੧੦. ਵਡ੍ਢਮਾਨਤ੍ਥੇਰਗਾਥਾਵਣ੍ਣਨਾ

ਸਤ੍ਤਿਯਾ ਵਿਯ ਓਮਟ੍ਠੋਤਿ ਆਯਸ੍ਮਤੋ ਵਡ੍ਢਮਾਨਤ੍ਥੇਰਸ੍ਸ ਗਾਥਾ. ਕਾ ਉਪ੍ਪਤ੍ਤਿ? ਅਯਮ੍ਪਿ ਕਿਰ ਪੁਰਿਮਬੁਦ੍ਧੇਸੁ ਕਤਾਧਿਕਾਰੋ ਇਤੋ ਦ੍ਵੇਨਵੁਤੇ ਕਪ੍ਪੇ ਤਿਸ੍ਸਸ੍ਸ ਭਗਵਤੋ ਕਾਲੇ ਕੁਲਗੇਹੇ ਨਿਬ੍ਬਤ੍ਤਿਤ੍ਵਾ ਵਿਞ੍ਞੁਤਂ ਪਤ੍ਤੋ ਤਿਸ੍ਸਂ ਭਗਵਨ੍ਤਂ ਪਿਣ੍ਡਾਯ ਚਰਨ੍ਤਂ ਦਿਸ੍ਵਾ ਪਸਨ੍ਨਮਾਨਸੋ ਸੁਪਰਿਪਕ੍ਕਾਨਿ ਵਣ੍ਟਤੋ ਮੁਤ੍ਤਾਨਿ ਅਮ੍ਬਫਲਾਨਿ ਅਦਾਸਿ. ਸੋ ਤੇਨ ਪੁਞ੍ਞਕਮ੍ਮੇਨ ਦੇਵਲੋਕੇ ਨਿਬ੍ਬਤ੍ਤੋ ਅਪਰਾਪਰਂ ਪੁਞ੍ਞਕਮ੍ਮਾਨਿ ਉਪਚਿਨਨ੍ਤੋ ਇਮਸ੍ਮਿਂ ਬੁਦ੍ਧੁਪ੍ਪਾਦੇ ਵੇਸਾਲਿਯਂ ਲਿਚ੍ਛਵਿਰਾਜਕੁਲੇ ਨਿਬ੍ਬਤ੍ਤਿ, ਵਡ੍ਢਮਾਨੋਤਿਸ੍ਸ ਨਾਮਂ ਅਹੋਸਿ. ਸੋ ਵਯਪ੍ਪਤ੍ਤੋ ਸਦ੍ਧੋ ਪਸਨ੍ਨੋ ਦਾਯਕੋ ਦਾਨਰਤੋ ਕਾਰਕੋ ਸਙ੍ਘੁਪਟ੍ਠਾਕੋ ਹੁਤ੍ਵਾ ਤਥਾਰੂਪੇ ਅਪਰਾਧੇ ਸਤ੍ਥਾਰਾ ਪਤ੍ਤਨਿਕ੍ਕੁਜ੍ਜਨਕਮ੍ਮੇ ਕਾਰਾਪਿਤੇ ਅਗ੍ਗਿਂ ਅਕ੍ਕਨ੍ਤੋ ਵਿਯ ਸਙ੍ਘਂ ਖਮਾਪੇਤ੍ਵਾ ਕਮ੍ਮਂ ਪਟਿਪ੍ਪਸ੍ਸਮ੍ਭੇਤ੍ਵਾ ਸਞ੍ਜਾਤਸਂਵੇਗੋ ਪਬ੍ਬਜਿ, ਪਬ੍ਬਜਿਤ੍ਵਾ ਪਨ ਥਿਨਮਿਦ੍ਧਾਭਿਭੂਤੋ ਵਿਹਾਸਿ. ਤਂ ਸਤ੍ਥਾ ਸਂਵੇਜੇਨ੍ਤੋ ‘‘ਸਤ੍ਤਿਯਾ ਵਿਯ ਓਮਟ੍ਠੋ’’ਤਿ ਗਾਥਂ ਅਭਾਸਿ.

੪੦. ਤਤ੍ਥ ਭਵਰਾਗਪ੍ਪਹਾਨਾਯਾਤਿ ਭਵਰਾਗਸ੍ਸ ਰੂਪਰਾਗਸ੍ਸ ਅਰੂਪਰਾਗਸ੍ਸ ਚ ਪਜਹਨਤ੍ਥਾਯ. ਯਦਿਪਿ ਅਜ੍ਝਤ੍ਤਸਂਯੋਜਨਾਨਿ ਅਪ੍ਪਹਾਯ ਬਹਿਦ੍ਧਸਂਯੋਜਨਾਨਂ ਪਹਾਨਂ ਨਾਮ ਨਤ੍ਥਿ, ਨਾਨਨ੍ਤਰਿਕਭਾਵਤੋ ਪਨ ਉਦ੍ਧਮ੍ਭਾਗਿਯਸਂਯੋਜਨਪ੍ਪਹਾਨਵਚਨੇਨ ਓਰਮ੍ਭਾਗਿਯਸਂਯੋਜਨਪ੍ਪਹਾਨਮ੍ਪਿ ਵੁਤ੍ਤਮੇਵ ਹੋਤਿ. ਯਸ੍ਮਾ ਵਾ ਸਮੁਚ੍ਛਿਨ੍ਨੋਰਮ੍ਭਾਗਿਯਸਂਯੋਜਨਾਨਮ੍ਪਿ ਕੇਸਞ੍ਚਿ ਅਰਿਯਾਨਂ ਉਦ੍ਧਮ੍ਭਾਗਿਯਸਂਯੋਜਨਾਨਿ ਦੁਪ੍ਪਹੇਯ੍ਯਾਨਿ ਹੋਨ੍ਤਿ, ਤਸ੍ਮਾ ਸੁਪ੍ਪਹੇਯ੍ਯਤੋ ਦੁਪ੍ਪਹੇਯ੍ਯਮੇਵ ਦਸ੍ਸੇਨ੍ਤੋ ਭਗਵਾ ਭਵਰਾਗਪ੍ਪਹਾਨਸੀਸੇਨ ਸਬ੍ਬਸ੍ਸਾਪਿ ਉਦ੍ਧਮ੍ਭਾਗਿਯਸਂਯੋਜਨਸ੍ਸ ਪਹਾਨਮਾਹ. ਥੇਰਸ੍ਸ ਏਵ ਵਾ ਅਜ੍ਝਾਸਯਵਸੇਨੇਵਂ ਵੁਤ੍ਤਂ. ਸੇਸਂ ਵੁਤ੍ਤਨਯਮੇਵ.

ਵਡ੍ਢਮਾਨਤ੍ਥੇਰਗਾਥਾਵਣ੍ਣਨਾ ਨਿਟ੍ਠਿਤਾ.

ਚਤੁਤ੍ਥਵਗ੍ਗਵਣ੍ਣਨਾ ਨਿਟ੍ਠਿਤਾ.