੧੦. ਧਾਤੁਵਿਵਣ੍ਣਪੇਤਵਤ੍ਥੁਵਣ੍ਣਨਾ
ਅਨ੍ਤਲਿਕ੍ਖਸ੍ਮਿਂ ਤਿਟ੍ਠਨ੍ਤੋਤਿ ਇਦਂ ਧਾਤੁਵਿਵਣ੍ਣਪੇਤਵਤ੍ਥੁ. ਭਗਵਤਿ ਕੁਸਿਨਾਰਾਯਂ ਉਪਵਤ੍ਤਨੇ ਮਲ੍ਲਾਨਂ ਸਾਲਵਨੇ ਯਮਕਸਾਲਾਨਮਨ੍ਤਰੇ ਪਰਿਨਿਬ੍ਬੁਤੇ ਧਾਤੁਵਿਭਾਗੇ ਚ ਕਤੇ ਰਾਜਾ ਅਜਾਤਸਤ੍ਤੁ ਅਤ੍ਤਨਾ ਲਦ੍ਧਧਾਤੁਭਾਗਂ ਗਹੇਤ੍ਵਾ ਸਤ੍ਤ ਵਸ੍ਸਾਨਿ ਸਤ੍ਤ ਚ ਮਾਸੇ ਸਤ੍ਤ ਚ ਦਿਵਸੇ ਬੁਦ੍ਧਗੁਣੇ ਅਨੁਸ੍ਸਰਨ੍ਤੋ ਉਲ਼ਾਰਪੂਜਂ ਪਵਤ੍ਤੇਸਿ. ਤਤ੍ਥ ਅਸਙ੍ਖੇਯ੍ਯਾ ਅਪ੍ਪਮੇਯ੍ਯਾ ਮਨੁਸ੍ਸਾ ਚਿਤ੍ਤਾਨਿ ਪਸਾਦੇਤ੍ਵਾ ਸਗ੍ਗੂਪਗਾ ਅਹੇਸੁਂ, ਛਲ਼ਾਸੀਤਿਮਤ੍ਤਾਨਿ ਪਨ ਪੁਰਿਸਸਹਸ੍ਸਾਨਿ ਚਿਰਕਾਲਭਾਵਿਤੇਨ ਅਸ੍ਸਦ੍ਧਿਯੇਨ ਮਿਚ੍ਛਾਦਸ੍ਸਨੇਨ ਚ ਵਿਪਲ੍ਲਤ੍ਥਚਿਤ੍ਤਾ ਪਸਾਦਨੀਯੇਪਿ ਠਾਨੇ ਅਤ੍ਤਨੋ ਚਿਤ੍ਤਾਨਿ ਪਦੋਸੇਤ੍ਵਾ ਪੇਤੇਸੁ ਉਪ੍ਪਜ੍ਜਿਂਸੁ. ਤਸ੍ਮਿਂਯੇਵ ਰਾਜਗਹੇ ਅਞ੍ਞਤਰਸ੍ਸ ਵਿਭਵਸਮ੍ਪਨ੍ਨਸ੍ਸ ਕੁਟੁਮ੍ਬਿਕਸ੍ਸ ਭਰਿਯਾ ਧੀਤਾ ਸੁਣਿਸਾ ਚ ਪਸਨ੍ਨਚਿਤ੍ਤਾ ‘‘ਧਾਤੁਪੂਜਂ ਕਰਿਸ੍ਸਾਮਾ’’ਤਿ ਗਨ੍ਧਪੁਪ੍ਫਾਦੀਨਿ ਗਹੇਤ੍ਵਾ ਧਾਤੁਟ੍ਠਾਨਂ ਗਨ੍ਤੁਂ ਆਰਦ੍ਧਾ. ਸੋ ਕੁਟੁਮ੍ਬਿਕੋ ‘‘ਕਿਂ ਅਟ੍ਠਿਕਾਨਂ ਪੂਜਨੇਨਾ’’ਤਿ ਤਾ ਪਰਿਭਾਸੇਤ੍ਵਾ ਧਾਤੁਪੂਜਂ ਵਿਵਣ੍ਣੇਸਿ. ਤਾਪਿ ਤਸ੍ਸ ਵਚਨਂ ਅਨਾਦਿਯਿਤ੍ਵਾ ਤਤ੍ਥ ਗਨ੍ਤ੍ਵਾ ਧਾਤੁਪੂਜਂ ਕਤ੍ਵਾ ਗੇਹਂ ਆਗਤਾ ਤਾਦਿਸੇਨ ਰੋਗੇਨ ਅਭਿਭੂਤਾ ਨਚਿਰਸ੍ਸੇਵ ਕਾਲਂ ਕਤ੍ਵਾ ਦੇਵਲੋਕੇ ਨਿਬ੍ਬਤ੍ਤਿਂਸੁ. ਸੋ ਪਨ ਕੋਧੇਨ ਅਭਿਭੂਤੋ ਨਚਿਰਸ੍ਸੇਵ ਕਾਲਂ ਕਤ੍ਵਾ ਤੇਨ ਪਾਪਕਮ੍ਮੇਨ ਪੇਤੇਸੁ ਨਿਬ੍ਬਤ੍ਤਿ.
ਅਥੇਕਦਿਵਸਂ ਆਯਸ੍ਮਾ ਮਹਾਕਸ੍ਸਪੋ ਸਤ੍ਤੇਸੁ ਅਨੁਕਮ੍ਪਾਯ ਤਥਾਰੂਪਂ ਇਦ੍ਧਾਭਿਸਙ੍ਖਾਰਂ ਅਭਿਸਙ੍ਖਾਸਿ, ਯਥਾ ਮਨੁਸ੍ਸਾ ਤੇ ਪੇਤੇ ਤਾ ਚ ਦੇਵਤਾਯੋ ਪਸ੍ਸਨ੍ਤਿ. ਤਥਾ ਪਨ ਕਤ੍ਵਾ ਚੇਤਿਯਙ੍ਗਣੇ ਠਿਤੋ ਤਂ ਧਾਤੁਵਿਵਣ੍ਣਕਂ ਪੇਤਂ ਤੀਹਿ ਗਾਥਾਹਿ ਪੁਚ੍ਛਿ. ਤਸ੍ਸ ਸੋ ਪੇਤੋ ਬ੍ਯਾਕਾਸਿ –
੫੦੭. ‘‘ਅਨ੍ਤਲਿਕ੍ਖਸ੍ਮਿਂ ਤਿਟ੍ਠਨ੍ਤੋ, ਦੁਗ੍ਗਨ੍ਧੋ ਪੂਤਿ ਵਾਯਸਿ;
ਮੁਖਞ੍ਚ ਤੇ ਕਿਮਯੋ ਪੂਤਿਗਨ੍ਧਂ, ਖਾਦਨ੍ਤਿ ਕਿਂ ਕਮ੍ਮਮਕਾਸਿ ਪੁਬ੍ਬੇ.
੫੦੮. ‘‘ਤਤੋ ਸਤ੍ਥਂ ਗਹੇਤ੍ਵਾਨ, ਓਕ੍ਕਨ੍ਤਨ੍ਤਿ ਪੁਨਪ੍ਪੁਨਂ;
ਖਾਰੇਨ ਪਰਿਪ੍ਫੋਸਿਤ੍ਵਾ, ਓਕ੍ਕਨ੍ਤਨ੍ਤਿ ਪੁਨਪ੍ਪੁਨਂ.
੫੦੯. ‘‘ਕਿਂ ਨੁ ਕਾਯੇਨ ਵਾਚਾਯ, ਮਨਸਾ ਦੁਕ੍ਕਟਂ ਕਤਂ;
ਕਿਸ੍ਸਕਮ੍ਮਵਿਪਾਕੇਨ, ਇਦਂ ਦੁਕ੍ਖਂ ਨਿਗਚ੍ਛਸੀ’’ਤਿ.
੫੧੦. ‘‘ਅਹਂ ਰਾਜਗਹੇ ਰਮ੍ਮੇ, ਰਮਣੀਯੇ ਗਿਰਿਬ੍ਬਜੇ;
ਇਸ੍ਸਰੋ ਧਨਧਞ੍ਞਸ੍ਸ, ਸੁਪਹੂਤਸ੍ਸ ਮਾਰਿਸ.
੫੧੧. ‘‘ਤਸ੍ਸਾਯਂ ਮੇ ਭਰਿਯਾ ਚ, ਧੀਤਾ ਚ ਸੁਣਿਸਾ ਚ ਮੇ;
ਤਾ ਮਾਲਂ ਉਪ੍ਪਲਞ੍ਚਾਪਿ, ਪਚ੍ਚਗ੍ਘਞ੍ਚ ਵਿਲੇਪਨਂ;
ਥੂਪਂ ਹਰਨ੍ਤਿਯੋ ਵਾਰੇਸਿਂ, ਤਂ ਪਾਪਂ ਪਕਤਂ ਮਯਾ.
੫੧੨. ‘‘ਛਲ਼ਾਸੀਤਿਸਹਸ੍ਸਾਨਿ, ਮਯਂ ਪਚ੍ਚਤ੍ਤਵੇਦਨਾ;
ਥੂਪਪੂਜਂ ਵਿਵਣ੍ਣੇਤ੍ਵਾ, ਪਚ੍ਚਾਮ ਨਿਰਯੇ ਭੁਸਂ.
੫੧੩. ‘‘ਯੇ ਚ ਖੋ ਥੂਪਪੂਜਾਯ, ਵਤ੍ਤਨ੍ਤੇ ਅਰਹਤੋ ਮਹੇ;
ਆਦੀਨਵਂ ਪਕਾਸੇਨ੍ਤਿ, ਵਿਵੇਚਯੇਥ ਨੇ ਤਤੋ.
੫੧੪. ‘‘ਇਮਾ ਚ ਪਸ੍ਸ ਅਯਨ੍ਤਿਯੋ, ਮਾਲਧਾਰੀ ਅਲਙ੍ਕਤਾ;
ਮਾਲਾਵਿਪਾਕਂਨੁਭੋਨ੍ਤਿਯੋ, ਸਮਿਦ੍ਧਾ ਚ ਤਾ ਯਸਸ੍ਸਿਨਿਯੋ.
੫੧੫. ‘‘ਤਞ੍ਚ ਦਿਸ੍ਵਾਨ ਅਚ੍ਛੇਰਂ, ਅਬ੍ਭੁਤਂ ਲੋਮਹਂਸਨਂ;
ਨਮੋ ਕਰੋਨ੍ਤਿ ਸਪ੍ਪਞ੍ਞਾ, ਵਨ੍ਦਨ੍ਤਿ ਤਂ ਮਹਾਮੁਨਿਂ.
੫੧੬. ‘‘ਸੋਹਂ ਨੂਨ ਇਤੋ ਗਨ੍ਤ੍ਵਾ, ਯੋਨਿਂ ਲਦ੍ਧਾਨ ਮਾਨੁਸਿਂ;
ਥੂਪਪੂਜਂ ਕਰਿਸ੍ਸਾਮਿ, ਅਪ੍ਪਮਤ੍ਤੋ ਪੁਨਪ੍ਪੁਨ’’ਨ੍ਤਿ.
੫੦੭-੮. ਤਤ੍ਥ ਦੁਗ੍ਗਨ੍ਧੋਤਿ ਅਨਿਟ੍ਠਗਨ੍ਧੋ, ਕੁਣਪਗਨ੍ਧਗਨ੍ਧੀਤਿ ਅਤ੍ਥੋ. ਤੇਨਾਹ ‘‘ਪੂਤਿ ਵਾਯਸੀ’’ਤਿ. ਤਤੋਤਿ ਦੁਗ੍ਗਨ੍ਧਵਾਯਨਤੋ ਕਿਮੀਹਿ ਖਾਯਿਤਬ੍ਬਤੋ ਚ ਉਪਰਿ. ਸਤ੍ਤਂ ਗਹੇਤ੍ਵਾਨ, ਓਕ੍ਕਨ੍ਤਨ੍ਤਿ ਪੁਨਪ੍ਪੁਨਨ੍ਤਿ ਕਮ੍ਮਸਞ੍ਚੋਦਿਤਾ ਸਤ੍ਤਾ ਨਿਸਿਤਧਾਰਂ ਸਤ੍ਥਂ ਗਹੇਤ੍ਵਾ ਪੁਨਪ੍ਪੁਨਂ ਤਂ ਵਣਮੁਖਂ ਅਵਕਨ੍ਤਨ੍ਤਿ. ਖਾਰੇਨ ਪਰਿਪ੍ਫੋਸਿਤ੍ਵਾ, ਓਕ੍ਕਨ੍ਤਨ੍ਤਿ ਪੁਨਪ੍ਪੁਨਨ੍ਤਿ ਅਵਕਨ੍ਤਿਤਟ੍ਠਾਨੇ ਖਾਰੋਦਕੇਨ ਆਸਿਞ੍ਚਿਤ੍ਵਾ ਪੁਨਪ੍ਪੁਨਮ੍ਪਿ ਅਵਕਨ੍ਤਨ੍ਤਿ.
੫੧੦. ਇਸ੍ਸਰੋ ਧਨਧਞ੍ਞਸ੍ਸ, ਸੁਪਹੂਤਸ੍ਸਾਤਿ ਅਤਿਵਿਯ ਪਹੂਤਸ੍ਸ ਧਨਸ੍ਸ ਧਞ੍ਞਸ੍ਸ ਚ ਇਸ੍ਸਰੋ ਸਾਮੀ, ਅਡ੍ਢੋ ਮਹਦ੍ਧਨੋਤਿ ਅਤ੍ਥੋ.
੫੧੧. ਤਸ੍ਸਾਯਂ ਮੇ ਭਰਿਯਾ ਚ, ਧੀਤਾ ਚ ਸੁਣਿਸਾ ਚਾਤਿ ਤਸ੍ਸ ਮਯ੍ਹਂ ਅਯਂ ਪੁਰਿਮਤ੍ਤਭਾਵੇ ਭਰਿਯਾ, ਅਯਂ ਧੀਤਾ, ਅਯਂ ਸੁਣਿਸਾ. ਤਾ ਦੇਵਭੂਤਾ ਆਕਾਸੇ ਠਿਤਾਤਿ ਦਸ੍ਸੇਨ੍ਤੋ ਵਦਤਿ. ਪਚ੍ਚਗ੍ਘਨ੍ਤਿ ਅਭਿਨਵਂ. ਥੂਪਂ ਹਰਨ੍ਤਿਯੋ ਵਾਰੇਸਿਨ੍ਤਿ ਥੂਪਂ ਪੂਜੇਤੁਂ ਉਪਨੇਨ੍ਤਿਯੋ ਧਾਤੁਂ ਵਿਵਣ੍ਣੇਨ੍ਤੋ ਪਟਿਕ੍ਖਿਪਿਂ. ਤਂ ਪਾਪਂ ਪਕਤਂ ਮਯਾਤਿ ਤਂ ਧਾਤੁਵਿਵਣ੍ਣਨਪਾਪਂ ਕਤਂ ਸਮਾਚਰਿਤਂ ਮਯਾਤਿ ਵਿਪ੍ਪਟਿਸਾਰਪ੍ਪਤ੍ਤੋ ਵਦਤਿ.
੫੧੨. ਛਲ਼ਾਸੀਤਿਸਹਸ੍ਸਾਨੀਤਿ ਛਸਹਸ੍ਸਾਧਿਕਾ ਅਸੀਤਿਸਹਸ੍ਸਮਤ੍ਤਾ. ਮਯਨ੍ਤਿ ਤੇ ਪੇਤੇ ਅਤ੍ਤਨਾ ਸਦ੍ਧਿਂ ਸਙ੍ਗਹੇਤ੍ਵਾ ਵਦਤਿ. ਪਚ੍ਚਤ੍ਤਵੇਦਨਾਤਿ ਵਿਸੁਂ ਵਿਸੁਂ ਅਨੁਭੁਯ੍ਯਮਾਨਦੁਕ੍ਖਵੇਦਨਾ. ਨਿਰਯੇਤਿ ਬਲਦੁਕ੍ਖਤਾਯ ਪੇਤ੍ਤਿਵਿਸਯਂ ਨਿਰਯਸਦਿਸਂ ਕਤ੍ਵਾ ਆਹ.
੫੧੩. ਯੇ ਚ ਖੋ ਥੂਪਪੂਜਾਯ, ਵਤ੍ਤਨ੍ਤੇ ਅਰਹਤੋ ਮਹੇਤਿ ਅਰਹਤੋ ਸਮ੍ਮਾਸਮ੍ਬੁਦ੍ਧਸ੍ਸ ਥੂਪਂ ਉਦ੍ਦਿਸ੍ਸ ਪੂਜਾਮਹੇ ਪਵਤ੍ਤਮਾਨੇ ਅਹਂ ਵਿਯ ਯੇ ਥੂਪਪੂਜਾਯ ਆਦੀਨਵਂ ਦੋਸਂ ਪਕਾਸੇਨ੍ਤਿ. ਤੇ ਪੁਗ੍ਗਲੇ ਤਤੋ ਪੁਞ੍ਞਤੋ ਵਿਵੇਚਯੇਥ ਵਿਵੇਚਾਪਯੇਥ, ਪਰਿਬਾਹਿਰੇ ਜਨਯੇਥਾਤਿ ਅਞ੍ਞਾਪਦੇਸੇਨ ਅਤ੍ਤਨੋ ਮਹਾਜਾਨਿਯਤਂ ਵਿਭਾਵੇਤਿ.
੫੧੪. ਆਯਨ੍ਤਿਯੋਤਿ ਆਕਾਸੇਨ ਆਗਚ੍ਛਨ੍ਤਿਯੋ. ਮਾਲਾਵਿਪਾਕਨ੍ਤਿ ਥੂਪੇ ਕਤਮਾਲਾਪੂਜਾਯ ਵਿਪਾਕਂ ਫਲਂ. ਸਮਿਦ੍ਧਾਤਿ ਦਿਬ੍ਬਸਮ੍ਪਤ੍ਤਿਯਾ ਸਮਿਦ੍ਧਾ. ਤਾ ਯਸਸ੍ਸਿਨਿਯੋਤਿ ਤਾ ਪਰਿਵਾਰਵਨ੍ਤਿਯੋ.
੫੧੫. ਤਞ੍ਚ ਦਿਸ੍ਵਾਨਾਤਿ ਤਸ੍ਸ ਅਤਿਪਰਿਤ੍ਤਸ੍ਸ ਪੂਜਾਪੁਞ੍ਞਸ੍ਸ ਅਚ੍ਛਰਿਯਂ ਅਬ੍ਭੁਤਂ ਲੋਮਹਂਸਨਂ ਅਤਿਉਲ਼ਾਰਂ ਵਿਪਾਕਵਿਸੇਸਂ ਦਿਸ੍ਵਾ. ਨਮੋ ਕਰੋਨ੍ਤਿ ਸਪ੍ਪਞ੍ਞਾ, ਵਨ੍ਦਨ੍ਤਿ ਤਂ ਮਹਾਮੁਨਿਨ੍ਤਿ, ਭਨ੍ਤੇ ਕਸ੍ਸਪ, ਇਮਾ ਇਤ੍ਥਿਯੋ ਤਂ ਉਤ੍ਤਮਪੁਞ੍ਞਕ੍ਖੇਤ੍ਤਭੂਤਂ ਵਨ੍ਦਨ੍ਤਿ ਅਭਿਵਾਦੇਨ੍ਤਿ, ਨਮੋ ਕਰੋਨ੍ਤਿ ਨਮਕ੍ਕਾਰਞ੍ਚ ਕਰੋਨ੍ਤੀਤਿ ਅਤ੍ਥੋ.
੫੧੬. ਅਥ ਸੋ ਪੇਤੋ ਸਂਵਿਗ੍ਗਮਾਨਸੋ ਸਂਵੇਗਾਨੁਰੂਪਂ ਆਯਤਿਂ ਅਤ੍ਤਨਾ ਕਾਤਬ੍ਬਂ ਦਸ੍ਸੇਨ੍ਤੋ ‘‘ਸੋਹਂ ਨੂਨਾ’’ਤਿ ਗਾਥਮਾਹ. ਤਂ ਉਤ੍ਤਾਨਤ੍ਥਮੇਵ.
ਏਵਂ ਪੇਤੇਨ ਵੁਤ੍ਤੋ ਮਹਾਕਸ੍ਸਪੋ ਤਂ ਅਟ੍ਠੁਪ੍ਪਤ੍ਤਿਂ ਕਤ੍ਵਾ ਸਮ੍ਪਤ੍ਤਪਰਿਸਾਯ ਧਮ੍ਮਂ ਦੇਸੇਸਿ.
ਧਾਤੁਵਿਵਣ੍ਣਪੇਤਵਤ੍ਥੁਵਣ੍ਣਨਾ ਨਿਟ੍ਠਿਤਾ.
ਇਤਿ ਖੁਦ੍ਦਕ-ਅਟ੍ਠਕਥਾਯ ਪੇਤਵਤ੍ਥੁਸ੍ਮਿਂ
ਦਸਵਤ੍ਥੁਪਟਿਮਣ੍ਡਿਤਸ੍ਸ
ਤਤਿਯਸ੍ਸ ਚੂਲ਼ਵਗ੍ਗਸ੍ਸ ਅਤ੍ਥਸਂਵਣ੍ਣਨਾ ਨਿਟ੍ਠਿਤਾ.