੭. ਪਵਿਟ੍ਠਤ੍ਥੇਰਗਾਥਾਵਣ੍ਣਨਾ

ਖਨ੍ਧਾ ਦਿਟ੍ਠਾ ਯਥਾਭੂਤਨ੍ਤਿ ਆਯਸ੍ਮਤੋ ਪਵਿਟ੍ਠਤ੍ਥੇਰਸ੍ਸ ਗਾਥਾ. ਕਾ ਉਪ੍ਪਤ੍ਤਿ? ਅਯਮ੍ਪਿ ਪੁਰਿਮਬੁਦ੍ਧੇਸੁ ਕਤਾਧਿਕਾਰੋ ਤਤ੍ਥ ਤਤ੍ਥ ਭਵੇ ਵਿਵਟ੍ਟੂਪਨਿਸ੍ਸਯਂ ਪੁਞ੍ਞਂ ਕਰੋਨ੍ਤੋ ਅਤ੍ਥਦਸ੍ਸਿਸ੍ਸ ਭਗਵਤੋ ਕਾਲੇ ਕੇਸਵੋ ਨਾਮ ਤਾਪਸੋ ਹੁਤ੍ਵਾ ਏਕਦਿਵਸਂ ਸਤ੍ਥਾਰਂ ਉਪਸਙ੍ਕਮਿਤ੍ਵਾ ਧਮ੍ਮਂ ਸੁਤ੍ਵਾ ਪਸਨ੍ਨਮਾਨਸੋ ਅਭਿਵਾਦੇਤ੍ਵਾ ਅਞ੍ਜਲਿਂ ਪਗ੍ਗਯ੍ਹ ਪਦਕ੍ਖਿਣਂ ਕਤ੍ਵਾ ਪਕ੍ਕਾਮਿ. ਸੋ ਤੇਨ ਪੁਞ੍ਞਕਮ੍ਮੇਨ ਦੇਵਲੋਕੇ ਨਿਬ੍ਬਤ੍ਤਿਤ੍ਵਾ ਅਪਰਾਪਰਂ ਪੁਞ੍ਞਾਨਿ ਕਤ੍ਵਾ ਦੇਵਮਨੁਸ੍ਸੇਸੁ ਸਂਸਰਨ੍ਤੋ ਇਮਸ੍ਮਿਂ ਬੁਦ੍ਧੁਪ੍ਪਾਦੇ ਮਗਧਰਟ੍ਠੇ ਬ੍ਰਾਹ੍ਮਣਕੁਲੇ ਉਪ੍ਪਜ੍ਜਿਤ੍ਵਾ ਅਨੁਕ੍ਕਮੇਨ ਵਿਞ੍ਞੁਤਂ ਪਤ੍ਤੋ ਨੇਕ੍ਖਮ੍ਮਨਿਨ੍ਨਜ੍ਝਾਸਯਤਾਯ ਪਰਿਬ੍ਬਾਜਕਪਬ੍ਬਜ੍ਜਂ ਪਬ੍ਬਜਿਤ੍ਵਾ ਤਤ੍ਥ ਸਿਕ੍ਖਿਤਬ੍ਬਂ ਸਿਕ੍ਖਿਤ੍ਵਾ ਵਿਚਰਨ੍ਤੋ ਉਪਤਿਸ੍ਸਕੋਲਿਤਾਨਂ ਬੁਦ੍ਧਸਾਸਨੇ ਪਬ੍ਬਜਿਤਭਾਵਂ ਸੁਤ੍ਵਾ ‘‘ਤੇਪਿ ਨਾਮ ਮਹਾਪਞ੍ਞਾ ਤਤ੍ਥ ਪਬ੍ਬਜਿਤਾ, ਤਦੇਵ ਮਞ੍ਞੇ ਸੇਯ੍ਯੋ’’ਤਿ ਸਤ੍ਥੁ ਸਨ੍ਤਿਕਂ ਗਨ੍ਤ੍ਵਾ ਧਮ੍ਮਂ ਸੁਤ੍ਵਾ ਪਟਿਲਦ੍ਧਸਦ੍ਧੋ ਪਬ੍ਬਜਿ. ਤਸ੍ਸ ਸਤ੍ਥਾ ਵਿਪਸ੍ਸਨਂ ਆਚਿਕ੍ਖਿ. ਸੋ ਵਿਪਸ੍ਸਨਂ ਆਰਭਿਤ੍ਵਾ ਨਚਿਰਸ੍ਸੇਵ ਅਰਹਤ੍ਤਂ ਸਚ੍ਛਾਕਾਸਿ. ਤੇਨ ਵੁਤ੍ਤਂ ਅਪਦਾਨੇ (ਅਪ. ਥੇਰ ੧.੧੪.੫੫-੫੯) –

‘‘ਨਾਰਦੋ ਇਤਿ ਮੇ ਨਾਮਂ, ਕੇਸਵੋ ਇਤਿ ਮਂ ਵਿਦੂ;

ਕੁਸਲਾਕੁਸਲਂ ਏਸਂ, ਅਗਮਂ ਬੁਦ੍ਧਸਨ੍ਤਿਕਂ.

‘‘ਮੇਤ੍ਤਚਿਤ੍ਤੋ ਕਾਰੁਣਿਕੋ, ਅਤ੍ਥਦਸ੍ਸੀ ਮਹਾਮੁਨਿ;

ਅਸ੍ਸਾਸਯਨ੍ਤੋ ਸਤ੍ਤੇ ਸੋ, ਧਮ੍ਮਂ ਦੇਸੇਤਿ ਚਕ੍ਖੁਮਾ.

‘‘ਸਕਂ ਚਿਤ੍ਤਂ ਪਸਾਦੇਤ੍ਵਾ, ਸਿਰੇ ਕਤ੍ਵਾਨ ਅਞ੍ਜਲਿਂ;

ਸਤ੍ਥਾਰਂ ਅਭਿਵਾਦੇਤ੍ਵਾ, ਪਕ੍ਕਾਮਿਂ ਪਾਚਿਨਾਮੁਖੋ.

‘‘ਸਤ੍ਤਰਸੇ ਕਪ੍ਪਸਤੇ, ਰਾਜਾ ਆਸਿ ਮਹੀਪਤਿ;

ਅਮਿਤ੍ਤਤਾਪਨੋ ਨਾਮ, ਚਕ੍ਕਵਤ੍ਤੀ ਮਹਬ੍ਬਲੋ.

‘‘ਕਿਲੇਸਾ ਝਾਪਿਤਾ ਮਯ੍ਹਂ…ਪੇ… ਕਤਂ ਬੁਦ੍ਧਸ੍ਸ ਸਾਸਨ’’ਨ੍ਤਿ.

ਅਰਹਤ੍ਤਂ ਪਨ ਪਤ੍ਵਾ ਅਞ੍ਞਂ ਬ੍ਯਾਕਰੋਨ੍ਤੋ –

੮੭. ‘‘ਖਨ੍ਧਾ ਦਿਟ੍ਠਾ ਯਥਾਭੂਤਂ, ਭਵਾ ਸਬ੍ਬੇ ਪਦਾਲਿਤਾ;

ਵਿਕ੍ਖੀਣੋ ਜਾਤਿਸਂਸਾਰੋ, ਨਤ੍ਥਿ ਦਾਨਿ ਪੁਨਬ੍ਭਵੋ’’ਤਿ. – ਗਾਥਂ ਅਭਾਸਿ;

ਤਤ੍ਥ ਖਨ੍ਧਾਤਿ ਪਞ੍ਚੁਪਾਦਾਨਕ੍ਖਨ੍ਧਾ, ਤੇ ਹਿ ਵਿਪਸ੍ਸਨੁਪਲਕ੍ਖਣਤੋ ਸਾਮਞ੍ਞਲਕ੍ਖਣਤੋ ਚ ਞਾਤਪਰਿਞ੍ਞਾਦੀਹਿ ਪਰਿਜਾਨਨਵਸੇਨ ਵਿਪਸ੍ਸਿਤਬ੍ਬਾ. ਦਿਟ੍ਠਾ ਯਥਾਭੂਤਨ੍ਤਿ ਵਿਪਸ੍ਸਨਾਪਞ੍ਞਾਸਹਿਤਾਯ ਮਗ੍ਗਪਞ੍ਞਾਯ ‘‘ਇਦਂ ਦੁਕ੍ਖ’’ਨ੍ਤਿਆਦਿਨਾ ਅਵਿਪਰੀਤਤੋ ਦਿਟ੍ਠਾ. ਭਵਾ ਸਬ੍ਬੇ ਪਦਾਲਿਤਾਤਿ ਕਾਮਭਵਾਦਯੋ ਸਬ੍ਬੇ ਕਮ੍ਮਭਵਾ ਉਪਪਤ੍ਤਿਭਵਾ ਚ ਮਗ੍ਗਞਾਣਸਤ੍ਥੇਨ ਭਿਨ੍ਨਾ ਵਿਦ੍ਧਂਸਿਤਾ. ਕਿਲੇਸਪਦਾਲਨੇਨੇਵ ਹਿ ਕਮ੍ਮੋਪਪਤ੍ਤਿਭਵਾ ਪਦਾਲਿਤਾ ਨਾਮ ਹੋਨ੍ਤਿ. ਤੇਨਾਹ ‘‘ਵਿਕ੍ਖੀਣੋ ਜਾਤਿਸਂਸਾਰੋ, ਨਤ੍ਥਿ ਦਾਨਿ ਪੁਨਬ੍ਭਵੋ’’ਤਿ. ਤਸ੍ਸਤ੍ਥੋ ਹੇਟ੍ਠਾ ਵੁਤ੍ਤੋਯੇਵ.

ਪਵਿਟ੍ਠਤ੍ਥੇਰਗਾਥਾਵਣ੍ਣਨਾ ਨਿਟ੍ਠਿਤਾ.