੯. ਕੂਟਵਿਨਿਚ੍ਛਯਿਕਪੇਤਵਤ੍ਥੁਵਣ੍ਣਨਾ

ਮਾਲੀ ਕਿਰਿਟੀ ਕਾਯੂਰੀਤਿ ਇਦਂ ਸਤ੍ਥਰਿ ਵੇਲ਼ੁਵਨੇ ਵਿਹਰਨ੍ਤੇ ਕੂਟਵਿਨਿਚ੍ਛਯਿਕਪੇਤਂ ਆਰਬ੍ਭ ਵੁਤ੍ਤਂ. ਤਦਾ ਬਿਮ੍ਬਿਸਾਰੋ ਰਾਜਾ ਮਾਸਸ੍ਸ ਛਸੁ ਦਿਵਸੇਸੁ ਉਪੋਸਥਂ ਉਪਵਸਤਿ, ਤਂ ਅਨੁਵਤ੍ਤਨ੍ਤਾ ਬਹੂ ਮਨੁਸ੍ਸਾ ਉਪੋਸਥਂ ਉਪਵਸਨ੍ਤਿ. ਰਾਜਾ ਅਤ੍ਤਨੋ ਸਨ੍ਤਿਕਂ ਆਗਤਾਗਤੇ ਮਨੁਸ੍ਸੇ ਪੁਚ੍ਛਤਿ – ‘‘ਕਿਂ ਤੁਮ੍ਹੇਹਿ ਉਪੋਸਥੋ ਉਪਵੁਤ੍ਥੋ, ਉਦਾਹੁ ਨ ਉਪਵੁਤ੍ਥੋ’’ਤਿ? ਤਤ੍ਰੇਕੋ ਅਧਿਕਰਣੇ ਨਿਯੁਤ੍ਤਕਪੁਰਿਸੋ ਪਿਸੁਣਵਾਚੋ ਨੇਕਤਿਕੋ ਲਞ੍ਜਗਾਹਕੋ ‘‘ਨ ਉਪਵੁਤ੍ਥੋਮ੍ਹੀ’’ਤਿ ਵਤ੍ਤੁਂ ਅਸਹਨ੍ਤੋ ‘‘ਉਪਵੁਤ੍ਥੋਮ੍ਹਿ, ਦੇਵਾ’’ਤਿ ਆਹ. ਅਥ ਨਂ ਰਾਜਸਮੀਪਤੋ ਨਿਕ੍ਖਨ੍ਤਂ ਸਹਾਯੋ ਆਹ – ‘‘ਕਿਂ, ਸਮ੍ਮ, ਅਜ੍ਜ ਤਯਾ ਉਪਵੁਤ੍ਥੋ’’ਤਿ? ‘‘ਭਯੇਨਾਹਂ, ਸਮ੍ਮ, ਰਞ੍ਞੋ ਸਮ੍ਮੁਖਾ ਏਵਂ ਅਵੋਚਂ, ਨਾਹਂ ਉਪੋਸਥਿਕੋ’’ਤਿ.

ਅਥ ਨਂ ਸਹਾਯੋ ਆਹ – ‘‘ਯਦਿ ਏਵਂ ਉਪਡ੍ਢੁਪੋਸਥੋਪਿ ਤਾਵ ਤੇ ਅਜ੍ਜ ਹੋਤੁ, ਉਪੋਸਥਙ੍ਗਾਨਿ ਸਮਾਦਿਯਾਹੀ’’ਤਿ. ਸੋ ਤਸ੍ਸ ਵਚਨਂ ‘‘ਸਾਧੂ’’ਤਿ ਸਮ੍ਪਟਿਚ੍ਛਿਤ੍ਵਾ ਗੇਹਂ ਗਨ੍ਤ੍ਵਾ ਅਭੁਤ੍ਵਾਵ ਮੁਖਂ ਵਿਕ੍ਖਾਲੇਤ੍ਵਾ ਉਪੋਸਥਂ ਅਧਿਟ੍ਠਾਯ ਰਤ੍ਤਿਯਂ ਵਾਸੂਪਗਤੋ ਰਿਤ੍ਤਾਸਯਸਮ੍ਭੂਤੇਨ ਬਲਵਵਾਤਹੇਤੁਕੇਨ ਸੂਲੇਨ ਉਪਚ੍ਛਿਨ੍ਨਾਯੁਸਙ੍ਖਾਰੋ ਚੁਤਿਅਨਨ੍ਤਰਂ ਪਬ੍ਬਤਕੁਚ੍ਛਿਯਂ ਵੇਮਾਨਿਕਪੇਤੋ ਹੁਤ੍ਵਾ ਨਿਬ੍ਬਤ੍ਤਿ. ਸੋ ਹਿ ਏਕਰਤ੍ਤਿਂ ਉਪੋਸਥਰਕ੍ਖਣਮਤ੍ਤੇਨ ਵਿਮਾਨਂ ਪਟਿਲਭਿ ਦਸਕਞ੍ਞਾਸਹਸ੍ਸਪਰਿਵਾਰਂ ਮਹਤਿਞ੍ਚ ਦਿਬ੍ਬਸਮ੍ਪਤ੍ਤਿਂ. ਕੂਟਵਿਨਿਚ੍ਛਯਿਕਤਾਯ ਪਨ ਪੇਸੁਣਿਕਤਾਯ ਚ ਅਤ੍ਤਨੋ ਪਿਟ੍ਠਿਮਂਸਾਨਿ ਸਯਮੇਵ ਓਕ੍ਕਨ੍ਤਿਤ੍ਵਾ ਖਾਦਤਿ. ਤਂ ਆਯਸ੍ਮਾ ਨਾਰਦੋ ਗਿਜ੍ਜਕੂਟਤੋ ਓਤਰਨ੍ਤੋ ਦਿਸ੍ਵਾ –

੪੯੯. ‘‘ਮਾਲੀ ਕਿਰਿਟੀ ਕਾਯੂਰੀ, ਗਤ੍ਤਾ ਤੇ ਚਨ੍ਦਨੁਸ੍ਸਦਾ;

ਪਸਨ੍ਨਮੁਖਵਣ੍ਣੋਸਿ, ਸੂਰਿਯਵਣ੍ਣੋਵ ਸੋਭਸਿ.

੫੦੦. ‘‘ਅਮਾਨੁਸਾ ਪਾਰਿਸਜ੍ਜਾ, ਯੇ ਤੇਮੇ ਪਰਿਚਾਰਕਾ;

ਦਸ ਕਞ੍ਞਾਸਹਸ੍ਸਾਨਿ, ਯਾ ਤੇਮਾ ਪਰਿਚਾਰਿਕਾ;

ਤਾ ਕਮ੍ਬੁਕਾਯੂਰਧਰਾ, ਕਞ੍ਚਨਾਵੇਲ਼ਭੂਸਿਤਾ.

੫੦੧. ‘‘ਮਹਾਨੁਭਾਵੋਸਿ ਤੁਵਂ, ਲੋਮਹਂਸਨਰੂਪਵਾ;

ਪਿਟ੍ਠਿਮਂਸਾਨਿ ਅਤ੍ਤਨੋ, ਸਾਮਂ ਉਕ੍ਕਚ੍ਚ ਖਾਦਸਿ.

੫੦੨. ‘‘ਕਿਂ ਨੁ ਕਾਯੇਨ ਵਾਚਾਯ, ਮਨਸਾ ਦੁਕ੍ਕਟਂ ਕਤਂ;

ਕਿਸ੍ਸਕਮ੍ਮਵਿਪਾਕੇਨ, ਪਿਟ੍ਠਿਮਂਸਾਨਿ ਅਤ੍ਤਨੋ;

ਸਾਮਂ ਉਕ੍ਕਚ੍ਚ ਖਾਦਸੀਤਿ.

੫੦੩. ‘‘ਅਤ੍ਤਨੋਹਂ ਅਨਤ੍ਥਾਯ, ਜੀਵਲੋਕੇ ਅਚਾਰਿਸਂ;

ਪੇਸੁਞ੍ਞਮੁਸਾਵਾਦੇਨ, ਨਿਕਤਿਵਞ੍ਚਨਾਯ ਚ.

੫੦੪. ‘‘ਤਤ੍ਥਾਹਂ ਪਰਿਸਂ ਗਨ੍ਤ੍ਵਾ, ਸਚ੍ਚਕਾਲੇ ਉਪਟ੍ਠਿਤੇ;

ਅਤ੍ਥਂ ਧਮ੍ਮਂ ਨਿਰਾਕਤ੍ਵਾ, ਅਧਮ੍ਮਮਨੁਵਤ੍ਤਿਸਂ.

੫੦੫. ‘‘ਏਵਂ ਸੋ ਖਾਦਤਤ੍ਤਾਨਂ, ਯੋ ਹੋਤਿ ਪਿਟ੍ਠਿਮਂਸਿਕੋ;

ਯਥਾਹਂ ਅਜ੍ਜ ਖਾਦਾਮਿ, ਪਿਟ੍ਠਿਮਂਸਾਨਿ ਅਤ੍ਤਨੋ.

੫੦੬. ‘‘ਤਯਿਦਂ ਤਯਾ ਨਾਰਦ ਸਾਮਂ ਦਿਟ੍ਠਂ, ਅਨੁਕਮ੍ਪਕਾ ਯੇ ਕੁਸਲਾ ਵਦੇਯ੍ਯੁਂ;

ਮਾ ਪੇਸੁਣਂ ਮਾ ਚ ਮੁਸਾ ਅਭਾਣਿ, ਮਾ ਖੋਸਿ ਪਿਟ੍ਠਿਮਂਸਿਕੋ ਤੁਵ’’ਨ੍ਤਿ. –

ਥੇਰੋ ਚਤੂਹਿ ਗਾਥਾਹਿ ਪੁਚ੍ਛਿ, ਸੋਪਿ ਤਸ੍ਸ ਚਤੂਹਿ ਗਾਥਾਹਿ ਏਤਮਤ੍ਥਂ ਵਿਸ੍ਸਜ੍ਜੇਸਿ.

੪੯੯. ਤਤ੍ਥ ਮਾਲੀਤਿ ਮਾਲਧਾਰੀ, ਦਿਬ੍ਬਪੁਪ੍ਫੇਹਿ ਪਟਿਮਣ੍ਡਿਤੋਤਿ ਅਧਿਪ੍ਪਾਯੋ. ਕਿਰਿਟੀਤਿ ਵੇਠਿਤਸੀਸੋ. ਕਾਯੂਰੀਤਿ ਕੇਯੂਰਵਾ, ਬਾਹਾਲਙ੍ਕਾਰਪਟਿਮਣ੍ਡਿਤੋਤਿ ਅਤ੍ਥੋ. ਗਤ੍ਤਾਤਿ ਸਰੀਰਾਵਯਵਾ. ਚਨ੍ਦਨੁਸ੍ਸਦਾਤਿ ਚਨ੍ਦਨਸਾਰਾਨੁਲਿਤ੍ਤਾ. ਸੂਰਿਯਵਣ੍ਣੋਵ ਸੋਭਸੀਤਿ ਬਾਲਸੂਰਿਯਸਦਿਸਵਣ੍ਣੋ ਏਵ ਹੁਤ੍ਵਾ ਵਿਰੋਚਸਿ. ‘‘ਅਰਣਵਣ੍ਣੀ ਪਭਾਸਸੀ’’ਤਿਪਿ ਪਾਲ਼ਿ, ਅਰਣਨ੍ਤਿ ਅਰਣਿਯੇਹਿ ਦੇਵੇਹਿ ਸਦਿਸਵਣ੍ਣੋ ਅਰਿਯਾਵਕਾਸੋਤਿ ਅਤ੍ਥੋ.

੫੦੦. ਪਾਰਿਸਜ੍ਜਾਤਿ ਪਰਿਸਪਰਿਯਾਪਨ੍ਨਾ, ਉਪਟ੍ਠਾਕਾਤਿ ਅਤ੍ਥੋ. ਤੁਵਨ੍ਤਿ ਤ੍ਵਂ. ਲੋਮਹਂਸਨਰੂਪਵਾਤਿ ਪਸ੍ਸਨ੍ਤਾਨਂ ਲੋਮਹਂਸਜਨਨਰੂਪਯੁਤ੍ਤੋ. ਮਹਾਨੁਭਾਵਤਾਸਮਙ੍ਗਿਤਾਯ ਹੇਤਂ ਵੁਤ੍ਤਂ. ਉਕ੍ਕਚ੍ਚਾਤਿ ਉਕ੍ਕਨ੍ਤਿਤ੍ਵਾ, ਛਿਨ੍ਦਿਤ੍ਵਾਤਿ ਅਤ੍ਥੋ.

੫੦੩. ਅਚਾਰਿਸਨ੍ਤਿ ਅਚਰਿਂ ਪਟਿਪਜ੍ਜਿਂ. ਪੇਸੁਞ੍ਞਮੁਸਾਵਾਦੇਨਾਤਿ ਪੇਸੁਞ੍ਞੇਨ ਚੇਵ ਮੁਸਾਵਾਦੇਨ ਚ. ਨਿਕਤਿਵਞ੍ਚਨਾਯ ਚਾਤਿ ਨਿਕਤਿਯਾ ਵਞ੍ਚਨਾਯ ਚ ਪਤਿਰੂਪਦਸ੍ਸਨੇਨ ਪਰੇਸਂ ਵਿਕਾਰੇਨ ਵਞ੍ਚਨਾਯ ਚ.

੫੦੪. ਸਚ੍ਚਕਾਲੇਤਿ ਸਚ੍ਚਂ ਵਤ੍ਤੁਂ ਯੁਤ੍ਤਕਾਲੇ. ਅਤ੍ਥਨ੍ਤਿ ਦਿਟ੍ਠਧਮ੍ਮਿਕਾਦਿਭੇਦਂ ਹਿਤਂ. ਧਮ੍ਮਨ੍ਤਿ ਕਾਰਣਂ ਞਾਯਂ. ਨਿਰਾਕਤ੍ਵਾਤਿ ਛਡ੍ਡੇਤ੍ਵਾ ਪਹਾਯ. ਸੋਤਿ ਯੋ ਪੇਸੁਞ੍ਞਾਦਿਂ ਆਚਰਤਿ, ਸੋ ਸਤ੍ਤੋ. ਸੇਸਂ ਸਬ੍ਬਂ ਹੇਟ੍ਠਾ ਵੁਤ੍ਤਨਯਮੇਵ.

ਕੂਟਵਿਨਿਚ੍ਛਯਿਕਪੇਤਵਤ੍ਥੁਵਣ੍ਣਨਾ ਨਿਟ੍ਠਿਤਾ.