੧੦. ਵਿਮਲਤ੍ਥੇਰਗਾਥਾਵਣ੍ਣਨਾ

ਧਰਣੀ ਚ ਸਿਞ੍ਚਤਿ ਵਾਤਿ ਆਯਸ੍ਮਤੋ ਵਿਮਲਤ੍ਥੇਰਸ੍ਸ ਗਾਥਾ. ਕਾ ਉਪ੍ਪਤ੍ਤਿ? ਸੋਪਿ ਪੁਰਿਮਬੁਦ੍ਧੇਸੁ ਕਤਾਧਿਕਾਰੋ ਤਤ੍ਥ ਤਤ੍ਥ ਭਵੇ ਵਿਵਟ੍ਟੂਪਨਿਸ੍ਸਯਂ ਕੁਸਲਂ ਉਪਚਿਨਨ੍ਤੋ ਵਿਪਸ੍ਸਿਸ੍ਸ ਭਗਵਤੋ ਕਾਲੇ ਸਙ੍ਖਧਮਨਕੁਲੇ ਨਿਬ੍ਬਤ੍ਤਿਤ੍ਵਾ ਵਿਞ੍ਞੁਤਂ ਪਤ੍ਤੋ ਤਸ੍ਮਿਂ ਸਿਪ੍ਪੇ ਨਿਪ੍ਫਤ੍ਤਿਂ ਗਤੋ ਏਕਦਿਵਸਂ ਵਿਪਸ੍ਸਿਂ ਭਗਵਨ੍ਤਂ ਪਸ੍ਸਿਤ੍ਵਾ ਪਸਨ੍ਨਮਾਨਸੋ ਸਙ੍ਖਧਮਨੇਨ ਪੂਜਂ ਕਤ੍ਵਾ ਤਤੋ ਪਟ੍ਠਾਯ ਕਾਲੇਨ ਕਾਲਂ ਸਤ੍ਥੁ ਉਪਟ੍ਠਾਨਂ ਅਕਾਸਿ. ਸੋ ਤੇਨ ਪੁਞ੍ਞਕਮ੍ਮੇਨ ਦੇਵਲੋਕੇ ਨਿਬ੍ਬਤ੍ਤਿਤ੍ਵਾ ਅਪਰਾਪਰਂ ਪੁਞ੍ਞਾਨਿ ਕਤ੍ਵਾ ਦੇਵਮਨੁਸ੍ਸੇਸੁ ਸਂਸਰਨ੍ਤੋ ਕਸ੍ਸਪਸ੍ਸ ਭਗਵਤੋ ਕਾਲੇ ‘‘ਅਨਾਗਤੇ ਮੇ ਵਿਮਲੋ ਵਿਸੁਦ੍ਧੋ ਕਾਯੋ ਹੋਤੂ’’ਤਿ ਬੋਧਿਰੁਕ੍ਖਂ ਗਨ੍ਧੋਦਕੇਹਿ ਨ੍ਹਾਪੇਸਿ, ਚੇਤਿਯਙ੍ਗਣਬੋਧਿਯਙ੍ਗਣੇਸੁ ਆਸਨਾਨਿ ਧੋਵਾਪੇਸਿ, ਭਿਕ੍ਖੂਨਮ੍ਪਿ ਕਿਲਿਟ੍ਠੇ ਸਮਣਪਰਿਕ੍ਖਾਰੇ ਧੋਵਾਪੇਸਿ.

ਸੋ ਤਤੋ ਚਵਿਤ੍ਵਾ ਦੇਵੇਸੁ ਚ ਮਨੁਸ੍ਸੇਸੁ ਚ ਪਰਿਵਤ੍ਤੇਨ੍ਤੋ ਇਮਸ੍ਮਿਂ ਬੁਦ੍ਧੁਪ੍ਪਾਦੇ ਰਾਜਗਹੇ ਇਬ੍ਭਕੁਲੇ ਨਿਬ੍ਬਤ੍ਤਿ. ਤਸ੍ਸ ਮਾਤੁਕੁਚ੍ਛਿਯਂ ਵਸਨ੍ਤਸ੍ਸ ਨਿਕ੍ਖਮਨ੍ਤਸ੍ਸ ਚ ਕਾਯੋ ਪਿਤ੍ਤਸੇਮ੍ਹਾਦੀਹਿ ਅਸਂਕਿਲਿਟ੍ਠੋ ਪਦੁਮਪਲਾਸੇ ਉਦਕਬਿਨ੍ਦੁ ਵਿਯ ਅਲਗ੍ਗੋ ਪਚ੍ਛਿਮਭਵਿਕਬੋਧਿਸਤ੍ਤਸ੍ਸ ਵਿਯ ਸੁਵਿਸੁਦ੍ਧੋ ਅਹੋਸਿ, ਤੇਨਸ੍ਸ ਵਿਮਲੋਤ੍ਵੇਵ ਨਾਮਂ ਅਕਂਸੁ. ਸੋ ਵਯਪ੍ਪਤ੍ਤੋ ਰਾਜਗਹਪ੍ਪਵੇਸਨੇ ਬੁਦ੍ਧਾਨੁਭਾਵਂ ਦਿਸ੍ਵਾ ਪਟਿਲਦ੍ਧਸਦ੍ਧੋ ਪਬ੍ਬਜਿਤ੍ਵਾ ਕਮ੍ਮਟ੍ਠਾਨਂ ਗਹੇਤ੍ਵਾ ਕੋਸਲਰਟ੍ਠੇ ਪਬ੍ਬਤਗੁਹਾਯਂ ਵਿਹਰਤਿ. ਅਥੇਕਦਿਵਸਂ ਚਾਤੁਦ੍ਦੀਪਿਕਮਹਾਮੇਘੋ ਸਕਲਂ ਚਕ੍ਕਵਾਲ਼ਗਬ੍ਭਂ ਪਤ੍ਥਰਿਤ੍ਵਾ ਪਾਵਸ੍ਸਿ. ਵਿਵਟ੍ਟਟ੍ਠਾਯਿਮ੍ਹਿ ਬੁਦ੍ਧਾਨਂ ਚਕ੍ਕਵਤ੍ਤੀਨਞ੍ਚ ਧਰਮਾਨਕਾਲੇ ਏਵ ਕਿਰ ਏਵਂ ਵਸ੍ਸਤਿ. ਘਮ੍ਮਪਰਿਲ਼ਾਹਵੂਪਸਮਤੋ ਉਤੁਸਪ੍ਪਾਯਲਾਭੇਨ ਥੇਰਸ੍ਸ ਚਿਤ੍ਤਂ ਸਮਾਹਿਤਂ ਅਹੋਸਿ ਏਕਗ੍ਗਂ. ਸੋ ਸਮਾਹਿਤਚਿਤ੍ਤੋ ਤਾਵਦੇਵ ਵਿਪਸ੍ਸਨਂ ਉਸ੍ਸੁਕ੍ਕਾਪੇਤ੍ਵਾ ਮਗ੍ਗਪਟਿਪਾਟਿਯਾ ਅਰਹਤ੍ਤਂ ਪਾਪੁਣਿ. ਤੇਨ ਵੁਤ੍ਤਂ ਅਪਦਾਨੇ (ਅਪ. ਥੇਰ ੧.੧੦.੫੬-੬੦) –

‘‘ਵਿਪਸ੍ਸਿਸ੍ਸ ਭਗਵਤੋ, ਅਹੋਸਿਂ ਸਙ੍ਖਧਮ੍ਮਕੋ;

ਨਿਚ੍ਚੁਪਟ੍ਠਾਨਯੁਤ੍ਤੋਮ੍ਹਿ, ਸੁਗਤਸ੍ਸ ਮਹੇਸਿਨੋ.

‘‘ਉਪਟ੍ਠਾਨਫਲਂ ਪਸ੍ਸ, ਲੋਕਨਾਥਸ੍ਸ ਤਾਦਿਨੋ;

ਸਟ੍ਠਿ ਤੂਰਿਯਸਹਸ੍ਸਾਨਿ, ਪਰਿਵਾਰੇਨ੍ਤਿ ਮਂ ਸਦਾ.

‘‘ਏਕਨਵੁਤਿਤੋ ਕਪ੍ਪੇ, ਉਪਟ੍ਠਹਿਂ ਮਹਾਇਸਿਂ;

ਦੁਗ੍ਗਤਿਂ ਨਾਭਿਜਾਨਾਮਿ, ਉਪਟ੍ਠਾਨਸ੍ਸਿਦਂ ਫਲਂ.

‘‘ਚਤੁਵੀਸੇ ਇਤੋ ਕਪ੍ਪੇ, ਮਹਾਨਿਗ੍ਘੋਸਨਾਮਕਾ;

ਸੋਲ਼ਸਾਸਿਂਸੁ ਰਾਜਾਨੋ, ਚਕ੍ਕਵਤ੍ਤੀ ਮਹਬ੍ਬਲਾ.

‘‘ਕਿਲੇਸਾ ਝਾਪਿਤਾ ਮਯ੍ਹਂ…ਪੇ… ਕਤਂ ਬੁਦ੍ਧਸ੍ਸ ਸਾਸਨ’’ਨ੍ਤਿ.

ਅਰਹਤ੍ਤਂ ਪਨ ਪਤ੍ਵਾ ਕਤਕਿਚ੍ਚਤਾਯ ਤੁਟ੍ਠਮਾਨਸੋ ਉਦਾਨਂ ਉਦਾਨੇਨ੍ਤੋ ‘‘ਧਰਣੀ ਚ ਸਿਞ੍ਚਤਿ ਵਾਤਿ ਮਾਲੁਤੋ’’ਤਿ ਗਾਥਂ ਅਭਾਸਿ.

੫੦. ਤਤ੍ਥ ਧਰਣੀਤਿ ਪਥਵੀ, ਸਾ ਹਿ ਸਕਲਂ ਧਰਾਧਰਂ ਧਾਰੇਤੀਤਿ ‘‘ਧਰਣੀ’’ਤਿ ਵੁਚ੍ਚਤਿ. ਸਿਞ੍ਚਤੀਤਿ ਸਮਨ੍ਤਤੋ ਨਭਂ ਪੂਰੇਤ੍ਵਾ ਅਭਿਪ੍ਪਵਸ੍ਸਤੋ ਮਹਾਮੇਘਸ੍ਸ ਵੁਟ੍ਠਿਧਾਰਾਹਿ ਸਿਞ੍ਚਤਿ. ਵਾਤਿ ਮਾਲੁਤੋਤਿ ਉਦਕਫੁਸਿਤਸਮ੍ਮਿਸ੍ਸਤਾਯ ਸੀਤਲੋ ਵਾਤੋ ਵਾਯਤਿ. ਵਿਜ੍ਜੁਤਾ ਚਰਤਿ ਨਭੇਤਿ ਤਤ੍ਥ ਤਤ੍ਥ ਗਜ੍ਜਤਾ ਗਲ਼ਗਲ਼ਾਯਤਾ ਮਹਾਮੇਘਤੋ ਨਿਚ੍ਛਰਨ੍ਤਿਯੋ ਸਤੇਰਤਾ ਆਕਾਸੇ ਇਤੋ ਚਿਤੋ ਚ ਵਿਚਰਨ੍ਤਿ. ਉਪਸਮਨ੍ਤਿ ਵਿਤਕ੍ਕਾਤਿ ਉਤੁਸਪ੍ਪਾਯਸਿਦ੍ਧੇਨ ਸਮਥਵਿਪਸ੍ਸਨਾਧਿਗਮੇਨ ਪੁਬ੍ਬਭਾਗੇ ਤਦਙ੍ਗਾਦਿਵਸੇਨ ਵੂਪਸਨ੍ਤਾ ਹੁਤ੍ਵਾ ਕਾਮਵਿਤਕ੍ਕਾਦਯੋ ਸਬ੍ਬੇਪਿ ਨਵ ਮਹਾਵਿਤਕ੍ਕਾ ਅਰਿਯਮਗ੍ਗਾਧਿਗਮੇਨ ਉਪਸਮਨ੍ਤਿ. ਅਨਵਸੇਸਤੋ ਸਮੁਚ੍ਛਿਜ੍ਜਨ੍ਤੀਤਿ. ਵਤ੍ਤਮਾਨਸਮੀਪਤਾਯ ਅਰਿਯਮਗ੍ਗਕ੍ਖਣਂ ਵਤ੍ਤਮਾਨਂ ਕਤ੍ਵਾ ਵਦਤਿ. ਅਤੀਤਤ੍ਥੇ ਵਾ ਏਤਂ ਪਚ੍ਚੁਪ੍ਪਨ੍ਨਵਚਨਂ. ਚਿਤ੍ਤਂ ਸੁਸਮਾਹਿਤਂ ਮਮਾਤਿ ਤਤੋ ਏਵ ਲੋਕੁਤ੍ਤਰਸਮਾਧਿਨਾ ਮਮ ਚਿਤ੍ਤਂ ਸੁਟ੍ਠੁ ਸਮਾਹਿਤਂ, ਨ ਦਾਨਿ ਤਸ੍ਸ ਸਮਾਧਾਨੇ ਕਿਞ੍ਚਿ ਕਾਤਬ੍ਬਂ ਅਤ੍ਥੀਤਿ ਥੇਰੋ ਅਞ੍ਞਂ ਬ੍ਯਾਕਾਸਿ.

ਵਿਮਲਤ੍ਥੇਰਗਾਥਾਵਣ੍ਣਨਾ ਨਿਟ੍ਠਿਤਾ.

ਪਞ੍ਚਮਵਗ੍ਗਵਣ੍ਣਨਾ ਨਿਟ੍ਠਿਤਾ.