੫. ਚਕ੍ਖੁਪਾਲਤ੍ਥੇਰਗਾਥਾਵਣ੍ਣਨਾ

ਅਨ੍ਧੋਹਂ ਹਤਨੇਤ੍ਤੋਸ੍ਮੀਤਿ ਆਯਸ੍ਮਤੋ ਚਕ੍ਖੁਪਾਲਤ੍ਥੇਰਸ੍ਸ ਗਾਥਾ. ਕਾ ਉਪ੍ਪਤ੍ਤਿ? ਸੋਪਿ ਪੁਰਿਮਬੁਦ੍ਧੇਸੁ ਕਤਾਧਿਕਾਰੋ ਤਤ੍ਥ ਤਤ੍ਥ ਭਵੇ ਪੁਞ੍ਞਾਨਿ ਕਰੋਨ੍ਤੋ ਸਿਦ੍ਧਤ੍ਥਸ੍ਸ ਭਗਵਤੋ ਕਾਲੇ ਕੁਲਗੇਹੇ ਨਿਬ੍ਬਤ੍ਤਿਤ੍ਵਾ ਵਿਞ੍ਞੁਤਂ ਪਤ੍ਤੋ ਭਗਵਤਿ ਪਰਿਨਿਬ੍ਬੁਤੇ ਥੂਪਮਹੇ ਕਯਿਰਮਾਨੇ ਉਮਾਪੁਪ੍ਫਂ ਗਹੇਤ੍ਵਾ ਥੂਪਂ ਪੂਜੇਸਿ. ਸੋ ਤੇਨ ਪੁਞ੍ਞਕਮ੍ਮੇਨ ਦੇਵਲੋਕੇ ਨਿਬ੍ਬਤ੍ਤਿਤ੍ਵਾ ਅਪਰਾਪਰਂ ਪੁਞ੍ਞਾਨਿ ਕਤ੍ਵਾ ਦੇਵਮਨੁਸ੍ਸੇਸੁ ਸਂਸਰਨ੍ਤੋ ਇਮਸ੍ਮਿਂ ਬੁਦ੍ਧੁਪ੍ਪਾਦੇ ਸਾਵਤ੍ਥਿਯਂ ਮਹਾਸੁਵਣ੍ਣਸ੍ਸ ਨਾਮ ਕੁਟੁਮ੍ਬਿਕਸ੍ਸ ਪੁਤ੍ਤੋ ਹੁਤ੍ਵਾ ਨਿਬ੍ਬਤ੍ਤਿ, ਤਸ੍ਸ ਪਾਲੋਤਿ ਨਾਮਮਕਂਸੁ. ਮਾਤਾ ਤਸ੍ਸ ਆਧਾਵਿਤ੍ਵਾ ਪਰਿਧਾਵਿਤ੍ਵਾ ਵਿਚਰਣਕਾਲੇ ਅਞ੍ਞਂ ਪੁਤ੍ਤਂ ਲਭਿ. ਤਸ੍ਸ ਮਾਤਾਪਿਤਰੋ ਚੂਲ਼ਪਾਲੋਤਿ ਨਾਮਂ ਕਤ੍ਵਾ ਇਤਰਂ ਮਹਾਪਾਲੋਤਿ ਵੋਹਰਿਂਸੁ. ਅਥ ਤੇ ਵਯਪ੍ਪਤ੍ਤੇ ਘਰਬਨ੍ਧਨੇਨ ਬਨ੍ਧਿਂਸੁ. ਤਸ੍ਮਿਂ ਸਮਯੇ ਸਤ੍ਥਾ ਸਾਵਤ੍ਥਿਯਂ ਵਿਹਰਤਿ ਜੇਤਵਨੇ. ਤਤ੍ਥ ਮਹਾਪਾਲੋ ਜੇਤਵਨਂ ਗਚ੍ਛਨ੍ਤੇਹਿ ਉਪਾਸਕੇਹਿ ਸਦ੍ਧਿਂ ਵਿਹਾਰਂ ਗਨ੍ਤ੍ਵਾ ਸਤ੍ਥੁ ਸਨ੍ਤਿਕੇ ਧਮ੍ਮਂ ਸੁਤ੍ਵਾ ਪਟਿਲਦ੍ਧਸਦ੍ਧੋ ਕੁਟੁਮ੍ਬਭਾਰਂ ਕਨਿਟ੍ਠਭਾਤਿਕਸ੍ਸੇਵ ਭਾਰਂ ਕਤ੍ਵਾ ਸਯਂ ਪਬ੍ਬਜਿਤ੍ਵਾ ਲਦ੍ਧੂਪਸਮ੍ਪਦੋ ਆਚਰਿਯੁਪਜ੍ਝਾਯਾਨਂ ਸਨ੍ਤਿਕੇ ਪਞ੍ਚਵਸ੍ਸਾਨਿ ਵਸਿਤ੍ਵਾ ਵੁਟ੍ਠਵਸ੍ਸੋ ਪਵਾਰੇਤ੍ਵਾ ਸਤ੍ਥੁ ਸਨ੍ਤਿਕੇ ਕਮ੍ਮਟ੍ਠਾਨਂ ਗਹੇਤ੍ਵਾ ਸਟ੍ਠਿਮਤ੍ਤੇ ਸਹਾਯਭਿਕ੍ਖੂ ਲਭਿਤ੍ਵਾ ਤੇਹਿ ਸਦ੍ਧਿਂ ਭਾਵਨਾਨੁਕੂਲਂ ਵਸਨਟ੍ਠਾਨਂ ਪਰਿਯੇਸਨ੍ਤੋ ਅਞ੍ਞਤਰਂ ਪਚ੍ਚਨ੍ਤਗਾਮਂ ਨਿਸ੍ਸਾਯ ਗਾਮਵਾਸਿਕੇਹਿ ਉਪਾਸਕੇਹਿ ਕਾਰੇਤ੍ਵਾ ਦਿਨ੍ਨਾਯ ਅਰਞ੍ਞਾਯਤਨੇ ਪਣ੍ਣਸਾਲਾਯ ਵਸਨ੍ਤੋ ਸਮਣਧਮ੍ਮਂ ਕਰੋਤਿ. ਤਸ੍ਸ ਅਕ੍ਖਿਰੋਗੋ ਉਪ੍ਪਨ੍ਨੋ. ਵੇਜ੍ਜੋ ਭੇਸਜ੍ਜਂ ਸਮ੍ਪਾਦੇਤ੍ਵਾ ਅਦਾਸਿ. ਸੋ ਵੇਜ੍ਜੇਨ ਵੁਤ੍ਤਵਿਧਾਨਂ ਨ ਪਟਿਪਜ੍ਜਿ. ਤੇਨਸ੍ਸ ਰੋਗੋ ਵਡ੍ਢਿ. ਸੋ ‘‘ਅਕ੍ਖਿਰੋਗਵੂਪਸਮਨਤੋ ਕਿਲੇਸਰੋਗਵੂਪਸਮਨਮੇਵ ਮਯ੍ਹਂ ਵਰ’’ਨ੍ਤਿ ਅਕ੍ਖਿਰੋਗਂ ਅਜ੍ਝੁਪੇਕ੍ਖਿਤ੍ਵਾ ਵਿਪਸ੍ਸਨਾਯਯੇਵ ਯੁਤ੍ਤਪ੍ਪਯੁਤ੍ਤੋ ਅਹੋਸਿ. ਤਸ੍ਸ ਭਾਵਨਂ ਉਸ੍ਸੁਕ੍ਕਾਪੇਨ੍ਤਸ੍ਸ ਅਪੁਬ੍ਬਂ ਅਚਰਿਮਂ ਅਕ੍ਖੀਨਿ ਚੇਵ ਕਿਲੇਸਾ ਚ ਭਿਜ੍ਜਿਂਸੁ. ਸੋ ਸੁਕ੍ਖਵਿਪਸ੍ਸਕੋ ਅਰਹਾ ਅਹੋਸਿ. ਤੇਨ ਵੁਤ੍ਤਂ ਅਪਦਾਨੇ (ਅਪ. ਥੇਰ ੧.੧੫.੨੧-੨੫) –

‘‘ਨਿਬ੍ਬੁਤੇ ਲੋਕਮਹਿਤੇ, ਆਹੁਤੀਨਂ ਪਟਿਗ੍ਗਹੇ;

ਸਿਦ੍ਧਤ੍ਥਮ੍ਹਿ ਭਗਵਤਿ, ਮਹਾਥੂਪਮਹੋ ਅਹੁ.

‘‘ਮਹੇ ਪਵਤ੍ਤਮਾਨਮ੍ਹਿ, ਸਿਦ੍ਧਤ੍ਥਸ੍ਸ ਮਹੇਸਿਨੋ;

ਉਮਾਪੁਪ੍ਫਂ ਗਹੇਤ੍ਵਾਨ, ਥੂਪਮ੍ਹਿ ਅਭਿਰੋਪਯਿਂ.

‘‘ਚਤੁਨ੍ਨਵੁਤਿਤੋ ਕਪ੍ਪੇ, ਯਂ ਪੁਪ੍ਫਮਭਿਰੋਪਯਿਂ;

ਦੁਗ੍ਗਤਿਂ ਨਾਭਿਜਾਨਾਮਿ, ਥੂਪਪੂਜਾਯਿਦਂ ਫਲਂ.

‘‘ਇਤੋ ਚ ਨਵਮੇ ਕਪ੍ਪੇ, ਸੋਮਦੇਵਸਨਾਮਕਾ;

ਪਞ੍ਚਾਸੀਤਿਸੁ ਰਾਜਾਨੋ, ਚਕ੍ਕਵਤ੍ਤੀ ਮਹਬ੍ਬਲਾ.

‘‘ਕਿਲੇਸਾ ਝਾਪਿਤਾ ਮਯ੍ਹਂ…ਪੇ… ਕਤਂ ਬੁਦ੍ਧਸ੍ਸ ਸਾਸਨ’’ਨ੍ਤਿ.

ਅਥ ਥੇਰੇ ਅਕ੍ਖਿਰੋਗੇਨ ਵਿਹਾਰੇ ਓਹੀਨੇ ਗਾਮਂ ਪਿਣ੍ਡਾਯ ਗਤੇ ਭਿਕ੍ਖੂ ਦਿਸ੍ਵਾ ਉਪਾਸਕਾ ‘‘ਕਸ੍ਮਾ ਥੇਰੋ ਨਾਗਤੋ’’ਤਿ ਪੁਚ੍ਛਿਤ੍ਵਾ ਤਮਤ੍ਥਂ ਸੁਤ੍ਵਾ ਸੋਕਾਭਿਭੂਤਾ ਪਿਣ੍ਡਪਾਤਂ ਉਪਨੇਤ੍ਵਾ, ‘‘ਭਨ੍ਤੇ, ਕਿਞ੍ਚਿ ਮਾ ਚਿਨ੍ਤਯਿਤ੍ਥ, ਇਦਾਨਿ ਮਯਮੇਵ ਪਿਣ੍ਡਪਾਤਂ ਆਨੇਤ੍ਵਾ ਉਪਟ੍ਠਹਿਸ੍ਸਾਮਾ’’ਤਿ ਤਥਾ ਕਰੋਨ੍ਤਿ. ਭਿਕ੍ਖੂ ਥੇਰਸ੍ਸ ਓਵਾਦੇ ਠਤ੍ਵਾ ਨਚਿਰਸ੍ਸੇਵ ਅਰਹਤ੍ਤਂ ਪਤ੍ਵਾ ਵੁਟ੍ਠਵਸ੍ਸਾ ਪਵਾਰੇਤ੍ਵਾ, ‘‘ਸਤ੍ਥਾਰਂ ਵਨ੍ਦਿਤੁਂ ਸਾਵਤ੍ਥਿਂ ਗਮਿਸ੍ਸਾਮ, ਭਨ੍ਤੇ’’ਤਿ ਆਹਂਸੁ. ਥੇਰੋ, ‘‘ਅਹਂ ਦੁਬ੍ਬਲੋ ਅਚਕ੍ਖੁਕੋ, ਮਗ੍ਗੋ ਚ ਸਉਪਦ੍ਦਵੋ, ਮਯਾ ਸਦ੍ਧਿਂ ਗਚ੍ਛਨ੍ਤਾਨਂ ਤੁਮ੍ਹਾਕਂ ਪਰਿਸ੍ਸਯੋ ਭਵਿਸ੍ਸਤਿ, ਤੁਮ੍ਹੇ ਪਠਮਂ ਗਚ੍ਛਥ, ਗਨ੍ਤ੍ਵਾ ਸਤ੍ਥਾਰਂ ਮਹਾਥੇਰੇ ਚ ਮਮ ਵਨ੍ਦਨਾਯ ਵਨ੍ਦਥ, ਚੂਲ਼ਪਾਲਸ੍ਸ ਮਮ ਪਵਤ੍ਤਿਂ ਕਥੇਤ੍ਵਾ ਕਞ੍ਚਿ ਪੁਰਿਸਂ ਪੇਸੇਯ੍ਯਾਥਾ’’ਤਿ ਆਹ. ਤੇ ਪੁਨਪਿ ਯਾਚਿਤ੍ਵਾ ਗਮਨਂ ਅਲਭਨ੍ਤਾ ‘‘ਸਾਧੂ’’ਤਿ ਪਟਿਸ੍ਸੁਣਿਤ੍ਵਾ ਸੇਨਾਸਨਂ ਸਂਸਾਮੇਤ੍ਵਾ ਉਪਾਸਕੇ ਆਪੁਚ੍ਛਿਤ੍ਵਾ ਅਨੁਕ੍ਕਮੇਨ ਜੇਤਵਨਂ ਗਨ੍ਤ੍ਵਾ ਸਤ੍ਥਾਰਂ ਮਹਾਥੇਰੇ ਚ ਤਸ੍ਸ ਵਨ੍ਦਨਾਯ ਵਨ੍ਦਿਤ੍ਵਾ ਦੁਤਿਯਦਿਵਸੇ ਸਾਵਤ੍ਥਿਯਂ ਪਿਣ੍ਡਾਯ ਚਰਿਤ੍ਵਾ ਚੂਲ਼ਪਾਲਸ੍ਸ ਤਂ ਪਵਤ੍ਤਿਂ ਵਤ੍ਵਾ ਤੇਨ ‘‘ਅਯਂ, ਭਨ੍ਤੇ, ਮਯ੍ਹਂ ਭਾਗਿਨੇਯ੍ਯੋ ਪਾਲਿਤੋ ਨਾਮ, ਇਮਂ ਪੇਸਿਸ੍ਸਾਮੀ’’ਤਿ ਵੁਤ੍ਤੇ, ‘‘ਮਗ੍ਗੋ ਸਪਰਿਸ੍ਸਯੋ, ਨ ਸਕ੍ਕਾ ਏਕੇਨ ਗਹਟ੍ਠੇਨ ਗਨ੍ਤੁਂ, ਤਸ੍ਮਾ ਪਬ੍ਬਾਜੇਤਬ੍ਬੋ’’ਤਿ ਤਂ ਪਬ੍ਬਾਜੇਤ੍ਵਾ ਪੇਸੇਸੁਂ. ਸੋ ਅਨੁਕ੍ਕਮੇਨ ਥੇਰਸ੍ਸ ਸਨ੍ਤਿਕਂ ਗਨ੍ਤ੍ਵਾ ਅਤ੍ਤਾਨਂ ਤਸ੍ਸ ਓਰੋਚੇਤ੍ਵਾ ਤਂ ਗਹੇਤ੍ਵਾ ਆਗਚ੍ਛਨ੍ਤੋ ਅਨ੍ਤਰਾਮਗ੍ਗੇ ਅਞ੍ਞਤਰਸ੍ਸ ਗਾਮਸ੍ਸ ਸਾਮਨ੍ਤਾ ਅਰਞ੍ਞਟ੍ਠਾਨੇ ਏਕਿਸ੍ਸਾ ਕਟ੍ਠਹਾਰਿਯਾ ਗਾਯਨ੍ਤਿਯਾ ਸਦ੍ਦਂ ਸੁਤ੍ਵਾ ਪਟਿਬਦ੍ਧਚਿਤ੍ਤੋ ਹੁਤ੍ਵਾ ਯਟ੍ਠਿਕੋਟਿਂ ਵਿਸ੍ਸਜ੍ਜੇਤ੍ਵਾ ‘‘ਤਿਟ੍ਠਥ, ਭਨ੍ਤੇ, ਮੁਹੁਤ੍ਤਂ ਯਾਵਾਹਂ ਆਗਚ੍ਛਾਮੀ’’ਤਿ ਵਤ੍ਵਾ ਤਸ੍ਸਾ ਸਨ੍ਤਿਕਂ ਗਨ੍ਤ੍ਵਾ ਤਤ੍ਥ ਸੀਲਵਿਪਤ੍ਤਿਂ ਪਾਪੁਣਿ. ਥੇਰੋ ਇਦਾਨਿਮੇਵ ਇਤ੍ਥਿਯਾ ਗੀਤਸਦ੍ਦੋ ਸੁਤੋ, ਸਾਮਣੇਰੋ ਚ ਚਿਰਾਯਤਿ, ਨੂਨ ਸੀਲਵਿਪਤ੍ਤਿਂ ਪਤ੍ਤੋ ਭਵਿਸ੍ਸਤੀ’’ਤਿ ਚਿਨ੍ਤੇਸਿ. ਸੋਪਿ ਆਗਨ੍ਤ੍ਵਾ ‘‘ਗਚ੍ਛਾਮ, ਭਨ੍ਤੇ’’ਤਿ ਆਹ. ਥੇਰੋ ‘‘ਕਿਂ ਪਾਪੋ ਜਾਤੋਸੀ’’ਤਿ ਪੁਚ੍ਛਿ. ਸਾਮਣੇਰੋ ਤੁਣ੍ਹੀ ਹੁਤ੍ਵਾ ਪੁਨ ਪੁਚ੍ਛਿਤੋਪਿ ਨ ਕਥੇਸਿ. ਥੇਰੋ ‘‘ਤਾਦਿਸੇਨ ਪਾਪੇਨ ਮਯ੍ਹਂ ਯਟ੍ਠਿਗਹਣਕਿਚ੍ਚਂ ਨਤ੍ਥਿ, ਗਚ੍ਛ ਤ੍ਵ’’ਨ੍ਤਿ ਵਤ੍ਵਾ ਪੁਨ ਤੇਨ ‘‘ਬਹੁਪਰਿਸ੍ਸਯੋ ਮਗ੍ਗੋ, ਤੁਮ੍ਹੇ ਚ ਅਨ੍ਧਾ, ਕਥਂ ਗਮਿਸ੍ਸਥਾ’’ਤਿ ਵੁਤ੍ਤੇ ‘‘ਬਾਲ ਇਧੇਵ ਮੇ ਨਿਪਜ੍ਜਿਤ੍ਵਾ ਮਰਨ੍ਤਸ੍ਸਾਪਿ ਅਪਰਾਪਰਂ ਪਰਿਵਤ੍ਤੇਨ੍ਤਸ੍ਸਾਪਿ ਤਾਦਿਸੇਨ ਗਮਨਂ ਨਾਮ ਨਤ੍ਥੀ’’ਤਿ ਇਮਮਤ੍ਥਂ ਦਸ੍ਸੇਨ੍ਤੋ –

੯੫. ‘‘ਅਨ੍ਧੋਹਂ ਹਤਨੇਤ੍ਤੋਸ੍ਮਿ, ਕਨ੍ਤਾਰਦ੍ਧਾਨਪਕ੍ਖਨ੍ਦੋ;

ਸਯਮਾਨੋਪਿ ਗਚ੍ਛਿਸ੍ਸਂ, ਨ ਸਹਾਯੇਨ ਪਾਪੇਨਾ’’ਤਿ. – ਗਾਥਂ ਅਭਾਸਿਤ੍ਥ;

ਤਤ੍ਥ ਅਨ੍ਧੋਤਿ ਚਕ੍ਖੁਵਿਕਲੋ. ਹਤਨੇਤ੍ਤੋਤਿ ਵਿਨਟ੍ਠਚਕ੍ਖੁਕੋ, ਤੇਨ ‘‘ਪਯੋਗਵਿਪਤ੍ਤਿਵਸੇਨਾਹਂ ਉਪਹਤਨੇਤ੍ਤਤਾਯ ਅਨ੍ਧੋ, ਨ ਜਚ੍ਚਨ੍ਧਭਾਵੇਨਾ’’ਤਿ ਯਥਾਵੁਤ੍ਤਂ ਅਨ੍ਧਭਾਵਂ ਵਿਸੇਸੇਤਿ. ਅਥ ਵਾ ‘‘ਅਨ੍ਧੋ’’ਤਿ ਇਦਂ ‘‘ਅਨ੍ਧੇ ਜਿਣ੍ਣੇ ਮਾਤਾਪਿਤਰੋ ਪੋਸੇਤੀ’’ਤਿਆਦੀਸੁ (ਮ. ਨਿ. ੨.੨੮੮) ਵਿਯ ਮਂਸਚਕ੍ਖੁਵੇਕਲ੍ਲਦੀਪਨਂ, ‘‘ਸਬ੍ਬੇਪਿਮੇ ਪਰਿਬ੍ਬਾਜਕਾ ਅਨ੍ਧਾ ਅਚਕ੍ਖੁਕਾ’’ (ਉਦਾ. ੫੪) ‘‘ਅਨ੍ਧੋ ਏਕਚਕ੍ਖੁ ਦ੍ਵਿਚਕ੍ਖੂ’’ਤਿਆਦੀਸੁ (ਅ. ਨਿ. ੩.੨੯) ਵਿਯ ਨ ਪਞ੍ਞਾਚਕ੍ਖੁਵੇਕਲ੍ਲਦੀਪਨਨ੍ਤਿ ਦਸ੍ਸੇਤੁਂ ‘‘ਹਤਨੇਤ੍ਤੋਸ੍ਮੀ’’ਤਿ ਵੁਤ੍ਤਂ, ਤੇਨ ਮੁਖ੍ਯਮੇਵ ਅਨ੍ਧਭਾਵਂ ਦਸ੍ਸੇਤਿ. ਕਨ੍ਤਾਰਦ੍ਧਾਨਪਕ੍ਖਨ੍ਦੋਤਿ ਕਨ੍ਤਾਰੇ ਵਿਵਨੇ ਦੀਘਮਗ੍ਗਂ ਅਨੁਪਵਿਟ੍ਠੋ, ਨ ਜਾਤਿਕਨ੍ਤਾਰਾਦਿਗਹਨਂ ਸਂਸਾਰਦ੍ਧਾਨਂ ਪਟਿਪਨ੍ਨੋਤਿ ਅਧਿਪ੍ਪਾਯੋ. ਤਾਦਿਸਞ੍ਹਿ ਕਨ੍ਤਾਰਦ੍ਧਾਨਂ ਅਯਂ ਥੇਰੋ ਸਮਤਿਕ੍ਕਮਿਤ੍ਵਾ ਠਿਤੋ, ਸਯਮਾਨੋਪੀਤਿ ਸਯਨ੍ਤੋਪਿ, ਪਾਦੇਸੁ ਅਵਹਨ੍ਤੇਸੁ ਉਰੇਨ ਜਣ੍ਣੁਕਾਹਿ ਚ ਭੂਮਿਯਂ ਸਂਸਰਨ੍ਤੋ ਪਰਿਵਤ੍ਤੇਨ੍ਤੋਪਿ ਗਚ੍ਛੇਯ੍ਯਂ. ਨ ਸਹਾਯੇਨ ਪਾਪੇਨਾਤਿ ਤਾਦਿਸੇਨ ਪਾਪਪੁਗ੍ਗਲੇਨ ਸਹਾਯਭੂਤੇਨ ਸਦ੍ਧਿਂ ਨ ਗਚ੍ਛਿਸ੍ਸਨ੍ਤਿ ਯੋਜਨਾ. ਤਂ ਸੁਤ੍ਵਾ ਇਤਰੋ ਸਂਵੇਗਜਾਤੋ ‘‘ਭਾਰਿਯਂ ਵਤ ਮਯਾ ਸਾਹਸਿਕਕਮ੍ਮਂ ਕਤ’’ਨ੍ਤਿ ਬਾਹਾ ਪਗ੍ਗਯ੍ਹ ਕਨ੍ਦਨ੍ਤੋ ਵਨਸਣ੍ਡਂ ਪਕ੍ਖਨ੍ਦੋ ਚ ਅਹੋਸਿ. ਅਥ ਥੇਰਸ੍ਸ ਸੀਲਤੇਜੇਨ ਪਣ੍ਡੁਕਮ੍ਬਲਸਿਲਾਸਨਂ ਉਣ੍ਹਾਕਾਰਂ ਦਸ੍ਸੇਸਿ. ਤੇਨ ਸਕ੍ਕੋ ਤਂ ਕਾਰਣਂ ਞਤ੍ਵਾ ਥੇਰਸ੍ਸ ਸਨ੍ਤਿਕਂ ਗਨ੍ਤ੍ਵਾ ਸਾਵਤ੍ਥਿਗਾਮਿਪੁਰਿਸਂ ਵਿਯ ਅਤ੍ਤਾਨਂ ਞਾਪੇਤ੍ਵਾ ਯਟ੍ਠਿਕੋਟਿਂ ਗਣ੍ਹਨ੍ਤੋ ਮਗ੍ਗਂ ਸਙ੍ਖਿਪਿਤ੍ਵਾ ਤਦਹੇਵ ਸਾਯਨ੍ਹੇ ਸਾਵਤ੍ਥਿਯਂ ਥੇਰਂ ਨੇਤ੍ਵਾ ਤਤ੍ਥ ਜੇਤਵਨੇ ਚੂਲ਼ਪਾਲਿਤੇਨ ਕਾਰਿਤਾਯ ਪਣ੍ਣਸਾਲਾਯ ਫਲਕੇ ਨਿਸੀਦਾਪੇਤ੍ਵਾ ਤਸ੍ਸ ਸਹਾਯਵਣ੍ਣੇਨ ਥੇਰਸ੍ਸ ਆਗਤਭਾਵਂ ਜਾਨਾਪੇਤ੍ਵਾ ਪਕ੍ਕਾਮਿ; ਚੂਲ਼ਪਾਲਿਤੋਪਿ ਤਂ ਯਾਵਜੀਵਂ ਸਕ੍ਕਚ੍ਚਂ ਉਪਟ੍ਠਾਸੀਤਿ.

ਚਕ੍ਖੁਪਾਲਤ੍ਥੇਰਗਾਥਾਵਣ੍ਣਨਾ ਨਿਟ੍ਠਿਤਾ.