੪. ਭੁਸਪੇਤਵਤ੍ਥੁਵਣ੍ਣਨਾ

ਭੁਸਾਨਿ ਏਕੋ ਸਾਲਿਂ ਪੁਨਾਪਰੋਤਿ ਇਦਂ ਸਤ੍ਥਰਿ ਸਾਵਤ੍ਥਿਯਂ ਵਿਹਰਨ੍ਤੇ ਚਤ੍ਤਾਰੋ ਪੇਤੇ ਆਰਬ੍ਭ ਵੁਤ੍ਤਂ. ਸਾਵਤ੍ਥਿਯਾ ਕਿਰ ਅਵਿਦੂਰੇ ਅਞ੍ਞਤਰਸ੍ਮਿਂ ਗਾਮਕੇ ਏਕੋ ਕੂਟਵਾਣਿਜੋ ਕੂਟਮਾਨਾਦੀਹਿ ਜੀਵਿਕਂ ਕਪ੍ਪੇਸਿ. ਸੋ ਸਾਲਿਪਲਾਪੇ ਗਹੇਤ੍ਵਾ ਤਮ੍ਬਮਤ੍ਤਿਕਾਯ ਪਰਿਭਾਵੇਤ੍ਵਾ ਗਰੁਤਰੇ ਕਤ੍ਵਾ ਰਤ੍ਤਸਾਲਿਹਿ ਸਦ੍ਧਿਂ ਮਿਸ੍ਸੇਤ੍ਵਾ ਵਿਕ੍ਕਿਣਿ. ਤਸ੍ਸ ਪੁਤ੍ਤੋ ‘‘ਘਰਂ ਆਗਤਾਨਂ ਮਮ ਮਿਤ੍ਤਸੁਹਜ੍ਜਾਨਂ ਸਮ੍ਮਾਨਂ ਨ ਕਰੋਤੀ’’ਤਿ ਕੁਪਿਤੋ ਯੁਗਚਮ੍ਮਂ ਗਹੇਤ੍ਵਾ ਮਾਤੁਸੀਸੇ ਪਹਾਰਮਦਾਸਿ. ਤਸ੍ਸ ਸੁਣਿਸਾ ਸਬ੍ਬੇਸਂ ਅਤ੍ਥਾਯ ਠਪਿਤਮਂਸਂ ਚੋਰਿਕਾਯ ਖਾਦਿਤ੍ਵਾ ਪੁਨ ਤੇਹਿ ਅਨੁਯੁਞ੍ਜਿਯਮਾਨਾ ‘‘ਸਚੇ ਮਯਾ ਤਂ ਮਂਸਂ ਖਾਦਿਤਂ, ਭਵੇ ਭਵੇ ਅਤ੍ਤਨੋ ਪਿਟ੍ਠਿਮਂਸਂ ਕਨ੍ਤਿਤ੍ਵਾ ਖਾਦੇਯ੍ਯ’’ਨ੍ਤਿ ਸਪਥਮਕਾਸਿ. ਭਰਿਯਾ ਪਨਸ੍ਸ ਕਿਞ੍ਚਿਦੇਵ ਉਪਕਰਣਂ ਯਾਚਨ੍ਤਾਨਂ ‘‘ਨਤ੍ਥੀ’’ਤਿ ਵਤ੍ਵਾ ਤੇਹਿ ਨਿਪ੍ਪੀਲ਼ਿਯਮਾਨਾ ‘‘ਸਚੇ ਸਨ੍ਤਂ ਨਤ੍ਥੀਤਿ ਵਦਾਮਿ, ਜਾਤਜਾਤਟ੍ਠਾਨੇ ਗੂਥਭਕ੍ਖਾ ਭਵੇਯ੍ਯ’’ਨ੍ਤਿ ਮੁਸਾਵਾਦੇਨ ਸਪਥਮਕਾਸਿ.

ਤੇ ਚਤ੍ਤਾਰੋਪਿ ਜਨਾ ਅਪਰੇਨ ਸਮਯੇਨ ਕਾਲਂ ਕਤ੍ਵਾ ਵਿਞ੍ਝਾਟਵਿਯਂ ਪੇਤਾ ਹੁਤ੍ਵਾ ਨਿਬ੍ਬਤ੍ਤਿਂਸੁ. ਤਤ੍ਥ ਕੂਟਵਾਣਿਜੋ ਕਮ੍ਮਫਲੇਨ ਪਜ੍ਜਲਨ੍ਤਂ ਭੁਸਂ ਉਭੋਹਿ ਹਤ੍ਥੇਹਿ ਗਹੇਤ੍ਵਾ ਅਤ੍ਤਨੋ ਮਤ੍ਥਕੇ ਆਕਿਰਿਤ੍ਵਾ ਮਹਾਦੁਕ੍ਖਂ ਅਨੁਭਵਤਿ, ਤਸ੍ਸ ਪੁਤ੍ਤੋ ਅਯੋਮਯੇਹਿ ਮੁਗ੍ਗਰੇਹਿ ਸਯਮੇਵ ਅਤ੍ਤਨੋ ਸੀਸਂ ਭਿਨ੍ਦਿਤ੍ਵਾ ਅਨਪ੍ਪਕਂ ਦੁਕ੍ਖਂ ਪਚ੍ਚਨੁਭੋਤਿ. ਤਸ੍ਸ ਸੁਣਿਸਾ ਕਮ੍ਮਫਲੇਨ ਸੁਨਿਸਿਤੇਹਿ ਅਤਿਵਿਯ ਵਿਪੁਲਾਯਤੇਹਿ ਨਖੇਹਿ ਅਤ੍ਤਨੋ ਪਿਟ੍ਠਿਮਂਸਾਨਿ ਕਨ੍ਤਿਤ੍ਵਾ ਖਾਦਨ੍ਤੀ ਅਪਰਿਮਿਤਂ ਦੁਕ੍ਖਂ ਅਨੁਭਵਤਿ, ਤਸ੍ਸ ਭਰਿਯਾਯ ਸੁਗਨ੍ਧਂ ਸੁਵਿਸੁਦ੍ਧਂ ਅਪਗਤਕਾਲ਼ਕਂ ਸਾਲਿਭਤ੍ਤਂ ਉਪਨੀਤਮਤ੍ਤਮੇਵ ਨਾਨਾਵਿਧਕਿਮਿਕੁਲਾਕੁਲਂ ਪਰਮਦੁਗ੍ਗਨ੍ਧਜੇਗੁਚ੍ਛਂ ਗੂਥਂ ਸਮ੍ਪਜ੍ਜਤਿ, ਤਂ ਸਾ ਉਭੋਹਿ ਹਤ੍ਥੇਹਿ ਪਰਿਗ੍ਗਹੇਤ੍ਵਾ ਭੁਞ੍ਜਨ੍ਤੀ ਮਹਾਦੁਕ੍ਖਂ ਪਟਿਸਂਵੇਦੇਤਿ.

ਏਵਂ ਤੇਸੁ ਚਤੂਸੁ ਜਨੇਸੁ ਪੇਤੇਸੁ ਨਿਬ੍ਬਤ੍ਤਿਤ੍ਵਾ ਮਹਾਦੁਕ੍ਖਂ ਅਨੁਭਵਨ੍ਤੇਸੁ ਆਯਸ੍ਮਾ ਮਹਾਮੋਗ੍ਗਲਾਨੋ ਪਬ੍ਬਤਚਾਰਿਕਂ ਚਰਨ੍ਤੋ ਏਕਦਿਵਸਂ ਤਂ ਠਾਨਂ ਗਤੋ. ਤੇ ਪੇਤੇ ਦਿਸ੍ਵਾ –

੪੪੭. ‘‘ਭੁਸਾਨਿ ਏਕੋ ਸਾਲਿਂ ਪੁਨਾਪਰੋ, ਅਯਞ੍ਚ ਨਾਰੀ ਸਕਮਂਸਲੋਹਿਤਂ;

ਤੁਵਞ੍ਚ ਗੂਥਂ ਅਸੁਚਿਂ ਅਕਨ੍ਤਂ, ਪਰਿਭੁਞ੍ਜਸਿ ਕਿਸ੍ਸ ਅਯਂ ਵਿਪਾਕੋ’’ਤਿ. –

ਇਮਾਯ ਗਾਥਾਯ ਤੇਹਿ ਕਤਕਮ੍ਮਂ ਪੁਚ੍ਛਿ. ਤਤ੍ਥ ਭੁਸਾਨੀਤਿ ਪਲਾਪਾਨਿ. ਏਕੋਤਿ ਏਕਕੋ. ਸਾਲਿਨ੍ਤਿ ਸਾਲਿਨੋ. ਸਾਮਿਅਤ੍ਥੇ ਹੇਤਂ ਉਪਯੋਗਵਚਨਂ, ਸਾਲਿਨੋ ਪਲਾਪਾਨਿ ਪਜ੍ਜਲਨ੍ਤਾਨਿ ਅਤ੍ਤਨੋ ਸੀਸੇ ਅਵਕਿਰਤੀਤਿ ਅਧਿਪ੍ਪਾਯੋ. ਪੁਨਾਪਰੋਤਿ ਪੁਨ ਅਪਰੋ. ਯੋ ਹਿ ਸੋ ਮਾਤੁਸੀਸਂ ਪਹਰਿ, ਸੋ ਅਯੋਮੁਗ੍ਗਰੇਹਿ ਅਤ੍ਤਨੋ ਸੀਸਂ ਪਹਰਿਤ੍ਵਾ ਸੀਸਭੇਦਂ ਪਾਪੁਣਾਤਿ, ਤਂ ਸਨ੍ਧਾਯ ਵਦਤਿ. ਸਕਮਂਸਲੋਹਿਤਨ੍ਤਿ ਅਤ੍ਤਨੋ ਪਿਟ੍ਠਿਮਂਸਂ ਲੋਹਿਤਞ੍ਚ ਪਰਿਭੁਞ੍ਜਤੀਤਿ ਯੋਜਨਾ. ਅਕਨ੍ਤਨ੍ਤਿ ਅਮਨਾਪਂ ਜੇਗੁਚ੍ਛਂ. ਕਿਸ੍ਸ ਅਯਂ ਵਿਪਾਕੋਤਿ ਕਤਮਸ੍ਸ ਪਾਪਕਮ੍ਮਸ੍ਸ ਇਦਂ ਫਲਂ, ਯਂ ਇਦਾਨਿ ਤੁਮ੍ਹੇਹਿ ਪਚ੍ਚਨੁਭਵੀਯਤੀਤਿ ਅਤ੍ਥੋ.

ਏਵਂ ਥੇਰੇਨ ਤੇਹਿ ਕਤਕਮ੍ਮੇ ਪੁਚ੍ਛਿਤੇ ਕੂਟਵਾਣਿਜਸ੍ਸ ਭਰਿਯਾ ਸਬ੍ਬੇਹਿ ਤੇਹਿ ਕਤਕਮ੍ਮਂ ਆਚਿਕ੍ਖਨ੍ਤੀ –

੪੪੮. ‘‘ਅਯਂ ਪੁਰੇ ਮਾਤਰਂ ਹਿਂਸਤਿ, ਅਯਂ ਪਨ ਕੂਟਵਾਣਿਜੋ;

ਅਯਂ ਮਂਸਾਨਿ ਖਾਦਿਤ੍ਵਾ, ਮੁਸਾਵਾਦੇਨ ਵਞ੍ਚੇਤਿ.

੪੪੯. ‘‘ਅਹਂ ਮਨੁਸ੍ਸੇਸੁ ਮਨੁਸ੍ਸਭੂਤਾ, ਅਗਾਰਿਨੀ ਸਬ੍ਬਕੁਲਸ੍ਸ ਇਸ੍ਸਰਾ;

ਸਨ੍ਤੇਸੁ ਪਰਿਗੁਹਾਮਿ, ਮਾ ਚ ਕਿਞ੍ਚਿ ਇਤੋ ਅਦਂ.

੪੫੦. ‘‘ਮੁਸਾਵਾਦੇਨ ਛਾਦੇਮਿ, ਨਤ੍ਥਿ ਏਤਂ ਮਮ ਗੇਹੇ;

ਸਚੇ ਸਨ੍ਤਂ ਨਿਗੁਹਾਮਿ, ਗੂਥੋ ਮੇ ਹੋਤੁ ਭੋਜਨਂ.

੪੫੧. ‘‘ਤਸ੍ਸ ਕਮ੍ਮਸ੍ਸ ਵਿਪਾਕੇਨ, ਮੁਸਾਵਾਦਸ੍ਸ ਚੂਭਯਂ;

ਸੁਗਨ੍ਧਂ ਸਾਲਿਨੋ ਭਤ੍ਤਂ, ਗੂਥਂ ਮੇ ਪਰਿਵਤ੍ਤਤਿ.

੪੫੨. ‘‘ਅਵਞ੍ਝਾਨਿ ਚ ਕਮ੍ਮਾਨਿ, ਨ ਹਿ ਕਮ੍ਮਂ ਵਿਨਸ੍ਸਤਿ;

ਦੁਗ੍ਗਨ੍ਧਂ ਕਿਮਿਨਂ ਮੀਲ਼੍ਹਂ, ਭੁਞ੍ਜਾਮਿ ਚ ਪਿਵਾਮਿ ਚਾ’’ਤਿ. – ਗਾਥਾ ਅਭਾਸਿ;

੪੪੮. ਤਤ੍ਥ ਅਯਨ੍ਤਿ ਪੁਤ੍ਤਂ ਦਸ੍ਸੇਨ੍ਤਿ ਵਦਤਿ. ਹਿਂਸਤੀਤਿ ਥਾਮੇਨ ਪਰਿਬਾਧੇਤਿ, ਮੁਗ੍ਗਰੇਨ ਪਹਰਤੀਤਿ ਅਤ੍ਥੋ. ਕੂਟਵਾਣਿਜੋਤਿ ਖਲਵਾਣਿਜੋ, ਵਞ੍ਚਨਾਯ ਵਣਿਜ੍ਜਕਾਰਕੋਤਿ ਅਤ੍ਥੋ. ਮਂਸਾਨਿ ਖਾਦਿਤ੍ਵਾਤਿ ਪਰੇਹਿ ਸਾਧਾਰਣਮਂਸਂ ਖਾਦਿਤ੍ਵਾ ‘‘ਨ ਖਾਦਾਮੀ’’ਤਿ ਮੁਸਾਵਾਦੇਨ ਤੇ ਵਞ੍ਚੇਤਿ.

੪੪੯-੫੦. ਅਗਾਰਿਨੀਤਿ ਗੇਹਸਾਮਿਨੀ. ਸਨ੍ਤੇਸੂਤਿ ਵਿਜ੍ਜਮਾਨੇਸ੍ਵੇਵ ਪਰੇਹਿ ਯਾਚਿਤਉਪਕਰਣੇਸੁ. ਪਰਿਗੁਹਾਮੀਤਿ ਪਟਿਚ੍ਛਾਦੇਸਿਂ. ਕਾਲਵਿਪਲ੍ਲਾਸੇਨ ਹੇਤਂ ਵੁਤ੍ਤਂ. ਮਾ ਚ ਕਿਞ੍ਚਿ ਇਤੋ ਅਦਨ੍ਤਿ ਇਤੋ ਮਮ ਸਨ੍ਤਕਤੋ ਕਿਞ੍ਚਿਮਤ੍ਤਮ੍ਪਿ ਅਤ੍ਥਿਕਸ੍ਸ ਪਰਸ੍ਸ ਨ ਅਦਾਸਿਂ. ਛਾਦੇਮਿਤਿ ‘‘ਨਤ੍ਥਿ ਏਤਂ ਮਮ ਗੇਹੇ’’ਤਿ ਮੁਸਾਵਾਦੇਨ ਛਾਦੇਸਿਂ.

੪੫੧-੨. ਗੂਥਂ ਮੇ ਪਰਿਵਤ੍ਤਤੀਤਿ ਸੁਗਨ੍ਧਂ ਸਾਲਿਭਤ੍ਤਂ ਮਯ੍ਹਂ ਕਮ੍ਮਵਸੇਨ ਗੂਥਭਾਵੇਨ ਪਰਿਵਤ੍ਤਤਿ ਪਰਿਣਮਤਿ. ਅਵਞ੍ਝਾਨੀਤਿ ਅਮੋਘਾਨਿ ਅਨਿਪ੍ਫਲਾਨਿ. ਨ ਹਿ ਕਮ੍ਮਂ ਵਿਨਸ੍ਸਤੀਤਿ ਯਥੂਪਚਿਤਂ ਕਮ੍ਮਂ ਫਲਂ ਅਦਤ੍ਵਾ ਨ ਹਿ ਵਿਨਸ੍ਸਤਿ. ਕਿਮਿਨਨ੍ਤਿ ਕਿਮਿਵਨ੍ਤਂ ਸਞ੍ਜਾਤਕਿਮਿਕੁਲਂ. ਮੀਲ਼੍ਹਨ੍ਤਿ ਗੂਥਂ. ਸੇਸਂ ਹੇਟ੍ਠਾ ਵੁਤ੍ਤਨਯਤ੍ਤਾ ਉਤ੍ਤਾਨਮੇਵ.

ਏਵਂ ਥੇਰੋ ਤਸ੍ਸਾ ਪੇਤਿਯਾ ਵਚਨਂ ਸੁਤ੍ਵਾ ਤਂ ਪਵਤ੍ਤਿਂ ਭਗਵਤੋ ਆਰੋਚੇਸਿ. ਭਗਵਾ ਤਮਤ੍ਥਂ ਅਟ੍ਠੁਪ੍ਪਤ੍ਤਿਂ ਕਤ੍ਵਾ ਸਮ੍ਪਤ੍ਤਪਰਿਸਾਯ ਧਮ੍ਮਂ ਦੇਸੇਸਿ. ਸਾ ਦੇਸਨਾ ਮਹਾਜਨਸ੍ਸ ਸਾਤ੍ਥਿਕਾ ਅਹੋਸੀਤਿ.

ਭੁਸਪੇਤਵਤ੍ਥੁਵਣ੍ਣਨਾ ਨਿਟ੍ਠਿਤਾ.