੨. ਸਾਣਵਾਸਿਤ੍ਥੇਰਪੇਤਵਤ੍ਥੁਵਣ੍ਣਨਾ
ਕੁਣ੍ਡਿਨਾਗਰਿਯੋ ਥੇਰੋਤਿ ਇਦਂ ਸਤ੍ਥਰਿ ਵੇਲ਼ੁਵਨੇ ਵਿਹਰਨ੍ਤੇ ਆਯਸ੍ਮਤੋ ਸਾਣਵਾਸਿਤ੍ਥੇਰਸ੍ਸ ਞਾਤਿਪੇਤੇ ਆਰਬ੍ਭ ਵੁਤ੍ਤਂ. ਅਤੀਤੇ ਕਿਰ ਬਾਰਾਣਸਿਯਂ ਕਿਤਵਸ੍ਸ ਨਾਮ ਰਞ੍ਞੋ ਪੁਤ੍ਤੋ ਉਯ੍ਯਾਨਕੀਲ਼ਂ ਕੀਲ਼ਿਤ੍ਵਾ ਨਿਵਤ੍ਤਨ੍ਤੋ ਸੁਨੇਤ੍ਤਂ ਨਾਮ ਪਚ੍ਚੇਕਬੁਦ੍ਧਂ ਪਿਣ੍ਡਾਯ ਚਰਿਤ੍ਵਾ ਨਗਰਤੋ ਨਿਕ੍ਖਮਨ੍ਤਂ ਦਿਸ੍ਵਾ ਇਸ੍ਸਰਿਯਮਦਮਤ੍ਤੋ ਹੁਤ੍ਵਾ ‘‘ਕਥਞ੍ਹਿ ਨਾਮ ਮਯ੍ਹਂ ਅਞ੍ਜਲਿਂ ਅਕਤ੍ਵਾ ਅਯਂ ਮੁਣ੍ਡਕੋ ਗਚ੍ਛਤੀ’’ਤਿ ਪਦੁਟ੍ਠਚਿਤ੍ਤੋ ਹਤ੍ਥਿਕ੍ਖਨ੍ਧਤੋ ਓਤਰਿਤ੍ਵਾ ‘‘ਕਚ੍ਚਿ ਤੇ ਪਿਣ੍ਡਪਾਤੋ ਲਦ੍ਧੋ’’ਤਿ ਆਲਪਨ੍ਤੋ ਹਤ੍ਥਤੋ ਪਤ੍ਤਂ ਗਹੇਤ੍ਵਾ ਪਥਵਿਯਂ ਪਾਤੇਤ੍ਵਾ ਭਿਨ੍ਦਿ. ਅਥ ਨਂ ਸਬ੍ਬਤ੍ਥ ਤਾਦਿਭਾਵਪ੍ਪਤ੍ਤਿਯਾ ਨਿਬ੍ਬਿਕਾਰਂ ਕਰੁਣਾਵਿਪ੍ਫਾਰਸੋਮਨਸ੍ਸਨਿਪਾਤਪਸਨ੍ਨਚਿਤ੍ਤਮੇਵ ਓਲੋਕੇਨ੍ਤਂ ਅਟ੍ਠਾਨਾਘਾਤੇਨ ਦੂਸਿਤਚਿਤ੍ਤੋ ‘‘ਕਿਂ ਮਂ ਕਿਤਵਸ੍ਸ ਰਞ੍ਞੋ ਪੁਤ੍ਤਂ ਨ ਜਾਨਾਸਿ, ਤ੍ਵਂ ਓਲੋਕਯਨ੍ਤੋ ਮਯ੍ਹਂ ਕਿਂ ਕਰਿਸ੍ਸਸੀ’’ਤਿ ਵਤ੍ਵਾ ਅਵਹਸਨ੍ਤੋ ਪਕ੍ਕਾਮਿ. ਪਕ੍ਕਨ੍ਤਮਤ੍ਤਸ੍ਸੇਵ ਚਸ੍ਸ ਨਰਕਗ੍ਗਿਦਾਹਪਟਿਭਾਗੋ ਬਲਵਸਰੀਰਦਾਹੋ ਉਪ੍ਪਜ੍ਜਿ. ਸੋ ਤੇਨ ਮਹਾਸਨ੍ਤਾਪੇਨਾਭਿਭੂਤਕਾਯੋ ਅਤਿਬਾਲ਼੍ਹਂ ਦੁਕ੍ਖਵੇਦਨਾਭਿਤੁਨ੍ਨੋ ਕਾਲਂ ਕਤ੍ਵਾ ਅਵੀਚੀਮਹਾਨਿਰਯੇ ਨਿਬ੍ਬਤ੍ਤਿ.
ਸੋ ਤਤ੍ਥ ਦਕ੍ਖਿਣਪਸ੍ਸੇਨ ਵਾਮਪਸ੍ਸੇਨ ਉਤ੍ਤਾਨੋ ਅਵਕੁਜ੍ਜੋਤਿ ਬਹੂਹਿ ਪਕਾਰੇਹਿ ਪਰਿਵਤ੍ਤਿਤ੍ਵਾ ਚਤੁਰਾਸੀਤਿ ਵਸ੍ਸਸਹਸ੍ਸਾਨਿ ਪਚ੍ਚਿਤ੍ਵਾ ਤਤੋ ਚੁਤੋ ਪੇਤੇਸੁ ਅਪਿਰਿਮਿਤਕਾਲਂ ਖੁਪ੍ਪਿਪਾਸਾਦਿਦੁਕ੍ਖਂ ਅਨੁਭਵਿਤ੍ਵਾ ਤਤੋ ਚੁਤੋ ਇਮਸ੍ਮਿਂ ਬੁਦ੍ਧੁਪ੍ਪਾਦੇ ਕੁਣ੍ਡਿਨਗਰਸ੍ਸ ਸਮੀਪੇ ਕੇਵਟ੍ਟਗਾਮੇ ਨਿਬ੍ਬਤ੍ਤਿ. ਤਸ੍ਸ ਜਾਤਿਸ੍ਸਰਞਾਣਂ ਉਪ੍ਪਜ੍ਜਿ, ਤੇਨ ਸੋ ਪੁਬ੍ਬੇ ਅਤ੍ਤਨਾ ਅਨੁਭੂਤਪੁਬ੍ਬਂ ਦੁਕ੍ਖਂ ਅਨੁਸ੍ਸਰਨ੍ਤੋ ਵਯਪ੍ਪਤ੍ਤੋਪਿ ਪਾਪਭਯੇਨ ਞਾਤਕੇਹਿਪਿ ਸਦ੍ਧਿਂ ਮਚ੍ਛਬਨ੍ਧਨਤ੍ਥਂ ਨ ਗਚ੍ਛਤਿ. ਤੇਸੁ ਗਚ੍ਛਨ੍ਤੇਸੁ ਮਚ੍ਛੇ ਘਾਤੇਤੁਂ ਅਨਿਚ੍ਛਨ੍ਤੋ ਨਿਲੀਯਤਿ, ਗਤੋ ਚ ਜਾਲਂ ਭਿਨ੍ਦਤਿ, ਜੀਵਨ੍ਤੇ ਵਾ ਮਚ੍ਛੇ ਗਹੇਤ੍ਵਾ ਉਦਕੇ ਵਿਸ੍ਸਜ੍ਜੇਤਿ, ਤਸ੍ਸ ਤਂ ਕਿਰਿਯਂ ਅਰੋਚਨ੍ਤਾ ਞਾਤਕਾ ਗੇਹਤੋ ਤਂ ਨੀਹਰਿਂਸੁ. ਏਕੋ ਪਨਸ੍ਸ ਭਾਤਾ ਸਿਨੇਹਬਦ੍ਧਹਦਯੋ ਅਹੋਸਿ.
ਤੇਨ ਚ ਸਮਯੇਨ ਆਯਸ੍ਮਾ ਆਨਨ੍ਦੋ ਕੁਣ੍ਡਿਨਗਰਂ ਉਪਨਿਸ੍ਸਾਯ ਸਾਣਪਬ੍ਬਤੇ ਵਿਹਰਤਿ. ਅਥ ਸੋ ਕੇਵਟ੍ਟਪੁਤ੍ਤੋ ਞਾਤਕੇਹਿ ਪਰਿਚ੍ਚਤ੍ਤੋ ਹੁਤ੍ਵਾ ਇਤੋ ਚਿਤੋ ਚ ਪਰਿਬ੍ਭਮਨ੍ਤੋ ਤਂ ਪਦੇਸਂ ਪਤ੍ਤੋ ਭੋਜਨਵੇਲਾਯ ਥੇਰਸ੍ਸ ਸਨ੍ਤਿਕਂ ਉਪਸਙ੍ਕਮਿ. ਥੇਰੋ ਤਂ ਪੁਚ੍ਛਿਤ੍ਵਾ ਭੋਜਨੇਨ ਅਤ੍ਥਿਕਭਾਵਂ ਞਤ੍ਵਾ ਤਸ੍ਸ ਭਤ੍ਤਂ ਦਤ੍ਵਾ ਕਤਭਤ੍ਤਕਿਚ੍ਚੋ ਸਬ੍ਬਂ ਤਂ ਪਵਤ੍ਤਿਂ ਞਤ੍ਵਾ ਧਮ੍ਮਕਥਾਯ ਪਸਨ੍ਨਮਾਨਸਂ ਞਤ੍ਵਾ ‘‘ਪਬ੍ਬਜਿਸ੍ਸਸਿ, ਆਵੁਸੋ’’ਤਿ? ‘‘ਆਮ, ਭਨ੍ਤੇ, ਪਬ੍ਬਜਿਸ੍ਸਾਮੀ’’ਤਿ. ਥੇਰੋ ਤਂ ਪਬ੍ਬਾਜੇਤ੍ਵਾ ਤੇਨ ਸਦ੍ਧਿਂ ਭਗਵਤੋ ਸਨ੍ਤਿਕਂ ਅਗਮਾਸਿ. ਅਥ ਨਂ ਸਤ੍ਥਾ ਆਹ – ‘‘ਆਨਨ੍ਦ, ਇਮਂ ਸਾਮਣੇਰਂ ਅਨੁਕਮ੍ਪੇਯ੍ਯਾਸੀ’’ਤਿ. ਸੋ ਚ ਅਕਤਕੁਸਲਤ੍ਤਾ ਅਪ੍ਪਲਾਭੋ ਅਹੋਸਿ. ਅਥ ਨਂ ਸਤ੍ਥਾ ਅਨੁਗ੍ਗਣ੍ਹਨ੍ਤੋ ਭਿਕ੍ਖੂਨਂ ਪਰਿਭੋਗਤ੍ਥਾਯ ਪਾਨੀਯਘਟਾਨਂ ਪਰਿਪੂਰਣੇ ਨਿਯੋਜੇਸਿ. ਤਂ ਦਿਸ੍ਵਾ ਉਪਾਸਕਾ ਤਸ੍ਸ ਬਹੂਨਿ ਨਿਚ੍ਚਭਤ੍ਤਾਨਿ ਪਟ੍ਠਪੇਸੁਂ.
ਸੋ ਅਪਰੇਨ ਸਮਯੇਨ ਲਦ੍ਧੂਪਸਮ੍ਪਦੋ ਅਰਹਤ੍ਤਂ ਪਤ੍ਵਾ ਥੇਰੋ ਹੁਤ੍ਵਾ ਦ੍ਵਾਦਸਹਿ ਭਿਕ੍ਖੂਹਿ ਸਦ੍ਧਿਂ ਸਾਣਪਬ੍ਬਤੇ ਵਸਿ. ਤਸ੍ਸ ਪਨ ਞਾਤਕਾ ਪਞ੍ਚਸਤਮਤ੍ਤਾ ਅਨੁਪਚਿਤਕੁਸਲਕਮ੍ਮਾ ਉਪਚਿਤਮਚ੍ਛੇਰਾਦਿਪਾਪਧਮ੍ਮਾ ਕਾਲਂ ਕਤ੍ਵਾ ਪੇਤੇਸੁ ਨਿਬ੍ਬਤ੍ਤਿਂਸੁ. ਤਸ੍ਸ ਪਨ ਮਾਤਾਪਿਤਰੋ ‘‘ਏਸ ਅਮ੍ਹੇਹਿ ਪੁਬ੍ਬੇ ਗੇਹਤੋ ਨਿਕ੍ਕਡ੍ਢਿਤੋ’’ਤਿ ਸਾਰਜ੍ਜਮਾਨਾ ਤਂ ਅਨੁਪਸਙ੍ਕਮਿਤ੍ਵਾ ਤਸ੍ਮਿਂ ਬਦ੍ਧਸਿਨੇਹਂ ਭਾਤਿਕਂ ਪੇਸੇਸੁਂ. ਸੋ ਥੇਰਸ੍ਸ ਗਾਮਂ ਪਿਣ੍ਡਾਯ ਪਵਿਟ੍ਠਸਮਯੇ ਦਕ੍ਖਿਣਜਾਣੁਮਣ੍ਡਲਂ ਪਥਵਿਯਂ ਪਤਿਟ੍ਠਾਪੇਤ੍ਵਾ ਕਤਞ੍ਜਲੀ ਅਤ੍ਤਾਨਂ ਦਸ੍ਸੇਤ੍ਵਾ ‘‘ਮਾਤਾ ਪਿਤਾ ਚ ਤੇ, ਭਨ੍ਤੇ’’ਤਿਆਦਿਗਾਥਾ ਅਵੋਚ. ਕੁਣ੍ਡਿਨਾਗਰਿਯੋ ਥੇਰੋਤਿਆਦਯੋ ਪਨ ਆਦਿਤੋ ਪਞ੍ਚ ਗਾਥਾ ਤਾਸਂ ਸਮ੍ਬਨ੍ਧਦਸ੍ਸਨਤ੍ਥਂ ਧਮ੍ਮਸਙ੍ਗਾਹਕੇਹਿ ਠਪਿਤਾ.
੪੦੮. ‘‘ਕੁਣ੍ਡਿਨਾਗਰਿਯੋ ਥੇਰੋ, ਸਾਣਵਾਸਿਨਿਵਾਸਿਕੋ;
ਪੋਟ੍ਠਪਾਦੋਤਿ ਨਾਮੇਨ, ਸਮਣੋ ਭਾਵਿਤਿਨ੍ਦ੍ਰਿਯੋ.
੪੦੯. ‘‘ਤਸ੍ਸ ਮਾਤਾ ਪਿਤਾ ਭਾਤਾ, ਦੁਗ੍ਗਤਾ ਯਮਲੋਕਿਕਾ;
ਪਾਪਕਮ੍ਮਂ ਕਰਿਤ੍ਵਾਨ, ਪੇਤਲੋਕਂ ਇਤੋ ਗਤਾ.
੪੧੦. ‘‘ਤੇ ਦੁਗ੍ਗਤਾ ਸੂਚਿਕਟ੍ਟਾ, ਕਿਲਨ੍ਤਾ ਨਗ੍ਗਿਨੋ ਕਿਸਾ;
ਉਤ੍ਤਸਨ੍ਤਾ ਮਹਤ੍ਤਾਸਾ, ਨ ਦਸ੍ਸੇਨ੍ਤਿ ਕੁਰੂਰਿਨੋ.
੪੧੧. ‘‘ਤਸ੍ਸ ਭਾਤਾ ਵਿਤਰਿਤ੍ਵਾ, ਨਗ੍ਗੋ ਏਕਪਥੇਕਕੋ;
ਚਤੁਕੁਣ੍ਡਿਕੋ ਭਵਿਤ੍ਵਾਨ, ਥੇਰਸ੍ਸ ਦਸ੍ਸਯੀਤੁਮਂ.
੪੧੨. ‘‘ਥੇਰੋ ਚਾਮਨਸਿਕਤ੍ਵਾ, ਤੁਣ੍ਹੀਭੂਤੋ ਅਤਿਕ੍ਕਮਿ;
ਸੋ ਚ ਵਿਞ੍ਞਾਪਯੀ ਥੇਰਂ, ‘ਭਾਤਾ ਪੇਤਗਤੋ ਅਹਂ’.
੪੧੩. ‘‘ਮਾਤਾ ਪਿਤਾ ਚ ਤੇ ਭਨ੍ਤੇ, ਦੁਗ੍ਗਤਾ ਯਮਲੋਕਿਕਾ;
ਪਾਪਕਮ੍ਮਂ ਕਰਿਤ੍ਵਾਨ, ਪੇਤਲੋਕਂ ਇਤੋ ਗਤਾ.
੪੧੪. ‘‘ਤੇਨ ਦੁਗ੍ਗਤਾ ਸੂਚਿਕਟ੍ਟਾ, ਕਿਲਨ੍ਤਾ ਨਗ੍ਗਿਨੋ ਕਿਸਾ;
ਉਤ੍ਤਸਨ੍ਤਾ ਮਹਤ੍ਤਾਸਾ, ਨ ਦਸ੍ਸੇਨ੍ਤਿ ਕੁਰੂਰਿਨੋ.
੪੧੫. ‘‘ਅਨੁਕਮ੍ਪਸ੍ਸੁ ਕਾਰੁਣਿਕੋ, ਦਤ੍ਵਾ ਅਨ੍ਵਾਦਿਸਾਹਿ ਨੋ;
ਤਵ ਦਿਨ੍ਨੇਨ ਦਾਨੇਨ, ਯਾਪੇਸ੍ਸਨ੍ਤਿ ਕੁਰੂਰਿਨੋ’’ਤਿ.
੪੦੮-੯. ਤਤ੍ਥ ਕੁਣ੍ਡਿਨਾਗਰਿਯੋ ਥੇਰੋਤਿ ਏਵਂਨਾਮਕੇ ਨਗਰੇ ਜਾਤਸਂਵਡ੍ਢਤ੍ਥੇਰੋ, ‘‘ਕੁਣ੍ਡਿਕਨਗਰੋ ਥੇਰੋ’’ਤਿਪਿ ਪਾਠੋ, ਸੋ ਏਵਤ੍ਥੋ. ਸਾਣਵਾਸਿਨਿਵਾਸਿਕੋਤਿ ਸਾਣਪਬ੍ਬਤਵਾਸੀ. ਪੋਟ੍ਠਪਾਦੋਤਿ ਨਾਮੇਨਾਤਿ ਨਾਮੇਨ ਪੋਟ੍ਠਪਾਦੋ ਨਾਮ. ਸਮਣੋਤਿ ਸਮਿਤਪਾਪੋ. ਭਾਵਿਤਿਨ੍ਦ੍ਰਿਯੋਤਿ ਅਰਿਯਮਗ੍ਗਭਾਵਨਾਯ ਭਾਵਿਤਸਦ੍ਧਾਦਿਇਨ੍ਦ੍ਰਿਯੋ, ਅਰਹਾਤਿ ਅਤ੍ਥੋ. ਤਸ੍ਸਾਤਿ ਤਸ੍ਸ ਸਾਣਵਾਸਿਤ੍ਥੇਰਸ੍ਸ. ਦੁਗ੍ਗਤਾਤਿ ਦੁਗ੍ਗਤਿਗਤਾ.
੪੧੦. ਸੂਚਿਕਟ੍ਟਾਤਿ ਪੂਤਿਨਾ ਲੂਖਗਤ੍ਤਾ ਅਟ੍ਟਕਾ, ਸੂਚਿਕਾਤਿ ਲਦ੍ਧਨਾਮਾਯ ਖੁਪ੍ਪਿਪਾਸਾਯ ਅਟ੍ਟਾ ਪੀਲ਼ਿਤਾ. ‘‘ਸੂਚਿਕਣ੍ਠਾ’’ਤਿ ਕੇਚਿ ਪਠਨ੍ਤਿ, ਸੂਚਿਛਿਦ੍ਦਸਦਿਸਮੁਖਦ੍ਵਾਰਾਤਿ ਅਤ੍ਥੋ. ਕਿਲਨ੍ਤਾਤਿ ਕਿਲਨ੍ਤਕਾਯਚਿਤ੍ਤਾ. ਨਗ੍ਗਿਨੋਤਿ ਨਗ੍ਗਰੂਪਾ ਨਿਚ੍ਚੋਲ਼ਾ. ਕਿਸਾਤਿ ਅਟ੍ਠਿਤ੍ਤਚਮਤ੍ਤਸਰੀਰਤਾਯ ਕਿਸਦੇਹਾ. ਉਤ੍ਤਸਨ੍ਤਾਤਿ ‘‘ਅਯਂ ਸਮਣੋ ਅਮ੍ਹਾਕਂ ਪੁਤ੍ਤੋ’’ਤਿ ਓਤ੍ਤਪ੍ਪੇਨ ਉਤ੍ਰਾਸਂ ਆਪਜ੍ਜਨ੍ਤਾ. ਮਹਤ੍ਤਾਸਾਤਿ ਅਤ੍ਤਨਾ ਪੁਬ੍ਬੇ ਕਤਕਮ੍ਮਂ ਪਟਿਚ੍ਚ ਸਞ੍ਜਾਤਮਹਾਭਯਾ. ਨ ਦਸ੍ਸੇਨ੍ਤੀਤਿ ਅਤ੍ਤਾਨਂ ਨ ਦਸ੍ਸੇਨ੍ਤਿ, ਸਮ੍ਮੁਖੀਭਾਵਂ ਨ ਗਚ੍ਛਨ੍ਤਿ. ਕੁਰੂਰਿਨੋਤਿ ਦਾਰੁਣਕਮ੍ਮਨ੍ਤਾ.
੪੧੧. ਤਸ੍ਸ ਭਾਤਾਤਿ ਸਾਣਵਾਸਿਤ੍ਥੇਰਸ੍ਸ ਭਾਤਾ. ਵਿਤਰਿਤ੍ਵਾਤਿ ਵਿਤਿਣ੍ਣੋ ਹੁਤ੍ਵਾ, ਓਤ੍ਤਪ੍ਪਸਨ੍ਤਾਸਭਯਾਤਿ ਅਤ੍ਥੋ. ਵਿਤੁਰਿਤ੍ਵਾਤਿ ਵਾ ਪਾਠੋ, ਤੁਰਿਤੋ ਹੁਤ੍ਵਾ, ਤਰਮਾਨਰੂਪੋ ਹੁਤ੍ਵਾਤਿ ਵੁਤ੍ਤਂ ਹੋਤਿ. ਏਕਪਥੇਤਿ ਏਕਪਦਿਕਮਗ੍ਗੇ. ਏਕਕੋਤਿ ਏਕਿਕੋ ਅਦੁਤਿਯੋ. ਚਤੁਕੁਣ੍ਡਿਕੋ ਭਵਿਤ੍ਵਾਨਾਤਿ ਚਤੂਹਿ ਅਙ੍ਗੇਹਿ ਕੁਣ੍ਡੇਤਿ ਅਤ੍ਤਭਾਵਂ ਪਵਤ੍ਤੇਤੀਤਿ ਚਤੁਕੁਣ੍ਡਿਕੋ, ਦ੍ਵੀਹਿ ਜਾਣੂਹਿ ਦ੍ਵੀਹਿ ਹਤ੍ਥੇਹਿ ਗਚ੍ਛਨ੍ਤੋ ਤਿਟ੍ਠਨ੍ਤੋ ਚ, ਏਵਂਭੂਤੋ ਹੁਤ੍ਵਾਤਿ ਅਤ੍ਥੋ. ਸੋ ਹਿ ਏਵਂ ਪੁਰਤੋ ਕੋਪੀਨਪਟਿਚ੍ਛਾਦਨਾ ਹੋਤੀਤਿ ਤਥਾ ਅਕਾਸਿ. ਥੇਰਸ੍ਸ ਦਸ੍ਸਯੀਤੁਮਨ੍ਤਿ ਥੇਰਸ੍ਸ ਅਤ੍ਤਾਨਂ ਉਦ੍ਦਿਸਯਿ ਦਸ੍ਸੇਸਿ.
੪੧੨. ਅਮਨਸਿਕਤ੍ਵਾਤਿ ‘‘ਅਯਂ ਨਾਮ ਏਸੋ’’ਤਿ ਏਵਂ ਮਨਸਿ ਅਕਰਿਤ੍ਵਾ ਅਨਾਵਜ੍ਜੇਤ੍ਵਾ. ਸੋ ਚਾਤਿ ਸੋ ਪੇਤੋ. ਭਾਤਾ ਪੇਤਗਤੋ ਅਹਨ੍ਤਿ ‘‘ਅਹਂ ਅਤੀਤਤ੍ਤਭਾਵੇ ਭਾਤਾ, ਇਦਾਨਿ ਪੇਤਭੂਤੋ ਇਧਾਗਤੋ’’ਤਿ ਵਤ੍ਵਾ ਵਿਞ੍ਞਾਪਯਿ ਥੇਰਨ੍ਤਿ ਯੋਜਨਾ.
੪੧੩-੫. ਯਥਾ ਪਨ ਵਿਞ੍ਞਾਪਯਿ, ਤਂ ਦਸ੍ਸੇਤੁਂ ‘‘ਮਾਤਾ ਪਿਤਾ ਚਾ’’ਤਿਆਦਿਨਾ ਤਿਸ੍ਸੋ ਗਾਥਾ ਵੁਤ੍ਤਾ. ਤਤ੍ਥ ਮਾਤਾ ਪਿਤਾ ਚ ਤੇਤਿ ਤਵ ਮਾਤਾ ਚ ਪਿਤਾ ਚ. ਅਨੁਕਮ੍ਪਸ੍ਸੂਤਿ ਅਨੁਗ੍ਗਣ੍ਹ ਅਨੁਦਯਂ ਕਰੋਹਿ. ਅਨ੍ਵਾਦਿਸਾਹੀਤਿ ਆਦਿਸ. ਨੋਤਿ ਅਮ੍ਹਾਕਂ. ਤਵ ਦਿਨ੍ਨੇਨਾਤਿ ਤਯਾ ਦਿਨ੍ਨੇਨ.
ਤਂ ਸੁਤ੍ਵਾ ਥੇਰੋ ਯਥਾ ਪਟਿਪਜ੍ਜਿ, ਤਂ ਦਸ੍ਸੇਤੁਂ –
੪੧੬. ‘‘ਥੇਰੋ ਚਰਿਤ੍ਵਾ ਪਿਣ੍ਡਾਯ, ਭਿਕ੍ਖੂ ਅਞ੍ਞੇ ਚ ਦ੍ਵਾਦਸ;
ਏਕਜ੍ਝਂ ਸਨ੍ਨਿਪਤਿਂਸੁ, ਭਤ੍ਤਵਿਸ੍ਸਗ੍ਗਕਾਰਣਾ.
੪੧੭. ‘‘ਥੇਰੋ ਸਬ੍ਬੇਵ ਤੇ ਆਹ, ਯਥਾਲਦ੍ਧਂ ਦਦਾਥ ਮੇ;
ਸਙ੍ਘਭਤ੍ਤਂ ਕਰਿਸ੍ਸਾਮਿ, ਅਨੁਕਮ੍ਪਾਯ ਞਾਤਿਨਂ.
੪੧੮. ‘‘ਨਿਯ੍ਯਾਦਯਿਂਸੁ ਥੇਰਸ੍ਸ, ਥੇਰੋ ਸਙ੍ਘਂ ਨਿਮਨ੍ਤਯਿ;
ਦਤ੍ਵਾ ਅਨ੍ਵਾਦਿਸਿ ਥੇਰੋ, ਮਾਤੁ ਪਿਤੁ ਚ ਭਾਤੁਨੋ;
‘ਇਦਂ ਮੇ ਞਾਤੀਨਂ ਹੋਤੁ, ਸੁਖਿਤਾ ਹੋਨ੍ਤੁ ਞਾਤਯੋ’.
੪੧੯. ‘‘ਸਮਨਨ੍ਤਰਾਨੁਦ੍ਦਿਟ੍ਠੇ, ਭੋਜਨਂ ਉਦਪਜ੍ਜਥ;
ਸੁਚਿਂ ਪਣੀਤਂ ਸਮ੍ਪਨ੍ਨਂ, ਅਨੇਕਰਸਬ੍ਯਞ੍ਜਨਂ.
੪੨੦. ‘‘ਤਤੋ ਉਦ੍ਦਸ੍ਸਯੀ ਭਾਤਾ, ਵਣ੍ਣਵਾ ਬਲਵਾ ਸੁਖੀ;
ਪਹੂਤਂ ਭੋਜਨਂ ਭਨ੍ਤੇ, ਪਸ੍ਸ ਨਗ੍ਗਾਮ੍ਹਸੇ ਮਯਂ;
ਤਥਾ ਭਨ੍ਤੇ ਪਰਕ੍ਕਮ, ਯਥਾ ਵਤ੍ਥਂ ਲਭਾਮਸੇ.
੪੨੧. ‘‘ਥੇਰੋ ਸਙ੍ਕਾਰਕੂਟਮ੍ਹਾ, ਉਚ੍ਚਿਨਿਤ੍ਵਾਨ ਨਨ੍ਤਕੇ;
ਪਿਲੋਤਿਕਂ ਪਟਂ ਕਤ੍ਵਾ, ਸਙ੍ਘੇ ਚਾਤੁਦ੍ਦਿਸੇ ਅਦਾ.
੪੨੨. ‘‘ਦਤ੍ਵਾ ਅਨ੍ਵਾਦਿਸੀ ਥੇਰੋ, ਮਾਤੁ ਪਿਤੁ ਚ ਭਾਤੁਨੋ;
‘ਇਦਂ ਮੇ ਞਾਤੀਨਂ ਹੋਤੁ, ਸੁਖਿਤਾ ਹੋਨ੍ਤੁ ਞਾਤਯੋ’.
੪੨੩. ‘‘ਸਮਨਨ੍ਤਰਾਨੁਦ੍ਦਿਟ੍ਠੇ, ਵਤ੍ਥਾਨਿ ਉਦਪਜ੍ਜਿਸੁਂ;
ਤਤੋ ਸੁਵਤ੍ਥਵਸਨੋ, ਥੇਰਸ੍ਸ ਦਸ੍ਸਯੀਤੁਮਂ.
੪੨੪. ‘‘ਯਾਵਤਾ ਨਨ੍ਦਰਾਜਸ੍ਸ, ਵਿਜਿਤਸ੍ਮਿਂ ਪਟਿਚ੍ਛਦਾ;
ਤਤੋ ਬਹੁਤਰਾ ਭਨ੍ਤੇ, ਵਤ੍ਥਾਨਚ੍ਛਾਦਨਾਨਿ ਨੋ.
੪੨੫. ‘‘ਕੋਸੇਯ੍ਯਕਮ੍ਬਲੀਯਾਨਿ, ਖੋਮਕਪ੍ਪਾਸਿਕਾਨਿ ਚ;
ਵਿਪੁਲਾ ਚ ਮਹਗ੍ਘਾ ਚ, ਤੇਪਾਕਾਸੇਵਲਮ੍ਬਰੇ.
੪੨੬. ‘‘ਤੇ ਮਯਂ ਪਰਿਦਹਾਮ, ਯਂ ਯਞ੍ਹਿ ਮਨਸੋ ਪਿਯਂ;
ਤਥਾ ਭਨ੍ਤੇ ਪਰਕ੍ਕਮ, ਯਥਾ ਗੇਹਂ ਲਭਾਮਸੇ.
੪੨੭. ‘‘ਥੇਰੋ ਪਣ੍ਣਕੁਟਿਂ ਕਤ੍ਵਾ, ਸਙ੍ਘੇ ਚਾਤੁਦ੍ਦਿਸੇ ਅਦਾ;
ਦਤ੍ਵਾ ਚ ਅਨ੍ਵਾਦਿਸੀ ਥੇਰੋ, ਮਾਤੁ ਪਿਤੁ ਚ ਭਾਤੁਨੋ;
‘ਇਦਂ ਮੇ ਞਾਤੀਨਂ ਹੋਤੁ, ਸੁਖਿਤਾ ਹੋਨ੍ਤੁ ਞਾਤਯੋ’.
੪੨੮. ‘‘ਸਮਨਨ੍ਤਰਾਨੁਦ੍ਦਿਟ੍ਠੇ, ਘਰਾਨਿ ਉਦਪਜ੍ਜਿਸੁਂ;
ਕੂਟਾਗਾਰਨਿਵੇਸਨਾ, ਵਿਭਤ੍ਤਾ ਭਾਗਸੋ ਮਿਤਾ.
੪੨੯. ‘‘ਨ ਮਨੁਸ੍ਸੇਸੁ ਈਦਿਸਾ, ਯਾਦਿਸਾ ਨੋ ਘਰਾ ਇਧ;
ਅਪਿ ਦਿਬ੍ਬੇਸੁ ਯਾਦਿਸਾ, ਤਾਦਿਸਾ ਨੋ ਘਰਾ ਇਧ.
੪੩੦. ‘‘ਦਦ੍ਦਲ੍ਲਮਾਨਾ ਆਭੇਨ੍ਤਿ, ਸਮਨ੍ਤਾ ਚਤੁਰੋ ਦਿਸਾ;
ਤਥਾ ਭਨ੍ਤੇ ਪਰਕ੍ਕਮ, ਯਥਾ ਪਾਨੀਯਂ ਲਭਾਮਸੇ.
੪੩੧. ‘‘ਥੇਰੋ ਕਰਣਂ ਪੂਰੇਤ੍ਵਾ, ਸਙ੍ਘੇ ਚਾਤੁਦ੍ਦਿਸੇ ਅਦਾ;
ਦਤ੍ਵਾ ਅਨ੍ਵਾਦਿਸੀ ਥੇਰੋ, ਮਾਤੁ ਪਿਤੁ ਚ ਭਾਤੁਨੋ;
‘ਇਦਂ ਮੇ ਞਾਤੀਨਂ ਹੋਤੁ, ਸੁਖਿਤਾ ਹੋਨ੍ਤੁ ਞਾਤਯੋ’.
੪੩੨. ‘‘ਸਮਨਨ੍ਤਰਾਨੁਦ੍ਦਿਟ੍ਠੇ, ਪਾਨੀਯਂ ਉਦਪਜ੍ਜਥ;
ਗਮ੍ਭੀਰਾ ਚਤੁਰਸ੍ਸਾ ਚ, ਪੋਕ੍ਖਰਞ੍ਞੋ ਸੁਨਿਮ੍ਮਿਤਾ.
੪੩੩. ‘‘ਸੀਤੋਦਿਕਾ ਸੁਪ੍ਪਤਿਤ੍ਥਾ, ਸੀਤਾ ਅਪ੍ਪਟਿਗਨ੍ਧਿਯਾ;
ਪਦੁਮੁਪ੍ਪਲਸਞ੍ਛਨ੍ਨਾ, ਵਾਰਿਕਿਞ੍ਜਕ੍ਖਪੂਰਿਤਾ.
੪੩੪. ‘‘ਤਤ੍ਥ ਨ੍ਹਤ੍ਵਾ ਪਿਵਿਤ੍ਵਾ ਚ, ਥੇਰਸ੍ਸ ਪਟਿਦਸ੍ਸਯੁਂ;
ਪਹੂਤਂ ਪਾਨੀਯਂ ਭਨ੍ਤੇ, ਪਾਦਾ ਦੁਕ੍ਖਾ ਫਲਨ੍ਤਿ ਨੋ.
੪੩੫. ‘‘ਆਹਿਣ੍ਡਮਾਨਾ ਖਞ੍ਜਾਮ, ਸਕ੍ਖਰੇ ਕੁਸਕਣ੍ਟਕੇ;
ਤਥਾ ਭਨ੍ਤੇ ਪਰਕ੍ਕਮ, ਯਥਾ ਯਾਨਂ ਲਭਾਮਸੇ.
੪੩੬. ‘‘ਥੇਰੋ ਸਿਪਾਟਿਕਂ ਲਦ੍ਧਾ, ਸਙ੍ਘੇ ਚਾਤੁਦ੍ਦਿਸੇ ਅਦਾ;
ਦਤ੍ਵਾ ਅਨ੍ਵਾਦਿਸੀ ਥੇਰੋ, ਮਾਤੁ ਪਿਤੁ ਚ ਭਾਤੁਨੋ;
‘ਇਦਂ ਮੇ ਞਾਤੀਨਂ ਹੋਤੁ, ਸੁਖਿਤਾ ਹੋਨ੍ਤੁ ਞਾਤਯੋ’.
੪੩੭. ‘‘ਸਮਨਨ੍ਤਰਾਨੁਦ੍ਦਿਟ੍ਠੇ, ਪੇਤਾ ਰਥੇਨ ਮਾਗਮੁਂ;
ਅਨੁਕਮ੍ਪਿਤਮ੍ਹ ਭਦਨ੍ਤੇ, ਭਤ੍ਤੇਨਚ੍ਛਾਦਨੇਨ ਚ.
੪੩੮. ‘‘ਘਰੇਨ ਪਾਨੀਯਦਾਨੇਨ, ਯਾਨਦਾਨੇਨ ਚੂਭਯਂ;
ਮੁਨਿਂ ਕਾਰੁਣਿਕਂ ਲੋਕੇ, ਭਨ੍ਤੇ ਵਨ੍ਦਿਤੁਮਾਗਤਾ’’ਤਿ. – ਗਾਥਾਯੋ ਆਹਂਸੁ;
੪੧੬-੭. ਤਤ੍ਥ ਥੇਰੋ ਚਰਿਤ੍ਵਾ ਪਿਣ੍ਡਾਯਾਤਿ ਥੇਰੋ ਪਿਣ੍ਡਾਪਾਤਚਾਰਿਕਾਯ ਚਰਿਤ੍ਵਾ. ਭਿਕ੍ਖੂ ਅਞ੍ਞੇ ਚ ਦ੍ਵਾਦਸਾਤਿ ਥੇਰੇਨ ਸਹ ਵਸਨ੍ਤਾ ਅਞ੍ਞੇ ਚ ਦ੍ਵਾਦਸ ਭਿਕ੍ਖੂ ਏਕਜ੍ਝਂ ਏਕਤੋ ਸਨ੍ਨਿਪਤਿਂਸੁ. ਕਸ੍ਮਾਤਿ ਚੇ? ਭਤ੍ਤਵਿਸ੍ਸਗ੍ਗਕਾਰਣਾਤਿ ਭਤ੍ਤਕਿਚ੍ਚਕਾਰਣਾ ਭੁਞ੍ਜਨਨਿਮਿਤ੍ਤਂ. ਤੇਤਿ ਤੇ ਭਿਕ੍ਖੂ. ਯਥਾਲਦ੍ਧਨ੍ਤਿ ਯਂ ਯਂ ਲਦ੍ਧਂ. ਦਦਾਥਾਤਿ ਦੇਥ.
੪੧੮. ਨਿਯ੍ਯਾਦਯਿਂਸੂਤਿ ਅਦਂਸੁ. ਸਙ੍ਘਂ ਨਿਮਨ੍ਤਯੀਤਿ ਤੇ ਏਵ ਦ੍ਵਾਦਸ ਭਿਕ੍ਖੂ ਸਙ੍ਘੁਦ੍ਦੇਸਵਸੇਨ ਤਂ ਭਤ੍ਤਂ ਦਾਤੁਂ ਨਿਮਨ੍ਤੇਸਿ. ਅਨ੍ਵਾਦਿਸੀਤਿ ਆਦਿਸਿ. ਤਤ੍ਥ ਯੇਸਂ ਅਨ੍ਵਾਦਿਸਿ, ਤੇ ਦਸ੍ਸੇਤੁਂ ‘‘ਮਾਤੁ ਪਿਤੁ ਚ ਭਾਤੁਨੋ, ਇਦਂ ਮੇ ਞਾਤੀਨਂ ਹੋਤੁ, ਸੁਖਿਤਾ ਹੋਨ੍ਤੁ ਞਾਤਯੋ’’ਤਿ ਵੁਤ੍ਤਂ.
੪੧੯. ਸਮਨਨ੍ਤਰਾਨੁਦ੍ਦਿਟ੍ਠੇਤਿ ਉਦ੍ਦਿਟ੍ਠਸਮਨਨ੍ਤਰਮੇਵ. ਭੋਜਨਂ ਉਦਪਜ੍ਜਥਾਤਿ ਤੇਸਂ ਪੇਤਾਨਂ ਭੋਜਨਂ ਉਪ੍ਪਜ੍ਜਿ. ਕੀਦਿਸਨ੍ਤਿ ਆਹ ‘‘ਸੁਚਿ’’ਨ੍ਤਿਆਦਿ. ਤਤ੍ਥ ਅਨੇਕਰਸਬ੍ਯਞ੍ਜਨਨ੍ਤਿ ਨਾਨਾਰਸੇਹਿ ਬ੍ਯਞ੍ਜਨੇਹਿ ਯੁਤ੍ਤਂ, ਅਥ ਵਾ ਅਨੇਕਰਸਂ ਅਨੇਕਬ੍ਯਞ੍ਜਨਞ੍ਚ. ਤਤੋਤਿ ਭੋਜਨਲਾਭਤੋ ਪਚ੍ਛਾ.
੪੨੦. ਉਦ੍ਦਸ੍ਸਯੀ ਭਾਤਾਤਿ ਭਾਤਿਕਭੂਤੋ ਪੇਤੋ ਥੇਰਸ੍ਸ ਅਤ੍ਤਾਨਂ ਦਸ੍ਸੇਸਿ. ਵਣ੍ਣਵਾ ਬਲਵਾ ਸੁਖੀਤਿ ਤੇਨ ਭੋਜਨਲਾਭੇਨ ਤਾਵਦੇਵ ਰੂਪਸਮ੍ਪਨ੍ਨੋ ਬਲਸਮ੍ਪਨ੍ਨੋ ਸੁਖਿਤੋਵ ਹੁਤ੍ਵਾ. ਪਹੂਤਂ ਭੋਜਨਂ, ਭਨ੍ਤੇਤਿ, ਭਨ੍ਤੇ, ਤਵ ਦਾਨਾਨੁਭਾਵੇਨ ਪਹੂਤਂ ਅਨਪ੍ਪਕਂ ਭੋਜਨਂ ਅਮ੍ਹੇਹਿ ਲਦ੍ਧਂ. ਪਸ੍ਸ ਨਗ੍ਗਾਮ੍ਹਸੇਤਿ ਓਲੋਕੇਹਿ, ਨਗ੍ਗਿਕਾ ਪਨ ਅਮ੍ਹ, ਤਸ੍ਮਾ ਤਥਾ, ਭਨ੍ਤੇ, ਪਰਕ੍ਕਮ ਪਯੋਗਂ ਕਰੋਹਿ. ਯਥਾ ਵਤ੍ਥਂ ਲਭਾਮਸੇਤਿ ਯੇਨ ਪਕਾਰੇਨ ਯਾਦਿਸੇਨ ਪਯੋਗੇਨ ਸਬ੍ਬੇਵ ਮਯਂ ਵਤ੍ਥਾਨਿ ਲਭੇਯ੍ਯਾਮ, ਤਥਾ ਵਾਯਮਥਾਤਿ ਅਤ੍ਥੋ.
੪੨੧. ਸਙ੍ਕਾਰਕੂਟਮ੍ਹਾਤਿ ਤਤ੍ਥ ਤਤ੍ਥ ਸਙ੍ਕਾਰਟ੍ਠਾਨਤੋ. ਉਚ੍ਚਿਨਿਤ੍ਵਾਨਾਤਿ ਗਵੇਸਨਵਸੇਨ ਗਹੇਤ੍ਵਾ. ਨਨ੍ਤਕੇਤਿ ਛਿਨ੍ਨਪਰਿਯਨ੍ਤੇ ਛਡ੍ਡਿਤਦੁਸ੍ਸਖਣ੍ਡੇ. ਤੇ ਪਨ ਯਸ੍ਮਾ ਖਣ੍ਡਭੂਤਾ ਪਿਲੋਤਿਕਾ ਨਾਮ ਹੋਨ੍ਤਿ, ਤਾਹਿ ਚ ਥੇਰੋ ਚੀਵਰਂ ਕਤ੍ਵਾ ਸਙ੍ਘਸ੍ਸ ਅਦਾਸਿ, ਤਸ੍ਮਾ ਆਹ ‘‘ਪਿਲੋਤਿਕਂ ਪਟਂ ਕਤ੍ਵਾ, ਸਙ੍ਘੇ ਚਾਤੁਦ੍ਦਿਸੇ ਅਦਾ’’ਤਿ. ਤਤ੍ਥ ਸਙ੍ਘੇ ਚਾਤੁਦ੍ਦਿਸੇ ਅਦਾਤਿ ਚਤੂਹਿਪਿ ਦਿਸਾਹਿ ਆਗਤਭਿਕ੍ਖੁਸਙ੍ਘਸ੍ਸ ਅਦਾਸਿ. ਸਮ੍ਪਦਾਨਤ੍ਥੇ ਹਿ ਇਦਂ ਭੁਮ੍ਮਵਚਨਂ.
੪੨੩-੪. ਸੁਵਤ੍ਥਵਸਨੋਤਿ ਸੁਨ੍ਦਰਵਤ੍ਥਵਸਨੋ. ਥੇਰਸ੍ਸ ਦਸ੍ਸਯੀਤੁਮਨ੍ਤਿ ਥੇਰਸ੍ਸ ਅਤ੍ਤਾਨਂ ਦਸ੍ਸਯਿ ਦਸ੍ਸੇਸਿ, ਪਾਕਟੋ ਅਹੋਸਿ. ਪਟਿਚ੍ਛਾਦਯਤਿ ਏਤ੍ਥਾਤਿ ਪਟਿਚ੍ਛਦਾ.
੪੨੮-੯. ਕੂਟਾਗਾਰਨਿਵੇਸਨਾਤਿ ਕੂਟਾਗਾਰਭੂਤਾ ਤਦਞ੍ਞਨਿਵੇਸਨਸਙ੍ਖਾਤਾ ਚ ਘਰਾ. ਲਿਙ੍ਗਵਿਪਲ੍ਲਾਸਵਸੇਨ ਹੇਤਂ ਵੁਤ੍ਤਂ. ਵਿਭਤ੍ਤਾਤਿ ਸਮਚਤੁਰਸ੍ਸਆਯਤਵਟ੍ਟਸਣ੍ਠਾਨਾਦਿਵਸੇਨ ਵਿਭਤ੍ਤਾ. ਭਾਗਸੋ ਮਿਤਾਤਿ ਭਾਗੇਨ ਪਰਿਚ੍ਛਿਨ੍ਨਾ. ਨੋਤਿ ਅਮ੍ਹਾਕਂ. ਇਧਾਤਿ ਇਮਸ੍ਮਿਂ ਪੇਤਲੋਕੇ. ਅਪਿ ਦਿਬ੍ਬੇਸੂਤਿ ਅਪੀਤਿ ਨਿਪਾਤਮਤ੍ਤਂ, ਦੇਵਲੋਕੇਸੂਤਿ ਅਤ੍ਥੋ.
੪੩੧. ਕਰਣਨ੍ਤਿ ਧਮਕਰਣਂ. ਪੂਰੇਤ੍ਵਾਤਿ ਉਦਕਸ੍ਸ ਪੂਰੇਤ੍ਵਾ. ਵਾਰਿਕਿਞ੍ਜਕ੍ਖਪੂਰਿਤਾਤਿ ਤਤ੍ਥ ਤਤ੍ਥ ਵਾਰਿਮਤ੍ਥਕੇ ਪਦੁਮੁਪ੍ਪਲਾਦੀਨਂ ਕੇਸਰਭਾਰੇਹਿ ਸਞ੍ਛਾਦਿਤਵਸੇਨ ਪੂਰਿਤਾ. ਫਲਨ੍ਤੀਤਿ ਪੁਪ੍ਫਨ੍ਤਿ, ਪਣ੍ਹਿਕਪਰਿਯਨ੍ਤਾਦੀਸੁ ਵਿਦਾਲੇਨ੍ਤੀਤਿ ਅਤ੍ਥੋ.
੪੩੫-੬. ਆਹਿਣ੍ਡਮਾਨਾਤਿ ਵਿਚਰਮਾਨਾ. ਖਞ੍ਜਾਮਾਤਿ ਖਞ੍ਜਨਵਸੇਨ ਗਚ੍ਛਾਮ. ਸਕ੍ਖਰੇ ਕੁਸਕਣ੍ਟਕੇਤਿ ਸਕ੍ਖਰਵਤਿ ਕੁਸਕਣ੍ਟਕਵਤਿ ਚ ਭੂਮਿਭਾਗੇ, ਸਕ੍ਖਰੇ ਕੁਸਕਣ੍ਟਕੇ ਚ ਅਕ੍ਕਮਨ੍ਤਾਤਿ ਅਤ੍ਥੋ. ਯਾਨਨ੍ਤਿ ਰਥਵਯ੍ਹਾਦਿਕਂ ਯਂਕਿਞ੍ਚਿ ਯਾਨਂ. ਸਿਪਾਟਿਕਨ੍ਤਿ ਏਕਪਟਲਉਪਾਹਨਂ.
੪੩੭-੮. ਰਥੇਨ ਮਾਗਮੁਨ੍ਤਿ ਮਕਾਰੋ ਪਦਸਨ੍ਧਿਕਰੋ, ਰਥੇਨ ਆਗਮਂਸੁ. ਉਭਯਨ੍ਤਿ ਉਭਯੇਨ ਦਾਨੇਨ, ਯਾਨਦਾਨੇਨ ਚੇਵ ਭਤ੍ਤਾਦਿਚਤੁਪਚ੍ਚਯਦਾਨੇਨ ਚ. ਪਾਨੀਯਦਾਨੇਨ ਹੇਤ੍ਥ ਭੇਸਜ੍ਜਦਾਨਮ੍ਪਿ ਸਙ੍ਗਹਿਤਂ. ਸੇਸਂ ਹੇਟ੍ਠਾ ਵੁਤ੍ਤਨਯਤ੍ਤਾ ਉਤ੍ਤਾਨਮੇਵਾਤਿ.
ਥੇਰੋ ਤਂ ਪਵਤ੍ਤਿਂ ਭਗਵਤੋ ਆਰੋਚੇਸਿ. ਭਗਵਾ ਤਮਤ੍ਥਂ ਅਟ੍ਠੁਪ੍ਪਤ੍ਤਿਂ ਕਤ੍ਵਾ ‘‘ਯਥਾ ਇਮੇ ਏਤਰਹਿ, ਏਵਂ ਤ੍ਵਮ੍ਪਿ ਇਤੋ ਅਨਨ੍ਤਰਾਤੀਤੇ ਅਤ੍ਤਭਾਵੇ ਪੇਤੋ ਹੁਤ੍ਵਾ ਮਹਾਦੁਕ੍ਖਂ ਅਨੁਭਵੀ’’ਤਿ ਵਤ੍ਵਾ ਥੇਰੇਨ ਯਾਚਿਤੋ ਸੁਤ੍ਤਪੇਤਵਤ੍ਥੁਂ ਕਥੇਤ੍ਵਾ ਸਮ੍ਪਤ੍ਤਪਰਿਸਾਯ ਧਮ੍ਮਂ ਦੇਸੇਸਿ. ਤਂ ਸੁਤ੍ਵਾ ਮਹਾਜਨੋ ਸਞ੍ਜਾਤਸਂਵੇਗੋ ਦਾਨਸੀਲਾਦਿਪੁਞ੍ਞਕਮ੍ਮਨਿਰਤੋ ਅਹੋਸੀਤਿ.
ਸਾਣਵਾਸਿਤ੍ਥੇਰਪੇਤਵਤ੍ਥੁਵਣ੍ਣਨਾ ਨਿਟ੍ਠਿਤਾ.