੫. ਕੁਮਾਰਪੇਤਵਤ੍ਥੁਵਣ੍ਣਨਾ

ਅਚ੍ਛੇਰਰੂਪਂ ਸੁਗਤਸ੍ਸ ਞਾਣਨ੍ਤਿ ਇਦਂ ਕੁਮਾਰਪੇਤਵਤ੍ਥੁ. ਤਸ੍ਸ ਕਾ ਉਪ੍ਪਤ੍ਤਿ? ਸਾਵਤ੍ਥਿਯਂ ਕਿਰ ਬਹੂ ਉਪਾਸਕਾ ਧਮ੍ਮਗਣਾ ਹੁਤ੍ਵਾ ਨਗਰੇ ਮਹਨ੍ਤਂ ਮਣ੍ਡਪਂ ਕਾਰੇਤ੍ਵਾ ਤਂ ਨਾਨਾਵਣ੍ਣੇਹਿ ਵਤ੍ਥੇਹਿ ਅਲਙ੍ਕਰਿਤ੍ਵਾ ਕਾਲਸ੍ਸੇਵ ਸਤ੍ਥਾਰਂ ਭਿਕ੍ਖੁਸਙ੍ਘਞ੍ਚ ਨਿਮਨ੍ਤੇਤ੍ਵਾ ਮਹਾਰਹਵਰਪਚ੍ਚਤ੍ਥਰਣਤ੍ਥਤੇਸੁ ਆਸਨੇਸੁ ਬੁਦ੍ਧਪ੍ਪਮੁਖਂ ਭਿਕ੍ਖੁਸਙ੍ਘਂ ਨਿਸੀਦਾਪੇਤ੍ਵਾ ਗਨ੍ਧਪੁਪ੍ਫਾਦੀਹਿ ਪੂਜੇਤ੍ਵਾ ਮਹਾਦਾਨਂ ਪਵਤ੍ਤੇਨ੍ਤਿ. ਤਂ ਦਿਸ੍ਵਾ ਅਞ੍ਞਤਰੋ ਮਚ੍ਛੇਰਮਲਪਰਿਯੁਟ੍ਠਿਤਚਿਤ੍ਤੋ ਪੁਰਿਸੋ ਤਂ ਸਕ੍ਕਾਰਂ ਅਸਹਮਾਨੋ ਏਵਮਾਹ – ‘‘ਵਰਮੇਤਂ ਸਬ੍ਬਂ ਸਙ੍ਕਾਰਕੂਟੇ ਛਡ੍ਡਿਤਂ, ਨ ਤ੍ਵੇਵ ਇਮੇਸਂ ਮੁਣ੍ਡਕਾਨਂ ਦਿਨ੍ਨ’’ਨ੍ਤਿ. ਤਂ ਸੁਤ੍ਵਾ ਉਪਾਸਕਾ ਸਂਵਿਗ੍ਗਮਾਨਸਾ ‘‘ਭਾਰਿਯਂ ਵਤ ਇਮਿਨਾ ਪੁਰਿਸੇਨ ਪਾਪਂ ਪਸੁਤਂ, ਯੇਨ ਏਵਂ ਬੁਦ੍ਧਪ੍ਪਮੁਖੇ ਭਿਕ੍ਖੁਸਙ੍ਘੇ ਅਪਰਦ੍ਧ’’ਨ੍ਤਿ ਤਮਤ੍ਥਂ ਤਸ੍ਸ ਮਾਤੁਯਾ ਆਰੋਚੇਤ੍ਵਾ ‘‘ਗਚ੍ਛ, ਤ੍ਵਂ ਸਸਾਵਕਸਙ੍ਘਂ ਭਗਵਨ੍ਤਂ ਖਮਾਪੇਹੀ’’ਤਿ ਆਹਂਸੁ. ਸਾ ‘‘ਸਾਧੂ’’ਤਿ ਪਟਿਸ੍ਸੁਣਿਤ੍ਵਾ ਪੁਤ੍ਤਂ ਸਨ੍ਤਜ੍ਜੇਨ੍ਤੀ ਸਞ੍ਞਾਪੇਤ੍ਵਾ ਭਗਵਨ੍ਤਂ ਭਿਕ੍ਖੁਸਙ੍ਘਞ੍ਚ ਉਪਸਙ੍ਕਮਿਤ੍ਵਾ ਪੁਤ੍ਤੇਨ ਕਤਅਚ੍ਚਯਂ ਦੇਸੇਨ੍ਤੀ ਖਮਾਪੇਤ੍ਵਾ ਭਗਵਤੋ ਭਿਕ੍ਖੁਸਙ੍ਘਸ੍ਸ ਚ ਸਤ੍ਤਾਹਂ ਯਾਗੁਦਾਨੇਨ ਪੂਜਂ ਅਕਾਸਿ. ਤਸ੍ਸਾ ਪੁਤ੍ਤੋ ਨਚਿਰਸ੍ਸੇਵ ਕਾਲਂ ਕਤ੍ਵਾ ਕਿਲਿਟ੍ਠਕਮ੍ਮੂਪਜੀਵਿਨਿਯਾ ਗਣਿਕਾਯ ਕੁਚ੍ਛਿਯਂ ਨਿਬ੍ਬਤ੍ਤਿ. ਸਾ ਚ ਨਂ ਜਾਤਮਤ੍ਤਂਯੇਵ ‘‘ਦਾਰਕੋ’’ਤਿ ਞਤ੍ਵਾ ਸੁਸਾਨੇ ਛਡ੍ਡਾਪੇਸਿ. ਸੋ ਤਤ੍ਥ ਅਤ੍ਤਨੋ ਪੁਞ੍ਞਬਲੇਨੇਵ ਗਹਿਤਾਰਕ੍ਖੋ ਕੇਨਚਿ ਅਨੁਪਦ੍ਦੁਤੋ ਮਾਤੁ-ਅਙ੍ਕੇ ਵਿਯ ਸੁਖਂ ਸੁਪਿ. ਦੇਵਤਾ ਤਸ੍ਸ ਆਰਕ੍ਖਂ ਗਣ੍ਹਿਂਸੂਤਿ ਚ ਵਦਨ੍ਤਿ.

ਅਥ ਭਗਵਾ ਪਚ੍ਚੂਸਸਮਯੇ ਮਹਾਕਰੁਣਾਸਮਾਪਤ੍ਤਿਤੋ ਵੁਟ੍ਠਾਯ ਬੁਦ੍ਧਚਕ੍ਖੁਨਾ ਲੋਕਂ ਵੋਲੋਕੇਨ੍ਤੋ ਤਂ ਦਾਰਕਂ ਸਿਵਥਿਕਾਯ ਛਡ੍ਡਿਤਂ ਦਿਸ੍ਵਾ ਸੂਰਿਯੁਗ੍ਗਮਨਵੇਲਾਯ ਸਿਵਥਿਕਂ ਅਗਮਾਸਿ. ‘‘ਸਤ੍ਥਾ ਇਧਾਗਤੋ, ਕਾਰਣੇਨੇਤ੍ਥ ਭਵਿਤਬ੍ਬ’’ਨ੍ਤਿ ਮਹਾਜਨੋ ਸਨ੍ਨਿਪਤਿ. ਭਗਵਾ ਸਨ੍ਨਿਪਤਿਤਪਰਿਸਾਯ ‘‘ਨਾਯਂ ਦਾਰਕੋ ਓਞ੍ਞਾਤਬ੍ਬੋ, ਯਦਿਪਿ ਇਦਾਨਿ ਸੁਸਾਨੇ ਛਡ੍ਡਿਤੋ ਅਨਾਥੋ ਠਿਤੋ, ਆਯਤਿਂ ਪਨ ਦਿਟ੍ਠੇਵ ਧਮ੍ਮੇ ਅਭਿਸਮ੍ਪਰਾਯਞ੍ਚ ਉਲ਼ਾਰਸਮ੍ਪਤ੍ਤਿਂ ਪਟਿਲਭਿਸ੍ਸਤੀ’’ਤਿ ਵਤ੍ਵਾ ਤੇਹਿ ਮਨੁਸ੍ਸੇਹਿ ‘‘ਕਿਂ ਨੁ ਖੋ, ਭਨ੍ਤੇ, ਇਮਿਨਾ ਪੁਰਿਮਜਾਤਿਯਂ ਕਤਂ ਕਮ੍ਮ’’ਨ੍ਤਿ ਪੁਟ੍ਠੋ –

‘‘ਬੁਦ੍ਧਪਮੁਖਸ੍ਸ ਭਿਕ੍ਖੁਸਙ੍ਘਸ੍ਸ, ਪੂਜਂ ਅਕਾਸਿ ਜਨਤਾ ਉਲ਼ਾਰਂ;

ਤਤ੍ਰਸ੍ਸ ਚਿਤ੍ਤਸ੍ਸਹੁ ਅਞ੍ਞਥਤ੍ਤਂ, ਵਾਚਂ ਅਭਾਸਿ ਫਰੁਸਂ ਅਸਬ੍ਭ’’ਨ੍ਤਿ. –

ਆਦਿਨਾ ਨਯੇਨ ਦਾਰਕੇਨ ਕਤਕਮ੍ਮਂ ਆਯਤਿਂ ਪਤ੍ਤਬ੍ਬਂ ਸਮ੍ਪਤ੍ਤਿਞ੍ਚ ਪਕਾਸੇਤ੍ਵਾ ਸਨ੍ਨਿਪਤਿਤਾਯ ਪਰਿਸਾਯ ਅਜ੍ਝਾਸਯਾਨੁਰੂਪਂ ਧਮ੍ਮਂ ਕਥੇਤ੍ਵਾ ਉਪਰਿ ਸਾਮੁਕ੍ਕਂਸਿਕਂ ਧਮ੍ਮਦੇਸਨਂ ਅਕਾਸਿ. ਸਚ੍ਚਪਰਿਯੋਸਾਨੇ ਚਤੁਰਾਸੀਤਿਯਾ ਪਾਣਸਹਸ੍ਸਾਨਂ ਧਮ੍ਮਾਭਿਸਮਯੋ ਅਹੋਸਿ, ਤਞ੍ਚ ਦਾਰਕਂ ਅਸੀਤਿਕੋਟਿਵਿਭਵੋ ਏਕੋ ਕੁਟੁਮ੍ਬਿਕੋ ਭਗਵਤੋ ਸਮ੍ਮੁਖਾਵ ‘‘ਮਯ੍ਹਂ ਪੁਤ੍ਤੋ’’ਤਿ ਅਗ੍ਗਹੇਸਿ. ਭਗਵਾ ‘‘ਏਤ੍ਤਕੇਨ ਅਯਂ ਦਾਰਕੋ ਰਕ੍ਖਿਤੋ, ਮਹਾਜਨਸ੍ਸ ਚ ਅਨੁਗ੍ਗਹੋ ਕਤੋ’’ਤਿ ਵਿਹਾਰਂ ਅਗਮਾਸਿ.

ਸੋ ਅਪਰੇਨ ਸਮਯੇਨ ਤਸ੍ਮਿਂ ਕੁਟੁਮ੍ਬਿਕੇ ਕਾਲਕਤੇ ਤੇਨ ਨਿਯ੍ਯਾਦਿਤਂ ਧਨਂ ਪਟਿਪਜ੍ਜਿਤ੍ਵਾ ਕੁਟੁਮ੍ਬਂ ਸਣ੍ਠਪੇਨ੍ਤੋ ਤਸ੍ਮਿਂ ਨਗਰੇਯੇਵ ਮਹਾਵਿਭਵੋ ਗਹਪਤਿ ਹੁਤ੍ਵਾ ਦਾਨਾਦਿਨਿਰਤੋ ਅਹੋਸਿ. ਅਥੇਕਦਿਵਸਂ ਭਿਕ੍ਖੂ ਧਮ੍ਮਸਭਾਯਂ ਕਥਂ ਸਮੁਟ੍ਠਾਪੇਸੁਂ – ‘‘ਅਹੋ ਨੂਨ ਸਤ੍ਥਾ ਸਤ੍ਤੇਸੁ ਅਨੁਕਮ੍ਪਕੋ, ਸੋਪਿ ਨਾਮ ਦਾਰਕੋ ਤਦਾ ਅਨਾਥੋ ਠਿਤੋ ਏਤਰਹਿ ਮਹਤਿਂ ਸਮ੍ਪਤ੍ਤਿਂ ਪਚ੍ਚਨੁਭਵਤਿ, ਉਲ਼ਾਰਾਨਿ ਚ ਪੁਞ੍ਞਾਨਿ ਕਰੋਤੀ’’ਤਿ. ਤਂ ਸੁਤ੍ਵਾ ਸਤ੍ਥਾ ‘‘ਨ, ਭਿਕ੍ਖਵੇ, ਤਸ੍ਸ ਏਤ੍ਤਕਾਵ ਸਮ੍ਪਤ੍ਤਿ, ਅਥ ਖੋ ਆਯੁਪਰਿਯੋਸਾਨੇ ਤਾਵਤਿਂਸਭਵਨੇ ਸਕ੍ਕਸ੍ਸ ਦੇਵਰਞ੍ਞੋ ਪੁਤ੍ਤੋ ਹੁਤ੍ਵਾ ਨਿਬ੍ਬਤ੍ਤਿਸ੍ਸਤਿ, ਮਹਤਿਂ ਦਿਬ੍ਬਸਮ੍ਪਤ੍ਤਿਞ੍ਚ ਪਟਿਲਭਿਸ੍ਸਤੀ’’ਤਿ ਬ੍ਯਾਕਾਸਿ. ਤਂ ਸੁਤ੍ਵਾ ਭਿਕ੍ਖੂ ਚ ਮਹਾਜਨੋ ਚ ‘‘ਇਦਂ ਕਿਰ ਕਾਰਣਂ ਦਿਸ੍ਵਾ ਦੀਘਦਸ੍ਸੀ ਭਗਵਾ ਜਾਤਮਤ੍ਤਸ੍ਸੇਵਸ੍ਸ ਆਮਕਸੁਸਾਨੇ ਛਡ੍ਡਿਤਸ੍ਸ ਤਤ੍ਥ ਗਨ੍ਤ੍ਵਾ ਸਙ੍ਗਹਂ ਅਕਾਸੀ’’ਤਿ ਸਤ੍ਥੁ ਞਾਣਵਿਸੇਸਂ ਥੋਮੇਤ੍ਵਾ ਤਸ੍ਮਿਂ ਅਤ੍ਤਭਾਵੇ ਤਸ੍ਸ ਪਵਤ੍ਤਿਂ ਕਥੇਸੁਂ. ਤਮਤ੍ਥਂ ਦੀਪੇਨ੍ਤਾ ਸਙ੍ਗੀਤਿਕਾਰਾ –

੪੫੩. ‘‘ਅਚ੍ਛੇਰਰੂਪਂ ਸੁਗਤਸ੍ਸ ਞਾਣਂ, ਸਤ੍ਥਾ ਯਥਾ ਪੁਗ੍ਗਲਂ ਬ੍ਯਾਕਾਸਿ;

ਉਸ੍ਸਨ੍ਨਪੁਞ੍ਞਾਪਿ ਭਵਨ੍ਤਿ ਹੇਕੇ, ਪਰਿਤ੍ਤਪੁਞ੍ਞਾਪਿ ਭਵਨ੍ਤਿ ਹੇਕੇ.

੪੫੪. ‘‘ਅਯਂ ਕੁਮਾਰੋ ਸੀਵਥਿਕਾਯ ਛਡ੍ਡਿਤੋ, ਅਙ੍ਗੁਟ੍ਠਸ੍ਨੇਹੇਨ ਯਾਪੇਤਿ ਰਤ੍ਤਿਂ;

ਨ ਯਕ੍ਖਭੂਤਾ ਨ ਸਰੀਸਪਾ ਵਾ, ਵਿਹੇਠਯੇਯ੍ਯੁਂ ਕਤਪੁਞ੍ਞਂ ਕੁਮਾਰਂ.

੪੫੫. ‘‘ਸੁਨਖਾਪਿਮਸ੍ਸ ਪਲਿਹਿਂਸੁ ਪਾਦੇ, ਧਙ੍ਕਾ ਸਿਙ੍ਗਾਲਾ ਪਰਿਵਤ੍ਤਯਨ੍ਤਿ;

ਗਬ੍ਭਾਸਯਂ ਪਕ੍ਖਿਗਣਾ ਹਰਨ੍ਤਿ, ਕਾਕਾ ਪਨ ਅਕ੍ਖਿਮਲਂ ਹਰਨ੍ਤਿ.

੪੫੬. ‘‘ਨਯਿਮਸ੍ਸ ਰਕ੍ਖਂ ਵਿਦਹਿਂਸੁ ਕੇਚਿ, ਨ ਓਸਧਂ ਸਾਸਪਧੂਪਨਂ ਵਾ;

ਨਕ੍ਖਤ੍ਤਯੋਗਮ੍ਪਿ ਨ ਅਗ੍ਗਹੇਸੁਂ, ਨ ਸਬ੍ਬਧਞ੍ਞਾਨਿਪਿ ਆਕਿਰਿਂਸੁ.

੪੫੭. ‘‘ਏਤਾਦਿਸਂ ਉਤ੍ਤਮਕਿਚ੍ਛਪਤ੍ਤਂ, ਰਤ੍ਤਾਭਤਂ ਸੀਵਥਿਕਾਯ ਛਡ੍ਡਿਤਂ;

ਨੋਨੀਤਪਿਣ੍ਡਂਵ ਪਵੇਧਮਾਨਂ, ਸਸਂਸਯਂ ਜੀਵਿਤਸਾਵਸੇਸਂ.

੪੫੮. ‘‘ਤਮਦ੍ਦਸਾ ਦੇਵਮਨੁਸ੍ਸਪੂਜਿਤੋ, ਦਿਸ੍ਵਾ ਚ ਤਂ ਬ੍ਯਾਕਰਿ ਭੂਰਿਪਞ੍ਞੋ;

‘ਅਯਂ ਕੁਮਾਰੋ ਨਗਰਸ੍ਸਿਮਸ੍ਸ, ਅਗ੍ਗਕੁਲਿਕੋ ਭਵਿਸ੍ਸਤਿ ਭੋਗਤੋ ਚ’.

੪੫੯. ‘‘ਕਿਸ੍ਸ ਵਤਂ ਕਿਂ ਪਨ ਬ੍ਰਹ੍ਮਚਰਿਯਂ, ਕਿਸ੍ਸ ਸੁਚਿਣ੍ਣਸ੍ਸ ਅਯਂ ਵਿਪਾਕੋ;

ਏਤਾਦਿਸਂ ਬ੍ਯਸਨਂ ਪਾਪੁਣਿਤ੍ਵਾ, ਤਂ ਤਾਦਿਸਂ ਪਚ੍ਚਨੁਭੋਸ੍ਸਤਿਦ੍ਧਿ’’ਨ੍ਤਿ. –

ਛ ਗਾਥਾ ਅਵੋਚੁਂ.

੪੫੩. ਤਤ੍ਥ ਅਚ੍ਛੇਰਰੂਪਨ੍ਤਿ ਅਚ੍ਛਰਿਯਸਭਾਵਂ. ਸੁਗਤਸ੍ਸ ਞਾਣਨ੍ਤਿ ਅਞ੍ਞੇਹਿ ਅਸਾਧਾਰਣਂ ਸਮ੍ਮਾਸਮ੍ਬੁਦ੍ਧਸ੍ਸ ਞਾਣਂ, ਆਸਯਾਨੁਸਯਞਾਣਾਦਿਸਬ੍ਬਞ੍ਞੁਤਞ੍ਞਾਣਮੇਵ ਸਨ੍ਧਾਯ ਵੁਤ੍ਤਂ. ਤਯਿਦਂ ਅਞ੍ਞੇਸਂ ਅਵਿਸਯਭੂਤਂ ਕਥਂ ਞਾਣਨ੍ਤਿ ਆਹ ‘‘ਸਤ੍ਥਾ ਯਥਾ ਪੁਗ੍ਗਲਂ ਬ੍ਯਾਕਾਸੀ’’ਤਿ. ਤੇਨ ਸਤ੍ਥੁ ਦੇਸਨਾਯ ਏਵ ਞਾਣਸ੍ਸ ਅਚ੍ਛਰਿਯਭਾਵੋ ਵਿਞ੍ਞਾਯਤੀਤਿ ਦਸ੍ਸੇਤਿ.

ਇਦਾਨਿ ਬ੍ਯਾਕਰਣਂ ਦਸ੍ਸੇਨ੍ਤੋ ‘‘ਉਸ੍ਸਨ੍ਨਪੁਞ੍ਞਾਪਿ ਭਵਨ੍ਤਿ ਹੇਕੇ, ਪਰਿਤ੍ਤਪੁਞ੍ਞਾਪਿ ਭਵਨ੍ਤਿ ਹੇਕੇ’’ਤਿ ਆਹ. ਤਸ੍ਸਤ੍ਥੋ – ਉਸ੍ਸਨ੍ਨਕੁਸਲਧਮ੍ਮਾਪਿ ਇਧੇਕਚ੍ਚੇ ਪੁਗ੍ਗਲਾ ਲਦ੍ਧਪਚ੍ਚਯਸ੍ਸ ਅਪੁਞ੍ਞਸ੍ਸ ਵਸੇਨ ਜਾਤਿਆਦਿਨਾ ਨਿਹੀਨਾ ਭਵਨ੍ਤਿ, ਪਰਿਤ੍ਤਪੁਞ੍ਞਾਪਿ ਅਪ੍ਪਤਰਪੁਞ੍ਞਧਮ੍ਮਾਪਿ ਏਕੇ ਸਤ੍ਤਾ ਖੇਤ੍ਤਸਮ੍ਪਤ੍ਤਿਆਦਿਨਾ ਤਸ੍ਸ ਪੁਞ੍ਞਸ੍ਸ ਮਹਾਜੁਤਿਕਤਾਯ ਉਲ਼ਾਰਾ ਭਵਨ੍ਤੀਤਿ.

੪੫੪. ਸੀਵਥਿਕਾਯਾਤਿ ਸੁਸਾਨੇ. ਅਙ੍ਗੁਟ੍ਠਸ੍ਨੇਹੇਨਾਤਿ ਅਙ੍ਗੁਟ੍ਠਤੋ ਪਵਤ੍ਤਸ੍ਨੇਹੇਨ, ਦੇਵਤਾਯ ਅਙ੍ਗੁਟ੍ਠਤੋ ਪਗ੍ਘਰਿਤਖੀਰੇਨਾਤਿ ਅਤ੍ਥੋ. ਨ ਯਕ੍ਖਭੂਤਾ ਨ ਸਰੀਸਪਾ ਵਾਤਿ ਪਿਸਾਚਭੂਤਾ ਵਾ ਯਕ੍ਖਭੂਤਾ ਵਾ ਸਰੀਸਪਾ ਵਾ ਯੇ ਕੇਚਿ ਸਰਨ੍ਤਾ ਗਚ੍ਛਨ੍ਤਾ ਵਾ ਨ ਵਿਹੇਠਯੇਯ੍ਯੁਂ ਨ ਬਾਧੇਯ੍ਯੁਂ.

੪੫੫. ਪਲਿਹਿਂਸੁ ਪਾਦੇਤਿ ਅਤ੍ਤਨੋ ਜਿਵ੍ਹਾਯ ਪਾਦੇ ਲਿਹਿਸੁਂ. ਧਙ੍ਕਾਤਿ ਕਾਕਾ. ਪਰਿਵਤ੍ਤਯਨ੍ਤੀਤਿ ‘‘ਮਾ ਨਂ ਕੁਮਾਰਂ ਕੇਚਿ ਵਿਹੇਠੇਯ੍ਯੁ’’ਨ੍ਤਿ ਰਕ੍ਖਨ੍ਤਾ ਨਿਰੋਗਭਾਵਜਾਨਨਤ੍ਥਂ ਅਪਰਾਪਰਂ ਪਰਿਵਤ੍ਤਨ੍ਤਿ. ਗਬ੍ਭਾਸਯਨ੍ਤਿ ਗਬ੍ਭਮਲਂ. ਪਕ੍ਖਿਗਣਾਤਿ ਗਿਜ੍ਝਕੁਲਲਾਦਯੋ ਸਕੁਣਗਣਾ. ਹਰਨ੍ਤੀਤਿ ਅਪਨੇਨ੍ਤਿ. ਅਕ੍ਖਿਮਲਨ੍ਤਿ ਅਕ੍ਖਿਗੂਥਂ.

੪੫੬. ਕੇਚੀਤਿ ਕੇਚਿ ਮਨੁਸ੍ਸਾ, ਅਮਨੁਸ੍ਸਾ ਪਨ ਰਕ੍ਖਂ ਸਂਵਿਦਹਿਂਸੁ. ਓਸਧਨ੍ਤਿ ਤਦਾ ਆਯਤਿਞ੍ਚ ਆਰੋਗ੍ਯਾਵਹਂ ਅਗਦਂ. ਸਾਸਪਧੂਪਨਂ ਵਾਤਿ ਯਂ ਜਾਤਸ੍ਸ ਦਾਰਕਸ੍ਸ ਰਕ੍ਖਣਤ੍ਥਂ ਸਾਸਪੇਨ ਧੂਪਨਂ ਕਰੋਨ੍ਤਿ, ਤਮ੍ਪਿ ਤਸ੍ਸ ਕਰੋਨ੍ਤਾ ਨਾਹੇਸੁਨ੍ਤਿ ਦੀਪੇਨ੍ਤਿ. ਨਕ੍ਖਤ੍ਤਯੋਗਮ੍ਪਿ ਨ ਅਗ੍ਗਹੇਸੁਨ੍ਤਿ ਨਕ੍ਖਤ੍ਤਯੁਤ੍ਤਮ੍ਪਿ ਨ ਗਣ੍ਹਿਂਸੁ. ‘‘ਅਸੁਕਮ੍ਹਿ ਨਕ੍ਖਤ੍ਤੇ ਤਿਥਿਮ੍ਹਿ ਮੁਹੁਤ੍ਤੇ ਅਯਂ ਜਾਤੋ’’ਤਿ ਏਵਂ ਜਾਤਕਮ੍ਮਮ੍ਪਿਸ੍ਸ ਨ ਕੇਚਿ ਅਕਂਸੂਤਿ ਅਤ੍ਥੋ. ਨ ਸਬ੍ਬਧਞ੍ਞਾਨਿਪਿ ਆਕਿਰਿਂਸੂਤਿ ਮਙ੍ਗਲਂ ਕਰੋਨ੍ਤਾ ਅਗਦਵਸੇਨ ਯਂ ਸਾਸਪਤੇਲਮਿਸ੍ਸਿਤਂ ਸਾਲਿਆਦਿਧਞ੍ਞਂ ਆਕਿਰਨ੍ਤਿ, ਤਮ੍ਪਿਸ੍ਸ ਨਾਕਂਸੂਤਿ ਅਤ੍ਥੋ.

੪੫੭. ਏਤਾਦਿਸਨ੍ਤਿ ਏਵਰੂਪਂ. ਉਤ੍ਤਮਕਿਚ੍ਛਪਤ੍ਤਨ੍ਤਿ ਪਰਮਕਿਚ੍ਛਂ ਆਪਨ੍ਨਂ ਅਤਿਵਿਯ ਦੁਕ੍ਖਪ੍ਪਤ੍ਤਂ. ਰਤ੍ਤਾਭਤਨ੍ਤਿ ਰਤ੍ਤਿਯਂ ਆਭਤਂ. ਨੋਨੀਤਪਿਣ੍ਡਂ ਵਿਯਾਤਿ ਨਵਨੀਤਪਿਣ੍ਡਸਦਿਸਂ, ਮਂਸਪੇਸਿਮਤ੍ਤਤਾ ਏਵਂ ਵੁਤ੍ਤਂ. ਪਵੇਧਮਾਨਨ੍ਤਿ ਦੁਬ੍ਬਲਭਾਵੇਨ ਪਕਮ੍ਪਮਾਨਂ. ਸਸਂਸਯਨ੍ਤਿ ‘‘ਜੀਵਤਿ ਨੁ ਖੋ ਨ ਨੁ ਖੋ ਜੀਵਤੀ’’ਤਿ ਸਂਸਯਿਤਤਾਯ ਸਂਸਯਵਨ੍ਤਂ. ਜੀਵਿਤਸਾਵਸੇਸਨ੍ਤਿ ਜੀਵਿਤਟ੍ਠਿਤਿਯਾ ਹੇਤੁਭੂਤਾਨਂ ਸਾਧਨਾਨਂ ਅਭਾਵੇਨ ਕੇਵਲਂ ਜੀਵਿਤਮਤ੍ਤਾਵਸੇਸਕਂ.

੪੫੮. ਅਗ੍ਗਕੁਲਿਕੋ ਭਵਿਸ੍ਸਤਿ ਭੋਗਤੋ ਚਾਤਿ ਭੋਗਨਿਮਿਤ੍ਤਂ ਭੋਗਸ੍ਸ ਵਸੇਨ ਅਗ੍ਗਕੁਲਿਕੋ ਸੇਟ੍ਠਕੁਲਿਕੋ ਭਵਿਸ੍ਸਤੀਤਿ ਅਤ੍ਥੋ.

੪੫੯. ‘‘ਕਿਸ੍ਸ ਵਤ’’ਨ੍ਤਿ ਅਯਂ ਗਾਥਾ ਸਤ੍ਥੁ ਸਨ੍ਤਿਕੇ ਠਿਤੇਹਿ ਉਪਾਸਕੇਹਿ ਤੇਨ ਕਤਕਮ੍ਮਸ੍ਸ ਪੁਚ੍ਛਾਵਸੇਨ ਵੁਤ੍ਤਾ. ਸਾ ਚ ਖੋ ਸਿਵਥਿਕਾਯ ਸਨ੍ਨਿਪਤਿਤੇਹੀਤਿ ਵੇਦਿਤਬ੍ਬਾ. ਤਤ੍ਥ ਕਿਸ੍ਸਾਤਿ ਕਿਂ ਅਸ੍ਸ. ਵਤਨ੍ਤਿ ਵਤਸਮਾਦਾਨਂ. ਪੁਨ ਕਿਸ੍ਸਾਤਿ ਕੀਦਿਸਸ੍ਸ ਸੁਚਿਣ੍ਣਸ੍ਸ ਵਤਸ੍ਸ ਬ੍ਰਹ੍ਮਚਰਿਯਸ੍ਸ ਚਾਤਿ ਵਿਭਤ੍ਤਿਂ ਵਿਪਰਿਣਾਮੇਤ੍ਵਾ ਯੋਜਨਾ. ਏਤਾਦਿਸਨ੍ਤਿ ਗਣਿਕਾਯ ਕੁਚ੍ਛਿਯਾ ਨਿਬ੍ਬਤ੍ਤਨਂ, ਸੁਸਾਨੇ ਛਡ੍ਡਨਨ੍ਤਿ ਏਵਰੂਪਂ. ਬ੍ਯਸਨਨ੍ਤਿ ਅਨਤ੍ਥਂ. ਤਾਦਿਸਨ੍ਤਿ ਤਥਾਰੂਪਂ, ‘‘ਅਙ੍ਗੁਟ੍ਠਸ੍ਨੇਹੇਨ ਯਾਪੇਤਿ ਰਤ੍ਤਿ’’ਨ੍ਤਿਆਦਿਨਾ, ‘‘ਅਯਂ ਕੁਮਾਰੋ ਨਗਰਸ੍ਸਿਮਸ੍ਸ ਅਗ੍ਗਕੁਲਿਕੋ ਭਵਿਸ੍ਸਤੀ’’ਤਿਆਦਿਨਾ ਚ ਵੁਤ੍ਤਪ੍ਪਕਾਰਨ੍ਤਿ ਅਤ੍ਥੋ. ਇਦ੍ਧਿਨ੍ਤਿ ਦੇਵਿਦ੍ਧਿਂ, ਦਿਬ੍ਬਸਮ੍ਪਤ੍ਤਿਨ੍ਤਿ ਵੁਤ੍ਤਂ ਹੋਤਿ.

ਇਦਾਨਿ ਤੇਹਿ ਉਪਾਸਕੇਹਿ ਪੁਟ੍ਠੋ ਭਗਵਾ ਯਥਾ ਤਦਾ ਬ੍ਯਾਕਾਸਿ, ਤਂ ਦਸ੍ਸੇਨ੍ਤਾ ਸਙ੍ਗੀਤਿਕਾਰਾ –

੪੬੦. ‘‘ਬੁਦ੍ਧਪਮੁਖਸ੍ਸ ਭਿਕ੍ਖੁਸਙ੍ਘਸ੍ਸ, ਪੂਜਂ ਅਕਾਸਿ ਜਨਤਾ ਉਲ਼ਾਰਂ;

ਤਤ੍ਰਸ੍ਸ ਚਿਤ੍ਤਸ੍ਸਹੁ ਅਞ੍ਞਥਤ੍ਤਂ, ਵਾਚਂ ਅਭਾਸਿ ਫਰੁਸਂ ਅਸਬ੍ਭਂ.

੪੬੧. ‘‘ਸੋ ਤਂ ਵਿਤਕ੍ਕਂ ਪਵਿਨੋਦਯਿਤ੍ਵਾ, ਪੀਤਿਂ ਪਸਾਦਂ ਪਟਿਲਦ੍ਧਾ ਪਚ੍ਛਾ;

ਤਥਾਗਤਂ ਜੇਤਵਨੇ ਵਸਨ੍ਤਂ, ਯਾਗੁਯਾ ਉਪਟ੍ਠਾਸਿ ਸਤ੍ਤਰਤ੍ਤਂ.

੪੬੨. ‘‘ਤਸ੍ਸ ਵਤਂ ਤਂ ਪਨ ਬ੍ਰਹ੍ਮਚਰਿਯਂ, ਤਸ੍ਸ ਸੁਚਿਣ੍ਣਸ੍ਸ ਅਯਂ ਵਿਪਾਕੋ;

ਏਤਾਦਿਸਂ ਬ੍ਯਸਨਂ ਪਾਪੁਣਿਤ੍ਵਾ, ਤਂ ਤਾਦਿਸਂ ਪਚ੍ਚਨੁਭੋਸ੍ਸਤਿਦ੍ਧਿਂ.

੪੬੩. ‘‘ਠਤ੍ਵਾਨ ਸੋ ਵਸ੍ਸਸਤਂ ਇਧੇਵ, ਸਬ੍ਬੇਹਿ ਕਾਮੇਹਿ ਸਮਙ੍ਗਿਭੂਤੋ;

ਕਾਯਸ੍ਸ ਭੇਦਾ ਅਭਿਸਮ੍ਪਰਾਯਂ, ਸਹਬ੍ਯਤਂ ਗਚ੍ਛਤਿ ਵਾਸਵਸ੍ਸਾ’’ਤਿ. –

ਚਤਸ੍ਸੋ ਗਾਥਾ ਅਵੋਚੁਂ.

੪੬੦. ਤਤ੍ਥ ਜਨਤਾਤਿ ਜਨਸਮੂਹੋ, ਉਪਾਸਕਗਣੋਤਿ ਅਧਿਪ੍ਪਾਯੋ. ਤਤ੍ਰਾਤਿ ਤਸ੍ਸਂ ਪੂਜਾਯਂ. ਅਸ੍ਸਾਤਿ ਤਸ੍ਸ ਦਾਰਕਸ੍ਸ. ਚਿਤ੍ਤਸ੍ਸਹੁ ਅਞ੍ਞਥਤ੍ਤਨ੍ਤਿ ਪੁਰਿਮਭਵਸ੍ਮਿਂ ਚਿਤ੍ਤਸ੍ਸ ਅਞ੍ਞਥਾਭਾਵੋ ਅਨਾਦਰੋ ਅਗਾਰਵੋ ਅਪਚ੍ਚਯੋ ਅਹੋਸਿ. ਅਸਬ੍ਭਨ੍ਤਿ ਸਾਧੁਸਭਾਯ ਸਾਵੇਤੁਂ ਅਯੁਤ੍ਤਂ ਫਰੁਸਂ ਵਾਚਂ ਅਭਾਸਿ.

੪੬੧. ਸੋਤਿ ਸੋ ਅਯਂ. ਤਂ ਵਿਤਕ੍ਕਨ੍ਤਿ ਤਂ ਪਾਪਕਂ ਵਿਤਕ੍ਕਂ. ਪਵਿਨੋਦਯਿਤ੍ਵਾਤਿ ਮਾਤਰਾ ਕਤਾਯ ਸਞ੍ਞਤ੍ਤਿਯਾ ਵੂਪਸਮੇਤ੍ਵਾ. ਪੀਤਿਂ ਪਸਾਦਂ ਪਟਿਲਦ੍ਧਾਤਿ ਪੀਤਿਂ ਪਸਾਦਞ੍ਚ ਪਟਿਲਭਿਤ੍ਵਾ ਉਪ੍ਪਾਦੇਤ੍ਵਾ. ਯਾਗੁਯਾ ਉਪਟ੍ਠਾਸੀਤਿ ਯਾਗੁਦਾਨੇਨ ਉਪਟ੍ਠਹਿ. ਸਤ੍ਤਰਤ੍ਤਨ੍ਤਿ ਸਤ੍ਤਦਿਵਸਂ.

੪੬੨. ਤਸ੍ਸ ਵਤਂ ਤਂ ਪਨ ਬ੍ਰਹ੍ਮਚਰਿਯਨ੍ਤਿ ਤਂ ਮਯਾ ਹੇਟ੍ਠਾ ਵੁਤ੍ਤਪ੍ਪਕਾਰਂ ਅਤ੍ਤਨੋ ਚਿਤ੍ਤਸ੍ਸ ਪਸਾਦਨਂ ਦਾਨਞ੍ਚ ਇਮਸ੍ਸ ਪੁਗ੍ਗਲਸ੍ਸ ਵਤਂ ਤਂ ਬ੍ਰਹ੍ਮਚਰਿਯਞ੍ਚ, ਅਞ੍ਞਂ ਕਿਞ੍ਚਿ ਨਤ੍ਥੀਤਿ ਅਤ੍ਥੋ.

੪੬੩. ਠਤ੍ਵਾਨਾਤਿ ਯਾਵ ਆਯੁਪਰਿਯੋਸਾਨਾ ਇਧੇਵ ਮਨੁਸ੍ਸਲੋਕੇ ਠਤ੍ਵਾ. ਅਭਿਸਮ੍ਪਰਾਯਨ੍ਤਿ ਪੁਨਬ੍ਭਵੇ. ਸਹਬ੍ਯਤਂ ਗਚ੍ਛਤਿ ਵਾਸਵਸ੍ਸਾਤਿ ਸਕ੍ਕਸ੍ਸ ਦੇਵਾਨਮਿਨ੍ਦਸ੍ਸ ਪੁਤ੍ਤਭਾਵੇਨ ਸਹਭਾਵਂ ਗਮਿਸ੍ਸਤਿ. ਅਨਾਗਤਤ੍ਥੇ ਹਿ ਇਦਂ ਪਚ੍ਚੁਪ੍ਪਨ੍ਨਕਾਲਵਚਨਂ. ਸੇਸਂ ਸਬ੍ਬਤ੍ਥ ਉਤ੍ਤਾਨਮੇਵਾਤਿ.

ਕੁਮਾਰਪੇਤਵਤ੍ਥੁਵਣ੍ਣਨਾ ਨਿਟ੍ਠਿਤਾ.