੮. ਕਿਮਿਲਤ੍ਥੇਰਗਾਥਾਵਣ੍ਣਨਾ

ਅਭਿਸਤ੍ਤੋਵ ਨਿਪਤਤੀਤਿ ਆਯਸ੍ਮਤੋ ਕਿਮਿਲਤ੍ਥੇਰਸ੍ਸ ਗਾਥਾ. ਕਾ ਉਪ੍ਪਤ੍ਤਿ? ਅਯਮ੍ਪਿ ਪੁਰਿਮਬੁਦ੍ਧੇਸੁ ਕਤਾਧਿਕਾਰੋ ਤਤ੍ਥ ਤਤ੍ਥ ਭਵੇ ਪੁਞ੍ਞਾਨਿ ਕਰੋਨ੍ਤੋ ਕਕੁਸਨ੍ਧਸ੍ਸ ਭਗਵਤੋ ਕਾਲੇ ਕੁਲਗੇਹੇ ਨਿਬ੍ਬਤ੍ਤਿਤ੍ਵਾ ਵਿਞ੍ਞੁਤਂ ਪਤ੍ਤੋ ਪਰਿਨਿਬ੍ਬੁਤੇ ਸਤ੍ਥਰਿ ਤਸ੍ਸ ਧਾਤੁਯੋ ਉਦ੍ਦਿਸ੍ਸ ਸਲ਼ਲਮਾਲਾਹਿ ਮਣ੍ਡਪਾਕਾਰੇਨ ਪੂਜਂ ਅਕਾਸਿ. ਸੋ ਤੇਨ ਪੁਞ੍ਞਕਮ੍ਮੇਨ ਤਾਵਤਿਂਸੇ ਨਿਬ੍ਬਤ੍ਤਿਤ੍ਵਾ ਅਪਰਾਪਰਂ ਦੇਵਮਨੁਸ੍ਸੇਸੁ ਸਂਸਰਨ੍ਤੋ ਇਮਸ੍ਮਿਂ ਬੁਦ੍ਧੁਪ੍ਪਾਦੇ ਕਪਿਲਵਤ੍ਥੁਨਗਰੇ ਸਾਕਿਯਰਾਜਕੁਲੇ ਨਿਬ੍ਬਤ੍ਤਿ, ਕਿਮਿਲੋਤਿਸ੍ਸ ਨਾਮਂ ਅਹੋਸਿ. ਸੋ ਵਯਪ੍ਪਤ੍ਤੋ ਭੋਗਸਮ੍ਪਤ੍ਤਿਯਾ ਸਮ੍ਪਨ੍ਨੋ ਵਿਹਰਤਿ. ਤਸ੍ਸ ਞਾਣਪਰਿਪਾਕਂ ਦਿਸ੍ਵਾ ਸਂਵੇਗਜਨਨਤ੍ਥਂ ਅਨੁਪਿਯਾਯਂ ਵਿਹਰਨ੍ਤੋ ਸਤ੍ਥਾ ਪਠਮਯੋਬ੍ਬਨੇ ਠਿਤਂ ਦਸ੍ਸਨੀਯਂ ਇਤ੍ਥਿਰੂਪਂ ਅਭਿਨਿਮ੍ਮਿਨਿਤ੍ਵਾ ਪੁਰਤੋ ਦਸ੍ਸੇਤ੍ਵਾ ਪੁਨ ਅਨੁਕ੍ਕਮੇਨ ਯਥਾ ਜਰਾਰੋਗਵਿਪਤ੍ਤੀਹਿ ਅਭਿਭੂਤਾ ਦਿਸ੍ਸਤਿ, ਤਥਾ ਅਕਾਸਿ. ਤਂ ਦਿਸ੍ਵਾ ਕਿਮਿਲਕੁਮਾਰੋ ਅਤਿਵਿਯ ਸਂਵੇਗਂ ਪਕਾਸੇਨ੍ਤੋ –

੧੧੮. ‘‘ਅਭਿਸਤ੍ਤੋਵ ਨਿਪਤਤਿ ਵਯੋ, ਰੂਪਂ ਅਞ੍ਞਮਿਵ ਤਥੇਵ ਸਨ੍ਤਂ;

ਤਸ੍ਸੇਵ ਸਤੋ ਅਵਿਪ੍ਪਵਸਤੋ, ਅਞ੍ਞਸ੍ਸੇਵ ਸਰਾਮਿ ਅਤ੍ਤਾਨ’’ਨ੍ਤਿ. –

ਗਾਥਂ ਅਭਾਸਿ.

ਤਤ੍ਥ ਅਭਿਸਤ੍ਤੋਵਾਤਿ ‘‘ਤ੍ਵਂ ਸੀਘਂ ਗਚ੍ਛ ਮਾ ਤਿਟ੍ਠਾ’’ਤਿ ਦੇਵੇਹਿ ਅਨੁਸਿਟ੍ਠੋ ਆਣਤ੍ਤੋ ਵਿਯ. ‘‘ਅਭਿਸਟ੍ਠੋ ਵਾ’’ਤਿਪਿ ਪਾਠੋ, ‘‘ਤ੍ਵਂ ਲਹੁਂ ਗਚ੍ਛਾ’’ਤਿ ਕੇਨਚਿ ਅਭਿਲਾਸਾਪਿਤੋ ਵਿਯਾਤਿ ਅਤ੍ਥੋ. ਨਿਪਤਤੀਤਿ ਅਤਿਪਤਤਿ ਅਭਿਧਾਵਤਿ ਨ ਤਿਟ੍ਠਤਿ, ਖਣੇ ਖਣੇ ਖਯਵਯਂ ਪਾਪੁਣਾਤੀਤਿ ਅਤ੍ਥੋ. ਵਯੋਤਿ ਬਾਲ੍ਯਯੋਬ੍ਬਨਾਦਿਕੋ ਸਰੀਰਸ੍ਸ ਅਵਤ੍ਥਾਵਿਸੇਸੋ. ਇਧ ਪਨਸ੍ਸ ਯੋਬ੍ਬਞ੍ਞਂ ਅਧਿਪ੍ਪੇਤਂ, ਤਂ ਹਿਸ੍ਸ ਅਭਿਪਤਨ੍ਤਂ ਖੀਯਨ੍ਤਂ ਹੁਤ੍ਵਾ ਉਪਟ੍ਠਿਤਂ. ਰੂਪਨ੍ਤਿ ਰੂਪਸਮ੍ਪਦਾਤਿ ਵਦਤਿ. ਰੂਪਨ੍ਤਿ ਪਨ ਸਰੀਰਂ ‘‘ਅਟ੍ਠਿਞ੍ਚ ਪਟਿਚ੍ਚ ਨ੍ਹਾਰੁਞ੍ਚ ਪਟਿਚ੍ਚ ਮਂਸਞ੍ਚ ਪਟਿਚ੍ਚ ਆਕਾਸੋ ਪਰਿਵਾਰਿਤੋ ਰੂਪਂਤ੍ਵੇਵ ਸਙ੍ਖਂ ਗਚ੍ਛਤੀ’’ਤਿਆਦੀਸੁ (ਮ. ਨਿ. ੧.੩੦੬) ਵਿਯ. ਅਞ੍ਞਮਿਵ ਤਥੇਵ ਸਨ੍ਤਨ੍ਤਿ ਇਦਂ ਰੂਪਂ ਯਾਦਿਸਂ, ਸਯਂ ਤਥੇਵ ਤੇਨੇਵਾਕਾਰੇਨ ਸਨ੍ਤਂ ਵਿਜ੍ਜਮਾਨਂ ਅਞ੍ਞਂ ਵਿਯ ਮਯ੍ਹਂ ਉਪਟ੍ਠਾਤੀਤਿ ਅਧਿਪ੍ਪਾਯੋ. ‘‘ਤਦੇਵ ਸਨ੍ਤ’’ਨ੍ਤਿ ਚ ਕੇਚਿ ਪਠਨ੍ਤਿ. ਤਸ੍ਸੇਵ ਸਤੋਤਿ ਤਸ੍ਸੇਵ ਮੇ ਅਨਞ੍ਞਸ੍ਸ ਸਤੋ ਸਮਾਨਸ੍ਸ. ਅਵਿਪ੍ਪਵਸਤੋਤਿ ਨ ਵਿਪ੍ਪਵਸਨ੍ਤਸ੍ਸ, ਚਿਰਵਿਪ੍ਪਵਾਸੇਨ ਹਿ ਸਤੋ ਅਨਞ੍ਞਮ੍ਪਿ ਅਞ੍ਞਂ ਵਿਯ ਉਪਟ੍ਠਾਤਿ ਇਦਮ੍ਪਿ ਇਧ ਨਤ੍ਥੀਤਿ ਅਧਿਪ੍ਪਾਯੋ. ਅਞ੍ਞਸ੍ਸੇਵ ਸਰਾਮਿ ਅਤ੍ਤਾਨਨ੍ਤਿ ਇਮਂ ਮਮ ਅਤ੍ਤਭਾਵਂ ਅਞ੍ਞਸ੍ਸ ਸਤ੍ਤਸ੍ਸ ਵਿਯ ਸਰਾਮਿ ਉਪਧਾਰੇਮਿ ਸਞ੍ਜਾਨਾਮੀਤਿ ਅਤ੍ਥੋ. ਤਸ੍ਸੇਵਂ ਅਨਿਚ੍ਚਤਂ ਮਨਸਿ ਕਰੋਨ੍ਤਸ੍ਸ ਦਲ਼੍ਹਤਰੋ ਸਂਵੇਗੋ ਉਦਪਾਦਿ, ਸੋ ਸਂਵੇਗਜਾਤੋ ਸਤ੍ਥਾਰਂ ਉਪਸਙ੍ਕਮਿਤ੍ਵਾ ਧਮ੍ਮਂ ਸੁਤ੍ਵਾ ਪਟਿਲਦ੍ਧਸਦ੍ਧੋ ਪਬ੍ਬਜਿਤ੍ਵਾ ਵਿਪਸ੍ਸਨਂ ਪਟ੍ਠਪੇਤ੍ਵਾ ਨਚਿਰਸ੍ਸੇਵ ਅਰਹਤ੍ਤਂ ਪਾਪੁਣਿ. ਤੇਨ ਵੁਤ੍ਤਂ ਅਪਦਾਨੇ (ਅਪ. ਥੇਰ ੨.੫੬.੪੨-੪੮) –

‘‘ਨਿਬ੍ਬੁਤੇ ਕਕੁਸਨ੍ਧਮ੍ਹਿ, ਬ੍ਰਾਹ੍ਮਣਮ੍ਹਿ ਵੁਸੀਮਤਿ;

ਗਹੇਤ੍ਵਾ ਸਲ਼ਲਂ ਮਾਲਂ, ਮਣ੍ਡਪਂ ਕਾਰਯਿਂ ਅਹਂ.

‘‘ਤਾਵਤਿਂਸਂ ਗਤੋ ਸਨ੍ਤੋ, ਲਭਿਮ੍ਹ ਬ੍ਯਮ੍ਹਮੁਤ੍ਤਮਂ;

ਅਞ੍ਞੇ ਦੇਵੇਤਿਰੋਚਾਮਿ, ਪੁਞ੍ਞਕਮ੍ਮਸ੍ਸਿਦਂ ਫਲਂ.

‘‘ਦਿਵਾ ਵਾ ਯਦਿ ਵਾ ਰਤ੍ਤਿਂ, ਚਙ੍ਕਮਨ੍ਤੋ ਠਿਤੋ ਚਹਂ;

ਛਨ੍ਨੋ ਸਲ਼ਲਪੁਪ੍ਫੇਹਿ, ਪੁਞ੍ਞਕਮ੍ਮਸ੍ਸਿਦਂ ਫਲਂ.

‘‘ਇਮਸ੍ਮਿਂਯੇਵ ਕਪ੍ਪਮ੍ਹਿ, ਯਂ ਬੁਦ੍ਧਮਭਿਪੂਜਯਿਂ;

ਦੁਗ੍ਗਤਿਂ ਨਾਭਿਜਾਨਾਮਿ, ਬੁਦ੍ਧਪੂਜਾਯਿਦਂ ਫਲਂ.

‘‘ਕਿਲੇਸਾ ਝਾਪਿਤਾ ਮਯ੍ਹਂ…ਪੇ… ਕਤਂ ਬੁਦ੍ਧਸ੍ਸ ਸਾਸਨ’’ਨ੍ਤਿ.

ਅਰਹਤ੍ਤਂ ਪਨ ਪਤ੍ਵਾਪਿ ਥੇਰੋ ਅਤ੍ਤਨੋ ਪੁਰਿਮੁਪ੍ਪਨ੍ਨਂ ਅਨਿਚ੍ਚਤਾਮਨਸਿਕਾਰਂ ਵਿਭਾਵੇਨ੍ਤੋ ਤਮੇਵ ਗਾਥਂ ਪਚ੍ਚੁਦਾਹਾਸਿ. ਤੇਨੇਤਂ ਇਮਸ੍ਸ ਥੇਰਸ੍ਸ ਅਞ੍ਞਾਬ੍ਯਾਕਰਣਮ੍ਪਿ ਅਹੋਸਿ.

ਕਿਮਿਲਤ੍ਥੇਰਗਾਥਾਵਣ੍ਣਨਾ ਨਿਟ੍ਠਿਤਾ.