੪. ਮੇਤ੍ਤਜਿਤ੍ਥੇਰਗਾਥਾਵਣ੍ਣਨਾ

ਨਮੋ ਹਿ ਤਸ੍ਸ ਭਗਵਤੋਤਿ ਆਯਸ੍ਮਤੋ ਮੇਤ੍ਤਜਿਤ੍ਥੇਰਸ੍ਸ ਗਾਥਾ. ਕਾ ਉਪ੍ਪਤ੍ਤਿ? ਸੋ ਕਿਰ ਅਨੋਮਦਸ੍ਸਿਸ੍ਸ ਭਗਵਤੋ ਕਾਲੇ ਕੁਲਗੇਹੇ ਨਿਬ੍ਬਤ੍ਤਿਤ੍ਵਾ ਵਿਞ੍ਞੁਤਂ ਪਤ੍ਤੋ ਸਾਸਨੇ ਅਭਿਪ੍ਪਸਨ੍ਨੋ ਹੁਤ੍ਵਾ ਬੋਧਿਰੁਕ੍ਖਸ੍ਸ ਇਟ੍ਠਕਾਹਿ ਵੇਦਿਕਂ ਚਿਨਿਤ੍ਵਾ ਸੁਧਾਪਰਿਕਮ੍ਮਂ ਕਾਰੇਸਿ. ਸਤ੍ਥਾ ਤਸ੍ਸ ਅਨੁਮੋਦਨਂ ਅਕਾਸਿ. ਸੋ ਤੇਨ ਪੁਞ੍ਞਕਮ੍ਮੇਨ ਦੇਵਲੋਕੇ ਨਿਬ੍ਬਤ੍ਤਿਤ੍ਵਾ ਅਪਰਾਪਰਂ ਪੁਞ੍ਞਾਨਿ ਕਤ੍ਵਾ ਦੇਵਮਨੁਸ੍ਸੇਸੁ ਸਂਸਰਨ੍ਤੋ ਇਮਸ੍ਮਿਂ ਬੁਦ੍ਧੁਪ੍ਪਾਦੇ ਮਗਧਰਟ੍ਠੇ ਅਞ੍ਞਤਰਸ੍ਸ ਬ੍ਰਾਹ੍ਮਣਸ੍ਸ ਪੁਤ੍ਤੋ ਹੁਤ੍ਵਾ ਨਿਬ੍ਬਤ੍ਤਿ, ਮੇਤ੍ਤਜੀਤਿਸ੍ਸ ਨਾਮਂ ਅਹੋਸਿ. ਸੋ ਵਯਪ੍ਪਤ੍ਤੋ ਕਾਮੇਸੁ ਆਦੀਨਵਂ ਦਿਸ੍ਵਾ ਤਾਪਸਪਬ੍ਬਜ੍ਜਂ ਪਬ੍ਬਜਿਤ੍ਵਾ ਅਰਞ੍ਞੇ ਵਿਹਰਨ੍ਤੋ ਬੁਦ੍ਧੁਪ੍ਪਾਦਂ ਸੁਤ੍ਵਾ ਪੁਬ੍ਬਹੇਤੁਨਾ ਚੋਦਿਯਮਾਨੋ ਸਤ੍ਥੁ ਸਨ੍ਤਿਕਂ ਗਨ੍ਤ੍ਵਾ ਪਵਤ੍ਤਿਨਿਵਤ੍ਤਿਯੋ ਆਰਬ੍ਭ ਪਞ੍ਹਂ ਪੁਚ੍ਛਿਤ੍ਵਾ ਸਤ੍ਥਾਰਾ ਪਞ੍ਹੇ ਵਿਸ੍ਸਜ੍ਜਿਤੇ ਪਟਿਲਦ੍ਧਸਦ੍ਧੋ ਪਬ੍ਬਜਿਤ੍ਵਾ ਵਿਪਸ੍ਸਨਂ ਪਟ੍ਠਪੇਤ੍ਵਾ ਅਰਹਤ੍ਤਂ ਪਾਪੁਣਿ. ਤੇਨ ਵੁਤ੍ਤਂ ਅਪਦਾਨੇ (ਅਪ. ਥੇਰ ੧.੧੫.੨੬-੩੧) –

‘‘ਅਨੋਮਦਸ੍ਸੀਮੁਨਿਨੋ, ਬੋਧਿਵੇਦਿਮਕਾਸਹਂ;

ਸੁਧਾਯ ਪਿਣ੍ਡਂ ਦਤ੍ਵਾਨ, ਪਾਣਿਕਮ੍ਮਂ ਅਕਾਸਹਂ.

‘‘ਦਿਸ੍ਵਾ ਤਂ ਸੁਕਤਂ ਕਮ੍ਮਂ, ਅਨੋਮਦਸ੍ਸੀ ਨਰੁਤ੍ਤਮੋ;

ਭਿਕ੍ਖੁਸਙ੍ਘੇ ਠਿਤੋ ਸਤ੍ਥਾ, ਇਮਾ ਗਾਥਾ ਅਭਾਸਥ.

‘‘ਇਮਿਨਾ ਸੁਧਕਮ੍ਮੇਨ, ਚੇਤਨਾਪਣਿਧੀਹਿ ਚ;

ਸਮ੍ਪਤ੍ਤਿਂ ਅਨੁਭੋਤ੍ਵਾਨ, ਦੁਕ੍ਖਸ੍ਸਨ੍ਤਂ ਕਰਿਸ੍ਸਤਿ.

‘‘ਪਸਨ੍ਨਮੁਖਵਣ੍ਣੋਮ੍ਹਿ, ਏਕਗ੍ਗੋ ਸੁਸਮਾਹਿਤੋ;

ਧਾਰੇਮਿ ਅਨ੍ਤਿਮਂ ਦੇਹਂ, ਸਮ੍ਮਾਸਮ੍ਬੁਦ੍ਧਸਾਸਨੇ.

‘‘ਇਤੋ ਕਪ੍ਪਸਤੇ ਆਸਿਂ, ਪਰਿਪੁਣ੍ਣੇ ਅਨੂਨਕੇ;

ਰਾਜਾ ਸਬ੍ਬਘਨੋ ਨਾਮ, ਚਕ੍ਕਵਤ੍ਤੀ ਮਹਬ੍ਬਲੋ.

‘‘ਕਿਲੇਸਾ ਝਾਪਿਤਾ ਮਯ੍ਹਂ…ਪੇ… ਕਤਂ ਬੁਦ੍ਧਸ੍ਸ ਸਾਸਨ’’ਨ੍ਤਿ.

ਅਰਹਤ੍ਤਂ ਪਨ ਪਤ੍ਵਾ ਸਤ੍ਥਾਰਂ ਥੋਮੇਨ੍ਤੋ –

੯੪. ‘‘ਨਮੋ ਹਿ ਤਸ੍ਸ ਭਗਵਤੋ, ਸਕ੍ਯਪੁਤ੍ਤਸ੍ਸ ਸਿਰੀਮਤੋ;

ਤੇਨਾਯਂ ਅਗ੍ਗਪ੍ਪਤ੍ਤੇਨ, ਅਗ੍ਗਧਮ੍ਮੋ ਸੁਦੇਸਿਤੋ’’ਤਿ. – ਗਾਥਂ ਅਭਾਸਿ;

ਤਤ੍ਥ ਨਮੋਤਿ ਨਮਕ੍ਕਾਰੋ. ਹੀਤਿ ਨਿਪਾਤਮਤ੍ਤਂ. ਤਸ੍ਸਾਤਿ ਯੋ ਸੋ ਭਗਵਾ ਸਮਤ੍ਤਿਂਸਪਾਰਮਿਯੋ ਪੂਰੇਤ੍ਵਾ ਸਬ੍ਬਕਿਲੇਸੇ ਭਞ੍ਜਿਤ੍ਵਾ ਅਨੁਤ੍ਤਰਂ ਸਮ੍ਮਾਸਮ੍ਬੋਧਿਂ ਅਭਿਸਮ੍ਬੁਦ੍ਧੋ, ਸਕ੍ਯਰਾਜਸ੍ਸ ਪੁਤ੍ਤੋਤਿ ਸਕ੍ਯਪੁਤ੍ਤੋ. ਅਨਞ੍ਞਸਾਧਾਰਣਾਯ ਪੁਞ੍ਞਸਮ੍ਪਤ੍ਤਿਯਾ ਚ ਸਮ੍ਭਾਵਿਤੋ ਉਤ੍ਤਮਾਯ ਰੂਪਕਾਯਸਿਰਿਯਾ ਧਮ੍ਮਕਾਯਸਿਰਿਯਾ ਚ ਸਮਨ੍ਨਾਗਤਤ੍ਤਾ ਸਿਰੀਮਾ, ਤਸ੍ਸ ਭਗਵਤੋ ਸਕ੍ਯਪੁਤ੍ਤਸ੍ਸ ਸਿਰੀਮਤੋ ਨਮੋ ਅਤ੍ਥੁ, ਤਂ ਨਮਾਮੀਤਿ ਅਤ੍ਥੋ. ਤੇਨਾਤਿ ਤੇਨ ਭਗਵਤਾ. ਅਯਨ੍ਤਿ ਤਸ੍ਸ ਧਮ੍ਮਸ੍ਸ ਅਤ੍ਤਨੋ ਪਚ੍ਚਕ੍ਖਤਾਯ ਵਦਤਿ. ਅਗ੍ਗਪ੍ਪਤ੍ਤੇਨਾਤਿ ਅਗ੍ਗਂ ਸਬ੍ਬਞ੍ਞੁਤਂ, ਸਬ੍ਬੇਹਿ ਵਾ ਗੁਣੇਹਿ ਅਗ੍ਗਭਾਵਂ ਸੇਟ੍ਠਭਾਵਂ ਪਤ੍ਤੇਨ. ਅਗ੍ਗਧਮ੍ਮੋਤਿ ਅਗ੍ਗੋ ਉਤ੍ਤਮੋ ਨਵਵਿਧਲੋਕੁਤ੍ਤਰੋ ਧਮ੍ਮੋ ਸੁਟ੍ਠੁ ਅਵਿਪਰੀਤਂ ਦੇਸਿਤੋ ਪਵੇਦਿਤੋਤਿ.

ਮੇਤ੍ਤਜਿਤ੍ਥੇਰਗਾਥਾਵਣ੍ਣਨਾ ਨਿਟ੍ਠਿਤਾ.