੮. ਦੁਤਿਯਮਿਗਲੁਦ੍ਦਕਪੇਤਵਤ੍ਥੁਵਣ੍ਣਨਾ

ਕੂਟਾਗਾਰੇ ਚ ਪਾਸਾਦੇਤਿ ਇਦਂ ਭਗਵਤਿ ਵੇਲ਼ੁਵਨੇ ਵਿਹਰਨ੍ਤੇ ਅਪਰਂ ਮਿਗਲੁਦ੍ਦਕਪੇਤਂ ਆਰਬ੍ਭ ਵੁਤ੍ਤਂ. ਰਾਜਗਹੇ ਕਿਰ ਅਞ੍ਞਤਰੋ ਮਾਗਵਿਕੋ ਮਾਣਵੋ ਵਿਭਵਸਮ੍ਪਨ੍ਨੋਪਿ ਸਮਾਨੋ ਭੋਗਸੁਖਂ ਪਹਾਯ ਰਤ੍ਤਿਨ੍ਦਿਵਂ ਮਿਗੇ ਹਨਨ੍ਤੋ ਵਿਚਰਤਿ. ਤਸ੍ਸ ਸਹਾਯਭੂਤੋ ਏਕੋ ਉਪਾਸਕੋ ਅਨੁਦ੍ਦਯਂ ਪਟਿਚ੍ਚ – ‘‘ਸਾਧੁ, ਸਮ੍ਮ, ਪਾਣਾਤਿਪਾਤਤੋ ਵਿਰਮਾਹਿ, ਮਾ ਤੇ ਅਹੋਸਿ ਦੀਘਰਤ੍ਤਂ ਅਹਿਤਾਯ ਦੁਕ੍ਖਾਯਾ’’ਤਿ ਓਵਾਦਂ ਅਦਾਸਿ. ਸੋ ਤਂ ਅਨਾਦਿਯਿ. ਅਥ ਸੋ ਉਪਾਸਕੋ ਅਞ੍ਞਤਰਂ ਅਤ੍ਤਨੋ ਮਨੋਭਾਵਨੀਯਂ ਖੀਣਾਸਵਤ੍ਥੇਰਂ ਯਾਚਿ – ‘‘ਸਾਧੁ, ਭਨ੍ਤੇ, ਅਸੁਕਪੁਰਿਸਸ੍ਸ ਤਥਾ ਧਮ੍ਮਂ ਦੇਸੇਥ, ਯਥਾ ਸੋ ਪਾਣਾਤਿਪਾਤਤੋ ਵਿਰਮੇਯ੍ਯਾ’’ਤਿ.

ਅਥੇਕਦਿਵਸਂ ਸੋ ਥੇਰੋ ਰਾਜਗਹੇ ਪਿਣ੍ਡਾਯ ਚਰਨ੍ਤੋ ਤਸ੍ਸ ਗੇਹਦ੍ਵਾਰੇ ਅਟ੍ਠਾਸਿ. ਤਂ ਦਿਸ੍ਵਾ ਸੋ ਮਾਗਵਿਕੋ ਸਞ੍ਜਾਤਬਹੁਮਾਨੋ ਪਚ੍ਚੁਗ੍ਗਨ੍ਤ੍ਵਾ ਗੇਹਂ ਪਵੇਸੇਤ੍ਵਾ ਆਸਨਂ ਪਞ੍ਞਾਪੇਤ੍ਵਾ ਅਦਾਸਿ. ਨਿਸੀਦਿ ਥੇਰੋ ਪਞ੍ਞਤ੍ਤੇ ਆਸਨੇ, ਸੋਪਿ ਥੇਰਂ ਉਪਸਙ੍ਕਮਿਤ੍ਵਾ ਨਿਸੀਦਿ. ਤਸ੍ਸ ਥੇਰੋ ਪਾਣਾਤਿਪਾਤੇ ਆਦੀਨਵਂ, ਤਤੋ ਵਿਰਤਿਯਾ ਆਨਿਸਂਸਞ੍ਚ ਪਕਾਸੇਸਿ. ਸੋ ਤਂ ਸੁਤ੍ਵਾਪਿ ਤਤੋ ਵਿਰਮਿਤੁਂ ਨ ਇਚ੍ਛਿ. ਅਥ ਨਂ ਥੇਰੋ ਆਹ – ‘‘ਸਚੇ, ਤ੍ਵਂ ਆਵੁਸੋ, ਸਬ੍ਬੇਨ ਸਬ੍ਬਂ ਵਿਰਮਿਤੁਂ ਨ ਸਕ੍ਕੋਸਿ, ਰਤ੍ਤਿਮ੍ਪਿ ਤਾਵ ਵਿਰਮਸ੍ਸੂ’’ਤਿ, ਸੋ ‘‘ਸਾਧੁ, ਭਨ੍ਤੇ, ਵਿਰਮਾਮਿ ਰਤ੍ਤਿ’’ਨ੍ਤਿ ਤਤੋ ਵਿਰਮਿ. ਸੇਸਂ ਅਨਨ੍ਤਰਵਤ੍ਥੁਸਦਿਸਂ. ਗਾਥਾਸੁ ਪਨ –

੪੮੮. ‘‘ਕੂਟਾਗਾਰੇ ਚ ਪਾਸਾਦੇ, ਪਲ੍ਲਙ੍ਕੇ ਗੋਨਕਤ੍ਥਤੇ;

ਪਞ੍ਚਙ੍ਗਿਕੇਨ ਤੁਰਿਯੇਨ, ਰਮਸਿ ਸੁਪ੍ਪਵਾਦਿਤੇ.

੪੮੯. ‘‘ਤਤੋ ਰਤ੍ਯਾ ਵਿਵਸਾਨੇ, ਸੂਰਿਯੁਗ੍ਗਮਨਂ ਪਤਿ;

ਅਪਵਿਦ੍ਧੋ ਸੁਸਾਨਸ੍ਮਿਂ, ਬਹੁਦੁਕ੍ਖਂ ਨਿਗਚ੍ਛਸਿ.

੪੯੦. ‘‘ਕਿਂ ਨੁ ਕਾਯੇਨ ਵਾਚਾਯ, ਮਨਸਾ ਦੁਕ੍ਕਟਂ ਕਤਂ;

ਕਿਸ੍ਸਕਮ੍ਮਵਿਪਾਕੇਨ, ਇਦਂ ਦੁਕ੍ਖਂ ਨਿਗਚ੍ਛਸੀ’’ਤਿ. –

ਤੀਹਿ ਗਾਥਾਹਿ ਨਾਰਦਤ੍ਥੇਰੋ ਨਂ ਪਟਿਪੁਚ੍ਛਿ. ਅਥਸ੍ਸ ਪੇਤੋ –

੪੯੧. ‘‘ਅਹਂ ਰਾਜਗਹੇ ਰਮ੍ਮੇ, ਰਮਣੀਯੇ ਗਿਰਿਬ੍ਬਜੇ;

ਮਿਗਲੁਦ੍ਦੋ ਪੁਰੇ ਆਸਿਂ, ਲੁਦ੍ਦੋ ਚਾਸਿਮਸਞ੍ਞਤੋ.

੪੯੨. ‘‘ਤਸ੍ਸ ਮੇ ਸਹਾਯੋ ਸੁਹਦਯੋ, ਸਦ੍ਧੋ ਆਸਿ ਉਪਾਸਕੋ;

ਤਸ੍ਸ ਕੁਲੂਪਕੋ ਭਿਕ੍ਖੁ, ਆਸਿ ਗੋਤਮਸਾਵਕੋ;

ਸੋਪਿ ਮਂ ਅਨੁਕਮ੍ਪਨ੍ਤੋ, ਨਿਵਾਰੇਸਿ ਪੁਨਪ੍ਪੁਨਂ.

੪੯੩. ‘‘‘ਮਾਕਾਸਿ ਪਾਪਕਂ ਕਮ੍ਮਂ, ਮਾ ਤਾਤ ਦੁਗ੍ਗਤਿਂ ਅਗਾ;

ਸਚੇ ਇਚ੍ਛਸਿ ਪੇਚ੍ਚ ਸੁਖਂ, ਵਿਰਮ ਪਾਣਵਧਾ ਅਸਂਯਮਾ’.

੪੯੪. ‘‘ਤਸ੍ਸਾਹਂ ਵਚਨਂ ਸੁਤ੍ਵਾ, ਸੁਖਕਾਮਸ੍ਸ ਹਿਤਾਨੁਕਮ੍ਪਿਨੋ;

ਨਾਕਾਸਿਂ ਸਕਲਾਨੁਸਾਸਨਿਂ, ਚਿਰਪਾਪਾਭਿਰਤੋ ਅਬੁਦ੍ਧਿਮਾ.

੪੯੫. ‘‘ਸੋ ਮਂ ਪੁਨ ਭੂਰਿਸੁਮੇਧਸੋ, ਅਨੁਕਮ੍ਪਾਯ ਸਂਯਮੇ ਨਿਵੇਸਯਿ;

‘ਸਚੇ ਦਿਵਾ ਹਨਸਿ ਪਾਣਿਨੋ, ਅਥ ਤੇ ਰਤ੍ਤਿਂ ਭਵਤੁ ਸਂਯਮੋ’.

੪੯੬. ‘‘ਸ੍ਵਾਹਂ ਦਿਵਾ ਹਨਿਤ੍ਵਾ ਪਾਣਿਨੋ, ਵਿਰਤੋ ਰਤ੍ਤਿਮਹੋਸਿ ਸਞ੍ਞਤੋ;

ਰਤ੍ਤਾਹਂ ਪਰਿਚਾਰੇਮਿ, ਦਿਵਾ ਖਜ੍ਜਾਮਿ ਦੁਗ੍ਗਤੋ.

੪੯੭. ‘‘ਤਸ੍ਸ ਕਮ੍ਮਸ੍ਸ ਕੁਸਲਸ੍ਸ, ਅਨੁਭੋਮਿ ਰਤ੍ਤਿਂ ਅਮਾਨੁਸਿਂ;

ਦਿਵਾ ਪਟਿਹਤਾਵ ਕੁਕ੍ਕੁਰਾ, ਉਪਧਾਵਨ੍ਤਿ ਸਮਨ੍ਤਾ ਖਾਦਿਤੁਂ.

੪੯੮. ‘‘ਯੇ ਚ ਤੇ ਸਤਤਾਨੁਯੋਗਿਨੋ, ਧੁਵਂ ਪਯੁਤ੍ਤਾ ਸੁਗਤਸ੍ਸ ਸਾਸਨੇ;

ਮਞ੍ਞਾਮਿ ਤੇ ਅਮਤਮੇਵ ਕੇਵਲਂ, ਅਧਿਗਚ੍ਛਨ੍ਤਿ ਪਦਂ ਅਸਙ੍ਖਤ’’ਨ੍ਤਿ. –

ਤਮਤ੍ਥਂ ਆਚਿਕ੍ਖਿ. ਤਾਸਂ ਅਤ੍ਥੋ ਹੇਟ੍ਠਾ ਵੁਤ੍ਤਨਯੋਵ.

ਦੁਤਿਯਮਿਗਲੁਦ੍ਦਕਪੇਤਵਤ੍ਥੁਵਣ੍ਣਨਾ ਨਿਟ੍ਠਿਤਾ.