੬. ਸੇਰਿਣੀਪੇਤਿਵਤ੍ਥੁਵਣ੍ਣਨਾ

ਨਗ੍ਗਾ ਦੁਬ੍ਬਣ੍ਣਰੂਪਾਸੀਤਿ ਇਦਂ ਸਤ੍ਥਰਿ ਜੇਤਵਨੇ ਵਿਹਰਨ੍ਤੇ ਸੇਰਿਣੀਪੇਤਿਂ ਆਰਬ੍ਭ ਵੁਤ੍ਤਂ. ਕੁਰੁਰਟ੍ਠੇ ਕਿਰ ਹਤ੍ਥਿਨਿਪੁਰੇ ਸੇਰਿਣੀ ਨਾਮ ਏਕਾ ਰੂਪੂਪਜੀਵਿਨੀ ਅਹੋਸਿ. ਤਤ੍ਥ ਚ ਉਪੋਸਥਕਰਣਤ੍ਥਾਯ ਤਤੋ ਤਤੋ ਭਿਕ੍ਖੂ ਸਨ੍ਨਿਪਤਿਂਸੁ. ਪੁਨ ਮਹਾਭਿਕ੍ਖੁਸਨ੍ਨਿਪਾਤੋ ਅਹੋਸਿ. ਤਂ ਦਿਸ੍ਵਾ ਮਨੁਸ੍ਸਾ ਤਿਲਤਣ੍ਡੁਲਾਦਿਂ ਸਪ੍ਪਿਨਵਨੀਤਮਧੁਆਦਿਞ੍ਚ ਬਹੁਂ ਦਾਨੂਪਕਰਣਂ ਸਜ੍ਜੇਤ੍ਵਾ ਮਹਾਦਾਨਂ ਪਵਤ੍ਤੇਸੁਂ. ਤੇਨ ਚ ਸਮਯੇਨ ਸਾ ਗਣਿਕਾ ਅਸ੍ਸਦ੍ਧਾ ਅਪ੍ਪਸਨ੍ਨਾ ਮਚ੍ਛੇਰਮਲਪਰਿਯੁਟ੍ਠਿਤਚਿਤ੍ਤਾ ਤੇਹਿ ਮਨੁਸ੍ਸੇਹਿ ‘‘ਏਹਿ ਤਾਵ ਇਦਂ ਦਾਨਂ ਅਨੁਮੋਦਾਹੀ’’ਤਿ ਉਸ੍ਸਾਹਿਤਾਪਿ ‘‘ਕਿਂ ਤੇਨ ਮੁਣ੍ਡਕਾਨਂ ਸਮਣਾਨਂ ਦਿਨ੍ਨੇਨਾ’’ਤਿ ਅਪ੍ਪਸਾਦਮੇਵ ਨੇਸਂ ਸਮ੍ਪਵੇਦੇਸਿ, ਕੁਤੋ ਅਪ੍ਪਮਤ੍ਤਕਸ੍ਸ ਪਰਿਚ੍ਚਾਗੋ.

ਸਾ ਅਪਰੇਨ ਸਮਯੇਨ ਕਾਲਂ ਕਤ੍ਵਾ ਅਞ੍ਞਤਰਸ੍ਸ ਪਚ੍ਚਨ੍ਤਨਗਰਸ੍ਸ ਪਰਿਖਾਪਿਟ੍ਠੇ ਪੇਤੀ ਹੁਤ੍ਵਾ ਨਿਬ੍ਬਤ੍ਤਿ. ਅਥ ਹਤ੍ਥਿਨਿਪੁਰਵਾਸੀ ਅਞ੍ਞਤਰੋ ਉਪਾਸਕੋ ਵਣਿਜ੍ਜਾਯ ਤਂ ਨਗਰਂ ਗਨ੍ਤ੍ਵਾ ਰਤ੍ਤਿਯਾ ਪਚ੍ਚੂਸਸਮਯੇ ਪਰਿਖਾਪਿਟ੍ਠਂ ਗਤੋ ਤਾਦਿਸੇਨ ਪਯੋਜਨੇਨ. ਸਾ ਤਤ੍ਥ ਤਂ ਦਿਸ੍ਵਾ ਸਞ੍ਜਾਨਿਤ੍ਵਾ ਨਗ੍ਗਾ ਅਟ੍ਠਿਤ੍ਤਚਮਤ੍ਤਾਵਸੇਸਸਰੀਰਾ ਅਤਿਵਿਯ ਬੀਭਚ੍ਛਦਸ੍ਸਨਾ ਅਵਿਦੂਰੇ ਠਤ੍ਵਾ ਅਤ੍ਤਾਨਂ ਦਸ੍ਸੇਸਿ. ਸੋ ਤਂ ਦਿਸ੍ਵਾ –

੪੬੪. ‘‘ਨਗ੍ਗਾ ਦੁਬ੍ਬਣ੍ਣਰੂਪਾਸਿ, ਕਿਸਾ ਧਮਨਿਸਨ੍ਥਤਾ;

ਉਪ੍ਫਾਸੁਲਿਕੇ ਕਿਸਿਕੇ, ਕਾ ਨੁ ਤ੍ਵਂ ਇਧ ਤਿਟ੍ਠਸੀ’’ਤਿ. –

ਗਾਥਾਯ ਪੁਚ੍ਛਿ. ਸਾਪਿਸ੍ਸ –

੪੬੫. ‘‘ਅਹਂ ਭਦਨ੍ਤੇ ਪੇਤੀਮ੍ਹਿ, ਦੁਗ੍ਗਤਾ ਯਮਲੋਕਿਕਾ;

ਪਾਪਕਮ੍ਮਂ ਕਰਿਤ੍ਵਾਨ, ਪੇਤਲੋਕਂ ਇਤੋ ਗਤਾ’’ਤਿ. –

ਗਾਥਾਯ ਅਤ੍ਤਾਨਂ ਪਕਾਸੇਸਿ. ਪੁਨ ਤੇਨ –

੪੬੬. ‘‘ਕਿਂ ਨੁ ਕਾਯੇਨ ਵਾਚਾਯ, ਮਨਸਾ ਦੁਕ੍ਕਟਂ ਕਤਂ;

ਕਿਸ੍ਸਕਮ੍ਮਵਿਪਾਕੇਨ, ਪੇਤਲੋਕਂ ਇਤੋ ਗਤਾ’’ਤਿ. –

ਗਾਥਾਯ ਕਤਕਮ੍ਮਂ ਪੁਚ੍ਛਿਤਾ –

੪੬੭. ‘‘ਅਨਾਵਟੇਸੁ ਤਿਤ੍ਥੇਸੁ, ਵਿਚਿਨਿਂ ਅਡ੍ਢਮਾਸਕਂ;

ਸਨ੍ਤੇਸੁ ਦੇਯ੍ਯਧਮ੍ਮੇਸੁ, ਦੀਪਂ ਨਾਕਾਸਿਮਤ੍ਤਨੋ.

੪੬੮. ‘‘ਨਦਿਂ ਉਪੇਮਿ ਤਸਿਤਾ, ਰਿਤ੍ਤਕਾ ਪਰਿਵਤ੍ਤਤਿ;

ਛਾਯਂ ਉਪੇਮਿ ਉਣ੍ਹੇਸੁ, ਆਤਪੋ ਪਰਿਵਤ੍ਤਤਿ.

੪੬੯. ‘‘ਅਗ੍ਗਿਵਣ੍ਣੋ ਚ ਮੇ ਵਾਤੋ, ਡਹਨ੍ਤੋ ਉਪਵਾਯਤਿ;

ਏਤਞ੍ਚ ਭਨ੍ਤੇ ਅਰਹਾਮਿ, ਅਞ੍ਞਞ੍ਚ ਪਾਪਕਂ ਤਤੋ.

੪੭੦. ‘‘ਗਨ੍ਤ੍ਵਾਨ ਹਤ੍ਥਿਨਿਂ ਪੁਰਂ, ਵਜ੍ਜੇਸਿ ਮਯ੍ਹ ਮਾਤਰਂ;

‘ਧੀਤਾ ਚ ਤੇ ਮਯਾ ਦਿਟ੍ਠਾ, ਦੁਗ੍ਗਤਾ ਯਮਲੋਕਿਕਾ;

ਪਾਪਕਮ੍ਮਂ ਕਰਿਤ੍ਵਾਨ, ਪੇਤਲੋਕਂ ਇਤੋ ਗਤਾ’.

੪੭੧. ‘‘ਅਤ੍ਥਿ ਮੇ ਏਤ੍ਥ ਨਿਕ੍ਖਿਤ੍ਤਂ, ਅਨਕ੍ਖਾਤਞ੍ਚ ਤਂ ਮਯਾ;

ਚਤ੍ਤਾਰਿ ਸਤਸਹਸ੍ਸਾਨਿ, ਪਲ੍ਲਙ੍ਕਸ੍ਸ ਚ ਹੇਟ੍ਠਤੋ.

੪੭੨. ‘‘ਤਤੋ ਮੇ ਦਾਨਂ ਦਦਤੁ, ਤਸ੍ਸਾ ਚ ਹੋਤੁ ਜੀਵਿਕਾ;

ਦਾਨਂ ਦਤ੍ਵਾ ਚ ਮੇ ਮਾਤਾ, ਦਕ੍ਖਿਣਂ ਅਨੁਦਿਚ੍ਛਤੁ;

ਤਦਾਹਂ ਸੁਖਿਤਾ ਹੇਸ੍ਸਂ, ਸਬ੍ਬਕਾਮਸਮਿਦ੍ਧਿਨੀ’’ਤਿ. –

ਇਮਾਹਿ ਛਹਿ ਗਾਥਾਹਿ ਅਤ੍ਤਨਾ ਕਤਕਮ੍ਮਞ੍ਚੇਵ ਪੁਨ ਤੇਨ ਅਤ੍ਤਨੋ ਕਾਤਬ੍ਬਂ ਅਤ੍ਥਞ੍ਚ ਆਚਿਕ੍ਖਿ.

੪੬੭. ਤਤ੍ਥ ਅਨਾਵਟੇਸੁ ਤਿਤ੍ਥੇਸੂਤਿ ਕੇਨਚਿ ਅਨਿਵਾਰਿਤੇਸੁ ਨਦੀਤਲ਼ਾਕਾਦੀਨਂ ਤਿਤ੍ਥਪਦੇਸੇਸੁ, ਯਤ੍ਥ ਮਨੁਸ੍ਸਾ ਨ੍ਹਾਯਨ੍ਤਿ, ਉਦਕਕਿਚ੍ਚਂ ਕਰੋਨ੍ਤਿ, ਤਾਦਿਸੇਸੁ ਠਾਨੇਸੁ. ਵਿਚਿਨਿਂ ਅਡ੍ਢਮਾਸਕਨ੍ਤਿ ‘‘ਮਨੁਸ੍ਸੇਹਿ ਠਪੇਤ੍ਵਾ ਵਿਸ੍ਸਰਿਤਂ ਅਪਿਨਾਮੇਤ੍ਥ ਕਿਞ੍ਚਿ ਲਭੇਯ੍ਯ’’ਨ੍ਤਿ ਲੋਭਾਭਿਭੂਤਾ ਅਡ੍ਢਮਾਸਕਮਤ੍ਤਮ੍ਪਿ ਵਿਚਿਨਿਂ ਗਵੇਸਿਂ. ਅਥ ਵਾ ਅਨਾਵਟੇਸੁ ਤਿਤ੍ਥੇਸੂਤਿ ਉਪਸਙ੍ਕਮਨੇਨ ਕੇਨਚਿ ਅਨਿਵਾਰਿਤੇਸੁ ਸਤ੍ਤਾਨਂ ਪਯੋਗਾਸਯਸੁਦ੍ਧਿਯਾ ਕਾਰਣਭਾਵੇਨ ਤਿਤ੍ਥਭੂਤੇਸੁ ਸਮਣਬ੍ਰਾਹ੍ਮਣੇਸੁ ਵਿਜ੍ਜਮਾਨੇਸੁ. ਵਿਚਿਨਿਂ ਅਡ੍ਢਮਾਸਕਨ੍ਤਿ ਮਚ੍ਛੇਰਮਲਪਰਿਯੁਟ੍ਠਿਤਚਿਤ੍ਤਾ ਕਸ੍ਸਚਿ ਕਿਞ੍ਚਿ ਅਦੇਨ੍ਤੀ ਅਡ੍ਢਮਾਸਕਮ੍ਪਿ ਵਿਸੇਸੇਨ ਚਿਨਿਂ, ਨ ਸਞ੍ਚਿਨਿਂ ਪੁਞ੍ਞਂ. ਤੇਨਾਹ ‘‘ਸਨ੍ਤੇਸੁ ਦੇਯ੍ਯਧਮ੍ਮੇਸੁ, ਦੀਪਂ ਨਾਕਾਸਿਮਤ੍ਤਨੋ’’ਤਿ.

੪੬੮. ਤਸਿਤਾਤਿ ਪਿਪਾਸਿਤਾ. ਰਿਤ੍ਤਕਾਤਿ ਕਾਕਪੇਯ੍ਯਾ ਸਨ੍ਦਮਾਨਾਪਿ ਨਦੀ ਮਮ ਪਾਪਕਮ੍ਮੇਨ ਉਦਕੇਨ ਰਿਤ੍ਤਾ ਤੁਚ੍ਛਾ ਵਾਲਿਕਮਤ੍ਤਾ ਹੁਤ੍ਵਾ ਪਰਿਵਤ੍ਤਤਿ. ਉਣ੍ਹੇਸੂਤਿ ਉਣ੍ਹਸਮਯੇਸੁ. ਆਤਪੋ ਪਰਿਵਤ੍ਤਤੀਤਿ ਛਾਯਾਟ੍ਠਾਨਂ ਮਯਿ ਉਪਗਤਾਯ ਆਤਪੋ ਸਮ੍ਪਜ੍ਜਤਿ.

੪੬੯-੭੦. ਅਗ੍ਗਿਵਣ੍ਣੋਤਿ ਸਮ੍ਫਸ੍ਸੇਨ ਅਗ੍ਗਿਸਦਿਸੋ. ਤੇਨ ਵੁਤ੍ਤਂ ‘‘ਡਹਨ੍ਤੋ ਉਪਵਾਯਤੀ’’ਤਿ. ਏਤਞ੍ਚ, ਭਨ੍ਤੇ, ਅਰਹਾਮੀਤਿ, ਭਨ੍ਤੇਤਿ ਤਂ ਉਪਾਸਕਂ ਗਰੁਕਾਰੇਨ ਵਦਤਿ. ਭਨ੍ਤੇ, ਏਤਞ੍ਚ ਯਥਾਵੁਤ੍ਤਂ ਪਿਪਾਸਾਦਿਦੁਕ੍ਖਂ, ਅਞ੍ਞਞ੍ਚ ਤਤੋ ਪਾਪਕਂ ਦਾਰੁਣਂ ਦੁਕ੍ਖਂ ਅਨੁਭਵਿਤੁਂ ਅਰਹਾਮਿ ਤਜ੍ਜਸ੍ਸ ਪਾਪਸ੍ਸ ਕਤਤ੍ਤਾਤਿ ਅਧਿਪ੍ਪਾਯੋ. ਵਜ੍ਜੇਸੀਤਿ ਵਦੇਯ੍ਯਾਸਿ.

੪੭੧-੭੨. ਏਤ੍ਥ ਨਿਕ੍ਖਿਤ੍ਤਂ, ਅਨਕ੍ਖਾਤਨ੍ਤਿ ‘‘ਏਤ੍ਤਕਂ ਏਤ੍ਥ ਨਿਕ੍ਖਿਤ੍ਤ’’ਨ੍ਤਿ ਅਨਾਚਿਕ੍ਖਿਤਂ. ਇਦਾਨਿ ਤਸ੍ਸ ਪਰਿਮਾਣਂ ਠਪਿਤਟ੍ਠਾਨਞ੍ਚ ਦਸ੍ਸੇਨ੍ਤੀ ‘‘ਚਤ੍ਤਾਰਿ ਸਤਸਹਸ੍ਸਾਨਿ, ਪਲ੍ਲਙ੍ਕਸ੍ਸ ਚ ਹੇਟ੍ਠਤੋ’’ਤਿ ਆਹ. ਤਤ੍ਥ ਪਲ੍ਲਙ੍ਕਸ੍ਸਾਤਿ ਪੁਬ੍ਬੇ ਅਤ੍ਤਨੋ ਸਯਨਪਲ੍ਲਙ੍ਕਸ੍ਸ. ਤਤੋਤਿ ਨਿਹਿਤਧਨਤੋ ਏਕਦੇਸਂ ਗਹੇਤ੍ਵਾ ਮਮਂ ਉਦ੍ਦਿਸ੍ਸ ਦਾਨਂ ਦੇਤੁ. ਤਸ੍ਸਾਤਿ ਮਯ੍ਹਂ ਮਾਤੁਯਾ.

ਏਵਂ ਤਾਯ ਪੇਤਿਯਾ ਵੁਤ੍ਤੇ ਸੋ ਉਪਾਸਕੋ ਤਸ੍ਸਾ ਵਚਨਂ ਸਮ੍ਪਟਿਚ੍ਛਿਤ੍ਵਾ ਤਤ੍ਥ ਅਤ੍ਤਨੋ ਕਰਣੀਯਂ ਤੀਰੇਤ੍ਵਾ ਹਤ੍ਥਿਨਿਪੁਰਂ ਗਨ੍ਤ੍ਵਾ ਤਸ੍ਸਾ ਮਾਤੁਯਾ ਤਮਤ੍ਥਂ ਆਰੋਚੇਸਿ. ਤਮਤ੍ਥਂ ਦਸ੍ਸੇਤੁਂ –

੪੭੩. ਸਾਧੂਤਿ ਸੋ ਪਟਿਸ੍ਸੁਤ੍ਵਾ, ਗਨ੍ਤ੍ਵਾਨ ਹਤ੍ਥਿਨਿਂ ਪੁਰਂ;

ਅਵੋਚ ਤਸ੍ਸਾ ਮਾਤਰਂ –

‘‘ਧੀਤਾ ਚ ਤੇ ਮਯਾ ਦਿਟ੍ਠਾ, ਦੁਗ੍ਗਤਾ ਯਮਲੋਕਿਕਾ;

ਪਾਪਕਮ੍ਮਂ ਕਰਿਤ੍ਵਾਨ, ਪੇਤਲੋਕਂ ਇਤੋ ਗਤਾ.

੪੭੪. ‘‘ਸਾ ਮਂ ਤਤ੍ਥ ਸਮਾਦਪੇਸਿ, ਵਜ੍ਜੇਸਿ ਮਯ੍ਹ ਮਾਤਰਂ;

‘ਧੀਤਾ ਚ ਤੇ ਮਯਾ ਦਿਟ੍ਠਾ, ਦੁਗ੍ਗਤਾ ਯਮਲੋਕਿਕਾ;

ਪਾਪਕਮ੍ਮਂ ਕਰਿਤ੍ਵਾਨ, ਪੇਤਲੋਕਂ ਇਤੋ ਗਤਾ.

੪੭੫. ‘‘‘ਅਤ੍ਥਿ ਚ ਮੇ ਏਤ੍ਥ ਨਿਕ੍ਖਿਤ੍ਤਂ, ਅਨਕ੍ਖਾਤਞ੍ਚ ਤਂ ਮਯਾ;

ਚਤ੍ਤਾਰਿ ਸਤਸਹਸ੍ਸਾਨਿ, ਪਲ੍ਲਙ੍ਕਸ੍ਸ ਚ ਹੇਟ੍ਠਤੋ.

੪੭੬. ‘‘‘ਤਤੋ ਮੇ ਦਾਨਂ ਦਦਤੁ, ਤਸ੍ਸਾ ਚ ਹੋਤੁ ਜੀਵਿਕਾ;

ਦਾਨਂ ਦਤ੍ਵਾ ਚ ਮੇ ਮਾਤਾ, ਦਕ੍ਖਿਣਂ ਅਨੁਦਿਚ੍ਛਤੁ;

ਤਦਾਹਂ ਸੁਖਿਤਾ ਹੇਸ੍ਸਂ, ਸਬ੍ਬਕਾਮਸਮਿਦ੍ਧਿਨੀ’.

੪੭੭. ‘‘ਤਤੋ ਹਿ ਸਾ ਦਾਨਮਦਾ, ਤਸ੍ਸਾ ਦਕ੍ਖਿਣਮਾਦਿਸੀ;

ਪੇਤੀ ਚ ਸੁਖਿਤਾ ਆਸਿ, ਤਸ੍ਸਾ ਚਾਸਿ ਸੁਜੀਵਿਕਾ’’ਤਿ. –

ਸਙ੍ਗੀਤਿਕਾਰਾ ਆਹਂਸੁ. ਤਾ ਸੁਵਿਞ੍ਞੇਯ੍ਯਾਵ.

ਤਂ ਸੁਤ੍ਵਾ ਤਸ੍ਸਾ ਮਾਤਾ ਭਿਕ੍ਖੁਸਙ੍ਘਸ੍ਸ ਦਾਨਂ ਦਤ੍ਵਾ ਤਸ੍ਸਾ ਆਦਿਸਿ. ਤੇਨ ਸਾ ਪਟਿਲਦ੍ਧੂਪਕਰਣਸਮ੍ਪਤ੍ਤਿਯਂ ਠਿਤਾ ਮਾਤੁ ਅਤ੍ਤਾਨਂ ਦਸ੍ਸੇਤ੍ਵਾ ਤਂ ਕਾਰਣਂ ਆਚਿਕ੍ਖਿ, ਮਾਤਾ ਭਿਕ੍ਖੂਨਂ ਆਰੋਚੇਸਿ, ਭਿਕ੍ਖੂ ਤਂ ਪਵਤ੍ਤਿਂ ਭਗਵਤੋ ਆਰੋਚੇਸੁਂ. ਭਗਵਾ ਤਮਤ੍ਥਂ ਅਟ੍ਠੁਪ੍ਪਤ੍ਤਿਂ ਕਤ੍ਵਾ ਸਮ੍ਪਤ੍ਤਪਰਿਸਾਯ ਧਮ੍ਮਂ ਦੇਸੇਸਿ. ਸਾ ਦੇਸਨਾ ਮਹਾਜਨਸ੍ਸ ਸਾਤ੍ਥਿਕਾ ਅਹੋਸੀਤਿ.

ਸੇਰਿਣੀਪੇਤਿਵਤ੍ਥੁਵਣ੍ਣਨਾ ਨਿਟ੍ਠਿਤਾ.