦਸ੍ਸ ਸਕ੍ਕਸ੍ਸ ਪਾਸੇਨ ਬਦ੍ਧੋ ਯਥਾ ਵੇਪਚਿਤ੍ਤਿ ਅਸੁਰਿਨ੍ਦੋ ਅਸੇਰਿਵਿਹਾਰੀ ਮਹਾਦੁਕ੍ਖਪ੍ਪਤ੍ਤੋ, ਏਵਮਹਂ ਪੁਬ੍ਬੇ ਕਿਲੇਸਪਾਸੇਨ ਬਦ੍ਧੋ ਆਸਿਂ, ਅਸੇਰਿਵਿਹਾਰੀ ਮਹਾਦੁਕ੍ਖਪ੍ਪਤ੍ਤੋਤਿ ਅਧਿਪ੍ਪਾਯੋ.

ਅਞ੍ਛਾਮੀਤਿ ਆਕਡ੍ਢਾਮਿ. ਨਨ੍ਤਿ ਕਿਲੇਸਪਾਸਂ. ਨ ਮੁਞ੍ਚਾਮੀਤਿ ਨ ਮੋਚੇਮਿ. ਅਸ੍ਮਾ ਸੋਕਪਰਿਦ੍ਦਵਾਤਿ ਇਮਸ੍ਮਾ ਸੋਕਪਰਿਦੇਵਵਟ੍ਟਤੋ. ਇਦਂ ਵੁਤ੍ਤਂ ਹੋਤਿ – ਯਥਾਪਾਸੇਨ ਬਦ੍ਧੋ ਮਿਗੋ ਸੂਕਰੋ ਵਾ ਮੋਚਨੁਪਾਯਂ ਅਜਾਨਨ੍ਤੋ ਪਰਿਪ੍ਫਨ੍ਦਮਾਨੋ ਤਂ ਆਵਿਞ੍ਛਨ੍ਤੋ ਬਨ੍ਧਨਂ ਦਲ਼੍ਹਂ ਕਰੋਤਿ, ਏਵਂ ਅਹਂ ਪੁਬ੍ਬੇ ਕਿਲੇਸਪਾਸੇਨ ਪਟਿਮੁਕ੍ਕੋ ਮੋਚਨੁਪਾਯਂ ਅਜਾਨਨ੍ਤੋ ਕਾਯਸਞ੍ਚੇਤਨਾਦਿਵਸੇਨ ਪਰਿਪ੍ਫਨ੍ਦਮਾਨੋ ਤਂ ਨ ਮੋਚੇਸਿਂ, ਅਞ੍ਞਦਤ੍ਥੁ ਤਂ ਦਲ਼੍ਹਂ ਕਰੋਨ੍ਤੋ ਸੋਕਾਦਿਨਾ ਪਰਂ ਕਿਲੇਸਂ ਏਵ ਪਾਪੁਣਿਨ੍ਤਿ. ਕੋ ਮੇ ਬਨ੍ਧਂ ਮੁਞ੍ਚਂ ਲੋਕੇ, ਸਮ੍ਬੋਧਿਂ ਵੇਦਯਿਸ੍ਸਤੀਤਿ ਇਮਸ੍ਮਿਂ ਲੋਕੇ ਏਤਂ ਕਿਲੇਸਬਨ੍ਧਨੇਨ ਬਨ੍ਧਂ ਮੁਞ੍ਚਨ੍ਤੋ ਸਮ੍ਬੁਜ੍ਝਤਿ ਏਤੇਨਾਤਿ ‘‘ਸਮ੍ਬੋਧੀ’’ਤਿ ਲਦ੍ਧਨਾਮਂ ਵਿਮੋਕ੍ਖਮਗ੍ਗਂ ਕੋ ਮੇ ਵੇਦਯਿਸ੍ਸਤਿ ਆਚਿਕ੍ਖਿਸ੍ਸਤੀਤਿ ਅਤ੍ਥੋ. ‘‘ਬਨ੍ਧਮੁਞ੍ਚ’’ਨ੍ਤਿਪਿ ਪਠਨ੍ਤਿ, ਬਨ੍ਧਾ, ਬਨ੍ਧਸ੍ਸ ਵਾ ਮੋਚਕਂ ਸਮ੍ਬੋਧਿਨ੍ਤਿ ਯੋਜਨਾ.

ਆਦਿਸਨ੍ਤਨ੍ਤਿ ਦੇਸੇਨ੍ਤਂ. ਪਭਙ੍ਗੁਨਨ੍ਤਿ ਪਭਞ੍ਜਨਂ ਕਿਲੇਸਾਨਂ ਵਿਦ੍ਧਂਸਨਂ, ਪਭਙ੍ਗੁਨਂ ਵਾ ਧਮ੍ਮਪ੍ਪਵਤ੍ਤਿਂ ਆਦਿਸਨ੍ਤਂ ਕਥੇਨ੍ਤਂ ਜਰਾਯ ਮਚ੍ਚੁਨੋ ਚ ਪਵਾਹਨਂ ਕਸ੍ਸ ਧਮ੍ਮਂ ਪਟਿਚ੍ਛਾਮਿ. ‘‘ਪਟਿਪਜ੍ਜਾਮੀ’’ਤਿ ਵਾ ਪਾਠੋ, ਸੋ ਏਵਤ੍ਥੋ. ਵਿਚਿਕਿਚ੍ਛਾਕਙ੍ਖਾਗਨ੍ਥਿਤਨ੍ਤਿ ‘‘ਅਹੋਸਿਂ ਨੁ ਖੋ ਅਹਮਤੀਤਮਦ੍ਧਾਨ’’ਨ੍ਤਿਆਦਿਨਯਪ੍ਪਵਤ੍ਤਾਯ (ਮ. ਨਿ. ੧.੧੮; ਸਂ. ਨਿ. ੨.੨੦) ਵਿਚਿਕਿਚ੍ਛਾਯ ਆਸਪ੍ਪਨਪਰਿਸਪ੍ਪਨਾਕਾਰਵੁਤ੍ਤਿਯਾ ਕਙ੍ਖਾਯ ਚ ਗਨ੍ਥਿਤਂ. ਸਾਰਮ੍ਭਬਲਸਞ੍ਞੁਤਨ੍ਤਿ ਕਰਣੁਤ੍ਤਰਿਯਕਰਣਲਕ੍ਖਣੇਨ ਬਲਪ੍ਪਤ੍ਤੇਨ ਸਾਰਮ੍ਭੇਨ ਯੁਤ੍ਤਂ. ਕੋਧਪ੍ਪਤ੍ਤਮਨਤ੍ਥਦ੍ਧਨ੍ਤਿ ਸਬ੍ਬਤ੍ਥ ਕੋਧੇਨ ਯੁਤ੍ਤਮਨਸਾ ਥਦ੍ਧਭਾਵਂ ਗਤਂ ਅਭਿਜਪ੍ਪਪ੍ਪਦਾਰਣਂ. ਇਚ੍ਛਿਤਾਲਾਭਾਦਿਵਸੇਨ ਹਿ ਤਣ੍ਹਾ ਸਤ੍ਤਾਨਂ ਚਿਤ੍ਤਂ ਪਦਾਲੇਨ੍ਤੀ ਵਿਯ ਪਵਤ੍ਤਤਿ. ਦੂਰੇ ਠਿਤਸ੍ਸਾਪਿ ਵਿਜ੍ਝਨੁਪਾਯਤਾਯ ਤਣ੍ਹਾਵ ਧਨੁ ਸਮੁਪਤਿਟ੍ਠਤਿ ਉਪ੍ਪਜ੍ਜਤਿ ਏਤਸ੍ਮਾਤਿ ਤਣ੍ਹਾਧਨੁਸਮੁਟ੍ਠਾਨਂ, ਦਿਟ੍ਠਿਸਲ੍ਲਂ. ਤਂ ਪਨ ਯਸ੍ਮਾ ਵੀਸਤਿਵਤ੍ਥੁਕਾ ਸਕ੍ਕਾਯਦਿਟ੍ਠਿ, ਦਸਵਤ੍ਥੁਕਾ ਮਿਚ੍ਛਾਦਿਟ੍ਠੀਤਿ ਤਿਂਸਪ੍ਪਭੇਦਂ, ਤਸ੍ਮਾ ਵੁਤ੍ਤਂ ‘‘ਦ੍ਵੇ ਚ ਪਨ੍ਨਰਸਾਯੁਤ’’ਨ੍ਤਿ, ਦ੍ਵਿਕ੍ਖਤ੍ਤੁਂ ਪਨ੍ਨਰਸਭੇਦਵਨ੍ਤਨ੍ਤਿ ਅਤ੍ਥੋ. ਪਸ੍ਸ ਓਰਸਿਕਂ ਬਾਲ਼੍ਹਂ, ਭੇਤ੍ਵਾਨ ਯਦਿ ਤਿਟ੍ਠਤੀਤਿ ਯਂ ਉਰਸਮ੍ਬਨ੍ਧਨੀਯਤਾਯ ਓਰਸਿਕਂ ਬਾਲ਼੍ਹਂ ਬਲਵਤਰਂ ਭੇਤ੍ਵਾਨ ਹਦਯਂ ਵਿਨਿਵਿਜ੍ਝਿਤ੍ਵਾ ਤਸ੍ਮਿਂਯੇਵ ਹਦਯੇ ਤਿਟ੍ਠਤਿ, ਤਂ ਪਸ੍ਸਾਤਿ ਅਤ੍ਤਾਨਮੇਵ ਆਲਪਤਿ.

ਅਨੁਦਿਟ੍ਠੀਨਂ ਅਪ੍ਪਹਾਨਨ੍ਤਿ ਅਨੁਦਿਟ੍ਠਿਭੂਤਾਨਂ ਸੇਸਦਿਟ੍ਠੀਨਂ ਅਪ੍ਪਹਾਨਕਾਰਣਂ. ਯਾਵ ਹਿ ਸਕ੍ਕਾਯਦਿਟ੍ਠਿ ਸਨ੍ਤਾਨਤੋ ਨ ਵਿਗਚ੍ਛਤਿ, ਤਾਵ ਸਸ੍ਸਤਦਿਟ੍ਠਿਆਦੀਨਂ ਅਪ੍ਪਹਾਨਮੇਵਾਤਿ. ਸਙ੍ਕਪ੍ਪਪਰਤੇਜਿਤਨ੍ਤਿ ਸਙ੍ਕਪ੍ਪੇਨ ਮਿਚ੍ਛਾਵਿਤਕ੍ਕੇਨ ਪਰੇ ਪਰਜਨੇ ਨਿਸ੍ਸਯਲਕ੍ਖਣਂ ਪਤਿਪਤਿਤੇ ਤੇਜਿਤਂ ਉਸ੍ਸਾਹਿਤਂ. ਤੇਨ ਵਿਦ੍ਧੋ ਪਵੇਧਾਮੀਤਿ ਤੇਨ ਦਿਟ੍ਠਿਸਲ੍ਲੇਨ ਯਥਾ ਹਦਯਂ ਆਹਚ੍ਚ ਤਿਟ੍ਠਤਿ, ਏਵਂ ਵਿਦ੍ਧੋ ਪਵੇਧਾਮਿ ਸਙ੍ਕਪ੍ਪਾਮਿ ਸਸ੍ਸਤੁਚ੍ਛੇਦਾਦਿਵਸੇਨ ਇਤੋ ਚਿਤੋ ਚ ਪਰਿਵਟ੍ਟਾਮਿ. ਪਤ੍ਤਂਵ ਮਾਲੁਤੇਰਿਤਨ੍ਤਿ ਮਾਲੁਤੇਨ ਵਾਯੁਨਾ ਏਰਿਤਂ ਵਣ੍ਟਤੋ ਮੁਤ੍ਤਂ ਦੁਮਪਤ੍ਤਂ ਵਿਯ.

ਅਜ੍ਝਤ੍ਤਂ ਮੇ ਸਮੁਟ੍ਠਾਯਾਤਿ ਯਥਾ ਲੋਕੇ ਸਲ੍ਲਂ ਨਾਮ ਬਾਹਿਰਤੋ ਉਟ੍ਠਾਯ ਅਜ੍ਝਤ੍ਤਂ ਨਿਮ੍ਮਥੇਤ੍ਵਾ ਬਾਧਤਿ, ਨ ਏਵਮਿਦਂ. ਇਦਂ ਪਨ ਅਜ੍ਝਤ੍ਤਂ ਮੇ ਮਮ ਅਤ੍ਤਭਾਵੇ ਸਮੁਟ੍ਠਾਯ ਸੋ ਅਤ੍ਤਭਾਵਸਞ੍ਞਿਤੋ ਛਫਸ੍ਸਾਯਤਨਕਾਯੋ ਯਥਾ ਖਿਪ੍ਪਂ ਸੀਘਂ ਪਚ੍ਚਤਿ, ਡਯ੍ਹਤਿ. ਯਥਾ ਕਿਂ? ਅਗ੍ਗਿ ਵਿਯ ਸਨਿਸ੍ਸਯਡਾਹਕੋ ਤਂਯੇਵ ਮਾਮਕਂ ਮਮ ਸਨ੍ਤਕਂ ਅਤ੍ਤਭਾਵਂ ਡਹਨ੍ਤੋ ਯਤ੍ਥ ਉਪ੍ਪਨ੍ਨੋ, ਤਤ੍ਥੇਵ ਸਰਤਿ ਪਵਤ੍ਤਤਿ.

ਤਂ ਨ ਪਸ੍ਸਾਮਿ ਤੇਕਿਚ੍ਛਨ੍ਤਿ ਤਾਦਿਸਾਯ ਤਿਕਿਚ੍ਛਾਯ ਨਿਯੁਤ੍ਤਤਾਯ ਤੇਕਿਚ੍ਛਂ ਸਲ੍ਲਕਤ੍ਤਂ ਭਿਸਕ੍ਕਂ ਤਂ ਨ ਪਸ੍ਸਾਮਿ. ਯੋ ਮੇਤਂ ਸਲ੍ਲਮੁਦ੍ਧਰੇਤਿ ਯੋ ਭਿਸਕ੍ਕੋ ਏਤਂ ਦਿਟ੍ਠਿਸਲ੍ਲਂ ਕਿਲੇਸਸਲ੍ਲਞ੍ਚ ਉਦ੍ਧਰੇਯ੍ਯ, ਉਦ੍ਧਰਨ੍ਤੋ ਚ ਨਾਨਾਰਜ੍ਜੇਨ ਰਜ੍ਜੁਸਦਿਸਸਙ੍ਖਾਤਾਯ ਏਸਨਿਸਲਾਕਾਯ ਪਵੇਸੇਤ੍ਵਾਨ ਸਤ੍ਥੇਨ ਕਨ੍ਤਿਤ੍ਵਾ ਨਾਞ੍ਞੇਨ ਮਨ੍ਤਾਗਦਪ੍ਪਯੋਗੇਨ ਵਿਚਿਕਿਚ੍ਛਿਤਂ ਸਲ੍ਲਂ ਤਿਕਿਚ੍ਛਿਤੁਂ ਸਕ੍ਕਾਤਿ ਆਹਰਿਤ੍ਵਾ ਯੋਜੇਤਬ੍ਬਂ. ਵਿਚਿਕਿਚ੍ਛਿਤਨ੍ਤਿ, ਚ ਨਿਦਸ੍ਸਨਮਤ੍ਤਮੇਤਂ. ਸਬ੍ਬਸ੍ਸਪਿ ਕਿਲੇਸਸਲ੍ਲਸ੍ਸ ਵਸੇਨ ਅਤ੍ਥੋ ਵੇਦਿਤਬ੍ਬੋ.

ਅਸਤ੍ਥੋਤਿ ਸਤ੍ਥਰਹਿਤੋ. ਅਵਣੋਤਿ ਵਣੇਨ ਵਿਨਾ. ਅਬ੍ਭਨ੍ਤਰਪਸ੍ਸਯਨ੍ਤਿ ਅਬ੍ਭਨ੍ਤਰਸਙ੍ਖਾਤਂ ਹਦਯਂ ਨਿਸ੍ਸਾਯ ਠਿਤਂ. ਅਹਿਂਸਨ੍ਤਿ ਅਪੀਲ਼ੇਨ੍ਤੋ. ‘‘ਅਹਿਂਸਾ’’ਤਿ ਚ ਪਾਠੋ, ਅਹਿਂਸਾਯ ਅਪੀਲ਼ਨੇਨਾਤਿ ਅਤ੍ਥੋ. ਅਯਞ੍ਹੇਤ੍ਥ ਸਙ੍ਖੇਪਤ੍ਥੋ – ਕੋ ਨੁ ਖੋ ਕਿਞ੍ਚਿ ਸਤ੍ਥਂ ਅਗ੍ਗਹੇਤ੍ਵਾ ਵਣਞ੍ਚ ਅਕਰੋਨ੍ਤੋ ਤਤੋ ਏਵ ਸਬ੍ਬਗਤ੍ਤਾਨਿ ਅਬਾਧੇਨ੍ਤੋ ਮਮ ਹਦਯਬ੍ਭਨ੍ਤਰਗਤਂ ਪੀਲ਼ਾਜਨਨਤੋ ਅਨ੍ਤੋ ਤੁਦਨਤੋ ਅਨ੍ਤੋ ਰੁਦ੍ਧਨਤੋ ਚ ਪਰਮਤ੍ਥੇਨੇਵ ਸਲ੍ਲਭੂਤਂ ਕਿਲੇਸਸਲ੍ਲਂ ਉਦ੍ਧਰਿਸ੍ਸਤੀਤਿ.

ਏਵਂ ਦਸਹਿ ਗਾਥਾਹਿ ਪੁਬ੍ਬੇ ਅਤ੍ਤਨਾ ਚਿਨ੍ਤਿਤਾਕਾਰਂ ਦਸ੍ਸੇਤ੍ਵਾ ਪੁਨਪਿ ਤਂ ਪਕਾਰਨ੍ਤਰੇਨ ਦਸ੍ਸੇਤੁਂ ‘‘ਧਮ੍ਮਪ੍ਪਤਿ ਹਿ ਸੋ ਸੇਟ੍ਠੋ’’ਤਿਆਦਿਮਾਹ. ਤਤ੍ਥ ਧਮ੍ਮਪ੍ਪਤੀਤਿ ਧਮ੍ਮਨਿਮਿਤ੍ਤਂ ਧਮ੍ਮਹੇਤੁ. ਹੀਤਿ ਨਿਪਾਤਮਤ੍ਤਂ. ਸੋ ਸੇਟ੍ਠੋਤਿ ਸੋ ਪੁਗ੍ਗਲੋ ਉਤ੍ਤਮੋ. ਵਿਸਦੋਸਪ੍ਪਵਾਹਕੋਤਿ ਯੋ ਮਯ੍ਹਂ ਰਾਗਾਦਿਕਿਲੇਸਸ੍ਸ ਪਵਾਹਕੋ ਉਚ੍ਛਿਨ੍ਨਕੋ. ਗਮ੍ਭੀਰੇ ਪਤਿਤਸ੍ਸ ਮੇ, ਥਲਂ ਪਾਣਿਞ੍ਚ ਦਸ੍ਸਯੇਤਿ ਕੋ ਨੁ ਖੋ ਅਤਿਗਮ੍ਭੀਰੇ ਸਂਸਾਰਮਹੋਘੇ ਪਤਿਤਸ੍ਸ ਮਯ੍ਹਂ ‘‘ਮਾ ਭਾਯੀ’’ਤਿ ਅਸ੍ਸਾਸੇਨ੍ਤੋ ਨਿਬ੍ਬਾਨਥਲਂ ਤਂਸਮ੍ਪਾਪਕਂ ਅਰਿਯਮਗ੍ਗਹਤ੍ਥਞ੍ਚ ਦਸ੍ਸੇਯ੍ਯ.

ਰਹਦੇਹਮਸ੍ਮਿ ਓਗਾਲ਼੍ਹੋਤਿ ਮਹਤਿ ਸਂਸਾਰਰਹਦੇ ਅਹਮਸ੍ਮਿ ਸਸੀਸਂ ਨਿਮੁਜ੍ਜਨਵਸੇਨ ਓਤਿਣ੍ਣੋ ਅਨੁਪਵਿਟ੍ਠੋ. ਅਹਾਰਿਯਰਜਮਤ੍ਤਿਕੇਤਿ ਅਪਨੇਤੁਂ ਅਸਕ੍ਕੁਣੇਯ੍ਯੋ ਰਾਗਾਦਿਰਜੋ ਮਤ੍ਤਿਕਾ ਕਦ੍ਦਮੋ ਏਤਸ੍ਸਾਤਿ ਅਹਾਰਿਯਰਜਮਤ੍ਤਿਕੋ, ਰਹਦੋ. ਤਸ੍ਮਿਂ ਰਹਦਸ੍ਮਿਂ. ‘‘ਅਹਾਰਿਯਰਜਮਨ੍ਤਿਕੇ’’ਤਿ ਵਾ ਪਾਠੋ, ਅਨ੍ਤਿਕੇ ਠਿਤਰਾਗਾਦੀਸੁ ਦੁਨ੍ਨੀਹਰਣੀਯਰਾਗਾਦਿਰਜੇਤਿ ਅਤ੍ਥੋ. ਸਨ੍ਤਦੋਸਪਟਿਚ੍ਛਾਦਨਲਕ੍ਖਣਾ ਮਾਯਾ, ਪਰਸਮ੍ਪਤ੍ਤਿਅਸਹਨਲਕ੍ਖਣਾ ਉਸੂਯਾ, ਕਰਣੁਤ੍ਤਰਿਯਕਰਣਲਕ੍ਖਣੋ ਸਾਰਮ੍ਭੋ, ਚਿਤ੍ਤਾਲਸਿਯਲਕ੍ਖਣਂ ਥਿਨਂ, ਕਾਯਾਲਸਿਯਲਕ੍ਖਣਂ ਮਿਦ੍ਧਨ੍ਤਿ ਇਮੇ ਪਾਪਧਮ੍ਮਾ ਪਤ੍ਥਟਾ ਯਂ ਰਹਦਂ, ਤਸ੍ਮਿਂ ਮਾਯਾਉਸੂਯਸਾਰਮ੍ਭਥਿਨਮਿਦ੍ਧਮਪਤ੍ਥਟੇ, ਮਕਾਰੋ ਚੇਤ੍ਥ ਪਦਸਨ੍ਧਿਕਰੋ ਵੁਤ੍ਤੋ. ਯਥਾਵੁਤ੍ਤੇਹਿ ਇਮੇਹਿ ਪਾਪਧਮ੍ਮੇਹਿ ਪਤ੍ਥਟੇਤਿ ਅਤ੍ਥੋ.

ਉਦ੍ਧਚ੍ਚਮੇਘਥਨਿਤਂ, ਸਂਯੋਜਨਵਲਾਹਕਨ੍ਤਿ ਵਚਨਵਿਪਲ੍ਲਾਸੇਨ ਵੁਤ੍ਤਂ, ਭਨ੍ਤਸਭਾਵਂ ਉਦ੍ਧਚ੍ਚਂ ਮੇਘਥਨਿਤਂ ਮੇਘਗਜ੍ਜਿਤਂ ਏਤੇਸਨ੍ਤਿ ਉਦ੍ਧਚ੍ਚਮੇਘਥਨਿਤਾ. ਦਸਵਿਧਾ ਸਂਯੋਜਨਾ ਏਵ ਵਲਾਹਕਾ ਏਤੇਸਨ੍ਤਿ ਸਂਯੋਜਨਵਲਾਹਕਾ. ਵਾਹਾ ਮਹਾਉਦਕਵਾਹਸਦਿਸਾ ਰਾਗਨਿਸ੍ਸਿਤਾ ਮਿਚ੍ਛਾਸਙ੍ਕਪ੍ਪਾ ਅਸੁਭਾਦੀਸੁ ਠਿਤਾ ਕੁਦ੍ਦਿਟ੍ਠਿਂ ਮਂ ਵਹਨ੍ਤਿ ਅਪਾਯਸਮੁਦ੍ਦਮੇਵ ਉਦ੍ਦਿਸ੍ਸ ਕਡ੍ਢਨ੍ਤੀਤਿ ਅਤ੍ਥੋ.

ਸਵਨ੍ਤਿ ਸਬ੍ਬਧਿ ਸੋਤਾਤਿ ਤਣ੍ਹਾਸੋਤੋ, ਦਿਟ੍ਠਿਸੋਤੋ, ਮਾਨਸੋਤੋ, ਅਵਿਜ੍ਜਾਸੋਤੋ, ਕਿਲੇਸਸੋਤੋਤਿ ਇਮੇ ਪਞ੍ਚਪਿਸੋਤਾ ਚਕ੍ਖੁਦ੍ਵਾਰਾਦੀਨਂ ਵਸੇਨ ਸਬ੍ਬੇਸੁ ਰੂਪਾਦੀਸੁ ਆਰਮ੍ਮਣੇਸੁ ਸਵਨਤੋ ‘‘ਰੂਪਤਣ੍ਹਾ…ਪੇ… ਧਮ੍ਮਤਣ੍ਹਾ’’ਤਿਆਦਿਨਾ (ਵਿਭ. ੨੦੪, ੨੩੨) ਸਬ੍ਬਭਾਗੇਹਿ ਵਾ ਸਵਨਤੋ ਸਬ੍ਬਧਿ ਸਵਨ੍ਤਿ. ਲਤਾਤਿ ਪਲਿਵੇਠਨਟ੍ਠੇਨ ਸਂਸਿਬ੍ਬਨਟ੍ਠੇਨ ਲਤਾ ਵਿਯਾਤਿ ਲਤਾ, ਤਣ੍ਹਾ. ਉਬ੍ਭਿਜ੍ਜ ਤਿਟ੍ਠਤੀਤਿ ਛਹਿ ਦ੍ਵਾਰੇਹਿ ਉਬ੍ਭਿਜ੍ਜਿਤ੍ਵਾ ਰੂਪਾਦੀਸੁ ਆਰਮ੍ਮਣੇਸੁ ਤਿਟ੍ਠਤਿ. ਤੇ ਸੋਤੇਤਿ ਤਣ੍ਹਾਦਿਕੇ ਸੋਤੇ ਮਮ ਸਨ੍ਤਾਨੇ ਸਨ੍ਦਨ੍ਤੇ ਮਗ੍ਗਸੇਤੁਬਨ੍ਧਨੇਨ ਕੋ ਪੁਰਿਸਵਿਸੇਸੋ ਨਿਵਾਰੇਯ੍ਯ, ਤਂ ਲਤਨ੍ਤਿ ਤਣ੍ਹਾਲਤਂ, ਮਗ੍ਗਸਤ੍ਥੇਨ ਕੋ ਛੇਚ੍ਛਤਿ ਛਿਨ੍ਦਿਸ੍ਸਤਿ.

ਵੇਲਂ ਕਰੋਥਾਤਿ ਤੇਸਂ ਸੋਤਾਨਂ ਵੇਲਂ ਸੇਤੁਂ ਕਰੋਥ ਸਨ੍ਨਿਵਾਰਣਂ. ਭਦ੍ਦਨ੍ਤੇਤਿ ਆਲਪਨਾਕਾਰਦਸ੍ਸਨਂ. ਮਾ ਤੇ ਮਨੋਮਯੋ ਸੋਤੋਤਿ ਉਦਕਸੋਤੋ ਓਲ਼ਾਰਿਕੋ, ਤਸ੍ਸ ਬਾਲਮਹਾਜਨੇਨਪਿ ਸੇਤੁਂ ਕਤ੍ਵਾ ਨਿਵਾਰਣਂ ਸਕ੍ਕਾ. ਅਯਂ ਪਨ ਮਨੋਮਯੋ ਸੋਤੋ ਸੁਖੁਮੋ ਦੁਨ੍ਨਿਵਾਰਣੋ. ਸੋ ਯਥਾ ਉਦਕਸੋਤੋ ਵਡ੍ਢਨ੍ਤੋ ਕੂਲੇ ਠਿਤਂ ਰੁਕ੍ਖਂ ਪਾਤੇਤ੍ਵਾਵ ਨਾਸੇਤਿ, ਏਵਂ ਤੁਮ੍ਹੇ ਅਪਾਯਤੀਰੇ ਠਿਤੇ ਤਤ੍ਥ ਸਹਸਾ ਪਾਤੇਤ੍ਵਾ ਅਪਾਯਸਮੁਦ੍ਦਂ ਪਾਪੇਨ੍ਤੋ ਮਾ ਲੁਵੇ ਮਾ ਵਿਨਾਸੇਯ੍ਯ ਮਾ ਅਨਯਬ੍ਯਸਨਂ ਪਾਪੇਯ੍ਯਾਤਿ ਅਤ੍ਥੋ.

ਏਵਂ ਅਯਂ ਥੇਰੋ ਪੁਰਿਮਤ੍ਤਭਾਵੇ ਪਰਿਮਦ੍ਦਿਤਸਙ੍ਖਾਰਤ੍ਤਾ ਞਾਣਪਰਿਪਾਕਂ ਗਤਤ੍ਤਾ ਪਵਤ੍ਤਿਦੁਕ੍ਖਂ ਉਪਧਾਰੇਨ੍ਤੋ ਯਥਾ ਵਿਚਿਕਿਚ੍ਛਾਦਿਕੇ ਸਂਕਿਲੇਸਧਮ੍ਮੇ ਪਰਿਗ੍ਗਣ੍ਹਿ, ਤਮਾਕਾਰਂ ਦਸ੍ਸੇਤ੍ਵਾ ਇਦਾਨਿ ਜਾਤਸਂਵੇਗੋ ਕਿਂਕੁਸਲਗਵੇਸੀ ਸਤ੍ਥੁ ਸਨ੍ਤਿਕਂ ਗਤੋ ਯਂ ਵਿਸੇਸਂ ਅਧਿਮੁਚ੍ਚਿ, ਤਂ ਦਸ੍ਸੇਨ੍ਤੋ ‘‘ਏਵਂ ਮੇ ਭਯਜਾਤਸ੍ਸਾ’’ਤਿਆਦਿਮਾਹ. ਤਤ੍ਥ ਏਵਂ ਮੇ ਭਯਜਾਤਸ੍ਸਾਤਿ ਏਵਂ ਵੁਤ੍ਤਪ੍ਪਕਾਰੇਨ ਸਂਸਾਰੇ ਜਾਤਭਯਸ੍ਸ ਅਪਾਰਾ ਓਰਿਮਤੀਰਤੋ ਸਪ੍ਪਟਿਭਯਤੋ ਸਂਸਾਰਵਟ੍ਟਤੋ ‘‘ਕਥਂ ਨੁ ਖੋ ਮੁਞ੍ਚੇਯ੍ਯ’’ਨ੍ਤਿ ਪਾਰਂ ਨਿਬ੍ਬਾਨਂ, ਏਸਤੋ ਗਵੇਸਤੋ, ਤਾਣੋ ਸਦੇਵਕਸ੍ਸ ਲੋਕਸ੍ਸ ਤਾਣਭੂਤੋ ਕਿਲੇਸਸਮੁਚ੍ਛੇਦਨੀ ਪਞ੍ਞਾ ਆਵੁਧੋ ਏਤਸ੍ਸਾਤਿ ਪਞ੍ਞਾਵੁਧੋ. ਦਿਟ੍ਠਧਮ੍ਮਿਕਾਦਿਅਤ੍ਥੇਨ ਸਤ੍ਤਾਨਂ ਯਥਾਰਹਂ ਅਨੁਸਾਸਨਤੋ ਸਤ੍ਥਾ, ਇਸਿਸਙ੍ਘੇਨ ਅਗ੍ਗਸਾਵਕਾਦਿਅਰਿਯਪੁਗ੍ਗਲਸਮੂਹੇਨ ਨਿਸੇਵਿਤੋ ਪਯਿਰੁਪਾਸਿਤੋ ਇਸਿਸਙ੍ਘਨਿਸੇਵਿਤੋ, ਸੋਪਾਨਨ੍ਤਿ ਦੇਸਨਾਞਾਣੇਨ ਸੁਟ੍ਠੁ ਕਤਤ੍ਤਾ ਅਭਿਸਙ੍ਖਤਤ੍ਤਾ ਸੁਕਤਂ, ਉਪਕ੍ਕਿਲੇਸਵਿਰਹਿਤਤੋ ਸੁਦ੍ਧਂ, ਸਦ੍ਧਾਪਞ੍ਞਾਦਿਸਾਰਭੂਤਂ ਧਮ੍ਮਸਾਰਮਯਂ ਪਟਿਪਕ੍ਖੇਹਿ ਅਚਲਨੀਯਤੋ ਦਲ਼੍ਹਂ, ਵਿਪਸ੍ਸਨਾਸਙ੍ਖਾਤਂ ਸੋਪਾਨਂ ਮਹੋਘੇਨ ਵੁਯ੍ਹਮਾਨਸ੍ਸ ਮਯ੍ਹਂ ਸਤ੍ਥਾ ਪਾਦਾਸਿ, ਦਦਨ੍ਤੋ ਚ ‘‘ਇਮਿਨਾ ਤੇ ਸੋਤ੍ਥਿ ਭਵਿਸ੍ਸਤੀ’’ਤਿ ਸਮਸ੍ਸਾਸੇਨ੍ਤੋ ਮਾ ਭਾਯੀਤਿ ਚ ਅਬ੍ਰਵਿ, ਕਥੇਸਿ.

ਸਤਿਪਟ੍ਠਾਨਪਾਸਾਦਨ੍ਤਿ ਤੇਨ ਵਿਪਸ੍ਸਨਾਸੋਪਾਨੇਨ ਕਾਯਾਨੁਪਸ੍ਸਨਾਦਿਨਾ ਲਦ੍ਧਬ੍ਬਚਤੁਬ੍ਬਿਧਸਾਮਞ੍ਞਫਲਵਿਸੇਸੇਨ ਚਤੁਭੂਮਿਸਮ੍ਪਨ੍ਨਂ ਸਤਿਪਟ੍ਠਾਨਪਾਸਾਦਂ ਆਰੁਹਿਤ੍ਵਾ ਪਚ੍ਚਵੇਕ੍ਖਿਸਂ ਚਤੁਸਚ੍ਚਧਮ੍ਮਂ ਮਗ੍ਗਞਾਣੇਨ ਪਤਿਅਵੇਕ੍ਖਿਂ ਪਟਿਵਿਜ੍ਝਿਂ. ਯਂ ਤਂ ਪੁਬ੍ਬੇ ਅਮਞ੍ਞਿਸ੍ਸਂ, ਸਕ੍ਕਾਯਾਭਿਰਤਂ ਪਜਨ੍ਤਿ ਏਵਂ ਪਟਿਵਿਦ੍ਧਸਚ੍ਚੋ ਯਂ ਸਕ੍ਕਾਯੇ ‘‘ਅਹਂ ਮਮਾ’’ਤਿ ਅਭਿਰਤਂ ਪਜਂ ਤਿਤ੍ਥਿਯਜਨਂ ਤੇਨ ਪਰਿਕਪ੍ਪਿਤਅਤ੍ਤਾਨਞ੍ਚ ਪੁਬ੍ਬੇ ਸਾਰਤੋ ਅਮਞ੍ਞਿਸ੍ਸਂ. ਯਦਾ ਚ ਮਗ੍ਗਮਦ੍ਦਕ੍ਖਿਂ, ਨਾਵਾਯ ਅਭਿਰੂਹਨਨ੍ਤਿ ਅਰਿਯਮਗ੍ਗਨਾਵਾਯ ਅਭਿਰੁਹਨੂਪਾਯਭੂਤਂ ਯਦਾ ਵਿਪਸ੍ਸਨਾਮਗ੍ਗਂ ਯਾਥਾਵਤੋ ਅਦ੍ਦਕ੍ਖਿਂ. ਤਤੋ ਪਟ੍ਠਾਯ ਤਂ ਤਿਤ੍ਥਿਯਜਨਂ ਅਤ੍ਤਾਨਞ੍ਚ ਅਨਧਿਟ੍ਠਾਯ ਚਿਤ੍ਤੇ ਅਟ੍ਠਪੇਤ੍ਵਾ ਅਗ੍ਗਹੇਤ੍ਵਾ ਤਿਤ੍ਥਂ ਨਿਬ੍ਬਾਨਸਙ੍ਖਾਤਸ੍ਸ ਅਮਤਮਹਾਪਾਰਸ੍ਸ ਤਿਤ੍ਥਭੂਤਂ ਅਰਿਯਮਗ੍ਗਦਸ੍ਸਨਂ ਸਬ੍ਬੇਹਿ ਮਗ੍ਗੇਹਿ ਸਬ੍ਬੇਹਿ ਕੁਸਲਧਮ੍ਮੇਹਿ ਉਕ੍ਕਟ੍ਠਂ ਅਦ੍ਦਕ੍ਖਿਂ, ਯਾਥਾਵਤੋ ਅਪਸ੍ਸਿਨ੍ਤਿ ਅਤ੍ਥੋ.

ਏਵਂ ਅਤ੍ਤਨੋ ਅਨੁਤ੍ਤਰਂ ਮਗ੍ਗਾਧਿਗਮਂ ਪਕਾਸੇਤ੍ਵਾ ਇਦਾਨਿ ਤਸ੍ਸ ਦੇਸਕਂ ਸਮ੍ਮਾਸਮ੍ਬੁਦ੍ਧਂ ਥੋਮੇਨ੍ਤੋ ‘‘ਸਲ੍ਲਂ ਅਤ੍ਤਸਮੁਟ੍ਠਾਨ’’ਨ੍ਤਿਆਦਿਮਾਹ. ਤਤ੍ਥ ਸਲ੍ਲਨ੍ਤਿ ਦਿਟ੍ਠਿਮਾਨਾਦਿਕਿਲੇਸਸਲ੍ਲਂ. ਅਤ੍ਤਸਮੁਟ੍ਠਾਨਨ੍ਤਿ ‘‘ਅਹ’’ਨ੍ਤਿ ਮਾਨਟ੍ਠਾਨਤਾਯ ‘‘ਅਤ੍ਤਾ’’ਤਿ ਚ ਲਦ੍ਧਨਾਮੇ ਅਤ੍ਤਭਾਵੇ ਸਮ੍ਭੂਤਂ. ਭਵਨੇਤ੍ਤਿਪ੍ਪਭਾਵਿਤਨ੍ਤਿ ਭਵਤਣ੍ਹਾਸਮੁਟ੍ਠਿਤਂ ਭਵਤਣ੍ਹਾਸਨ੍ਨਿਸ੍ਸਯਂ. ਸਾ ਹਿ ਦਿਟ੍ਠਿਮਾਨਾਦੀਨਂ ਸਮ੍ਭਵੋ. ਏਤੇਸਂ ਅਪ੍ਪਵਤ੍ਤਾਯਾਤਿ ਯਥਾਵੁਤ੍ਤਾਨਂ ਪਾਪਧਮ੍ਮਾਨਂ ਅਪ੍ਪਵਤ੍ਤਿਯਾ ਅਨੁਪ੍ਪਾਦਾਯ. ਦੇਸੇਸਿ ਮਗ੍ਗਮੁਤ੍ਤਮਨ੍ਤਿ ਉਤ੍ਤਮਂ ਸੇਟ੍ਠਂ ਅਰਿਯਂ ਅਟ੍ਠਙ੍ਗਿਕਂ ਮਗ੍ਗਂ, ਤਦੁਪਾਯਞ੍ਚ ਵਿਪਸ੍ਸਨਾਮਗ੍ਗਂ ਕਥੇਸਿ.

ਦੀਘਰਤ੍ਤਾਨੁਸਯਿਤਨ੍ਤਿ ਅਨਮਤਗ੍ਗੇ ਸਂਸਾਰੇ ਚਿਰਕਾਲਂ ਸਨ੍ਤਾਨੇ ਅਨੁ ਅਨੁ ਸਯਿਤਂ ਕਾਰਣਲਾਭੇਨ ਉਪ੍ਪਜ੍ਜਨਾਰਹਭਾਵੇਨ ਥਾਮਗਤਂ, ਤਤੋ ਚ ਚਿਰਰਤ੍ਤਂ ਅਧਿਟ੍ਠਿਤਂ ਸਨ੍ਤਾਨਂ ਅਜ੍ਝਾਰੁਯ੍ਹ ਠਿਤਂ. ਗਨ੍ਥਨ੍ਤਿ ਅਭਿਜ੍ਝਾਕਾਯਗਨ੍ਥਾਦਿਂ ਮਮ ਸਨ੍ਤਾਨੇ ਗਨ੍ਥਭੂਤਂ ਕਿਲੇਸਵਿਸਦੋਸਂ ਪਵਾਹਨੋ ਬੁਦ੍ਧੋ ਭਗਵਾ ਅਤ੍ਤਨੋ ਦੇਸਨਾਨੁਭਾਵੇਨ ਅਪਾਨੁਦੀ ਪਰਿਜਹਾਪੇਸਿ, ਗਨ੍ਥੇਸੁ ਹਿ ਅਨਵਸੇਸਤੋ ਪਹੀਨੇਸੁ ਅਪ੍ਪਹੀਨੋ ਨਾਮ ਕਿਲੇਸੋ ਨਤ੍ਥੀਤਿ.

ਤੇਲਕਾਨਿਤ੍ਥੇਰਗਾਥਾਵਣ੍ਣਨਾ ਨਿਟ੍ਠਿਤਾ.