੧੦. ਉਗ੍ਗਤ੍ਥੇਰਗਾਥਾਵਣ੍ਣਨਾ

ਯਂ ਮਯਾ ਪਕਤਂ ਕਮ੍ਮਨ੍ਤਿ ਆਯਸ੍ਮਤੋ ਉਗ੍ਗਤ੍ਥੇਰਸ੍ਸ ਗਾਥਾ. ਕਾ ਉਪ੍ਪਤ੍ਤਿ? ਅਯਮ੍ਪਿ ਪੁਰਿਮਬੁਦ੍ਧੇਸੁ ਕਤਾਧਿਕਾਰੋ ਤਤ੍ਥ ਤਤ੍ਥ ਭਵੇ ਪੁਞ੍ਞਾਨਿ ਕਰੋਨ੍ਤੋ ਇਤੋ ਏਕਤਿਂਸੇ ਕਪ੍ਪੇ ਸਿਖਿਸ੍ਸ ਭਗਵਤੋ ਕਾਲੇ ਕੁਲਗੇਹੇ ਨਿਬ੍ਬਤ੍ਤਿਤ੍ਵਾ ਵਿਞ੍ਞੁਤਂ ਪਤ੍ਤੋ ਏਕਦਿਵਸਂ ਸਿਖਿਂ ਭਗਵਨ੍ਤਂ ਪਸ੍ਸਿਤ੍ਵਾ ਪਸਨ੍ਨਮਾਨਸੋ ਕੇਤਕਪੁਪ੍ਫੇਹਿ ਪੂਜਂ ਅਕਾਸਿ. ਸੋ ਤੇਨ ਪੁਞ੍ਞਕਮ੍ਮੇਨ ਦੇਵਲੋਕੇ ਨਿਬ੍ਬਤ੍ਤਿਤ੍ਵਾ ਅਪਰਾਪਰਂ ਸੁਗਤੀਸੁਯੇਵ ਸਂਸਰਨ੍ਤੋ ਇਮਸ੍ਮਿਂ ਬੁਦ੍ਧੁਪ੍ਪਾਦੇ ਕੋਸਲਰਟ੍ਠੇ ਉਗ੍ਗਨਿਗਮੇ ਸੇਟ੍ਠਿਪੁਤ੍ਤੋ ਹੁਤ੍ਵਾ ਨਿਬ੍ਬਤ੍ਤਿ, ਉਗ੍ਗੋਤ੍ਵੇਵਸ੍ਸ ਨਾਮਂ ਅਹੋਸਿ. ਸੋ ਵਿਞ੍ਞੁਤਂ ਪਤ੍ਤੋ ਭਗਵਤਿ ਤਸ੍ਮਿਂ ਨਿਗਮੇ ਭਦ੍ਦਾਰਾਮੇ ਵਿਹਰਨ੍ਤੇ ਵਿਹਾਰਂ ਗਨ੍ਤ੍ਵਾ ਸਤ੍ਥੁ ਸਨ੍ਤਿਕੇ ਧਮ੍ਮਂ ਸੁਤ੍ਵਾ ਪਟਿਲਦ੍ਧਸਦ੍ਧੋ ਪਬ੍ਬਜਿਤ੍ਵਾ ਵਿਪਸ੍ਸਨਾਯ ਕਮ੍ਮਂ ਕਰੋਨ੍ਤੋ ਨਚਿਰਸ੍ਸੇਵ ਅਰਹਤ੍ਤਂ ਪਾਪੁਣਿ. ਤੇਨ ਵੁਤ੍ਤਂ ਅਪਦਾਨੇ (ਅਪ. ਥੇਰ ੧.੧੪.੧੦-੧੬) –

‘‘ਵਿਨਤਾਨਦਿਯਾ ਤੀਰੇ, ਪਿਲਕ੍ਖੁ ਫਲਿਤੋ ਅਹੁ;

ਤਾਹਂ ਰੁਕ੍ਖਂ ਗਵੇਸਨ੍ਤੋ, ਅਦ੍ਦਸਂ ਲੋਕਨਾਯਕਂ.

‘‘ਕੇਤਕਂ ਪੁਪ੍ਫਿਤਂ ਦਿਸ੍ਵਾ, ਵਣ੍ਟੇ ਛੇਤ੍ਵਾਨਹਂ ਤਦਾ;

ਬੁਦ੍ਧਸ੍ਸ ਅਭਿਰੋਪੇਸਿਂ, ਸਿਖਿਨੋ ਲੋਕਬਨ੍ਧੁਨੋ.

‘‘ਯੇਨ ਞਾਣੇਨ ਪਤ੍ਤੋਸਿ, ਅਚ੍ਚੁਤਂ ਅਮਤਂ ਪਦਂ;

ਤਂ ਞਾਣਂ ਅਭਿਪੂਜੇਮਿ, ਬੁਦ੍ਧਸੇਟ੍ਠ ਮਹਾਮੁਨਿ.

‘‘ਞਾਣਮ੍ਹਿ ਪੂਜਂ ਕਤ੍ਵਾਨ, ਪਿਲਕ੍ਖੁਮਦ੍ਦਸਂ ਅਹਂ;

ਪਟਿਲਦ੍ਧੋਮ੍ਹਿ ਤਂ ਪਞ੍ਞਂ, ਞਾਣਪੂਜਾਯਿਦਂ ਫਲਂ.

‘‘ਏਕਤਿਂਸੇ ਇਤੋ ਕਪ੍ਪੇ, ਯਂ ਪੁਪ੍ਫਮਭਿਰੋਪਯਿਂ;

ਦੁਗ੍ਗਤਿਂ ਨਾਭਿਜਾਨਾਮਿ, ਞਾਣਪੂਜਾਯਿਦਂ ਫਲਂ.

‘‘ਇਤੋ ਤੇਰਸਕਪ੍ਪਮ੍ਹਿ, ਦ੍ਵਾਦਸਾਸੁਂ ਫਲੁਗ੍ਗਤਾ;

ਸਤ੍ਤਰਤਨਸਮ੍ਪਨ੍ਨਾ, ਚਕ੍ਕਵਤ੍ਤੀ ਮਹਬ੍ਬਲਾ.

‘‘ਕਿਲੇਸਾ ਝਾਪਿਤਾ ਮਯ੍ਹਂ…ਪੇ… ਕਤਂ ਬੁਦ੍ਧਸ੍ਸ ਸਾਸਨ’’ਨ੍ਤਿ.

ਅਰਹਤ੍ਤਂ ਪਨ ਪਤ੍ਵਾ ਅਤ੍ਤਨੋ ਵਟ੍ਟੂਪਚ੍ਛੇਦਦੀਪਨੇਨ ਅਞ੍ਞਂ ਬ੍ਯਾਕਰੋਨ੍ਤੋ –

੮੦. ‘‘ਯਂ ਮਯਾ ਪਕਤਂ ਕਮ੍ਮਂ, ਅਪ੍ਪਂ ਵਾ ਯਦਿ ਵਾ ਬਹੁਂ;

ਸਬ੍ਬਮੇਤਂ ਪਰਿਕ੍ਖੀਣਂ, ਨਤ੍ਥਿ ਦਾਨਿ ਪੁਨਬ੍ਭਵੋ’’ਤਿ. – ਗਾਥਂ ਅਭਾਸਿ;

ਤਤ੍ਥ ਯਂ ਮਯਾ ਪਕਤਂ ਕਮ੍ਮਨ੍ਤਿ ਯਂ ਕਮ੍ਮਂ ਤੀਹਿ ਕਮ੍ਮਦ੍ਵਾਰੇਹਿ, ਛਹਿ ਉਪ੍ਪਤ੍ਤਿਦ੍ਵਾਰੇਹਿ, ਅਟ੍ਠਹਿ ਅਸਂਵਰਦ੍ਵਾਰੇਹਿ, ਅਟ੍ਠਹਿ ਚ ਸਂਵਰਦ੍ਵਾਰੇਹਿ ਪਾਪਾਦਿਵਸੇਨ ਦਾਨਾਦਿਵਸੇਨ ਚਾਤਿ ਅਨੇਕੇਹਿ ਪਕਾਰੇਹਿ ਅਨਾਦਿਮਤਿ ਸਂਸਾਰੇ ਯਂ ਮਯਾ ਕਤਂ ਉਪਚਿਤਂ ਅਭਿਨਿਬ੍ਬਤ੍ਤਿਤਂ ਵਿਪਾਕਕਮ੍ਮਂ. ਅਪ੍ਪਂ ਵਾ ਯਦਿ ਵਾ ਬਹੁਨ੍ਤਿ ਤਞ੍ਚ ਵਤ੍ਥੁਚੇਤਨਾਪਯੋਗਕਿਲੇਸਾਦੀਨਂ ਦੁਬ੍ਬਲਭਾਵੇਨ ਅਪ੍ਪਂ ਵਾ, ਤੇਸਂ ਬਲਵਭਾਵੇਨ ਅਭਿਣ੍ਹਪਵਤ੍ਤਿਯਾ ਚ ਬਹੁਂ ਵਾ. ਸਬ੍ਬਮੇਤਂ ਪਰਿਕ੍ਖੀਣਨ੍ਤਿ ਸਬ੍ਬਮੇਵ ਚੇਤਂ ਕਮ੍ਮਂ ਕਮ੍ਮਕ੍ਖਯਕਰਸ੍ਸ ਅਗ੍ਗਮਗ੍ਗਸ੍ਸ ਅਧਿਗਤਤ੍ਤਾ ਪਰਿਕ੍ਖਯਂ ਗਤਂ, ਕਿਲੇਸਵਟ੍ਟਪ੍ਪਹਾਨੇਨ ਹਿ ਕਮ੍ਮਵਟ੍ਟਂ ਪਹੀਨਮੇਵ ਹੋਤਿ ਵਿਪਾਕਵਟ੍ਟਸ੍ਸ ਅਨੁਪ੍ਪਾਦਨਤੋ. ਤੇਨਾਹ ‘‘ਨਤ੍ਥਿ ਦਾਨਿ ਪੁਨਬ੍ਭਵੋ’’ਤਿ. ਆਯਤਿਂ ਪੁਨਬ੍ਭਵਾਭਿਨਿਬ੍ਬਤ੍ਤਿ ਮਯ੍ਹਂ ਨਤ੍ਥੀਤਿ ਅਤ੍ਥੋ. ‘‘ਸਬ੍ਬਮ੍ਪੇਤ’’ਨ੍ਤਿਪਿ ਪਾਠੋ, ਸਬ੍ਬਮ੍ਪਿ ਏਤਨ੍ਤਿ ਪਦਵਿਭਾਗੋ.

ਉਗ੍ਗਤ੍ਥੇਰਗਾਥਾਵਣ੍ਣਨਾ ਨਿਟ੍ਠਿਤਾ.

ਅਟ੍ਠਮਵਗ੍ਗਵਣ੍ਣਨਾ ਨਿਟ੍ਠਿਤਾ.