੯. ਰਕ੍ਖਿਤਤ੍ਥੇਰਗਾਥਾਵਣ੍ਣਨਾ

ਸਬ੍ਬੋ ਰਾਗੋ ਪਹੀਨੋ ਮੇਤਿ ਆਯਸ੍ਮਤੋ ਰਕ੍ਖਿਤਤ੍ਥੇਰਸ੍ਸ ਗਾਥਾ. ਕਾ ਉਪ੍ਪਤ੍ਤਿ? ਅਯਂ ਕਿਰ ਪਦੁਮੁਤ੍ਤਰਸ੍ਸ ਭਗਵਤੋ ਕਾਲੇ ਕੁਲਗੇਹੇ ਨਿਬ੍ਬਤ੍ਤਿਤ੍ਵਾ ਵਿਞ੍ਞੁਤਂ ਪਤ੍ਤੋ ਏਕਦਿਵਸਂ ਸਤ੍ਥੁ ਧਮ੍ਮਦੇਸਨਂ ਸੁਤ੍ਵਾ ਪਸਨ੍ਨਮਾਨਸੋ ਦੇਸਨਾਞਾਣਂ ਆਰਬ੍ਭ ਥੋਮਨਂ ਅਕਾਸਿ. ਸਤ੍ਥਾ ਤਸ੍ਸ ਚਿਤ੍ਤਪ੍ਪਸਾਦਂ ਓਲੋਕੇਤ੍ਵਾ ‘‘ਅਯਂ ਇਤੋ ਸਤਸਹਸ੍ਸਕਪ੍ਪਮਤ੍ਥਕੇ ਗੋਤਮਸ੍ਸ ਨਾਮ ਸਮ੍ਮਾਸਮ੍ਬੁਦ੍ਧਸ੍ਸ ਰਕ੍ਖਿਤੋ ਨਾਮ ਸਾਵਕੋ ਭਵਿਸ੍ਸਤੀ’’ਤਿ ਬ੍ਯਾਕਾਸਿ. ਸੋ ਤਂ ਸੁਤ੍ਵਾ ਭਿਯ੍ਯੋਸੋਮਤ੍ਤਾਯ ਪਸਨ੍ਨਮਾਨਸੋ ਅਪਰਾਪਰਂ ਪੁਞ੍ਞਾਨਿ ਕਤ੍ਵਾ ਦੇਵਮਨੁਸ੍ਸੇਸੁ ਸਂਸਰਨ੍ਤੋ ਇਮਸ੍ਮਿਂ ਬੁਦ੍ਧੁਪ੍ਪਾਦੇ ਦੇਵਦਹਨਿਗਮੇ ਸਾਕਿਯਰਾਜਕੁਲੇ ਨਿਬ੍ਬਤ੍ਤਿ, ਰਕ੍ਖਿਤੋਤਿਸ੍ਸ ਨਾਮਂ ਅਹੋਸਿ. ਸੋ ਯੇ ਸਾਕਿਯਕੋਲਿਯਰਾਜੂਹਿ ਭਗਵਤੋ ਪਰਿਵਾਰਤ੍ਥਾਯ ਦਿਨ੍ਨਾ ਪਞ੍ਚਸਤਰਾਜਕੁਮਾਰਾ ਪਬ੍ਬਜਿਤਾ, ਤੇਸਂ ਅਞ੍ਞਤਰੋ. ਤੇ ਪਨ ਰਾਜਕੁਮਾਰਾ ਨ ਸਂਵੇਗੇਨ ਪਬ੍ਬਜਿਤਤ੍ਤਾ ਉਕ੍ਕਣ੍ਠਾਭਿਭੂਤਾ ਯਦਾ ਸਤ੍ਥਾਰਾ ਕੁਣਾਲਦਹਤੀਰਂ ਨੇਤ੍ਵਾ ਕੁਣਾਲਜਾਤਕਦੇਸਨਾਯ (ਜਾ. ੨.੨੧.ਕੁਣਾਲਜਾਤਕ) ਇਤ੍ਥੀਨਂ ਦੋਸਵਿਭਾਵਨੇਨ ਕਾਮੇਸੁ ਆਦੀਨਵਂ ਪਕਾਸੇਤ੍ਵਾ ਕਮ੍ਮਟ੍ਠਾਨੇ ਨਿਯੋਜਿਤਾ, ਤਦਾ ਅਯਮ੍ਪਿ ਕਮ੍ਮਟ੍ਠਾਨਂ ਅਨੁਯੁਞ੍ਜਨ੍ਤੋ ਵਿਪਸ੍ਸਨਂ ਵਡ੍ਢੇਤ੍ਵਾ ਅਰਹਤ੍ਤਂ ਪਾਪੁਣਿ. ਤੇਨ ਵੁਤ੍ਤਂ ਅਪਦਾਨੇ (ਅਪ. ਥੇਰ ੧.੧੪.੧-੯) –

‘‘ਪਦੁਮੁਤ੍ਤਰੋ ਨਾਮ ਜਿਨੋ, ਲੋਕਜੇਟ੍ਠੋ ਨਰਾਸਭੋ;

ਮਹਤੋ ਜਨਕਾਯਸ੍ਸ, ਦੇਸੇਤਿ ਅਮਤਂ ਪਦਂ.

‘‘ਤਸ੍ਸਾਹਂ ਵਚਨਂ ਸੁਤ੍ਵਾ, ਵਾਚਾਸਭਿਮੁਦੀਰਿਤਂ;

ਅਞ੍ਜਲਿਂ ਪਗ੍ਗਹੇਤ੍ਵਾਨ, ਏਕਗ੍ਗੋ ਆਸਹਂ ਤਦਾ.

‘‘ਯਥਾ ਸਮੁਦ੍ਦੋ ਉਦਧੀਨਮਗ੍ਗੋ, ਨੇਰੂ ਨਗਾਨਂ ਪਵਰੋ ਸਿਲੁਚ੍ਚਯੋ;

ਤਥੇਵ ਯੇ ਚਿਤ੍ਤਵਸੇਨ ਵਤ੍ਤਰੇ, ਨ ਬੁਦ੍ਧਞਾਣਸ੍ਸ ਕਲਂ ਉਪੇਨ੍ਤਿ ਤੇ.

‘‘ਧਮ੍ਮਵਿਧਿਂ ਠਪੇਤ੍ਵਾਨ, ਬੁਦ੍ਧੋ ਕਾਰੁਣਿਕੋ ਇਸਿ;

ਭਿਕ੍ਖੁਸਙ੍ਘੇ ਨਿਸੀਦਿਤ੍ਵਾ, ਇਮਾ ਗਾਥਾ ਅਭਾਸਥ.

‘‘ਯੋ ਸੋ ਞਾਣਂ ਪਕਿਤ੍ਤੇਸਿ, ਬੁਦ੍ਧਮ੍ਹਿ ਲੋਕਨਾਯਕੇ;

ਕਪ੍ਪਾਨਂ ਸਤਸਹਸ੍ਸਂ, ਦੁਗ੍ਗਤਿਂ ਨ ਗਮਿਸ੍ਸਤਿ.

‘‘ਕਿਲੇਸੇ ਝਾਪਯਿਤ੍ਵਾਨ, ਏਕਗ੍ਗੋ ਸੁਸਮਾਹਿਤੋ;

ਸੋਭਿਤੋ ਨਾਮ ਨਾਮੇਨ, ਹੇਸ੍ਸਤਿ ਸਤ੍ਥੁ ਸਾਵਕੋ.

‘‘ਪਞ੍ਞਾਸੇ ਕਪ੍ਪਸਹਸ੍ਸੇ, ਸਤ੍ਤੇਵਾਸੁਂ ਯਸੁਗ੍ਗਤਾ;

ਸਤ੍ਤਰਤਨਸਮ੍ਪਨ੍ਨਾ, ਚਕ੍ਕਵਤ੍ਤੀ ਮਹਬ੍ਬਲਾ.

‘‘ਕਿਲੇਸਾ ਝਾਪਿਤਾ ਮਯ੍ਹਂ…ਪੇ… ਕਤਂ ਬੁਦ੍ਧਸ੍ਸ ਸਾਸਨ’’ਨ੍ਤਿ.

ਅਰਹਤ੍ਤਂ ਪਨ ਪਤ੍ਵਾ ਅਤ੍ਤਨੋ ਪਹੀਨਕਿਲੇਸੇ ਪਚ੍ਚਵੇਕ੍ਖਨ੍ਤੋ ‘‘ਸਬ੍ਬੋ ਰਾਗੋ’’ਤਿ ਗਾਥਂ ਅਭਾਸਿ.

੭੯. ਤਤ੍ਥ ‘‘ਸਬ੍ਬੋ ਰਾਗੋ’’ਤਿ ਕਾਮਰਾਗਾਦਿਪ੍ਪਭੇਦੋ ਸਬ੍ਬੋਪਿ ਰਾਗੋ. ਪਹੀਨੋਤਿ ਅਰਿਯਮਗ੍ਗਭਾਵਨਾਯ ਸਮੁਚ੍ਛੇਦਪ੍ਪਹਾਨਵਸੇਨ ਪਹੀਨੋ. ਸਬ੍ਬੋ ਦੋਸੋਤਿ ਆਘਾਤਵਤ੍ਥੁਕਾਦਿਭਾਵੇਨ ਅਨੇਕਭੇਦਭਿਨ੍ਨੋ ਸਬ੍ਬੋਪਿ ਬ੍ਯਾਪਾਦੋ. ਸਮੂਹਤੋਤਿ ਮਗ੍ਗੇਨ ਸਮੁਗ੍ਘਾਟਿਤੋ. ਸਬ੍ਬੋ ਮੇ ਵਿਗਤੋ ਮੋਹੋਤਿ ‘‘ਦੁਕ੍ਖੇ ਅਞ੍ਞਾਣ’’ਨ੍ਤਿਆਦਿਨਾ (ਧ. ਸ. ੧੦੬੭; ਵਿਭ. ੯੦੯) ਵਤ੍ਥੁਭੇਦੇਨ ਅਟ੍ਠਭੇਦੋ, ਸਂਕਿਲੇਸਵਤ੍ਥੁਵਿਭਾਗੇਨ ਅਨੇਕਵਿਭਾਗੋ ਸਬ੍ਬੋਪਿ ਮੋਹੋ ਮਗ੍ਗੇਨ ਵਿਦ੍ਧਂਸਿਤਤ੍ਤਾ ਮਯ੍ਹਂ ਵਿਗਤੋ. ਸੀਤਿਭੂਤੋਸ੍ਮਿ ਨਿਬ੍ਬੁਤੋਤਿ ਏਵਂ ਮੂਲਕਿਲੇਸਪ੍ਪਹਾਨੇਨ ਤਦੇਕਟ੍ਠਤਾਯ ਸਂਕਿਲੇਸਾਨਂ ਸਮ੍ਮਦੇਵ ਪਟਿਪ੍ਪਸ੍ਸਦ੍ਧਤ੍ਤਾ ਅਨਵਸੇਸਕਿਲੇਸਦਰਥਪਰਿਲ਼ਾਹਾਭਾਵਤੋ ਸੀਤਿਭਾਵਂ ਪਤ੍ਤੋ, ਤਤੋ ਏਵ ਸਬ੍ਬਸੋ ਕਿਲੇਸਪਰਿਨਿਬ੍ਬਾਨੇਨ ਪਰਿਨਿਬ੍ਬੁਤੋ ਅਹਂ ਅਸ੍ਮਿ ਭਵਾਮੀਤਿ ਅਞ੍ਞਂ ਬ੍ਯਾਕਾਸਿ.

ਰਕ੍ਖਿਤਤ੍ਥੇਰਗਾਥਾਵਣ੍ਣਨਾ ਨਿਟ੍ਠਿਤਾ.