੭. ਧਨਪਾਲਸੇਟ੍ਠਿਪੇਤਵਤ੍ਥੁਵਣ੍ਣਨਾ

ਨਗ੍ਗੋ ਦੁਬ੍ਬਣ੍ਣਰੂਪੋਸੀਤਿ ਇਦਂ ਸਤ੍ਥਰਿ ਜੇਤਵਨੇ ਵਿਹਰਨ੍ਤੇ ਧਨਪਾਲਪੇਤਂ ਆਰਬ੍ਭ ਵੁਤ੍ਤਂ. ਅਨੁਪ੍ਪਨ੍ਨੇ ਕਿਰ ਬੁਦ੍ਧੇ ਪਣ੍ਣਰਟ੍ਠੇ ਏਰਕਚ੍ਛਨਗਰੇ ਧਨਪਾਲਕੋ ਨਾਮ ਸੇਟ੍ਠਿ ਅਹੋਸਿ ਅਸ੍ਸਦ੍ਧੋ ਅਪ੍ਪਸਨ੍ਨੋ ਕਦਰਿਯੋ ਨਤ੍ਥਿਕਦਿਟ੍ਠਿਕੋ. ਤਸ੍ਸ ਕਿਰਿਯਾ ਪਾਲ਼ਿਤੋ ਏਵ ਵਿਞ੍ਞਾਯਤਿ. ਸੋ ਕਾਲਂ ਕਤ੍ਵਾ ਮਰੁਕਨ੍ਤਾਰੇ ਪੇਤੋ ਹੁਤ੍ਵਾ ਨਿਬ੍ਬਤ੍ਤਿ. ਤਸ੍ਸ ਤਾਲਕ੍ਖਨ੍ਧਪ੍ਪਮਾਣੋ ਕਾਯੋ ਅਹੋਸਿ, ਸਮੁਟ੍ਠਿਤਚ੍ਛਵਿ ਫਰੁਸੋ, ਵਿਰੂਪਕੇਸੋ, ਭਯਾਨਕੋ, ਦੁਬ੍ਬਣ੍ਣੋ ਅਤਿਵਿਯ ਵਿਰੂਪੋ ਬੀਭਚ੍ਛਦਸ੍ਸਨੋ. ਸੋ ਪਞ੍ਚਪਣ੍ਣਾਸ ਵਸ੍ਸਾਨਿ ਭਤ੍ਤਸਿਤ੍ਥਂ ਵਾ ਉਦਕਬਿਨ੍ਦੁਂ ਵਾ ਅਲਭਨ੍ਤੋ ਵਿਸੁਕ੍ਖਕਣ੍ਠੋਟ੍ਠਜਿਵ੍ਹੋ ਜਿਘਚ੍ਛਾਪਿਪਾਸਾਭਿਭੂਤੋ ਇਤੋ ਚਿਤੋ ਚ ਪਰਿਬ੍ਭਮਤਿ.

ਅਥ ਅਮ੍ਹਾਕਂ ਭਗਵਤਿ ਲੋਕੇ ਉਪ੍ਪਜ੍ਜਿਤ੍ਵਾ ਪਵਤ੍ਤਿਤਵਰਧਮ੍ਮਚਕ੍ਕੇ ਅਨੁਕ੍ਕਮੇਨ ਸਾਵਤ੍ਥਿਯਂ ਵਿਹਰਨ੍ਤੇ ਸਾਵਤ੍ਥਿਵਾਸਿਨੋ ਵਾਣਿਜਾ ਪਞ੍ਚਮਤ੍ਤਾਨਿ ਸਕਟਸਤਾਨਿ ਭਣ੍ਡਸ੍ਸ ਪੂਰੇਤ੍ਵਾ ਉਤ੍ਤਰਾਪਥਂ ਗਨ੍ਤ੍ਵਾ ਭਣ੍ਡਂ ਵਿਕ੍ਕਿਣਿਤ੍ਵਾ ਪਟਿਲਦ੍ਧਭਣ੍ਡਂ ਸਕਟੇਸੁ ਆਰੋਪੇਤ੍ਵਾ ਪਟਿਨਿਵਤ੍ਤਮਾਨਾ ਸਾਯਨ੍ਹਸਮਯੇ ਅਞ੍ਞਤਰਂ ਸੁਕ੍ਖਨਦਿਂ ਪਾਪੁਣਿਤ੍ਵਾ ਤਤ੍ਥ ਯਾਨਂ ਮੁਞ੍ਚਿਤ੍ਵਾ ਰਤ੍ਤਿਯਂ ਵਾਸਂ ਕਪ੍ਪੇਸੁਂ. ਅਥ ਸੋ ਪੇਤੋ ਪਿਪਾਸਾਭਿਭੂਤੋ ਪਾਨੀਯਸ੍ਸਤ੍ਥਾਯ ਆਗਨ੍ਤ੍ਵਾ ਤਤ੍ਥ ਬਿਨ੍ਦੁਮਤ੍ਤਮ੍ਪਿ ਪਾਨੀਯਂ ਅਲਭਿਤ੍ਵਾ ਵਿਗਤਾਸੋ ਛਿਨ੍ਨਮੂਲੋ ਵਿਯ ਤਾਲੋ ਛਿਨ੍ਨਪਾਦੋ ਪਤਿ. ਤਂ ਦਿਸ੍ਵਾ ਵਾਣਿਜਾ –

੨੨੭. ‘‘ਨਗ੍ਗੋ ਦੁਬ੍ਬਣ੍ਣਰੂਪੋਸਿ, ਕਿਸੋ ਧਮਨਿਸਨ੍ਥਤੋ;

ਉਪ੍ਫਾਸੁਲਿਕੋ ਕਿਸਿਕੋ, ਕੋ ਨੁ ਤ੍ਵਮਸਿ ਮਾਰਿਸਾ’’ਤਿ. –

ਇਮਾਯ ਗਾਥਾਯ ਪੁਚ੍ਛਿਂਸੁ. ਤਤੋ ਪੇਤੋ –

੨੨੮. ‘‘ਅਹਂ ਭਦਨ੍ਤੇ ਪੇਤੋਮ੍ਹਿ, ਦੁਗ੍ਗਤੋ ਯਮਲੋਕਿਕੋ;

ਪਾਪਕਮ੍ਮਂ ਕਰਿਤ੍ਵਾਨ, ਪੇਤਲੋਕਂ ਇਤੋ ਗਤੋ’’ਤਿ. –

ਅਤ੍ਤਾਨਂ ਆਵਿਕਤ੍ਵਾ ਪੁਨ ਤੇਹਿ –

੨੨੯. ‘‘ਕਿਂ ਨੁ ਕਾਯੇਨ ਵਾਚਾਯ, ਮਨਸਾ ਦੁਕ੍ਕਟਂ ਕਤਂ;

ਕਿਸ੍ਸਕਮ੍ਮਵਿਪਾਕੇਨ, ਪੇਤਲੋਕਂ ਇਤੋ ਗਤੋ’’ਤਿ. –

ਕਤਕਮ੍ਮਂ ਪੁਚ੍ਛਿਤੋ ਪੁਬ੍ਬੇ ਨਿਬ੍ਬਤ੍ਤਟ੍ਠਾਨਤੋ ਪਟ੍ਠਾਯ ਅਤੀਤਂ ਪਚ੍ਚੁਪ੍ਪਨ੍ਨਂ ਅਨਾਗਤਞ੍ਚ ਅਤ੍ਤਨੋ ਪਵਤ੍ਤਿਂ ਦਸ੍ਸੇਨ੍ਤੋ ਤੇਸਞ੍ਚ ਓਵਾਦਂ ਦੇਨ੍ਤੋ –

੨੩੦. ‘‘ਨਗਰਂ ਅਤ੍ਥਿ ਪਣ੍ਣਾਨਂ, ਏਰਕਚ੍ਛਨ੍ਤਿ ਵਿਸ੍ਸੁਤਂ;

ਤਤ੍ਥ ਸੇਟ੍ਠਿ ਪੁਰੇ ਆਸਿਂ, ਧਨਪਾਲੋਤਿ ਮਂ ਵਿਦੂ.

੨੩੧. ‘‘ਅਸੀਤਿ ਸਕਟਵਾਹਾਨਂ, ਹਿਰਞ੍ਞਸ੍ਸ ਅਹੋਸਿ ਮੇ;

ਪਹੂਤਂ ਮੇ ਜਾਤਰੂਪਂ, ਮੁਤ੍ਤਾ ਵੇਲ਼ੁਰਿਯਾ ਬਹੂ.

੨੩੨. ‘‘ਤਾਵ ਮਹਦ੍ਧਨਸ੍ਸਾਪਿ, ਨ ਮੇ ਦਾਤੁਂ ਪਿਯਂ ਅਹੁ;

ਪਿਦਹਿਤ੍ਵਾ ਦ੍ਵਾਰਂ ਭੁਞ੍ਜਿਂ, ਮਾ ਮਂ ਯਾਚਨਕਾਦ੍ਦਸੁਂ.

੨੩੩. ‘‘ਅਸ੍ਸਦ੍ਧੋ ਮਚ੍ਛਰੀ ਚਾਸਿਂ, ਕਦਰਿਯੋ ਪਰਿਭਾਸਕੋ;

ਦਦਨ੍ਤਾਨਂ ਕਰੋਨ੍ਤਾਨਂ, ਵਾਰਯਿਸ੍ਸਂ ਬਹੂ ਜਨੇ.

੨੩੪. ‘‘ਵਿਪਾਕੋ ਨਤ੍ਥਿ ਦਾਨਸ੍ਸ, ਸਂਯਮਸ੍ਸ ਕੁਤੋ ਫਲਂ;

ਪੋਕ੍ਖਰਞ੍ਞੋਦਪਾਨਾਨਿ, ਆਰਾਮਾਨਿ ਚ ਰੋਪਿਤੇ;

ਪਪਾਯੋ ਚ ਵਿਨਾਸੇਸਿਂ, ਦੁਗ੍ਗੇ ਸਙ੍ਕਮਨਾਨਿ ਚ.

੨੩੫. ‘‘ਸ੍ਵਾਹਂ ਅਕਤਕਲ੍ਯਾਣੋ, ਕਤਪਾਪੋ ਤਤੋ ਚੁਤੋ;

ਉਪਪਨ੍ਨੋ ਪੇਤ੍ਤਿਵਿਸਯਂ, ਖੁਪ੍ਪਿਪਾਸਸਮਪ੍ਪਿਤੋ.

੨੩੬. ‘‘ਪਞ੍ਚਪਣ੍ਣਾਸ ਵਸ੍ਸਾਨਿ, ਯਤੋ ਕਾਲਙ੍ਕਤੋ ਅਹਂ;

ਨਾਭਿਜਾਨਾਮਿ ਭੁਤ੍ਤਂ ਵਾ, ਪੀਤਂ ਵਾ ਪਨ ਪਾਨਿਯਂ.

੨੩੭. ‘‘ਯੋ ਸਂਯਮੋ ਸੋ ਵਿਨਾਸੋ, ਯੋ ਵਿਨਾਸੋ ਸੋ ਸਂਯਮੋ;

ਪੇਤਾ ਹਿ ਕਿਰ ਜਾਨਨ੍ਤਿ, ਯੋ ਸਂਯਮੋ ਸੋ ਵਿਨਾਸੋ.

੨੩੮. ‘‘ਅਹਂ ਪੁਰੇ ਸਂਯਮਿਸ੍ਸਂ, ਨਾਦਾਸਿਂ ਬਹੁਕੇ ਧਨੇ;

ਸਨ੍ਤੇਸੁ ਦੇਯ੍ਯਧਮ੍ਮੇਸੁ, ਦੀਪਂ ਨਾਕਾਸਿਮਤ੍ਤਨੋ;

ਸ੍ਵਾਹਂ ਪਚ੍ਛਾਨੁਤਪ੍ਪਾਮਿ, ਅਤ੍ਤਕਮ੍ਮਫਲੂਪਗੋ.

੨੩੯. ‘‘ਉਦ੍ਧਂ ਚਤੂਹਿ ਮਾਸੇਹਿ, ਕਾਲਕਿਰਿਯਾ ਭਵਿਸ੍ਸਤਿ;

ਏਕਨ੍ਤਕਟੁਕਂ ਘੋਰਂ, ਨਿਰਯਂ ਪਪਤਿਸ੍ਸਹਂ.

੨੪੦. ‘‘ਚਤੁਕ੍ਕਣ੍ਣਂ ਚਤੁਦ੍ਵਾਰਂ, ਵਿਭਤ੍ਤਂ ਭਾਗਸੋ ਮਿਤਂ;

ਅਯੋਪਾਕਾਰਪਰਿਯਨ੍ਤਂ, ਅਯਸਾ ਪਟਿਕੁਜ੍ਜਿਤਂ.

੨੪੧. ‘‘ਤਸ੍ਸ ਅਯੋਮਯਾ ਭੂਮਿ, ਜਲਿਤਾ ਤੇਜਸਾ ਯੁਤਾ;

ਸਮਨ੍ਤਾ ਯੋਜਨਸਤਂ, ਫਰਿਤ੍ਵਾ ਤਿਟ੍ਠਤਿ ਸਬ੍ਬਦਾ.

੨੪੨. ‘‘ਤਤ੍ਥਾਹਂ ਦੀਘਮਦ੍ਧਾਨਂ, ਦੁਕ੍ਖਂ ਵੇਦਿਸ੍ਸ ਵੇਦਨਂ;

ਫਲਂ ਪਾਪਸ੍ਸ ਕਮ੍ਮਸ੍ਸ, ਤਸ੍ਮਾ ਸੋਚਾਮਹਂ ਭੁਸਂ.

੨੪੩. ‘‘ਤਂ ਵਾ ਵਦਾਮਿ ਭਦ੍ਦਂ ਵੋ, ਯਾਵਨ੍ਤੇਤ੍ਥ ਸਮਾਗਤਾ;

ਮਾਕਤ੍ਥ ਪਾਪਕਂ ਕਮ੍ਮਂ, ਆਵਿ ਵਾ ਯਦਿ ਵਾ ਰਹੋ.

੨੪੪. ‘‘ਸਚੇ ਤਂ ਪਾਪਕਂ ਕਮ੍ਮਂ, ਕਰਿਸ੍ਸਥ ਕਰੋਥ ਵਾ;

ਨ ਵੋ ਦੁਕ੍ਖਾ ਪਮੁਤ੍ਯਤ੍ਥਿ, ਉਪ੍ਪਚ੍ਚਾਪਿ ਪਲਾਯਤਂ.

੨੪੫. ‘‘ਮਤ੍ਤੇਯ੍ਯਾ ਹੋਥ ਪੇਤ੍ਤੇਯ੍ਯਾ, ਕੁਲੇ ਜੇਟ੍ਠਾਪਚਾਯਿਕਾ;

ਸਾਮਞ੍ਞਾ ਹੋਥ ਬ੍ਰਹ੍ਮਞ੍ਞਾ, ਏਵਂ ਸਗ੍ਗਂ ਗਮਿਸ੍ਸਥਾ’’ਤਿ. –

ਇਮਾ ਗਾਥਾ ਅਭਾਸਿ.

੨੩੦-੨੩੧. ਤਤ੍ਥ ਪਣ੍ਣਾਨਨ੍ਤਿ ਪਣ੍ਣਾਨਾਮਰਟ੍ਠਸ੍ਸ ਏਵਂਨਾਮਕਾਨਂ ਰਾਜੂਨਂ. ਏਰਕਚ੍ਛਨ੍ਤਿ ਤਸ੍ਸ ਨਗਰਸ੍ਸ ਨਾਮਂ. ਤਤ੍ਥਾਤਿ ਤਸ੍ਮਿਂ ਨਗਰੇ. ਪੁਰੇਤਿ ਪੁਬ੍ਬੇ ਅਤੀਤਤ੍ਤਭਾਵੇ. ਧਨਪਾਲੋਤਿ ਮਂ ਵਿਦੂਤਿ ‘‘ਧਨਪਾਲਸੇਟ੍ਠੀ’’ਤਿ ਮਂ ਜਾਨਨ੍ਤਿ. ਤਯਿਦਂ ਨਾਮਂ ਤਦਾ ਮਯ੍ਹਂ ਅਤ੍ਥਾਨੁਗਤਮੇਵਾਤਿ ਦਸ੍ਸੇਨ੍ਤੋ ‘‘ਅਸੀਤੀ’’ਤਿ ਗਾਥਮਾਹ. ਤਤ੍ਥ ਅਸੀਤਿ ਸਕਟਵਾਹਾਨਨ੍ਤਿ ਵੀਸਤਿਖਾਰਿਕੋ ਵਾਹੋ, ਯੋ ਸਕਟਨ੍ਤਿ ਵੁਚ੍ਚਤਿ. ਤੇਸਂ ਸਕਟਵਾਹਾਨਂ ਅਸੀਤਿ ਹਿਰਞ੍ਞਸ੍ਸ ਤਥਾ ਕਹਾਪਣਸ੍ਸ ਚ ਮੇ ਅਹੋਸੀਤਿ ਯੋਜਨਾ. ਪਹੂਤਂ ਮੇ ਜਾਤਰੂਪਨ੍ਤਿ ਸੁਵਣ੍ਣਮ੍ਪਿ ਪਹੂਤਂ ਅਨੇਕਭਾਰਪਰਿਮਾਣਂ ਅਹੋਸੀਤਿ ਸਮ੍ਬਨ੍ਧੋ.

੨੩੨-੨੩੩. ਨ ਮੇ ਦਾਤੁਂ ਪਿਯਂ ਅਹੂਤਿ ਦਾਨਂ ਦਾਤੁਂ ਮਯ੍ਹਂ ਪਿਯਂ ਨਾਹੋਸਿ. ਮਾ ਮਂ ਯਾਚਨਕਾਦ੍ਦਸੁਨ੍ਤਿ ‘‘ਯਾਚਕਾ ਮਾ ਮਂ ਪਸ੍ਸਿਂਸੂ’’ਤਿ ਪਿਦਹਿਤ੍ਵਾ ਗੇਹਦ੍ਵਾਰਂ ਭੁਞ੍ਜਾਮਿ. ਕਦਰਿਯੋਤਿ ਥਦ੍ਧਮਚ੍ਛਰੀ. ਪਰਿਭਾਸਕੋਤਿ ਦਾਨਂ ਦੇਨ੍ਤੇ ਦਿਸ੍ਵਾ ਭਯੇਨ ਸਨ੍ਤਜ੍ਜਕੋ. ਦਦਨ੍ਤਾਨਂ ਕਰੋਨ੍ਤਾਨਨ੍ਤਿ ਉਪਯੋਗਤ੍ਥੇ ਸਾਮਿਵਚਨਂ, ਦਾਨਾਨਿ ਦਦਨ੍ਤੇ ਪੁਞ੍ਞਾਨਿ ਕਰੋਨ੍ਤੇ. ਬਹੂ ਜਨੇਤਿ ਬਹੂ ਸਤ੍ਤੇ. ਦਦਨ੍ਤਾਨਂ ਵਾ ਕਰੋਨ੍ਤਾਨਂ ਵਾ ਸਮੁਦਾਯਭੂਤਂ ਬਹੁਂ ਜਨਂ ਪੁਞ੍ਞਕਮ੍ਮਤੋ ਵਾਰਯਿਸ੍ਸਂ ਨਿਵਾਰੇਸਿਂ.

੨੩੪-੨੩੬. ਵਿਪਾਕੋ ਨਤ੍ਥਿ ਦਾਨਸ੍ਸਾਤਿਆਦਿ ਦਾਨਾਦੀਨਂ ਨਿਵਾਰਣੇ ਕਾਰਣਦਸ੍ਸਨਂ. ਤਤ੍ਥ ਵਿਪਾਕੋ ਨਤ੍ਥਿ ਦਾਨਸ੍ਸਾਤਿ ਦਾਨਕਮ੍ਮਸ੍ਸ ਫਲਂ ਨਾਮ ਨਤ੍ਥਿ, ਕੇਵਲਂ ਪੁਞ੍ਞਂ ਪੁਞ੍ਞਨ੍ਤਿ ਧਨਵਿਨਾਸੋ ਏਵਾਤਿ ਦੀਪੇਤਿ. ਸਂਯਮਸ੍ਸਾਤਿ ਸੀਲਸਂਯਮਸ੍ਸ. ਕੁਤੋ ਫਲਨ੍ਤਿ ਕੁਤੋ ਨਾਮ ਫਲਂ ਲਬ੍ਭਤਿ, ਨਿਰਤ੍ਥਕਮੇਵ ਸੀਲਰਕ੍ਖਣਨ੍ਤਿ ਅਧਿਪ੍ਪਾਯੋ. ਆਰਾਮਾਨੀਤਿ ਆਰਾਮੂਪਵਨਾਨੀਤਿ ਅਤ੍ਥੋ. ਪਪਾਯੋਤਿ ਪਾਨੀਯਸਾਲਾ. ਦੁਗ੍ਗੇਤਿ ਉਦਕਚਿਕ੍ਖਲ੍ਲਾਨਂ ਵਸੇਨ ਦੁਗ੍ਗਮਟ੍ਠਾਨਾਨਿ. ਸਙ੍ਕਮਨਾਨੀਤਿ ਸੇਤੁਯੋ. ਤਤੋ ਚੁਤੋਤਿ ਤਤੋ ਮਨੁਸ੍ਸਲੋਕਤੋ ਚੁਤੋ. ਪਞ੍ਚਪਣ੍ਣਾਸਾਤਿ ਪਞ੍ਚਪਞ੍ਞਾਸ. ਯਤੋ ਕਾਲਙ੍ਕਤੋ ਅਹਨ੍ਤਿ ਯਦਾ ਕਾਲਕਤਾ ਅਹਂ, ਤਤੋ ਪਟ੍ਠਾਯ. ਨਾਭਿਜਾਨਾਮੀਤਿ ਏਤ੍ਤਕਂ ਕਾਲਂ ਭੁਤ੍ਤਂ ਵਾ ਪੀਤਂ ਵਾ ਕਿਞ੍ਚਿ ਨ ਜਾਨਾਮਿ.

੨੩੭-੩੮. ਯੋ ਸਂਯਮੋ ਸੋ ਵਿਨਾਸੋਤਿ ਲੋਭਾਦਿਵਸੇਨ ਯਂ ਸਂਯਮਨਂ ਕਸ੍ਸਚਿ ਅਦਾਨਂ, ਸੋ ਇਮੇਸਂ ਸਤ੍ਤਾਨਂ ਵਿਨਾਸੋ ਨਾਮ ਪੇਤਯੋਨਿਯਂ ਨਿਬ੍ਬਤ੍ਤਪੇਤਾਨਂ ਮਹਾਬ੍ਯਸਨਸ੍ਸ ਹੇਤੁਭਾਵਤੋ. ‘‘ਯੋ ਵਿਨਾਸੋ ਸੋ ਸਂਯਮੋ’’ਤਿ ਇਮਿਨਾ ਯਥਾਵੁਤ੍ਤਸ੍ਸ ਅਤ੍ਥਸ੍ਸ ਏਕਨ੍ਤਿਕਭਾਵਂ ਵਦਤਿ. ਪੇਤਾ ਹਿ ਕਿਰ ਜਾਨਨ੍ਤੀਤਿ ਏਤ੍ਥ ਹਿ-ਸਦ੍ਦੋ ਅਵਧਾਰਣੇ, ਕਿਰ-ਸਦ੍ਦੋ ਅਰੁਚਿਸੂਚਨੇ. ‘‘ਸਂਯਮੋ ਦੇਯ੍ਯਧਮ੍ਮਸ੍ਸ ਅਪਰਿਚ੍ਚਾਗੋ ਵਿਨਾਸਹੇਤੂ’’ਤਿ ਇਮਮਤ੍ਥਂ ਪੇਤਾ ਏਵ ਕਿਰ ਜਾਨਨ੍ਤਿ ਪਚ੍ਚਕ੍ਖਤੋ ਅਨੁਭੁਯ੍ਯਮਾਨਤ੍ਤਾ, ਨ ਮਨੁਸ੍ਸਾਤਿ. ਨਯਿਦਂ ਯੁਤ੍ਤਂ ਮਨੁਸ੍ਸਾਨਮ੍ਪਿ ਪੇਤਾਨਂ ਵਿਯ ਖੁਪ੍ਪਿਪਾਸਾਦੀਹਿ ਅਭਿਭੁਯ੍ਯਮਾਨਾਨਂ ਦਿਸ੍ਸਮਾਨਤ੍ਤਾ. ਪੇਤਾ ਪਨ ਪੁਰਿਮਤ੍ਤਭਾਵੇ ਕਤਕਮ੍ਮਸ੍ਸ ਪਾਕਟਭਾਵਤੋ ਤਮਤ੍ਥਂ ਸੁਟ੍ਠੁਤਰਂ ਜਾਨਨ੍ਤਿ. ਤੇਨਾਹ – ‘‘ਅਹਂ ਪੁਰੇ ਸਂਯਮਿਸ੍ਸ’’ਨ੍ਤਿਆਦਿ. ਤਤ੍ਥ ਸਂਯਮਿਸ੍ਸਨ੍ਤਿ ਸਯਮ੍ਪਿ ਦਾਨਾਦਿਪੁਞ੍ਞਕਿਰਿਯਤੋ ਸਂਯਮਨਂ ਸਙ੍ਕੋਚਂ ਅਕਾਸਿਂ. ਬਹੁਕੇ ਧਨੇਤਿ ਮਹਨ੍ਤੇ ਧਨੇ ਵਿਜ੍ਜਮਾਨੇ.

੨੪੩. ਤਨ੍ਤਿ ਤਸ੍ਮਾ. ਵੋਤਿ ਤੁਮ੍ਹੇ. ਭਦ੍ਦਂ ਵੋਤਿ ਭਦ੍ਦਂ ਕਲ੍ਯਾਣਂ ਸੁਨ੍ਦਰਂ ਤੁਮ੍ਹਾਕਂ ਹੋਤੂਤਿ ਵਚਨਸੇਸੋ. ਯਾਵਨ੍ਤੇਤ੍ਥ ਸਮਾਗਤਾਤਿ ਯਾਵਨ੍ਤੋ ਯਾਵਤਕਾ ਏਤ੍ਥ ਸਮਾਗਤਾ, ਤੇ ਸਬ੍ਬੇ ਮਮ ਵਚਨਂ ਸੁਣਾਥਾਤਿ ਅਧਿਪ੍ਪਾਯੋ. ਆਵੀਤਿ ਪਕਾਸਨਂ ਪਰੇਸਂ ਪਾਕਟਵਸੇਨ. ਰਹੋਤਿ ਪਟਿਚ੍ਛਨ੍ਨਂ ਅਪਾਕਟਵਸੇਨ. ਆਵਿ ਵਾ ਪਾਣਾਤਿਪਾਤਾਦਿਮੁਸਾਵਾਦਾਦਿਕਾਯਵਚੀਪਯੋਗਵਸੇਨ, ਯਦਿ ਵਾ ਰਹੋ ਅਭਿਜ੍ਝਾਦਿਵਸੇਨ ਪਾਪਕਂ ਲਾਮਕਂ ਅਕੁਸਲਕਮ੍ਮਂ ਮਾਕਤ੍ਥ ਮਾ ਕਰਿਤ੍ਥ.

੨੪੪. ਸਚੇ ਤਂ ਪਾਪਕਂ ਕਮ੍ਮਨ੍ਤਿ ਅਥ ਪਨ ਤਂ ਪਾਪਕਮ੍ਮਂ ਆਯਤਿਂ ਕਰਿਸ੍ਸਥ, ਏਤਰਹਿ ਵਾ ਕਰੋਥ, ਨਿਰਯਾਦੀਸੁ ਚਤੂਸੁ ਅਪਾਯੇਸੁ ਮਨੁਸ੍ਸੇਸੁ ਚ ਅਪ੍ਪਾਯੁਕਤਾਦਿਵਸੇਨ ਤਸ੍ਸ ਫਲਭੂਤਾ ਦੁਕ੍ਖਤੋ ਪਮੁਤ੍ਤਿ ਪਮੋਕ੍ਖੋ ਨਾਮ ਨਤ੍ਥਿ. ਉਪ੍ਪਚ੍ਚਾਪਿ ਪਲਾਯਤਨ੍ਤਿ ਉਪ੍ਪਤਿਤ੍ਵਾ ਆਕਾਸੇਨ ਗਚ੍ਛਨ੍ਤਾਨਮ੍ਪਿ ਮੋਕ੍ਖੋ ਨਤ੍ਥਿਯੇਵਾਤਿ ਅਤ੍ਥੋ. ‘‘ਉਪੇਚ੍ਚਾ’’ਤਿਪਿ ਪਾਲ਼ਿ, ਇਤੋ ਵਾ ਏਤ੍ਤੋ ਵਾ ਪਲਾਯਨ੍ਤੇ ਤੁਮ੍ਹੇ ਅਨੁਬਨ੍ਧਿਸ੍ਸਤੀਤਿ ਅਧਿਪ੍ਪਾਯੇਨ ਉਪੇਚ੍ਚ ਸਞ੍ਚਿਚ੍ਚ ਪਲਾਯਨ੍ਤਾਨਮ੍ਪਿ ਤੁਮ੍ਹਾਕਂ ਤਤੋ ਮੋਕ੍ਖੋ ਨਤ੍ਥਿ, ਗਤਿਕਾਲਾਦਿਪਚ੍ਚਯਨ੍ਤਰਸਮਵਾਯੇ ਪਨ ਸਤਿ ਵਿਪਚ੍ਚਤਿਯੇਵਾਤਿ ਅਤ੍ਥੋ. ਅਯਞ੍ਚ ਅਤ੍ਥੋ –

‘‘ਨ ਅਨ੍ਤਲਿਕ੍ਖੇ ਨ ਸਮੁਦ੍ਦਮਜ੍ਝੇ, ਨ ਪਬ੍ਬਤਾਨਂ ਵਿਵਰਂ ਪਵਿਸ੍ਸ;

ਨ ਵਿਜ੍ਜਤੀ ਸੋ ਜਗਤਿਪ੍ਪਦੇਸੋ, ਯਤ੍ਥਟ੍ਠਿਤੋ ਮੁਚ੍ਚੇਯ੍ਯ ਪਾਪਕਮ੍ਮਾ’’ਤਿ. (ਧ. ਪ. ੧੨੭; ਮਿ. ਪ. ੪.੨.੪) –

ਇਮਾਯ ਗਾਥਾਯ ਦੀਪੇਤਬ੍ਬੋ.

੨੪੫. ਮਤ੍ਤੇਯ੍ਯਾਤਿ ਮਾਤੁਹਿਤਾ. ਹੋਥਾਤਿ ਤੇਸਂ ਉਪਟ੍ਠਾਨਾਦੀਨਿ ਕਰੋਥ. ਤਥਾ ਪੇਤ੍ਤੇਯ੍ਯਾਤਿ ਵੇਦਿਤਬ੍ਬਾ. ਕੁਲੇ ਜੇਟ੍ਠਾਪਚਾਯਿਕਾਤਿ ਕੁਲੇ ਜੇਟ੍ਠਕਾਨਂ ਅਪਚਾਯਨਕਰਾ. ਸਾਮਞ੍ਞਾਤਿ ਸਮਣਪੂਜਕਾ. ਤਥਾ ਬ੍ਰਹ੍ਮਞ੍ਞਾਤਿ ਬਾਹਿਤਪਾਪਪੂਜਕਾਤਿ ਅਤ੍ਥੋ. ਏਵਂ ਸਗ੍ਗਂ ਗਮਿਸ੍ਸਥਾਤਿ ਇਮਿਨਾ ਮਯਾ ਵੁਤ੍ਤਨਯੇਨ ਪੁਞ੍ਞਾਨਿ ਕਤ੍ਵਾ ਦੇਵਲੋਕਂ ਉਪਪਜ੍ਜਿਸ੍ਸਥਾਤਿ ਅਤ੍ਥੋ. ਯਂ ਪਨੇਤ੍ਥ ਅਤ੍ਥਤੋ ਨ ਵਿਭਤ੍ਤਂ, ਤਂ ਹੇਟ੍ਠਾ ਖਲ੍ਲਾਟਿਯਪੇਤਵਤ੍ਥੁਆਦੀਸੁ ਵੁਤ੍ਤਨਯੇਨੇਵ ਵੇਦਿਤਬ੍ਬਂ.

ਤੇ ਵਾਣਿਜਾ ਤਸ੍ਸ ਵਚਨਂ ਸੁਤ੍ਵਾ ਸਂਵੇਗਜਾਤਾ ਤਂ ਅਨੁਕਮ੍ਪਮਾਨਾ ਭਾਜਨੇਹਿ ਪਾਨੀਯਂ ਗਹੇਤ੍ਵਾ ਤਂ ਸਯਾਪੇਤ੍ਵਾ ਮੁਖੇ ਆਸਿਞ੍ਚਿਂਸੁ. ਤਤੋ ਮਹਾਜਨੇਨ ਬਹੁਵੇਲਂ ਆਸਿਤ੍ਤਂ ਉਦਕਂ ਤਸ੍ਸ ਪੇਤਸ੍ਸ ਪਾਪਬਲੇਨ ਅਧੋਗਲ਼ਂ ਨ ਓਤਿਣ੍ਣਂ, ਕੁਤੋ ਪਿਪਾਸਂ ਪਟਿਵਿਨੇਸ੍ਸਤਿ. ਤੇ ਤਂ ਪੁਚ੍ਛਿਂਸੁ – ‘‘ਅਪਿ ਤੇ ਕਾਚਿ ਅਸ੍ਸਾਸਮਤ੍ਤਾ ਲਦ੍ਧਾ’’ਤਿ. ਸੋ ਆਹ – ‘‘ਯਦਿ ਮੇ ਏਤ੍ਤਕੇਹਿ ਜਨੇਹਿ ਏਤ੍ਤਕਂ ਵੇਲਂ ਆਸਿਞ੍ਚਮਾਨਂ ਉਦਕਂ ਏਕਬਿਨ੍ਦੁਮਤ੍ਤਮ੍ਪਿ ਪਰਗਲ਼ਂ ਪਵਿਟ੍ਠਂ, ਇਤੋ ਪੇਤਯੋਨਿਤੋ ਮੋਕ੍ਖੋ ਮਾ ਹੋਤੂ’’ਤਿ. ਅਥ ਤੇ ਵਾਣਿਜਾ ਤਂ ਸੁਤ੍ਵਾ ਅਤਿਵਿਯ ਸਂਵੇਗਜਾਤਾ ‘‘ਅਤ੍ਥਿ ਪਨ ਕੋਚਿ ਉਪਾਯੋ ਪਿਪਾਸਾਵੂਪਸਮਾਯਾ’’ਤਿ ਆਹਂਸੁ. ਸੋ ਆਹ – ‘‘ਇਮਸ੍ਮਿਂ ਪਾਪਕਮ੍ਮੇ ਖੀਣੇ ਤਥਾਗਤਸ੍ਸ ਵਾ ਤਥਾਗਤਸਾਵਕਾਨਂ ਵਾ ਦਾਨੇ ਦਿਨ੍ਨੇ ਮਮ ਦਾਨਮੁਦ੍ਦਿਸਿਸ੍ਸਤਿ, ਅਹਂ ਇਤੋ ਪੇਤਤ੍ਤਤੋ ਮੁਚ੍ਚਿਸ੍ਸਾਮੀ’’ਤਿ. ਤਂ ਸੁਤ੍ਵਾ ਵਾਣਿਜਾ ਸਾਵਤ੍ਥਿਂ ਗਨ੍ਤ੍ਵਾ ਭਗਵਨ੍ਤਂ ਉਪਸਙ੍ਕਮਿਤ੍ਵਾ ਤਂ ਪਵਤ੍ਤਿਂ ਆਰੋਚੇਤ੍ਵਾ ਸਰਣਾਨਿ ਸੀਲਾਨਿ ਚ ਗਹੇਤ੍ਵਾ ਬੁਦ੍ਧਪ੍ਪਮੁਖਸ੍ਸ ਭਿਕ੍ਖੁਸਙ੍ਘਸ੍ਸ ਸਤ੍ਤਾਹਂ ਦਾਨਂ ਦਤ੍ਵਾ ਤਸ੍ਸ ਪੇਤਸ੍ਸ ਦਕ੍ਖਿਣਂ ਆਦਿਸਿਂਸੁ. ਭਗਵਾ ਤਮਤ੍ਥਂ ਅਟ੍ਠੁਪ੍ਪਤ੍ਤਿਂ ਕਤ੍ਵਾ ਚਤੁਨ੍ਨਂ ਪਰਿਸਾਨਂ ਧਮ੍ਮਂ ਦੇਸੇਸਿ. ਮਹਾਜਨੋ ਚ ਲੋਭਾਦਿਮਚ੍ਛੇਰਮਲਂ ਪਹਾਯ ਦਾਨਾਦਿਪੁਞ੍ਞਾਭਿਰਤੋ ਅਹੋਸੀਤਿ.

ਧਨਪਾਲਸੇਟ੍ਠਿਪੇਤਵਤ੍ਥੁਵਣ੍ਣਨਾ ਨਿਟ੍ਠਿਤਾ.