੮. ਮੇਣ੍ਡਸਿਰਤ੍ਥੇਰਗਾਥਾਵਣ੍ਣਨਾ

ਅਨੇਕਜਾਤਿਸਂਸਾਰਨ੍ਤਿ ਆਯਸ੍ਮਤੋ ਮੇਣ੍ਡਸਿਰਤ੍ਥੇਰਸ੍ਸ ਗਾਥਾ. ਕਾ ਉਪ੍ਪਤ੍ਤਿ? ਸੋਪਿ ਕਿਰ ਪੁਰਿਮਬੁਦ੍ਧੇਸੁ ਕਤਾਧਿਕਾਰੋ ਤਤ੍ਥ ਤਤ੍ਥ ਭਵੇ ਵਿਵਟ੍ਟੂਪਨਿਸ੍ਸਯਾਨਿ ਪੁਞ੍ਞਾਨਿ ਕਰੋਨ੍ਤੋ ਇਤੋ ਏਕਨਵੁਤੇ ਕਪ੍ਪੇ ਬ੍ਰਾਹ੍ਮਣਕੁਲੇ ਨਿਬ੍ਬਤ੍ਤਿਤ੍ਵਾ ਵਯਪ੍ਪਤ੍ਤੋ ਕਾਮੇ ਪਹਾਯ ਇਸਿਪਬ੍ਬਜ੍ਜਂ ਪਬ੍ਬਜਿਤ੍ਵਾ ਮਹਤਾ ਇਸਿਗਣੇਨ ਸਦ੍ਧਿਂ ਹਿਮਵਨ੍ਤੇ ਵਸਨ੍ਤੋ ਸਤ੍ਥਾਰਂ ਦਿਸ੍ਵਾ ਪਸਨ੍ਨਮਾਨਸੋ ਇਸਿਗਣੇਨ ਪਦੁਮਾਨਿ ਆਹਰਾਪੇਤ੍ਵਾ ਸਤ੍ਥੁ ਪੁਪ੍ਫਪੂਜਂ ਕਤ੍ਵਾ ਸਾਵਕੇ ਅਪ੍ਪਮਾਦਪਟਿਪਤ੍ਤਿਯਂ ਓਵਦਿਤ੍ਵਾ ਕਾਲਂ ਕਤ੍ਵਾ ਦੇਵਲੋਕੇ ਨਿਬ੍ਬਤ੍ਤੋ ਅਪਰਾਪਰਂ ਸਂਸਰਨ੍ਤੋ ਇਮਸ੍ਮਿਂ ਬੁਦ੍ਧੁਪ੍ਪਾਦੇ ਸਾਕੇਤੇ ਗਹਪਤਿਕੁਲੇ ਨਿਬ੍ਬਤ੍ਤਿ, ਤਸ੍ਸ ਮੇਣ੍ਡਸਰਿਕ੍ਖਸੀਸਤਾਯ ਮੇਣ੍ਡਸਿਰੋਤ੍ਵੇਵ ਸਮਞ੍ਞਾ ਅਹੋਸਿ. ਸੋ ਭਗਵਤਿ ਸਾਕੇਤੇ ਅਞ੍ਜਨਵਨੇ ਵਿਹਰਨ੍ਤੇ ਸਤ੍ਥਾਰਂ ਉਪਸਙ੍ਕਮਿਤ੍ਵਾ ਪਟਿਲਦ੍ਧਸਦ੍ਧੋ ਪਬ੍ਬਜਿਤ੍ਵਾ ਸਮਥਵਿਪਸ੍ਸਨਾਸੁ ਕਮ੍ਮਂ ਕਰੋਨ੍ਤੋ ਛਲ਼ਭਿਞ੍ਞੋ ਅਹੋਸਿ. ਤੇਵ ਵੁਤ੍ਤਂ ਅਪਦਾਨੇ (ਅਪ. ਥੇਰ ੧.੧੩.੯੭-੧੦੫) –

‘‘ਹਿਮਵਨ੍ਤਸ੍ਸਾਵਿਦੂਰੇ, ਗੋਤਮੋ ਨਾਮ ਪਬ੍ਬਤੋ;

ਨਾਨਾਰੁਕ੍ਖੇਹਿ ਸਞ੍ਛਨ੍ਨੋ, ਮਹਾਭੂਤਗਣਾਲਯੋ.

‘‘ਵੇਮਜ੍ਝਮ੍ਹਿ ਚ ਤਸ੍ਸਾਸਿ, ਅਸ੍ਸਮੋ ਅਭਿਨਿਮ੍ਮਿਤੋ;

ਪੁਰਕ੍ਖਤੋ ਸਸਿਸ੍ਸੇਹਿ, ਵਸਾਮਿ ਅਸ੍ਸਮੇ ਅਹਂ.

‘‘ਆਯਨ੍ਤੁ ਮੇ ਸਿਸ੍ਸਗਣਾ, ਪਦੁਮਂ ਆਹਰਨ੍ਤੁ ਮੇ;

ਬੁਦ੍ਧਪੂਜਂ ਕਰਿਸ੍ਸਾਮਿ, ਦ੍ਵਿਪਦਿਨ੍ਦਸ੍ਸ ਤਾਦਿਨੋ.

‘‘ਏਵਨ੍ਤਿ ਤੇ ਪਟਿਸ੍ਸੁਤ੍ਵਾ, ਪਦੁਮਂ ਆਹਰਿਂਸੁ ਮੇ;

ਤਥਾ ਨਿਮਿਤ੍ਤਂ ਕਤ੍ਵਾਹਂ, ਬੁਦ੍ਧਸ੍ਸ ਅਭਿਰੋਪਯਿਂ.

‘‘ਸਿਸ੍ਸੇ ਤਦਾ ਸਮਾਨੇਤ੍ਵਾ, ਸਾਧੁਕਂ ਅਨੁਸਾਸਹਂ;

ਮਾ ਖੋ ਤੁਮ੍ਹੇ ਪਮਜ੍ਜਿਤ੍ਥ, ਅਪ੍ਪਮਾਦੋ ਸੁਖਾਵਹੋ.

‘‘ਏਵਂ ਸਮਨੁਸਾਸਿਤ੍ਵਾ, ਤੇ ਸਿਸ੍ਸੇ ਵਚਨਕ੍ਖਮੇ;

ਅਪ੍ਪਮਾਦਗੁਣੇ ਯੁਤ੍ਤੋ, ਤਦਾ ਕਾਲਙ੍ਕਤੋ ਅਹਂ.

‘‘ਏਕਨਵੁਤਿਤੋ ਕਪ੍ਪੇ, ਯਂ ਪੁਪ੍ਫਮਭਿਰੋਪਯਿਂ;

ਦੁਗ੍ਗਤਿਂ ਨਾਭਿਜਾਨਾਮਿ, ਬੁਦ੍ਧਪੂਜਾਯਿਦਂ ਫਲਂ.

‘‘ਏਕਪਞ੍ਞਾਸਕਪ੍ਪਮ੍ਹਿ, ਰਾਜਾ ਆਸਿਂ ਜਲੁਤ੍ਤਮੋ;

ਸਤ੍ਤਰਤਨਸਮ੍ਪਨ੍ਨੋ, ਚਕ੍ਕਵਤ੍ਤੀ ਮਹਬ੍ਬਲੋ.

‘‘ਕਿਲੇਸਾ ਝਾਪਿਤਾ ਮਯ੍ਹਂ…ਪੇ… ਕਤਂ ਬੁਦ੍ਧਸ੍ਸ ਸਾਸਨ’’ਨ੍ਤਿ.

ਸੋ ਅਤ੍ਤਨੋ ਪੁਬ੍ਬੇਨਿਵਾਸਂ ਅਨੁਸ੍ਸਰਨ੍ਤੋ –

੭੮. ‘‘ਅਨੇਕਜਾਤਿਸਂਸਾਰਂ, ਸਨ੍ਧਾਵਿਸ੍ਸਂ ਅਨਿਬ੍ਬਿਸਂ;

ਤਸ੍ਸ ਮੇ ਦੁਕ੍ਖਜਾਤਸ੍ਸ, ਦੁਕ੍ਖਕ੍ਖਨ੍ਧੋ ਅਪਰਦ੍ਧੋ’’ਤਿ. – ਗਾਥਂ ਅਭਾਸਿ;

ਤਤ੍ਥ ਅਨੇਕਜਾਤਿਸਂਸਾਰਨ੍ਤਿ ਅਨੇਕਜਾਤਿਸਤਸਹਸ੍ਸਸਙ੍ਖ੍ਯਂ ਇਦਂ ਸਂਸਾਰਵਟ੍ਟਂ, ਅਦ੍ਧੁਨੋ ਅਧਿਪ੍ਪੇਤਤ੍ਤਾ ਅਚ੍ਚਨ੍ਤਸਂਯੋਗੇਕਵਚਨਂ. ਸਨ੍ਧਾਵਿਸ੍ਸਨ੍ਤਿ ਸਂਸਰਿਂ, ਅਪਰਾਪਰਂ ਚਵਨੁਪ੍ਪਜ੍ਜਨਵਸੇਨ ਪਰਿਬ੍ਭਮਿਂ. ਅਨਿਬ੍ਬਿਸਨ੍ਤਿ ਤਸ੍ਸ ਨਿਵਤ੍ਤਕਞਾਣਂ ਅਵਿਨ੍ਦਨ੍ਤੋ ਅਲਭਨ੍ਤੋ. ਤਸ੍ਸ ਮੇਤਿ ਏਵਂ ਸਂਸਰਨ੍ਤਸ੍ਸ ਮੇ. ਦੁਕ੍ਖਜਾਤਸ੍ਸਾਤਿ ਜਾਤਿਆਦਿਵਸੇਨ ਉਪ੍ਪਨ੍ਨਦੁਕ੍ਖਸ੍ਸ, ਤਿਸ੍ਸਨ੍ਨਂ ਵਾ ਦੁਕ੍ਖਤਾਨਂ ਵਸੇਨ ਦੁਕ੍ਖਸਭਾਵਸ੍ਸ. ਦੁਕ੍ਖਕ੍ਖਨ੍ਧੋਤਿ ਕਮ੍ਮਕਿਲੇਸਵਿਪਾਕਵਟ੍ਟਪ੍ਪਕਾਰੋ ਦੁਕ੍ਖਰਾਸਿ. ਅਪਰਦ੍ਧੋਤਿ ਅਰਹਤ੍ਤਮਗ੍ਗਪ੍ਪਤ੍ਤਿਤੋ ਪਟ੍ਠਾਯ ਪਰਿਬ੍ਭਟ੍ਠੋ ਚੁਤੋ ਨ ਅਭਿਨਿਬ੍ਬਤ੍ਤਿਸ੍ਸਤਿ. ‘‘ਅਪਰਟ੍ਠੋ’’ਤਿ ਵਾ ਪਾਠੋ, ਅਪਗਤਸਮਿਦ੍ਧਿਤੋ ਸਮੁਚ੍ਛਿਨ੍ਨਕਾਰਣਤ੍ਤਾ ਅਪਗਤੋਤਿ ਅਤ੍ਥੋ. ਇਦਮੇਵ ਚ ਥੇਰਸ੍ਸ ਅਞ੍ਞਾਬ੍ਯਾਕਰਣਂ ਅਹੋਸਿ.

ਮੇਣ੍ਡਸਿਰਤ੍ਥੇਰਗਾਥਾਵਣ੍ਣਨਾ ਨਿਟ੍ਠਿਤਾ.