੩. ਚੂਲ਼ਵਗ੍ਗੋ

੧. ਅਭਿਜ੍ਜਮਾਨਪੇਤਵਤ੍ਥੁਵਣ੍ਣਨਾ

ਅਭਿਜ੍ਜਮਾਨੇ ਵਾਰਿਮ੍ਹੀਤਿ ਇਦਂ ਸਤ੍ਥਰਿ ਵੇਲ਼ੁਵਨੇ ਵਿਹਰਨ੍ਤੇ ਅਞ੍ਞਤਰਂ ਲੁਦ੍ਦਪੇਤਂ ਆਰਬ੍ਭ ਵੁਤ੍ਤਂ. ਬਾਰਾਣਸਿਯਂ ਕਿਰ ਅਪਰਦਿਸਾਭਾਗੇ ਪਾਰਗਙ੍ਗਾਯ ਵਾਸਭਗਾਮਂ ਅਤਿਕ੍ਕਮਿਤ੍ਵਾ ਚੁਨ੍ਦਟ੍ਠਿਲਨਾਮਕੇ ਗਾਮੇ ਏਕੋ ਲੁਦ੍ਦਕੋ ਅਹੋਸਿ. ਸੋ ਅਰਞ੍ਞੇ ਮਿਗੇ ਵਧਿਤ੍ਵਾ ਵਰਮਂਸਂ ਅਙ੍ਗਾਰੇ ਪਚਿਤ੍ਵਾ ਖਾਦਿਤ੍ਵਾ ਅਵਸੇਸਂ ਪਣ੍ਣਪੁਟੇ ਬਨ੍ਧਿਤ੍ਵਾ ਕਾਜੇਨ ਗਹੇਤ੍ਵਾ ਗਾਮਂ ਆਗਚ੍ਛਤਿ. ਤਂ ਬਾਲਦਾਰਕਾ ਗਾਮਦ੍ਵਾਰੇ ਦਿਸ੍ਵਾ ‘‘ਮਂਸਂ ਮੇ ਦੇਹਿ, ਮਂਸਂ ਮੇ ਦੇਹੀ’’ਤਿ ਹਤ੍ਥੇ ਪਸਾਰੇਤ੍ਵਾ ਉਪਧਾਵਨ੍ਤਿ. ਸੋ ਤੇਸਂ ਥੋਕਂ ਥੋਕਂ ਮਂਸਂ ਦੇਤਿ. ਅਥੇਕਦਿਵਸਂ ਮਂਸਂ ਅਲਭਿਤ੍ਵਾ ਉਦ੍ਦਾਲਕਪੁਪ੍ਫਂ ਪਿਲ਼ਨ੍ਧਿਤ੍ਵਾ ਬਹੁਞ੍ਚ ਹਤ੍ਥੇਨ ਗਹੇਤ੍ਵਾ ਗਾਮਂ ਗਚ੍ਛਨ੍ਤਂ ਤਂ ਦਾਰਕਾ ਗਾਮਦ੍ਵਾਰੇ ਦਿਸ੍ਵਾ ‘‘ਮਂਸਂ ਮੇ ਦੇਹਿ, ਮਂਸਂ ਮੇ ਦੇਹੀ’’ਤਿ ਹਤ੍ਥੇ ਪਸਾਰੇਤ੍ਵਾ ਉਪਧਾਵਿਂਸੁ. ਸੋ ਤੇਸਂ ਏਕੇਕਂ ਪੁਪ੍ਫਮਞ੍ਜਰਿਂ ਅਦਾਸਿ.

ਅਥ ਅਪਰੇਨ ਸਮਯੇਨ ਕਾਲਂ ਕਤ੍ਵਾ ਪੇਤੇਸੁ ਨਿਬ੍ਬਤ੍ਤੋ ਨਗ੍ਗੋ ਵਿਰੂਪਰੂਪੋ ਭਯਾਨਕਦਸ੍ਸਨੋ ਸੁਪਿਨੇਪਿ ਅਨ੍ਨਪਾਨਂ ਅਜਾਨਨ੍ਤੋ ਸੀਸੇ ਆਬਨ੍ਧਿਤਉਦ੍ਦਾਲਕਕੁਸੁਮਮਾਲਾਕਲਾਪੋ ‘‘ਚੁਨ੍ਦਟ੍ਠਿਲਾਯਂ ਞਾਤਕਾਨਂ ਸਨ੍ਤਿਕੇ ਕਿਞ੍ਚਿ ਲਭਿਸ੍ਸਾਮੀ’’ਤਿ ਗਙ੍ਗਾਯ ਉਦਕੇ ਅਭਿਜ੍ਜਮਾਨੇ ਪਟਿਸੋਤਂ ਪਦਸਾ ਗਚ੍ਛਤਿ. ਤੇਨ ਚ ਸਮਯੇਨ ਕੋਲਿਯੋ ਨਾਮ ਰਞ੍ਞੋ ਬਿਮ੍ਬਿਸਾਰਸ੍ਸ ਮਹਾਮਤ੍ਤੋ ਕੁਪਿਤਂ ਪਚ੍ਚਨ੍ਤਂ ਵੂਪਸਮੇਤ੍ਵਾ ਪਟਿਨਿਵਤ੍ਤੇਨ੍ਤੋ ਹਤ੍ਥਿਅਸ੍ਸਾਦਿਪਰਿਵਾਰਬਲਂ ਥਲਪਥੇਨ ਪੇਸੇਤ੍ਵਾ ਸਯਂ ਗਙ੍ਗਾਯ ਨਦਿਯਾ ਅਨੁਸੋਤਂ ਨਾਵਾਯ ਆਗਚ੍ਛਨ੍ਤੋ ਤਂ ਪੇਤਂ ਤਥਾ ਗਚ੍ਛਨ੍ਤਂ ਦਿਸ੍ਵਾ ਪੁਚ੍ਛਨ੍ਤੋ –

੩੮੭. ‘‘ਅਭਿਜ੍ਜਮਾਨੇ ਵਾਰਿਮ੍ਹਿ, ਗਙ੍ਗਾਯ ਇਧ ਗਚ੍ਛਸਿ;

ਨਗ੍ਗੋ ਪੁਬ੍ਬਦ੍ਧਪੇਤੋਵ, ਮਾਲਧਾਰੀ ਅਲਙ੍ਕਤੋ;

ਕੁਹਿਂ ਗਮਿਸ੍ਸਸਿ ਪੇਤ, ਕਤ੍ਥ ਵਾਸੋ ਭਵਿਸ੍ਸਤੀ’’ਤਿ. –

ਗਾਥਮਾਹ. ਤਤ੍ਥ ਅਭਿਜ੍ਜਮਾਨੇਤਿ ਪਦਨਿਕ੍ਖੇਪੇਨ ਅਭਿਜ੍ਜਮਾਨੇ ਸਙ੍ਘਾਤੇ, ਵਾਰਿਮ੍ਹਿ ਗਙ੍ਗਾਯਾਤਿ ਗਙ੍ਗਾਯ ਨਦਿਯਾ ਉਦਕੇ. ਇਧਾਤਿ ਇਮਸ੍ਮਿਂ ਠਾਨੇ. ਪੁਬ੍ਬਦ੍ਧਪੇਤੋਵਾਤਿ ਕਾਯਸ੍ਸ ਪੁਰਿਮਦ੍ਧੇਨ ਅਪੇਤੋ ਵਿਯ ਅਪੇਤਯੋਨਿਕੋ ਦੇਵਪੁਤ੍ਤੋ ਵਿਯ. ਕਥਂ? ਮਾਲਧਾਰੀ ਅਲਙ੍ਕਤੋਤਿ, ਮਾਲਾਹਿ ਪਿਲ਼ਨ੍ਧਿਤ੍ਵਾ ਅਲਙ੍ਕਤਸੀਸਗ੍ਗੋਤਿ ਅਤ੍ਥੋ. ਕਤ੍ਥ ਵਾਸੋ ਭਵਿਸ੍ਸਤੀਤਿ ਕਤਰਸ੍ਮਿਂ ਗਾਮੇ ਦੇਸੇ ਵਾ ਤੁਯ੍ਹਂ ਨਿਵਾਸੋ ਭਵਿਸ੍ਸਤਿ, ਤਂ ਕਥੇਹੀਤਿ ਅਤ੍ਥੋ.

ਇਦਾਨਿ ਯਂ ਤਦਾ ਤੇਨ ਪੇਤੇਨ ਕੋਲਿਯੇਨ ਚ ਵੁਤ੍ਤਂ, ਤਂ ਦਸ੍ਸੇਤੁਂ ਸਙ੍ਗੀਤਿਕਾਰਾ –

੩੮੮. ‘‘ਚੁਨ੍ਦਟ੍ਠਿਲਂ ਗਮਿਸ੍ਸਾਮਿ, ਪੇਤੋ ਸੋ ਇਤਿ ਭਾਸਤਿ;

ਅਨ੍ਤਰੇ ਵਾਸਭਗਾਮਂ, ਬਾਰਾਣਸਿਞ੍ਚ ਸਨ੍ਤਿਕੇ.

੩੮੯. ‘‘ਤਞ੍ਚ ਦਿਸ੍ਵਾ ਮਹਾਮਤ੍ਤੋ, ਕੋਲਿਯੋ ਇਤਿ ਵਿਸ੍ਸੁਤੋ;

ਸਤ੍ਤੁਂ ਭਤ੍ਤਞ੍ਚ ਪੇਤਸ੍ਸ, ਪੀਤਕਞ੍ਚ ਯੁਗਂ ਅਦਾ.

੩੯੦. ‘‘ਨਾਵਾਯ ਤਿਟ੍ਠਮਾਨਾਯ, ਕਪ੍ਪਕਸ੍ਸ ਅਦਾਪਯਿ;

ਕਪ੍ਪਕਸ੍ਸ ਪਦਿਨ੍ਨਮ੍ਹਿ, ਠਾਨੇ ਪੇਤਸ੍ਸ ਦਿਸ੍ਸਥ.

੩੯੧. ‘‘ਤਤੋ ਸੁਵਤ੍ਥਵਸਨੋ, ਮਾਲਧਾਰੀ ਅਲਙ੍ਕਤੋ;

ਠਾਨੇ ਠਿਤਸ੍ਸ ਪੇਤਸ੍ਸ, ਦਕ੍ਖਿਣਾ ਉਪਕਪ੍ਪਥ;

ਤਸ੍ਮਾ ਦਜ੍ਜੇਥ ਪੇਤਾਨਂ, ਅਨੁਕਮ੍ਪਾਯ ਪੁਨਪ੍ਪੁਨ’’ਨ੍ਤਿ. – ਗਾਥਾਯੋ ਅਵੋਚੁਂ;

੩੮੮. ਤਤ੍ਥ ਚੁਨ੍ਦਟ੍ਠਿਲਨ੍ਤਿ ਏਵਂਨਾਮਕਂ ਗਾਮਂ. ਅਨ੍ਤਰੇ ਵਾਸਭਗਾਮਂ, ਬਾਰਾਣਸਿਞ੍ਚ ਸਨ੍ਤਿਕੇਤਿ ਵਾਸਭਗਾਮਸ੍ਸ ਚ ਬਾਰਾਣਸਿਯਾ ਚ ਵੇਮਜ੍ਝੇ. ਅਨ੍ਤਰਾ-ਸਦ੍ਦਯੋਗੇਨ ਹੇਤਂ ਸਾਮ੍ਯਤ੍ਥੇ ਉਪਯੋਗਵਚਨਂ. ਬਾਰਾਣਸਿਯਾ ਸਨ੍ਤਿਕੇ ਹਿ ਸੋ ਗਾਮੋਤਿ. ਅਯਞ੍ਹੇਤ੍ਥ ਅਤ੍ਥੋ – ਅਨ੍ਤਰੇ ਵਾਸਭਗਾਮਸ੍ਸ ਚ ਬਾਰਾਣਸਿਯਾ ਚ ਯੋ ਚੁਨ੍ਦਟ੍ਠਿਲਨਾਮਕੋ ਗਾਮੋ ਬਾਰਾਣਸਿਯਾ ਅਵਿਦੂਰੇ, ਤਂ ਗਾਮਂ ਗਮਿਸ੍ਸਾਮੀਤਿ.

੩੮੯. ਕੋਲਿਯੋ ਇਤਿ ਵਿਸ੍ਸੁਤੋਤਿ ਕੋਲਿਯੋਤਿ ਏਵਂਪਕਾਸਿਤਨਾਮੋ. ਸਤ੍ਤੁਂ ਭਤ੍ਤਞ੍ਚਾਤਿ ਸਤ੍ਤੁਞ੍ਚੇਵ ਭਤ੍ਤਞ੍ਚ. ਪੀਤਕਞ੍ਚ ਯੁਗਂ ਅਦਾਤਿ ਪੀਤਕਂ ਸੁਵਣ੍ਣਵਣ੍ਣਂ ਏਕਂ ਵਤ੍ਥਯੁਗਞ੍ਚ ਅਦਾਸਿ.

੩੯੦. ਕਦਾ ਅਦਾਸੀਤਿ ਚੇ ਆਹ ਨਾਵਾਯ ਤਿਟ੍ਠਮਾਨਾਯ. ਕਪ੍ਪਕਸ੍ਸ ਅਦਾਪਯੀਤਿ ਗਚ੍ਛਨ੍ਤਿਂ ਨਾਵਂ ਠਪੇਤ੍ਵਾ ਤਤ੍ਥ ਏਕਸ੍ਸ ਨ੍ਹਾਪਿਤਸ੍ਸ ਉਪਾਸਕਸ੍ਸ ਦਾਪੇਸਿ, ਦਿਨ੍ਨਮ੍ਹਿ ਵਤ੍ਥਯੁਗੇਤਿ ਯੋਜਨਾ. ਠਾਨੇਤਿ ਠਾਨਸੋ ਤਙ੍ਖਣਞ੍ਞੇਵ. ਪੇਤਸ੍ਸ ਦਿਸ੍ਸਥਾਤਿ ਪੇਤਸ੍ਸ ਸਰੀਰੇ ਪਞ੍ਞਾਯਿਤ੍ਥ, ਤਸ੍ਸ ਨਿਵਾਸਨਪਾਰੁਪਨਵਤ੍ਥਂ ਸਮ੍ਪਜ੍ਜਿ. ਤੇਨਾਹ ‘‘ਤਤੋ ਸੁਵਤ੍ਥਵਸਨੋ, ਮਾਲਧਾਰੀ ਅਲਙ੍ਕਤੋ’’ਤਿ, ਸੁਵਤ੍ਥਵਸਨੋ ਮਾਲਾਭਰਣੇਹਿ ਸੁਮਣ੍ਡਿਤਪਸਾਧਿਤੋ. ਠਾਨੇ ਠਿਤਸ੍ਸ ਪੇਤਸ੍ਸ, ਦਕ੍ਖਿਣਾ ਉਪਕਪ੍ਪਥਾਤਿ ਦਕ੍ਖਿਣੇਯ੍ਯਟ੍ਠਾਨੇ ਠਿਤਾ ਪਨੇਸਾ ਦਕ੍ਖਿਣਾ ਤਸ੍ਸ ਪੇਤਸ੍ਸ ਯਸ੍ਮਾ ਉਪਕਪ੍ਪਤਿ, ਵਿਨਿਯੋਗਂ ਅਗਮਾਸਿ. ਤਸ੍ਮਾ ਦਜ੍ਜੇਥ ਪੇਤਾਨਂ, ਅਨੁਕਮ੍ਪਾਯ ਪੁਨਪ੍ਪੁਨਨ੍ਤਿ ਪੇਤਾਨਂ ਅਨੁਕਮ੍ਪਾਯ ਪੇਤੇ ਉਦ੍ਦਿਸ੍ਸ ਪੁਨਪ੍ਪੁਨਂ ਦਕ੍ਖਿਣਂ ਦਦੇਯ੍ਯਾਤਿ ਅਤ੍ਥੋ.

ਅਥ ਸੋ ਕੋਲਿਯਮਹਾਮਤ੍ਤੋ ਤਂ ਪੇਤਂ ਅਨੁਕਮ੍ਪਮਾਨੋ ਦਾਨਵਿਧਿਂ ਸਮ੍ਪਾਦੇਤ੍ਵਾ ਅਨੁਸੋਤਂ ਆਗਨ੍ਤ੍ਵਾ ਸੂਰਿਯੇ ਉਗ੍ਗਚ੍ਛਨ੍ਤੇ ਬਾਰਾਣਸਿਂ ਸਮ੍ਪਾਪੁਣਿ. ਭਗਵਾ ਚ ਤੇਸਂ ਅਨੁਗ੍ਗਹਤ੍ਥਂ ਆਕਾਸੇਨ ਆਗਨ੍ਤ੍ਵਾ ਗਙ੍ਗਾਤੀਰੇ ਅਟ੍ਠਾਸਿ. ਕੋਲਿਯਮਹਾਮਤ੍ਤੋਪਿ ਨਾਵਾਤੋ ਓਤਰਿਤ੍ਵਾ ਹਟ੍ਠਪਹਟ੍ਠੋ ਭਗਵਨ੍ਤਂ ਨਿਮਨ੍ਤੇਸਿ – ‘‘ਅਧਿਵਾਸੇਥ ਮੇ, ਭਨ੍ਤੇ, ਭਗਵਾ ਅਜ੍ਜਤਨਾਯ ਭਤ੍ਤਂ ਅਨੁਕਮ੍ਪਂ ਉਪਾਦਾਯਾ’’ਤਿ. ਅਧਿਵਾਸੇਸਿ ਭਗਵਾ ਤੁਣ੍ਹੀਭਾਵੇਨ. ਸੋ ਭਗਵਤੋ ਅਧਿਵਾਸਨਂ ਵਿਦਿਤ੍ਵਾ ਤਾਵਦੇਵ ਰਮਣੀਯੇ ਭੂਮਿਭਾਗੇ ਮਹਨ੍ਤਂ ਸਾਖਾਮਣ੍ਡਪਂ ਉਪਰਿ ਚਤੂਸੁ ਚ ਪਸ੍ਸੇਸੁ ਨਾਨਾਵਿਰਾਗਵਣ੍ਣਵਿਚਿਤ੍ਤਵਿਵਿਧਵਸਨਸਮਲਙ੍ਕਤਂ ਕਾਰੇਤ੍ਵਾ ਤਤ੍ਥ ਭਗਵਤੋ ਆਸਨਂ ਪਞ੍ਞਾਪੇਤ੍ਵਾ ਅਦਾਸਿ. ਨਿਸੀਦਿ ਭਗਵਾ ਪਞ੍ਞਤ੍ਤੇ ਆਸਨੇ.

ਅਥ ਸੋ ਮਹਾਮਤ੍ਤੋ ਭਗਵਨ੍ਤਂ ਉਪਸਙ੍ਕਮਿਤ੍ਵਾ ਗਨ੍ਧਪੁਪ੍ਫਾਦੀਹਿ ਪੂਜੇਤ੍ਵਾ ਵਨ੍ਦਿਤ੍ਵਾ ਏਕਮਨ੍ਤਂ ਨਿਸਿਨ੍ਨੋ ਹੇਟ੍ਠਾ ਅਤ੍ਤਨੋ ਵੁਤ੍ਤਵਚਨਂ ਪੇਤਸ੍ਸ ਚ ਪਟਿਵਚਨਂ ਭਗਵਤੋ ਆਰੋਚੇਸਿ. ਭਗਵਾ ‘‘ਭਿਕ੍ਖੁਸਙ੍ਘੋ ਆਗਚ੍ਛਤੂ’’ਤਿ ਚਿਨ੍ਤੇਸਿ. ਚਿਨ੍ਤਿਤਸਮਨਨ੍ਤਰਮੇਵ ਬੁਦ੍ਧਾਨੁਭਾਵਸਞ੍ਚੋਦਿਤੋ ਸੁਵਣ੍ਣਹਂਸਗਣੋ ਵਿਯ ਧਤਰਟ੍ਠਹਂਸਰਾਜਂ ਭਿਕ੍ਖੁਸਙ੍ਘੋ ਧਮ੍ਮਰਾਜਂ ਸਮ੍ਪਰਿਵਾਰੇਸਿ. ਤਾਵਦੇਵ ਮਹਾਜਨੋ ਸਨ੍ਨਿਪਤਿ ‘‘ਉਲ਼ਾਰਾ ਧਮ੍ਮਦੇਸਨਾ ਭਵਿਸ੍ਸਤੀ’’ਤਿ. ਤਂ ਦਿਸ੍ਵਾ ਪਸਨ੍ਨਮਾਨਸੋ ਮਹਾਮਤ੍ਤੋ ਬੁਦ੍ਧਪ੍ਪਮੁਖਂ ਭਿਕ੍ਖੁਸਙ੍ਘਂ ਪਣੀਤੇਨ ਖਾਦਨੀਯੇਨ ਭੋਜਨੀਯੇਨ ਸਨ੍ਤਪ੍ਪੇਸਿ. ਭਗਵਾ ਕਤਭਤ੍ਤਕਿਚ੍ਚੋ ਮਹਾਜਨਸ੍ਸ ਅਨੁਕਮ੍ਪਾਯ ‘‘ਬਾਰਾਣਸਿਸਮੀਪਗਾਮਵਾਸਿਨੋ ਸਨ੍ਨਿਪਤਨ੍ਤੂ’’ਤਿ ਅਧਿਟ੍ਠਾਸਿ. ਸਬ੍ਬੇ ਚ ਤੇ ਇਦ੍ਧਿਬਲੇਨ ਮਹਾਜਨਾ ਸਨ੍ਨਿਪਤਿਂਸੁ, ਉਲ਼ਾਰੇ ਚਸ੍ਸ ਪੇਤੇ ਪਾਕਟੇ ਅਕਾਸਿ. ਤੇਸੁ ਕੇਚਿ ਛਿਨ੍ਨਭਿਨ੍ਨਪਿਲੋਤਿਕਖਣ੍ਡਧਰਾ, ਕੇਚਿ ਅਤ੍ਤਨੋ ਕੇਸੇਹੇਵ ਪਟਿਚ੍ਛਾਦਿਤਕੋਪਿਨਾ, ਕੇਚਿ ਨਗ੍ਗਾ ਯਥਾਜਾਤਰੂਪਾ ਖੁਪ੍ਪਿਪਾਸਾਭਿਭੂਤਾ ਤਚਪਰਿਯੋਨਦ੍ਧਾ ਅਟ੍ਠਿਮਤ੍ਤਸਰੀਰਾ ਇਤੋ ਚਿਤੋ ਚ ਪਰਿਬ੍ਭਮਨ੍ਤਾ ਮਹਾਜਨਸ੍ਸ ਪਚ੍ਚਕ੍ਖਤੋ ਪਞ੍ਞਾਯਿਂਸੁ.

ਅਥ ਭਗਵਾ ਤਥਾਰੂਪਂ ਇਦ੍ਧਾਭਿਸਙ੍ਖਾਰਂ ਅਭਿਸਙ੍ਖਾਸਿ, ਯਥਾ ਤੇ ਏਕਜ੍ਝਂ ਸਨ੍ਨਿਪਤਿਤ੍ਵਾ ਅਤ੍ਤਨਾ ਕਤਂ ਪਾਪਕਮ੍ਮਂ ਮਹਾਜਨਸ੍ਸ ਪਵੇਦੇਸੁਂ. ਤਮਤ੍ਥਂ ਦੀਪੇਨ੍ਤਾ ਸਙ੍ਗੀਤਿਕਾਰਾ –

੩੯੨. ‘‘ਸਾਤੁਨ੍ਨਵਸਨਾ ਏਕੇ, ਅਞ੍ਞੇ ਕੇਸਨਿਵਾਸਨਾ;

ਪੇਤਾ ਭਤ੍ਤਾਯ ਗਚ੍ਛਨ੍ਤਿ, ਪਕ੍ਕਮਨ੍ਤਿ ਦਿਸੋਦਿਸਂ.

੩੯੩. ‘‘ਦੂਰੇ ਏਕੇ ਪਧਾਵਿਤ੍ਵਾ, ਅਲਦ੍ਧਾਵ ਨਿਵਤ੍ਤਰੇ;

ਛਾਤਾ ਪਮੁਚ੍ਛਿਤਾ ਭਨ੍ਤਾ, ਭੂਮਿਯਂ ਪਟਿਸੁਮ੍ਭਿਤਾ.

੩੯੪. ‘‘ਕੇਚਿ ਤਤ੍ਥ ਪਪਤਿਤ੍ਵਾ, ਭੂਮਿਯਂ ਪਟਿਸੁਮ੍ਭਿਤਾ;

ਪੁਬ੍ਬੇ ਅਕਤਕਲ੍ਯਾਣਾ, ਅਗ੍ਗਿਦਡ੍ਢਾਵ ਆਤਪੇ.

੩੯੫. ‘‘ਮਯਂ ਪੁਬ੍ਬੇ ਪਾਪਧਮ੍ਮਾ, ਘਰਣੀ ਕੁਲਮਾਤਰੋ;

ਸਨ੍ਤੇਸੁ ਦੇਯ੍ਯਧਮ੍ਮੇਸੁ, ਦੀਪਂ ਨਾਕਮ੍ਹ ਅਤ੍ਤਨੋ.

੩੯੬. ‘‘ਪਹੂਤਂ ਅਨ੍ਨਪਾਨਮ੍ਪਿ, ਅਪਿਸ੍ਸੁ ਅਵਕਿਰੀਯਤਿ;

ਸਮ੍ਮਗ੍ਗਤੇ ਪਬ੍ਬਜਿਤੇ, ਨ ਚ ਕਿਞ੍ਚਿ ਅਦਮ੍ਹਸੇ.

੩੯੭. ‘‘ਅਕਮ੍ਮਕਾਮਾ ਅਲਸਾ, ਸਾਦੁਕਾਮਾ ਮਹਗ੍ਘਸਾ;

ਆਲੋਪਪਿਣ੍ਡਦਾਤਾਰੋ, ਪਟਿਗ੍ਗਹੇ ਪਰਿਭਾਸਿਮ੍ਹਸੇ.

੩੯੮. ‘‘ਤੇ ਘਰਾ ਤਾ ਚ ਦਾਸਿਯੋ, ਤਾਨੇਵਾਭਰਣਾਨਿ ਨੋ;

ਤੇ ਅਞ੍ਞੇ ਪਰਿਚਾਰੇਨ੍ਤਿ, ਮਯਂ ਦੁਕ੍ਖਸ੍ਸ ਭਾਗਿਨੋ.

੩੯੯. ‘‘ਵੇਣੀ ਵਾ ਅਵਞ੍ਞਾ ਹੋਨ੍ਤਿ, ਰਥਕਾਰੀ ਚ ਦੁਬ੍ਭਿਕਾ;

ਚਣ੍ਡਾਲੀ ਕਪਣਾ ਹੋਨ੍ਤਿ, ਕਪ੍ਪਕਾ ਚ ਪੁਨਪ੍ਪੁਨਂ.

੪੦੦. ‘‘ਯਾਨਿ ਯਾਨਿ ਨਿਹੀਨਾਨਿ, ਕੁਲਾਨਿ ਕਪਣਾਨਿ ਚ;

ਤੇਸੁ ਤੇਸ੍ਵੇਵ ਜਾਯਨ੍ਤਿ, ਏਸਾ ਮਚ੍ਛਰਿਨੋ ਗਤਿ.

੪੦੧. ‘‘ਪੁਬ੍ਬੇ ਚ ਕਤਕਲ੍ਯਾਣਾ, ਦਾਯਕਾ ਵੀਤਮਚ੍ਛਰਾ;

ਸਗ੍ਗਂ ਤੇ ਪਰਿਪੂਰੇਨ੍ਤਿ, ਓਭਾਸੇਨ੍ਤਿ ਚ ਨਨ੍ਦਨਂ.

੪੦੨. ‘‘ਵੇਜਯਨ੍ਤੇ ਚ ਪਾਸਾਦੇ, ਰਮਿਤ੍ਵਾ ਕਾਮਕਾਮਿਨੋ;

ਉਚ੍ਚਾਕੁਲੇਸੁ ਜਾਯਨ੍ਤਿ, ਸਭੋਗੇਸੁ ਤਤੋ ਚੁਤਾ.

੪੦੩. ‘‘ਕੂਟਾਗਾਰੇ ਚ ਪਾਸਾਦੇ, ਪਲ੍ਲਙ੍ਕੇ ਪੋਨਕਤ੍ਥਤੇ;

ਬੀਜਿਤਙ੍ਗਾ ਮੋਰਹਤ੍ਥੇਹਿ, ਕੁਲੇ ਜਾਤਾ ਯਸਸ੍ਸਿਨੋ.

੪੦੪. ‘‘ਅਙ੍ਕਤੋ ਅਙ੍ਕਂ ਗਚ੍ਛਨ੍ਤਿ, ਮਾਲਧਾਰੀ ਅਲਙ੍ਕਤਾ;

ਧਾਤਿਯੋ ਉਪਤਿਟ੍ਠਨ੍ਤਿ, ਸਾਯਂ ਪਾਤਂ ਸੁਖੇਸਿਨੋ.

੪੦੫. ‘‘ਨਯਿਦਂ ਅਕਤਪੁਞ੍ਞਾਨਂ, ਕਤਪੁਞ੍ਞਾਨਮੇਵਿਦਂ;

ਅਸੋਕਂ ਨਨ੍ਦਨਂ ਰਮ੍ਮਂ, ਤਿਦਸਾਨਂ ਮਹਾਵਨਂ.

੪੦੬. ‘‘ਸੁਖਂ ਅਕਤਪੁਞ੍ਞਾਨਂ, ਇਧ ਨਤ੍ਥਿ ਪਰਤ੍ਥ ਚ;

ਸੁਖਞ੍ਚ ਕਤਪੁਞ੍ਞਾਨਂ, ਇਧ ਚੇਵ ਪਰਤ੍ਥ ਚ.

੪੦੭. ‘‘ਤੇਸਂ ਸਹਬ੍ਯਕਾਮਾਨਂ, ਕਤ੍ਤਬ੍ਬਂ ਕੁਸਲਂ ਬਹੁਂ;

ਕਤਪੁਞ੍ਞਾ ਹਿ ਮੋਦਨ੍ਤਿ, ਸਗ੍ਗੇ ਭੋਗਸਮਙ੍ਗਿਨੋ’’ਤਿ. – ਗਾਥਾਯੋ ਅਵੋਚੁਂ;

੩੯੨. ਤਤ੍ਥ ਸਾਤੁਨ੍ਨਵਸਨਾਤਿ ਛਿਨ੍ਨਭਿਨ੍ਨਪਿਲੋਤਿਕਖਣ੍ਡਨਿਵਾਸਨਾ. ਏਕੇਤਿ ਏਕਚ੍ਚੇ. ਕੇਸਨਿਵਾਸਨਾਤਿ ਕੇਸੇਹੇਵ ਪਟਿਚ੍ਛਾਦਿਤਕੋਪਿਨਾ. ਭਤ੍ਤਾਯ ਗਚ੍ਛਨ੍ਤੀਤਿ ‘‘ਅਪ੍ਪੇਵ ਨਾਮ ਇਤੋ ਗਤਾ ਯਤ੍ਥ ਵਾ ਤਤ੍ਥ ਵਾ ਕਿਞ੍ਚਿ ਉਚ੍ਛਿਟ੍ਠਭਤ੍ਤਂ ਵਾ ਵਮਿਤਭਤ੍ਤਂ ਵਾ ਗਬ੍ਭਮਲਾਦਿਕਂ ਵਾ ਲਭੇਯ੍ਯਾਮਾ’’ਤਿ ਕਤ੍ਥਚਿਦੇਵ ਅਟ੍ਠਤ੍ਵਾ ਘਾਸਤ੍ਥਾਯ ਗਚ੍ਛਨ੍ਤਿ. ਪਕ੍ਕਮਨ੍ਤਿ ਦਿਸੋਦਿਸਨ੍ਤਿ ਦਿਸਤੋ ਦਿਸਂ ਅਨੇਕਯੋਜਨਨ੍ਤਰਿਕਂ ਠਾਨਂ ਪਕ੍ਕਮਨ੍ਤਿ.

੩੯੩. ਦੂਰੇਤਿ ਦੂਰੇਵ ਠਾਨੇ. ਏਕੇਤਿ ਏਕਚ੍ਚੇ ਪੇਤਾ. ਪਧਾਵਿਤ੍ਵਾਤਿ ਘਾਸਤ੍ਥਾਯ ਉਪਧਾਵਿਤ੍ਵਾ. ਅਲਦ੍ਧਾਵ ਨਿਵਤ੍ਤਰੇਤਿ ਕਿਞ੍ਚਿ ਘਾਸਂ ਵਾ ਪਾਨੀਯਂ ਵਾ ਅਲਭਿਤ੍ਵਾ ਏਵ ਨਿਵਤ੍ਤਨ੍ਤਿ. ਪਮੁਚ੍ਛਿਤਾਤਿ ਖੁਪ੍ਪਿਪਾਸਾਦਿਦੁਕ੍ਖੇਨ ਸਞ੍ਜਾਤਮੁਚ੍ਛਾ. ਭਨ੍ਤਾਤਿ ਪਰਿਬ੍ਭਮਨ੍ਤਾ. ਭੂਮਿਯਂ ਪਟਿਸੁਮ੍ਭਿਤਾਤਿ ਤਾਯ ਏਵ ਮੁਚ੍ਛਾਯ ਉਪ੍ਪਤ੍ਤਿਯਾ ਠਤ੍ਵਾ ਅਵਕ੍ਖਿਤ੍ਤਮਤ੍ਤਿਕਾਪਿਣ੍ਡਾ ਵਿਯ ਵਿਸ੍ਸੁਸ੍ਸਿਤ੍ਵਾ ਪਥਵਿਯਂ ਪਤਿਤਾ.

੩੯੪. ਤਤ੍ਥਾਤਿ ਗਤਟ੍ਠਾਨੇ. ਭੂਮਿਯਂ ਪਟਿਸੁਮ੍ਭਿਤਾਤਿ ਪਪਾਤੇ ਪਤਿਤਾ ਵਿਯ ਜਿਘਚ੍ਛਾਦਿਦੁਕ੍ਖੇਨ ਠਾਤੁਂ ਅਸਮਤ੍ਥਭਾਵੇਨ ਭੂਮਿਯਂ ਪਤਿਤਾ, ਤਤ੍ਥ ਵਾ ਗਤਟ੍ਠਾਨੇ ਘਾਸਾਦੀਨਂ ਅਲਾਭੇਨ ਛਿਨ੍ਨਾਸਾ ਹੁਤ੍ਵਾ ਕੇਨਚਿ ਪਟਿਮੁਖਂ ਸੁਮ੍ਭਿਤਾ ਪੋਥਿਤਾ ਵਿਯ ਭੂਮਿਯਂ ਪਤਿਤਾ ਹੋਨ੍ਤੀਤਿ ਅਤ੍ਥੋ. ਪੁਬ੍ਬੇ ਅਕਤਕਲ੍ਯਾਣਾਤਿ ਪੁਰਿਮਭਵੇ ਅਕਤਕੁਸਲਾ. ਅਗ੍ਗਿਦਡ੍ਢਾਵ ਆਤਪੇਤਿ ਨਿਦਾਘਕਾਲੇ ਆਤਪਟ੍ਠਾਨੇ ਅਗ੍ਗਿਨਾ ਦਡ੍ਢਾ ਵਿਯ, ਖੁਪ੍ਪਿਪਾਸਗ੍ਗਿਨਾ ਡਯ੍ਹਮਾਨਾ ਮਹਾਦੁਕ੍ਖਂ ਅਨੁਭਵਨ੍ਤੀਤਿ ਅਤ੍ਥੋ.

੩੯੫. ਪੁਬ੍ਬੇਤਿ ਅਤੀਤਭਵੇ. ਪਾਪਧਮ੍ਮਾਤਿ ਇਸ੍ਸੁਕੀਮਚ੍ਛਰੀਆਦਿਭਾਵੇਨ ਲਾਮਕਸਭਾਵਾ. ਘਰਣੀਤਿ ਘਰਸਾਮਿਨਿਯੋ. ਕੁਲਮਾਤਰੋਤਿ ਕੁਲਦਾਰਕਾਨਂ ਮਾਤਰੋ, ਕੁਲਪੁਰਿਸਾਨਂ ਵਾ ਮਾਤਰੋ. ਦੀਪਨ੍ਤਿ ਪਤਿਟ੍ਠਂ, ਪੁਞ੍ਞਨ੍ਤਿ ਅਤ੍ਥੋ. ਤਞ੍ਹਿ ਸਤ੍ਤਾਨਂ ਸੁਗਤੀਸੁ ਪਤਿਟ੍ਠਾਭਾਵਤੋ ‘‘ਪਤਿਟ੍ਠਾ’’ਤਿ ਵੁਚ੍ਚਤਿ. ਨਾਕਮ੍ਹਾਤਿ ਨ ਕਰਿਮ੍ਹ.

੩੯੬. ਪਹੂਤਨ੍ਤਿ ਬਹੁਂ. ਅਨ੍ਨਪਾਨਮ੍ਪੀਤਿ ਅਨ੍ਨਞ੍ਚ ਪਾਨਞ੍ਚ. ਅਪਿਸ੍ਸੁ ਅਵਕਿਰੀਯਤੀਤਿ ਸੂਤਿ ਨਿਪਾਤਮਤ੍ਤਂ, ਅਪਿ ਅਵਕਿਰੀਯਤਿ ਛਟ੍ਟੀਯਤਿ. ਸਮ੍ਮਗ੍ਗਤੇਤਿ ਸਮ੍ਮਾ ਗਤੇ ਸਮ੍ਮਾ ਪਟਿਪਨ੍ਨੇ ਸਮ੍ਮਾ ਪਟਿਪਨ੍ਨਾਯ. ਪਬ੍ਬਜਿਤੇਤਿ ਪਬ੍ਬਜਿਤਾਯ. ਸਮ੍ਪਦਾਨੇ ਹਿ ਇਦਂ ਭੁਮ੍ਮਵਚਨਂ. ਸਮ੍ਮਗ੍ਗਤੇ ਵਾ ਪਬ੍ਬਜਿਤੇ ਸਤਿ ਲਬ੍ਭਮਾਨੇਤਿ ਅਤ੍ਥੋ. ਨ ਚ ਕਿਞ੍ਚਿ ਅਦਮ੍ਹਸੇਤਿ ‘‘ਕਿਞ੍ਚਿਮਤ੍ਤਮ੍ਪਿ ਦੇਯ੍ਯਧਮ੍ਮਂ ਨਾਦਮ੍ਹਾ’’ਤਿ ਵਿਪ੍ਪਟਿਸਾਰਾਭਿਭੂਤਾ ਵਦਨ੍ਤਿ.

੩੯੭. ਅਕਮ੍ਮਕਾਮਾਤਿ ਸਾਧੂਤਿ ਅਕਤ੍ਤਬ੍ਬਂ ਕਮ੍ਮਂ ਅਕੁਸਲਂ ਕਾਮੇਨ੍ਤੀਤਿ ਅਕਮ੍ਮਕਾਮਾ, ਸਾਧੂਹਿ ਵਾ ਕਤ੍ਤਬ੍ਬਂ ਕੁਸਲਂ ਕਾਮੇਨ੍ਤੀਤਿ ਕਮ੍ਮਕਾਮਾ, ਨ ਕਮ੍ਮਕਾਮਾਤਿ ਅਕਮ੍ਮਕਾਮਾ, ਕੁਸਲਧਮ੍ਮੇਸੁ ਅਚ੍ਛਨ੍ਦਿਕਾਤਿ ਅਤ੍ਥੋ. ਅਲਸਾਤਿ ਕੁਸੀਤਾ ਕੁਸਲਕਮ੍ਮਕਰਣੇ ਨਿਬ੍ਬੀਰਿਯਾ. ਸਾਦੁਕਾਮਾਤਿ ਸਾਤਮਧੁਰਵਤ੍ਥੁਪਿਯਾ. ਮਹਗ੍ਘਸਾਤਿ ਮਹਾਭੋਜਨਾ, ਉਭਯੇਨਾਪਿ ਸੁਨ੍ਦਰਞ੍ਚ ਮਧੁਰਞ੍ਚ ਭੋਜਨਂ ਲਭਿਤ੍ਵਾ ਅਤ੍ਥਿਕਾਨਂ ਕਿਞ੍ਚਿ ਅਦਤ੍ਵਾ ਸਯਮੇਵ ਭੁਞ੍ਜਿਤਾਰੋਤਿ ਦਸ੍ਸੇਤਿ. ਆਲੋਪਪਿਣ੍ਡਦਾਤਾਰੋਤਿ ਆਲੋਪਮਤ੍ਤਸ੍ਸਪਿ ਭੋਜਨਪਿਣ੍ਡਸ੍ਸ ਦਾਯਕਾ. ਪਟਿਗ੍ਗਹੇਤਿ ਤਸ੍ਸ ਪਟਿਗ੍ਗਣ੍ਹਨਕੇ. ਪਰਿਭਾਸਿਮ੍ਹਸੇਤਿ ਪਰਿਭਵਂ ਕਰੋਨ੍ਤਾ ਭਾਸਿਮ੍ਹ, ਅਵਮਞ੍ਞਿਮ੍ਹ ਉਪ੍ਪਣ੍ਡਿਮ੍ਹਾ ਚਾਤਿ ਅਤ੍ਥੋ.

੩੯੮. ਤੇ ਘਰਾਤਿ ਯਤ੍ਥ ਮਯਂ ਪੁਬ੍ਬੇ ‘‘ਅਮ੍ਹਾਕਂ ਘਰ’’ਨ੍ਤਿ ਮਮਤ੍ਤਂ ਅਕਰਿਮ੍ਹਾ, ਤਾਨਿ ਘਰਾਨਿ ਯਥਾਠਿਤਾਨਿ, ਇਦਾਨਿ ਨੋ ਨ ਕਿਞ੍ਚਿ ਉਪਕਪ੍ਪਤੀਤਿ ਅਧਿਪ੍ਪਾਯੋ. ਤਾ ਚ ਦਾਸਿਯੋ ਤਾਨੇਵਾਭਰਣਾਨਿ ਨੋਤਿ ਏਤ੍ਥਾਪਿ ਏਸੇਵ ਨਯੋ. ਤਤ੍ਥ ਨੋਤਿ ਅਮ੍ਹਾਕਂ. ਤੇਤਿ ਤੇ ਘਰਾਦਿਕੇ. ਅਞ੍ਞੇ ਪਰਿਚਾਰੇਨ੍ਤਿ, ਪਰਿਭੋਗਾਦਿਵਸੇਨ ਵਿਨਿਯੋਗਂ ਕਰੋਨ੍ਤੀਤਿ ਅਤ੍ਥੋ. ਮਯਂ ਦੁਕ੍ਖਸ੍ਸ ਭਾਗਿਨੋਤਿ ਮਯਂ ਪਨ ਪੁਬ੍ਬੇ ਕੇਵਲਂ ਕੀਲ਼ਨਪ੍ਪਸੁਤਾ ਹੁਤ੍ਵਾ ਸਾਪਤੇਯ੍ਯਂ ਪਹਾਯ ਗਮਨੀਯਂ ਅਨੁਗਾਮਿਕਂ ਕਾਤੁਂ ਅਜਾਨਨ੍ਤਾ ਇਦਾਨਿ ਖੁਪ੍ਪਿਪਾਸਾਦਿਦੁਕ੍ਖਸ੍ਸ ਭਾਗਿਨੋ ਭਵਾਮਾਤਿ ਅਤ੍ਤਾਨਂ ਗਰਹਨ੍ਤਾ ਵਦਨ੍ਤਿ.

੩੯੯. ਇਦਾਨਿ ਯਸ੍ਮਾ ਪੇਤਯੋਨਿਤੋ ਚਵਿਤ੍ਵਾ ਮਨੁਸ੍ਸੇਸੁ ਉਪ੍ਪਜ੍ਜਨ੍ਤਾਪਿ ਸਤ੍ਤਾ ਯੇਭੁਯ੍ਯੇਨ ਤਸ੍ਸੇਵ ਕਮ੍ਮਸ੍ਸ ਵਿਪਾਕਾਵਸੇਸੇਨ ਹੀਨਜਾਤਿਕਾ ਕਪਣਵੁਤ੍ਤਿਨੋਵ ਹੋਨ੍ਤਿ, ਤਸ੍ਮਾ ਤਮਤ੍ਥਂ ਦਸ੍ਸੇਤੁਂ ‘‘ਵੇਣਿਵਾ’’ਤਿਆਦਿਨਾ ਦ੍ਵੇ ਗਾਥਾ ਵੁਤ੍ਤਾ. ਤਤ੍ਥ ਵੇਣਿਵਾਤਿ ਵੇਨਜਾਤਿਕਾ, ਵਿਲੀਵਕਾਰਾ ਨਲ਼ਕਾਰਾ ਹੋਨ੍ਤੀਤਿ ਅਤ੍ਥੋ. ਵਾ-ਸਦ੍ਦੋ ਅਨਿਯਮਤ੍ਥੋ. ਅਵਞ੍ਞਾਤਿ ਅਵਞ੍ਞੇਯ੍ਯਾ, ਅਵਜਾਨਿਤਬ੍ਬਾਤਿ ਵੁਤ੍ਤਂ ਹੋਤਿ. ‘‘ਵਮ੍ਭਨਾ’’ਤਿ ਵਾ ਪਾਠੋ, ਪਰੇਹਿ ਬਾਧਨੀਯਾਤਿ ਅਤ੍ਥੋ. ਰਥਕਾਰੀਤਿ ਚਮ੍ਮਕਾਰਿਨੋ. ਦੁਬ੍ਭਿਕਾਤਿ ਮਿਤ੍ਤਦੁਬ੍ਭਿਕਾ ਮਿਤ੍ਤਾਨਂ ਬਾਧਿਕਾ. ਚਣ੍ਡਾਲੀਤਿ ਚਣ੍ਡਾਲਜਾਤਿਕਾ. ਕਪਣਾਤਿ ਵਨਿਬ੍ਬਕਾ ਅਤਿਵਿਯ ਕਾਰੁਞ੍ਞਪ੍ਪਤ੍ਤਾ. ਕਪ੍ਪਕਾਤਿ ਕਪ੍ਪਕਜਾਤਿਕਾ, ਸਬ੍ਬਤ੍ਥ ‘‘ਹੋਨ੍ਤਿ ਪੁਨਪ੍ਪੁਨ’’ਨ੍ਤਿ ਯੋਜਨਾ, ਅਪਰਾਪਰਮ੍ਪਿ ਇਮੇਸੁ ਨਿਹੀਨਕੁਲੇਸੁ ਉਪ੍ਪਜ੍ਜਨ੍ਤੀਤਿ ਵੁਤ੍ਤਂ ਹੋਤਿ.

੪੦੦. ਤੇਸੁ ਤੇਸ੍ਵੇਵ ਜਾਯਨ੍ਤੀਤਿ ਯਾਨਿ ਯਾਨਿ ਅਞ੍ਞਾਨਿਪਿ ਨੇਸਾਦਪੁਕ੍ਕੁਸਕੁਲਾਦੀਨਿ ਕਪਣਾਨਿ ਅਤਿਵਿਯ ਵਮ੍ਭਨਿਯਾਨਿ ਪਰਮਦੁਗ੍ਗਤਾਨਿ ਚ, ਤੇਸੁ ਤੇਸੁ ਏਵ ਨਿਹੀਨਕੁਲੇਸੁ ਮਚ੍ਛਰਿਯਮਲੇਨ ਪੇਤੇਸੁ ਨਿਬ੍ਬਤ੍ਤਿਤ੍ਵਾ ਤਤੋ ਚੁਤਾ ਨਿਬ੍ਬਤ੍ਤਨ੍ਤਿ. ਤੇਨਾਹ ‘‘ਏਸਾ ਮਚ੍ਛਰਿਨੋ ਗਤੀ’’ਤਿ.

੪੦੧. ਏਵਂ ਅਕਤਪੁਞ੍ਞਾਨਂ ਸਤ੍ਤਾਨਂ ਗਤਿਂ ਦਸ੍ਸੇਤ੍ਵਾ ਇਦਾਨਿ ਕਤਪੁਞ੍ਞਾਨਂ ਗਤਿਂ ਦਸ੍ਸੇਤੁਂ ‘‘ਪੁਬ੍ਬੇ ਚ ਕਤਕਲ੍ਯਾਣਾ’’ਤਿ ਸਤ੍ਤ ਗਾਥਾ ਵੁਤ੍ਤਾ. ਤਤ੍ਥ ਸਗ੍ਗਂ ਤੇ ਪਰਿਪੂਰੇਨ੍ਤੀਤਿ ਯੇ ਪੁਬ੍ਬੇ ਪੁਰਿਮਜਾਤਿਯਂ ਕਤਕਲ੍ਯਾਣਾ ਦਾਯਕਾ ਦਾਨਪੁਞ੍ਞਾਭਿਰਤਾ ਵਿਗਤਮਲਮਚ੍ਛੇਰਾ, ਤੇ ਅਤ੍ਤਨੋ ਰੂਪਸਮ੍ਪਤ੍ਤਿਯਾ ਚੇਵ ਪਰਿਵਾਰਸਮ੍ਪਤ੍ਤਿਯਾ ਚ ਸਗ੍ਗਂ ਦੇਵਲੋਕਂ ਪਰਿਪੂਰੇਨ੍ਤਿ ਪਰਿਪੁਣ੍ਣਂ ਕਰੋਨ੍ਤਿ. ਓਭਾਸੇਨ੍ਤਿ ਚ ਨਨ੍ਦਨਨ੍ਤਿ ਨ ਕੇਵਲਂ ਪਰਿਪੂਰੇਨ੍ਤਿਯੇਵ, ਅਥ ਖੋ ਕਪ੍ਪਰੁਕ੍ਖਾਦੀਨਂ ਪਭਾਹਿ ਸਭਾਵੇਨੇਵ ਓਭਾਸਮਾਨਮ੍ਪਿ ਨਨ੍ਦਨਵਨਂ ਅਤ੍ਤਨੋ ਵਤ੍ਥਾਭਰਣਜੁਤੀਹਿ ਸਰੀਰਪ੍ਪਭਾਯ ਚ ਅਭਿਭਵਿਤ੍ਵਾ ਚੇਵ ਓਭਾਸੇਤ੍ਵਾ ਚ ਜੋਤੇਨ੍ਤਿ.

੪੦੨. ਕਾਮਕਾਮਿਨੋਤਿ ਯਥਿਚ੍ਛਿਤੇਸੁ ਕਾਮਗੁਣੇਸੁ ਯਥਾਕਾਮਂ ਪਰਿਭੋਗਵਨ੍ਤੋ. ਉਚ੍ਚਾਕੁਲੇਸੂਤਿ ਉਚ੍ਚੇਸੁ ਖਤ੍ਤਿਯਕੁਲਾਦੀਸੁ ਕੁਲੇਸੁ. ਸਭੋਗੇਸੂਤਿ ਮਹਾਵਿਭਵੇਸੁ. ਤਤੋ ਚੁਤਾਤਿ ਤਤੋ ਦੇਵਲੋਕਤੋ ਚੁਤਾ.

੪੦੩. ਕੂਟਾਗਾਰੇ ਚ ਪਾਸਾਦੇਤਿ ਕੂਟਾਗਾਰੇ ਚ ਪਾਸਾਦੇ ਚ. ਬੀਜਿਤਙ੍ਗਾਤਿ ਬੀਜਿਯਮਾਨਦੇਹਾ. ਮੋਰਹਤ੍ਥੇਹੀਤਿ ਮੋਰਪਿਞ੍ਛਪਟਿਮਣ੍ਡਿਤਬੀਜਨੀਹਤ੍ਥੇਹਿ. ਯਸਸ੍ਸਿਨੋਤਿ ਪਰਿਵਾਰਵਨ੍ਤੋ ਰਮਨ੍ਤੀਤਿ ਅਧਿਪ੍ਪਾਯੋ.

੪੦੪. ਅਙ੍ਕਤੋ ਅਙ੍ਕਂ ਗਚ੍ਛਨ੍ਤੀਤਿ ਦਾਰਕਕਾਲੇਪਿ ਞਾਤੀਨਂ ਧਾਤੀਨਞ੍ਚ ਅਙ੍ਕਟ੍ਠਾਨਤੋ ਅਙ੍ਕਟ੍ਠਾਨਮੇਵ ਗਚ੍ਛਨ੍ਤਿ, ਨ ਭੂਮਿਤਲਨ੍ਤਿ ਅਧਿਪ੍ਪਾਯੋ. ਉਪਤਿਟ੍ਠਨ੍ਤੀਤਿ ਉਪਟ੍ਠਾਨਂ ਕਰੋਨ੍ਤਿ. ਸੁਖੇਸਿਨੋਤਿ ਸੁਖਮਿਚ੍ਛਨ੍ਤਾ, ‘‘ਮਾ ਸੀਤਂ ਵਾ ਉਣ੍ਹਂ ਵਾ’’ਤਿ ਅਪ੍ਪਕਮ੍ਪਿ ਦੁਕ੍ਖਂ ਪਰਿਹਰਨ੍ਤਾ ਉਪਤਿਟ੍ਠਨ੍ਤੀਤਿ ਅਧਿਪ੍ਪਾਯੋ.

੪੦੫. ਨਯਿਦਂ ਅਕਤਪੁਞ੍ਞਾਨਨ੍ਤਿ ਇਦਂ ਸੋਕਵਤ੍ਥੁਅਭਾਵਤੋ ਅਸੋਕਂ ਰਮ੍ਮਂ ਰਮਣੀਯਂ ਤਿਦਸਾਨਂ ਤਾਵਤਿਂਸਦੇਵਾਨਂ ਮਹਾਵਨਂ ਮਹਾਉਪਵਨਭੂਤਂ ਨਨ੍ਦਨਂ ਨਨ੍ਦਨਵਨਂ ਅਕਤਪੁਞ੍ਞਾਨਂ ਨ ਹੋਤਿ, ਤੇਹਿ ਲਦ੍ਧੁਂ ਨ ਸਕ੍ਕਾਤਿ ਅਤ੍ਥੋ.

੪੦੬. ਇਧਾਤਿ ਇਮਸ੍ਮਿਂ ਮਨੁਸ੍ਸਲੋਕੇ ਵਿਸੇਸਤੋ ਪੁਞ੍ਞਂ ਕਰੀਯਤਿ, ਤਂ ਸਨ੍ਧਾਯਾਹ. ਇਧਾਤਿ ਵਾ ਦਿਟ੍ਠਧਮ੍ਮੇ. ਪਰਤ੍ਥਾਤਿ ਸਮ੍ਪਰਾਯੇ.

੪੦੭. ਤੇਸਨ੍ਤਿ ਤੇਹਿ ਯਥਾਵੁਤ੍ਤੇਹਿ ਦੇਵੇਹਿ. ਸਹਬ੍ਯਕਾਮਾਨਨ੍ਤਿ ਸਹਭਾਵਂ ਇਚ੍ਛਨ੍ਤੇਹਿ. ਭੋਗਸਮਙ੍ਗਿਨੋਤਿ ਭੋਗੇਹਿ ਸਮਨ੍ਨਾਗਤਾ, ਦਿਬ੍ਬੇਹਿ ਪਞ੍ਚਕਾਮਗੁਣੇਹਿ ਸਮਪ੍ਪਿਤਾ ਮੋਦਨ੍ਤੀਤਿ ਅਤ੍ਥੋ. ਸੇਸਂ ਉਤ੍ਤਾਨਤ੍ਥਮੇਵ.

ਏਵਂ ਤੇਹਿ ਪੇਤੇਹਿ ਸਾਧਾਰਣਤੋ ਅਤ੍ਤਨਾ ਕਤਕਮ੍ਮਸ੍ਸ ਚ ਗਤਿਯਾ ਪੁਞ੍ਞਕਮ੍ਮਸ੍ਸ ਚ ਗਤਿਯਾ ਪਵੇਦਿਤਾਯ ਸਂਵਿਗ੍ਗਮਨਸ੍ਸ ਕੋਲ਼ਿਯਾਮਚ੍ਚਪਮੁਖਸ੍ਸ ਤਤ੍ਥ ਸਨ੍ਨਿਪਤਿਤਸ੍ਸ ਮਹਾਜਨਸ੍ਸ ਅਜ੍ਝਾਸਯਾਨੁਰੂਪਂ ਭਗਵਾ ਵਿਤ੍ਥਾਰੇਨ ਧਮ੍ਮਂ ਦੇਸੇਸਿ. ਦੇਸਨਾਪਰਿਯੋਸਾਨੇ ਚਤੁਰਾਸੀਤਿਯਾ ਪਾਣਸਹਸ੍ਸਾਨਂ ਧਮ੍ਮਾਭਿਸਮਯੋ ਅਹੋਸੀਤਿ.

ਅਭਿਜ੍ਜਮਾਨਪੇਤਵਤ੍ਥੁਵਣ੍ਣਨਾ ਨਿਟ੍ਠਿਤਾ.

੨. ਸਾਣਵਾਸਿਤ੍ਥੇਰਪੇਤਵਤ੍ਥੁਵਣ੍ਣਨਾ

ਕੁਣ੍ਡਿਨਾਗਰਿਯੋ ਥੇਰੋਤਿ ਇਦਂ ਸਤ੍ਥਰਿ ਵੇਲ਼ੁਵਨੇ ਵਿਹਰਨ੍ਤੇ ਆਯਸ੍ਮਤੋ ਸਾਣਵਾਸਿਤ੍ਥੇਰਸ੍ਸ ਞਾਤਿਪੇਤੇ ਆਰਬ੍ਭ ਵੁਤ੍ਤਂ. ਅਤੀਤੇ ਕਿਰ ਬਾਰਾਣਸਿਯਂ ਕਿਤਵਸ੍ਸ ਨਾਮ ਰਞ੍ਞੋ ਪੁਤ੍ਤੋ ਉਯ੍ਯਾਨਕੀਲ਼ਂ ਕੀਲ਼ਿਤ੍ਵਾ ਨਿਵਤ੍ਤਨ੍ਤੋ ਸੁਨੇਤ੍ਤਂ ਨਾਮ ਪਚ੍ਚੇਕਬੁਦ੍ਧਂ ਪਿਣ੍ਡਾਯ ਚਰਿਤ੍ਵਾ ਨਗਰਤੋ ਨਿਕ੍ਖਮਨ੍ਤਂ ਦਿਸ੍ਵਾ ਇਸ੍ਸਰਿਯਮਦਮਤ੍ਤੋ ਹੁਤ੍ਵਾ ‘‘ਕਥਞ੍ਹਿ ਨਾਮ ਮਯ੍ਹਂ ਅਞ੍ਜਲਿਂ ਅਕਤ੍ਵਾ ਅਯਂ ਮੁਣ੍ਡਕੋ ਗਚ੍ਛਤੀ’’ਤਿ ਪਦੁਟ੍ਠਚਿਤ੍ਤੋ ਹਤ੍ਥਿਕ੍ਖਨ੍ਧਤੋ ਓਤਰਿਤ੍ਵਾ ‘‘ਕਚ੍ਚਿ ਤੇ ਪਿਣ੍ਡਪਾਤੋ ਲਦ੍ਧੋ’’ਤਿ ਆਲਪਨ੍ਤੋ ਹਤ੍ਥਤੋ ਪਤ੍ਤਂ ਗਹੇਤ੍ਵਾ ਪਥਵਿਯਂ ਪਾਤੇਤ੍ਵਾ ਭਿਨ੍ਦਿ. ਅਥ ਨਂ ਸਬ੍ਬਤ੍ਥ ਤਾਦਿਭਾਵਪ੍ਪਤ੍ਤਿਯਾ ਨਿਬ੍ਬਿਕਾਰਂ ਕਰੁਣਾਵਿਪ੍ਫਾਰਸੋਮਨਸ੍ਸਨਿਪਾਤਪਸਨ੍ਨਚਿਤ੍ਤਮੇਵ ਓਲੋਕੇਨ੍ਤਂ ਅਟ੍ਠਾਨਾਘਾਤੇਨ ਦੂਸਿਤਚਿਤ੍ਤੋ ‘‘ਕਿਂ ਮਂ ਕਿਤਵਸ੍ਸ ਰਞ੍ਞੋ ਪੁਤ੍ਤਂ ਨ ਜਾਨਾਸਿ, ਤ੍ਵਂ ਓਲੋਕਯਨ੍ਤੋ ਮਯ੍ਹਂ ਕਿਂ ਕਰਿਸ੍ਸਸੀ’’ਤਿ ਵਤ੍ਵਾ ਅਵਹਸਨ੍ਤੋ ਪਕ੍ਕਾਮਿ. ਪਕ੍ਕਨ੍ਤਮਤ੍ਤਸ੍ਸੇਵ ਚਸ੍ਸ ਨਰਕਗ੍ਗਿਦਾਹਪਟਿਭਾਗੋ ਬਲਵਸਰੀਰਦਾਹੋ ਉਪ੍ਪਜ੍ਜਿ. ਸੋ ਤੇਨ ਮਹਾਸਨ੍ਤਾਪੇਨਾਭਿਭੂਤਕਾਯੋ ਅਤਿਬਾਲ਼੍ਹਂ ਦੁਕ੍ਖਵੇਦਨਾਭਿਤੁਨ੍ਨੋ ਕਾਲਂ ਕਤ੍ਵਾ ਅਵੀਚੀਮਹਾਨਿਰਯੇ ਨਿਬ੍ਬਤ੍ਤਿ.

ਸੋ ਤਤ੍ਥ ਦਕ੍ਖਿਣਪਸ੍ਸੇਨ ਵਾਮਪਸ੍ਸੇਨ ਉਤ੍ਤਾਨੋ ਅਵਕੁਜ੍ਜੋਤਿ ਬਹੂਹਿ ਪਕਾਰੇਹਿ ਪਰਿਵਤ੍ਤਿਤ੍ਵਾ ਚਤੁਰਾਸੀਤਿ ਵਸ੍ਸਸਹਸ੍ਸਾਨਿ ਪਚ੍ਚਿਤ੍ਵਾ ਤਤੋ ਚੁਤੋ ਪੇਤੇਸੁ ਅਪਿਰਿਮਿਤਕਾਲਂ ਖੁਪ੍ਪਿਪਾਸਾਦਿਦੁਕ੍ਖਂ ਅਨੁਭਵਿਤ੍ਵਾ ਤਤੋ ਚੁਤੋ ਇਮਸ੍ਮਿਂ ਬੁਦ੍ਧੁਪ੍ਪਾਦੇ ਕੁਣ੍ਡਿਨਗਰਸ੍ਸ ਸਮੀਪੇ ਕੇਵਟ੍ਟਗਾਮੇ ਨਿਬ੍ਬਤ੍ਤਿ. ਤਸ੍ਸ ਜਾਤਿਸ੍ਸਰਞਾਣਂ ਉਪ੍ਪਜ੍ਜਿ, ਤੇਨ ਸੋ ਪੁਬ੍ਬੇ ਅਤ੍ਤਨਾ ਅਨੁਭੂਤਪੁਬ੍ਬਂ ਦੁਕ੍ਖਂ ਅਨੁਸ੍ਸਰਨ੍ਤੋ ਵਯਪ੍ਪਤ੍ਤੋਪਿ ਪਾਪਭਯੇਨ ਞਾਤਕੇਹਿਪਿ ਸਦ੍ਧਿਂ ਮਚ੍ਛਬਨ੍ਧਨਤ੍ਥਂ ਨ ਗਚ੍ਛਤਿ. ਤੇਸੁ ਗਚ੍ਛਨ੍ਤੇਸੁ ਮਚ੍ਛੇ ਘਾਤੇਤੁਂ ਅਨਿਚ੍ਛਨ੍ਤੋ ਨਿਲੀਯਤਿ, ਗਤੋ ਚ ਜਾਲਂ ਭਿਨ੍ਦਤਿ, ਜੀਵਨ੍ਤੇ ਵਾ ਮਚ੍ਛੇ ਗਹੇਤ੍ਵਾ ਉਦਕੇ ਵਿਸ੍ਸਜ੍ਜੇਤਿ, ਤਸ੍ਸ ਤਂ ਕਿਰਿਯਂ ਅਰੋਚਨ੍ਤਾ ਞਾਤਕਾ ਗੇਹਤੋ ਤਂ ਨੀਹਰਿਂਸੁ. ਏਕੋ ਪਨਸ੍ਸ ਭਾਤਾ ਸਿਨੇਹਬਦ੍ਧਹਦਯੋ ਅਹੋਸਿ.

ਤੇਨ ਚ ਸਮਯੇਨ ਆਯਸ੍ਮਾ ਆਨਨ੍ਦੋ ਕੁਣ੍ਡਿਨਗਰਂ ਉਪਨਿਸ੍ਸਾਯ ਸਾਣਪਬ੍ਬਤੇ ਵਿਹਰਤਿ. ਅਥ ਸੋ ਕੇਵਟ੍ਟਪੁਤ੍ਤੋ ਞਾਤਕੇਹਿ ਪਰਿਚ੍ਚਤ੍ਤੋ ਹੁਤ੍ਵਾ ਇਤੋ ਚਿਤੋ ਚ ਪਰਿਬ੍ਭਮਨ੍ਤੋ ਤਂ ਪਦੇਸਂ ਪਤ੍ਤੋ ਭੋਜਨਵੇਲਾਯ ਥੇਰਸ੍ਸ ਸਨ੍ਤਿਕਂ ਉਪਸਙ੍ਕਮਿ. ਥੇਰੋ ਤਂ ਪੁਚ੍ਛਿਤ੍ਵਾ ਭੋਜਨੇਨ ਅਤ੍ਥਿਕਭਾਵਂ ਞਤ੍ਵਾ ਤਸ੍ਸ ਭਤ੍ਤਂ ਦਤ੍ਵਾ ਕਤਭਤ੍ਤਕਿਚ੍ਚੋ ਸਬ੍ਬਂ ਤਂ ਪਵਤ੍ਤਿਂ ਞਤ੍ਵਾ ਧਮ੍ਮਕਥਾਯ ਪਸਨ੍ਨਮਾਨਸਂ ਞਤ੍ਵਾ ‘‘ਪਬ੍ਬਜਿਸ੍ਸਸਿ, ਆਵੁਸੋ’’ਤਿ? ‘‘ਆਮ, ਭਨ੍ਤੇ, ਪਬ੍ਬਜਿਸ੍ਸਾਮੀ’’ਤਿ. ਥੇਰੋ ਤਂ ਪਬ੍ਬਾਜੇਤ੍ਵਾ ਤੇਨ ਸਦ੍ਧਿਂ ਭਗਵਤੋ ਸਨ੍ਤਿਕਂ ਅਗਮਾਸਿ. ਅਥ ਨਂ ਸਤ੍ਥਾ ਆਹ – ‘‘ਆਨਨ੍ਦ, ਇਮਂ ਸਾਮਣੇਰਂ ਅਨੁਕਮ੍ਪੇਯ੍ਯਾਸੀ’’ਤਿ. ਸੋ ਚ ਅਕਤਕੁਸਲਤ੍ਤਾ ਅਪ੍ਪਲਾਭੋ ਅਹੋਸਿ. ਅਥ ਨਂ ਸਤ੍ਥਾ ਅਨੁਗ੍ਗਣ੍ਹਨ੍ਤੋ ਭਿਕ੍ਖੂਨਂ ਪਰਿਭੋਗਤ੍ਥਾਯ ਪਾਨੀਯਘਟਾਨਂ ਪਰਿਪੂਰਣੇ ਨਿਯੋਜੇਸਿ. ਤਂ ਦਿਸ੍ਵਾ ਉਪਾਸਕਾ ਤਸ੍ਸ ਬਹੂਨਿ ਨਿਚ੍ਚਭਤ੍ਤਾਨਿ ਪਟ੍ਠਪੇਸੁਂ.

ਸੋ ਅਪਰੇਨ ਸਮਯੇਨ ਲਦ੍ਧੂਪਸਮ੍ਪਦੋ ਅਰਹਤ੍ਤਂ ਪਤ੍ਵਾ ਥੇਰੋ ਹੁਤ੍ਵਾ ਦ੍ਵਾਦਸਹਿ ਭਿਕ੍ਖੂਹਿ ਸਦ੍ਧਿਂ ਸਾਣਪਬ੍ਬਤੇ ਵਸਿ. ਤਸ੍ਸ ਪਨ ਞਾਤਕਾ ਪਞ੍ਚਸਤਮਤ੍ਤਾ ਅਨੁਪਚਿਤਕੁਸਲਕਮ੍ਮਾ ਉਪਚਿਤਮਚ੍ਛੇਰਾਦਿਪਾਪਧਮ੍ਮਾ ਕਾਲਂ ਕਤ੍ਵਾ ਪੇਤੇਸੁ ਨਿਬ੍ਬਤ੍ਤਿਂਸੁ. ਤਸ੍ਸ ਪਨ ਮਾਤਾਪਿਤਰੋ ‘‘ਏਸ ਅਮ੍ਹੇਹਿ ਪੁਬ੍ਬੇ ਗੇਹਤੋ ਨਿਕ੍ਕਡ੍ਢਿਤੋ’’ਤਿ ਸਾਰਜ੍ਜਮਾਨਾ ਤਂ ਅਨੁਪਸਙ੍ਕਮਿਤ੍ਵਾ ਤਸ੍ਮਿਂ ਬਦ੍ਧਸਿਨੇਹਂ ਭਾਤਿਕਂ ਪੇਸੇਸੁਂ. ਸੋ ਥੇਰਸ੍ਸ ਗਾਮਂ ਪਿਣ੍ਡਾਯ ਪਵਿਟ੍ਠਸਮਯੇ ਦਕ੍ਖਿਣਜਾਣੁਮਣ੍ਡਲਂ ਪਥਵਿਯਂ ਪਤਿਟ੍ਠਾਪੇਤ੍ਵਾ ਕਤਞ੍ਜਲੀ ਅਤ੍ਤਾਨਂ ਦਸ੍ਸੇਤ੍ਵਾ ‘‘ਮਾਤਾ ਪਿਤਾ ਚ ਤੇ, ਭਨ੍ਤੇ’’ਤਿਆਦਿਗਾਥਾ ਅਵੋਚ. ਕੁਣ੍ਡਿਨਾਗਰਿਯੋ ਥੇਰੋਤਿਆਦਯੋ ਪਨ ਆਦਿਤੋ ਪਞ੍ਚ ਗਾਥਾ ਤਾਸਂ ਸਮ੍ਬਨ੍ਧਦਸ੍ਸਨਤ੍ਥਂ ਧਮ੍ਮਸਙ੍ਗਾਹਕੇਹਿ ਠਪਿਤਾ.

੪੦੮. ‘‘ਕੁਣ੍ਡਿਨਾਗਰਿਯੋ ਥੇਰੋ, ਸਾਣਵਾਸਿਨਿਵਾਸਿਕੋ;

ਪੋਟ੍ਠਪਾਦੋਤਿ ਨਾਮੇਨ, ਸਮਣੋ ਭਾਵਿਤਿਨ੍ਦ੍ਰਿਯੋ.

੪੦੯. ‘‘ਤਸ੍ਸ ਮਾਤਾ ਪਿਤਾ ਭਾਤਾ, ਦੁਗ੍ਗਤਾ ਯਮਲੋਕਿਕਾ;

ਪਾਪਕਮ੍ਮਂ ਕਰਿਤ੍ਵਾਨ, ਪੇਤਲੋਕਂ ਇਤੋ ਗਤਾ.

੪੧੦. ‘‘ਤੇ ਦੁਗ੍ਗਤਾ ਸੂਚਿਕਟ੍ਟਾ, ਕਿਲਨ੍ਤਾ ਨਗ੍ਗਿਨੋ ਕਿਸਾ;

ਉਤ੍ਤਸਨ੍ਤਾ ਮਹਤ੍ਤਾਸਾ, ਨ ਦਸ੍ਸੇਨ੍ਤਿ ਕੁਰੂਰਿਨੋ.

੪੧੧. ‘‘ਤਸ੍ਸ ਭਾਤਾ ਵਿਤਰਿਤ੍ਵਾ, ਨਗ੍ਗੋ ਏਕਪਥੇਕਕੋ;

ਚਤੁਕੁਣ੍ਡਿਕੋ ਭਵਿਤ੍ਵਾਨ, ਥੇਰਸ੍ਸ ਦਸ੍ਸਯੀਤੁਮਂ.

੪੧੨. ‘‘ਥੇਰੋ ਚਾਮਨਸਿਕਤ੍ਵਾ, ਤੁਣ੍ਹੀਭੂਤੋ ਅਤਿਕ੍ਕਮਿ;

ਸੋ ਚ ਵਿਞ੍ਞਾਪਯੀ ਥੇਰਂ, ‘ਭਾਤਾ ਪੇਤਗਤੋ ਅਹਂ’.

੪੧੩. ‘‘ਮਾਤਾ ਪਿਤਾ ਚ ਤੇ ਭਨ੍ਤੇ, ਦੁਗ੍ਗਤਾ ਯਮਲੋਕਿਕਾ;

ਪਾਪਕਮ੍ਮਂ ਕਰਿਤ੍ਵਾਨ, ਪੇਤਲੋਕਂ ਇਤੋ ਗਤਾ.

੪੧੪. ‘‘ਤੇਨ ਦੁਗ੍ਗਤਾ ਸੂਚਿਕਟ੍ਟਾ, ਕਿਲਨ੍ਤਾ ਨਗ੍ਗਿਨੋ ਕਿਸਾ;

ਉਤ੍ਤਸਨ੍ਤਾ ਮਹਤ੍ਤਾਸਾ, ਨ ਦਸ੍ਸੇਨ੍ਤਿ ਕੁਰੂਰਿਨੋ.

੪੧੫. ‘‘ਅਨੁਕਮ੍ਪਸ੍ਸੁ ਕਾਰੁਣਿਕੋ, ਦਤ੍ਵਾ ਅਨ੍ਵਾਦਿਸਾਹਿ ਨੋ;

ਤਵ ਦਿਨ੍ਨੇਨ ਦਾਨੇਨ, ਯਾਪੇਸ੍ਸਨ੍ਤਿ ਕੁਰੂਰਿਨੋ’’ਤਿ.

੪੦੮-੯. ਤਤ੍ਥ ਕੁਣ੍ਡਿਨਾਗਰਿਯੋ ਥੇਰੋਤਿ ਏਵਂਨਾਮਕੇ ਨਗਰੇ ਜਾਤਸਂਵਡ੍ਢਤ੍ਥੇਰੋ, ‘‘ਕੁਣ੍ਡਿਕਨਗਰੋ ਥੇਰੋ’’ਤਿਪਿ ਪਾਠੋ, ਸੋ ਏਵਤ੍ਥੋ. ਸਾਣਵਾਸਿਨਿਵਾਸਿਕੋਤਿ ਸਾਣਪਬ੍ਬਤਵਾਸੀ. ਪੋਟ੍ਠਪਾਦੋਤਿ ਨਾਮੇਨਾਤਿ ਨਾਮੇਨ ਪੋਟ੍ਠਪਾਦੋ ਨਾਮ. ਸਮਣੋਤਿ ਸਮਿਤਪਾਪੋ. ਭਾਵਿਤਿਨ੍ਦ੍ਰਿਯੋਤਿ ਅਰਿਯਮਗ੍ਗਭਾਵਨਾਯ ਭਾਵਿਤਸਦ੍ਧਾਦਿਇਨ੍ਦ੍ਰਿਯੋ, ਅਰਹਾਤਿ ਅਤ੍ਥੋ. ਤਸ੍ਸਾਤਿ ਤਸ੍ਸ ਸਾਣਵਾਸਿਤ੍ਥੇਰਸ੍ਸ. ਦੁਗ੍ਗਤਾਤਿ ਦੁਗ੍ਗਤਿਗਤਾ.

੪੧੦. ਸੂਚਿਕਟ੍ਟਾਤਿ ਪੂਤਿਨਾ ਲੂਖਗਤ੍ਤਾ ਅਟ੍ਟਕਾ, ਸੂਚਿਕਾਤਿ ਲਦ੍ਧਨਾਮਾਯ ਖੁਪ੍ਪਿਪਾਸਾਯ ਅਟ੍ਟਾ ਪੀਲ਼ਿਤਾ. ‘‘ਸੂਚਿਕਣ੍ਠਾ’’ਤਿ ਕੇਚਿ ਪਠਨ੍ਤਿ, ਸੂਚਿਛਿਦ੍ਦਸਦਿਸਮੁਖਦ੍ਵਾਰਾਤਿ ਅਤ੍ਥੋ. ਕਿਲਨ੍ਤਾਤਿ ਕਿਲਨ੍ਤਕਾਯਚਿਤ੍ਤਾ. ਨਗ੍ਗਿਨੋਤਿ ਨਗ੍ਗਰੂਪਾ ਨਿਚ੍ਚੋਲ਼ਾ. ਕਿਸਾਤਿ ਅਟ੍ਠਿਤ੍ਤਚਮਤ੍ਤਸਰੀਰਤਾਯ ਕਿਸਦੇਹਾ. ਉਤ੍ਤਸਨ੍ਤਾਤਿ ‘‘ਅਯਂ ਸਮਣੋ ਅਮ੍ਹਾਕਂ ਪੁਤ੍ਤੋ’’ਤਿ ਓਤ੍ਤਪ੍ਪੇਨ ਉਤ੍ਰਾਸਂ ਆਪਜ੍ਜਨ੍ਤਾ. ਮਹਤ੍ਤਾਸਾਤਿ ਅਤ੍ਤਨਾ ਪੁਬ੍ਬੇ ਕਤਕਮ੍ਮਂ ਪਟਿਚ੍ਚ ਸਞ੍ਜਾਤਮਹਾਭਯਾ. ਨ ਦਸ੍ਸੇਨ੍ਤੀਤਿ ਅਤ੍ਤਾਨਂ ਨ ਦਸ੍ਸੇਨ੍ਤਿ, ਸਮ੍ਮੁਖੀਭਾਵਂ ਨ ਗਚ੍ਛਨ੍ਤਿ. ਕੁਰੂਰਿਨੋਤਿ ਦਾਰੁਣਕਮ੍ਮਨ੍ਤਾ.

੪੧੧. ਤਸ੍ਸ ਭਾਤਾਤਿ ਸਾਣਵਾਸਿਤ੍ਥੇਰਸ੍ਸ ਭਾਤਾ. ਵਿਤਰਿਤ੍ਵਾਤਿ ਵਿਤਿਣ੍ਣੋ ਹੁਤ੍ਵਾ, ਓਤ੍ਤਪ੍ਪਸਨ੍ਤਾਸਭਯਾਤਿ ਅਤ੍ਥੋ. ਵਿਤੁਰਿਤ੍ਵਾਤਿ ਵਾ ਪਾਠੋ, ਤੁਰਿਤੋ ਹੁਤ੍ਵਾ, ਤਰਮਾਨਰੂਪੋ ਹੁਤ੍ਵਾਤਿ ਵੁਤ੍ਤਂ ਹੋਤਿ. ਏਕਪਥੇਤਿ ਏਕਪਦਿਕਮਗ੍ਗੇ. ਏਕਕੋਤਿ ਏਕਿਕੋ ਅਦੁਤਿਯੋ. ਚਤੁਕੁਣ੍ਡਿਕੋ ਭਵਿਤ੍ਵਾਨਾਤਿ ਚਤੂਹਿ ਅਙ੍ਗੇਹਿ ਕੁਣ੍ਡੇਤਿ ਅਤ੍ਤਭਾਵਂ ਪਵਤ੍ਤੇਤੀਤਿ ਚਤੁਕੁਣ੍ਡਿਕੋ, ਦ੍ਵੀਹਿ ਜਾਣੂਹਿ ਦ੍ਵੀਹਿ ਹਤ੍ਥੇਹਿ ਗਚ੍ਛਨ੍ਤੋ ਤਿਟ੍ਠਨ੍ਤੋ ਚ, ਏਵਂਭੂਤੋ ਹੁਤ੍ਵਾਤਿ ਅਤ੍ਥੋ. ਸੋ ਹਿ ਏਵਂ ਪੁਰਤੋ ਕੋਪੀਨਪਟਿਚ੍ਛਾਦਨਾ ਹੋਤੀਤਿ ਤਥਾ ਅਕਾਸਿ. ਥੇਰਸ੍ਸ ਦਸ੍ਸਯੀਤੁਮਨ੍ਤਿ ਥੇਰਸ੍ਸ ਅਤ੍ਤਾਨਂ ਉਦ੍ਦਿਸਯਿ ਦਸ੍ਸੇਸਿ.

੪੧੨. ਅਮਨਸਿਕਤ੍ਵਾਤਿ ‘‘ਅਯਂ ਨਾਮ ਏਸੋ’’ਤਿ ਏਵਂ ਮਨਸਿ ਅਕਰਿਤ੍ਵਾ ਅਨਾਵਜ੍ਜੇਤ੍ਵਾ. ਸੋ ਚਾਤਿ ਸੋ ਪੇਤੋ. ਭਾਤਾ ਪੇਤਗਤੋ ਅਹਨ੍ਤਿ ‘‘ਅਹਂ ਅਤੀਤਤ੍ਤਭਾਵੇ ਭਾਤਾ, ਇਦਾਨਿ ਪੇਤਭੂਤੋ ਇਧਾਗਤੋ’’ਤਿ ਵਤ੍ਵਾ ਵਿਞ੍ਞਾਪਯਿ ਥੇਰਨ੍ਤਿ ਯੋਜਨਾ.

੪੧੩-੫. ਯਥਾ ਪਨ ਵਿਞ੍ਞਾਪਯਿ, ਤਂ ਦਸ੍ਸੇਤੁਂ ‘‘ਮਾਤਾ ਪਿਤਾ ਚਾ’’ਤਿਆਦਿਨਾ ਤਿਸ੍ਸੋ ਗਾਥਾ ਵੁਤ੍ਤਾ. ਤਤ੍ਥ ਮਾਤਾ ਪਿਤਾ ਚ ਤੇਤਿ ਤਵ ਮਾਤਾ ਚ ਪਿਤਾ ਚ. ਅਨੁਕਮ੍ਪਸ੍ਸੂਤਿ ਅਨੁਗ੍ਗਣ੍ਹ ਅਨੁਦਯਂ ਕਰੋਹਿ. ਅਨ੍ਵਾਦਿਸਾਹੀਤਿ ਆਦਿਸ. ਨੋਤਿ ਅਮ੍ਹਾਕਂ. ਤਵ ਦਿਨ੍ਨੇਨਾਤਿ ਤਯਾ ਦਿਨ੍ਨੇਨ.

ਤਂ ਸੁਤ੍ਵਾ ਥੇਰੋ ਯਥਾ ਪਟਿਪਜ੍ਜਿ, ਤਂ ਦਸ੍ਸੇਤੁਂ –

੪੧੬. ‘‘ਥੇਰੋ ਚਰਿਤ੍ਵਾ ਪਿਣ੍ਡਾਯ, ਭਿਕ੍ਖੂ ਅਞ੍ਞੇ ਚ ਦ੍ਵਾਦਸ;

ਏਕਜ੍ਝਂ ਸਨ੍ਨਿਪਤਿਂਸੁ, ਭਤ੍ਤਵਿਸ੍ਸਗ੍ਗਕਾਰਣਾ.

੪੧੭. ‘‘ਥੇਰੋ ਸਬ੍ਬੇਵ ਤੇ ਆਹ, ਯਥਾਲਦ੍ਧਂ ਦਦਾਥ ਮੇ;

ਸਙ੍ਘਭਤ੍ਤਂ ਕਰਿਸ੍ਸਾਮਿ, ਅਨੁਕਮ੍ਪਾਯ ਞਾਤਿਨਂ.

੪੧੮. ‘‘ਨਿਯ੍ਯਾਦਯਿਂਸੁ ਥੇਰਸ੍ਸ, ਥੇਰੋ ਸਙ੍ਘਂ ਨਿਮਨ੍ਤਯਿ;

ਦਤ੍ਵਾ ਅਨ੍ਵਾਦਿਸਿ ਥੇਰੋ, ਮਾਤੁ ਪਿਤੁ ਚ ਭਾਤੁਨੋ;

‘ਇਦਂ ਮੇ ਞਾਤੀਨਂ ਹੋਤੁ, ਸੁਖਿਤਾ ਹੋਨ੍ਤੁ ਞਾਤਯੋ’.

੪੧੯. ‘‘ਸਮਨਨ੍ਤਰਾਨੁਦ੍ਦਿਟ੍ਠੇ, ਭੋਜਨਂ ਉਦਪਜ੍ਜਥ;

ਸੁਚਿਂ ਪਣੀਤਂ ਸਮ੍ਪਨ੍ਨਂ, ਅਨੇਕਰਸਬ੍ਯਞ੍ਜਨਂ.

੪੨੦. ‘‘ਤਤੋ ਉਦ੍ਦਸ੍ਸਯੀ ਭਾਤਾ, ਵਣ੍ਣਵਾ ਬਲਵਾ ਸੁਖੀ;

ਪਹੂਤਂ ਭੋਜਨਂ ਭਨ੍ਤੇ, ਪਸ੍ਸ ਨਗ੍ਗਾਮ੍ਹਸੇ ਮਯਂ;

ਤਥਾ ਭਨ੍ਤੇ ਪਰਕ੍ਕਮ, ਯਥਾ ਵਤ੍ਥਂ ਲਭਾਮਸੇ.

੪੨੧. ‘‘ਥੇਰੋ ਸਙ੍ਕਾਰਕੂਟਮ੍ਹਾ, ਉਚ੍ਚਿਨਿਤ੍ਵਾਨ ਨਨ੍ਤਕੇ;

ਪਿਲੋਤਿਕਂ ਪਟਂ ਕਤ੍ਵਾ, ਸਙ੍ਘੇ ਚਾਤੁਦ੍ਦਿਸੇ ਅਦਾ.

੪੨੨. ‘‘ਦਤ੍ਵਾ ਅਨ੍ਵਾਦਿਸੀ ਥੇਰੋ, ਮਾਤੁ ਪਿਤੁ ਚ ਭਾਤੁਨੋ;

‘ਇਦਂ ਮੇ ਞਾਤੀਨਂ ਹੋਤੁ, ਸੁਖਿਤਾ ਹੋਨ੍ਤੁ ਞਾਤਯੋ’.

੪੨੩. ‘‘ਸਮਨਨ੍ਤਰਾਨੁਦ੍ਦਿਟ੍ਠੇ, ਵਤ੍ਥਾਨਿ ਉਦਪਜ੍ਜਿਸੁਂ;

ਤਤੋ ਸੁਵਤ੍ਥਵਸਨੋ, ਥੇਰਸ੍ਸ ਦਸ੍ਸਯੀਤੁਮਂ.

੪੨੪. ‘‘ਯਾਵਤਾ ਨਨ੍ਦਰਾਜਸ੍ਸ, ਵਿਜਿਤਸ੍ਮਿਂ ਪਟਿਚ੍ਛਦਾ;

ਤਤੋ ਬਹੁਤਰਾ ਭਨ੍ਤੇ, ਵਤ੍ਥਾਨਚ੍ਛਾਦਨਾਨਿ ਨੋ.

੪੨੫. ‘‘ਕੋਸੇਯ੍ਯਕਮ੍ਬਲੀਯਾਨਿ, ਖੋਮਕਪ੍ਪਾਸਿਕਾਨਿ ਚ;

ਵਿਪੁਲਾ ਚ ਮਹਗ੍ਘਾ ਚ, ਤੇਪਾਕਾਸੇਵਲਮ੍ਬਰੇ.

੪੨੬. ‘‘ਤੇ ਮਯਂ ਪਰਿਦਹਾਮ, ਯਂ ਯਞ੍ਹਿ ਮਨਸੋ ਪਿਯਂ;

ਤਥਾ ਭਨ੍ਤੇ ਪਰਕ੍ਕਮ, ਯਥਾ ਗੇਹਂ ਲਭਾਮਸੇ.

੪੨੭. ‘‘ਥੇਰੋ ਪਣ੍ਣਕੁਟਿਂ ਕਤ੍ਵਾ, ਸਙ੍ਘੇ ਚਾਤੁਦ੍ਦਿਸੇ ਅਦਾ;

ਦਤ੍ਵਾ ਚ ਅਨ੍ਵਾਦਿਸੀ ਥੇਰੋ, ਮਾਤੁ ਪਿਤੁ ਚ ਭਾਤੁਨੋ;

‘ਇਦਂ ਮੇ ਞਾਤੀਨਂ ਹੋਤੁ, ਸੁਖਿਤਾ ਹੋਨ੍ਤੁ ਞਾਤਯੋ’.

੪੨੮. ‘‘ਸਮਨਨ੍ਤਰਾਨੁਦ੍ਦਿਟ੍ਠੇ, ਘਰਾਨਿ ਉਦਪਜ੍ਜਿਸੁਂ;

ਕੂਟਾਗਾਰਨਿਵੇਸਨਾ, ਵਿਭਤ੍ਤਾ ਭਾਗਸੋ ਮਿਤਾ.

੪੨੯. ‘‘ਨ ਮਨੁਸ੍ਸੇਸੁ ਈਦਿਸਾ, ਯਾਦਿਸਾ ਨੋ ਘਰਾ ਇਧ;

ਅਪਿ ਦਿਬ੍ਬੇਸੁ ਯਾਦਿਸਾ, ਤਾਦਿਸਾ ਨੋ ਘਰਾ ਇਧ.

੪੩੦. ‘‘ਦਦ੍ਦਲ੍ਲਮਾਨਾ ਆਭੇਨ੍ਤਿ, ਸਮਨ੍ਤਾ ਚਤੁਰੋ ਦਿਸਾ;

ਤਥਾ ਭਨ੍ਤੇ ਪਰਕ੍ਕਮ, ਯਥਾ ਪਾਨੀਯਂ ਲਭਾਮਸੇ.

੪੩੧. ‘‘ਥੇਰੋ ਕਰਣਂ ਪੂਰੇਤ੍ਵਾ, ਸਙ੍ਘੇ ਚਾਤੁਦ੍ਦਿਸੇ ਅਦਾ;

ਦਤ੍ਵਾ ਅਨ੍ਵਾਦਿਸੀ ਥੇਰੋ, ਮਾਤੁ ਪਿਤੁ ਚ ਭਾਤੁਨੋ;

‘ਇਦਂ ਮੇ ਞਾਤੀਨਂ ਹੋਤੁ, ਸੁਖਿਤਾ ਹੋਨ੍ਤੁ ਞਾਤਯੋ’.

੪੩੨. ‘‘ਸਮਨਨ੍ਤਰਾਨੁਦ੍ਦਿਟ੍ਠੇ, ਪਾਨੀਯਂ ਉਦਪਜ੍ਜਥ;

ਗਮ੍ਭੀਰਾ ਚਤੁਰਸ੍ਸਾ ਚ, ਪੋਕ੍ਖਰਞ੍ਞੋ ਸੁਨਿਮ੍ਮਿਤਾ.

੪੩੩. ‘‘ਸੀਤੋਦਿਕਾ ਸੁਪ੍ਪਤਿਤ੍ਥਾ, ਸੀਤਾ ਅਪ੍ਪਟਿਗਨ੍ਧਿਯਾ;

ਪਦੁਮੁਪ੍ਪਲਸਞ੍ਛਨ੍ਨਾ, ਵਾਰਿਕਿਞ੍ਜਕ੍ਖਪੂਰਿਤਾ.

੪੩੪. ‘‘ਤਤ੍ਥ ਨ੍ਹਤ੍ਵਾ ਪਿਵਿਤ੍ਵਾ ਚ, ਥੇਰਸ੍ਸ ਪਟਿਦਸ੍ਸਯੁਂ;

ਪਹੂਤਂ ਪਾਨੀਯਂ ਭਨ੍ਤੇ, ਪਾਦਾ ਦੁਕ੍ਖਾ ਫਲਨ੍ਤਿ ਨੋ.

੪੩੫. ‘‘ਆਹਿਣ੍ਡਮਾਨਾ ਖਞ੍ਜਾਮ, ਸਕ੍ਖਰੇ ਕੁਸਕਣ੍ਟਕੇ;

ਤਥਾ ਭਨ੍ਤੇ ਪਰਕ੍ਕਮ, ਯਥਾ ਯਾਨਂ ਲਭਾਮਸੇ.

੪੩੬. ‘‘ਥੇਰੋ ਸਿਪਾਟਿਕਂ ਲਦ੍ਧਾ, ਸਙ੍ਘੇ ਚਾਤੁਦ੍ਦਿਸੇ ਅਦਾ;

ਦਤ੍ਵਾ ਅਨ੍ਵਾਦਿਸੀ ਥੇਰੋ, ਮਾਤੁ ਪਿਤੁ ਚ ਭਾਤੁਨੋ;

‘ਇਦਂ ਮੇ ਞਾਤੀਨਂ ਹੋਤੁ, ਸੁਖਿਤਾ ਹੋਨ੍ਤੁ ਞਾਤਯੋ’.

੪੩੭. ‘‘ਸਮਨਨ੍ਤਰਾਨੁਦ੍ਦਿਟ੍ਠੇ, ਪੇਤਾ ਰਥੇਨ ਮਾਗਮੁਂ;

ਅਨੁਕਮ੍ਪਿਤਮ੍ਹ ਭਦਨ੍ਤੇ, ਭਤ੍ਤੇਨਚ੍ਛਾਦਨੇਨ ਚ.