੮. ਗਵਮ੍ਪਤਿਤ੍ਥੇਰਗਾਥਾਵਣ੍ਣਨਾ

ਯੋ ਇਦ੍ਧਿਯਾ ਸਰਭੁਨ੍ਤਿ ਆਯਸ੍ਮਤੋ ਗਵਮ੍ਪਤਿਤ੍ਥੇਰਸ੍ਸ ਗਾਥਾ. ਕਾ ਉਪ੍ਪਤ੍ਤਿ? ਸੋ ਕਿਰ ਪੁਰਿਮਬੁਦ੍ਧੇਸੁ ਕਤਾਧਿਕਾਰੋ ਇਤੋ ਏਕਤਿਂਸੇ ਕਪ੍ਪੇ ਸਿਖਿਂ ਭਗਵਨ੍ਤਂ ਪਸ੍ਸਿਤ੍ਵਾ ਪਸਨ੍ਨਮਾਨਸੋ ਪੁਪ੍ਫੇਹਿ ਪੂਜਂ ਅਕਾਸਿ. ਸੋ ਤੇਨ ਪੁਞ੍ਞਕਮ੍ਮੇਨ ਦੇਵਲੋਕੇ ਉਪ੍ਪਨ੍ਨੋ ਅਪਰਾਪਰਂ ਪੁਞ੍ਞਾਨਿ ਕਰੋਨ੍ਤੋ ਕੋਣਾਗਮਨਸ੍ਸ ਭਗਵਤੋ ਚੇਤਿਯੇ ਛਤ੍ਤਞ੍ਚ ਵੇਦਿਕਞ੍ਚ ਕਾਰੇਸਿ. ਕਸ੍ਸਪਸ੍ਸ ਪਨ ਭਗਵਤੋ ਕਾਲੇ ਅਞ੍ਞਤਰਸ੍ਮਿਂ ਕੁਲਗੇਹੇ ਨਿਬ੍ਬਤ੍ਤੋ. ਤਸ੍ਮਿਞ੍ਚ ਕੁਲੇ ਬਹੁਂ ਗੋਮਣ੍ਡਲਂ ਅਹੋਸਿ. ਤਂ ਗੋਪਾਲਕਾ ਰਕ੍ਖਨ੍ਤਿ. ਅਯਂ ਤਤ੍ਥ ਅਨ੍ਤਰਨ੍ਤਰਾ ਯੁਤ੍ਤਪ੍ਪਯੁਤ੍ਤਂ ਵਿਚਾਰੇਨ੍ਤੋ ਵਿਚਰਤਿ. ਸੋ ਏਕਂ ਖੀਣਾਸਵਤ੍ਥੇਰਂ ਗਾਮੇ ਪਿਣ੍ਡਾਯ ਚਰਿਤ੍ਵਾ ਬਹਿਗਾਮੇ ਦੇਵਸਿਕਂ ਏਕਸ੍ਮਿਂ ਪਦੇਸੇ ਭਤ੍ਤਕਿਚ੍ਚਂ ਕਰੋਨ੍ਤਂ ਦਿਸ੍ਵਾ ‘‘ਅਯ੍ਯੋ ਸੂਰਿਯਾਤਪੇਨ ਕਿਲਮਿਸ੍ਸਤੀ’’ਤਿ ਚਿਨ੍ਤੇਤ੍ਵਾ ਚਤ੍ਤਾਰੋ ਸਿਰੀਸਦਣ੍ਡੇ ਉਸ੍ਸਾਪੇਤ੍ਵਾ ਤੇਸਂ ਉਪਰਿ ਸਿਰੀਸਸਾਖਾਯੋ ਠਪੇਤ੍ਵਾ ਸਾਖਾਮਣ੍ਡਪਂ ਕਤ੍ਵਾ ਅਦਾਸਿ. ‘‘ਮਣ੍ਡਪਸ੍ਸ ਸਮੀਪੇ ਸਿਰੀਸਰੁਕ੍ਖਂ ਰੋਪੇਸੀ’’ਤਿ ਚ ਵਦਨ੍ਤਿ. ਤਸ੍ਸ ਅਨੁਕਮ੍ਪਾਯ ਦੇਵਸਿਕਂ ਥੇਰੋ ਤਤ੍ਥ ਨਿਸੀਦਿ. ਸੋ ਤੇਨ ਪੁਞ੍ਞਕਮ੍ਮੇਨ ਤਤੋ ਚਵਿਤ੍ਵਾ ਚਾਤੁਮਹਾਰਾਜਿਕੇਸੁ ਨਿਬ੍ਬਤ੍ਤਿ. ਤਸ੍ਸ ਪੁਰਿਮਕਮ੍ਮਸਂਸੂਚਕਂ ਵਿਮਾਨਦ੍ਵਾਰੇ ਮਹਨ੍ਤਂ ਸਿਰੀਸਵਨਂ ਨਿਬ੍ਬਤ੍ਤਿ ਵਣ੍ਣਗਨ੍ਧਸਮ੍ਪਨ੍ਨੇਹਿ ਅਞ੍ਞੇਹਿ ਪੁਪ੍ਫੇਹਿ ਸਬ੍ਬਕਾਲੇ ਉਪਸੋਭਯਮਾਨਂ, ਤੇਨ ਤਂ ਵਿਮਾਨਂ ‘‘ਸੇਰੀਸਕ’’ਨ੍ਤਿ ਪਞ੍ਞਾਯਿਤ੍ਥ. ਸੋ ਦੇਵਪੁਤ੍ਤੋ ਏਕਂ ਬੁਦ੍ਧਨ੍ਤਰਂ ਦੇਵੇਸੁ ਚ ਮਨੁਸ੍ਸੇਸੁ ਚ ਸਂਸਰਿਤ੍ਵਾ ਇਮਸ੍ਮਿਂ ਬੁਦ੍ਧੁਪ੍ਪਾਦੇ ਯਸਤ੍ਥੇਰਸ੍ਸ ਚਤੂਸੁ ਗਿਹਿਸਹਾਯੇਸੁ ਗਵਮ੍ਪਤਿ ਨਾਮ ਹੁਤ੍ਵਾ ਆਯਸ੍ਮਤੋ ਯਸਸ੍ਸ ਪਬ੍ਬਜਿਤਭਾਵਂ ਸੁਤ੍ਵਾ ਅਤ੍ਤਨੋ ਸਹਾਯੇਹਿ ਸਦ੍ਧਿਂ ਭਗਵਤੋ ਸਨ੍ਤਿਕਂ ਅਗਮਾਸਿ. ਸਤ੍ਥਾ ਤਸ੍ਸ ਧਮ੍ਮਂ ਦੇਸੇਸਿ. ਸੋ ਦੇਸਨਾਵਸਾਨੇ ਸਹਾਯੇਹਿ ਸਦ੍ਧਿਂ ਅਰਹਤ੍ਤੇ ਪਤਿਟ੍ਠਾਸਿ. ਤੇਨ ਵੁਤ੍ਤਂ ਅਪਦਾਨੇ (ਅਪ. ਥੇਰ ੨.੫੩.੪੨-੪੭) –

‘‘ਮਿਗਲੁਦ੍ਦੋ ਪੁਰੇ ਆਸਿਂ, ਵਿਪਿਨੇ ਵਿਚਰਂ ਅਹਂ;

ਅਦ੍ਦਸਂ ਵਿਰਜਂ ਬੁਦ੍ਧਂ, ਸਬ੍ਬਧਮ੍ਮਾਨ ਪਾਰਗੁਂ.

‘‘ਤਸ੍ਮਿਂ ਮਹਾਕਾਰੁਣਿਕੇ, ਸਬ੍ਬਸਤ੍ਤਹਿਤੇ ਰਤੇ;

ਪਸਨ੍ਨਚਿਤ੍ਤੋ ਸੁਮਨੋ, ਨੇਲਪੁਪ੍ਫਂ ਅਪੂਜਯਿਂ.

‘‘ਏਕਤਿਂਸੇ ਇਤੋ ਕਪ੍ਪੇ, ਯਂ ਪੁਪ੍ਫਮਭਿਪੂਜਯਿਂ;

ਦੁਗ੍ਗਤਿਂ ਨਾਭਿਜਾਨਾਮਿ, ਬੁਦ੍ਧਪੂਜਾਯਿਦਂ ਫਲਂ.

‘‘ਕਿਲੇਸਾ ਝਾਪਿਤਾ ਮਯ੍ਹਂ…ਪੇ… ਕਤਂ ਬੁਦ੍ਧਸ੍ਸ ਸਾਸਨ’’ਨ੍ਤਿ.

ਅਰਹਤ੍ਤਂ ਪਨ ਪਤ੍ਵਾ ਥੇਰੋ ਵਿਮੁਤ੍ਤਿਸੁਖਂ ਪਟਿਸਂਵੇਦੇਨ੍ਤੋ ਸਾਕੇਤੇ ਵਿਹਰਤਿ ਅਞ੍ਜਨਵਨੇ. ਤੇਨ ਚ ਸਮਯੇਨ ਭਗਵਾ ਮਹਤਾ ਭਿਕ੍ਖੁਸਙ੍ਘੇਨ ਸਦ੍ਧਿਂ ਸਾਕੇਤਂ ਗਨ੍ਤ੍ਵਾ ਅਞ੍ਜਨਵਨੇ ਵਿਹਾਸਿ. ਸੇਨਾਸਨਂ ਨਪ੍ਪਹੋਸਿ. ਸਮ੍ਬਹੁਲਾ ਭਿਕ੍ਖੂ ਵਿਹਾਰਸਾਮਨ੍ਤਾ ਸਰਭੁਯਾ ਨਦਿਯਾ ਵਾਲਿਕਾਪੁਲ਼ਿਨੇ ਸਯਿਂਸੁ. ਅਥ ਅਡ੍ਢਰਤ੍ਤਸਮਯੇ ਨਦਿਯਾ ਉਦਕੋਘੇ ਆਗਚ੍ਛਨ੍ਤੇ ਸਾਮਣੇਰਾਦਯੋ ਉਚ੍ਚਾਸਦ੍ਦਮਹਾਸਦ੍ਦਾ ਅਹੇਸੁਂ. ਭਗਵਾ ਤਂ ਞਤ੍ਵਾ ਆਯਸ੍ਮਨ੍ਤਂ ਗਵਮ੍ਪਤਿਂ ਆਣਾਪੇਸਿ – ‘‘ਗਚ੍ਛ, ਗਵਮ੍ਪਤਿ, ਜਲੋਘਂ ਵਿਕ੍ਖਮ੍ਭੇਤ੍ਵਾ ਭਿਕ੍ਖੂਨਂ ਫਾਸੁਵਿਹਾਰਂ ਕਰੋਹੀ’’ਤਿ. ਥੇਰੋ ‘‘ਸਾਧੁ, ਭਨ੍ਤੇ’’ਤਿ ਇਦ੍ਧਿਬਲੇਨ ਨਦੀਸੋਤਂ ਵਿਕ੍ਖਮ੍ਭਿ, ਤਂ ਦੂਰਤੋਵ ਪਬ੍ਬਤਕੂਟਂ ਵਿਯ ਅਟ੍ਠਾਸਿ. ਤਤੋ ਪਟ੍ਠਾਯ ਥੇਰਸ੍ਸ ਆਨੁਭਾਵੋ ਲੋਕੇ ਪਾਕਟੋ ਅਹੋਸਿ. ਅਥੇਕਦਿਵਸਂ ਸਤ੍ਥਾ ਮਹਤਿਯਾ ਦੇਵਪਰਿਸਾਯ ਮਜ੍ਝੇ ਨਿਸੀਦਿਤ੍ਵਾ ਧਮ੍ਮਂ ਦੇਸੇਨ੍ਤਂ ਥੇਰਂ ਦਿਸ੍ਵਾ ਲੋਕਾਨੁਕਮ੍ਪਾਯ ਤਸ੍ਸ ਗੁਣਾਨਂ ਵਿਭਾਵਨਤ੍ਥਂ ਤਂ ਪਸਂਸਨ੍ਤੋ ‘‘ਯੋ ਇਦ੍ਧਿਯਾ ਸਰਭੁ’’ਨ੍ਤਿ ਗਾਥਂ ਅਭਾਸਿ.

੩੮. ਤਤ੍ਥ ਇਦ੍ਧਿਯਾਤਿ ਅਧਿਟ੍ਠਾਨਿਦ੍ਧਿਯਾ. ਸਰਭੁਨ੍ਤਿ ਏਵਂਨਾਮਿਕਂ ਨਦਿਂ, ਯਂ ਲੋਕੇ ‘‘ਸਰਭੁ’’ਨ੍ਤਿ ਵਦਨ੍ਤਿ. ਅਟ੍ਠਪੇਸੀਤਿ ਸਨ੍ਦਿਤੁਂ ਅਦੇਨ੍ਤੋ ਸੋਤਂ ਨਿਵਤ੍ਤੇਤ੍ਵਾ ਪਬ੍ਬਤਕੂਟਂ ਵਿਯ ਮਹਨ੍ਤਂ ਜਲਰਾਸਿਂ ਕਤ੍ਵਾ ਠਪੇਸਿ. ਅਸਿਤੋਤਿ ਨਸਿਤੋ, ਤਣ੍ਹਾਦਿਟ੍ਠਿਨਿਸ੍ਸਯਰਹਿਤੋ, ਬਨ੍ਧਨਸਙ੍ਖਾਤਾਨਂ ਵਾ ਸਬ੍ਬਸਂਯੋਜਨਾਨਂ ਸਮੁਚ੍ਛਿਨ੍ਨਤ੍ਤਾ ਕੇਨਚਿਪਿ ਬਨ੍ਧਨੇਨ ਅਬਦ੍ਧੋ, ਤਤੋ ਏਵ ਏਜਾਨਂ ਕਿਲੇਸਾਨਂ ਅਭਾਵਤੋ ਅਨੇਜੋ ਸੋ, ਗਵਮ੍ਪਤਿ, ਤਂ ਸਬ੍ਬਸਙ੍ਗਾਤਿਗਤਂ ਤਾਦਿਸਂ ਸਬ੍ਬੇਪਿ ਰਾਗਦੋਸਮੋਹਮਾਨਦਿਟ੍ਠਿਸਙ੍ਗੇ ਅਤਿਕ੍ਕਮਿਤ੍ਵਾ ਠਿਤਤ੍ਤਾ ਸਬ੍ਬਸਙ੍ਗਾਤਿਗਤਂ, ਅਸੇਕ੍ਖਮੁਨਿਭਾਵਤੋ ਮਹਾਮੁਨਿਂ, ਤਤੋ ਏਵ ਕਾਮਕਮ੍ਮਭਵਾਦਿਭੇਦਸ੍ਸ ਸਕਲਸ੍ਸਪਿ ਭਵਸ੍ਸ ਪਾਰਂ ਨਿਬ੍ਬਾਨਂ ਗਤਤ੍ਤਾ ਭਵਸ੍ਸ ਪਾਰਗੁਂ. ਦੇਵਾ ਨਮਸ੍ਸਨ੍ਤੀਤਿ ਦੇਵਾਪਿ ਇਮਸ੍ਸਨ੍ਤਿ, ਪਗੇਵ ਇਤਰਾ ਪਜਾਤਿ.

ਗਾਥਾਪਰਿਯੋਸਾਨੇ ਮਹਤੋ ਜਨਕਾਯਸ੍ਸ ਧਮ੍ਮਾਭਿਸਮਯੋ ਅਹੋਸਿ. ਥੇਰੋ ਅਞ੍ਞਂ ਬ੍ਯਾਕਰੋਨ੍ਤੋ ‘‘ਸਤ੍ਥਾਰਂ ਪੂਜੇਸ੍ਸਾਮੀ’’ਤਿ ਇਮਮੇਵ ਗਾਥਂ ਅਭਾਸੀਤਿ.

ਗਵਮ੍ਪਤਿਤ੍ਥੇਰਗਾਥਾਵਣ੍ਣਨਾ ਨਿਟ੍ਠਿਤਾ.