੧. ਅਧਿਮੁਤ੍ਤਤ੍ਥੇਰਗਾਥਾਵਣ੍ਣਨਾ

ਵੀਸਤਿਨਿਪਾਤੇ ਯਞ੍ਞਤ੍ਥਂ ਵਾਤਿਆਦਿਕਾ ਆਯਸ੍ਮਤੋ ਅਪਰਸ੍ਸ ਅਧਿਮੁਤ੍ਤਤ੍ਥੇਰਸ੍ਸ ਗਾਥਾ. ਕਾ ਉਪ੍ਪਤ੍ਤਿ? ਅਯਮ੍ਪਿ ਪੁਰਿਮਬੁਦ੍ਧੇਸੁ ਕਤਾਧਿਕਾਰੋ ਤਤ੍ਥ ਤਤ੍ਥ ਭਵੇ ਪੁਞ੍ਞਾਨਿ ਉਪਚਿਨਨ੍ਤੋ ਅਤ੍ਥਦਸ੍ਸਿਸ੍ਸ ਭਗਵਤੋ ਕਾਲੇ ਵਿਭਵਸਮ੍ਪਨ੍ਨੇ ਕੁਲੇ ਨਿਬ੍ਬਤ੍ਤਿਤ੍ਵਾ ਵਿਞ੍ਞੁਤਂ ਪਤ੍ਤੋ ਸਤ੍ਥਰਿ ਪਰਿਨਿਬ੍ਬੁਤੇ ਭਿਕ੍ਖੁਸਙ੍ਘਂ ਉਪਟ੍ਠਹਨ੍ਤੋ ਮਹਾਦਾਨਾਨਿ ਪਵਤ੍ਤੇਸਿ. ਸੋ ਤੇਨ ਪੁਞ੍ਞਕਮ੍ਮੇਨ ਦੇਵਮਨੁਸ੍ਸੇਸੁ ਸਂਸਰਨ੍ਤੋ ਇਮਸ੍ਮਿਂ ਬੁਦ੍ਧੁਪ੍ਪਾਦੇ ਆਯਸ੍ਮਤੋ ਸਂਕਿਚ੍ਚਤ੍ਥੇਰਸ੍ਸ ਭਗਿਨਿਯਾ ਕੁਚ੍ਛਿਮ੍ਹਿ ਨਿਬ੍ਬਤ੍ਤਿ, ਅਧਿਮੁਤ੍ਤੋਤਿਸ੍ਸ ਨਾਮਂ ਅਹੋਸਿ. ਸੋ ਵਯਪ੍ਪਤ੍ਤੋ ਮਾਤੁਲਤ੍ਥੇਰਸ੍ਸ ਸਨ੍ਤਿਕੇ ਪਬ੍ਬਜਿਤ੍ਵਾ ਵਿਪਸ੍ਸਨਾਯ ਕਮ੍ਮਂ ਕਰੋਨ੍ਤੋ ਸਾਮਣੇਰਭੂਮਿਯਂਯੇਵ ਠਿਤੋ ਅਰਹਤ੍ਤਂ ਪਾਪੁਣਿ. ਤੇਨ ਵੁਤ੍ਤਂ ਅਪਦਾਨੇ (ਅਪ. ਥੇਰ ੧.੪.੮੪-੮੮) –

‘‘ਨਿਬ੍ਬੁਤੇ ਲੋਕਨਾਥਮ੍ਹਿ, ਅਤ੍ਥਦਸ੍ਸੀਨਰੁਤ੍ਤਮੇ;

ਉਪਟ੍ਠਹਿਂ ਭਿਕ੍ਖੁਸਙ੍ਘਂ, ਵਿਪ੍ਪਸਨ੍ਨੇਨ ਚੇਤਸਾ.

‘‘ਨਿਮਨ੍ਤੇਤ੍ਵਾ ਭਿਕ੍ਖੁਸਙ੍ਘਂ, ਉਜੁਭੂਤਂ ਸਮਾਹਿਤਂ;

ਉਚ੍ਛੁਨਾ ਮਣ੍ਡਪਂ ਕਤ੍ਵਾ, ਭੋਜੇਸਿਂ ਸਙ੍ਘਮੁਤ੍ਤਮਂ.

‘‘ਯਂ ਯਂ ਯੋਨੁਪਪਜ੍ਜਾਮਿ, ਦੇਵਤ੍ਤਂ ਅਥਮਾਨੁਸਂ;

ਸਬ੍ਬੇ ਸਤ੍ਤੇ ਅਭਿਭੋਮਿ, ਪੁਞ੍ਞਕਮ੍ਮਸ੍ਸਿਦਂ ਫਲਂ.

‘‘ਅਟ੍ਠਾਰਸੇ ਕਪ੍ਪਸਤੇ, ਯਂ ਦਾਨਮਦਦਿਂ ਤਦਾ;

ਦੁਗ੍ਗਤਿਂ ਨਾਭਿਜਾਨਾਮਿ, ਉਚ੍ਛੁਦਾਨਸ੍ਸਿਦਂ ਫਲਂ.

‘‘ਪਟਿਸਮ੍ਭਿਦਾ ਚਤਸ੍ਸੋ…ਪੇ… ਕਤਂ ਬੁਦ੍ਧਸ੍ਸ ਸਾਸਨ’’ਨ੍ਤਿ.

ਅਰਹਤ੍ਤਂ ਪਨ ਪਤ੍ਵਾ ਸਮਾਪਤ੍ਤਿਸੁਖੇਨ ਵੀਤਿਨਾਮੇਨ੍ਤੋ ਉਪਸਮ੍ਪਜ੍ਜਿਤੁਕਾਮੋ ‘‘ਮਾਤਰਂ ਆਪੁਚ੍ਛਿਸ੍ਸਾਮੀ’’ਤਿ ਮਾਤੁ ਸਨ੍ਤਿਕਂ ਗਚ੍ਛਨ੍ਤੋ ਅਨ੍ਤਰਾਮਗ੍ਗੇ ਦੇਵਤਾਯ ਬਲਿਕਮ੍ਮਕਰਣਤ੍ਥਂ ਮਂਸਪਰਿਯੇਸਨਂ ਚਰਨ੍ਤੇਹਿ ਪਞ੍ਚਸਤੇਹਿ ਚੋਰੇਹਿ ਸਮਾਗਚ੍ਛਿ. ਚੋਰਾ ਚ ਤਂ ਅਗ੍ਗਹੇਸੁਂ ‘‘ਦੇਵਤਾਯ ਬਲਿ ਭਵਿਸ੍ਸਤੀ’’ਤਿ. ਸੋ ਚੋਰੇਹਿ ਗਹਿਤੋਪਿ ਅਭੀਤੋ ਅਚ੍ਛਮ੍ਭੀ ਵਿਪ੍ਪਸਨ੍ਨਮੁਖੋਵ ਅਟ੍ਠਾਸਿ. ਤਂ ਦਿਸ੍ਵਾ ਚੋਰਗਾਮਣਿਅਚ੍ਛਰਿਯਬ੍ਭੁਤਚਿਤ੍ਤਜਾਤੋ ਪਸਂਸਨ੍ਤੋ –

੭੦੫. ‘‘ਯਞ੍ਞਤ੍ਥਂ ਵਾ ਧਨਤ੍ਥਂ ਵਾ, ਯੇ ਹਨਾਮ ਮਯਂ ਪੁਰੇ;

ਅਵਸੇਸਂ ਭਯਂ ਹੋਤਿ, ਵੇਧਨ੍ਤਿ ਵਿਲਪਨ੍ਤਿ ਚ.

੭੦੬. ‘‘ਤਸ੍ਸ ਤੇ ਨਤ੍ਥਿ ਭੀਤਤ੍ਤਂ, ਭਿਯ੍ਯੋ ਵਣ੍ਣੋ ਪਸੀਦਤਿ;

ਕਸ੍ਮਾ ਨ ਪਰਿਦੇਵੇਸਿ, ਏਵਰੂਪੇ ਮਹਬ੍ਭਯੇ’’ਤਿ. – ਦ੍ਵੇ ਗਾਥਾ ਅਭਾਸਿ;

ਤਤ੍ਥ ਯਞ੍ਞਤ੍ਥਨ੍ਤਿ ਯਜਨਤ੍ਥਂ ਦੇਵਤਾਨਂ ਬਲਿਕਮ੍ਮਕਰਣਤ੍ਥਂ ਵਾ. ਵਾ-ਸਦ੍ਦੋ ਵਿਕਪ੍ਪਨਤ੍ਥੋ. ਧਨਤ੍ਥਨ੍ਤਿ ਸਾਪਤੇਯ੍ਯਹਰਣਤ੍ਥਂ. ਯੇ ਹਨਾਮ ਮਯਂ ਪੁਰੇਤਿ ਯੇ ਸਤ੍ਤੇ ਮਯਂ ਪੁਬ੍ਬੇ ਹਨਿਮ੍ਹ. ਅਤੀਤਤ੍ਥੇ ਹਿ ਇਦਂ ਵਤ੍ਤਮਾਨਵਚਨਂ. ਅਵਸੇਤਿ ਅਵਸੇ ਅਸੇਰਿਕੇ ਕਤ੍ਵਾ. ਤਨ੍ਤਿ ਤੇਸਂ. ‘‘ਅਵਸੇਸਨ੍ਤਿ’’ਪਿ ਪਠਨ੍ਤਿ. ਅਮ੍ਹੇਹਿ ਗਹਿਤੇਸੁ ਤਂ ਏਕਂ ਠਪੇਤ੍ਵਾ ਅਵਸੇਸਾਨਂ; ਅਯਮੇਵ ਵਾ ਪਾਠੋ. ਭਯਂ ਹੋਤੀਤਿ ਮਰਣਭਯਂ ਹੋਤਿ. ਯੇਨ ਤੇ ਵੇਧਨ੍ਤਿ ਵਿਲਪਨ੍ਤਿ,ਚਿਤ੍ਤੁਤ੍ਰਾਸੇਨ ਵੇਧਨ੍ਤਿ, ‘‘ਸਾਮਿ, ਤੁਮ੍ਹਾਕਂ ਇਦਞ੍ਚਿਦਞ੍ਚ ਦਸ੍ਸਾਮ, ਦਾਸਾ ਭਵਿਸ੍ਸਾਮਾ’’ਤਿਆਦਿਕਂ ਵਦਨ੍ਤਾ ਵਿਲਪਨ੍ਤਿ.

ਤਸ੍ਸ ਤੇਤਿ ਯੋ ਤ੍ਵਂ ਅਮ੍ਹੇਹਿ ਦੇਵਤਾਯ ਬਲਿਕਮ੍ਮਤ੍ਥਂ ਜੀਵਿਤਾ ਵੋਰੋਪੇਤੁਕਾਮੇਹਿ ਉਕ੍ਖਿਤ੍ਤਾਸਿਕੇਹਿ ਸਨ੍ਤਜ੍ਜਿਤੋ, ਤਸ੍ਸ ਤੇ. ਭੀਤਤ੍ਤਨ੍ਤਿ ਭੀਤਭਾਵੋ, ਭਯਨ੍ਤਿ ਅਤ੍ਥੋ. ਭਿਯ੍ਯੋ ਵਣ੍ਣੋ ਪਸੀਦਤੀਤਿ ਪਕਤਿਵਣ੍ਣਤੋ ਉਪਰਿਪਿ ਤੇ ਮੁਖਵਣ੍ਣੋ ਵਿਪ੍ਪਸੀਦਤਿ. ਥੇਰਸ੍ਸ ਕਿਰ ਤਦਾ ‘‘ਸਚੇ ਇਮੇ ਮਾਰੇਸ੍ਸਨ੍ਤਿ, ਇਦਾਨੇਵਾਹਂ ਅਨੁਪਾਦਾਯ ਪਰਿਨਿਬ੍ਬਾਯਿਸ੍ਸਾਮਿ, ਦੁਕ੍ਖਭਾਰੋ ਵਿਗਚ੍ਛਿਸ੍ਸਤੀ’’ਤਿ ਉਲ਼ਾਰਂ ਪੀਤਿਸੋਮਨਸ੍ਸਂ ਉਪ੍ਪਜ੍ਜਿ. ਏਵਰੂਪੇ ਮਹਬ੍ਭਯੇਤਿ ਏਦਿਸੇ ਮਹਤਿ ਮਰਣਭਯੇ ਉਪਟ੍ਠਿਤੇ. ਹੇਤੁਅਤ੍ਥੇ ਵਾ ਏਤਂ ਭੁਮ੍ਮਵਚਨਂ.

ਇਦਾਨਿ ਥੇਰੋ ਚੋਰਗਾਮਣਿਸ੍ਸ ਪਟਿਵਚਨਦਾਨਮੁਖੇਨ ਧਮ੍ਮਂ ਦੇਸੇਨ੍ਤੋ –

੭੦੭. ‘‘ਨਤ੍ਥਿ ਚੇਤਸਿਕਂ ਦੁਕ੍ਖਂ, ਅਨਪੇਕ੍ਖਸ੍ਸ ਗਾਮਣਿ;

ਅਤਿਕ੍ਕਨ੍ਤਾ ਭਯਾ ਸਬ੍ਬੇ, ਖੀਣਸਂਯੋਜਨਸ੍ਸ ਵੇ.

੭੦੮. ‘‘ਖੀਣਾਯ ਭਵਨੇਤ੍ਤਿਯਾ, ਦਿਟ੍ਠੇ ਧਮ੍ਮੇ ਯਥਾਤਥੇ;

ਨ ਭਯਂ ਮਰਣੇ ਹੋਤਿ, ਭਾਰਨਿਕ੍ਖੇਪਨੇ ਯਥਾ.

੭੦੯. ‘‘ਸੁਚਿਣ੍ਣਂ ਬ੍ਰਹ੍ਮਚਰਿਯਂ ਮੇ, ਮਗ੍ਗੋ ਚਾਪਿ ਸੁਭਾਵਿਤੋ;

ਮਰਣੇ ਮੇ ਭਯਂ ਨਤ੍ਥਿ, ਰੋਗਾਨਮਿਵ ਸਙ੍ਖਯੇ.

੭੧੦. ‘‘ਸੁਚਿਣ੍ਣਂ ਬ੍ਰਹ੍ਮਚਰਿਯਂ ਮੇ, ਮਗ੍ਗੋ ਚਾਪਿ ਸੁਭਾਵਿਤੋ;

ਨਿਰਸ੍ਸਾਦਾ ਭਵਾ ਦਿਟ੍ਠਾ, ਵਿਸਂ ਪਿਤ੍ਵਾਵ ਛਡ੍ਡਿਤਂ.

੭੧੧. ‘‘ਪਾਰਗੂ ਅਨੁਪਾਦਾਨੋ, ਕਤਕਿਚ੍ਚੋ ਅਨਾਸਵੋ;

ਤੁਟ੍ਠੋ ਆਯੁਕ੍ਖਯਾ ਹੋਤਿ, ਮੁਤ੍ਤੋ ਆਘਾਤਨਾ ਯਥਾ.

੭੧੨. ‘‘ਉਤ੍ਤਮਂ ਧਮ੍ਮਤਂ ਪਤ੍ਤੋ, ਸਬ੍ਬਲੋਕੇ ਅਨਤ੍ਥਿਕੋ;

ਆਦਿਤ੍ਤਾਵ ਘਰਾ ਮੁਤ੍ਤੋ, ਮਰਣਸ੍ਮਿਂ ਨ ਸੋਚਤਿ.

੭੧੩. ‘‘ਯਦਤ੍ਥਿ ਸਙ੍ਗਤਂ ਕਿਞ੍ਚਿ, ਭਵੋ ਵਾ ਯਤ੍ਥ ਲਬ੍ਭਤਿ;

ਸਬ੍ਬਂ ਅਨਿਸ੍ਸਰਂ ਏਤਂ, ਇਤਿ ਵੁਤ੍ਤਂ ਮਹੇਸਿਨਾ.

੭੧੪. ‘‘ਯੋ ਤਂ ਤਥਾ ਪਜਾਨਾਤਿ, ਯਥਾ ਬੁਦ੍ਧੇਨ ਦੇਸਿਤਂ;

ਨ ਗਣ੍ਹਾਤਿ ਭਵਂ ਕਿਞ੍ਚਿ, ਸੁਤਤ੍ਤਂਵ ਅਯੋਗੁਲ਼ਂ.

੭੧੫. ‘‘ਨ ਮੇ ਹੋਤਿ ‘ਅਹੋਸਿ’ਨ੍ਤਿ, ‘ਭਵਿਸ੍ਸ’ਨ੍ਤਿ ਨ ਹੋਤਿ ਮੇ;

ਸਙ੍ਖਾਰਾ ਵਿਗਮਿਸ੍ਸਨ੍ਤਿ, ਤਤ੍ਥ ਕਾ ਪਰਿਦੇਵਨਾ.

੭੧੬. ‘‘ਸੁਦ੍ਧਂ ਧਮ੍ਮਸਮੁਪ੍ਪਾਦਂ, ਸੁਦ੍ਧਂ ਸਙ੍ਖਾਰਸਨ੍ਤਤਿਂ;

ਪਸ੍ਸਨ੍ਤਸ੍ਸ ਯਥਾਭੂਤਂ, ਨ ਭਯਂ ਹੋਤਿ ਗਾਮਣਿ.

੭੧੭. ‘‘ਤਿਣਕਟ੍ਠਸਮਂ ਲੋਕਂ, ਯਦਾ ਪਞ੍ਞਾਯ ਪਸ੍ਸਤਿ;

ਮਮਤ੍ਤਂ ਸੋ ਅਸਂਵਿਨ੍ਦਂ, ‘ਨਤ੍ਥਿ ਮੇ’ਤਿ ਨ ਸੋਚਤਿ.

੭੧੮. ‘‘ਉਕ੍ਕਣ੍ਠਾਮਿ ਸਰੀਰੇਨ, ਭਵੇਨਮ੍ਹਿ ਅਨਤ੍ਥਿਕੋ;

ਸੋਯਂ ਭਿਜ੍ਜਿਸ੍ਸਤਿ ਕਾਯੋ, ਅਞ੍ਞੋ ਚ ਨ ਭਵਿਸ੍ਸਤਿ.

੭੧੯. ‘‘ਯਂ ਵੋ ਕਿਚ੍ਚਂ ਸਰੀਰੇਨ, ਤਂ ਕਰੋਥ ਯਦਿਚ੍ਛਥ;

ਨ ਮੇ ਤਪ੍ਪਚ੍ਚਯਾ ਤਤ੍ਥ, ਦੋਸੋ ਪੇਮਞ੍ਚ ਹੇਹਿਤੀ’’ਤਿ. –

ਇਮਾ ਗਾਥਾ ਅਭਾਸਿ.

੭੨੦. ‘‘ਤਸ੍ਸ ਤਂ ਵਚਨਂ ਸੁਤ੍ਵਾ, ਅਬ੍ਭੁਤਂ ਲੋਮਹਂਸਨਂ;

ਸਤ੍ਥਾਨਿ ਨਿਕ੍ਖਿਪਿਤ੍ਵਾਨ, ਮਾਣਵਾ ਏਤਦਬ੍ਰਵੁ’’ਨ੍ਤਿ. –

ਅਯਂ ਸਙ੍ਗੀਤਿਕਾਰੇਹਿ ਵੁਤ੍ਤਗਾਥਾ. ਇਤੋ ਅਪਰਾ ਤਿਸ੍ਸੋ ਚੋਰਾਨਂ, ਥੇਰਸ੍ਸ ਚ ਵਚਨਪਟਿਵਚਨਗਾਥਾ –

੭੨੧. ‘‘ਕਿਂ ਭਦਨ੍ਤੇ ਕਰਿਤ੍ਵਾਨ, ਕੋ ਵਾ ਆਚਰਿਯੋ ਤਵ;

ਕਸ੍ਸ ਸਾਸਨਮਾਗਮ੍ਮ, ਲਬ੍ਭਤੇ ਤਂ ਅਸੋਕਤਾ.

੭੨੨. ‘‘ਸਬ੍ਬਞ੍ਞੂ ਸਬ੍ਬਦਸ੍ਸਾਵੀ, ਜਿਨੋ ਆਚਰਿਯੋ ਮਮ;

ਮਹਾਕਾਰੁਣਿਕੋ ਸਤ੍ਥਾ, ਸਬ੍ਬਲੋਕਤਿਕਿਚ੍ਛਕੋ.

੭੨੩. ‘‘ਤੇਨਾਯਂ ਦੇਸਿਤੋ ਧਮ੍ਮੋ, ਖਯਗਾਮੀ ਅਨੁਤ੍ਤਰੋ;

ਤਸ੍ਸ ਸਾਸਨਮਾਗਮ੍ਮ, ਲਬ੍ਭਤੇ ਤਂ ਅਸੋਕਤਾ.

੭੨੪. ‘‘ਸੁਤ੍ਵਾਨ ਚੋਰਾ ਇਸਿਨੋ ਸੁਭਾਸਿਤਂ, ਨਿਕ੍ਖਿਪ੍ਪ ਸਤ੍ਥਾਨਿ ਚ ਆਵੁਧਾਨਿ ਚ;

ਤਮ੍ਹਾ ਚ ਕਮ੍ਮਾ ਵਿਰਮਿਂਸੁ ਏਕੇ, ਏਕੇ ਚ ਪਬ੍ਬਜ੍ਜਮਰੋਚਯਿਂਸੁ.

੭੨੫. ‘‘ਤੇ ਪਬ੍ਬਜਿਤ੍ਵਾ ਸੁਗਤਸ੍ਸ ਸਾਸਨੇ, ਭਾਵੇਤ੍ਵ ਬੋਜ੍ਝਙ੍ਗਬਲਾਨਿ ਪਣ੍ਡਿਤਾ;

ਉਦਗ੍ਗਚਿਤ੍ਤਾ ਸੁਮਨਾ ਕਤਿਨ੍ਦ੍ਰਿਯਾ, ਫੁਸਿਂਸੁ ਨਿਬ੍ਬਾਨਪਦਂ ਅਸਙ੍ਖਤ’’ਨ੍ਤਿ. –

ਇਮਾਪਿ ਸਙ੍ਗੀਤਿਕਾਰੇਹਿ ਵੁਤ੍ਤਗਾਥਾ.

ਤਤ੍ਥ ਨਤ੍ਥਿ ਚੇਤਸਿਕਂ ਦੁਕ੍ਖਂ, ਅਨਪੇਕ੍ਖਸ੍ਸ, ਗਾਮਣੀਤਿ ਗਾਮਣਿ, ਅਪੇਕ੍ਖਾਯ, ਤਣ੍ਹਾਯ, ਅਭਾਵੇਨ ਅਨਪੇਕ੍ਖਸ੍ਸ ਮਾਦਿਸਸ੍ਸ, ਲੋਹਿਤਸਭਾਵੋ ਪੁਬ੍ਬੋ ਵਿਯ, ਚੇਤਸਿਕਂ ਦੁਕ੍ਖਂ ਦੋਮਨਸ੍ਸਂ ਨਤ੍ਥਿ, ਦੋਮਨਸ੍ਸਾਭਾਵਾਪਦੇਸੇਨ ਭਯਾਭਾਵਂ ਵਦਤਿ. ਤੇਨਾਹ ‘‘ਅਤਿਕ੍ਕਨ੍ਤਾ ਭਯਾ ਸਬ੍ਬੇ’’ਤਿ. ਅਤਿਕ੍ਕਨ੍ਤਾ ਭਯਾ ਸਬ੍ਬੇਤਿ ਖੀਣਸਂਯੋਜਨਸ੍ਸ ਅਰਹਤੋ ਪਞ੍ਚਵੀਸਤਿ ਮਹਾਭਯਾ, ਅਞ੍ਞੇ ਚ ਸਬ੍ਬੇਪਿ ਭਯਾ ਏਕਂਸੇਨ ਅਤਿਕ੍ਕਨ੍ਤਾ ਅਤੀਤਾ, ਅਪਗਤਾਤਿ ਅਤ੍ਥੋ.

ਦਿਟ੍ਠੇ ਧਮ੍ਮੇ ਯਥਾਤਥੇਤਿ ਚਤੁਸਚ੍ਚਧਮ੍ਮੇ ਪਰਿਞ੍ਞਾਪਹਾਨਸਚ੍ਛਿਕਿਰਿਯਭਾਵਨਾਵਸੇਨ ਮਗ੍ਗਪਞ੍ਞਾਯ ਯਥਾਭੂਤਂ ਦਿਟ੍ਠੇ. ਮਰਣੇਤਿ ਮਰਣਹੇਤੁ. ਭਾਰਨਿਕ੍ਖੇਪਨੇ ਯਥਾਤਿ ਯਥਾ ਕੋਚਿ ਪੁਰਿਸੋ ਸੀਸੇ ਠਿਤੇਨ ਮਹਤਾ ਗਰੁਭਾਰੇਨ ਸਂਸੀਦਨ੍ਤੋ ਤਸ੍ਸ ਨਿਕ੍ਖੇਪਨੇ, ਅਪਨਯਨੇ ਨ ਭਾਯਤਿ, ਏਵਂ ਸਮ੍ਪਦਮਿਦਨ੍ਤਿ ਅਤ੍ਥੋ. ਵੁਤ੍ਤਞ੍ਹੇਤਂ ਭਗਵਤਾ –

‘‘ਭਾਰਾ ਹਵੇ ਪਞ੍ਚਕ੍ਖਨ੍ਧਾ, ਭਾਰਹਾਰੋ ਚ ਪੁਗ੍ਗਲੋ;

ਭਾਰਾਦਾਨਂ ਦੁਖਂ ਲੋਕੇ, ਭਾਰਨਿਕ੍ਖੇਪਨਂ ਸੁਖ’’ਨ੍ਤਿ. (ਸਂ. ਨਿ. ੩.੨੨);

ਸੁਚਿਣ੍ਣਨ੍ਤਿ ਸੁਟ੍ਠੁ ਚਰਿਤਂ. ਬ੍ਰਹ੍ਮਚਰਿਯਨ੍ਤਿ, ਸਿਕ੍ਖਤ੍ਤਯਸਙ੍ਗਹਂ ਸਾਸਨਬ੍ਰਹ੍ਮਚਰਿਯਂ. ਤਤੋ ਏਵ ਮਗ੍ਗੋ ਚਾਪਿ ਸੁਭਾਵਿਤੋ ਅਟ੍ਠਙ੍ਗਿਕੋ ਅਰਿਯਮਗ੍ਗੋਪਿ ਸਮ੍ਮਦੇਵ ਭਾਵਿਤੋ. ਰੋਗਾਨਮਿਵ ਸਙ੍ਖਯੇਤਿ ਯਥਾ ਬਹੂਹਿ ਰੋਗੇਹਿ ਅਭਿਭੂਤਸ੍ਸ ਆਤੁਰਸ੍ਸ ਰੋਗਾਨਂ ਸਙ੍ਖਯੇ ਪੀਤਿਸੋਮਨਸ੍ਸਮੇਵ ਹੋਤਿ, ਏਵਂ ਖਨ੍ਧਰੋਗਸਙ੍ਖਯੇ ਮਰਣੇ ਮਾਦਿਸਸ੍ਸ ਭਯਂ ਨਤ੍ਥਿ.

ਨਿਰਸ੍ਸਾਦਾ ਭਵਾ ਦਿਟ੍ਠਾਤਿ ਤੀਹਿ ਦੁਕ੍ਖਤਾਹਿ ਅਭਿਭੂਤਾ, ਏਕਾਦਸਹਿ ਅਗ੍ਗੀਹਿ ਆਦਿਤ੍ਤਾ, ਤਯੋ ਭਵਾ ਨਿਰਸ੍ਸਾਦਾ, ਅਸ੍ਸਾਦਰਹਿਤਾ, ਮਯਾ ਦਿਟ੍ਠਾ. ਵਿਸਂ ਪਿਤ੍ਵਾਵ ਛਡ੍ਡਿਤਨ੍ਤਿ ਪਮਾਦਵਸੇਨ ਵਿਸਂ ਪਿਵਿਤ੍ਵਾ ਤਾਦਿਸੇਨ ਪਯੋਗੇਨ ਛਡ੍ਡਿਤਂ ਵਿਯ ਮਰਣੇ ਮੇ ਭਯਂ ਨਤ੍ਥੀਤਿ ਅਤ੍ਥੋ.

ਮੁਤ੍ਤੋ ਆਘਾਤਨਾ ਯਥਾਤਿ ਯਥਾ ਚੋਰੇਹਿ ਮਾਰਣਤ੍ਥਂ ਆਘਾਤਨਂ ਨੀਤੋ ਕੇਨਚਿ ਉਪਾਯੇਨ ਤਤੋ ਮੁਤ੍ਤੋ ਹਟ੍ਠਤੁਟ੍ਠੋ ਹੋਤਿ, ਏਵਂ ਸਂਸਾਰਪਾਰਂ, ਨਿਬ੍ਬਾਨਂ, ਗਤਤ੍ਤਾ ਪਾਰਗੂ, ਚਤੂਹਿਪਿ ਉਪਾਦਾਨੇਹਿ ਅਨੁਪਾਦਾਨੋ, ਪਰਿਞ੍ਞਾਦੀਨਂ ਸੋਲ਼ਸਨ੍ਨਂ ਕਿਚ੍ਚਾਨਂ ਕਤਤ੍ਤਾ ਕਤਕਿਚ੍ਚੋ ਕਾਮਾਸਵਾਦੀਹਿ ਅਨਾਸਵੋ, ਆਯੁਕ੍ਖਯਾ ਆਯੁਕ੍ਖਯਹੇਤੁ ਤੁਟ੍ਠੋ ਸੋਮਨਸ੍ਸਿਕੋ ਹੋਤਿ.

ਉਤ੍ਤਮਨ੍ਤਿ ਸੇਟ੍ਠਂ. ਧਮ੍ਮਤਨ੍ਤਿ, ਧਮ੍ਮਸਭਾਵਂ. ਅਰਹਤ੍ਤੇ ਸਿਦ੍ਧੇ ਸਿਜ੍ਝਨਹੇਤੁ ਇਟ੍ਠਾਦੀਸੁ ਤਾਦਿਭਾਵਂ. ਸਬ੍ਬਲੋਕੇਤਿ ਸਬ੍ਬਲੋਕਸ੍ਮਿਮ੍ਪਿ, ਦੀਘਾਯੁਕਸੁਖਬਹੁਲਤਾਦਿਵਸੇਨ ਸਂਯੁਤ੍ਤੇਪਿ ਲੋਕੇ. ਅਨਤ੍ਥਿਕੋਤਿ, ਅਨਪੇਕ੍ਖੋ. ਆਦਿਤ੍ਤਾਵ ਘਰਾ ਮੁਤ੍ਤੋਤਿ ਯਥਾ ਕੋਚਿ ਪੁਰਿਸੋ ਸਮਨ੍ਤਤੋ ਆਦਿਤ੍ਤਤੋ ਪਜ੍ਜਲਿਤਤੋ ਗੇਹਤੋ ਨਿਸ੍ਸਟੋ, ਤਤੋ ਨਿਸ੍ਸਰਣਨਿਮਿਤ੍ਤਂ ਨ ਸੋਚਤਿ, ਏਵਂ ਖੀਣਾਸਵੋ ਮਰਣਨਿਮਿਤ੍ਤਂ ਨ ਸੋਚਤਿ.

ਯਦਤ੍ਥਿ ਸਙ੍ਗਤਂ ਕਿਞ੍ਚੀਤਿ ਯਂਕਿਞ੍ਚਿ ਇਮਸ੍ਮਿਂ ਲੋਕੇ ਅਤ੍ਥਿ, ਵਿਜ੍ਜਤਿ, ਉਪਲਬ੍ਭਤਿ ਸਙ੍ਗਤਂ, ਸਤ੍ਤੇਹਿ ਸਙ੍ਖਾਰੇਹਿ ਵਾ ਸਮਾਗਮੋ, ਸਮੋਧਾਨਂ. ‘‘ਸਙ੍ਖਤ’’ਨ੍ਤਿਪਿ ਪਾਠੋ, ਤਸ੍ਸ ਯਂਕਿਞ੍ਚਿ ਪਚ੍ਚਯੇਹਿ ਸਮਚ੍ਚ ਸਮ੍ਭੁਯ੍ਯ ਕਤਂ, ਪਟਿਚ੍ਚਸਮੁਪ੍ਪਨ੍ਨਨ੍ਤਿ ਅਤ੍ਥੋ. ਭਵੋ ਵਾ ਯਤ੍ਥ ਲਬ੍ਭਤੀਤਿ ਯਸ੍ਮਿਂ ਸਤ੍ਤਨਿਕਾਯੇ ਯੋ ਉਪਪਤ੍ਤਿਭਵੋ ਲਬ੍ਭਤਿ. ਸਬ੍ਬਂ ਅਨਿਸ੍ਸਰਂ ਏਤਨ੍ਤਿ ਸਬ੍ਬਮੇਤਂ ਇਸ੍ਸਰਰਹਿਤਂ, ਨ ਏਤ੍ਥ ਕੇਨਚਿ ‘‘ਏਵਂ ਹੋਤੂ’’ਤਿ ਇਸ੍ਸਰਿਯਂ ਵਤ੍ਤੇਤੁਂ ਸਕ੍ਕਾ. ਇਤਿ ਵੁਤ੍ਤਂ ਮਹੇਸਿਨਾਤਿ ‘‘ਸਬ੍ਬੇ ਧਮ੍ਮਾ ਅਨਤ੍ਤਾ’’ਤਿ ਏਵਂ ਵੁਤ੍ਤਂ ਮਹੇਸਿਨਾ ਸਮ੍ਮਾਸਮ੍ਬੁਦ੍ਧੇਨ. ਤਸ੍ਮਾ ‘‘ਅਨਿਸ੍ਸਰਂ ਏਤ’’ਨ੍ਤਿ ਪਜਾਨਨ੍ਤੋ ਮਰਣਸ੍ਮਿਂ ਨ ਸੋਚਤੀਤਿ ਯੋਜਨਾ.

ਨ ਗਣ੍ਹਾਤਿ ਭਵਂ ਕਿਞ੍ਚੀਤਿ ਯੋ ਅਰਿਯਸਾਵਕੋ ‘‘ਸਬ੍ਬੇ ਸਙ੍ਖਾਰਾ ਅਨਿਚ੍ਚਾ’’ਤਿਆਦਿਨਾ (ਧ. ਪ. ੨੭੭) ਯਥਾ ਬੁਦ੍ਧੇਨ ਭਗਵਤਾ ਦੇਸਿਤਂ, ਤਥਾ ਤਂ ਭਵਤ੍ਤਯਂ ਵਿਪਸ੍ਸਨਾਪਞ੍ਞਾਸਹਿਤਾਯ ਮਗ੍ਗਪਞ੍ਞਾਯ ਪਜਾਨਾਤਿ. ਸੋ ਯਥਾ ਕੋਚਿ ਪੁਰਿਸੋ ਸੁਖਕਾਮੋ ਦਿਵਸਂ ਸਨ੍ਤਤ੍ਤਂ ਅਯੋਗੁਲ਼ਂ ਹਤ੍ਥੇਨ ਨ ਗਣ੍ਹਾਤਿ, ਏਵਂ ਕਿਞ੍ਚਿ ਖੁਦ੍ਦਕਂ ਵਾ ਮਹਨ੍ਤਂ ਵਾ ਭਵਂ ਨ ਗਣ੍ਹਾਤਿ, ਨ ਤਤ੍ਥ ਤਣ੍ਹਂ ਕਰੋਤੀਤਿ ਅਤ੍ਥੋ.

ਨ ਮੇ ਹੋਤਿ ‘‘ਅਹੋਸਿ’’ਨ੍ਤਿ ‘‘ਅਤੀਤਮਦ੍ਧਾਨਂ ਅਹਂ ਈਦਿਸੋ ਅਹੋਸਿ’’ਨ੍ਤਿ ਅਤ੍ਤਦਿਟ੍ਠਿਵਸੇਨ ਨ ਮੇ ਚਿਤ੍ਤਪ੍ਪਵਤ੍ਤਿ ਅਤ੍ਥਿ ਦਿਟ੍ਠਿਯਾ ਸਮ੍ਮਦੇਵ ਉਗ੍ਘਾਟਿਤਤ੍ਤਾ, ਧਮ੍ਮਸਭਾਵਸ੍ਸ ਚ ਸੁਦਿਟ੍ਠਤ੍ਤਾ. ‘‘ਭਵਿਸ੍ਸ’’ਨ੍ਤਿ ਨ ਹੋਤਿ ਮੇਤਿ ਤਤੋ ਏਵ ‘‘ਅਨਾਗਤਮਦ੍ਧਾਨਂ ਅਹਂ ਏਦਿਸੋ ਕਥਂ ਨੁ ਖੋ ਭਵਿਸ੍ਸਂ ਭਵੇਯ੍ਯ’’ਨ੍ਤਿ ਏਵਮ੍ਪਿ ਮੇ ਨ ਹੋਤਿ. ਸਙ੍ਖਾਰਾ ਵਿਗਮਿਸ੍ਸਨ੍ਤੀਤਿ ਏਵਂ ਪਨ ਹੋਤਿ ‘‘ਯਥਾਪਚ੍ਚਯਂ ਪਵਤ੍ਤਮਾਨਾ ਸਙ੍ਖਾਰਾਵ, ਨ ਏਤ੍ਥ ਕੋਚਿ ਅਤ੍ਤਾ ਵਾ ਅਤ੍ਤਨਿਯਂ ਵਾ, ਤੇ ਚ ਖੋ ਵਿਗਮਿਸ੍ਸਨ੍ਤਿ, ਵਿਨਸ੍ਸਿਸ੍ਸਨ੍ਤਿ, ਖਣੇ ਖਣੇ ਭਿਜ੍ਜਿਸ੍ਸਨ੍ਤੀ’’ਤਿ. ਤਤ੍ਥ ਕਾ ਪਰਿਦੇਵਨਾਤਿ ਏਵਂ ਪਸ੍ਸਨ੍ਤਸ੍ਸ ਮਾਦਿਸਸ੍ਸ ਤਤ੍ਥ ਸਙ੍ਖਾਰਗਤੇ ਕਾ ਨਾਮ ਪਰਿਦੇਵਨਾ.

ਸੁਦ੍ਧਨ੍ਤਿ ਕੇਵਲਂ, ਅਤ੍ਤਸਾਰੇਨ ਅਸਮ੍ਮਿਸ੍ਸਂ. ਧਮ੍ਮਸਮੁਪ੍ਪਾਦਨ੍ਤਿ ਪਚ੍ਚਯਪਚ੍ਚਯੁਪ੍ਪਨ੍ਨਧਮ੍ਮਸਮੁਪ੍ਪਤ੍ਤਿਂ ਅਵਿਜ੍ਜਾਦਿਪਚ੍ਚਯੇਹਿ ਸਙ੍ਖਾਰਾਦਿਧਮ੍ਮਮਤ੍ਤਪ੍ਪਵਤ੍ਤਿਂ. ਸਙ੍ਖਾਰਸਨ੍ਤਤਿਨ੍ਤਿ ਕਿਲੇਸਕਮ੍ਮਵਿਪਾਕਪ੍ਪਭੇਦਸਙ੍ਖਾਰਪਬਨ੍ਧਂ. ਪਸ੍ਸਨ੍ਤਸ੍ਸ ਯਥਾਭੂਤਨ੍ਤਿ ਸਹ ਵਿਪਸ੍ਸਨਾਯ ਮਗ੍ਗਪਞ੍ਞਾਯ ਯਾਥਾਵਤੋ ਜਾਨਨ੍ਤਸ੍ਸ.

ਤਿਣਕਟ੍ਠਸਮਂ ਲੋਕਨ੍ਤਿ ਯਥਾ ਅਰਞ੍ਞੇ ਅਪਰਿਗ੍ਗਹੇ ਤਿਣਕਟ੍ਠੇ ਕੇਨਚਿ ਗਯ੍ਹਮਾਨੇ ਅਪਰਸ੍ਸ ‘‘ਮਯ੍ਹਂ ਸਨ੍ਤਕਂ ਅਯਂ ਗਣ੍ਹਤੀ’’ਤਿ ਨ ਹੋਤਿ, ਏਵਂ ਸੋ ਅਸਾਮਿਕਤਾਯ ਤਿਣਕਟ੍ਠਸਮਂ ਸਙ੍ਖਾਰਲੋਕਂ ਯਦਾ ਪਞ੍ਞਾਯ ਪਸ੍ਸਤਿ, ਸੋ ਤਤ੍ਥ ਮਮਤ੍ਤਂ ਅਸਂਵਿਨ੍ਦਂ ਅਸਂਵਿਨ੍ਦਨ੍ਤੋ ਅਲਭਨ੍ਤੋ ਅਕਰੋਨ੍ਤੋ. ਨਤ੍ਥਿ ਮੇਤਿ ‘‘ਅਹੁ ਵਤ ਸੋਹਂ, ਤਂ ਮੇ ਨਤ੍ਥੀ’’ਤਿ ਨ ਸੋਚਤਿ.

ਉਕ੍ਕਣ੍ਠਾਮਿ ਸਰੀਰੇਨਾਤਿ ਅਸਾਰਕੇਨ ਅਭਿਨੁਦੇਨ ਦੁਕ੍ਖੇਨ ਅਕਤਞ੍ਞੁਨਾ ਅਸੁਚਿਦੁਗ੍ਗਨ੍ਧਜੇਗੁਚ੍ਛਪਟਿਕ੍ਕੂਲਸਭਾਵੇਨ ਇਮਿਨਾ ਕਾਯੇਨ ਉਕ੍ਕਣ੍ਠਾਮਿ ਇਮਂ ਕਾਯਂ ਨਿਬ੍ਬਿਨ੍ਦਨ੍ਤੋ ਏਵਂ ਤਿਟ੍ਠਾਮਿ. ਭਵੇਨਮ੍ਹਿ ਅਨਤ੍ਥਿਕੋਤਿ ਸਬ੍ਬੇਨਪਿ ਭਵੇਨ ਅਨਤ੍ਥਿਕੋ ਅਮ੍ਹਿ, ਨ ਕਿਞ੍ਚਿ ਭਵਂ ਪਤ੍ਥੇਮਿ. ਸੋਯਂ ਭਿਜ੍ਜਿਸ੍ਸਤਿ ਕਾਯੋਤਿ ਅਯਂ ਮਮ ਕਾਯੋ ਇਦਾਨਿ ਤੁਮ੍ਹਾਕਂ ਪਯੋਗੇਨ ਅਞ੍ਞਥਾ ਵਾ ਅਞ੍ਞਤ੍ਥ ਭਿਜ੍ਜਿਸ੍ਸਤਿ. ਅਞ੍ਞੋ ਚ ਨ ਭਵਿਸ੍ਸਤੀਤਿ ਅਞ੍ਞੋ ਕਾਯੋ ਮਯ੍ਹਂ ਆਯਤਿਂ ਨ ਭਵਿਸ੍ਸਤਿ, ਪੁਨਬ੍ਭਵਾਭਾਵਤੋ.

ਯਂ ਵੋ ਕਿਚ੍ਚਂ ਸਰੀਰੇਨਾਤਿ ਯਂ ਤੁਮ੍ਹਾਕਂ ਇਮਿਨਾ ਸਰੀਰੇਨ ਪਯੋਜਨਂ, ਤਂ ਕਰੋਥ ਯਦਿਚ੍ਛਥ, ਇਚ੍ਛਥ ਚੇ. ਨ ਮੇ ਤਪ੍ਪਚ੍ਚਯਾਤਿ, ਤਂ ਨਿਮਿਤ੍ਤਂ ਇਮਸ੍ਸ ਸਰੀਰਸ੍ਸ ਤੁਮ੍ਹੇਹਿ ਯਥਿਚ੍ਛਿਤਕਿਚ੍ਚਸ੍ਸ ਕਰਣਹੇਤੁ. ਤਤ੍ਥਾਤਿ ਤੇਸੁ ਕਰੋਨ੍ਤੇਸੁ ਚ ਅਕਰੋਨ੍ਤੇਸੁ ਚ. ਦੋਸੋ ਪੇਮਞ੍ਚ ਹੇਹਿਤੀਤਿ ਯਥਾਕ੍ਕਮਂ ਪਟਿਘੋ ਅਨੁਨਯੋ ਨ ਭਵਿਸ੍ਸਤਿ, ਅਤ੍ਤਨੋ ਭਵੇ ਅਪੇਕ੍ਖਾਯ ਸਬ੍ਬਸੋ ਪਹੀਨਤ੍ਤਾਤਿ ਅਧਿਪ੍ਪਾਯੋ. ਅਞ੍ਞਪਚ੍ਚਯਾ ਅਞ੍ਞਤ੍ਥ ਚ ਪਟਿਘਾਨੁਨਯੇਸੁ ਅਸਨ੍ਤੇਸੁਪਿ ਤਪ੍ਪਚ੍ਚਯਾ, ‘‘ਤਤ੍ਥਾ’’ਤਿ ਵਚਨਂ ਯਥਾਧਿਗਤਵਸੇਨ ਵੁਤ੍ਤਂ.

ਤਸ੍ਸਾਤਿ ਅਧਿਮੁਤ੍ਤਤ੍ਥੇਰਸ੍ਸ. ਤਂ ਵਚਨਨ੍ਤਿ ‘‘ਨਤ੍ਥਿ ਚੇਤਸਿਕਂ ਦੁਕ੍ਖ’’ਨ੍ਤਿਆਦਿਕਂ ਮਰਣੇ ਭਯਾਭਾਵਾਦਿਦੀਪਕਂ, ਤਤੋ ਏਵ ਅਬ੍ਭੁਤਂ ਲੋਮਹਂਸਨਂ ਵਚਨਂ ਸੁਤ੍ਵਾ. ਮਾਣਵਾਤਿ ਚੋਰਾ. ਚੋਰਾ ਹਿ ‘‘ਮਾਣਵਾ’’ਤਿ ਵੁਚ੍ਚਨ੍ਤਿ ‘‘ਮਾਣਵੇਹਿ ਸਹ ਗਚ੍ਛਨ੍ਤਿ ਕਤਕਮ੍ਮੇਹਿ ਅਕਤਕਮ੍ਮੇਹਿਪੀ’’ਤਿਆਦੀਸੁ (ਮ. ਨਿ. ੨.੧੪੯) ਵਿਯ.

ਕਿਂ ਭਦਨ੍ਤੇ ਕਰਿਤ੍ਵਾਨਾਤਿ, ਭਨ੍ਤੇ, ਕਿਂ ਨਾਮ ਤਪੋਕਮ੍ਮਂ ਕਤ੍ਵਾ. ਕੋ ਵਾ ਤਵ ਆਚਰਿਯੋ ਕਸ੍ਸ ਸਾਸਨਂ, ਓਵਾਦਂ ਨਿਸ੍ਸਾਯ ਅਯਂ ਅਸੋਕਤਾ ਮਰਣਕਾਲੇ ਸੋਕਾਭਾਵੋ ਲਬ੍ਭਤੀਤਿ ਏਤਂ ਅਤ੍ਥਂ ਅਬ੍ਰਵੁਂ, ਪੁਚ੍ਛਾਵਸੇਨ ਕਥੇਸੁਂ, ਭਾਸਿਂਸੁ.

ਤਂ ਸੁਤ੍ਵਾ ਥੇਰੋ ਤੇਸਂ ਪਟਿਵਚਨਂ ਦੇਨ੍ਤੋ ‘‘ਸਬ੍ਬਞ੍ਞੂ’’ਤਿਆਦਿਮਾਹ. ਤਤ੍ਥ ਸਬ੍ਬਞ੍ਞੂਤਿ ਪਰੋਪਦੇਸੇਨ ਵਿਨਾ ਸਬ੍ਬਪਕਾਰੇਨ ਸਬ੍ਬਧਮ੍ਮਾਵਬੋਧਨਸਮਤ੍ਥਸ੍ਸ ਆਕਙ੍ਖਾਪਟਿਬਦ੍ਧਵੁਤ੍ਤਿਨੋ ਅਨਾਵਰਣਞਾਣਸ੍ਸ ਅਧਿਗਮੇਨ ਅਤੀਤਾਦਿਭੇਦਂ ਸਬ੍ਬਂ ਜਾਨਾਤੀਤਿ, ਸਬ੍ਬਞ੍ਞੂ. ਤੇਨੇਵ ਸਮਨ੍ਤਚਕ੍ਖੁਨਾ ਸਬ੍ਬਸ੍ਸ ਦਸ੍ਸਨਤੋ ਸਬ੍ਬਦਸ੍ਸਾਵੀ. ਯਮ੍ਹਿ ਅਨਾਵਰਣਞਾਣਂ, ਤਦੇਵ ਸਬ੍ਬਞ੍ਞੁਤਞ੍ਞਾਣਂ, ਨਤ੍ਥੇਵ ਅਸਾਧਾਰਣਞਾਣਪਾਲ਼ਿਯਾ ਵਿਰੋਧੋ ਵਿਸਯੁਪ੍ਪਤ੍ਤਿਮੁਖੇਨ ਅਞ੍ਞੇਹਿ ਅਸਾਧਾਰਣਭਾਵਦਸ੍ਸਨਤ੍ਥਂ ਏਕਸ੍ਸੇਵ ਞਾਣਸ੍ਸ ਦ੍ਵਿਧਾ ਵੁਤ੍ਤਤ੍ਤਾ. ਯਂ ਪਨੇਤ੍ਥ ਵਤ੍ਤਬ੍ਬਂ, ਤਂ ਇਤਿਵੁਤ੍ਤਕਵਣ੍ਣਨਾਯਂ (ਇਤਿਵੁ. ਅਟ੍ਠ. ੩੮) ਵਿਤ੍ਥਾਰਤੋ ਵੁਤ੍ਤਮੇਵਾਤਿ ਤਤ੍ਥ ਵੁਤ੍ਤਨਯੇਨੇਵ ਵੇਦਿਤਬ੍ਬਂ. ਪਞ੍ਚਨ੍ਨਮ੍ਪਿ ਮਾਰਾਨਂ ਵਿਜਯਤੋ ਜਿਨੋ, ਹੀਨਾਦਿਵਿਭਾਗਭਿਨ੍ਨੇ ਸਬ੍ਬਸ੍ਮਿਂ ਸਤ੍ਤਨਿਕਾਯੇ ਅਧਿਮੁਤ੍ਤਵੁਤ੍ਤਿਤਾਯ ਮਹਤਿਯਾ ਕਰੁਣਾਯ ਸਮਨ੍ਨਾਗਤਤ੍ਤਾ ਮਹਾਕਾਰੁਣਿਕੋ, ਦਿਟ੍ਠਧਮ੍ਮਿਕਸਮ੍ਪਰਾਯਿਕਪਰਮਤ੍ਥੇਹਿ ਯਥਾਰਹਂ ਵੇਨੇਯ੍ਯਾਨਂ ਅਨੁਸਾਸਨਤੋ ਸਤ੍ਥਾ, ਤਤੋ ਏਵ ਸਬ੍ਬਲੋਕਸ੍ਸ ਕਿਲੇਸਰੋਗਤਿਕਿਚ੍ਛਨਤੋ ਸਬ੍ਬਲੋਕਤਿਕਿਚ੍ਛਕੋ, ਸਮ੍ਮਾਸਮ੍ਬੁਦ੍ਧੋ ਆਚਰਿਯੋ ਮਮਾਤਿ ਯੋਜਨਾ. ਖਯਗਾਮੀਤਿ ਨਿਬ੍ਬਾਨਗਾਮੀ.

ਏਵਂ ਥੇਰੇਨ ਸਤ੍ਥੁ ਸਾਸਨਸ੍ਸ ਚ ਗੁਣੇ ਪਕਾਸਿਤੇ ਪਟਿਲਦ੍ਧਸਦ੍ਧਾ ਏਕਚ੍ਚੇ ਚੋਰਾ ਪਬ੍ਬਜਿਂਸੁ, ਏਕਚ੍ਚੇ ਉਪਾਸਕਤ੍ਤਂ ਪਵੇਦੇਸੁਂ. ਤਮਤ੍ਥਂ ਦੀਪੇਨ੍ਤੋ ਧਮ੍ਮਸਙ੍ਗਾਹਕਾ ‘‘ਸੁਤ੍ਵਾਨ ਚੋਰਾ’’ਤਿਆਦਿਨਾ ਦ੍ਵੇ ਗਾਥਾ ਅਭਾਸਿਂਸੁ. ਤਤ੍ਥ ਇਸਿਨੋਤਿ ਅਧਿਸੀਲਸਿਕ੍ਖਾਦੀਨਂ ਏਸਨਟ੍ਠੇਨ ਇਸਿਨੋ, ਅਧਿਮੁਤ੍ਤਤ੍ਥੇਰਸ੍ਸ. ਨਿਕ੍ਖਿਪ੍ਪਾਤਿ ਪਹਾਯ. ਸਤ੍ਥਾਨਿ ਚ ਆਵੁਧਾਨਿ ਚਾਤਿ ਅਸਿਆਦਿਸਤ੍ਥਾਨਿ ਚੇਵ ਧਨੁਕਲਾਪਾਦਿਆਵੁਧਾਨਿ ਚ. ਤਮ੍ਹਾ ਚ ਕਮ੍ਮਾਤਿ ਤਤੋ ਚੋਰਕਮ੍ਮਤੋ.

ਤੇ ਪਬ੍ਬਜਿਤ੍ਵਾ ਸੁਗਤਸ੍ਸ ਸਾਸਨੇਤਿ ਤੇ ਚੋਰਾ ਸੋਭਨਗਮਨਤਾਦੀਹਿ ਸੁਗਤਸ੍ਸ ਭਗਵਤੋ ਸਾਸਨੇ ਪਬ੍ਬਜ੍ਜਂ ਉਪਗਨ੍ਤ੍ਵਾ. ਭਾਵਨਾਵਿਸੇਸਾਧਿਗਤਾਯ ਓਦਗ੍ਯਲਕ੍ਖਣਾਯ ਪੀਤਿਯਾ ਸਮਨ੍ਨਾਗਮੇਨ ਉਦਗ੍ਗਚਿਤ੍ਤਾ. ਸੁਮਨਾਤਿ ਸੋਮਨਸ੍ਸਪ੍ਪਤ੍ਤਾ. ਕਤਿਨ੍ਦ੍ਰਿਯਾਤਿ ਭਾਵਿਤਿਨ੍ਦ੍ਰਿਯਾ. ਫੁਸਿਂਸੂਤਿ ਅਗ੍ਗਮਗ੍ਗਾਧਿਗਮੇਨ ਅਸਙ੍ਖਤਂ ਨਿਬ੍ਬਾਨਂ ਅਧਿਗਚ੍ਛਿਂਸੁ. ਅਧਿਮੁਤ੍ਤੋ ਕਿਰ ਚੋਰੇ ਨਿਬ੍ਬਿਸੇਵਨੇ ਕਤ੍ਵਾ, ਤੇ ਤਤ੍ਥੇਵ ਠਪੇਤ੍ਵਾ, ਮਾਤੁ ਸਨ੍ਤਿਕਂ ਗਨ੍ਤ੍ਵਾ, ਮਾਤਰਂ ਆਪੁਚ੍ਛਿਤ੍ਵਾ, ਪਚ੍ਚਾਗਨ੍ਤ੍ਵਾ ਤੇਹਿ ਸਦ੍ਧਿਂ ਉਪਜ੍ਝਾਯਸ੍ਸ ਸਨ੍ਤਿਕਂ ਗਨ੍ਤ੍ਵਾ, ਪਬ੍ਬਾਜੇਤ੍ਵਾ ਉਪਸਮ੍ਪਦਂ ਅਕਾਸਿ. ਅਥ ਤੇਸਂ ਕਮ੍ਮਟ੍ਠਾਨਂ ਆਚਿਕ੍ਖਿ, ਤੇ ਨਚਿਰਸ੍ਸੇਵ ਅਰਹਤ੍ਤੇ ਪਤਿਟ੍ਠਹਿਂਸੁ. ਤੇਨ ਵੁਤ੍ਤਂ ‘‘ਪਬ੍ਬਜਿਤ੍ਵਾ…ਪੇ… ਅਸਙ੍ਖਤ’’ਨ੍ਤਿ.

ਅਧਿਮੁਤ੍ਤਤ੍ਥੇਰਗਾਥਾਵਣ੍ਣਨਾ ਨਿਟ੍ਠਿਤਾ.