੮. ਅਜ੍ਜੁਨਤ੍ਥੇਰਗਾਥਾਵਣ੍ਣਨਾ

ਅਸਕ੍ਖਿਂ ਵਤ ਅਤ੍ਤਾਨਨ੍ਤਿ ਆਯਸ੍ਮਤੋ ਅਜ੍ਜੁਨਤ੍ਥੇਰਸ੍ਸ ਗਾਥਾ. ਕਾ ਉਪ੍ਪਤ੍ਤਿ? ਅਯਮ੍ਪਿ ਪੁਰਿਮਬੁਦ੍ਧੇਸੁ ਕਤਾਧਿਕਾਰੋ ਤਤ੍ਥ ਤਤ੍ਥ ਭਵੇ ਵਿਵਟ੍ਟੂਪਨਿਸ੍ਸਯਂ ਕੁਸਲਂ ਉਪਚਿਨਨ੍ਤੋ ਵਿਪਸ੍ਸਿਸ੍ਸ ਭਗਵਤੋ ਕਾਲੇ ਸੀਹਯੋਨਿਯਂ ਨਿਬ੍ਬਤ੍ਤੋ ਏਕਦਿਵਸਂ ਅਰਞ੍ਞੇ ਅਞ੍ਞਤਰਸ੍ਮਿਂ ਰੁਕ੍ਖਮੂਲੇ ਨਿਸਿਨ੍ਨਂ ਸਤ੍ਥਾਰਂ ਦਿਸ੍ਵਾ ‘‘ਅਯਂ ਖੋ ਇਮਸ੍ਮਿਂ ਕਾਲੇ ਸਬ੍ਬਸੇਟ੍ਠੋ ਪੁਰਿਸਸੀਹੋ’’ਤਿ ਪਸਨ੍ਨਮਾਨਸੋ ਸੁਪੁਪ੍ਫਿਤਸਾਲਸਾਖਂ ਭਞ੍ਜਿਤ੍ਵਾ ਸਤ੍ਥਾਰਂ ਪੂਜੇਸਿ. ਸੋ ਤੇਨ ਪੁਞ੍ਞਕਮ੍ਮੇਨ ਦੇਵਮਨੁਸ੍ਸੇਸੁ ਸਂਸਰਨ੍ਤੋ ਇਮਸ੍ਮਿਂ ਬੁਦ੍ਧੁਪ੍ਪਾਦੇ ਸਾਵਤ੍ਥਿਯਂ ਸੇਟ੍ਠਿਕੁਲੇ ਨਿਬ੍ਬਤ੍ਤਿ. ਅਜ੍ਜੁਨੋਤਿਸ੍ਸ ਨਾਮਂ ਅਹੋਸਿ. ਸੋ ਵਿਞ੍ਞੁਤਂ ਪਤ੍ਤੋ ਨਿਗਣ੍ਠੇਹਿ ਕਤਪਰਿਚਯੋ ਹੁਤ੍ਵਾ ‘‘ਏਵਾਹਂ ਅਮਤਂ ਅਧਿਗਮਿਸ੍ਸਾਮੀ’’ਤਿ ਵਿਵਟ੍ਟਜ੍ਝਾਸਯਤਾਯ ਦਹਰਕਾਲੇਯੇਵ ਨਿਗਣ੍ਠੇਸੁ ਪਬ੍ਬਜਿਤ੍ਵਾ ਤਤ੍ਥ ਸਾਰਂ ਅਲਭਨ੍ਤੋ ਸਤ੍ਥੁ ਯਮਕਪਾਟਿਹਾਰਿਯਂ ਦਿਸ੍ਵਾ ਪਟਿਲਦ੍ਧਸਦ੍ਧੋ ਸਾਸਨੇ ਪਬ੍ਬਜਿਤ੍ਵਾ ਵਿਪਸ੍ਸਨਂ ਆਰਭਿਤ੍ਵਾ ਨਚਿਰਸ੍ਸੇਵ ਅਰਹਾ ਅਹੋਸਿ. ਤੇਨ ਵੁਤ੍ਤਂ ਅਪਦਾਨੇ (ਅਪ. ਥੇਰ ੧.੧੪.੬੦-੬੫) –

‘‘ਮਿਗਰਾਜਾ ਤਦਾ ਆਸਿਂ, ਅਭਿਜਾਤੋ ਸੁਕੇਸਰੀ;

ਗਿਰਿਦੁਗ੍ਗਂ ਗਵੇਸਨ੍ਤੋ, ਅਦ੍ਦਸਂ ਲੋਕਨਾਯਕਂ.

‘‘ਅਯਂ ਨੁ ਖੋ ਮਹਾਵੀਰੋ, ਨਿਬ੍ਬਾਪੇਤਿ ਮਹਾਜਨਂ;

ਯਂਨੂਨਾਹਂ ਉਪਾਸੇਯ੍ਯਂ, ਦੇਵਦੇਵਂ ਨਰਾਸਭਂ.

‘‘ਸਾਖਂ ਸਾਲਸ੍ਸ ਭਞ੍ਜਿਤ੍ਵਾ, ਸਕੋਸਂ ਪੁਪ੍ਫਮਾਹਰਿਂ;

ਉਪਗਨ੍ਤ੍ਵਾਨ ਸਮ੍ਬੁਦ੍ਧਂ, ਅਦਾਸਿਂ ਪੁਪ੍ਫਮੁਤ੍ਤਮਂ.

‘‘ਏਕਨਵੁਤਿਤੋ ਕਪ੍ਪੇ, ਯਂ ਪੁਪ੍ਫਮਭਿਰੋਪਯਿਂ;

ਦੁਗ੍ਗਤਿਂ ਨਾਭਿਜਾਨਾਮਿ, ਪੁਪ੍ਫਦਾਨਸ੍ਸਿਦਂ ਫਲਂ.

‘‘ਇਤੋ ਚ ਨਵਮੇ ਕਪ੍ਪੇ, ਵਿਰੋਚਨਸਨਾਮਕਾ;

ਤਯੋ ਆਸਿਂਸੁ ਰਾਜਾਨੋ, ਚਕ੍ਕਵਤ੍ਤੀ ਮਹਬ੍ਬਲਾ.

‘‘ਕਿਲੇਸਾ ਝਾਪਿਤਾ ਮਯ੍ਹਂ…ਪੇ… ਕਤਂ ਬੁਦ੍ਧਸ੍ਸ ਸਾਸਨ’’ਨ੍ਤਿ.

ਅਰਹਤ੍ਤਂ ਪਨ ਪਤ੍ਵਾ ਅਨੁਤ੍ਤਰਸੁਖਾਧਿਗਮਸਮ੍ਭੂਤੇਨ ਪੀਤਿਵੇਗੇਨ ਉਦਾਨਂ ਉਦਾਨੇਨ੍ਤੋ –

੮੮. ‘‘ਅਸਕ੍ਖਿਂ ਵਤ ਅਤ੍ਤਾਨਂ, ਉਦ੍ਧਾਤੁਂ ਉਦਕਾ ਥਲਂ;

ਵੁਯ੍ਹਮਾਨੋ ਮਹੋਘੇਵ, ਸਚ੍ਚਾਨਿ ਪਟਿਵਿਜ੍ਝਹ’’ਨ੍ਤਿ. – ਗਾਥਂ ਅਭਾਸਿ;

ਤਤ੍ਥ ਅਸਕ੍ਖਿਨ੍ਤਿ ਸਕ੍ਕੋਸਿਂ. ਵਤਾਤਿ ਵਿਮ੍ਹਯੇ ਨਿਪਾਤੋ. ਅਤਿਵਿਮ੍ਹਯਨੀਯਞ੍ਹੇਤਂ ਯਦਿਦਂ ਸਚ੍ਚਪਟਿਵੇਧੋ. ਤੇਨਾਹ –

‘‘ਤਂ ਕਿਂਮਞ੍ਞਥ, ਭਿਕ੍ਖਵੇ, ਕਤਮਂ ਨੁ ਖੋ ਦੁਕ੍ਕਰਤਰਂ ਵਾ ਦੁਰਭਿਸਮ੍ਭਵਤਰਂ ਵਾ, ਯਂ ਸਤ੍ਤਧਾ ਭਿਨ੍ਨਸ੍ਸ ਵਾਲਸ੍ਸ ਕੋਟਿਯਾ ਕੋਟਿਂ ਪਟਿਵਿਜ੍ਝੇਯ੍ਯਾ’’ਤਿਆਦਿ (ਸਂ. ਨਿ. ੫.੧੧੧੫)?

ਅਤ੍ਤਾਨਨ੍ਤਿ ਨਿਯਕਜ੍ਝਤ੍ਤਂ ਸਨ੍ਧਾਯ ਵਦਤਿ. ਯੋ ਹਿ ਪਰੋ ਨ ਹੋਤਿ ਸੋ ਅਤ੍ਤਾਤਿ. ਉਦ੍ਧਾਤੁਨ੍ਤਿ ਉਦ੍ਧਰਿਤੁਂ, ‘‘ਉਦ੍ਧਟ’’ਨ੍ਤਿਪਿ ਪਾਠੋ. ਉਦਕਾਤਿ ਸਂਸਾਰਮਹੋਘਸਙ੍ਖਾਤਾ ਉਦਕਾ. ਥਲਨ੍ਤਿ ਨਿਬ੍ਬਾਨਥਲਂ. ਵੁਯ੍ਹਮਾਨੋ ਮਹੋਘੇਵਾਤਿ ਮਹਣ੍ਣਵੇ ਵੁਯ੍ਹਮਾਨੋ ਵਿਯ. ਇਦਂ ਵੁਤ੍ਤਂ ਹੋਤਿ – ਯਥਾ ਨਾਮ ਗਮ੍ਭੀਰਵਿਤ੍ਥਤੇ ਅਪ੍ਪਤਿਟ੍ਠੇ ਮਹਤਿ ਉਦਕੋਘੇ ਵੇਗਸਾ ਵੁਯ੍ਹਮਾਨੋ ਪੁਰਿਸੋ ਕੇਨਚਿ ਅਤ੍ਥਕਾਮੇਨ ਉਪਨੀਤਂ ਫਿਯਾਰਿਤ੍ਤਸਮ੍ਪਨ੍ਨਂ ਦਲ਼੍ਹਨਾਵਂ ਲਭਿਤ੍ਵਾ ਸੁਖੇਨੇਵ ਤਤੋ ਅਤ੍ਤਾਨਂ ਉਦ੍ਧਰਿਤੁਂ ਸਕ੍ਕੁਣੇਯ੍ਯ ਪਾਰਂ ਪਾਪੁਣੇਯ੍ਯ, ਏਵਮੇਵਾਹਂ ਸਂਸਾਰਮਹੋਘੇ ਕਿਲੇਸਾਭਿਸਙ੍ਖਾਰਵੇਗੇਨ ਵੁਯ੍ਹਮਾਨੋ ਸਤ੍ਥਾਰਾ ਉਪਨੀਤਂ ਸਮਥਵਿਪਸ੍ਸਨੁਪੇਤਂ ਅਰਿਯਮਗ੍ਗਨਾਵਂ ਲਭਿਤ੍ਵਾ ਤਤੋ ਅਤ੍ਤਾਨਂ ਉਦ੍ਧਰਿਤੁਂ ਨਿਬ੍ਬਾਨਥਲਂ ਪਤ੍ਤੁਂ ਅਹੋ ਅਸਕ੍ਖਿਨ੍ਤਿ. ਯਥਾ ਪਨ ਅਸਕ੍ਖਿ, ਤਂ ਦਸ੍ਸੇਤੁਂ ‘‘ਸਚ੍ਚਾਨਿ ਪਟਿਵਿਜ੍ਝਹ’’ਨ੍ਤਿ ਆਹ. ਯਸ੍ਮਾ ਅਹਂ ਦੁਕ੍ਖਾਦੀਨਿ ਚਤ੍ਤਾਰਿ ਅਰਿਯਸਚ੍ਚਾਨਿ ਪਰਿਞ੍ਞਾਪਹਾਨਸਚ੍ਛਿਕਿਰਿਯਾਭਾਵਨਾਪਟਿਵੇਧੇਨ ਪਟਿਵਿਜ੍ਝਿਂ ਅਰਿਯਮਗ੍ਗਞਾਣੇਨ ਅਞ੍ਞਾਸਿਂ, ਤਸ੍ਮਾ ਅਸਕ੍ਖਿਂ ਵਤ ਅਤ੍ਤਾਨਂ ਉਦ੍ਧਾਤੁਂ ਉਦਕਾ ਥਲਨ੍ਤਿ ਯੋਜਨਾ.

ਅਜ੍ਜੁਨਤ੍ਥੇਰਗਾਥਾਵਣ੍ਣਨਾ ਨਿਟ੍ਠਿਤਾ.