੬. ਪਿਯਞ੍ਜਹਤ੍ਥੇਰਗਾਥਾਵਣ੍ਣਨਾ

ਉਪ੍ਪਤਨ੍ਤੇਸੁ ਨਿਪਤੇਤਿ ਆਯਸ੍ਮਤੋ ਪਿਯਞ੍ਜਹਤ੍ਥੇਰਸ੍ਸ ਗਾਥਾ. ਕਾ ਉਪ੍ਪਤ੍ਤਿ? ਸੋਪਿ ਪੁਰਿਮਬੁਦ੍ਧੇਸੁ ਕਤਾਧਿਕਾਰੋ ਤਤ੍ਥ ਤਤ੍ਥ ਭਵੇ ਵਿਵਟ੍ਟੂਪਨਿਸ੍ਸਯਂ ਪੁਞ੍ਞਂ ਉਪਚਿਨਨ੍ਤੋ ਇਤੋ ਏਕਨਵੁਤੇ ਕਪ੍ਪੇ ਵਿਪਸ੍ਸਿਸ੍ਸ ਭਗਵਤੋ ਕਾਲੇ ਹਿਮਵਨ੍ਤੇ ਰੁਕ੍ਖਦੇਵਤਾ ਹੁਤ੍ਵਾ ਪਬ੍ਬਤਨ੍ਤਰੇ ਵਸਨ੍ਤੋ ਦੇਵਤਾਸਮਾਗਮੇਸੁ ਅਪ੍ਪਾਨੁਭਾਵਤਾਯ ਪਰਿਸਪਰਿਯਨ੍ਤੇ ਠਤ੍ਵਾ ਧਮ੍ਮਂ ਸੁਤ੍ਵਾ ਸਤ੍ਥਰਿ ਪਟਿਲਦ੍ਧਸਦ੍ਧੋ ਏਕਦਿਵਸਂ ਸੁਵਿਸੁਦ੍ਧਂ ਰਮਣੀਯਂ ਗਙ੍ਗਾਯਂ ਪੁਲਿਨਪ੍ਪਦੇਸਂ ਦਿਸ੍ਵਾ ਸਤ੍ਥੁ ਗੁਣੇ ਅਨੁਸ੍ਸਰਿ – ‘‘ਇਤੋਪਿ ਸੁਵਿਸੁਦ੍ਧਾ ਸਤ੍ਥੁ ਗੁਣਾ ਅਨਨ੍ਤਾ ਅਪਰਿਮੇਯ੍ਯਾ ਚਾ’’ਤਿ, ਏਵਂ ਸੋ ਸਤ੍ਥੁ ਗੁਣੇ ਆਰਬ੍ਭ ਚਿਤ੍ਤਂ ਪਸਾਦੇਤ੍ਵਾ ਤੇਨ ਪੁਞ੍ਞਕਮ੍ਮੇਨ ਦੇਵਮਨੁਸ੍ਸੇਸੁ ਸਂਸਰਨ੍ਤੋ ਇਮਸ੍ਮਿਂ ਬੁਦ੍ਧੁਪ੍ਪਾਦੇ ਵੇਸਾਲਿਯਂ ਲਿਚ੍ਛਵਿਰਾਜਕੁਲੇ ਨਿਬ੍ਬਤ੍ਤਿਤ੍ਵਾ ਵਯਪ੍ਪਤ੍ਤੋ ਯੁਦ੍ਧਸੋਣ੍ਡੋ ਅਪਰਾਜਿਤਸਙ੍ਗਾਮੋ ਅਮਿਤ੍ਤਾਨਂ ਪਿਯਹਾਨਿਕਰਣੇਨ ਪਿਯਞ੍ਜਹੋਤਿ ਪਞ੍ਞਾਯਿਤ੍ਥ. ਸੋ ਸਤ੍ਥੁ ਵੇਸਾਲਿਗਮਨੇ ਪਟਿਲਦ੍ਧਸਦ੍ਧੋ ਪਬ੍ਬਜਿਤ੍ਵਾ ਅਰਞ੍ਞੇ ਵਸਮਾਨੋ ਵਿਪਸ੍ਸਨਂ ਵਡ੍ਢੇਤ੍ਵਾ ਅਰਹਤ੍ਤਂ ਪਾਪੁਣਿ. ਤੇਨ ਵੁਤ੍ਤਂ ਅਪਦਾਨੇ (ਅਪ. ਥੇਰ ੧.੧੩.੮੪-੯੦) –

‘‘ਪਬ੍ਬਤੇ ਹਿਮਵਨ੍ਤਮ੍ਹਿ, ਵਸਾਮਿ ਪਬ੍ਬਤਨ੍ਤਰੇ;

ਪੁਲਿਨਂ ਸੋਭਨਂ ਦਿਸ੍ਵਾ, ਬੁਦ੍ਧਸੇਟ੍ਠਂ ਅਨੁਸ੍ਸਰਿਂ.

‘‘ਞਾਣੇ ਉਪਨਿਧਾ ਨਤ੍ਥਿ, ਸਙ੍ਖਾਰਂ ਨਤ੍ਥਿ ਸਤ੍ਥੁਨੋ;

ਸਬ੍ਬਧਮ੍ਮਂ ਅਭਿਞ੍ਞਾਯ, ਞਾਣੇਨ ਅਧਿਮੁਚ੍ਚਤਿ.

‘‘ਨਮੋ ਤੇ ਪੁਰਿਸਾਜਞ੍ਞ, ਨਮੋ ਤੇ ਪੁਰਿਸੁਤ੍ਤਮ;

ਞਾਣੇਨ ਤੇ ਸਮੋ ਨਤ੍ਥਿ, ਯਾਵਤਾ ਞਾਣਮੁਤ੍ਤਮਂ.

‘‘ਞਾਣੇ ਚਿਤ੍ਤਂ ਪਸਾਦੇਤ੍ਵਾ, ਕਪ੍ਪਂ ਸਗ੍ਗਮ੍ਹਿ ਮੋਦਹਂ;

ਅਵਸੇਸੇਸੁ ਕਪ੍ਪੇਸੁ, ਕੁਸਲਂ ਚਰਿਤਂ ਮਯਾ.

‘‘ਏਕਨਵੁਤਿਤੋ ਕਪ੍ਪੇ, ਯਂ ਸਞ੍ਞਮਲਭਿਂ ਤਦਾ;

ਦੁਗ੍ਗਤਿਂ ਨਾਭਿਜਾਨਾਮਿ, ਞਾਣਸਞ੍ਞਾਯਿਦਂ ਫਲਂ.

‘‘ਇਤੋ ਸਤ੍ਤਤਿਕਪ੍ਪਮ੍ਹਿ, ਏਕੋ ਪੁਲਿਨਪੁਪ੍ਫਿਯੋ;

ਸਤ੍ਤਰਤਨਸਮ੍ਪਨ੍ਨੋ, ਚਕ੍ਕਵਤ੍ਤੀ ਮਹਬ੍ਬਲੋ.

‘‘ਕਿਲੇਸਾ ਝਾਪਿਤਾ ਮਯ੍ਹਂ…ਪੇ… ਕਤਂ ਬੁਦ੍ਧਸ੍ਸ ਸਾਸਨ’’ਨ੍ਤਿ.

ਅਰਹਤ੍ਤਂ ਪਨ ਪਤ੍ਵਾ ‘‘ਅਨ੍ਧਪੁਥੁਜ੍ਜਨਾਨਂ ਪਟਿਪਤ੍ਤਿਤੋ ਵਿਧੁਰਾ ਅਰਿਯਾਨਂ ਪਟਿਪਤ੍ਤੀ’’ਤਿ ਇਮਸ੍ਸ ਅਤ੍ਥਸ੍ਸ ਦਸ੍ਸਨਵਸੇਨ ਅਞ੍ਞਂ ਬ੍ਯਾਕਰੋਨ੍ਤੋ –

੭੬. ‘‘ਉਪ੍ਪਤਨ੍ਤੇਸੁ ਨਿਪਤੇ, ਨਿਪਤਨ੍ਤੇਸੁ ਉਪ੍ਪਤੇ;

ਵਸੇ ਅਵਸਮਾਨੇਸੁ, ਰਮਮਾਨੇਸੁ ਨੋ ਰਮੇ’’ਤਿ. – ਗਾਥਂ ਅਭਾਸਿ;

ਤਤ੍ਥ ਉਪ੍ਪਤਨ੍ਤੇਸੂਤਿ ਉਣ੍ਣਮਨ੍ਤੇਸੁ, ਸਤ੍ਤੇਸੁ ਮਾਨੁਦ੍ਧਚ੍ਚਥਮ੍ਭਸਾਰਮ੍ਭਾਦੀਹਿ ਅਤ੍ਤੁਕ੍ਕਂਸਨੇਨ ਅਨੁਪਸਨ੍ਤੇਸੁ. ਨਿਪਤੇਤਿ ਨਮੇਯ੍ਯ, ਤੇਸਞ੍ਞੇਵ ਪਾਪਧਮ੍ਮਾਨਂ ਪਰਿਵਜ੍ਜਨੇਨ ਨਿਵਾਤਵੁਤ੍ਤਿ ਭਵੇਯ੍ਯ. ਨਿਪਤਨ੍ਤੇਸੂਤਿ ਓਣਮਨ੍ਤੇਸੁ, ਹੀਨਾਧਿਮੁਤ੍ਤਿਕਤਾਯ ਕੋਸਜ੍ਜੇਨ ਚ ਗੁਣਤੋ ਨਿਹੀਯਮਾਨੇਸੁ. ਉਪ੍ਪਤੇਤਿ ਉਣ੍ਣਮੇਯ੍ਯ, ਪਣੀਤਾਧਿਮੁਤ੍ਤਿਕਤਾਯ ਵੀਰਿਯਾਰਮ੍ਭੇਨ ਚ ਗੁਣਤੋ ਉਸ੍ਸੁਕ੍ਕੇਯ੍ਯ. ਅਥ ਵਾ ਉਪ੍ਪਤਨ੍ਤੇਸੂਤਿ ਉਟ੍ਠਹਨ੍ਤੇਸੁ, ਕਿਲੇਸੇਸੁ ਪਰਿਯੁਟ੍ਠਾਨਵਸੇਨ ਸੀਸਂ ਉਕ੍ਖਿਪਨ੍ਤੇਸੁ. ਨਿਪਤੇਤਿ ਪਟਿਸਙ੍ਖਾਨਬਲੇਨ ਯਥਾ ਤੇ ਨ ਉਪ੍ਪਜ੍ਜਨ੍ਤਿ, ਤਥਾ ਅਨੁਰੂਪਪਚ੍ਚਵੇਕ੍ਖਣਾਯ ਨਿਪਤੇਯ੍ਯ, ਵਿਕ੍ਖਮ੍ਭੇਯ੍ਯ ਚੇਵ ਸਮੁਚ੍ਛਿਨ੍ਦੇਯ੍ਯ ਚ. ਨਿਪਤਨ੍ਤੇਸੂਤਿ ਪਰਿਪਤਨ੍ਤੇਸੁ, ਅਯੋਨਿਸੋਮਨਸਿਕਾਰੇਸੁ ਵੀਰਿਯਪਯੋਗਮਨ੍ਦਤਾਯ ਵਾ ਯਥਾਰਦ੍ਧੇਸੁ ਸਮਥਵਿਪਸ੍ਸਨਾਧਮ੍ਮੇਸੁ ਹਾਯ ਮਾਨੇਸੁ. ਉਪ੍ਪਤੇਤਿ ਯੋਨਿਸੋਮਨਸਿਕਾਰੇਨ ਵੀਰਿਯਾਰਮ੍ਭਸਮ੍ਪਦਾਯ ਚ ਤੇ ਉਪਟ੍ਠਾਪੇਯ੍ਯ ਉਪ੍ਪਾਦੇਯ੍ਯ ਵਡ੍ਢੇਯ੍ਯ ਚ. ਵਸੇ ਅਵਸਮਾਨੇਸੂਤਿ ਸਤ੍ਤੇਸੁ ਮਗ੍ਗਬ੍ਰਹ੍ਮਚਰਿਯਵਾਸਂ ਅਰਿਯਵਾਸਞ੍ਚ ਅਵਸਨ੍ਤੇਸੁ ਸਯਂ ਤਂ ਵਾਸਂ ਵਸੇਯ੍ਯਾਤਿ, ਅਰਿਯੇਸੁ ਵਾ ਕਿਲੇਸਵਾਸਂ ਦੁਤਿਯਕਵਾਸਂ ਅਵਸਨ੍ਤੇਸੁ ਯੇਨ ਵਾਸੇਨ ਤੇ ਅਵਸਮਾਨਾ ਨਾਮ ਹੋਨ੍ਤਿ, ਸਯਂ ਤਥਾ ਵਸੇ. ਰਮਮਾਨੇਸੁ ਨੋ ਰਮੇਤਿ ਸਤ੍ਤੇਸੁ ਕਾਮਗੁਣਰਤਿਯਾ ਕਿਲੇਸਰਤਿਯਾ ਰਮਨ੍ਤੇਸੁ ਸਯਂ ਤਥਾ ਨੋ ਰਮੇ ਨਂ ਰਮੇਯ੍ਯ, ਅਰਿਯੇਸੁ ਵਾ ਨਿਰਾਮਿਸਾਯ ਝਾਨਾਦਿਰਤਿਯਾ ਰਮਮਾਨੇਸੁ ਸਯਮ੍ਪਿ ਤਥਾ ਰਮੇ, ਤਤੋ ਅਞ੍ਞਥਾ ਪਨ ਕਦਾਚਿਪਿ ਨੋ ਰਮੇ ਨਾਭਿਰਮੇਯ੍ਯ ਵਾਤਿ ਅਤ੍ਥੋ.

ਪਿਯਞ੍ਜਹਤ੍ਥੇਰਗਾਥਾਵਣ੍ਣਨਾ ਨਿਟ੍ਠਿਤਾ.