੧੦. ਪਾਰਾਪਰਿਯਤ੍ਥੇਰਗਾਥਾਵਣ੍ਣਨਾ

ਸਮਣਸ੍ਸ ਅਹੁ ਚਿਨ੍ਤਾਤਿਆਦਿਕਾ ਆਯਸ੍ਮਤੋ ਪਾਰਾਪਰਿਯਤ੍ਥੇਰਸ੍ਸ ਗਾਥਾ. ਇਮਸ੍ਸ ਵਤ੍ਥੁ ਹੇਟ੍ਠਾ ਆਗਤਮੇਵ. ਤਾ ਚ ਗਾਥਾ ਸਤ੍ਥਰਿ ਧਰਨ੍ਤੇ ਅਤ੍ਤਨੋ ਪੁਥੁਜ੍ਜਨਕਾਲੇ ਮਨਚ੍ਛਟ੍ਠਾਨਂ ਇਨ੍ਦ੍ਰਿਯਾਨਂ ਨਿਗ੍ਗਣ੍ਹਨਚਿਨ੍ਤਾਯ ਪਕਾਸਨਵਸੇਨ ਭਾਸਿਤਾ. ਇਮਾ ਪਨ ਅਪਰਭਾਗੇ ਸਤ੍ਥਰਿ ਪਰਿਨਿਬ੍ਬੁਤੇ ਅਤ੍ਤਨੋ ਚ ਪਰਿਨਿਬ੍ਬਾਨੇ ਉਪਟ੍ਠਿਤੇ ਤਦਾ ਆਯਤਿਞ੍ਚ ਭਿਕ੍ਖੂਨਂ ਉਦ੍ਧਮ੍ਮਪਟਿਪਤ੍ਤਿਯਾ ਪਕਾਸਨਵਸੇਨ ਭਾਸਿਤਾ. ਤਤ੍ਥ –

੯੨੦. ‘‘ਸਮਣਸ੍ਸ ਅਹੁ ਚਿਨ੍ਤਾ, ਪੁਪ੍ਫਿਤਮ੍ਹਿ ਮਹਾਵਨੇ;

ਏਕਗ੍ਗਸ੍ਸ ਨਿਸਿਨ੍ਨਸ੍ਸ, ਪਵਿਵਿਤ੍ਤਸ੍ਸ ਝਾਯਿਨੋ’’ਤਿ. –

ਅਯਂ ਗਾਥਾ ਸਙ੍ਗੀਤਿਕਾਰੇਹਿ ਠਪਿਤਾ. ਤਸ੍ਸਤ੍ਥੋ ਹੇਟ੍ਠਾ ਵੁਤ੍ਤਨਯੋਵ. ਅਯਂ ਪਨ ਸਮ੍ਬਨ੍ਧੋ – ਸਤ੍ਥਰਿ ਅਗ੍ਗਸਾਵਕੇਸੁ ਏਕਚ੍ਚੇਸੁ ਮਹਾਥੇਰੇਸੁ ਚ ਪਰਿਨਿਬ੍ਬੁਤੇਸੁ ਅਤੀਤਸਤ੍ਥੁਕੇ ਪਾਵਚਨੇ ਸੁਬ੍ਬਚੇਸੁ ਸਿਕ੍ਖਾਕਾਮੇਸੁ ਭਿਕ੍ਖੂਸੁ ਦੁਲ੍ਲਭੇਸੁ, ਦੁਬ੍ਬਚੇਸੁ ਮਿਚ੍ਛਾਪਟਿਪਤ੍ਤਿਬਹੁਲੇਸੁ ਭਿਕ੍ਖੂਸੁ ਚ ਜਾਤੇਸੁ ਸੁਪੁਪ੍ਫਿਤੇ ਮਹਨ੍ਤੇ ਸਾਲਵਨੇ ਨਿਸਿਨ੍ਨਸ੍ਸ ਪਵਿਵਿਤ੍ਤਸ੍ਸ ਏਕਗ੍ਗਸ੍ਸ ਝਾਯਨਸੀਲਸ੍ਸ, ਸਮਿਤਪਾਪਤਾਯ ਸਮਣਸ੍ਸ, ਪਾਰਾਪਰਿਯਤ੍ਥੇਰਸ੍ਸ ਪਟਿਪਤ੍ਤਿਂ ਨਿਸ੍ਸਾਯ ਚਿਨ੍ਤਾ ਵੀਮਂਸਾ ਅਹੋਸੀਤਿ ਇਤਰਾ –

੯੨੧. ‘‘ਅਞ੍ਞਥਾ ਲੋਕਨਾਥਮ੍ਹਿ, ਤਿਟ੍ਠਨ੍ਤੇ ਪੁਰਿਸੁਤ੍ਤਮੇ;

ਇਰਿਯਂ ਆਸਿ ਭਿਕ੍ਖੂਨਂ, ਅਞ੍ਞਥਾ ਦਾਨਿ ਦਿਸ੍ਸਤਿ.

੯੨੨. ‘‘ਸੀਤਵਾਤਪਰਿਤ੍ਤਾਣਂ, ਹਿਰਿਕੋਪੀਨਛਾਦਨਂ;

ਮਤ੍ਤਟ੍ਠਿਯਂ ਅਭੁਞ੍ਜਿਂਸੁ, ਸਨ੍ਤੁਟ੍ਠਾ ਇਤਰੀਤਰੇ.

੯੨੩. ‘‘ਪਣੀਤਂ ਯਦਿ ਵਾ ਲੂਖਂ, ਅਪ੍ਪਂ ਵਾ ਯਦਿ ਵਾ ਬਹੁਂ;

ਯਾਪਨਤ੍ਥਂ ਅਭੁਞ੍ਜਿਂਸੁ, ਅਗਿਦ੍ਧਾ ਨਾਧਿਮੁਚ੍ਛਿਤਾ.

੯੨੪. ‘‘ਜੀਵਿਤਾਨਂ ਪਰਿਕ੍ਖਾਰੇ, ਭੇਸਜ੍ਜੇ ਅਥ ਪਚ੍ਚਯੇ;

ਨ ਬਾਲ਼੍ਹਂ ਉਸ੍ਸੁਕਾ ਆਸੁਂ, ਯਥਾ ਤੇ ਆਸਵਕ੍ਖਯੇ.

੯੨੫. ‘‘ਅਰਞ੍ਞੇ ਰੁਕ੍ਖਮੂਲੇਸੁ, ਕਨ੍ਦਰਾਸੁ ਗੁਹਾਸੁ ਚ;

ਵਿਵੇਕਮਨੁਬ੍ਰੂਹਨ੍ਤਾ, ਵਿਹਂਸੁ ਤਪ੍ਪਰਾਯਣਾ.

੯੨੬. ‘‘ਨੀਚਾ ਨਿਵਿਟ੍ਠਾ ਸੁਭਰਾ, ਮੁਦੂ ਅਥਦ੍ਧਮਾਨਸਾ;

ਅਬ੍ਯਾਸੇਕਾ ਅਮੁਖਰਾ, ਅਤ੍ਥਚਿਨ੍ਤਾਵਸਾਨੁਗਾ.

੯੨੭. ‘‘ਤਤੋ ਪਾਸਾਦਿਕਂ ਆਸਿ, ਗਤਂ ਭੁਤ੍ਤਂ ਨਿਸੇਵਿਤਂ;

ਸਿਨਿਦ੍ਧਾ ਤੇਲਧਾਰਾਵ, ਅਹੋਸਿ ਇਰਿਯਾਪਥੋ.

੯੨੮. ‘‘ਸਬ੍ਬਾਸਵਪਰਿਕ੍ਖੀਣਾ, ਮਹਾਝਾਯੀ ਮਹਾਹਿਤਾ;

ਨਿਬ੍ਬੁਤਾ ਦਾਨਿ ਤੇ ਥੇਰਾ, ਪਰਿਤ੍ਤਾ ਦਾਨਿ ਤਾਦਿਸਾ.

੯੨੯. ‘‘ਕੁਸਲਾਨਞ੍ਚ ਧਮ੍ਮਾਨਂ, ਪਞ੍ਞਾਯ ਚ ਪਰਿਕ੍ਖਯਾ;

ਸਬ੍ਬਾਕਾਰਵਰੂਪੇਤਂ, ਲੁਜ੍ਜਤੇ ਜਿਨਸਾਸਨਂ.

੯੩੦. ‘‘ਪਾਪਕਾਨਞ੍ਚ ਧਮ੍ਮਾਨਂ, ਕਿਲੇਸਾਨਞ੍ਚ ਯੋ ਉਤੁ;

ਉਪਟ੍ਠਿਤਾ ਵਿਵੇਕਾਯ, ਯੇ ਚ ਸਦ੍ਧਮ੍ਮਸੇਸਕਾ.

੯੩੧. ‘‘ਤੇ ਕਿਲੇਸਾ ਪਵਡ੍ਢਨ੍ਤਾ, ਆਵਿਸਨ੍ਤਿ ਬਹੁਂ ਜਨਂ;

ਕੀਲ਼ਨ੍ਤਿ ਮਞ੍ਞੇ ਬਾਲੇਹਿ, ਉਮ੍ਮਤ੍ਤੇਹਿਵ ਰਕ੍ਖਸਾ.

੯੩੨. ‘‘ਕਿਲੇਸੇਹਾਭਿਭੂਤਾ ਤੇ, ਤੇਨ ਤੇਨ ਵਿਧਾਵਿਤਾ;

ਨਰਾ ਕਿਲੇਸਵਤ੍ਥੂਸੁ, ਸਸਙ੍ਗਾਮੇਵ ਘੋਸਿਤੇ.

੯੩੩. ‘‘ਪਰਿਚ੍ਚਜਿਤ੍ਵਾ ਸਦ੍ਧਮ੍ਮਂ, ਅਞ੍ਞਮਞ੍ਞੇਹਿ ਭਣ੍ਡਰੇ;

ਦਿਟ੍ਠਿਗਤਾਨਿ ਅਨ੍ਵੇਨ੍ਤਾ, ਇਦਂ ਸੇਯ੍ਯੋਤਿ ਮਞ੍ਞਰੇ.

੯੩੪. ‘‘ਧਨਞ੍ਚ ਪੁਤ੍ਤਂ ਭਰਿਯਞ੍ਚ, ਛਡ੍ਡਯਿਤ੍ਵਾਨ ਨਿਗ੍ਗਤਾ;

ਕਟਚ੍ਛੁਭਿਕ੍ਖਹੇਤੂਪਿ, ਅਕਿਚ੍ਛਾਨਿ ਨਿਸੇਵਰੇ.

੯੩੫. ‘‘ਉਦਰਾਵਦੇਹਕਂ ਭੁਤ੍ਵਾ, ਸਯਨ੍ਤੁਤ੍ਤਾਨਸੇਯ੍ਯਕਾ;

ਕਥਾ ਵਡ੍ਢੇਨ੍ਤਿ ਪਟਿਬੁਦ੍ਧਾ, ਯਾ ਕਥਾ ਸਤ੍ਥੁਗਰਹਿਤਾ.

੯੩੬. ‘‘ਸਬ੍ਬਕਾਰੁਕਸਿਪ੍ਪਾਨਿ, ਚਿਤ੍ਤਿਂ ਕਤ੍ਵਾਨ ਸਿਕ੍ਖਰੇ;

ਅਵੂਪਸਨ੍ਤਾ ਅਜ੍ਝਤ੍ਤਂ, ਸਾਮਞ੍ਞਤ੍ਥੋਤਿਅਚ੍ਛਤਿ.

੯੩੭. ‘‘ਮਤ੍ਤਿਕਂ ਤੇਲਚੁਣ੍ਣਞ੍ਚ, ਉਦਕਾਸਨਭੋਜਨਂ;

ਗਿਹੀਨਂ ਉਪਨਾਮੇਨ੍ਤਿ, ਆਕਙ੍ਖਨ੍ਤਾ ਬਹੁਤ੍ਤਰਂ.

੯੩੮. ‘‘ਦਨ੍ਤਪੋਨਂ ਕਪਿਤ੍ਥਞ੍ਚ, ਪੁਪ੍ਫਂ ਖਾਦਨਿਯਾਨਿ ਚ;

ਪਿਣ੍ਡਪਾਤੇ ਚ ਸਮ੍ਪਨ੍ਨੇ, ਅਮ੍ਬੇ ਆਮਲਕਾਨਿ ਚ.

੯੩੯. ‘‘ਭੇਸਜ੍ਜੇਸੁ ਯਥਾ ਵੇਜ੍ਜਾ, ਕਿਚ੍ਚਾਕਿਚ੍ਚੇ ਯਥਾ ਗਿਹੀ;

ਗਣਿਕਾਵ ਵਿਭੂਸਾਯਂ, ਇਸ੍ਸਰੇ ਖਤ੍ਤਿਯਾ ਯਥਾ.

੯੪੦. ‘‘ਨੇਕਤਿਕਾ ਵਞ੍ਚਨਿਕਾ, ਕੂਟਸਕ੍ਖੀ ਅਪਾਟੁਕਾ;

ਬਹੂਹਿ ਪਰਿਕਪ੍ਪੇਹਿ, ਆਮਿਸਂ ਪਰਿਭੁਞ੍ਜਰੇ.

੯੪੧. ‘‘ਲੇਸਕਪ੍ਪੇ ਪਰਿਯਾਯੇ, ਪਰਿਕਪ੍ਪੇਨੁਧਾਵਿਤਾ;

ਜੀਵਿਕਤ੍ਥਾ ਉਪਾਯੇਨ, ਸਙ੍ਕਡ੍ਢਨ੍ਤਿ ਬਹੁਂ ਧਨਂ.

੯੪੨. ‘‘ਉਪਟ੍ਠਾਪੇਨ੍ਤਿ ਪਰਿਸਂ, ਕਮ੍ਮਤੋ ਨੋ ਚ ਧਮ੍ਮਤੋ;

ਧਮ੍ਮਂ ਪਰੇਸਂ ਦੇਸੇਨ੍ਤਿ, ਲਾਭਤੋ ਨੋ ਚ ਅਤ੍ਥਤੋ.

੯੪੩. ‘‘ਸਙ੍ਘਲਾਭਸ੍ਸ ਭਣ੍ਡਨ੍ਤਿ, ਸਙ੍ਘਤੋ ਪਰਿਬਾਹਿਰਾ;

ਪਰਲਾਭੋਪਜੀਵਨ੍ਤਾ, ਅਹਿਰੀਕਾ ਨ ਲਜ੍ਜਰੇ.

੯੪੪. ‘‘ਨਾਨੁਯੁਤ੍ਤਾ ਤਥਾ ਏਕੇ, ਮੁਣ੍ਡਾ ਸਙ੍ਘਾਟਿਪਾਰੁਤਾ;

ਸਮ੍ਭਾਵਨਂਯੇਵਿਚ੍ਛਨ੍ਤਿ, ਲਾਭਸਕ੍ਕਾਰਮੁਚ੍ਛਿਤਾ.

੯੪੫. ‘‘ਏਵਂ ਨਾਨਪ੍ਪਯਾਤਮ੍ਹਿ, ਨ ਦਾਨਿ ਸੁਕਰਂ ਤਥਾ;

ਅਫੁਸਿਤਂ ਵਾ ਫੁਸਿਤੁਂ, ਫੁਸਿਤਂ ਵਾਨੁਰਕ੍ਖਿਤੁਂ.

੯੪੬. ‘‘ਯਥਾ ਕਣ੍ਟਕਟ੍ਠਾਨਮ੍ਹਿ, ਚਰੇਯ੍ਯ ਅਨੁਪਾਹਨੋ;

ਸਤਿਂ ਉਪਟ੍ਠਪੇਤ੍ਵਾਨ, ਏਵਂ ਗਾਮੇ ਮੁਨੀ ਚਰੇ.

੯੪੭. ‘‘ਸਰਿਤ੍ਵਾ ਪੁਬ੍ਬਕੇ ਯੋਗੀ, ਤੇਸਂ ਵਤ੍ਤਮਨੁਸ੍ਸਰਂ;

ਕਿਞ੍ਚਾਪਿ ਪਚ੍ਛਿਮੋ ਕਾਲੋ, ਫੁਸੇਯ੍ਯ ਅਮਤਂ ਪਦਂ.

੯੪੮. ‘‘ਇਦਂ ਵਤ੍ਵਾ ਸਾਲਵਨੇ, ਸਮਣੋ ਭਾਵਿਤਿਨ੍ਦ੍ਰਿਯੋ;

ਬ੍ਰਾਹ੍ਮਣੋ ਪਰਿਨਿਬ੍ਬਾਯੀ, ਇਸਿ ਖੀਣਪੁਨਬ੍ਭਵੋ’’ਤਿ. –

ਇਮਾ ਗਾਥਾ ਥੇਰੇਨੇਵ ਭਾਸਿਤਾ.

ਤਤ੍ਥ ਇਰਿਯਂ ਆਸਿ ਭਿਕ੍ਖੂਨਨ੍ਤਿ ਪੁਰਿਸੁਤ੍ਤਮੇ ਲੋਕਨਾਥਮ੍ਹਿ ਸਮ੍ਮਾਸਮ੍ਬੁਦ੍ਧੇ ਤਿਟ੍ਠਨ੍ਤੇ ਧਰਨ੍ਤੇ ਏਤਰਹਿ ਪਟਿਪਤ੍ਤਿਭਾਵਤੋ. ਅਞ੍ਞਥਾ ਅਞ੍ਞੇਨ ਪਕਾਰੇਨ ਭਿਕ੍ਖੂਨਂ ਇਰਿਯਂ ਚਰਿਤਂ ਅਹੋਸਿ ਯਥਾਨੁਸਿਟ੍ਠਂ ਪਟਿਪਤ੍ਤਿਭਾਵਤੋ. ਅਞ੍ਞਥਾ ਦਾਨਿ ਦਿਸ੍ਸਤੀਤਿ ਇਦਾਨਿ ਪਨ ਤਤੋ ਅਞ੍ਞਥਾ ਭਿਕ੍ਖੂਨਂ ਇਰਿਯਂ ਦਿਸ੍ਸਤਿ ਅਯਾਥਾਵਪਟਿਪਤ੍ਤਿਭਾਵਤੋਤਿ ਅਧਿਪ੍ਪਾਯੋ.

ਇਦਾਨਿ ਸਤ੍ਥਰਿ ਧਰਨ੍ਤੇ ਯੇਨਾਕਾਰੇਨ ਭਿਕ੍ਖੂਨਂ ਪਟਿਪਤ੍ਤਿ ਅਹੋਸਿ, ਤਂ ਤਾਵ ਦਸ੍ਸੇਤੁਂ ‘‘ਸੀਤਵਾਤਪਰਿਤ੍ਤਾਣ’’ਨ੍ਤਿਆਦਿ ਵੁਤ੍ਤਂ. ਤਤ੍ਥ ਮਤ੍ਤਟ੍ਠਿਯਨ੍ਤਿ ਤਂ ਮਤ੍ਤਂ ਪਯੋਜਨਂ. ਯਾਵਦੇਵ ਸੀਤਵਾਤਪਰਿਤ੍ਤਾਣਂ, ਯਾਵਦੇਵ ਹਿਰੀਕੋਪੀਨਪਟਿਚ੍ਛਾਦਨਂ ਕਤ੍ਵਾ ਚੀਵਰਂ ਪਰਿਭੁਞ੍ਜਿਂਸੁ. ਕਥਂ? ਸਨ੍ਤੁਟ੍ਠਾ ਇਤਰੀਤਰੇ ਯਸ੍ਮਿਂ ਤਸ੍ਮਿਂ ਹੀਨੇ ਪਣੀਤੇ ਵਾ ਯਥਾਲਦ੍ਧੇ ਪਚ੍ਚਯੇ ਸਨ੍ਤੋਸਂ ਆਪਨ੍ਨਾ.

ਪਣੀਤਨ੍ਤਿ ਉਲ਼ਾਰਂ ਸਪ੍ਪਿਆਦਿਨਾ ਸਂਸਟ੍ਠਂ, ਤਦਭਾਵੇਨ ਲੂਖਂ. ਅਪ੍ਪਨ੍ਤਿ, ਚਤੁਪਞ੍ਚਾਲੋਪਮਤ੍ਤਮ੍ਪਿ. ਬਹੁਂ ਯਾਪਨਤ੍ਥਂ ਅਭੁਞ੍ਜਿਂਸੂਤਿ ਪਣੀਤਂ ਬਹੁਂ ਭੁਞ੍ਜਨ੍ਤਾਪਿ ਯਾਪਨਮਤ੍ਤਮੇਵ ਆਹਾਰਂ ਭੁਞ੍ਜਿਂਸੁ. ਤਤੋ ਏਵ ਅਗਿਦ੍ਧਾ ਗੇਧਂ ਅਨਾਪਨ੍ਨਾ. ਨਾਧਿਮੁਚ੍ਛਿਤਾ ਨ ਅਜ੍ਝੋਸਿਤਾ ਅਕ੍ਖਬ੍ਭਞ੍ਜਨਂ ਵਿਯ ਸਾਕਟਿਕਾ, ਵਣਲੇਪਨਂ ਵਿਯ ਵਣਿਨੋ ਅਭੁਞ੍ਜਿਂਸੁ.

ਜੀਵਿਤਾਨਂ ਪਰਿਕ੍ਖਾਰੇ, ਭੇਸਜ੍ਜੇ ਅਥ ਪਚ੍ਚਯੇਪਿ ਜੀਵਿਤਾਨਂ ਪਵਤ੍ਤਿਯਾ ਪਰਿਕ੍ਖਾਰਭੂਤੇ ਭੇਸਜ੍ਜਸਙ੍ਖਾਤੇ ਪਚ੍ਚਯੇ ਗਿਲਾਨਪਚ੍ਚਯੇ. ਯਥਾ ਤੇਤਿ ਯਥਾ ਤੇ ਪੁਰਿਮਕਾ ਭਿਕ੍ਖੂ ਆਸਵਕ੍ਖਯੇ ਉਸ੍ਸੁਕਾ ਯੁਤ੍ਤਾ ਆਸੁਂ, ਤਥਾ ਤੇ ਰੋਗਾਭਿਭੂਤਾਪਿ ਗਿਲਾਨਪਚ੍ਚਯੇ ਬਾਲ਼੍ਹਂ ਅਤਿਵਿਯ ਉਸ੍ਸੁਕਾ ਨਾਹੇਸੁਨ੍ਤਿ ਅਤ੍ਥੋ.

ਤਪ੍ਪਰਾਯਣਾਤਿ ਵਿਵੇਕਪਰਾਯਣਾ ਵਿਵੇਕਪੋਣਾ. ਏਵਂ ਚਤੂਹਿ ਗਾਥਾਹਿ ਚਤੁਪਚ੍ਚਯਸਨ੍ਤੋਸਂ ਭਾਵਨਾਭਿਰਤਿਞ੍ਚ ਦਸ੍ਸੇਨ੍ਤੇਨ ਤੇਸਂ ਅਰਿਯਵਂਸਪਟਿਪਦਾ ਦਸ੍ਸਿਤਾ.

ਨੀਚਾਤਿ ‘‘ਮਯਂ ਪਂਸੁਕੂਲਿਕਾ ਪਿਣ੍ਡਪਾਤਿਕਾ’’ਤਿ ਅਤ੍ਤੁਕ੍ਕਂਸਨਪਰਵਮ੍ਭਨਾਨਿ ਅਕਤ੍ਵਾ ਨੀਚਵੁਤ੍ਤਿਨੋ, ਨਿਵਾਤਵੁਤ੍ਤਿਨੋਤਿ ਅਤ੍ਥੋ. ਨਿਵਿਟ੍ਠਾਤਿ ਸਾਸਨੇ ਨਿਵਿਟ੍ਠਸਦ੍ਧਾ. ਸੁਭਰਾਤਿ ਅਪ੍ਪਿਚ੍ਛਤਾਦਿਭਾਵੇਨ ਸੁਪੋਸਾ. ਮੁਦੂਤਿ ਵਤ੍ਤਪਟਿਪਤ੍ਤਿਯਂ ਸਕਲੇ ਚ ਬ੍ਰਹ੍ਮਚਰਿਯੇ ਮੁਦੂ, ਸੁਪਰਿਕਮ੍ਮਕਤਸੁਵਣ੍ਣਂ ਵਿਯ ਵਿਨਿਯੋਗਕ੍ਖਮਾ. ਮੁਦੂਤਿ ਵਾ ਅਭਾਕੁਟਿਕਾ ਉਤ੍ਤਾਨਮੁਖਾ ਪੁਪ੍ਫਿਤਮੁਖੇਨ ਪਟਿਸਨ੍ਥਾਰਵੁਤ੍ਤਿਨੋ, ਸੁਤਿਤ੍ਥਂ ਵਿਯ ਸੁਖਾਵਹਾਤਿ ਵੁਤ੍ਤਂ ਹੋਤਿ. ਅਥਦ੍ਧਮਾਨਸਾਤਿ ਅਕਥਿਨਚਿਤ੍ਤਾ ਤੇਨ ਸੁਬ੍ਬਚਭਾਵਮਾਹ. ਅਬ੍ਯਾਸੇਕਾਤਿ ਸਤਿਵਿਪ੍ਪਵਾਸਾਭਾਵਤੋ ਕਿਲੇਸਬ੍ਯਾਸੇਕਰਹਿਤਾ, ਅਨ੍ਤਰਨ੍ਤਰਾ ਤਣ੍ਹਾਦਿਟ੍ਠਿਮਾਨਾਦੀਹਿ ਅਵੋਕਿਣ੍ਣਾਤਿ ਅਤ੍ਥੋ. ਅਮੁਖਰਾਤਿ ਨ ਮੁਖਰਾ, ਨ ਮੁਖੇਨ ਖਰਾ ਵਚੀਪਾਗਬ੍ਭਿਯਰਹਿਤਾਤਿ ਵਾ ਅਤ੍ਥੋ. ਅਤ੍ਥਚਿਨ੍ਤਾਵਸਾਨੁਗਾਤਿ ਹਿਤਚਿਨ੍ਤਾਵਸਾਨੁਗਾਹਿਤਚਿਨ੍ਤਾਵਸਿਕਾ, ਅਤ੍ਤਨੋ ਪਰੇਸਞ੍ਚ ਹਿਤਚਿਨ੍ਤਮੇਵ ਅਨੁਪਰਿਵਤ੍ਤਨਕਾ.

ਤਤੋਤਿ ਤਸ੍ਮਾ ਨੀਚਵੁਤ੍ਤਾਦਿਹੇਤੁ. ਪਾਸਾਦਿਕਨ੍ਤਿ ਪਸਾਦਜਨਿਕਂ ਪਟਿਪਤ੍ਤਿਂ ਪਸ੍ਸਨ੍ਤਾਨਂ ਸੁਣਨ੍ਤਾਨਞ੍ਚ ਪਸਾਦਾਵਹਂ. ਗਤਨ੍ਤਿ ਅਭਿਕ੍ਕਨ੍ਤਪਟਿਕ੍ਕਨ੍ਤਪਰਿਵਤ੍ਤਨਾਦਿਗਮਨਂ. ਗਤਨ੍ਤਿ ਵਾ ਕਾਯਵਾਚਾਪਵਤ੍ਤਿ. ਭੁਤ੍ਤਨ੍ਤਿ ਚਤੁਪਚ੍ਚਯਪਰਿਭੋਗੋ. ਨਿਸੇਵਿਤਨ੍ਤਿ ਗੋਚਰਨਿਸੇਵਨਂ. ਸਿਨਿਦ੍ਧਾ ਤੇਲਧਾਰਾਵਾਤਿ ਯਥਾ ਅਨਿਵਤ੍ਤਿਤਾ ਕੁਸਲਜਨਾਭਿਸਿਞ੍ਚਿਤਾ ਸਵਨ੍ਤੀ ਤੇਲਧਾਰਾ ਅਵਿਚ੍ਛਿਨ੍ਨਾ ਸਿਨਿਦ੍ਧਾ ਮਟ੍ਠਾ ਦਸ੍ਸਨੀਯਾ ਪਾਸਾਦਿਕਾ ਹੋਤਿ, ਏਵਂ ਤੇਸਂ ਆਕਪ੍ਪਸਮ੍ਪਨ੍ਨਾਨਂ ਇਰਿਯਾਪਥੋ ਅਚ੍ਛਿਦ੍ਦੋ ਸਣ੍ਹੋ ਮਟ੍ਠੋ ਦਸ੍ਸਨੀਯੋ ਪਾਸਾਦਿਕੋ ਅਹੋਸਿ.

ਮਹਾਝਾਯੀਤਿ ਮਹਨ੍ਤੇਹਿ ਝਾਨੇਹਿ ਝਾਯਨਸੀਲਾ, ਮਹਨ੍ਤਂ ਵਾ ਨਿਬ੍ਬਾਨਂ ਝਾਯਨ੍ਤੀਤਿ ਮਹਾਝਾਯੀ. ਤਤੋ ਏਵ ਮਹਾਹਿਤਾ, ਮਹਨ੍ਤੇਹਿ ਹਿਤੇਹਿ ਸਮਨ੍ਨਾਗਤਾਤਿ ਅਤ੍ਥੋ. ਤੇ ਥੇਰਾਤਿ ਤੇ ਯਥਾਵੁਤ੍ਤਪ੍ਪਕਾਰਾ ਪਟਿਪਤ੍ਤਿਪਰਾਯਣਾ ਥੇਰਾ ਇਦਾਨਿ ਪਰਿਨਿਬ੍ਬੁਤਾਤਿ ਅਤ੍ਥੋ. ਪਰਿਤ੍ਤਾ ਦਾਨਿ ਤਾਦਿਸਾਤਿ ਇਦਾਨਿ ਪਚ੍ਛਿਮੇ ਕਾਲੇ ਤਾਦਿਸਾ ਤਥਾਰੂਪਾ ਥੇਰਾ ਪਰਿਤ੍ਤਾ ਅਪ੍ਪਕਾ ਕਤਿਪਯਾ ਏਵਾਤਿ ਵੁਤ੍ਤਂ ਹੋਤਿ.

ਕੁਸਲਾਨਞ੍ਚ ਧਮ੍ਮਾਨਨ੍ਤਿ ਵਿਵਟ੍ਟਸ੍ਸ ਉਪਨਿਸ੍ਸਯਭੂਤਾਨਂ ਵਿਮੋਕ੍ਖਸਮ੍ਭਾਰਾਨਂ ਅਨਵਜ੍ਜਧਮ੍ਮਾਨਂ. ਪਞ੍ਞਾਯ ਚਾਤਿ ਤਥਾਰੂਪਾਯ ਪਞ੍ਞਾਯ ਚ. ਪਰਿਕ੍ਖਯਾਤਿ ਅਭਾਵਤੋ ਅਨੁਪ੍ਪਤ੍ਤਿਤੋ. ਕਾਮਞ੍ਚੇਤ੍ਥ ਪਞ੍ਞਾਪਿ ਸਿਯਾ ਅਨਵਜ੍ਜਧਮ੍ਮਾ, ਬਹੁਕਾਰਭਾਵਦਸ੍ਸਨਤ੍ਥਂ ਪਨਸ੍ਸਾ ਵਿਸੁਂ ਗਹਣਂ ਯਥਾ ਪੁਞ੍ਞਞਾਣਸਮ੍ਭਾਰਾਤਿ. ਸਬ੍ਬਾਕਾਰਵਰੂਪੇਤਨ੍ਤਿ ਆਦਿਕਲ੍ਯਾਣਤਾਦੀਹਿ ਸਬ੍ਬੇਹਿ ਆਕਾਰਵਰੇਹਿ ਪਕਾਰਵਿਸੇਸੇਹਿ ਉਪੇਤਂ ਯੁਤ੍ਤਂ ਜਿਨਸ੍ਸ ਭਗਵਤੋ ਸਾਸਨਂ ਲੁਜ੍ਜਤਿ ਵਿਨਸ੍ਸਤੀਤਿ ਅਤ੍ਥੋ.

ਪਾਪਕਾਨਞ੍ਚ ਧਮ੍ਮਾਨਂ, ਕਿਲੇਸਾਨਞ੍ਚ ਯੋ ਉਤੂਤਿ ਕਾਯਦੁਚ੍ਚਰਿਤਾਦੀਨਂ ਪਾਪਧਮ੍ਮਾਨਂ ਲੋਭਾਦੀਨਞ੍ਚ ਕਿਲੇਸਾਨਂ ਯੋ ਉਤੁ ਯੋ ਕਾਲੋ, ਸੋ ਅਯਂ ਵਤ੍ਤਤੀਤਿ ਵਚਨਸੇਸੋ. ਉਪਟ੍ਠਿਤਾ ਵਿਵੇਕਾਯ, ਯੇ ਚ ਸਦ੍ਧਮ੍ਮਸੇਸਕਾਤਿ ਯੇ ਪਨ ਏਵਰੂਪੇ ਕਾਲੇ ਕਾਯਚਿਤ੍ਤਉਪਧਿਵਿਵੇਕਤ੍ਥਾਯ ਉਪਟ੍ਠਿਤਾ ਆਰਦ੍ਧਵੀਰਿਯਾ, ਤੇ ਚ ਸੇਸਪਟਿਪਤ੍ਤਿਸਦ੍ਧਮ੍ਮਕਾ ਹੋਨ੍ਤਿ. ਅਯਞ੍ਹੇਤ੍ਥ ਅਧਿਪ੍ਪਾਯੋ – ਸੁਵਿਸੁਦ੍ਧਸੀਲਾਚਾਰਾਪਿ ਸਮਾਨਾ ਇਦਾਨਿ ਏਕਚ੍ਚੇ ਭਿਕ੍ਖੂ ਇਰਿਯਾਪਥਸਣ੍ਠਾਪਨਂ, ਸਮਥਵਿਪਸ੍ਸਨਾਭਾਵਨਾਵਿਧਾਨਂ, ਮਹਾਪਲਿਬੋਧੂਪਚ੍ਛੇਦੋ, ਖੁਦ੍ਦਕਪਲਿਬੋਧੂਪਚ੍ਛੇਦੋਤਿ ਏਵਮਾਦਿਪੁਬ੍ਬਕਿਚ੍ਚਂ ਸਮ੍ਪਾਦੇਤ੍ਵਾ ਭਾਵਨਮਨੁਯੁਞ੍ਜਨ੍ਤਿ. ਤੇ ਸੇਸਪਟਿਪਤ੍ਤਿਸਦ੍ਧਮ੍ਮਕਾ, ਪਟਿਪਤ੍ਤਿਂ ਮਤ੍ਥਕਂ ਪਾਪੇਤੁਂ ਨ ਸਕ੍ਕੋਨ੍ਤੀਤਿ.

ਤੇ ਕਿਲੇਸਾ ਪਵਡ੍ਢਨ੍ਤਾਤਿ ਯੇ ਭਗਵਤੋ ਓਰਸਪੁਤ੍ਤੇਹਿ ਚ ਤਦਾ ਪਰਿਕ੍ਖਯਂ ਪਰਿਯਾਦਾਨਂ ਗਮਿਤਾ ਕਿਲੇਸਾ, ਤੇ ਏਤਰਹਿ ਲਦ੍ਧੋਕਾਸਾ ਭਿਕ੍ਖੂਸੁ ਵੁਦ੍ਧਿਂ ਵਿਰੂਲ਼੍ਹਿਂ ਵੇਪੁਲ੍ਲਂ ਆਪਜ੍ਜਨ੍ਤਾ. ਆਵਿਸਨ੍ਤਿ ਬਹੁਂ ਜਨਨ੍ਤਿ ਕਲ੍ਯਾਣਮਿਤ੍ਤਰਹਿਤਂ ਅਯੋਨਿਸੋਮਨਸਿਕਾਰਬਹੁਲਂ ਅਨ੍ਧਬਾਲਜਨਂ ਅਭਿਭਵਿਤ੍ਵਾ ਅਵਸਂ ਕਰੋਨ੍ਤਾ ਆਵਿਸਨ੍ਤਿ ਸਨ੍ਤਾਨਂ ਅਨੁਪਵਿਸਨ੍ਤਿ. ਏਵਂਭੂਤਾ ਚ ਤੇ ਕੀਲ਼ਨ੍ਤਿ ਮਞ੍ਞੇ ਬਾਲੇਹਿ, ਉਮ੍ਮਤ੍ਤੇਹਿਵ ਰਕ੍ਖਸਾ, ਯਥਾ ਨਾਮ ਕੇਲ਼ਿਸੀਲਾ ਰਕ੍ਖਸਾ ਭਿਸਕ੍ਕਰਹਿਤੇ ਉਮ੍ਮਤ੍ਤੇ ਆਵਿਸਿਤ੍ਵਾ ਤੇ ਅਨਯਬ੍ਯਸਨਂ ਆਪਾਦੇਨ੍ਤਾ ਤੇਹਿ ਕੀਲ਼ਨ੍ਤਿ, ਏਵਂ ਤੇ ਕਿਲੇਸਾ ਸਮ੍ਮਾਸਮ੍ਬੁਦ੍ਧਭਿਸਕ੍ਕਰਹਿਤੇ ਅਨ੍ਧਬਾਲੇ ਭਿਕ੍ਖੂ ਆਵਿਸਿਤ੍ਵਾ ਤੇਸਂ ਦਿਟ੍ਠਧਮ੍ਮਿਕਾਦਿਭੇਦਂ ਅਨਤ੍ਥਂ ਉਪ੍ਪਾਦੇਨ੍ਤਾ ਤੇਹਿ ਸਦ੍ਧਿਂ ਕੀਲ਼ਨ੍ਤਿ ਮਞ੍ਞੇ, ਕੀਲ਼ਨ੍ਤਾ ਵਿਯ ਹੋਨ੍ਤੀਤਿ ਅਤ੍ਥੋ.

ਤੇਨ ਤੇਨਾਤਿ ਤੇਨ ਤੇਨ ਆਰਮ੍ਮਣਭਾਗੇਨ. ਵਿਧਾਵਿਤਾਤਿ ਵਿਰੂਪਂ ਧਾਵਿਤਾ ਅਸਾਰੁਪ੍ਪਵਸੇਨ ਪਟਿਪਜ੍ਜਨ੍ਤਾ. ਕਿਲੇਸਵਤ੍ਥੂਸੂਤਿ ਪਠਮਂ ਉਪ੍ਪਨ੍ਨਂ ਕਿਲੇਸਾ ਪਚ੍ਛਾ ਉਪ੍ਪਜ੍ਜਨਕਾਨਂ ਕਾਰਣਭਾਵਤੋ ਕਿਲੇਸਾਵ ਕਿਲੇਸਵਤ੍ਥੂਨਿ, ਤੇਸੁ ਕਿਲੇਸਵਤ੍ਥੂਸੁ ਸਮੂਹਿਤੇਸੁ. ਸਸਙ੍ਗਾਮੇਵ ਘੋਸਿਤੇਤਿ ਹਿਰਞ੍ਞਸੁਵਣ੍ਣਮਣਿਮੁਤ੍ਤਾਦਿਕਂ ਧਨਂ ਵਿਪ੍ਪਕਿਰਿਤ੍ਵਾ ‘‘ਯਂ ਯਂ ਹਿਰਞ੍ਞਸੁਵਣ੍ਣਾਦਿ ਯਸ੍ਸ ਯਸ੍ਸ ਹਤ੍ਥਗਤਂ, ਤਂ ਤਂ ਤਸ੍ਸ ਤਸ੍ਸੇਵ ਹੋਤੂ’’ਤਿ ਏਵਂ ਕਾਮਘੋਸਨਾ ਸਸਙ੍ਗਾਮਘੋਸਨਾ ਨਾਮ. ਤਤ੍ਥਾਯਮਤ੍ਥੋ – ਕਿਲੇਸਵਤ੍ਥੂਸੁ ‘‘ਯੋ ਯੋ ਕਿਲੇਸੋ ਯਂ ਯਂ ਸਤ੍ਤਂ ਗਣ੍ਹਾਤਿ ਅਭਿਭਵਤਿ, ਸੋ ਸੋ ਤਸ੍ਸ ਤਸ੍ਸ ਹੋਤੂ’’ਤਿ ਕਿਲੇਸਸੇਨਾਪਤਿਨਾ ਮਾਰੇਨ ਸਸਙ੍ਗਾਮੇ ਘੋਸਿਤੇ ਵਿਯ. ਤੇਹਿ ਤੇਹਿ ਕਿਲੇਸੇਹਿ ਅਭਿਭੂਤਾ ਤੇ ਬਾਲਪੁਥੁਜ੍ਜਨਾ ਤੇਨ ਤੇਨ ਆਰਮ੍ਮਣਭਾਗੇਨ ਵਿਧਾਵਿਤਾ ਵੋਸਿਤਾਤਿ.

ਤੇ ਏਵਂ ਵਿਧਾਵਿਤਾ ਕਿਂ ਕਰੋਨ੍ਤੀਤਿ ਆਹ ‘‘ਪਰਿਚ੍ਚਜਿਤ੍ਵਾ ਸਦ੍ਧਮ੍ਮਂ, ਅਞ੍ਞਮਞ੍ਞੇਹਿ ਭਣ੍ਡਰੇ’’ਤਿ. ਤਸ੍ਸਤ੍ਥੋ – ਪਟਿਪਤ੍ਤਿਸਦ੍ਧਮ੍ਮਂ ਛਡ੍ਡੇਤ੍ਵਾ ਆਮਿਸਕਿਞ੍ਜਕ੍ਖਹੇਤੁ ਅਞ੍ਞਮਞ੍ਞੇਹਿ ਭਣ੍ਡਰੇ ਕਲਹਂ ਕਰੋਨ੍ਤੀਤਿ. ਦਿਟ੍ਠਿਗਤਾਨੀਤਿ ‘‘ਵਿਞ੍ਞਾਣਮਤ੍ਤਮੇਵ ਅਤ੍ਥਿ, ਨਤ੍ਥੇਵ ਰੂਪਧਮ੍ਮਾ’’ਤਿ, ‘‘ਯਥਾ ਪੁਗ੍ਗਲੋ ਨਾਮ ਪਰਮਤ੍ਥਤੋ ਨਤ੍ਥਿ, ਏਵਂ ਸਭਾਵਧਮ੍ਮਾਪਿ ਪਰਮਤ੍ਥਤੋ ਨਤ੍ਥਿ, ਵੋਹਾਰਮਤ੍ਤਮੇਵਾ’’ਤਿ ਚ ਏਵਮਾਦੀਨਿ ਦਿਟ੍ਠਿਗਤਾਨਿ ਮਿਚ੍ਛਾਗਾਹੇ ਅਨ੍ਵੇਨ੍ਤਾ ਅਨੁਗਚ੍ਛਨ੍ਤਾ ਇਦਂ ਸੇਯ੍ਯੋ ਇਦਮੇਵ ਸੇਟ੍ਠਂ, ਅਞ੍ਞਂ ਮਿਚ੍ਛਾਤਿ ਮਞ੍ਞਨ੍ਤਿ.

ਨਿਗ੍ਗਤਾਤਿ ਗੇਹਤੋ ਨਿਕ੍ਖਨ੍ਤਾ. ਕਟਚ੍ਛੁਭਿਕ੍ਖਹੇਤੂਪੀਤਿ ਕਟਚ੍ਛੁਮਤ੍ਤਭਿਕ੍ਖਾਨਿਮਿਤ੍ਤਮ੍ਪਿ. ਤਂ ਦਦਨ੍ਤਸ੍ਸ ਗਹਟ੍ਠਸ੍ਸ ਅਨਨੁਲੋਮਿਕਸਂਸਗ੍ਗਵਸੇਨ ਅਕਿਚ੍ਚਾਨਿ ਪਬ੍ਬਜਿਤੇਨ ਅਕਤ੍ਤਬ੍ਬਾਨਿ ਕਮ੍ਮਾਨਿ ਨਿਸੇਵਰੇ ਕਰੋਨ੍ਤਿ.

ਉਦਰਾਵਦੇਹਕਂ ਭੁਤ੍ਵਾਤਿ ‘‘ਊਨੂਦਰੋ ਮਿਤਾਹਾਰੋ’’ਤਿ (ਥੇਰਗਾ. ੯੮੨; ਮਿ. ਪ. ੬.੫.੧੦) ਵੁਤ੍ਤਵਚਨਂ ਅਚਿਨ੍ਤੇਤ੍ਵਾ ਉਦਰਪੂਰਂ ਭੁਞ੍ਜਿਤ੍ਵਾ. ਸਯਨ੍ਤੁਤ੍ਤਾਨਸੇਯ੍ਯਕਾਤਿ ‘‘ਦਕ੍ਖਿਣੇਨ ਪਸ੍ਸੇਨ ਸੀਹਸੇਯ੍ਯਂ ਕਪ੍ਪੇਤਿ ਪਾਦੇ ਪਾਦਂ ਅਚ੍ਚਾਧਾਯ ਸਤੋ ਸਮ੍ਪਜਾਨੋ’’ਤਿ (ਅ. ਨਿ. ੮.੯; ਵਿਭ. ੫੧੯) ਵੁਤ੍ਤਵਿਧਾਨਂ ਅਨਨੁਸ੍ਸਰਿਤ੍ਵਾ ਉਤ੍ਤਾਨਸੇਯ੍ਯਕਾ ਸਯਨ੍ਤਿ. ਯਾ ਕਥਾ ਸਤ੍ਥੁਗਰਹਿਤਾਤਿ ਰਾਜਕਥਾਦਿਤਿਰਚ੍ਛਾਨਕਥਂ ਸਨ੍ਧਾਯ ਵਦਤਿ.

ਸਬ੍ਬਕਾਰੁਕਸਿਪ੍ਪਾਨੀਤਿ ਸਬ੍ਬੇਹਿ ਵੇਸ੍ਸਾਦੀਹਿ ਕਾਰੁਕੇਹਿ ਕਤ੍ਤਬ੍ਬਾਨਿ ਭਤ੍ਤਤਾਲਵਣ੍ਟਕਰਣਾਦੀਨਿ ਹਤ੍ਥਸਿਪ੍ਪਾਨਿ. ਚਿਤ੍ਤਿਂ ਕਤ੍ਵਾਨਾਤਿ ਸਕ੍ਕਚ੍ਚਂ ਸਾਦਰਂ ਕਤ੍ਵਾ. ਅਵੂਪਸਨ੍ਤਾ ਅਜ੍ਝਤ੍ਤਨ੍ਤਿ ਕਿਲੇਸਵੂਪਸਮਾਭਾਵਤੋ ਗਦ੍ਦੁਹਨਮਤ੍ਤਮ੍ਪਿ ਸਮਾਧਾਨਾਭਾਵਤੋ ਚ ਅਜ੍ਝਤ੍ਤਂ ਅਵੂਪਸਨ੍ਤਾ, ਅਵੂਪਸਨ੍ਤਚਿਤ੍ਤਾਤਿ ਅਤ੍ਥੋ. ਸਾਮਞ੍ਞਤ੍ਥੋਤਿ ਸਮਣਧਮ੍ਮੋ. ਅਤਿਅਚ੍ਛਤੀਤਿ ਤੇਸਂ ਆਜੀਵਕਿਚ੍ਚਪਸੁਤਤਾਯ ਏਕਦੇਸਮ੍ਪਿ ਅਫੁਸਨਤੋ ਵਿਸੁਂਯੇਵ ਨਿਸੀਦਤਿ, ਅਨਲ੍ਲੀਯਤੀਤਿ ਵੁਤ੍ਤਂ ਹੋਤਿ.

ਮਤ੍ਤਿਕਨ੍ਤਿ ਪਾਕਤਿਕਂ ਵਾ ਪਞ੍ਚਵਣ੍ਣਂ ਵਾ ਗਿਹੀਨਂ ਵਿਨਿਯੋਗਕ੍ਖਮਂ ਮਤ੍ਤਿਕਂ. ਤੇਲਚੁਣ੍ਣਞ੍ਚਾਤਿ ਪਾਕਤਿਕਂ, ਅਭਿਸਙ੍ਖਤਂ ਵਾ ਤੇਲਞ੍ਚ ਚੁਣ੍ਣਞ੍ਚ. ਉਦਕਾਸਨਭੋਜਨਨ੍ਤਿ ਉਦਕਞ੍ਚ ਆਸਨਞ੍ਚ ਭੋਜਨਞ੍ਚ. ਆਕਙ੍ਖਨ੍ਤਾ ਬਹੁਤ੍ਤਰਨ੍ਤਿ ਬਹੁਂ ਪਿਣ੍ਡਪਾਤਾਦਿਉਤ੍ਤਰੁਤ੍ਤਰਂ ਆਕਙ੍ਖਨ੍ਤਾ ‘‘ਅਮ੍ਹੇਹਿ ਮਤ੍ਤਿਕਾਦੀਸੁ ਦਿਨ੍ਨੇਸੁ ਮਨੁਸ੍ਸਾ ਦਲ਼੍ਹਭਤ੍ਤਿਕਾ ਹੁਤ੍ਵਾ ਬਹੁਂ ਉਤ੍ਤਰੁਤ੍ਤਰਂ ਚਤੁਪਚ੍ਚਯਜਾਤਂ ਦਸ੍ਸਨ੍ਤੀ’’ਤਿ ਅਧਿਪ੍ਪਾਯੇਨ ਗਿਹੀਨਂ ਉਪਨਾਮੇਨ੍ਤੀਤਿ ਅਤ੍ਥੋ.

ਦਨ੍ਤੇ ਪੁਨਨ੍ਤਿ ਸੋਧੇਨ੍ਤਿ ਏਤੇਨਾਤਿ ਦਨ੍ਤਪੋਨਂ, ਦਨ੍ਤਕਟ੍ਠਂ. ਕਪਿਤ੍ਥਨ੍ਤਿ ਕਪਿਤ੍ਥਫਲਂ. ਪੁਪ੍ਫਨ੍ਤਿ ਸੁਮਨਚਮ੍ਪਕਾਦਿਪੁਪ੍ਫਂ. ਖਾਦਨੀਯਾਨੀਤਿ ਅਟ੍ਠਾਰਸਵਿਧੇਪਿ ਖਜ੍ਜਕਵਿਸੇਸੇ. ਪਿਣ੍ਡਪਾਤੇ ਚ ਸਮ੍ਪਨ੍ਨੇਤਿ ਵਣ੍ਣਾਦਿਸਮ੍ਪਯੁਤ੍ਤੇ ਓਦਨਵਿਸੇਸੇ. ‘‘ਅਮ੍ਬੇ ਆਮਲਕਾਨਿ ਚਾ’’ਤਿ ਚ-ਸਦ੍ਦੇਨ ਮਾਤੁਲੁਙ੍ਗਤਾਲਨਾਲ਼ਿਕੇਰਾਦਿਫਲਾਨਿ ਅਵੁਤ੍ਤਾਨਿ ਸਙ੍ਗਣ੍ਹਾਤਿ. ਸਬ੍ਬਤ੍ਥ ਗਿਹੀਨਂ ਉਪਨਾਮੇਨ੍ਤਿ ਆਕਙ੍ਖਨ੍ਤਾ ਬਹੁਤ੍ਤਰਨ੍ਤਿ ਯੋਜਨਾ.

ਭੇਸਜ੍ਜੇਸੁ ਯਥਾ ਵੇਜ੍ਜਾਤਿ ਗਿਹੀਨਂ ਭੇਸਜ੍ਜਪ੍ਪਯੋਗੇਸੁ ਯਥਾ ਵੇਜ੍ਜਾ, ਤਥਾ ਭਿਕ੍ਖੂ ਪਟਿਪਜ੍ਜਨ੍ਤੀਤਿ ਅਧਿਪ੍ਪਾਯੋ. ਕਿਚ੍ਚਾਕਿਚ੍ਚੇ ਯਥਾ ਗਿਹੀਤਿ ਗਹਟ੍ਠਾਨਂ ਖੁਦ੍ਦਕੇ ਚੇਵ ਮਹਨ੍ਤੇ ਚ ਕਿਚ੍ਚੇ ਕਤ੍ਤਬ੍ਬੇ ਗਿਹੀ ਵਿਯ. ਗਣਿਕਾਵ ਵਿਭੂਸਾਯਨ੍ਤਿ ਅਤ੍ਤਨੋ ਸਰੀਰਸ੍ਸ ਵਿਭੂਸਨੇ ਰੂਪੂਪਜੀਵਿਨਿਯੋ ਵਿਯ. ਇਸ੍ਸਰੇ ਖਤ੍ਤਿਯਾ ਯਥਾਤਿ ਇਸ੍ਸਰੇ ਇਸ੍ਸਰਿਯਪਵਤ੍ਤਨੇ ਯਥਾ ਖਤ੍ਤਿਯਾ, ਏਵਂ ਕੁਲਪਤੀ ਹੁਤ੍ਵਾ ਵਤ੍ਤਨ੍ਤੀਤਿ ਅਤ੍ਥੋ.

ਨੇਕਤਿਕਾਤਿ ਨਿਕਤਿਯਂ ਨਿਯੁਤ੍ਤਾ, ਅਮਣਿਂਯੇਵ ਮਣਿਂ, ਅਸੁਵਣ੍ਣਂਯੇਵ ਸੁਵਣ੍ਣਂ ਕਤ੍ਵਾ ਪਟਿਰੂਪਸਾਚਿਯੋਗਨਿਰਤਾ. ਵਞ੍ਚਨਿਕਾਤਿ ਕੂਟਮਾਨਾਦੀਹਿ ਵਿਪ੍ਪਲਮ੍ਬਕਾ. ਕੂਟਸਕ੍ਖੀਤਿ ਅਯਾਥਾਵਸਕ੍ਖਿਨੋ. ਅਪਾਟੁਕਾਤਿ ਵਾਮਕਾ, ਅਸਂਯਤਵੁਤ੍ਤੀਤਿ ਅਤ੍ਥੋ. ਬਹੂਹਿ ਪਰਿਕਪ੍ਪੇਹੀਤਿ ਯਥਾਵੁਤ੍ਤੇਹਿ ਅਞ੍ਞੇਹਿ ਚ ਬਹੂਹਿ ਮਿਚ੍ਛਾਜੀਵਪ੍ਪਕਾਰੇਹਿ.

ਲੇਸਕਪ੍ਪੇਤਿ ਕਪ੍ਪਿਯਲੇਸੇ ਕਪ੍ਪਿਯਪਟਿਰੂਪੇ. ਪਰਿਯਾਯੇਤਿ, ਪਚ੍ਚਯੇਸੁ ਪਰਿਯਾਯਸ੍ਸ ਯੋਗੇ. ਪਰਿਕਪ੍ਪੇਤਿ ਵਡ੍ਢਿਆਦਿਵਿਕਪ੍ਪਨੇ, ਸਬ੍ਬਤ੍ਥ ਵਿਸਯੇ ਭੁਮ੍ਮਂ. ਅਨੁਧਾਵਿਤਾਤਿ ਮਹਿਚ੍ਛਤਾਦੀਹਿ ਪਾਪਧਮ੍ਮੇਹਿ ਅਨੁਧਾਵਿਤਾ ਵੋਸਿਤਾ. ਜੀਵਿਕਤ੍ਥਾ ਜੀਵਿਕਪ੍ਪਯੋਜਨਾ ਆਜੀਵਹੇਤੁਕਾ. ਉਪਾਯੇਨਾਤਿ ਪਰਿਕਥਾਦਿਨਾ ਉਪਾਯੇਨ ਪਚ੍ਚਯੁਪ੍ਪਾਦਨਨਯੇਨ. ਸਙ੍ਕਡ੍ਢਨ੍ਤੀਤਿ ਸਂਹਰਨ੍ਤਿ.

ਉਪਟ੍ਠਾਪੇਨ੍ਤਿ ਪਰਿਸਨ੍ਤਿ ਪਰਿਸਾਯ ਅਤ੍ਤਾਨਂ ਉਪਟ੍ਠਪੇਨ੍ਤਿ, ਯਥਾ ਪਰਿਸਾ ਅਤ੍ਤਾਨਂ ਉਪਟ੍ਠਪੇਨ੍ਤਿ, ਏਵਂ ਪਰਿਸਂ ਸਙ੍ਗਣ੍ਹਨ੍ਤੀਤਿ ਅਤ੍ਥੋ. ਕਮ੍ਮਤੋਤਿ ਕਮ੍ਮਹੇਤੁ. ਤੇ ਹਿ ਅਤ੍ਤਨੋ ਕਤ੍ਤਬ੍ਬਵੇਯ੍ਯਾਵਚ੍ਚਨਿਮਿਤ੍ਤਂ ਉਪਟ੍ਠਪੇਨ੍ਤਿ. ਨੋ ਚ ਧਮ੍ਮਤੋਤਿ ਧਮ੍ਮਨਿਮਿਤ੍ਤਂ ਨੋ ਚ ਉਪਟ੍ਠਪੇਨ੍ਤਿ. ਯੋ ਸਤ੍ਥਾਰਾ ਉਲ੍ਲੁਮ੍ਪਨਸਭਾਵਸਣ੍ਠਿਤਾਯ ਪਰਿਸਾਯ ਸਙ੍ਗਹੋ ਅਨੁਞ੍ਞਾਤੋ, ਤੇਨ ਨ ਸਙ੍ਗਣ੍ਹਨ੍ਤੀਤਿ ਅਤ੍ਥੋ. ਲਾਭਤੋਤਿ ਲਾਭਹੇਤੁ, ‘‘ਅਯ੍ਯੋ ਬਹੁਸ੍ਸੁਤੋ, ਭਾਣਕੋ, ‘ਧਮ੍ਮਕਥਿਕੋ’ਤਿ ਏਵਂ ਸਮ੍ਭਾਵੇਨ੍ਤੋ ਮਹਾਜਨੋ ਮਯ੍ਹਂ ਲਾਭਸਕ੍ਕਾਰੇ ਉਪਨਯਿਸ੍ਸਤੀ’’ਤਿ ਇਚ੍ਛਾਚਾਰੇ ਠਤ੍ਵਾ ਲਾਭਨਿਮਿਤ੍ਤਂ ਪਰੇਸਂ ਧਮ੍ਮਂ ਦੇਸੇਨ੍ਤਿ. ਨੋ ਚ ਅਤ੍ਥਤੋਤਿ ਯੋ ਸੋ ਵਿਮੁਤ੍ਤਾਯਤਨਸੀਸੇ ਠਤ੍ਵਾ ਸਦ੍ਧਮ੍ਮਂ ਕਥੇਨ੍ਤੇਨ ਪਤ੍ਤਬ੍ਬੋ ਅਤ੍ਥੋ, ਨ ਤਂਦਿਟ੍ਠਧਮ੍ਮਿਕਾਦਿਭੇਦਹਿਤਨਿਮਿਤ੍ਤਂ ਧਮ੍ਮਂ ਦੇਸੇਨ੍ਤੀਤਿ ਅਤ੍ਥੋ.

ਸਙ੍ਘਲਾਭਸ੍ਸ ਭਣ੍ਡਨ੍ਤੀਤਿ ਸਙ੍ਘਲਾਭਹੇਤੁ ਭਣ੍ਡਨ੍ਤਿ ‘‘ਮਯ੍ਹਂ ਪਾਪੁਣਾਤਿ, ਨ ਤੁਯ੍ਹ’’ਨ੍ਤਿਆਦਿਨਾ ਕਲਹਂ ਕਰੋਨ੍ਤਿ. ਸਙ੍ਘਤੋ ਪਰਿਬਾਹਿਰਾਤਿ, ਅਰਿਯਸਙ੍ਘਤੋ ਬਹਿਭੂਤਾ ਅਰਿਯਸਙ੍ਘੇ ਤਦਭਾਵਤੋ. ਪਰਲਾਭੋਪਜੀਵਨ੍ਤਾਤਿ ਸਾਸਨੇ ਲਾਭਸ੍ਸ ਅਨ੍ਧਬਾਲਪੁਥੁਜ੍ਜਨੇਹਿ ਪਰੇ ਸੀਲਾਦਿਗੁਣਸਮ੍ਪਨ੍ਨੇ ਸੇਕ੍ਖੇ ਉਦ੍ਦਿਸ੍ਸ ਉਪ੍ਪਨ੍ਨਤ੍ਤਾ ਤਂ ਪਰਲਾਭਂ, ਪਰਤੋ ਵਾ ਦਾਯਕਤੋ ਲਦ੍ਧਬ੍ਬਲਾਭਂ ਉਪਜੀਵਨ੍ਤਾ ਭਣ੍ਡਨਕਾਰਕਾ ਭਿਕ੍ਖੂ ਪਾਪਜਿਗੁਚ੍ਛਾਯ ਅਭਾਵਤੋ ਅਹਿਰਿਕਾ ਸਮਾਨਾ ਚ ‘‘ਮਯਂ ਪਰਲਾਭਂ ਭੁਞ੍ਜਾਮ, ਪਰਪਟਿਬਦ੍ਧਜੀਵਿਕਾ’’ਤਿਪਿ ਨ ਲਜ੍ਜਰੇ ਨ ਹਿਰੀਯਨ੍ਤਿ.

ਨਾਨੁਯੁਤ੍ਤਾਤਿ ਸਮਣਕਰਣੇਹਿ ਧਮ੍ਮੇਹਿ ਅਨਨੁਯੁਤ੍ਤਾ. ਤਥਾਤਿ ਯਥਾ ਪੁਬ੍ਬੇ ਵੁਤ੍ਤਾ ਬਨ੍ਧਨਕਾਰਕਾਦਯੋ, ਤਥਾ. ਏਕੇਤਿ ਏਕਚ੍ਚੇ. ਮੁਣ੍ਡਾ ਸਙ੍ਘਾਟਿਪਾਰੁਤਾਤਿ ਕੇਵਲਂ ਮੁਣ੍ਡਿਤਕੇਸਤਾਯ ਮੁਣ੍ਡਾ ਪਿਲੋਤਿਕਖਣ੍ਡੇਹਿ ਸਙ੍ਘਟਿਤਟ੍ਠੇਨ ‘‘ਸਙ੍ਘਾਟੀ’’ਤਿ ਲਦ੍ਧਨਾਮੇਨ ਚੀਵਰੇਨ ਪਾਰੁਤਸਰੀਰਾ. ਸਮ੍ਭਾਵਨਂਯੇਵਿਚ੍ਛਨ੍ਤਿ, ਲਾਭਸਕ੍ਕਾਰਮੁਚ੍ਛਿਤਾਤਿ ਲਾਭਸਕ੍ਕਾਰਾਸਾਯ ਮੁਚ੍ਛਿਤਾ ਅਜ੍ਝੋਸਿਤਾ ਹੁਤ੍ਵਾ, ‘‘ਪੇਸਲੋ ਧੁਤਵਾਦੋ ਬਹੁਸ੍ਸੁਤੋ’’ਤਿ ਵਾ ਮਧੁਰਵਚਨਮਨੁਯੁਤ੍ਤਾ ‘‘ਅਰਿਯੋ’’ਤਿ ਚ ਕੇਵਲਂ ਸਮ੍ਭਾਵਨਂ ਬਹੁਮਾਨਂਯੇਵ ਇਚ੍ਛਨ੍ਤਿ ਏਸਨ੍ਤਿ, ਨ ਤਨ੍ਨਿਮਿਤ੍ਤੇ ਗੁਣੇਤਿ ਅਤ੍ਥੋ.

ਏਵਨ੍ਤਿ ‘‘ਕੁਸਲਾਨਞ੍ਚ ਧਮ੍ਮਾਨਂ ਪਞ੍ਞਾਯ ਚ ਪਰਿਕ੍ਖਯਾ’’ਤਿ ਵੁਤ੍ਤਨਯੇਨ. ਨਾਨਪ੍ਪਯਾਤਮ੍ਹੀਤਿ ਨਾਨਪ੍ਪਕਾਰੇ ਭੇਦਨਧਮ੍ਮੇ ਪਯਾਤੇ ਸਮਕਤੇ, ਨਾਨਪ੍ਪਕਾਰੇਨ ਵਾ ਸਂਕਿਲੇਸਧਮ੍ਮੇ ਪਯਾਤੁਂ ਪਵਤ੍ਤਿਤੁਂ ਆਰਦ੍ਧੇ. ਨ ਦਾਨਿ ਸੁਕਰਂ ਤਥਾਤਿ ਇਦਾਨਿ ਇਮਸ੍ਮਿਂ ਦੁਲ੍ਲਭਕਲ੍ਯਾਣਮਿਤ੍ਤੇ ਦੁਲ੍ਲਭਸਪ੍ਪਾਯਸਦ੍ਧਮ੍ਮਸ੍ਸਵਨੇ ਚ ਕਾਲੇ ਯਥਾ ਸਤ੍ਥਰਿ ਧਰਨ੍ਤੇ ਅਫੁਸਿਤਂ ਅਫੁਟ੍ਠਂ, ਅਨਧਿਗਤਂ ਝਾਨਵਿਪਸ੍ਸਨਂ ਫੁਸਿਤੁਂ ਅਧਿਗਨ੍ਤੁਂ, ਫੁਸਿਤਂ ਵਾ ਹਾਨਭਾਗਿਯਂ ਠਿਤਿਭਾਗਿਯਮੇਵ ਵਾ ਅਹੁਤ੍ਵਾ ਯਥਾ ਵਿਸੇਸਭਾਗਿਯਂ ਹੋਤਿ, ਤਥਾ ਅਨੁਰਕ੍ਖਿਤੁਂ ਪਾਲੇਤੁਂ ਸੁਕਰਂ, ਤਥਾ ਨ ਸੁਕਰਂ, ਤਥਾ ਸਮ੍ਪਾਦੇਤੁਂ ਨ ਸਕ੍ਕਾਤਿ ਅਤ੍ਥੋ.

ਇਦਾਨਿ ਅਤ੍ਤਨੋ ਪਰਿਨਿਬ੍ਬਾਨਕਾਲਸ੍ਸ ਆਸਨ੍ਨਤ੍ਤਾ ਸਂਖਿਤ੍ਤੇਨ ਓਵਾਦੇਨ ਸਬ੍ਰਹ੍ਮਚਾਰਿਂ ਓਵਦਨ੍ਤੋ ‘‘ਯਥਾ ਕਣ੍ਟਕਟ੍ਠਾਨਮ੍ਹੀ’’ਤਿਆਦਿਮਾਹ. ਤਸ੍ਸਤ੍ਥੋ – ਯਥਾ ਪੁਰਿਸੋ ਕੇਨਚਿਦੇਵ ਪਯੋਜਨੇਨ ਕਣ੍ਟਕਨਿਚਿਤੇ ਪਦੇਸੇ ਅਨੁਪਾਹਨੋ ਵਿਚਰਨ੍ਤੋ ‘‘ਮਾ ਮਂ ਕਣ੍ਟਕੋ ਵਿਜ੍ਝੀ’’ਤਿ ਸਤਿਂ ਉਪਟ੍ਠਪੇਤ੍ਵਾਵ ਵਿਚਰਤਿ, ਏਵਂ ਕਿਲੇਸਕਣ੍ਟਕਨਿਚਿਤੇ ਗੋਚਰਗਾਮੇ ਪਯੋਜਨੇਨ ਚਰਨ੍ਤੋ ਮੁਨਿ ਸਤਿਂ ਉਪਟ੍ਠਪੇਤ੍ਵਾਨ ਸਤਿਸਮ੍ਪਜਞ੍ਞਯੁਤ੍ਤੋ ਅਪ੍ਪਮਤ੍ਤੋਵ ਚਰੇਯ੍ਯ ਕਮ੍ਮਟ੍ਠਾਨਂ ਅਵਿਜਹਨ੍ਤੋਤਿ ਵੁਤ੍ਤਂ ਹੋਤਿ.

ਸਰਿਤ੍ਵਾ ਪੁਬ੍ਬਕੇ ਯੋਗੀ, ਤੇਸਂ ਵਤ੍ਤਮਨੁਸ੍ਸਰਨ੍ਤਿ ਪੁਰਿਮਕੇ ਯੋਗੇ ਭਾਵਨਾਯ ਯੁਤ੍ਤਤਾਯ ਯੋਗੀ ਆਰਦ੍ਧਵਿਪਸ੍ਸਕੇ ਸਰਿਤ੍ਵਾ ਤੇਸਂ ਵਤ੍ਤਂ ਆਗਮਾਨੁਸਾਰੇਨ ਸਮ੍ਮਾਪਟਿਪਤ੍ਤਿਭਾਵਨਾਵਿਧਿਂ ਅਨੁਸ੍ਸਰਨ੍ਤੋ ਧੁਰਨਿਕ੍ਖੇਪਂ ਅਕਤ੍ਵਾ ਯਥਾਪਟਿਪਜ੍ਜਨ੍ਤੋ. ਕਿਞ੍ਚਾਪਿ ਪਚ੍ਛਿਮੋ ਕਾਲੋਤਿ ਯਦਿਪਾਯਂ ਅਤੀਤਸਤ੍ਥੁਕੋ ਚਰਿਮੋ ਕਾਲੋ, ਤਥਾਪਿ ਯਥਾਧਮ੍ਮਮੇਵ ਪਟਿਪਜ੍ਜਨ੍ਤੋ ਵਿਪਸ੍ਸਨਂ ਉਸ੍ਸੁਕ੍ਕਾਪੇਨ੍ਤੋ ਫੁਸੇਯ੍ਯ ਅਮਤਂ ਪਦਂ ਨਿਬ੍ਬਾਨਂ ਅਧਿਗਚ੍ਛੇਯ੍ਯ.

ਇਦਂ ਵਤ੍ਵਾਤਿ, ਯਥਾਦਸ੍ਸਿਤਂ ਸਂਕਿਲੇਸਵੋਦਾਨੇਸੁ ਇਮਂ ਪਟਿਪਤ੍ਤਿਵਿਧਿਂ ਕਥੇਤ੍ਵਾ. ਅਯਞ੍ਚ ਓਸਾਨਗਾਥਾ ਸਙ੍ਗੀਤਿਕਾਰੇਹਿ ਥੇਰਸ੍ਸ ਪਰਿਨਿਬ੍ਬਾਨਂ ਪਕਾਸੇਤੁਂ ਵੁਤ੍ਤਾਤਿ ਵੇਦਿਤਬ੍ਬਾ.

ਪਾਰਾਪਰਿਯਤ੍ਥੇਰਗਾਥਾਵਣ੍ਣਨਾ ਨਿਟ੍ਠਿਤਾ.

ਵੀਸਤਿਨਿਪਾਤਵਣ੍ਣਨਾ ਨਿਟ੍ਠਿਤਾ.