੩. ਰਥਕਾਰਪੇਤਿਵਤ੍ਥੁਵਣ੍ਣਨਾ

ਵੇਲ਼ੁਰਿਯਥਮ੍ਭਂ ਰੁਚਿਰਂ ਪਭਸ੍ਸਰਨ੍ਤਿ ਇਦਂ ਸਤ੍ਥਰਿ ਸਾਵਤ੍ਥਿਯਂ ਵਿਹਰਨ੍ਤੇ ਅਞ੍ਞਤਰਂ ਪੇਤਿਂ ਆਰਬ੍ਭ ਵੁਤ੍ਤਂ. ਅਤੀਤੇ ਕਿਰ ਕਸ੍ਸਪਸ੍ਸ ਭਗਵਤੋ ਕਾਲੇ ਅਞ੍ਞਤਰਾ ਇਤ੍ਥੀ ਸੀਲਾਚਾਰਸਮ੍ਪਨ੍ਨਾ ਕਲ੍ਯਾਣਮਿਤ੍ਤਸਨ੍ਨਿਸ੍ਸਯੇਨ ਸਾਸਨੇ ਅਭਿਪ੍ਪਸਨ੍ਨਾ ਸੁਵਿਭਤ੍ਤਵਿਚਿਤ੍ਰਭਿਤ੍ਤਿਥਮ੍ਭਸੋਪਾਨਭੂਮਿਤਲਂ ਅਤਿਵਿਯ ਦਸ੍ਸਨੀਯਂ ਏਕਂ ਆਵਾਸਂ ਕਤ੍ਵਾ ਤਤ੍ਥ ਭਿਕ੍ਖੂ ਨਿਸੀਦਾਪੇਤ੍ਵਾ ਪਣੀਤੇਨ ਆਹਾਰੇਨ ਪਰਿਵਿਸਿਤ੍ਵਾ ਭਿਕ੍ਖੁਸਙ੍ਘਸ੍ਸ ਨਿਯ੍ਯਾਦੇਸਿ. ਸਾ ਅਪਰੇਨ ਸਮਯੇਨ ਕਾਲਂ ਕਤ੍ਵਾ ਅਞ੍ਞਸ੍ਸ ਪਾਪਕਮ੍ਮਸ੍ਸ ਵਸੇਨ ਹਿਮਵਤਿ ਪਬ੍ਬਤਰਾਜੇ ਰਥਕਾਰਦਹਂ ਨਿਸ੍ਸਾਯ ਵਿਮਾਨਪੇਤੀ ਹੁਤ੍ਵਾ ਨਿਬ੍ਬਤ੍ਤਿ. ਤਸ੍ਸਾ ਸਙ੍ਘਸ੍ਸ ਆਵਾਸਦਾਨਪੁਞ੍ਞਾਨੁਭਾਵੇਨ ਸਬ੍ਬਰਤਨਮਯਂ ਉਲ਼ਾਰਂ ਅਤਿਵਿਯ ਸਮਨ੍ਤਤੋ ਪਾਸਾਦਿਕਂ ਮਨੋਹਰਂ ਰਮਣੀਯਂ ਪੋਕ੍ਖਰਣਿਯਂ ਨਨ੍ਦਨਵਨਸਦਿਸਂ ਉਪਸੋਭਿਤਂ ਵਿਮਾਨਂ ਨਿਬ੍ਬਤ੍ਤਿ, ਸਯਞ੍ਚ ਸੁਵਣ੍ਣਵਣ੍ਣਾ ਅਭਿਰੂਪਾ ਦਸ੍ਸਨੀਯਾ ਪਾਸਾਦਿਕਾ ਅਹੋਸਿ.

ਸਾ ਤਤ੍ਥ ਪੁਰਿਸੇਹਿ ਵਿਨਾਵ ਦਿਬ੍ਬਸਮ੍ਪਤ੍ਤਿਂ ਅਨੁਭਵਨ੍ਤੀ ਵਿਹਰਤਿ. ਤਸ੍ਸਾ ਤਤ੍ਥ ਦੀਘਰਤ੍ਤਂ ਨਿਪ੍ਪੁਰਿਸਾਯ ਵਸਨ੍ਤਿਯਾ ਅਨਭਿਰਤਿ ਉਪ੍ਪਨ੍ਨਾ. ਸਾ ਉਕ੍ਕਣ੍ਠਿਤਾ ਹੁਤ੍ਵਾ ‘‘ਅਤ੍ਥੇਸੋ ਉਪਾਯੋ’’ਤਿ ਚਿਨ੍ਤੇਤ੍ਵਾ ਦਿਬ੍ਬਾਨਿ ਅਮ੍ਬਪਕ੍ਕਾਨਿ ਨਦਿਯਂ ਪਕ੍ਖਿਪਤਿ. ਸਬ੍ਬਂ ਕਣ੍ਣਮੁਣ੍ਡਪੇਤਿਵਤ੍ਥੁਸ੍ਮਿਂ ਆਗਤਨਯੇਨੇਵ ਵੇਦਿਤਬ੍ਬਂ. ਇਧ ਪਨ ਬਾਰਾਣਸਿਵਾਸੀ ਏਕੋ ਮਾਣਵੋ ਗਙ੍ਗਾਯ ਤੇਸੁ ਏਕਂ ਅਮ੍ਬਫਲਂ ਦਿਸ੍ਵਾ ਤਸ੍ਸ ਪਭਵਂ ਗਵੇਸਨ੍ਤੋ ਅਨੁਕ੍ਕਮੇਨ ਤਂ ਠਾਨਂ ਗਨ੍ਤ੍ਵਾ ਨਦਿਂ ਦਿਸ੍ਵਾ ਤਦਨੁਸਾਰੇਨ ਤਸ੍ਸਾ ਵਸਨਟ੍ਠਾਨਂ ਗਤੋ. ਸਾ ਤਂ ਦਿਸ੍ਵਾ ਅਤ੍ਤਨੋ ਵਸਨਟ੍ਠਾਨਂ ਨੇਤ੍ਵਾ ਪਟਿਸਨ੍ਥਾਰਂ ਕਰੋਨ੍ਤੀ ਨਿਸੀਦਿ. ਸੋ ਤਸ੍ਸਾ ਵਸਨਟ੍ਠਾਨਸਮ੍ਪਤ੍ਤਿਂ ਦਿਸ੍ਵਾ ਪੁਚ੍ਛਨ੍ਤੋ –

੪੩੯. ‘‘ਵੇਲ਼ੁਰਿਯਥਮ੍ਭਂ ਰੁਚਿਰਂ ਪਭਸ੍ਸਰਂ, ਵਿਮਾਨਮਾਰੁਯ੍ਹ ਅਨੇਕਚਿਤ੍ਤਂ;

ਤਤ੍ਥਚ੍ਛਸਿ ਦੇਵਿ ਮਹਾਨੁਭਾਵੇ, ਪਥਦ੍ਧਨਿ ਪਨ੍ਨਰਸੇਵ ਚਨ੍ਦੋ.

੪੪੦. ‘‘ਵਣ੍ਣੋ ਚ ਤੇ ਕਨਕਸ੍ਸ ਸਨ੍ਨਿਭੋ, ਉਤ੍ਤਤ੍ਤਰੂਪੋ ਭੁਸ ਦਸ੍ਸਨੇਯ੍ਯੋ;

ਪਲ੍ਲਙ੍ਕਸੇਟ੍ਠੇ ਅਤੁਲੇ ਨਿਸਿਨ੍ਨਾ, ਏਕਾ ਤੁਵਂ ਨਤ੍ਥਿ ਚ ਤੁਯ੍ਹ ਸਾਮਿਕੋ.

੪੪੧. ‘‘ਇਮਾ ਚ ਤੇ ਪੋਕ੍ਖਰਣੀ ਸਮਨ੍ਤਾ, ਪਹੂਤਮਲ੍ਯਾ ਬਹੁਪੁਣ੍ਡਰੀਕਾ;

ਸੁਵਣ੍ਣਚੁਣ੍ਣੇਹਿ ਸਮਨ੍ਤਮੋਤ੍ਥਤਾ, ਨ ਤਤ੍ਥ ਪਙ੍ਕੋ ਪਣਕੋ ਚ ਵਿਜ੍ਜਤਿ.

੪੪੨. ‘‘ਹਂਸਾ ਚਿਮੇ ਦਸ੍ਸਨੀਯਾ ਮਨੋਰਮਾ, ਉਦਕਸ੍ਮਿਮਨੁਪਰਿਯਨ੍ਤਿ ਸਬ੍ਬਦਾ;

ਸਮਯ੍ਯ ਵਗ੍ਗੂਪਨਦਨ੍ਤਿ ਸਬ੍ਬੇ, ਬਿਨ੍ਦੁਸ੍ਸਰਾ ਦੁਨ੍ਦੁਭੀਨਂਵ ਘੋਸੋ.

੪੪੩. ‘‘ਦਦ੍ਦਲ੍ਲਮਾਨਾ ਯਸਸਾ ਯਸਸ੍ਸਿਨੀ, ਨਾਵਾਯ ਚ ਤ੍ਵਂ ਅਵਲਮ੍ਬ ਤਿਟ੍ਠਸਿ;

ਆਲ਼ਾਰਪਮ੍ਹੇ ਹਸਿਤੇ ਪਿਯਂਵਦੇ, ਸਬ੍ਬਙ੍ਗਕਲ੍ਯਾਣਿ ਭੁਸਂ ਵਿਰੋਚਸਿ.

੪੪੪. ‘‘ਇਦਂ ਵਿਮਾਨਂ ਵਿਰਜਂ ਸਮੇ ਠਿਤਂ, ਉਯ੍ਯਾਨਵਨ੍ਤਂ ਰਤਿਨਨ੍ਦਿਵਡ੍ਢਨਂ;

ਇਚ੍ਛਾਮਹਂ ਨਾਰਿ ਅਨੋਮਦਸ੍ਸਨੇ, ਤਯਾ ਸਹ ਨਨ੍ਦਨੇ ਇਧ ਮੋਦਿਤੁ’’ਨ੍ਤਿ. –

ਇਮਾ ਗਾਥਾ ਅਭਾਸਿ.

੪੩੯. ਤਤ੍ਥ ਤਤ੍ਥਾਤਿ ਤਸ੍ਮਿਂ ਵਿਮਾਨੇ. ਅਚ੍ਛਸੀਤਿ ਇਚ੍ਛਿਤਿਚ੍ਛਿਤਕਾਲੇ ਨਿਸੀਦਸਿ. ਦੇਵੀਤਿ ਤਂ ਆਲਪਤਿ. ਮਹਾਨੁਭਾਵੇਤਿ ਮਹਤਾ ਦਿਬ੍ਬਾਨੁਭਾਵੇਨ ਸਮਨ੍ਨਾਗਤੇ. ਪਥਦ੍ਧਨੀਤਿ ਅਤ੍ਤਨੋ ਪਥਭੂਤੇ ਅਦ੍ਧਨਿ, ਗਗਨਤਲਮਗ੍ਗੇਤਿ ਅਤ੍ਥੋ. ਪਨ੍ਨਰਸੇਵ ਚਨ੍ਦੋਤਿ ਪੁਣ੍ਣਮਾਸਿਯਂ ਪਰਿਪੁਣ੍ਣਮਣ੍ਡਲੋ ਚਨ੍ਦੋ ਵਿਯ ਵਿਜ੍ਜੋਤਮਾਨਾਤਿ ਅਤ੍ਥੋ.

੪੪੦. ਵਣ੍ਣੋ ਚ ਤੇ ਕਨਕਸ੍ਸ ਸਨ੍ਨਿਭੋਤਿ ਤਵ ਵਣ੍ਣੋ ਚ ਉਤ੍ਤਤ੍ਤਸਿਙ੍ਗੀਸੁਵਣ੍ਣੇਨ ਸਦਿਸੋ ਅਤਿਵਿਯ ਮਨੋਹਰੋ. ਤੇਨਾਹ ‘‘ਉਤ੍ਤਤ੍ਤਰੂਪੋ ਭੁਸ ਦਸ੍ਸਨੇਯ੍ਯੋ’’ਤਿ. ਅਤੁਲੇਤਿ ਮਹਾਰਹੇ. ਅਤੁਲੇਤਿ ਵਾ ਦੇਵਤਾਯ ਆਲਪਨਂ, ਅਸਦਿਸਰੂਪੇਤਿ ਅਤ੍ਥੋ. ਨਤ੍ਥਿ ਚ ਤੁਯ੍ਹ ਸਾਮਿਕੋਤਿ ਤੁਯ੍ਹਂ ਸਾਮਿਕੋ ਚ ਨਤ੍ਥਿ.

੪੪੧. ਪਹੂਤਮਲ੍ਯਾਤਿ ਕਮਲਕੁਵਲਯਾਦਿਬਹੁਵਿਧਕੁਸੁਮਵਤਿਯੋ. ਸੁਵਣ੍ਣਚੁਣ੍ਣੇਹੀਤਿ ਸੁਵਣ੍ਣਵਾਲੁਕਾਹਿ. ਸਮਨ੍ਤਮੋਤ੍ਥਤਾਤਿ ਸਮਨ੍ਤਤੋ ਓਕਿਣ੍ਣਾ. ਤਤ੍ਥਾਤਿ ਤਾਸੁ ਪੋਕ੍ਖਰਣੀਸੁ. ਪਙ੍ਕੋ ਪਣਕੋ ਚਾਤਿ ਕਦ੍ਦਮੋ ਵਾ ਉਦਕਪਿਚ੍ਛਿਲ੍ਲੋ ਵਾ ਨ ਵਿਜ੍ਜਤਿ.

੪੪੨. ਹਂਸਾ ਚਿਮੇ ਦਸ੍ਸਨੀਯਾ ਮਨੋਰਮਾਤਿ ਇਮੇ ਹਂਸਾ ਚ ਦਸ੍ਸਨਸੁਖਾ ਮਨੋਰਮਾ ਚ. ਅਨੁਪਰਿਯਨ੍ਤੀਤਿ ਅਨੁਵਿਚਰਨ੍ਤਿ. ਸਬ੍ਬਦਾਤਿ ਸਬ੍ਬੇਸੁ ਉਤੂਸੁ. ਸਮਯ੍ਯਾਤਿ ਸਙ੍ਗਮ੍ਮ. ਵਗ੍ਗੂਤਿ ਮਧੁਰਂ. ਉਪਨਦਨ੍ਤੀਤਿ ਵਿਕੂਜਨ੍ਤਿ. ਬਿਨ੍ਦੁਸ੍ਸਰਾਤਿ ਅਵਿਸਟਸ੍ਸਰਾ ਸਮ੍ਪਿਣ੍ਡਿਤਸ੍ਸਰਾ. ਦੁਨ੍ਦੁਭੀਨਂਵ ਘੋਸੋਤਿ ਵਗ੍ਗੁਬਿਨ੍ਦੁਸ੍ਸਰਭਾਵੇਨ ਦੁਨ੍ਦੁਭੀਨਂ ਵਿਯ ਤਵ ਪੋਕ੍ਖਰਣਿਯਂ ਹਂਸਾਨਂ ਘੋਸੋਤਿ ਅਤ੍ਥੋ.

੪੪੩. ਦਦ੍ਦਲ੍ਲਮਾਨਾਤਿ ਅਤਿਵਿਯ ਅਭਿਜਲਨ੍ਤੀ. ਯਸਸਾਤਿ ਦੇਵਿਦ੍ਧਿਯਾ. ਨਾਵਾਯਾਤਿ ਦੋਣਿਯਂ. ਪੋਕ੍ਖਰਣਿਯਞ੍ਹਿ ਪਦੁਮਿਨਿਯਂ ਸੁਵਣ੍ਣਨਾਵਾਯ ਮਹਾਰਹੇ ਪਲ੍ਲਙ੍ਕੇ ਨਿਸੀਦਿਤ੍ਵਾ ਉਦਕਕੀਲ਼ਂ ਕੀਲ਼ਨ੍ਤਿਂ ਪੇਤਿਂ ਦਿਸ੍ਵਾ ਏਵਮਾਹ. ਅਵਲਮ੍ਬਾਤਿ ਅਵਲਮ੍ਬਿਤ੍ਵਾ ਅਪਸ੍ਸੇਨਂ ਅਪਸ੍ਸਾਯ. ਤਿਟ੍ਠਸੀਤਿ ਇਦਂ ਠਾਨਸਦ੍ਦਸ੍ਸ ਗਤਿਨਿਵਤ੍ਤਿ ਅਤ੍ਥਤ੍ਤਾ ਗਤਿਯਾ ਪਟਿਕ੍ਖੇਪਵਚਨਂ. ‘‘ਨਿਸਜ੍ਜਸੀ’’ਤਿ ਵਾ ਪਾਠੋ, ਨਿਸੀਦਸਿਚ੍ਚੇਵਸ੍ਸ ਅਤ੍ਥੋ ਦਟ੍ਠਬ੍ਬੋ. ਆਲ਼ਾਰਪਮ੍ਹੇਤਿ ਵੇਲ੍ਲਿਤਦੀਘਨੀਲਪਖੁਮੇ. ਹਸਿਤੇਤਿ ਹਸਿਤਮਹਾਹਸਿਤਮੁਖੇ. ਪਿਯਂਵਦੇਤਿ ਪਿਯਭਾਣਿਨੀ. ਸਬ੍ਬਙ੍ਗਕਲ੍ਯਾਣੀਤਿ ਸਬ੍ਬੇਹਿ ਅਙ੍ਗੇਹਿ ਸੁਨ੍ਦਰੇ, ਸੋਭਨਸਬ੍ਬਙ੍ਗਪਚ੍ਚਙ੍ਗੀਤਿ ਅਤ੍ਥੋ. ਵਿਰੋਚਸੀਤਿ ਵਿਰਾਜੇਸਿ.

੪੪੪. ਵਿਰਜਨ੍ਤਿ ਵਿਗਤਰਜਂ ਨਿਦ੍ਦੋਸਂ. ਸਮੇ ਠਿਤਨ੍ਤਿ ਸਮੇ ਭੂਮਿਭਾਗੇ ਠਿਤਂ, ਚਤੁਰਸ੍ਸਸੋਭਿਤਤਾਯ ਵਾ ਸਮਭਾਗੇ ਠਿਤਂ, ਸਮਨ੍ਤਭਦ੍ਦਕਨ੍ਤਿ ਅਤ੍ਥੋ. ਉਯ੍ਯਾਨਵਨ੍ਤਨ੍ਤਿ ਨਨ੍ਦਨਵਨਸਹਿਤਂ. ਰਤਿਨਨ੍ਦਿਵਡ੍ਢਨਨ੍ਤਿ ਰਤਿਞ੍ਚ ਨਨ੍ਦਿਞ੍ਚ ਵਡ੍ਢੇਤੀਤਿ ਰਤਿਨਨ੍ਦਿਵਡ੍ਢਨਂ, ਸੁਖਸ੍ਸ ਚ ਪੀਤਿਯਾ ਚ ਸਂਵਡ੍ਢਨਨ੍ਤਿ ਅਤ੍ਥੋ. ਨਾਰੀਤਿ ਤਸ੍ਸਾ ਆਲਪਨਂ. ਅਨੋਮਦਸ੍ਸਨੇਤਿ ਪਰਿਪੁਣ੍ਣਅਙ੍ਗਪਚ੍ਚਙ੍ਗਤਾਯ ਅਨਿਨ੍ਦਿਤਦਸ੍ਸਨੇ. ਨਨ੍ਦਨੇਤਿ ਨਨ੍ਦਨਕਰੇ. ਇਧਾਤਿ ਨਨ੍ਦਨਵਨੇ, ਵਿਮਾਨੇ ਵਾ. ਮੋਦਿਤੁਨ੍ਤਿ ਅਭਿਰਮਿਤੁਂ ਇਚ੍ਛਾਮੀਤਿ ਯੋਜਨਾ.

ਏਵਂ ਤੇਨ ਮਾਣਵੇਨ ਵੁਤ੍ਤੇ ਸਾ ਵਿਮਾਨਪੇਤਿਦੇਵਤਾ ਤਸ੍ਸ ਪਟਿਵਚਨਂ ਦੇਨ੍ਤੀ –

੪੪੫. ‘‘ਕਰੋਹਿ ਕਮ੍ਮਂ ਇਧ ਵੇਦਨੀਯਂ, ਚਿਤ੍ਤਞ੍ਚ ਤੇ ਇਧ ਨਿਹਿਤਂ ਭਵਤੁ;

ਕਤ੍ਵਾਨ ਕਮ੍ਮਂ ਇਧ ਵੇਦਨੀਯਂ, ਏਵਂ ਮਮਂ ਲਚ੍ਛਸਿ ਕਾਮਕਾਮਿਨਿ’’ਨ੍ਤਿ. –

ਗਾਥਮਾਹ. ਤਤ੍ਥ ਕਰੋਹਿ ਕਮ੍ਮਂ ਇਧ ਵੇਦਨੀਯਨ੍ਤਿ ਇਧ ਇਮਸ੍ਮਿਂ ਦਿਬ੍ਬਟ੍ਠਾਨੇ ਵਿਪਚ੍ਚਨਕਂ ਵਿਪਾਕਦਾਯਕਂ ਕੁਸਲਕਮ੍ਮਂ ਕਰੋਹਿ ਪਸਵੇਯ੍ਯਾਸਿ. ਇਧ ਨਿਹਿਤਨ੍ਤਿ ਇਧੂਪਨੀਤਂ, ‘‘ਇਧ ਨਿਨ੍ਨ’’ਨ੍ਤਿ ਵਾ ਪਾਠੋ, ਇਮਸ੍ਮਿਂ ਠਾਨੇ ਨਿਨ੍ਨਂ ਪੋਣਂ ਪਬ੍ਭਾਰਂ ਤਵ ਚਿਤ੍ਤਂ ਭਵਤੁ ਹੋਤੁ. ਮਮਨ੍ਤਿ ਮਂ. ਲਚ੍ਛਸੀਤਿ ਲਭਿਸ੍ਸਸਿ.

ਸੋ ਮਾਣਵੋ ਤਸ੍ਸਾ ਵਿਮਾਨਪੇਤਿਯਾ ਵਚਨਂ ਸੁਤ੍ਵਾ ਤਤੋ ਮਨੁਸ੍ਸਪਥਂ ਗਤੋ ਤਤ੍ਥ ਚਿਤ੍ਤਂ ਪਣਿਧਾਯ ਤਜ੍ਜਂ ਪੁਞ੍ਞਕਮ੍ਮਂ ਕਤ੍ਵਾ ਨਚਿਰਸ੍ਸੇਵ ਕਾਲਂ ਕਤ੍ਵਾ ਤਤ੍ਥ ਨਿਬ੍ਬਤ੍ਤਿ ਤਸ੍ਸਾ ਪੇਤਿਯਾ ਸਹਬ੍ਯਤਂ. ਤਮਤ੍ਥਂ ਪਕਾਸੇਨ੍ਤਾ ਸਙ੍ਗੀਤਿਕਾਰਾ –

੪੪੬. ‘‘ਸਾਧੂਤਿ ਸੋ ਤਸ੍ਸਾ ਪਟਿਸ੍ਸੁਣਿਤ੍ਵਾ,

ਅਕਾਸਿ ਕਮ੍ਮਂ ਤਹਿਂ ਵੇਦਨੀਯਂ;

ਕਤ੍ਵਾਨ ਕਮ੍ਮਂ ਤਹਿਂ ਵੇਦਨੀਯਂ,

ਉਪਪਜ੍ਜਿ ਸੋ ਮਾਣਵੋ ਤਸ੍ਸਾ ਸਹਬ੍ਯਤ’’ਨ੍ਤਿ. –

ਓਸਾਨਗਾਥਮਾਹਂਸੁ. ਤਤ੍ਥ ਸਾਧੂਤਿ ਸਮ੍ਪਟਿਚ੍ਛਨੇ ਨਿਪਾਤੋ. ਤਸ੍ਸਾਤਿ ਤਸ੍ਸਾ ਵਿਮਾਨਪੇਤਿਯਾ. ਪਟਿਸ੍ਸੁਣਿਤ੍ਵਾਤਿ ਤਸ੍ਸਾ ਵਚਨਂ ਸਮ੍ਪਟਿਚ੍ਛਿਤ੍ਵਾ. ਤਹਿਂ ਵੇਦਨੀਯਨ੍ਤਿ ਤਸ੍ਮਿਂ ਵਿਮਾਨੇ ਤਾਯ ਸਦ੍ਧਿਂ ਵੇਦਿਤਬ੍ਬਸੁਖਵਿਪਾਕਂ ਕੁਸਲਕਮ੍ਮਂ. ਸਹਬ੍ਯਤਨ੍ਤਿ ਸਹਭਾਵਂ. ਸੋ ਮਾਣਵੋ ਤਸ੍ਸਾ ਸਹਬ੍ਯਤਂ ਉਪਪਜ੍ਜੀਤਿ ਯੋਜਨਾ. ਸੇਸਂ ਉਤ੍ਤਾਨਮੇਵ.

ਏਵਂ ਤੇਸੁ ਤਤ੍ਥ ਚਿਰਕਾਲਂ ਦਿਬ੍ਬਸਮ੍ਪਤ੍ਤਿਂ ਅਨੁਭਵਨ੍ਤੇਸੁ ਪੁਰਿਸੋ ਕਮ੍ਮਸ੍ਸ ਪਰਿਕ੍ਖਯੇਨ ਕਾਲਮਕਾਸਿ, ਇਤ੍ਥੀ ਪਨ ਅਤ੍ਤਨੋ ਪੁਞ੍ਞਕਮ੍ਮਸ੍ਸ ਖੇਤ੍ਤਙ੍ਗਤਭਾਵੇਨ ਏਕਂ ਬੁਦ੍ਧਨ੍ਤਰਂ ਤਤ੍ਥ ਪਰਿਪੁਣ੍ਣਂ ਕਤ੍ਵਾ ਵਸਿ. ਅਥ ਅਮ੍ਹਾਕਂ ਭਗਵਤਿ ਲੋਕੇ ਉਪ੍ਪਜ੍ਜਿਤ੍ਵਾ ਪਵਤ੍ਤਿਤਵਰਧਮ੍ਮਚਕ੍ਕੇ ਅਨੁਕ੍ਕਮੇਨ ਜੇਤਵਨੇ ਵਿਹਰਨ੍ਤੇ ਆਯਸ੍ਮਾ ਮਹਾਮੋਗ੍ਗਲ੍ਲਾਨੋ ਏਕਦਿਵਸਂ ਪਬ੍ਬਤਚਾਰਿਕਂ ਚਰਮਾਨੋ ਤਂ ਵਿਮਾਨਞ੍ਚ ਵਿਮਾਨਪੇਤਿਞ੍ਚ ਦਿਸ੍ਵਾ ‘‘ਵੇਲ਼ੁਰਿਯਥਮ੍ਭਂ ਰੁਚਿਰਂ ਪਭਸ੍ਸਰ’’ਨ੍ਤਿਆਦਿਕਾਹਿ ਗਾਥਾਹਿ ਪੁਚ੍ਛਿ. ਸਾ ਚਸ੍ਸ ਆਦਿਤੋ ਪਟ੍ਠਾਯ ਸਬ੍ਬਂ ਅਤ੍ਤਨੋ ਪਵਤ੍ਤਿਂ ਆਰੋਚੇਸਿ. ਤਂ ਸੁਤ੍ਵਾ ਥੇਰੋ ਸਾਵਤ੍ਥਿਂ ਆਗਨ੍ਤ੍ਵਾ ਭਗਵਤੋ ਆਰੋਚੇਸਿ. ਭਗਵਾ ਤਮਤ੍ਥਂ ਅਟ੍ਠੁਪ੍ਪਤ੍ਤਿਂ ਕਤ੍ਵਾ ਸਮ੍ਪਤ੍ਤਪਰਿਸਾਯ ਧਮ੍ਮਂ ਦੇਸੇਸਿ. ਤਂ ਸੁਤ੍ਵਾ ਮਹਾਜਨੋ ਦਾਨਾਦਿਪੁਞ੍ਞਧਮ੍ਮਨਿਰਤੋ ਅਹੋਸੀਤਿ.

ਰਥਕਾਰਪੇਤਿਵਤ੍ਥੁਵਣ੍ਣਨਾ ਨਿਟ੍ਠਿਤਾ.