੧੦. ਅਜਿਤਤ੍ਥੇਰਗਾਥਾਵਣ੍ਣਨਾ

ਮਰਣੇ ਮੇ ਭਯਂ ਨਤ੍ਥੀਤਿ ਆਯਸ੍ਮਤੋ ਅਜਿਤਤ੍ਥੇਰਸ੍ਸ ਗਾਥਾ. ਕਾ ਉਪ੍ਪਤ੍ਤਿ? ਸੋ ਕਿਰ ਏਕਨਵੁਤੇ ਕਪ੍ਪੇ ਵਿਪਸ੍ਸਿਂ ਭਗਵਨ੍ਤਂ ਪਸ੍ਸਿਤ੍ਵਾ ਪਸਨ੍ਨਚਿਤ੍ਤੋ ਕਪਿਤ੍ਥਫਲਂ ਅਦਾਸਿ. ਤਤੋ ਪਰਮ੍ਪਿ ਤਂ ਤਂ ਪੁਞ੍ਞਂ ਕਤ੍ਵਾ ਦੇਵਮਨੁਸ੍ਸੇਸੁ ਸਂਸਰਨ੍ਤੋ ਇਮਸ੍ਮਿਂ ਕਪ੍ਪੇ ਅਨੁਪ੍ਪਨ੍ਨੇ ਏਵ ਅਮ੍ਹਾਕਂ ਸਤ੍ਥਰਿ ਸਾਵਤ੍ਥਿਯਂ ਮਹਾਕੋਸਲਰਞ੍ਞੋ ਅਗ੍ਗਾਸਨਿਯਸ੍ਸ ਬ੍ਰਾਹ੍ਮਣਸ੍ਸ ਪੁਤ੍ਤੋ ਹੁਤ੍ਵਾ ਨਿਬ੍ਬਤ੍ਤਿ. ਤਸ੍ਸ ਅਜਿਤੋਤਿ ਨਾਮਂ ਅਹੋਸਿ. ਤਸ੍ਮਿਞ੍ਚ ਸਮਯੇ ਸਾਵਤ੍ਥਿਵਾਸੀ ਬਾਵਰੀ ਨਾਮ ਬ੍ਰਾਹ੍ਮਣੋ ਤੀਹਿ ਮਹਾਪੁਰਿਸਲਕ੍ਖਣੇਹਿ ਸਮਨ੍ਨਾਗਤੋ ਤਿਣ੍ਣਂ ਵੇਦਾਨਂ ਪਾਰਗੂ ਸਾਵਤ੍ਥਿਤੋ ਨਿਕ੍ਖਮਿਤ੍ਵਾ ਤਾਪਸਪਬ੍ਬਜ੍ਜਂ ਪਬ੍ਬਜਿਤ੍ਵਾ ਗੋਧਾਵਰੀਤੀਰੇ ਕਪਿਤ੍ਥਾਰਾਮੇ ਵਸਤਿ. ਅਥ ਅਜਿਤੋ ਤਸ੍ਸ ਸਨ੍ਤਿਕੇ ਪਬ੍ਬਜਿਤੋ ਅਤ੍ਥਕਾਮਾਯ ਦੇਵਤਾਯ ਚੋਦਿਤੇਨ ਬਾਵਰਿਨਾ ਸਤ੍ਥੁ ਸਨ੍ਤਿਕਂ ਪੇਸਿਤੋ ਤਿਸ੍ਸਮੇਤ੍ਤੇਯ੍ਯਾਦੀਹਿ ਸਦ੍ਧਿਂ ਭਗਵਨ੍ਤਂ ਉਪਸਙ੍ਕਮਿਤ੍ਵਾ ਮਨਸਾਵ ਪਞ੍ਹੇ ਪੁਚ੍ਛਿਤ੍ਵਾ ਤੇਸੁ ਵਿਸ੍ਸਜ੍ਜਿਤੇਸੁ ਪਸਨ੍ਨਚਿਤ੍ਤੋ ਸਤ੍ਥੁ ਸਨ੍ਤਿਕੇ ਪਬ੍ਬਜਿਤ੍ਵਾ ਕਮ੍ਮਟ੍ਠਾਨਂ ਗਹੇਤ੍ਵਾ ਵਿਪਸ੍ਸਨਂ ਵਡ੍ਢੇਤ੍ਵਾ ਅਰਹਤ੍ਤਂ ਪਾਪੁਣਿ. ਤੇਨ ਵੁਤ੍ਤਂ ਅਪਦਾਨੇ (ਅਪ. ਥੇਰ ੨.੫੨.੭-੧੧) –

‘‘ਸੁਵਣ੍ਣਵਣ੍ਣਂ ਸਮ੍ਬੁਦ੍ਧਂ, ਆਹੁਤੀਨਂ ਪਟਿਗ੍ਗਹਂ;

ਰਥਿਯਂ ਪਟਿਪਜ੍ਜਨ੍ਤਂ, ਕਪਿਤ੍ਥਂ ਅਦਦਿਂ ਫਲਂ.

‘‘ਏਕਨਵੁਤਿਤੋ ਕਪ੍ਪੇ, ਯਂ ਫਲਂ ਅਦਦਿਂ ਦਦਾ;

ਦੁਗ੍ਗਤਿਂ ਨਾਭਿਜਾਨਾਮਿ, ਫਲਦਾਨਸ੍ਸਿਦਂ ਫਲਂ.

‘‘ਕਿਲੇਸਾ ਝਾਪਿਤਾ ਮਯ੍ਹਂ…ਪੇ… ਕਤਂ ਬੁਦ੍ਧਸ੍ਸ ਸਾਸਨ’’ਨ੍ਤਿ.

ਅਰਹਤ੍ਤਂ ਪਨ ਪਤ੍ਤੋ ਸੀਹਨਾਦਂ ਨਦਨ੍ਤੋ ‘‘ਮਰਣੇ ਮੇ ਭਯਂ ਨਤ੍ਥੀ’’ਤਿ ਗਾਥਂ ਅਭਾਸਿ.

੨੦. ਤਤ੍ਥ ਮਰਣੇਤਿ ਮਰਣਨਿਮਿਤ੍ਤਂ ਮਰਣਹੇਤੁ. ਮੇਤਿ ਮਯ੍ਹਂ, ਭਯਂ ਨਤ੍ਥਿ ਉਚ੍ਛਿਨ੍ਨਭਵਮੂਲਤਾਯ ਪਰਿਕ੍ਖੀਣਜਾਤਿਕਤ੍ਤਾ. ਅਨੁਚ੍ਛਿਨ੍ਨਭਵਮੂਲਾਨਞ੍ਹਿ ‘‘ਕੀਦਿਸੀ ਨੁ ਖੋ ਮਯ੍ਹਂ ਆਯਤਿਂ ਉਪ੍ਪਤ੍ਤੀ’’ਤਿ ਮਰਣਤੋ ਭਯਂ ਭਵੇਯ੍ਯ. ਨਿਕਨ੍ਤੀਤਿ ਅਪੇਕ੍ਖਾ ਤਣ੍ਹਾ, ਸਾ ਨਤ੍ਥਿ ਜੀਵਿਤੇ ਸੁਪਰਿਮਦ੍ਦਿਤਸਙ੍ਖਾਰਤਾਯ ਉਪਾਦਾਨਕ੍ਖਨ੍ਧਾਨਂ ਦੁਕ੍ਖਾਸਾਰਕਾਦਿਭਾਵੇਨ ਸੁਟ੍ਠੁ ਉਪਟ੍ਠਹਨਤੋ. ਏਵਂਭੂਤੋ ਚਾਹਂ ਸਨ੍ਦੇਹਂ ਸਰੀਰਂ, ਸਕਂ ਵਾ ਦੇਹਂ ਦੇਹਸਙ੍ਖਾਤਂ ਦੁਕ੍ਖਭਾਰਂ ਨਿਕ੍ਖਿਪਿਸ੍ਸਾਮਿ ਛਡ੍ਡੇਸ੍ਸਾਮਿ, ਨਿਕ੍ਖਿਪਨ੍ਤੋ ਚ ‘‘‘ਇਮਿਨਾ ਸਰੀਰਕੇਨ ਸਾਧੇਤਬ੍ਬਂ ਸਾਧਿਤਂ, ਇਦਾਨਿ ਤਂ ਏਕਂਸੇਨ ਛਡ੍ਡਨੀਯਮੇਵਾ’ਤਿ ਪਞ੍ਞਾਵੇਪੁਲ੍ਲਪ੍ਪਤ੍ਤਿਯਾ ਸਮ੍ਪਜਾਨੋ ਸਤਿਵੇਪੁਲ੍ਲਪ੍ਪਤ੍ਤਿਯਾ ਪਟਿਸ੍ਸਤੋ ਨਿਕ੍ਖਿਪਿਸ੍ਸਾਮੀ’’ਤਿ. ਇਮਂ ਪਨ ਗਾਥਂ ਵਤ੍ਵਾ ਥੇਰੋ ਝਾਨਂ ਸਮਾਪਜ੍ਜਿਤ੍ਵਾ ਤਦਨਨ੍ਤਰਂ ਪਰਿਨਿਬ੍ਬਾਯੀਤਿ.

ਅਜਿਤਤ੍ਥੇਰਗਾਥਾਵਣ੍ਣਨਾ ਨਿਟ੍ਠਿਤਾ.

ਦੁਤਿਯਵਗ੍ਗਵਣ੍ਣਨਾ ਨਿਟ੍ਠਿਤਾ.