੪. ਰਟ੍ਠਪਾਲਤ੍ਥੇਰਗਾਥਾਵਣ੍ਣਨਾ

ਪਸ੍ਸ ਚਿਤ੍ਤਕਤਨ੍ਤਿਆਦਿਕਾ ਆਯਸ੍ਮਤੋ ਰਟ੍ਠਪਾਲਤ੍ਥੇਰਸ੍ਸ ਗਾਥਾ. ਕਾ ਉਪ੍ਪਤ੍ਤਿ? ਅਯਂ ਕਿਰ ਪਦੁਮੁਤ੍ਤਰਸ੍ਸ ਭਗਵਤੋ ਉਪ੍ਪਤ੍ਤਿਤੋ ਪੁਰੇਤਰਮੇਵ ਹਂਸਵਤੀਨਗਰੇ ਗਹਪਤਿਮਹਾਸਾਲਕੁਲੇ ਨਿਬ੍ਬਤ੍ਤਿਤ੍ਵਾ ਵਯਪ੍ਪਤ੍ਤੋ ਪਿਤੁ ਅਚ੍ਚਯੇਨ ਘਰਾਵਾਸੇ ਪਤਿਟ੍ਠਿਤੋ ਰਤਨਕੋਟ੍ਠਾਗਾਰਕਮ੍ਮਿਕੇਨ ਦਸ੍ਸਿਤਂ ਅਪਰਿਮਾਣਂ ਕੁਲਵਂਸਾਨੁਗਤਂ ਧਨਂ ਦਿਸ੍ਵਾ ‘‘ਇਮਂ ਏਤ੍ਤਕਂ ਧਨਰਾਸਿਂ ਮਯ੍ਹਂ ਪਿਤੁਅਯ੍ਯਕਪਯ੍ਯਕਾਦਯੋ ਅਤ੍ਤਨਾ ਸਦ੍ਧਿਂ ਗਹੇਤ੍ਵਾ ਗਨ੍ਤੁਂ ਨਾਸਕ੍ਖਿਂਸੁ, ਮਯਾ ਪਨ ਗਹੇਤ੍ਵਾ ਗਨ੍ਤੁਂ ਵਟ੍ਟਤੀ’’ਤਿ ਚਿਨ੍ਤੇਤ੍ਵਾ ਕਪਣਦ੍ਧਿਕਾਦੀਨਂ ਮਹਾਦਾਨਂ ਅਦਾਸਿ. ਸੋ ਅਭਿਞ੍ਞਾਲਾਭਿਂ ਏਕਂ ਤਾਪਸਂ ਉਪਟ੍ਠਹਨ੍ਤੋ ਤੇਨ ਦੇਵਲੋਕਾਧਿਪਚ੍ਚੇ ਨਿਯੋਜਿਤੋ ਯਾਵਜੀਵਂ ਪੁਞ੍ਞਾਨਿ ਕਤ੍ਵਾ ਤਤੋ ਚੁਤੋ ਦੇਵਲੋਕੇ ਨਿਬ੍ਬਤ੍ਤਿਤ੍ਵਾ ਦਿਬ੍ਬਸਮ੍ਪਤ੍ਤਿਂ ਅਨੁਭਵਨ੍ਤੋ ਤਤ੍ਥ ਯਾਵਤਾਯੁਕਂ ਠਤ੍ਵਾ ਤਤੋ ਚੁਤੋ ਮਨੁਸ੍ਸਲੋਕੇ ਭਿਨ੍ਨਂ ਰਟ੍ਠਂ ਸਨ੍ਧਾਰੇਤੁਂ ਸਮਤ੍ਥਸ੍ਸ ਕੁਲਸ੍ਸ ਏਕਪੁਤ੍ਤਕੋ ਹੁਤ੍ਵਾ ਨਿਬ੍ਬਤ੍ਤਿ.

ਤੇਨ ਚ ਸਮਯੇਨ ਪਦੁਮੁਤ੍ਤਰੋ ਭਗਵਾ ਲੋਕੇ ਉਪ੍ਪਜ੍ਜਿਤ੍ਵਾ ਪਵਤ੍ਤਿਤਵਰਧਮ੍ਮਚਕ੍ਕੋ ਵੇਨੇਯ੍ਯਸਤ੍ਤੇ ਨਿਬ੍ਬਾਨਮਹਾਨਗਰਸਙ੍ਖਾਤਂ ਖੇਮਨ੍ਤਭੂਮਿਂ ਸਮ੍ਪਾਪੇਸਿ. ਅਥ ਸੋ ਕੁਲਪੁਤ੍ਤੋ ਅਨੁਕ੍ਕਮੇਨ ਵਿਞ੍ਞੁਤਂ ਪਤ੍ਤੋ ਏਕਦਿਵਸਂ ਉਪਾਸਕੇਹਿ ਸਦ੍ਧਿਂ ਵਿਹਾਰਂ ਗਨ੍ਤ੍ਵਾ ਸਤ੍ਥਾਰਂ ਧਮ੍ਮਂ ਦੇਸੇਨ੍ਤਂ ਦਿਸ੍ਵਾ ਪਸਨ੍ਨਚਿਤ੍ਤੋ ਪਰਿਸਪਰਿਯਨ੍ਤੇ ਨਿਸੀਦਿ. ਤੇਨ ਖੋ ਪਨ ਸਮਯੇਨ ਸਤ੍ਥਾ ਏਕਂ ਭਿਕ੍ਖੁਂ ਸਦ੍ਧਾਪਬ੍ਬਜਿਤਾਨਂ ਅਗ੍ਗਟ੍ਠਾਨੇ ਠਪੇਸਿ. ਤਂ ਦਿਸ੍ਵਾ ਸੋ ਪਸਨ੍ਨਮਾਨਸੋ ਤਦਤ੍ਥਾਯ ਚਿਤ੍ਤਂ ਠਪੇਤ੍ਵਾ ਸਤਸਹਸ੍ਸਭਿਕ੍ਖੁਪਰਿਵੁਤਸ੍ਸ ਭਗਵਤੋ ਮਹਤਾ ਸਕ੍ਕਾਰੇਨ ਸਤ੍ਤਾਹਂ ਮਹਾਦਾਨਂ ਪਵਤ੍ਤੇਤ੍ਵਾ ਪਣਿਧਾਨਂ ਅਕਾਸਿ. ਸਤ੍ਥਾ ਤਸ੍ਸ ਅਨਨ੍ਤਰਾਯੇਨ ਇਜ੍ਝਨਭਾਵਂ ਦਿਸ੍ਵਾ ‘‘ਅਨਾਗਤੇ ਗੋਤਮਸ੍ਸ ਨਾਮ ਸਮ੍ਮਾਸਮ੍ਬੁਦ੍ਧਸ੍ਸ ਸਾਸਨੇ ਸਦ੍ਧਾਪਬ੍ਬਜਿਤਾਨਂ ਅਗ੍ਗੋ ਭਵਿਸ੍ਸਤੀ’’ਤਿ ਬ੍ਯਾਕਾਸਿ. ਸੋ ਸਤ੍ਥਾਰਂ ਭਿਕ੍ਖੁਸਙ੍ਘਞ੍ਚ ਵਨ੍ਦਿਤ੍ਵਾ ਉਟ੍ਠਾਯਾਸਨਾ ਪਕ੍ਕਾਮਿ. ਸੋ ਤਤ੍ਥ ਯਾਵਤਾਯੁਕਂ ਪੁਞ੍ਞਾਨਿ ਕਤ੍ਵਾ ਤਤੋ ਚਵਿਤ੍ਵਾ ਦੇਵਮਨੁਸ੍ਸੇਸੁ ਸਂਸਰਨ੍ਤੋ ਇਤੋ ਦ੍ਵੇਨਵੁਤੇ ਕਪ੍ਪੇ ਫੁਸ੍ਸਸ੍ਸ ਭਗਵਤੋ ਕਾਲੇ ਸਤ੍ਥੁ ਵੇਮਾਤਿਕਭਾਤਿਕੇਸੁ ਤੀਸੁ ਰਾਜਪੁਤ੍ਤੇਸੁ ਸਤ੍ਥਾਰਂ ਉਪਟ੍ਠਹਨ੍ਤੇਸੁ ਤੇਸਂ ਪੁਞ੍ਞਕਿਰਿਯਾਯ ਕਿਚ੍ਚਂ ਅਕਾਸਿ.

ਏਵਂ ਤਤ੍ਥ ਤਤ੍ਥ ਭਵੇ ਤਂ ਤਂ ਬਹੁਂ ਕੁਸਲਂ ਉਪਚਿਨਿਤ੍ਵਾ ਸੁਗਤੀਸੁਯੇਵ ਸਂਸਰਨ੍ਤੋ ਇਮਸ੍ਮਿਂ ਬੁਦ੍ਧੁਪ੍ਪਾਦੇ ਕੁਰੁਰਟ੍ਠੇ ਥੁਲ੍ਲਕੋਟ੍ਠਿਕਨਿਗਮੇ ਰਟ੍ਠਪਾਲਸੇਟ੍ਠਿਨੋ ਗੇਹੇ ਨਿਬ੍ਬਤ੍ਤਿ, ਤਸ੍ਸ ਭਿਨ੍ਨਂ ਰਟ੍ਠਂ ਸਨ੍ਧਾਰੇਤੁਂ ਸਮਤ੍ਥੇ ਕੁਲੇ ਨਿਬ੍ਬਤ੍ਤਤ੍ਤਾ ਰਟ੍ਠਪਾਲੋਤਿ ਵਂਸਾਨੁਗਤਮੇਵ ਨਾਮਂ ਅਹੋਸਿ. ਸੋ ਮਹਤਾ ਪਰਿਵਾਰੇਨ ਵਡ੍ਢਨ੍ਤੋ ਅਨੁਕ੍ਕਮੇਨ ਯੋਬ੍ਬਨਪਤ੍ਤੋ ਮਾਤਾਪਿਤੂਹਿ ਪਤਿਰੂਪੇਨ ਦਾਰੇਨ ਸਂਯੋਜਿਤੋ ਮਹਨ੍ਤੇ ਚ ਯਸੇ ਪਤਿਟ੍ਠਾਪਿਤੋ ਦਿਬ੍ਬਸਮ੍ਪਤ੍ਤਿਸਦਿਸਂ ਸਮ੍ਪਤ੍ਤਿਂ ਪਚ੍ਚਨੁਭੋਤਿ. ਅਥ ਭਗਵਾ ਕੁਰੁਰਟ੍ਠੇ ਜਨਪਦਚਾਰਿਕਂ ਚਰਨ੍ਤੋ ਥੁਲ੍ਲਕੋਟ੍ਠਿਕਂ ਅਨੁਪਾਪੁਣਿ. ਤਂ ਸੁਤ੍ਵਾ ਰਟ੍ਠਪਾਲੋ ਕੁਲਪੁਤ੍ਤੋ ਸਤ੍ਥਾਰਂ ਉਪਸਙ੍ਕਮਿਤ੍ਵਾ ਸਤ੍ਥੁ ਸਨ੍ਤਿਕੇ ਧਮ੍ਮਂ ਸੁਤ੍ਵਾ ਪਟਿਲਦ੍ਧਸਦ੍ਧੋ ਪਬ੍ਬਜਿਤੁਕਾਮੋ ਸਤ੍ਤਾਹਂ ਭਤ੍ਤਚ੍ਛੇਦਂ ਕਤ੍ਵਾ ਕਿਚ੍ਛੇਨ ਕਸਿਰੇਨ ਮਾਤਾਪਿਤਰੋ ਅਨੁਜਾਨਾਪੇਤ੍ਵਾ ਸਤ੍ਥਾਰਂ ਉਪਸਙ੍ਕਮਿਤ੍ਵਾ ਪਬ੍ਬਜ੍ਜਂ ਯਾਚਿਤ੍ਵਾ ਸਤ੍ਥੁ ਆਣਤ੍ਤਿਯਾ ਅਞ੍ਞਤਰਸ੍ਸ ਥੇਰਸ੍ਸ ਸਨ੍ਤਿਕੇ ਪਬ੍ਬਜਿਤ੍ਵਾ ਯੋਨਿਸੋਮਨਸਿਕਾਰੇਨ ਕਮ੍ਮਂ ਕਰੋਨ੍ਤੋ ਵਿਪਸ੍ਸਨਂ ਵਡ੍ਢੇਤ੍ਵਾ ਅਰਹਤ੍ਤਂ ਪਾਪੁਣਿ. ਤੇਨ ਵੁਤ੍ਤਂ ਅਪਦਾਨੇ (ਅਪ. ਥੇਰ ੧.੨.੯੭-੧੧੧) –

‘‘ਪਦੁਮੁਤ੍ਤਰਸ੍ਸ ਭਗਵਤੋ, ਲੋਕਜੇਟ੍ਠਸ੍ਸ ਤਾਦਿਨੋ;

ਵਰਨਾਗੋ ਮਯਾ ਦਿਨ੍ਨੋ, ਈਸਾਦਨ੍ਤੋ ਉਰੂਲ਼੍ਹਵਾ.

‘‘ਸੇਤਚ੍ਛਤ੍ਤੋ ਪਸੋਭਿਤੋ, ਸਕਪ੍ਪਨੋ ਸਹਤ੍ਥਿਪੋ;

ਅਗ੍ਘਾਪੇਤ੍ਵਾਨ ਤਂ ਸਬ੍ਬਂ, ਸਙ੍ਘਾਰਾਮਂ ਅਕਾਰਯਿਂ.

‘‘ਚਤੁਪਞ੍ਞਾਸਸਹਸ੍ਸਾਨਿ, ਪਾਸਾਦੇ ਕਾਰਯਿਂ ਅਹਂ;

ਮਹੋਘਦਾਨਂ ਕਰਿਤ੍ਵਾਨ, ਨਿਯ੍ਯਾਦੇਸਿਂ ਮਹੇਸਿਨੋ.

‘‘ਅਨੁਮੋਦਿ ਮਹਾਵੀਰੋ, ਸਯਮ੍ਭੂ ਅਗ੍ਗਪੁਗ੍ਗਲੋ;

ਸਬ੍ਬੇ ਜਨੇ ਹਾਸਯਨ੍ਤੋ, ਦੇਸੇਸਿ ਅਮਤਂ ਪਦਂ.

‘‘ਤਂ ਮੇ ਬੁਦ੍ਧੋ ਵਿਯਾਕਾਸਿ, ਜਲਜੁਤ੍ਤਰਨਾਮਕੋ;

ਭਿਕ੍ਖੁਸਙ੍ਘੇ ਨਿਸੀਦਿਤ੍ਵਾ, ਇਮਾ ਗਾਥਾ ਅਭਾਸਥ.

‘‘ਚਤੁਪਞ੍ਞਾਸਸਹਸ੍ਸਾਨਿ, ਪਾਸਾਦੇ ਕਾਰਯੀ ਅਯਂ;

ਕਥਯਿਸ੍ਸਾਮਿ ਵਿਪਾਕਂ, ਸੁਣੋਥ ਮਮ ਭਾਸਤੋ.

‘‘ਅਟ੍ਠਾਰਸਸਹਸ੍ਸਾਨਿ, ਕੂਟਾਗਾਰਾ ਭਵਿਸ੍ਸਰੇ;

ਬ੍ਯਮ੍ਹੁਤ੍ਤਮਮ੍ਹਿ ਨਿਬ੍ਬਤ੍ਤਾ, ਸਬ੍ਬਸੋਣ੍ਣਮਯਾ ਚ ਤੇ.

‘‘ਪਞ੍ਞਾਸਕ੍ਖਤ੍ਤੁਂ ਦੇਵਿਨ੍ਦੋ, ਦੇਵਰਜ੍ਜਂ ਕਰਿਸ੍ਸਤਿ;

ਅਟ੍ਠਪਞ੍ਞਾਸਕ੍ਖਤ੍ਤੁਞ੍ਚ, ਚਕ੍ਕਵਤ੍ਤੀ ਭਵਿਸ੍ਸਤਿ.

‘‘ਕਪ੍ਪਸਤਸਹਸ੍ਸਮ੍ਹਿ, ਓਕ੍ਕਾਕਕੁਲਸਮ੍ਭਵੋ;

ਗੋਤਮੋ ਨਾਮ ਗੋਤ੍ਤੇਨ, ਸਤ੍ਥਾ ਲੋਕੇ ਭਵਿਸ੍ਸਤਿ.

‘‘ਦੇਵਲੋਕਾ ਚਵਿਤ੍ਵਾਨ, ਸੁਕ੍ਕਮੂਲੇਨ ਚੋਦਿਤੋ;

ਅਡ੍ਢੇ ਕੁਲੇ ਮਹਾਭੋਗੇ, ਨਿਬ੍ਬਤ੍ਤਿਸ੍ਸਤਿ ਤਾਵਦੇ.

‘‘ਸੋ ਪਚ੍ਛਾ ਪਬ੍ਬਜਿਤ੍ਵਾਨ, ਸੁਕ੍ਕਮੂਲੇਨ ਚੋਦਿਤੋ;

ਰਟ੍ਠਪਾਲੋਤਿ ਨਾਮੇਨ, ਹੇਸ੍ਸਤਿ ਸਤ੍ਥੁ ਸਾਵਕੋ.

‘‘ਪਧਾਨਪਹਿਤਤ੍ਤੋ ਸੋ, ਉਪਸਨ੍ਤੋ ਨਿਰੂਪਧਿ;

ਸਬ੍ਬਾਸਵੇ ਪਰਿਞ੍ਞਾਯ, ਨਿਬ੍ਬਾਯਿਸ੍ਸਤਿਨਾਸਵੋ.

‘‘ਉਟ੍ਠਾਯ ਅਭਿਨਿਕ੍ਖਮ੍ਮ, ਜਹਿਤਾ ਭੋਗਸਮ੍ਪਦਾ;

ਖੇਲ਼ਪਿਣ੍ਡੇਵ ਭੋਗਮ੍ਹਿ, ਪੇਮਂ ਮਯ੍ਹਂ ਨ ਵਿਜ੍ਜਤਿ.

‘‘ਵੀਰਿਯਂ ਮੇ ਧੁਰਧੋਰਯ੍ਹਂ, ਯੋਗਕ੍ਖੇਮਾਧਿਵਾਹਨਂ;

ਧਾਰੇਮਿ ਅਨ੍ਤਿਮਂ ਦੇਹਂ, ਸਮ੍ਮਾਸਮ੍ਬੁਦ੍ਧਸਾਸਨੇ.

‘‘ਪਟਿਸਮ੍ਭਿਦਾ ਚਤਸ੍ਸੋ, ਵਿਮੋਕ੍ਖਾਪਿ ਚ ਅਟ੍ਠਿਮੇ;

ਛਲ਼ਭਿਞ੍ਞਾ ਸਚ੍ਛਿਕਤਾ, ਕਤਂ ਬੁਦ੍ਧਸ੍ਸ ਸਾਸਨ’’ਨ੍ਤਿ.

ਅਰਹਤ੍ਤਂ ਪਨ ਪਤ੍ਵਾ ਸਤ੍ਥਾਰਂ ਅਨੁਜਾਨਾਪੇਤ੍ਵਾ ਮਾਤਾਪਿਤਰੋ ਪਸ੍ਸਿਤੁਂ ਥੁਲ੍ਲਕੋਟ੍ਠਿਕਂ ਗਨ੍ਤ੍ਵਾ, ਤਤ੍ਥ ਸਪਦਾਨਂ ਪਿਣ੍ਡਾਯ ਚਰਨ੍ਤੋ ਪਿਤੁ ਨਿਵੇਸਨੇ ਆਭਿਦੋਸਿਕਂ ਕੁਮ੍ਮਾਸਂ ਲਭਿਤ੍ਵਾ ਤਂ ਅਮਤਂ ਵਿਯ ਪਰਿਭੁਞ੍ਜਨ੍ਤੋ, ਪਿਤਰਾ ਨਿਮਨ੍ਤਿਤੋ ਸ੍ਵਾਤਨਾਯ ਅਧਿਵਾਸੇਤ੍ਵਾ, ਦੁਤਿਯਦਿਵਸੇ ਪਿਤੁ ਨਿਵੇਸਨੇ ਪਿਣ੍ਡਪਾਤਂ ਪਰਿਭੁਞ੍ਜਿਤ੍ਵਾ ਅਲਙ੍ਕਤਪਟਿਯਤ੍ਤੇ ਇਤ੍ਥਾਗਾਰਜਨੇ ਉਪਗਨ੍ਤ੍ਵਾ ‘‘ਕੀਦਿਸਾ ਨਾਮ ਤਾ, ਅਯ੍ਯਪੁਤ੍ਤ, ਅਚ੍ਛਰਾਯੋ, ਯਾਸਂ ਤ੍ਵਂ ਹੇਤੁ ਬ੍ਰਹ੍ਮਚਰਿਯਂ ਚਰਸੀ’’ਤਿਆਦੀਨਿ (ਮ. ਨਿ. ੨.੩੦੧) ਵਤ੍ਵਾ, ਪਲੋਭਨਕਮ੍ਮਂ ਕਾਤੁਂ ਆਰਦ੍ਧੇ ਤਸ੍ਸ ਅਧਿਪ੍ਪਾਯਂ ਪਰਿਵਤ੍ਤੇਤ੍ਵਾ ਅਨਿਚ੍ਚਤਾਦਿਪਟਿਸਂਯੁਤ੍ਤਂ ਧਮ੍ਮਂ ਕਥੇਨ੍ਤੋ –

੭੬੯. ‘‘ਪਸ੍ਸ ਚਿਤ੍ਤਕਤਂ ਬਿਮ੍ਬਂ, ਅਰੁਕਾਯਂ ਸਮੁਸ੍ਸਿਤਂ;

ਆਤੁਰਂ ਬਹੁਸਙ੍ਕਪ੍ਪਂ, ਯਸ੍ਸ ਨਤ੍ਥਿ ਧੁਵਂ ਠਿਤਿ.

੭੭੦. ‘‘ਪਸ੍ਸ ਚਿਤ੍ਤਕਤਂ ਰੂਪਂ, ਮਣਿਨਾ ਕੁਣ੍ਡਲੇਨ ਚ;

ਅਟ੍ਠਿਂ ਤਚੇਨ ਓਨਦ੍ਧਂ, ਸਹ ਵਤ੍ਥੇਹਿ ਸੋਭਤਿ.

੭੭੧. ‘‘ਅਲਤ੍ਤਕਕਤਾ ਪਾਦਾ, ਮੁਖਂ ਚੁਣ੍ਣਕਮਕ੍ਖਿਤਂ;

ਅਲਂ ਬਾਲਸ੍ਸ ਮੋਹਾਯ, ਨੋ ਚ ਪਾਰਗਵੇਸਿਨੋ.

੭੭੨. ‘‘ਅਟ੍ਠਾਪਦਕਤਾ ਕੇਸਾ, ਨੇਤ੍ਤਾ ਅਞ੍ਜਨਮਕ੍ਖਿਤਾ;

ਅਲਂ ਬਾਲਸ੍ਸ ਮੋਹਾਯ, ਨੋ ਚ ਪਾਰਗਵੇਸਿਨੋ.

੭੭੩. ‘‘ਅਞ੍ਜਨੀਵ ਨਵਾ ਚਿਤ੍ਤਾ, ਪੂਤਿਕਾਯੋ ਅਲਙ੍ਕਤੋ;

ਅਲਂ ਬਾਲਸ੍ਸ ਮੋਹਾਯ, ਨੋ ਚ ਪਾਰਗਵੇਸਿਨੋ.

੭੭੪. ‘‘ਓਦਹਿ ਮਿਗਵੋ ਪਾਸਂ, ਨਾਸਦਾ ਵਾਗੁਰਂ ਮਿਗੋ;

ਭੁਤ੍ਵਾ ਨਿਵਾਪਂ ਗਚ੍ਛਾਮ, ਕਨ੍ਦਨ੍ਤੇ ਮਿਗਬਨ੍ਧਕੇ.

੭੭੫. ‘‘ਛਿਨ੍ਨੋ ਪਾਸੋ ਮਿਗਵਸ੍ਸ, ਨਾਸਦਾ ਵਾਗੁਰਂ ਮਿਗੋ;

ਭੁਤ੍ਵਾ ਨਿਵਾਪਂ ਗਚ੍ਛਾਮ, ਸੋਚਨ੍ਤੇ ਮਿਗਲੁਦ੍ਦਕੇ’’ਤਿ. – ਇਮਾ ਗਾਥਾ ਅਭਾਸਿ;

ਤਤ੍ਥ ਚਿਤ੍ਤਕਤਨ੍ਤਿ ਚਿਤ੍ਤਂ ਕਤਂ ਚਿਤ੍ਤਕਤਂ, ਵਤ੍ਥਾਭਰਣਮਾਲਾਦੀਹਿ ਵਿਚਿਤ੍ਤਂ ਕਤਨ੍ਤਿ ਅਤ੍ਥੋ. ਬਿਮ੍ਬਨ੍ਤਿ ਦੀਘਾਦਿਭਾਵੇਨ ਯੁਤ੍ਤਟ੍ਠਾਨੇਸੁ ਦੀਘਾਦੀਹਿ ਅਙ੍ਗਪਚ੍ਚਙ੍ਗੇਹਿ ਮਣ੍ਡਿਤਂ ਅਤ੍ਤਭਾਵਂ. ਅਰੁਕਾਯਨ੍ਤਿ ਨਵਨ੍ਨਂ ਵਣਮੁਖਾਨਂ ਲੋਮਕੂਪਾਨਞ੍ਚ ਵਸੇਨ ਵਿਸ੍ਸਨ੍ਦਮਾਨਅਸੁਚਿਂ, ਸਬ੍ਬਸੋ ਚ ਅਰੁਭੂਤਂ ਵਣਭੂਤਂ ਅਰੂਨਂ ਵਾ ਕਾਯਂ. ਸਮੁਸ੍ਸਿਤਨ੍ਤਿ ਤੀਹਿ ਅਟ੍ਠਿਸਤੇਹਿ ਸਮੁਸ੍ਸਿਤਂ. ਆਤੁਰਨ੍ਤਿ ਸਬ੍ਬਕਾਲਂ ਇਰਿਯਾਪਥਨ੍ਤਰਾਦੀਹਿ ਪਰਿਹਰਿਤਬ੍ਬਤਾਯ ਨਿਚ੍ਚਂ ਗਿਲਾਨਂ. ਬਹੁਸਙ੍ਕਪ੍ਪਨ੍ਤਿ ਬਾਲਜਨੇਨ ਅਭੂਤਂ ਆਰੋਪੇਤ੍ਵਾ ਬਹੁਧਾ ਸਙ੍ਕਪ੍ਪਿਤਬ੍ਬਂ. ਯਸ੍ਸ ਨਤ੍ਥਿ ਧੁਵਂ ਠਿਤੀਤਿ ਯਸ੍ਸ ਕਾਯਸ੍ਸ ਧੁਵਭਾਵੋ ਠਿਤਿਸਭਾਵੋ ਨਤ੍ਥਿ, ਏਕਂਸਤੋ ਭੇਦਨਵਿਕਿਰਣਵਿਦ੍ਧਂਸਨਧਮ੍ਮੋਯੇਵ. ਤਂ ਪਸ੍ਸਾਤਿ ਸਮੀਪੇ ਠਿਤਂ ਜਨਂ, ਅਤ੍ਤਾਨਮੇਵ ਵਾ ਸਨ੍ਧਾਯ ਵਦਤਿ.

ਰੂਪਨ੍ਤਿ ਸਰੀਰਂ. ਸਰੀਰਮ੍ਪਿ ਹਿ ‘‘ਅਟ੍ਠਿਞ੍ਚ ਪਟਿਚ੍ਚ, ਨ੍ਹਾਰੁਞ੍ਚ ਪਟਿਚ੍ਚ, ਮਂਸਞ੍ਚ ਪਟਿਚ੍ਚ, ਚਮ੍ਮਞ੍ਚ ਪਟਿਚ੍ਚ, ਆਕਾਸੋ ਪਰਿਵਾਰਿਤੋ ‘ਰੂਪਨ੍ਤ੍ਵੇਵ ਸਙ੍ਖਂ ਗਚ੍ਛਤੀ’’ਤਿਆਦੀਸੁ (ਮ. ਨਿ. ੧.੩੦੬) ਰੂਪਨ੍ਤਿ ਵੁਚ੍ਚਤਿ. ਮਣਿਨਾ ਕੁਣ੍ਡਲੇਨ ਚਾਤਿ ਸੀਸੂਪਗਾਦਿਆਭਰਣਗਤੇਨ ਮਣਿਨਾ ਕੁਣ੍ਡਲੇਨ ਚਿਤ੍ਤਕਤਂ. ਅਟ੍ਠਿਂ ਤਚੇਨ ਓਨਦ੍ਧਨ੍ਤਿ ਅਲ੍ਲਚਮ੍ਮੇਨ ਪਰਿਯੋਨਦ੍ਧਂ ਅਤਿਰੇਕਤਿਸਤਪਭੇਦਂ ਅਟ੍ਠਿਂ ਪਸ੍ਸਾਤਿ ਯੋਜਨਾ. ਕੁਣ੍ਡਲੇਨ ਚਾਤਿ ਚ-ਸਦ੍ਦੇਨ ਸੇਸਾਭਰਣਾਲਙ੍ਕਾਰੇ ਸਙ੍ਗਣ੍ਹਾਤਿ. ਸਹ ਵਤ੍ਥੇਹਿ ਸੋਭਤੀਤਿ ਤਯਿਦਂ ਰੂਪਂ ਮਣਿਨਾ ਚਿਤ੍ਤਕਤਮ੍ਪਿ ਵਤ੍ਥੇਹਿ ਪਟਿਚ੍ਛਾਦਿਤਮੇਵ ਸੋਭਤਿ, ਨ ਅਪਟਿਚ੍ਛਾਦਿਤਨ੍ਤਿ ਅਤ੍ਥੋ. ਯੇ ਪਨ ‘‘ਅਟ੍ਠਿਤਚੇਨਾ’’ਤਿ ਪਠਨ੍ਤਿ, ਤੇਸਂ ਅਟ੍ਠਿਤਚੇਨਂ ਓਨਦ੍ਧਂ ਸੋਭਤਿ, ਓਨਦ੍ਧਤ੍ਤਾ ਅਟ੍ਠਿਤਚੇਨਾਤਿ ਅਤ੍ਥੋ.

ਅਲਤ੍ਤਕਕਤਾਤਿ ਅਲਤ੍ਤਕੇਨ ਕਤਰਞ੍ਜਨਾ ਲਾਖਾਯ ਸਂਰਞ੍ਜਿਤਾ. ਪਾਦਾਤਿ ਚਰਣਾ. ਮੁਖਂ ਚੁਣ੍ਣਕਮਕ੍ਖਿਤਨ੍ਤਿ ਮੁਖਂ ਚੁਣ੍ਣਕੇਨ ਮਕ੍ਖਿਤਂ, ਯਂ ਮਣ੍ਡਨਮਨੁਯੁਤ੍ਤਾ ਸਾਸਪਕਕ੍ਕੇਨ ਮੁਖਪੀਲ਼ਕਾਦੀਨਿ ਹਰਿਤ੍ਵਾ ਲੋਣਮਤ੍ਤਿਕਾਯ ਦੁਟ੍ਠਲੋਹਿਤਂ ਹਰਿਤ੍ਵਾ ਮੁਖਚੁਣ੍ਣਕਵਿਲੇਪਨਂ ਕਰੋਨ੍ਤਿ, ਤਂ ਸਨ੍ਧਾਯ ਵੁਤ੍ਤਂ. ਅਲਨ੍ਤਿ ਬਾਲਸ੍ਸ ਅਨ੍ਧਪੁਥੁਜ੍ਜਨਸ੍ਸ ਨੋ ਚ ਪਾਰਗਵੇਸਿਨੋ ਵਟ੍ਟਾਭਿਰਤਸ੍ਸ ਮੋਹਾਯ ਸਮ੍ਮੋਹਨਾਯ ਸਮਤ੍ਥਂ ਤਸ੍ਸ ਚਿਤ੍ਤਂ ਮੋਹੇਤੁਂ ਪਰਿਯਤ੍ਤਂ, ਪਾਰਗਵੇਸਿਨੋ ਪਨ ਵਿਵਟ੍ਟਾਭਿਰਤਸ੍ਸ ਨੋ ਅਲਂ ਨ ਪਰਿਯਤ੍ਤਂ.

ਅਟ੍ਠਾਪਦਕਤਾਤਿ ਅਟ੍ਠਪਦਾਕਾਰੇਨ ਕਤਾ ਸਞ੍ਚਿਤਾ ਪੁਰਿਮਭਾਗੇ ਕੇਸੇ ਕਪ੍ਪੇਤ੍ਵਾ ਨਲਾਟਸ੍ਸ ਪਟਿਚ੍ਛਾਦਨਵਸੇਨ ਕਤਾ ਕੇਸਰਚਨਾ ਅਟ੍ਠਪਦਂ ਨਾਮ, ਯਂ ‘‘ਅਲਕ’’ਨ੍ਤਿਪਿ ਵੁਚ੍ਚਤਿ. ਨੇਤ੍ਤਾ ਅਞ੍ਜਨਮਕ੍ਖਿਤਾਤਿ ਉਭੋਪਿ ਨਯਨਾਨਿ ਅਨ੍ਤੋ ਦ੍ਵੀਸੁ ਅਨ੍ਤੇਸੁ ਚ ਯਥਾ ਅਞ੍ਜਨਚ੍ਛਾਯਾ ਦਿਸ੍ਸਤਿ, ਏਵਂ ਅਞ੍ਜਿਤਞ੍ਜਨਾਨਿ.

ਅਞ੍ਜਨੀਵ ਨਵਾ ਚਿਤ੍ਤਾ, ਪੂਤਿਕਾਯੋ ਅਲਙ੍ਕਤੋਤਿ ਯਥਾ ਅਞ੍ਜਨੀ ਅਞ੍ਜਨਨਾਲ਼ਿਕਾ ਨਵਾ ਅਭਿਨਵਾ ਮਾਲਾਕਮ੍ਮਮਕਰਦਨ੍ਤਾਦਿਵਸੇਨ ਚਿਤ੍ਤਾ ਬਹਿ ਮਟ੍ਠਾ ਉਜ੍ਜਲਾ ਦਸ੍ਸਨੀਯਾ, ਅਨ੍ਤੋ ਪਨ ਨ ਦਸ੍ਸਨੀਯਾ ਹੋਤਿ, ਏਵਮੇਵ ਤਾਸਂ ਕਾਯੋ ਨ੍ਹਾਨਬ੍ਭਞ੍ਜਨਵਤ੍ਥਾਲਙ੍ਕਾਰੇਹਿ ਅਲਙ੍ਕਤੋ ਬਹਿ ਉਜ੍ਜਲੋ, ਅਨ੍ਤੋ ਪਨ ਪੂਤਿ ਨਾਨਪ੍ਪਕਾਰਅਸੁਚੀਹਿ ਭਰਿਤੋ ਤਿਟ੍ਠਤੀਤਿ ਅਤ੍ਥੋ.

ਓਦਹੀਤਿ ਓਡ੍ਡੇਸਿ. ਮਿਗਵੋਤਿ, ਮਿਗਲੁਦ੍ਦਕੋ. ਪਾਸਨ੍ਤਿ, ਦਣ੍ਡਵਾਗੁਰਂ. ਨਾਸਦਾਤਿ ਨ ਸਙ੍ਘਟ੍ਟੇਸਿ. ਵਾਗੁਰਨ੍ਤਿ ਪਾਸਂ. ਨਿਵਾਪਨ੍ਤਿ ਮਿਗਾਨਂ ਖਾਦਨਤ੍ਥਾਯ ਖਿਤ੍ਤਂ ਤਿਣਾਦਿਘਾਸਂ. ਉਪਮਾ ਖੋ ਅਯਂ ਥੇਰੇਨ ਕਤਾ ਅਤ੍ਥਸ੍ਸ ਵਿਞ੍ਞਾਪਨਾਯ. ਅਯਞ੍ਹੇਤ੍ਥ ਅਤ੍ਥੋ – ਯਥਾ ਮਿਗਾਨਂ ਮਾਰਣਤ੍ਥਾਯ ਦਣ੍ਡਵਾਗੁਰਂ ਓਡ੍ਡੇਤ੍ਵਾ ਤਤ੍ਥ ਨਿਵਾਪਂ ਵਿਕਿਰਿਯ ਮਿਗਲੁਦ੍ਦਕੇ ਨਿਲੀਨੇ ਠਿਤੇ ਤਤ੍ਥੇਕੋ ਜਵਪਰਕ੍ਕਮਸਮ੍ਪਨ੍ਨੋ ਛੇਕੋ ਮਿਗੋ ਪਾਸਂ ਅਫੁਸਨ੍ਤੋ ਏਵ ਯਥਾਸੁਖਂ ਨਿਵਾਪਂ ਖਾਦਿਤ੍ਵਾ, ‘‘ਵਞ੍ਚੇਸਿ ਵਤ ਮਿਗੋ’’ਤਿ ਮਿਗਲੁਦ੍ਦਕੇ ਵਿਰਵਨ੍ਤੇ ਏਵ ਗਚ੍ਛਤਿ. ਅਪਰੋ ਮਿਗੋ ਬਲਵਾ ਛੇਕੋ ਜਵਸਮ੍ਪਨ੍ਨੋਵ ਤਤ੍ਥ ਗਨ੍ਤ੍ਵਾ ਨਿਵਾਪਂ ਖਾਦਿਤ੍ਵਾ ਤਤ੍ਥ ਤਤ੍ਥ ਪਾਸਂ ਛਿਨ੍ਦਿਤ੍ਵਾ, ‘‘ਵਞ੍ਚੇਸਿ ਵਤ ਮਿਗੋ, ਪਾਸੋ ਛਿਨ੍ਨੋ’’ਤਿ ਮਿਗਲੁਦ੍ਦਕੇ ਸੋਚਨ੍ਤੇ ਏਵ ਗਚ੍ਛਤਿ, ਏਵਂ ਮਯਮ੍ਪਿ ਪੁਬ੍ਬੇ ਪੁਥੁਜ੍ਜਨਕਾਲੇ ਮਾਤਾਪਿਤੂਹਿ ਆਸਜ੍ਜਨਤ੍ਥਾਯ ਨਿਯ੍ਯਾਦਿਤੇ ਭੋਗੇ ਭੁਞ੍ਜਿਤ੍ਵਾ ਤਤ੍ਥ ਤਤ੍ਥ ਅਸਜ੍ਜਮਾਨਾ ਨਿਕ੍ਖਨ੍ਤਾ. ਇਦਾਨਿ ਪਨ ਸਬ੍ਬਸੋ ਛਿਨ੍ਨਕਿਲੇਸਾ ਅਪਾਸਾ ਹੁਤ੍ਵਾ ਠਿਤਾ, ਤੇਹਿ ਦਿਨ੍ਨਭੋਜਨਂ ਭੁਞ੍ਜਿਤ੍ਵਾ ਤੇਸੁ ਸੋਚਨ੍ਤੇਸੁ ਏਵ ਗਚ੍ਛਾਮਾਤਿ.

ਏਵਂ ਥੇਰੋ ਮਿਗਲੁਦ੍ਦਕਂ ਵਿਯ ਮਾਤਾਪਿਤਰੋ, ਹਿਰਞ੍ਞਸੁਵਣ੍ਣਂ ਇਤ੍ਥਾਗਾਰਞ੍ਚ ਵਾਗੁਰਜਾਲਂ ਵਿਯ, ਅਤ੍ਤਨਾ ਪੁਬ੍ਬੇ ਭੁਤ੍ਤਭੋਗੇ ਚ ਇਦਾਨਿ ਭੁਤ੍ਤਭੋਜਨਞ੍ਚ ਨਿਵਾਪਤਿਣਂ ਵਿਯ, ਅਤ੍ਤਾਨਂ ਮਹਾਮਿਗਂ ਵਿਯ ਚ ਕਤ੍ਵਾ ਦਸ੍ਸੇਤਿ. ਇਮਾ ਗਾਥਾ ਵਤ੍ਵਾ ਵੇਹਾਸਂ ਅਬ੍ਭੁਗ੍ਗਨ੍ਤ੍ਵਾ ਰਞ੍ਞੋ ਕੋਰਬ੍ਯਸ੍ਸ ਮਿਗਾਜਿਨਉਯ੍ਯਾਨੇ ਮਙ੍ਗਲਸਿਲਾਪਟ੍ਟੇ ਨਿਸੀਦਿ. ਥੇਰਸ੍ਸ ਕਿਰ ਪਿਤਾ ਸਤ੍ਤਸੁ ਦ੍ਵਾਰਕੋਟ੍ਠਕੇਸੁ ਅਗ੍ਗਲ਼ਂ ਦਾਪੇਤ੍ਵਾ ਮਲ੍ਲੇ ਆਣਾਪੇਸਿ ‘‘ਨਿਕ੍ਖਮਿਤੁਂ ਮਾ ਦੇਥ, ਕਾਸਾਯਾਨਿ ਅਪਨੇਤ੍ਵਾ ਸੇਤਕਾਨਿ ਨਿਵਾਸੇਥਾ’’ਤਿ, ਤਸ੍ਮਾ ਥੇਰੋ ਆਕਾਸੇਨ ਅਗਮਾਸਿ. ਅਥ ਰਾਜਾ ਕੋਰਬ੍ਯੋ ਥੇਰਸ੍ਸ ਤਤ੍ਥ ਨਿਸਿਨ੍ਨਭਾਵਂ ਸੁਤ੍ਵਾ ਤਂ ਉਪਸਙ੍ਕਮਿਤ੍ਵਾ ਸਮ੍ਮੋਦਨੀਯਂ ਕਥਂ ਸਾਰਣੀਯਂ ਵੀਤਿਸਾਰੇਤ੍ਵਾ ‘‘ਇਧ, ਭੋ ਰਟ੍ਠਪਾਲ, ਪਬ੍ਬਜਨ੍ਤੋ ਬ੍ਯਾਧਿਪਾਰਿਜੁਞ੍ਞਂ ਵਾ ਜਰਾਭੋਗਞਾਤਿਪਾਰਿਜੁਞ੍ਞਂ ਵਾ ਪਤ੍ਤੋ ਪਬ੍ਬਜਤਿ. ਤ੍ਵਂ ਪਨ ਕਿਞ੍ਚਿਪਿ ਪਾਰਿਜੁਞ੍ਞਂ ਅਨੁਪਗਤੋ ਏਵ ਕਸ੍ਮਾ ਪਬ੍ਬਜਿਤੋ’’ਤਿ ਪੁਚ੍ਛਿ. ਅਥਸ੍ਸ ਥੇਰੋ, ‘‘ਉਪਨਿਯ੍ਯਤਿ ਲੋਕੋ ਅਦ੍ਧੁਵੋ, ਅਤਾਣੋ ਲੋਕੋ ਅਨਭਿਸ੍ਸਰੋ, ਅਸ੍ਸਕੋ ਲੋਕੋ ਸਬ੍ਬਂ ਪਹਾਯ ਗਮਨੀਯਂ, ਊਨੋ ਲੋਕੋ ਅਤਿਤ੍ਤੋ ਤਣ੍ਹਾਦਾਸੋ’’ਤਿ (ਮ. ਨਿ. ੨.੩੦੫) ਇਮੇਸਂ ਚਤੁਨ੍ਨਂ ਧਮ੍ਮੁਦ੍ਦੇਸਾਨਂ ਅਤ੍ਤਾਨਂ ਵਿਵਿਤ੍ਤਭਾਵਂ ਕਥੇਤ੍ਵਾ ਤਸ੍ਸਾ ਦੇਸਨਾਯ ਅਨੁਗੀਤਿਂ ਕਥੇਨ੍ਤੋ –

੭੭੬. ‘‘ਪਸ੍ਸਾਮਿ ਲੋਕੇ ਸਧਨੇ ਮਨੁਸ੍ਸੇ, ਲਦ੍ਧਾਨ ਵਿਤ੍ਤਂ ਨ ਦਦਨ੍ਤਿ ਮੋਹਾ;

ਲੁਦ੍ਧਾ ਧਨਂ ਸਨ੍ਨਿਚਯਂ ਕਰੋਨ੍ਤਿ, ਭਿਯ੍ਯੋਵ ਕਾਮੇ ਅਭਿਪਤ੍ਥਯਨ੍ਤਿ.

੭੭੭. ‘‘ਰਾਜਾ ਪਸਯ੍ਹਪ੍ਪਥਵਿਂ ਵਿਜੇਤ੍ਵਾ, ਸਸਾਗਰਨ੍ਤਂ ਮਹਿਮਾਵਸਨ੍ਤੋ;

ਓਰਂ ਸਮੁਦ੍ਦਸ੍ਸ ਅਤਿਤ੍ਤਰੂਪੋ, ਪਾਰਂ ਸਮੁਦ੍ਦਸ੍ਸਪਿ ਪਤ੍ਥਯੇਥ.

੭੭੮. ‘‘ਰਾਜਾ ਚ ਅਞ੍ਞੇ ਚ ਬਹੂ ਮਨੁਸ੍ਸਾ, ਅਵੀਤਤਣ੍ਹਾ ਮਰਣਂ ਉਪੇਨ੍ਤਿ;

ਊਨਾਵ ਹੁਤ੍ਵਾਨ ਜਹਨ੍ਤਿ ਦੇਹਂ, ਕਾਮੇਹਿ ਲੋਕਮ੍ਹਿ ਨ ਹਤ੍ਥਿ ਤਿਤ੍ਤਿ.

੭੭੯. ‘‘ਕਨ੍ਦਨ੍ਤਿ ਨਂ ਞਾਤੀ ਪਕਿਰਿਯ ਕੇਸੇ, ‘ਅਹੋ ਵਤਾ ਨੋ ਅਮਰਾ’ਤਿ ਚਾਹੁ;

ਵਤ੍ਥੇਨ ਨਂ ਪਾਰੁਤਂ ਨੀਹਰਿਤ੍ਵਾ, ਚਿਤਂ ਸਮੋਧਾਯ ਤਤੋ ਡਹਨ੍ਤਿ.

੭੮੦. ‘‘ਸੋ ਡਯ੍ਹਤਿ ਸੂਲੇਹਿ ਤੁਜ੍ਜਮਾਨੋ, ਏਕੇਨ ਵਤ੍ਥੇਨ ਪਹਾਯ ਭੋਗੇ;

ਨ ਮੀਯਮਾਨਸ੍ਸ ਭਵਨ੍ਤਿ ਤਾਣਾ, ਞਾਤੀ ਚ ਮਿਤ੍ਤਾ ਅਥ ਵਾ ਸਹਾਯਾ.

੭੮੧. ‘‘ਦਾਯਾਦਕਾ ਤਸ੍ਸ ਧਨਂ ਹਰਨ੍ਤਿ, ਸਤ੍ਤੋ ਪਨ ਗਚ੍ਛਤਿ ਯੇਨਕਮ੍ਮਂ;

ਨ ਮੀਯਮਾਨਂ ਧਨਮਨ੍ਵੇਤਿ ਕਿਞ੍ਚਿ, ਪੁਤ੍ਤਾ ਚ ਦਾਰਾ ਚ ਧਨਞ੍ਚ ਰਟ੍ਠਂ.

੭੮੨. ‘‘ਨ ਦੀਘਮਾਯੁਂ ਲਭਤੇ ਧਨੇਨ, ਨ ਚਾਪਿ ਵਿਤ੍ਤੇਨ ਜਰਂ ਵਿਹਨ੍ਤਿ;

ਅਪ੍ਪਂ ਹਿਦਂ ਜੀਵਿਤਮਾਹੁ ਧੀਰਾ, ਅਸਸ੍ਸਤਂ ਵਿਪ੍ਪਰਿਣਾਮਧਮ੍ਮਂ.

੭੮੩. ‘‘ਅਡ੍ਢਾ ਦਲਿਦ੍ਦਾ ਚ ਫੁਸਨ੍ਤਿ ਫਸ੍ਸਂ, ਬਾਲੋ ਚ ਧੀਰੋ ਚ ਤਥੇਵ ਫੁਟ੍ਠੋ;

ਬਾਲੋ ਹਿ ਬਾਲ੍ਯਾ ਵਧਿਤੋਵ ਸੇਤਿ, ਧੀਰੋ ਚ ਨੋ ਵੇਧਤਿ ਫਸ੍ਸਫੁਟ੍ਠੋ.

੭੮੪. ‘‘ਤਸ੍ਮਾ ਹਿ ਪਞ੍ਞਾਵ ਧਨੇਨ ਸੇਯ੍ਯਾ, ਯਾਯ ਵੋਸਾਨਮਿਧਾਧਿਗਚ੍ਛਤਿ;

ਅਬ੍ਯੋਸਿਤਤ੍ਤਾ ਹਿ ਭਵਾਭਵੇਸੁ, ਪਾਪਾਨਿ ਕਮ੍ਮਾਨਿ ਕਰੋਤਿ ਮੋਹਾ.

੭੮੫. ‘‘ਉਪੇਤਿ ਗਬ੍ਭਞ੍ਚ ਪਰਞ੍ਚ ਲੋਕਂ, ਸਂਸਾਰਮਾਪਜ੍ਜ ਪਰਮ੍ਪਰਾਯ;

ਤਸ੍ਸਪ੍ਪਪਞ੍ਞੋ ਅਭਿਸਦ੍ਦਹਨ੍ਤੋ, ਉਪੇਤਿ ਗਬ੍ਭਞ੍ਚ ਪਰਞ੍ਚ ਲੋਕਂ.

੭੮੬. ‘‘ਚੋਰੋ ਯਥਾ ਸਨ੍ਧਿਮੁਖੇ ਗਹੀਤੋ, ਸਕਮ੍ਮੁਨਾ ਹਞ੍ਞਤਿ ਪਾਪਧਮ੍ਮੋ;

ਏਵਂ ਪਜਾ ਪੇਚ੍ਚ ਪਰਮ੍ਹਿ ਲੋਕੇ, ਸਕਮ੍ਮੁਨਾ ਹਞ੍ਞਤਿ ਪਾਪਧਮ੍ਮੋ.

੭੮੭. ‘‘ਕਾਮਾ ਹਿ ਚਿਤ੍ਰਾ ਮਧੁਰਾ ਮਨੋਰਮਾ, ਵਿਰੂਪਰੂਪੇਨ ਮਥੇਨ੍ਤਿ ਚਿਤ੍ਤਂ;

ਆਦੀਨਵਂ ਕਾਮਗੁਣੇਸੁ ਦਿਸ੍ਵਾ, ਤਸ੍ਮਾ ਅਹਂ ਪਬ੍ਬਜਿਤੋਮ੍ਹਿ ਰਾਜ.

੭੮੮. ‘‘ਦੁਮਪ੍ਫਲਾਨੀਵ ਪਤਨ੍ਤਿ ਮਾਣਵਾ, ਦਹਰਾ ਚ ਵੁਡ੍ਢਾ ਚ ਸਰੀਰਭੇਦਾ;

ਏਤਮ੍ਪਿ ਦਿਸ੍ਵਾ ਪਬ੍ਬਜਿਤੋਮ੍ਹਿ ਰਾਜ, ਅਪਣ੍ਣਕਂ ਸਾਮਞ੍ਞਮੇਵ ਸੇਯ੍ਯੋ.

੭੮੯. ‘‘ਸਦ੍ਧਾਯਾਹਂ ਪਬ੍ਬਜਿਤੋ, ਉਪੇਤੋ ਜਿਨਸਾਸਨੇ;

ਅਵਞ੍ਝਾ ਮਯ੍ਹਂ ਪਬ੍ਬਜ੍ਜਾ, ਅਨਣੋ ਭੁਞ੍ਜਾਮਿ ਭੋਜਨਂ.

੭੯੦. ‘‘ਕਾਮੇ ਆਦਿਤ੍ਤਤੋ ਦਿਸ੍ਵਾ, ਜਾਤਰੂਪਾਨਿ ਸਤ੍ਥਤੋ;

ਗਬ੍ਭਵੋਕ੍ਕਨ੍ਤਿਤੋ ਦੁਕ੍ਖਂ, ਨਿਰਯੇਸੁ ਮਹਬ੍ਭਯਂ.

੭੯੧. ‘‘ਏਤਮਾਦੀਨਵਂ ਞਤ੍ਵਾ, ਸਂਵੇਗਂ ਅਲਭਿਂ ਤਦਾ;

ਸੋਹਂ ਵਿਦ੍ਧੋ ਤਦਾ ਸਨ੍ਤੋ, ਸਮ੍ਪਤ੍ਤੋ ਆਸਵਕ੍ਖਯਂ.

੭੯੨. ‘‘ਪਰਿਚਿਣ੍ਣੋ ਮਯਾ ਸਤ੍ਥਾ, ਕਤਂ ਬੁਦ੍ਧਸ੍ਸ ਸਾਸਨਂ;

ਓਹਿਤੋ ਗਰੁਕੋ ਭਾਰੋ, ਭਵਨੇਤ੍ਤਿ ਸਮੂਹਤਾ.

੭੯੩. ‘‘ਯਸ੍ਸਤ੍ਥਾਯ ਪਬ੍ਬਜਿਤੋ, ਅਗਾਰਸ੍ਮਾਨਗਾਰਿਯਂ;

ਸੋ ਮੇ ਅਤ੍ਥੋ ਅਨੁਪ੍ਪਤ੍ਤੋ, ਸਬ੍ਬਸਂਯੋਜਨਕ੍ਖਯੋ’’ਤਿ. – ਇਮਾ ਗਾਥਾ ਅਵੋਚ;

ਤਤ੍ਥ ਪਸ੍ਸਾਮਿ ਲੋਕੇਤਿ ਅਹਂ, ਮਹਾਰਾਜ, ਇਮਸ੍ਮਿਂ ਲੋਕੇ ਸਧਨੇ ਧਨਸਮ੍ਪਨ੍ਨੇ ਅਡ੍ਢੇ ਮਨੁਸ੍ਸੇ ਪਸ੍ਸਾਮਿ, ਤੇ ਪਨ ਲਦ੍ਧਾਨ ਵਿਤ੍ਤਂ ਧਨਂ ਲਭਿਤ੍ਵਾ ਭੋਗਸਮ੍ਪਤ੍ਤਿਯਂ ਠਿਤਾ ਸਮਣਬ੍ਰਾਹ੍ਮਣਾਦੀਸੁ ਕਸ੍ਸਚਿ ਕਿਞ੍ਚਿਪਿ ਨ ਦਦਨ੍ਤਿ. ਕਸ੍ਮਾ? ਮੋਹਾ ਕਮ੍ਮਸ੍ਸਕਤਾਪਞ੍ਞਾਯ ਅਭਾਵਤੋ. ਲੁਦ੍ਧਾ ਲੋਭਾਭਿਭੂਤਾ ਯਥਾਲਦ੍ਧਂ ਧਨਂ ਸਨ੍ਨਿਚਯਂ ਸਬ੍ਬਸੋ ਨਿਚੇਤਬ੍ਬਂ ਨਿਧੇਤਬ੍ਬਂ ਕਰੋਨ੍ਤਿ. ਭਿਯ੍ਯੋਵ ਯਥਾਧਿਗਤਕਾਮਤੋ ਉਪਰਿ ਕਾਮੇ ਕਾਮਗੁਣੇ ‘‘ਤਥਾਹਂ ਏਦਿਸੇ ਚ ਭੋਗੇ ਪਟਿਲਭੇਯ੍ਯ’’ਨ੍ਤਿ ਅਭਿਪਤ੍ਥਯਨ੍ਤਿ ਪਚ੍ਚਾਸੀਸਨ੍ਤਿ ਤਜ੍ਜਞ੍ਚ ਵਾਯਾਮਂ ਕਰੋਨ੍ਤਿ.

ਭਿਯ੍ਯੋ ਕਾਮਪਤ੍ਥਨਾਯ ਉਦਾਹਰਣਂ ਦਸ੍ਸੇਨ੍ਤੋ ‘‘ਰਾਜਾ’’ਤਿਆਦਿਮਾਹ. ਤਤ੍ਥ ਪਸਯ੍ਹਪ੍ਪਥਵਿਂ ਵਿਜੇਤ੍ਵਾਤਿ ਅਤ੍ਤਨੋ ਵਂਸਾਨੁਗਤਂ ਪਥਵਿਂ ਬਲਕ੍ਕਾਰੇਨ ਅਭਿਵਿਜਿਯ. ਆਵਸਨ੍ਤੋਤਿ ਪਸਾਸੇਨ੍ਤੋ. ਓਰਂ ਸਮੁਦ੍ਦਸ੍ਸਾਤਿ ਅਨਵਸੇਸਂ ਸਮੁਦ੍ਦਸ੍ਸ ਓਰਭਾਗਂ ਲਭਿਤ੍ਵਾਪਿ ਤੇਨ ਅਤਿਤ੍ਤਰੂਪੋ ਪਾਰਂ ਸਮੁਦ੍ਦਸ੍ਸ ਦੀਪਨ੍ਤਰਮ੍ਪਿ ਪਤ੍ਥਯੇਯ੍ਯ.

ਅਵੀਤਤਣ੍ਹਾਤਿ ਅਵਿਗਤਤਣ੍ਹਾ. ਊਨਾਵਾਤਿ ਅਪਰਿਪੁਣ੍ਣਮਨੋਰਥਾਵ. ਕਾਮੇਹਿ ਲੋਕਮ੍ਹਿ ਨ ਹਤ੍ਥਿ ਤਿਤ੍ਤੀਤਿ ਤਣ੍ਹਾਵਿਪਨ੍ਨਾਨਂ ਇਮਸ੍ਮਿਂ ਲੋਕੇ ਵਤ੍ਥੁਕਾਮੇਹਿ ਤਿਤ੍ਤਿ ਨਾਮ ਨਤ੍ਥਿ.

ਕਨ੍ਦਨ੍ਤਿ ਨਨ੍ਤਿ ਮਤਪੁਰਿਸਂ ਉਦ੍ਦਿਸ੍ਸ ਤਸ੍ਸ ਗੁਣੇ ਕਿਤ੍ਤੇਨ੍ਤਾ ਕਨ੍ਦਨਂ ਕਰੋਨ੍ਤਿ. ਅਹੋ ਵਤਾ ਨੋ ਅਮਰਾਤਿ ਚਾਹੂਤਿ ਅਹੋ ਵਤ ਅਮ੍ਹਾਕਂ ਞਾਤੀ ਅਮਰਾ ਸਿਯੁਨ੍ਤਿ ਚ ਕਥੇਨ੍ਤਿ, ਗਾਥਾਸੁਖਤ੍ਥਞ੍ਹੇਤ੍ਥ ਵਤਾ-ਇਤਿ ਦੀਘਂ ਕਤ੍ਵਾ ਵੁਤ੍ਤਂ.

ਸੋ ਡਯ੍ਹਤਿ ਸੂਲੇਹਿ ਤੁਜ੍ਜਮਾਨੋਤਿ ਸੋ ਮਤਸਤ੍ਤੋ ਛਵਡਾਹਕੇਹਿ ਸਮ੍ਮਾ ਝਾਪੇਤੁਂ ਸੂਲੇਹਿ ਤੁਜ੍ਜਮਾਨੋ. ਤਾਣਾਤਿ ਪਰਿਤ੍ਤਾਣਕਰਾ.

ਯੇਨਕਮ੍ਮਨ੍ਤਿ ਯਥਾਕਮ੍ਮਂ. ਧਨਨ੍ਤਿ ਧਨਾਯਿਤਬ੍ਬਂ ਯਂਕਿਞ੍ਚਿ ਵਤ੍ਥੁ. ਪੁਨ ਧਨਨ੍ਤਿ ਹਿਰਞ੍ਞਸੁਵਣ੍ਣਂ ਸਨ੍ਧਾਯ ਵਦਤਿ.

‘‘ਨ ਦੀਘਮਾਯੁ’’ਨ੍ਤਿਆਦਿਨਾ ਕਾਮਗੁਣਸ੍ਸ ਜਰਾਯ ਚ ਪਟਿਕਾਰਾਭਾਵਂ ਵਤ੍ਵਾ ਪੁਨ ਤਸ੍ਸ ਏਕਨ੍ਤਿਕਭਾਵਂ ਦਸ੍ਸੇਤੁਂ ‘‘ਅਪ੍ਪਂ ਹੀ’’ਤਿਆਦਿ ਵੁਤ੍ਤਂ. ਫੁਸਨ੍ਤੀਤਿ ਅਨਿਟ੍ਠਫਸ੍ਸਂ ਫੁਸਨ੍ਤਿ ਪਾਪੁਣਨ੍ਤਿ, ਤਤ੍ਥ ਅਡ੍ਢਦਲਿਦ੍ਦਤਾ ਅਕਾਰਣਨ੍ਤਿ ਦਸ੍ਸੇਤਿ. ਫਸ੍ਸਂ ਬਾਲੋ ਚ ਧੀਰੋ ਚ ਤਥੇਵ ਫੁਟ੍ਠੋਤਿ ਯਥਾ ਬਾਲੋ ਇਟ੍ਠਾਨਿਟ੍ਠਸਮ੍ਫਸ੍ਸਂ ਫੁਟ੍ਠੋ, ਤਥੇਵ ਧੀਰੋ ਇਟ੍ਠਾਨਿਟ੍ਠਫਸ੍ਸਂ ਫੁਟ੍ਠੋ ਹੋਤਿ, ਨ ਏਤ੍ਥ ਬਾਲਪਣ੍ਡਿਤਾਨਂ ਕੋਚਿ ਵਿਸੇਸੋ. ਅਯਂ ਪਨ ਵਿਸੇਸੋ, ਬਾਲੋ ਹਿ ਬਾਲ੍ਯਾ ਵਧਿਤੋਵ ਸੇਤੀਤਿ ਬਾਲਪੁਗ੍ਗਲੋ ਕੇਨਚਿ ਦੁਕ੍ਖਧਮ੍ਮੇਨ ਫੁਟ੍ਠੋ ਸੋਚਨ੍ਤੋ ਕਿਲਮਨ੍ਤੋ ਉਰਤ੍ਤਾਲ਼ਿਂ ਕਨ੍ਦਨ੍ਤੋ ਬਾਲਭਾਵੇਨ ਵਧਿਤੋ ਪੀਲ਼ਿਤੋਵ ਹੁਤ੍ਵਾ ਸੇਤਿ ਸਯਤਿ. ਇਤੋ ਚਿਤੋ ਚ ਆਵਟ੍ਟਨ੍ਤੋ ਵਿਵਟ੍ਟਨ੍ਤੋ ਵਿਰੋਧੇਨ੍ਤੋ ਵੇਧਤਿ ਫਸ੍ਸਫੁਟ੍ਠੋਤਿ ਧੀਰੋ ਪਨ ਪਣ੍ਡਿਤੋ ਦੁਕ੍ਖਸਮ੍ਫਸ੍ਸੇਨ ਸਮ੍ਫੁਟ੍ਠੋ ਨ ਵੇਧਤਿ ਕਮ੍ਪਨਮਤ੍ਤਮ੍ਪਿ ਤਸ੍ਸ ਨ ਹੋਤੀਤਿ.

ਤਸ੍ਮਾਤਿ ਯਸ੍ਮਾ ਬਾਲਪਣ੍ਡਿਤਾਨਂ ਲੋਕਧਮ੍ਮੇ ਏਦਿਸੀ ਪਵਤ੍ਤਿ, ਤਸ੍ਮਾ ਹਿ ਪਞ੍ਞਾਵ ਧਨੇਨ ਸੇਯ੍ਯਾ, ਯਾਯ ਵੋਸਾਨਮਿਧਾਧਿਗਚ੍ਛਤੀਤਿ ਪਞ੍ਞਾਵ ਧਨਤੋ ਪਾਸਂਸਤਰਾ, ਯਾਯ ਪਞ੍ਞਾਯ ਵੋਸਾਨਂ ਭਵਸ੍ਸ ਪਰਿਯੋਸਾਨਭੂਤਂ ਨਿਬ੍ਬਾਨਂ ਅਧਿਗਚ੍ਛਤਿ. ਅਬ੍ਯੋਸਿਤਤ੍ਤਾ ਹੀਤਿ ਅਨਧਿਗਤਨਿਟ੍ਠਤ੍ਤਾ. ਭਵਾਭਵੇਸੂਤਿ ਮਹਨ੍ਤਾਮਹਨ੍ਤੇਸੁ ਭਵੇਸੁ.

ਉਪੇਤਿ ਗਬ੍ਭਞ੍ਚ ਪਰਞ੍ਚ ਲੋਕਂ, ਸਂਸਾਰਮਾਪਜ੍ਜ ਪਰਮ੍ਪਰਾਯਾਤਿ ਯੋ ਪਾਪਾਨਿ ਕਤ੍ਵਾ ਅਪਰਾਪਰਂ ਸਂਸਰਣਮਾਪਜ੍ਜਿਤ੍ਵਾ ਉਪੇਤਿ ਗਬ੍ਭਞ੍ਚ ਪਰਞ੍ਚ ਲੋਕਂ ਗਬ੍ਭਸੇਯ੍ਯਾਯ ਪਰਲੋਕੁਪ੍ਪਤ੍ਤਿਯਾ ਚ ਨ ਮੁਚ੍ਚਤਿ, ਤਸ੍ਸ ਪਾਪਕਮ੍ਮਕਾਰਿਨੋ ਪੁਗ੍ਗਲਸ੍ਸ ਕਿਰਿਯਂ ਅਭਿਸਦ੍ਦਹਨ੍ਤੋ ‘‘ਅਤ੍ਤਾ ਚ ਮੇ ਹੋਤੀ’’ਤਿ ਪਤ੍ਤਿਯਾਯਨ੍ਤੋ ਅਞ੍ਞੋਪਿ ਅਪ੍ਪਪਞ੍ਞੋ ਬਾਲੋ ਯਥਾ ਪਟਿਪਜ੍ਜਿਤ੍ਵਾ ਉਪੇਤਿ ਗਬ੍ਭਞ੍ਚ ਪਰਞ੍ਚ ਲੋਕਂ, ਨ ਤਤੋ ਪਰਿਮੁਚ੍ਚਤਿ.

ਚੋਰੋ ਯਥਾਤਿ ਯਥਾ ਚੋਰੋ ਪਾਪਧਮ੍ਮੋ ਘਰਸਨ੍ਧਿਂ ਛਿਨ੍ਦਨ੍ਤੋ ਸਨ੍ਧਿਮੁਖੇ ਆਰਕ੍ਖਕਪੁਰਿਸੇਹਿ ਗਹਿਤੋ ਸਕਮ੍ਮੁਨਾ ਤੇਨ ਅਤ੍ਤਨੋ ਸਨ੍ਧਿਚ੍ਛੇਦਕਮ੍ਮੁਨਾ ਕਾਰਣਭੂਤੇਨ ਕਸਾਦੀਹਿ ਤਾਲ਼ਨਾਦਿਵਸੇਨ ਹਞ੍ਞਤਿ ਰਾਜਪੁਰਿਸੇਹਿ ਬਾਧਿਯ੍ਯਤਿ ਬਜ੍ਝਤਿ ਚ. ਏਵਂ ਪਜਾਤਿ ਏਵਮਯਂ ਸਤ੍ਤਲੋਕੋ ਇਧ ਪਾਪਾਨਿ ਕਰਿਤ੍ਵਾ ਪੇਚ੍ਚ ਪਤ੍ਵਾ ਤੇਨ ਕਮ੍ਮੁਨਾ ਪਰਮ੍ਹਿ ਲੋਕੇ ਨਿਰਯਾਦੀਸੁ ਹਞ੍ਞਤਿ, ਪਞ੍ਚਵਿਧਬਨ੍ਧਨਕਮ੍ਮਕਾਰਣਾਦਿਵਸੇਨ ਬਾਧਿਯ੍ਯਤਿ.

ਏਵਮੇਤਾਹਿ ਏਕਾਦਸਹਿ ਗਾਥਾਹਿ ਯਥਾਰਹਂ ਚਤ੍ਤਾਰੋ ਧਮ੍ਮੁਦ੍ਦੇਸੇ ਪਕਾਸੇਤ੍ਵਾ ਇਦਾਨਿ ਕਾਮੇਸੁ ਸਂਸਾਰੇ ਚ ਆਦੀਨਵਂ ਦਿਸ੍ਵਾ ਸਦ੍ਧਾਯ ਅਤ੍ਤਨੋ ਪਬ੍ਬਜਿਤਭਾਵਂ ਪਬ੍ਬਜਿਤਕਿਚ੍ਚਸ੍ਸ ਚ ਮਤ੍ਥਕਪ੍ਪਤ੍ਤਿਂ ਵਿਭਾਵੇਨ੍ਤੋ ‘‘ਕਾਮਾ ਹੀ’’ਤਿਆਦਿਮਾਹ. ਤਤ੍ਥ ਕਾਮਾਤਿ ਵਤ੍ਥੁਕਾਮਾ ਮਨਾਪਿਯਾ ਰੂਪਾਦਯੋ ਧਮ੍ਮਾ, ਕਿਲੇਸਕਾਮਾ ਸਬ੍ਬੇਪਿ ਰਾਗਪ੍ਪਭੇਦਾ. ਇਧ ਪਨ ਵਤ੍ਥੁਕਾਮਾ ਵੇਦਿਤਬ੍ਬਾ. ਤੇ ਹਿ ਰੂਪਾਦਿਵਸੇਨ ਅਨੇਕਪ੍ਪਕਾਰਤਾਯ ਚਿਤ੍ਰਾ. ਲੋਕਸ੍ਸਾਦਵਸੇਨ ਇਟ੍ਠਾਕਾਰਤਾਯ ਮਧੁਰਾ. ਬਾਲਪੁਥੁਜ੍ਜਨਾਨਂ ਮਨਂ ਰਮੇਨ੍ਤੀਤਿ ਮਨੋਰਮਾ. ਵਿਰੂਪਰੂਪੇਨਾਤਿ ਵਿਵਿਧਰੂਪੇਨ, ਅਨੇਕਵਿਧਸਭਾਵੇਨਾਤਿ ਅਤ੍ਥੋ. ਤੇ ਹਿ ਰੂਪਾਦਿਵਸੇਨ ਚਿਤ੍ਰਾ, ਨੀਲਾਦਿਵਸੇਨ ਵਿਵਿਧਰੂਪਾ. ਏਵਂ ਤੇਨ ਵਿਰੂਪਰੂਪੇਨ ਤਥਾ ਤਥਾ ਅਸ੍ਸਾਦਂ ਦਸ੍ਸੇਤ੍ਵਾ ਮਥੇਨ੍ਤਿ ਚਿਤ੍ਤਂ ਪਬ੍ਬਜ੍ਜਾਯ ਅਭਿਰਮਿਤੁਂ ਨ ਦੇਨ੍ਤੀਤਿ ਇਮਿਨਾ ਅਪ੍ਪਸ੍ਸਾਦਬਹੁਦੁਕ੍ਖਤਾਦਿਨਾ ਆਦੀਨਵਂ ਕਾਮਗੁਣੇਸੁ ਦਿਸ੍ਵਾ ਤਸ੍ਮਾ ਤਂਨਿਮਿਤ੍ਤਂ ਅਹਂ ਪਬ੍ਬਜਿਤੋ ਅਮ੍ਹਿ. ਦੁਮਪ੍ਫਲਾਨਿ ਪਕ੍ਕਕਾਲੇ ਅਪਰਿਪਕ੍ਕਕਾਲੇ ਚ ਯਤ੍ਥ ਕਤ੍ਥਚਿ ਪਰੂਪਕ੍ਕਮਤੋ ਸਰਸਤੋ ਵਾ ਪਤਨ੍ਤਿ, ਏਵਂ ਸਤ੍ਤਾ ਦਹਰਾ ਚ ਵੁਡ੍ਢਾ ਚ ਸਰੀਰਸ੍ਸ ਭੇਦਾ ਪਤਨ੍ਤਿਯੇਵ. ਏਤਮ੍ਪਿ ਦਿਸ੍ਵਾਤਿ ਏਵਂ ਅਨਿਚ੍ਚਤਮ੍ਪਿ ਪਞ੍ਞਾਚਕ੍ਖੁਨਾ ਦਿਸ੍ਵਾ, ਨ ਕੇਵਲਂ ਅਪ੍ਪਸ੍ਸਾਦਤਾਦਿਤਾਯ ਆਦੀਨਵਮੇਵਾਤਿ ਅਧਿਪ੍ਪਾਯੋ. ਅਪਣ੍ਣਕਨ੍ਤਿ ਅਵਿਰਦ੍ਧਨਕਂ ਸਾਮਞ੍ਞਮੇਵ ਸਮਣਭਾਵੋਵ ਸੇਯ੍ਯੋ ਉਤ੍ਤਰਿਤਰੋ.

ਸਦ੍ਧਾਯਾਤਿ ਕਮ੍ਮਂ ਕਮ੍ਮਫਲਂ ਬੁਦ੍ਧਸੁਬੁਦ੍ਧਤਂ ਧਮ੍ਮਸੁਧਮ੍ਮਤਂ ਸਙ੍ਘਸੁਪ੍ਪਟਿਪਤ੍ਤਿਞ੍ਚ ਸਦ੍ਦਹਿਤ੍ਵਾ. ਉਪੇਤੋ ਜਿਨਸਾਸਨੇਤਿ ਸਤ੍ਥੁ ਸਾਸਨੇ ਸਮ੍ਮਾਪਟਿਪਤ੍ਤਿਂ ਉਪਗਤੋ. ਅਵਞ੍ਝਾ ਮਯ੍ਹਂ ਪਬ੍ਬਜ੍ਜਾ ਅਰਹਤ੍ਤਸ੍ਸ ਅਧਿਗਤਤ੍ਤਾ. ਤਤੋ ਏਵ ਅਨਣੋ ਭੁਞ੍ਜਾਮਿ ਭੋਜਨਂ ਨਿਕ੍ਕਿਲੇਸਵਸੇਨ ਸਾਮਿਭਾਵਤੋ ਸਾਮਿਪਰਿਭੋਗੇਨ ਪਰਿਭੁਞ੍ਜਨਤੋ.

ਕਾਮੇ ਆਦਿਤ੍ਤਤੋ ਦਿਸ੍ਵਾਤਿ ਵਤ੍ਥੁਕਾਮੇ ਕਿਲੇਸਕਾਮੇ ਚ ਏਕਾਦਸਹਿ ਅਗ੍ਗੀਹਿ ਆਦਿਤ੍ਤਭਾਵਤੋ ਦਿਸ੍ਵਾ. ਜਾਤਰੂਪਾਨਿ ਸਤ੍ਥਤੋਤਿ ਕਤਾਕਤਪ੍ਪਭੇਦਾ ਸਬ੍ਬਸੁਵਣ੍ਣਵਿਕਤਿਯੋ ਅਨਤ੍ਥਾਵਹਤਾਯ ਨਿਸਿਤਸਤ੍ਥਤੋ. ਗਬ੍ਭਵੋਕ੍ਕਨ੍ਤਿਤੋ ਦੁਕ੍ਖਨ੍ਤਿ ਗਬ੍ਭਵੋਕ੍ਕਨ੍ਤਿਤੋ ਪਟ੍ਠਾਯ ਸਬ੍ਬਸਂਸਾਰਪਵਤ੍ਤਿਦੁਕ੍ਖਂ. ਨਿਰਯੇਸੁ ਮਹਬ੍ਭਯਨ੍ਤਿ ਸਉਸ੍ਸਦੇਸੁ ਅਟ੍ਠਸੁ ਮਹਾਨਿਰਯੇਸੁ ਲਬ੍ਭਮਾਨਂ ਮਹਾਭਯਞ੍ਚ ਸਬ੍ਬਤ੍ਥ ਦਿਸ੍ਵਾਤਿ ਯੋਜਨਾ.

ਏਤਮਾਦੀਨਵਂ ਞਤ੍ਵਾਤਿ ਏਤਂ ਕਾਮਾਨਂ ਆਦਿਤ੍ਤਤਾਦਿਂ ਸਂਸਾਰੇ ਆਦੀਨਵਂ ਦੋਸਂ ਞਤ੍ਵਾ. ਸਂਵੇਗਂ ਅਲਭਿਂ ਤਦਾਤਿ ਤਸ੍ਮਿਂ ਸਤ੍ਥੁ ਸਨ੍ਤਿਕੇ ਧਮ੍ਮਸ੍ਸ ਸੁਤਕਾਲੇ ਭਵਾਦਿਕੇ ਸਂਵੇਗਂ ਅਲਤ੍ਥਂ. ਵਿਦ੍ਧੋ ਤਦਾ ਸਨ੍ਤੋਤਿ ਤਸ੍ਮਿਂ ਗਹਟ੍ਠਕਾਲੇ ਰਾਗਸਲ੍ਲਾਦੀਹਿ ਵਿਦ੍ਧੋ ਸਮਾਨੋ ਇਦਾਨਿ ਸਤ੍ਥੁ ਸਾਸਨਂ ਆਗਮ੍ਮ ਸਮ੍ਪਤ੍ਤੋ ਆਸਵਕ੍ਖਯਂ, ਵਿਦ੍ਧੋ ਵਾ ਚਤ੍ਤਾਰਿ ਸਚ੍ਚਾਨਿ, ਪਟਿਵਿਦ੍ਧੋਤਿ ਅਤ੍ਥੋ. ਸੇਸਂ ਅਨ੍ਤਰਨ੍ਤਰਾਦੀਸੁ ਵੁਤ੍ਤਤ੍ਤਾ ਸੁਵਿਞ੍ਞੇਯ੍ਯਮੇਵ.

ਏਵਂ ਥੇਰੋ ਰਞ੍ਞੋ ਕੋਰਬ੍ਯਸ੍ਸ ਧਮ੍ਮਂ ਦੇਸੇਤ੍ਵਾ ਸਤ੍ਥੁ ਸਨ੍ਤਿਕਮੇਵ ਗਤੋ. ਸਤ੍ਥਾ ਚ ਅਪਰਭਾਗੇ ਅਰਿਯਗਣਮਜ੍ਝੇ ਨਿਸਿਨ੍ਨੋ ਥੇਰਂ ਸਦ੍ਧਾਪਬ੍ਬਜਿਤਾਨਂ ਅਗ੍ਗਟ੍ਠਾਨੇ ਠਪੇਸੀਤਿ.

ਰਟ੍ਠਪਾਲਤ੍ਥੇਰਗਾਥਾਵਣ੍ਣਨਾ ਨਿਟ੍ਠਿਤਾ.