੭. ਮਿਗਲੁਦ੍ਦਕਪੇਤਵਤ੍ਥੁਵਣ੍ਣਨਾ

ਨਰਨਾਰਿਪੁਰਕ੍ਖਤੋ ਯੁਵਾਤਿ ਇਦਂ ਭਗਵਤਿ ਵੇਲ਼ੁਵਨੇ ਵਿਹਰਨ੍ਤੇ ਮਿਗਲੁਦ੍ਦਕਪੇਤਂ ਆਰਬ੍ਭ ਵੁਤ੍ਤਂ. ਰਾਜਗਹੇ ਕਿਰ ਅਞ੍ਞਤਰੋ ਲੁਦ੍ਦਕੋ ਰਤ੍ਤਿਨ੍ਦਿਵਂ ਮਿਗੇ ਵਧਿਤ੍ਵਾ ਜੀਵਿਕਂ ਕਪ੍ਪੇਸਿ. ਤਸ੍ਸੇਕੋ ਉਪਾਸਕੋ ਮਿਤ੍ਤੋ ਅਹੋਸਿ, ਸੋ ਤਂ ਸਬ੍ਬਕਾਲਂ ਪਾਪਤੋ ਨਿਵਤ੍ਤੇਤੁਂ ਅਸਕ੍ਕੋਨ੍ਤੋ ‘‘ਏਹਿ, ਸਮ੍ਮ, ਰਤ੍ਤਿਯਂ ਪਾਣਾਤਿਪਾਤਾ ਵਿਰਮਾਹੀ’’ਤਿ ਰਤ੍ਤਿਯਂ ਪੁਞ੍ਞੇ ਸਮਾਦਪੇਸਿ. ਸੋ ਰਤ੍ਤਿਯਂ ਵਿਰਮਿਤ੍ਵਾ ਦਿਵਾ ਏਵ ਪਾਣਾਤਿਪਾਤਂ ਕਰੋਤਿ.

ਸੋ ਅਪਰੇਨ ਸਮਯੇਨ ਕਾਲਂ ਕਤ੍ਵਾ ਰਾਜਗਹਸਮੀਪੇ ਵੇਮਾਨਿਕਪੇਤੋ ਹੁਤ੍ਵਾ ਨਿਬ੍ਬਤ੍ਤੋ, ਦਿਵਸਭਾਗਂ ਮਹਾਦੁਕ੍ਖਂ ਅਨੁਭਵਿਤ੍ਵਾ ਰਤ੍ਤਿਯਂ ਪਞ੍ਚਹਿ ਕਾਮਗੁਣੇਹਿ ਸਮਪ੍ਪਿਤਾ ਸਮਙ੍ਗੀਭੂਤੋ ਪਰਿਚਾਰੇਸਿ. ਤਂ ਦਿਸ੍ਵਾ ਆਯਸ੍ਮਾ ਨਾਰਦੋ –

੪੭੮. ‘‘ਨਰਨਾਰਿਪੁਰਕ੍ਖਤੋ ਯੁਵਾ, ਰਜਨੀਯੇਹਿ ਕਾਮਗੁਣੇਹਿ ਸੋਭਸਿ;

ਦਿਵਸਂ ਅਨੁਭੋਸਿ ਕਾਰਣਂ, ਕਿਮਕਾਸਿ ਪੁਰਿਮਾਯ ਜਾਤਿਯਾ’’ਤਿ. –

ਇਮਾਯ ਗਾਥਾਯ ਪਟਿਪੁਚ੍ਛਿ. ਤਤ੍ਥ ਨਰਨਾਰਿਪੁਰਕ੍ਖਤੋਤਿ ਪਰਿਚਾਰਕਭੂਤੇਹਿ ਦੇਵਪੁਤ੍ਤੇਹਿ ਦੇਵਧੀਤਾਹਿ ਚ ਪੁਰਕ੍ਖਤੋ ਪਯਿਰੁਪਾਸਿਤੋ. ਯੁਵਾਤਿ ਤਰੁਣੋ. ਰਜਨੀਯੇਹੀਤਿ ਕਮਨੀਯੇਹਿ ਰਾਗੁਪ੍ਪਤ੍ਤਿਹੇਤੁਭੂਤੇਹਿ. ਕਾਮਗੁਣੇਹੀਤਿ ਕਾਮਕੋਟ੍ਠਾਸੇਹਿ. ਸੋਭਸੀਤਿ ਸਮਙ੍ਗਿਭਾਵੇਨ ਵਿਰੋਚਸਿ ਰਤ੍ਤਿਯਨ੍ਤਿ ਅਧਿਪ੍ਪਾਯੋ. ਤੇਨਾਹ ‘‘ਦਿਵਸਂ ਅਨੁਭੋਸਿ ਕਾਰਣ’’ਨ੍ਤਿ, ਦਿਵਸਭਾਗੇ ਪਨ ਨਾਨਪ੍ਪਕਾਰਂ ਕਾਰਣਂ ਘਾਤਨਂ ਪਚ੍ਚਨੁਭਵਸਿ. ਰਜਨੀਤਿ ਵਾ ਰਤ੍ਤੀਸੁ. ਯੇਹੀਤਿ ਨਿਪਾਤਮਤ੍ਤਂ. ਕਿਮਕਾਸਿ ਪੁਰਿਮਾਯ ਜਾਤਿਯਾਤਿ ਏਵਂ ਸੁਖਦੁਕ੍ਖਸਂਵਤ੍ਤਨਿਯਂ ਕਿਂ ਨਾਮ ਕਮ੍ਮਂ ਇਤੋ ਪੁਰਿਮਾਯ ਜਾਤਿਯਾ ਤ੍ਵਂ ਅਕਤ੍ਥ, ਤਂ ਕਥੇਹੀਤਿ ਅਤ੍ਥੋ.

ਤਂ ਸੁਤ੍ਵਾ ਪੇਤੋ ਥੇਰਸ੍ਸ ਅਤ੍ਤਨਾ ਕਤਕਮ੍ਮਂ ਆਚਿਕ੍ਖਨ੍ਤੋ –

੪੭੯. ‘‘ਅਹਂ ਰਾਜਗਹੇ ਰਮ੍ਮੇ, ਰਮਣੀਯੇ ਗਿਰਿਬ੍ਬਜੇ;

ਮਿਗਲੁਦ੍ਦੋ ਪੁਰੇ ਆਸਿਂ, ਲੋਹਿਤਪਾਣਿ ਦਾਰੁਣੋ.

੪੮੦. ‘‘ਅਵਿਰੋਧਕਰੇਸੁ ਪਾਣਿਸੁ, ਪੁਥੁਸਤ੍ਤੇਸੁ ਪਦੁਟ੍ਠਮਾਨਸੋ;

ਵਿਚਰਿਂ ਅਤਿਦਾਰੁਣੋ ਸਦਾ, ਪਰਹਿਂਸਾਯ ਰਤੋ ਅਸਞ੍ਞਤੋ.

੪੮੧. ‘‘ਤਸ੍ਸ ਮੇ ਸਹਾਯੋ ਸੁਹਦਯੋ, ਸਦ੍ਧੋ ਆਸਿ ਉਪਾਸਕੋ;

ਸੋਪਿ ਮਂ ਅਨੁਕਮ੍ਪਨ੍ਤੋ, ਨਿਵਾਰੇਸਿ ਪੁਨਪ੍ਪੁਨਂ.

੪੮੨. ‘‘‘ਮਾਕਾਸਿ ਪਾਪਕਂ ਕਮ੍ਮਂ, ਮਾ ਤਾਤ ਦੁਗ੍ਗਤਿਂ ਅਗਾ;

ਸਚੇ ਇਚ੍ਛਸਿ ਪੇਚ੍ਚ ਸੁਖਂ, ਵਿਰਮ ਪਾਣਵਧਾ ਅਸਂਯਮਾ.

੪੮੩. ‘‘ਤਸ੍ਸਾਹਂ ਵਚਨਂ ਸੁਤ੍ਵਾ, ਸੁਖਕਾਮਸ੍ਸ ਹਿਤਾਨੁਕਮ੍ਪਿਨੋ;

ਨਾਕਾਸਿਂ ਸਕਲਾਨੁਸਾਸਨਿਂ, ਚਿਰਪਾਪਾਭਿਰਤੋ ਅਬੁਦ੍ਧਿਮਾ.

੪੮੪. ‘‘ਸੋ ਮਂ ਪੁਨ ਭੂਰਿਸੁਮੇਧਸੋ, ਅਨੁਕਮ੍ਪਾਯ ਸਂਯਮੇ ਨਿਵੇਸਯਿ;

ਸਚੇ ਦਿਵਾ ਹਨਸਿ ਪਾਣਿਨੋ, ਅਥ ਤੇ ਰਤ੍ਤਿਂ ਭਵਤੁ ਸਂਯਮੋ.

੪੮੫. ‘‘ਸ੍ਵਾਹਂ ਦਿਵਾ ਹਨਿਤ੍ਵਾ ਪਾਣਿਨੋ, ਵਿਰਤੋ ਰਤ੍ਤਿਮਹੋਸਿ ਸਞ੍ਞਤੋ;

ਰਤ੍ਤਾਹਂ ਪਰਿਚਾਰੇਮਿ, ਦਿਵਾ ਖਜ੍ਜਾਮਿ ਦੁਗ੍ਗਤੋ.

੪੮੬. ‘‘ਤਸ੍ਸ ਕਮ੍ਮਸ੍ਸ ਕੁਸਲਸ੍ਸ, ਅਨੁਭੋਮਿ ਰਤ੍ਤਿਂ ਅਮਾਨੁਸਿਂ;

ਦਿਵਾ ਪਟਿਹਤਾਵ ਕੁਕ੍ਕੁਰਾ, ਉਪਧਾਵਨ੍ਤਿ ਸਮਨ੍ਤਾ ਖਾਦਿਤੁਂ.

੪੮੭. ‘‘ਯੇ ਚ ਤੇ ਸਤਤਾਨੁਯੋਗਿਨੋ, ਧੁਵਂ ਪਯੁਤ੍ਤਾ ਸੁਗਤਸ੍ਸ ਸਾਸਨੇ;

ਮਞ੍ਞਾਮਿ ਤੇ ਅਮਤਮੇਵ ਕੇਵਲਂ, ਅਧਿਗਚ੍ਛਨ੍ਤਿ ਪਦਂ ਅਸਙ੍ਖਤ’’ਨ੍ਤਿ. –

ਇਮਾ ਗਾਥਾ ਅਭਾਸਿ.

੪੭੯-੮੦. ਤਤ੍ਥ ਲੁਦ੍ਦੋਤਿ ਦਾਰੁਣੋ. ਲੋਹਿਤਪਾਣੀਤਿ ਅਭਿਣ੍ਹਂ ਪਾਣਘਾਤੇਨ ਲੋਹਿਤਮਕ੍ਖਿਤਪਾਣੀ. ਦਾਰੁਣੋਤਿ ਖਰੋ, ਸਤ੍ਤਾਨਂ ਹਿਂਸਨਕੋਤਿ ਅਤ੍ਥੋ. ਅਵਿਰੋਧਕਰੇਸੂਤਿ ਕੇਨਚਿ ਵਿਰੋਧਂ ਅਕਰੋਨ੍ਤੇਸੁ ਮਿਗਸਕੁਣਾਦੀਸੁ.

੪੮੨-੮੩. ਅਸਂਯਮਾਤਿ ਅਸਂਵਰਾ ਦੁਸ੍ਸੀਲ੍ਯਾ. ਸਕਲਾਨੁਸਾਸਨਿਨ੍ਤਿ ਸਬ੍ਬਂ ਅਨੁਸਾਸਨਿਂ, ਸਬ੍ਬਕਾਲਂ ਪਾਣਾਤਿਪਾਤਤੋ ਪਟਿਵਿਰਤਿਨ੍ਤਿ ਅਤ੍ਥੋ. ਚਿਰਪਾਪਾਭਿਰਤੋਤਿ ਚਿਰਕਾਲਂ ਪਾਪੇ ਅਭਿਰਤੋ.

੪੮੪. ਸਂਯਮੇਤਿ ਸੁਚਰਿਤੇ. ਨਿਵੇਸਯੀਹਿ ਨਿਵੇਸੇਸਿ. ਸਚੇ ਦਿਵਾ ਹਨਸਿ ਪਾਣਿਨੋ, ਅਥ ਤੇ ਰਤ੍ਤਿਂ ਭਵਤੁ ਸਂਯਮੋਤਿ ਨਿਵੇਸਿਤਾਕਾਰਦਸ੍ਸਨਂ. ਸੋ ਕਿਰ ਸਲ੍ਲਪਾਸਸਜ੍ਜਨਾਦਿਨਾ ਰਤ੍ਤਿਯਮ੍ਪਿ ਪਾਣਵਧਂ ਅਨੁਯੁਤ੍ਤੋ ਅਹੋਸਿ.

੪੮੫. ਦਿਵਾ ਖਜ੍ਜਾਮਿ ਦੁਗ੍ਗਤੋਤਿ ਇਦਾਨਿ ਦੁਗ੍ਗਤਿਂ ਗਤੋ ਮਹਾਦੁਕ੍ਖਪ੍ਪਤ੍ਤੋ ਦਿਵਸਭਾਗੇ ਖਾਦਿਯਾਮਿ. ਤਸ੍ਸ ਕਿਰ ਦਿਵਾ ਸੁਨਖੇਹਿ ਮਿਗਾਨਂ ਖਾਦਾਪਿਤਤ੍ਤਾ ਕਮ੍ਮਸਰਿਕ੍ਖਕਂ ਫਲਂ ਹੋਤਿ, ਦਿਵਸਭਾਗੇ ਮਹਨ੍ਤਾ ਸੁਨਖਾ ਉਪਧਾਵਿਤ੍ਵਾ ਅਟ੍ਠਿਸਙ੍ਘਾਤਮਤ੍ਤਾਵਸੇਸਂ ਸਰੀਰਂ ਕਰੋਨ੍ਤਿ. ਰਤ੍ਤਿਯਾ ਪਨ ਉਪਗਤਾਯ ਤਂ ਪਾਕਤਿਕਮੇਵ ਹੋਤਿ, ਦਿਬ੍ਬਸਮ੍ਪਤ੍ਤਿਂ ਅਨੁਭਵਤਿ. ਤੇਨ ਵੁਤ੍ਤਂ –

੪੮੬. ‘‘ਤਸ੍ਸ ਕਮ੍ਮਸ੍ਸ ਕੁਸਲਸ੍ਸ, ਅਨੁਭੋਮਿ ਰਤ੍ਤਿਂ ਅਮਾਨੁਸਿਂ;

ਦਿਵਾ ਪਟਿਹਤਾਵ ਕੁਕ੍ਕੁਰਾ, ਉਪਧਾਵਨ੍ਤਿ ਸਮਨ੍ਤਾ ਖਾਦਿਤੁ’’ਨ੍ਤਿ.

ਤਤ੍ਥ ਪਟਿਹਤਾਤਿ ਪਟਿਹਤਚਿਤ੍ਤਾ ਬਦ੍ਧਾਘਾਤਾ ਵਿਯ ਹੁਤ੍ਵਾ. ਸਮਨ੍ਤਾ ਖਾਦਿਤੁਨ੍ਤਿ ਮਮ ਸਰੀਰਂ ਸਮਨ੍ਤਤੋ ਖਾਦਿਤੁਂ ਉਪਧਾਵਨ੍ਤਿ. ਇਦਞ੍ਚ ਨੇਸਂ ਅਤਿਵਿਯ ਅਤ੍ਤਨੋ ਭਯਾਵਹਂ ਉਪਗਮਨਕਾਲਂ ਗਹੇਤ੍ਵਾ ਵੁਤ੍ਤਂ. ਤੇ ਪਨ ਉਪਧਾਵਿਤ੍ਵਾ ਅਟ੍ਠਿਮਤ੍ਤਾਵਸੇਸਂ ਸਰੀਰਂ ਕਤ੍ਵਾ ਗਚ੍ਛਨ੍ਤਿ.

੪੮੭. ਯੇ ਚ ਤੇ ਸਤਤਾਨੁਯੋਗਿਨੋਤਿ ਓਸਾਨਗਾਥਾਯ ਅਯਂ ਸਙ੍ਖੇਪਤ੍ਥੋ – ਅਹਮ੍ਪਿ ਨਾਮ ਰਤ੍ਤਿਯਂ ਪਾਣਵਧਮਤ੍ਤਤੋ ਵਿਰਤੋ ਏਵਰੂਪਂ ਸਮ੍ਪਤ੍ਤਿਂ ਅਨੁਭਵਾਮਿ. ਯੇ ਪਨ ਤੇ ਪੁਰਿਸਾ ਸੁਗਤਸ੍ਸ ਬੁਦ੍ਧਸ੍ਸ ਭਗਵਤੋ ਸਾਸਨੇ ਅਧਿਸੀਲਾਦਿਕੇ ਧੁਵਂ ਪਯੁਤ੍ਤਾ ਦਲ਼੍ਹਂ ਪਯੁਤ੍ਤਾ ਸਤਤਂ ਸਬ੍ਬਕਾਲਂ ਅਨੁਯੋਗਵਨ੍ਤਾ, ਤੇ ਪੁਞ੍ਞਵਨ੍ਤੋ ਕੇਵਲਂ ਲੋਕਿਯਸੁਖੇਨ ਅਸਮ੍ਮਿਸ੍ਸਂ ‘‘ਅਸਙ੍ਖਤਂ ਪਦ’’ਨ੍ਤਿ ਲਦ੍ਧਨਾਮਂ ਅਮਤਮੇਵ ਅਧਿਗਚ੍ਛਨ੍ਤਿ ਮਞ੍ਞੇ, ਨਤ੍ਥਿ ਤੇਸਂ ਤਦਧਿਗਮੇ ਕੋਚਿ ਵਿਬਨ੍ਧੋਤਿ.

ਏਵਂ ਤੇਨ ਪੇਤੇਨ ਵੁਤ੍ਤੇ ਥੇਰੋ ਤਂ ਪਵਤ੍ਤਿਂ ਸਤ੍ਥੁ ਆਰੋਚੇਸਿ. ਸਤ੍ਥਾ ਤਮਤ੍ਥਂ ਅਟ੍ਠੁਪ੍ਪਤ੍ਤਿਂ ਕਤ੍ਵਾ ਸਮ੍ਪਤ੍ਤਪਰਿਸਾਯ ਧਮ੍ਮਂ ਦੇਸੇਸਿ. ਸਬ੍ਬਮ੍ਪਿ ਵੁਤ੍ਤਨਯਮੇਵ.

ਮਿਗਲੁਦ੍ਦਕਪੇਤਵਤ੍ਥੁਵਣ੍ਣਨਾ ਨਿਟ੍ਠਿਤਾ.