੮. ਚੂਲ਼ਸੇਟ੍ਠਿਪੇਤਵਤ੍ਥੁਵਣ੍ਣਨਾ

ਨਗ੍ਗੋ ਕਿਸੋ ਪਬ੍ਬਜਿਤੋਸਿ, ਭਨ੍ਤੇਤਿ ਇਦਂ ਸਤ੍ਥਰਿ ਵੇਲ਼ੁਵਨੇ ਵਿਹਰਨ੍ਤੇ ਚੂਲ਼ਸੇਟ੍ਠਿਪੇਤਂ ਆਰਬ੍ਭ ਵੁਤ੍ਤਂ. ਬਾਰਾਣਸਿਯਂ ਕਿਰ ਏਕੋ ਗਹਪਤਿ ਅਸ੍ਸਦ੍ਧੋ ਅਪ੍ਪਸਨ੍ਨੋ ਮਚ੍ਛਰੀ ਕਦਰਿਯੋ ਪੁਞ੍ਞਕਿਰਿਯਾਯ ਅਨਾਦਰੋ ਚੂਲ਼ਸੇਟ੍ਠਿ ਨਾਮ ਅਹੋਸਿ. ਸੋ ਕਾਲਂ ਕਤ੍ਵਾ ਪੇਤੇਸੁ ਨਿਬ੍ਬਤ੍ਤਿ, ਤਸ੍ਸ ਕਾਯੋ ਅਪਗਤਮਂਸਲੋਹਿਤੋ ਅਟ੍ਠਿਨ੍ਹਾਰੁਚਮ੍ਮਮਤ੍ਤੋ ਮੁਣ੍ਡੋ ਅਪੇਤਵਤ੍ਥੋ ਅਹੋਸਿ. ਧੀਤਾ ਪਨਸ੍ਸ ਅਨੁਲਾ ਅਨ੍ਧਕਵਿਨ੍ਦੇ ਸਾਮਿਕਸ੍ਸ ਗੇਹੇ ਵਸਨ੍ਤੀ ਪਿਤਰਂ ਉਦ੍ਦਿਸ੍ਸ ਬ੍ਰਾਹ੍ਮਣੇ ਭੋਜੇਤੁਕਾਮਾ ਤਣ੍ਡੁਲਾਦੀਨਿ ਦਾਨੂਪਕਰਣਾਨਿ ਸਜ੍ਜੇਸਿ. ਤਂ ਞਤ੍ਵਾ ਪੇਤੋ ਆਸਾਯ ਆਕਾਸੇਨ ਤਤ੍ਥ ਗਚ੍ਛਨ੍ਤੋ ਰਾਜਗਹਂ ਸਮ੍ਪਾਪੁਣਿ. ਤੇਨ ਚ ਸਮਯੇਨ ਰਾਜਾ ਅਜਾਤਸਤ੍ਤੁ ਦੇਵਦਤ੍ਤੇਨ ਉਯ੍ਯੋਜਿਤੋ ਪਿਤਰਂ ਜੀਵਿਤਾ ਵੋਰੋਪੇਤ੍ਵਾ ਤੇਨ ਵਿਪ੍ਪਟਿਸਾਰੇਨ ਦੁਸ੍ਸੁਪਿਨੇਨ ਚ ਨਿਦ੍ਦਂ ਅਨੁਪਗਚ੍ਛਨ੍ਤੋ ਉਪਰਿਪਾਸਾਦਵਰਗਤੋ ਚਙ੍ਕਮਨ੍ਤੋ ਤਂ ਪੇਤਂ ਆਕਾਸੇਨ ਗਚ੍ਛਨ੍ਤਂ ਦਿਸ੍ਵਾ ਇਮਾਯ ਗਾਥਾਯ ਪੁਚ੍ਛਿ –

੨੪੬. ‘‘ਨਗ੍ਗੋ ਕਿਸੋ ਪਬ੍ਬਜਿਤੋਸਿ ਭਨ੍ਤੇ, ਰਤ੍ਤਿਂ ਕੁਹਿਂ ਗਚ੍ਛਸਿ ਕਿਸ੍ਸਹੇਤੁ;

ਆਚਿਕ੍ਖ ਮੇ ਤਂ ਅਪਿ ਸਕ੍ਕੁਣੇਮੁ, ਸਬ੍ਬੇਨ ਵਿਤ੍ਤਂ ਪਟਿਪਾਦਯੇ ਤੁਵ’’ਨ੍ਤਿ.

ਤਤ੍ਥ ਪਬ੍ਬਜਿਤੋਤਿ ਸਮਣੋ. ਰਾਜਾ ਕਿਰ ਤਂ ਨਗ੍ਗਤ੍ਤਾ ਮੁਣ੍ਡਤ੍ਤਾ ਚ ‘‘ਨਗ੍ਗੋ ਸਮਣੋ ਅਯ’’ਨ੍ਤਿ ਸਞ੍ਞਾਯ ‘‘ਨਗ੍ਗੋ ਕਿਸੋ ਪਬ੍ਬਜਿਤੋਸੀ’’ਤਿਆਦਿਮਾਹ. ਕਿਸ੍ਸਹੇਤੂਤਿ ਕਿਨ੍ਨਿਮਿਤ੍ਤਂ. ਸਬ੍ਬੇਨ ਵਿਤ੍ਤਂ ਪਟਿਪਾਦਯੇ ਤੁਵਨ੍ਤਿ ਵਿਤ੍ਤਿਯਾ ਉਪਕਰਣਭੂਤਂ ਵਿਤ੍ਤਂ ਸਬ੍ਬੇਨ ਭੋਗੇਨ ਤੁਯ੍ਹਂ ਅਜ੍ਝਾਸਯਾਨੁਰੂਪਂ, ਸਬ੍ਬੇਨ ਵਾ ਉਸ੍ਸਾਹੇਨ ਪਟਿਪਾਦੇਯ੍ਯਂ ਸਮ੍ਪਾਦੇਯ੍ਯਂ. ਤਥਾ ਕਾਤੁਂ ਮਯਂ ਅਪ੍ਪੇਵ ਨਾਮ ਸਕ੍ਕੁਣੇਯ੍ਯਾਮ, ਤਸ੍ਮਾ ਆਚਿਕ੍ਖ ਮੇ ਤਂ, ਏਤਂ ਤਵ ਆਗਮਨਕਾਰਣਂ ਮਯ੍ਹਂ ਕਥੇਹੀਤਿ ਅਤ੍ਥੋ.

ਏਵਂ ਰਞ੍ਞਾ ਪੁਟ੍ਠੋ ਪੇਤੋ ਅਤ੍ਤਨੋ ਪਵਤ੍ਤਿਂ ਕਥੇਨ੍ਤੋ ਤਿਸ੍ਸੋ ਗਾਥਾ ਅਭਾਸਿ –

੨੪੭. ‘‘ਬਾਰਾਣਸੀ ਨਗਰਂ ਦੂਰਘੁਟ੍ਠਂ, ਤਤ੍ਥਾਹਂ ਗਹਪਤਿ ਅਡ੍ਢਕੋ ਅਹੁ ਦੀਨੋ;

ਅਦਾਤਾ ਗੇਧਿਤਮਨੋ ਆਮਿਸਸ੍ਮਿਂ, ਦੁਸ੍ਸੀਲ੍ਯੇਨ ਯਮਵਿਸਯਮ੍ਹਿ ਪਤ੍ਤੋ.

੨੪੮. ‘‘ਸੋ ਸੂਚਿਕਾਯ ਕਿਲਮਿਤੋ ਤੇਹਿ,

ਤੇਨੇਵ ਞਾਤੀਸੁ ਯਾਮਿ ਆਮਿਸਕਿਞ੍ਚਿਕ੍ਖਹੇਤੁ;

ਅਦਾਨਸੀਲਾ ਨ ਚ ਸਦ੍ਦਹਨ੍ਤਿ,

‘ਦਾਨਫਲਂ ਹੋਤਿ ਪਰਮ੍ਹਿ ਲੋਕੇ’.

੨੪੯. ‘‘ਧੀਤਾ ਚ ਮਯ੍ਹਂ ਲਪਤੇ ਅਭਿਕ੍ਖਣਂ, ਦਸ੍ਸਾਮਿ ਦਾਨਂ ਪਿਤੂਨਂ ਪਿਤਾਮਹਾਨਂ;

ਤਮੁਪਕ੍ਖਟਂ ਪਰਿਵਿਸਯਨ੍ਤਿ ਬ੍ਰਾਹ੍ਮਣਾ, ਯਾਮਿ ਅਹਂ ਅਨ੍ਧਕਵਿਨ੍ਦਂ ਭੁਤ੍ਤੁ’’ਨ੍ਤਿ.

੨੪੭. ਤਤ੍ਥ ਦੂਰਘੁਟ੍ਠਨ੍ਤਿ ਦੂਰਤੋ ਏਵ ਗੁਣਕਿਤ੍ਤਨਵਸੇਨ ਘੋਸਿਤਂ, ਸਬ੍ਬਤ੍ਥ ਵਿਸ੍ਸੁਤਂ ਪਾਕਟਨ੍ਤਿ ਅਤ੍ਥੋ. ਅਡ੍ਢਕੋਤਿ ਅਡ੍ਢੋ ਮਹਾਵਿਭਵੋ. ਦੀਨੋਤਿ ਨਿਹੀਨਚਿਤ੍ਤੋ ਅਦਾਨਜ੍ਝਾਸਯੋ. ਤੇਨਾਹ ‘‘ਅਦਾਤਾ’’ਤਿ. ਗੇਧਿਤਮਨੋ ਆਮਿਸਸ੍ਮਿਨ੍ਤਿ ਕਾਮਾਮਿਸੇ ਲਗ੍ਗਚਿਤ੍ਤੋ ਗੇਧਂ ਆਪਨ੍ਨੋ. ਦੁਸ੍ਸੀਲ੍ਯੇਨ ਯਮਵਿਸਯਮ੍ਹਿ ਪਤ੍ਤੋਤਿ ਅਤ੍ਤਨਾ ਕਤੇਨ ਦੁਸ੍ਸੀਲਕਮ੍ਮੁਨਾ ਯਮਵਿਸਯਂ ਪੇਤਲੋਕਂ ਪਤ੍ਤੋ ਅਮ੍ਹਿ.

੨੪੮. ਸੋ ਸੂਚਿਕਾਯ ਕਿਲਮਿਤੋਤਿ ਸੋ ਅਹਂ ਵਿਜ੍ਝਨਟ੍ਠੇਨ ਸੂਚਿਸਦਿਸਤਾਯ ‘‘ਸੂਚਿਕਾ’’ਤਿ ਲਦ੍ਧਨਾਮਾਯ ਜਿਘਚ੍ਛਾਯ ਕਿਲਮਿਤੋ ਨਿਰਨ੍ਤਰਂ ਵਿਜ੍ਝਮਾਨੋ. ‘‘ਕਿਲਮਥੋ’’ਤਿ ਇਚ੍ਚੇਵ ਵਾ ਪਾਠੋ. ਤੇਹੀਤਿ ‘‘ਦੀਨੋ’’ਤਿਆਦਿਨਾ ਵੁਤ੍ਤੇਹਿ ਪਾਪਕਮ੍ਮੇਹਿ ਕਾਰਣਭੂਤੇਹਿ. ਤਸ੍ਸ ਹਿ ਪੇਤਸ੍ਸ ਤਾਨਿ ਪਾਪਕਮ੍ਮਾਨਿ ਅਨੁਸ੍ਸਰਨ੍ਤਸ੍ਸ ਅਤਿਵਿਯ ਦੋਮਨਸ੍ਸਂ ਉਪ੍ਪਜ੍ਜਿ, ਤਸ੍ਮਾ ਏਵਮਾਹ. ਤੇਨੇਵਾਤਿ ਤੇਨੇਵ ਜਿਘਚ੍ਛਾਦੁਕ੍ਖੇਨ. ਞਾਤੀਸੁ ਯਾਮੀਤਿ ਞਾਤੀਨਂ ਸਮੀਪਂ ਯਾਮਿ ਗਚ੍ਛਾਮਿ. ਆਮਿਸਕਿਞ੍ਚਿਕ੍ਖਹੇਤੂਤਿ ਆਮਿਸਸ੍ਸ ਕਿਞ੍ਚਿਕ੍ਖਨਿਮਿਤ੍ਤਂ, ਕਿਞ੍ਚਿ ਆਮਿਸਂ ਪਤ੍ਥੇਨ੍ਤੋਤਿ ਅਤ੍ਥੋ. ਅਦਾਨਸੀਲਾ ਨ ਚ ਸਦ੍ਦਹਨ੍ਤਿ, ‘ਦਾਨਫਲਂ ਹੋਤਿ ਪਰਮ੍ਹਿ ਲੋਕੇ’ਤਿ ਯਥਾ ਅਹਂ, ਤਥਾ ਏਵਂ ਅਞ੍ਞੇਪਿ ਮਨੁਸ੍ਸਾ ਅਦਾਨਸੀਲਾ ‘‘ਦਾਨਸ੍ਸ ਫਲਂ ਏਕਂਸੇਨ ਪਰਲੋਕੇ ਹੋਤੀ’’ਤਿ ਨ ਚ ਸਦ੍ਦਹਨ੍ਤਿ. ਯਤੋ ਅਹਂ ਵਿਯ ਤੇਪਿ ਪੇਤਾ ਹੁਤ੍ਵਾ ਮਹਾਦੁਕ੍ਖਂ ਪਚ੍ਚਨੁਭਵਨ੍ਤੀਤਿ ਅਧਿਪ੍ਪਾਯੋ.

੨੪੯. ਲਪਤੇਤਿ ਕਥੇਤਿ. ਅਭਿਕ੍ਖਣਨ੍ਤਿ ਅਭਿਣ੍ਹਂ ਬਹੁਸੋ. ਕਿਨ੍ਤਿ ਲਪਤੀਤਿ ਆਹ ‘‘ਦਸ੍ਸਾਮਿ ਦਾਨਂ ਪਿਤੂਨਂ ਪਿਤਾਮਹਾਨ’’ਨ੍ਤਿ. ਤਤ੍ਥ ਪਿਤੂਨਨ੍ਤਿ ਮਾਤਾਪਿਤੂਨਂ, ਚੂਲ਼ਪਿਤੁਮਹਾਪਿਤੂਨਂ ਵਾ. ਪਿਤਾਮਹਾਨਨ੍ਤਿ ਅਯ੍ਯਕਪਯ੍ਯਕਾਨਂ. ਉਪਕ੍ਖਟਨ੍ਤਿ ਸਜ੍ਜਿਤਂ. ਪਰਿਵਿਸਯਨ੍ਤੀਤਿ ਭੋਜਯਨ੍ਤਿ. ਅਨ੍ਧਕਵਿਨ੍ਦਨ੍ਤਿ ਏਵਂਨਾਮਕਂ ਨਗਰਂ. ਭੁਤ੍ਤੁਨ੍ਤਿ ਭੁਞ੍ਜਿਤੁਂ. ਤਤੋ ਪਰਾ ਸਙ੍ਗੀਤਿਕਾਰਕੇਹਿ ਵੁਤ੍ਤਾ –

੨੫੦. ‘‘ਤਮਵੋਚ ਰਾਜਾ ‘ਅਨੁਭਵਿਯਾਨ ਤਮ੍ਪਿ,

ਏਯ੍ਯਾਸਿ ਖਿਪ੍ਪਂ ਅਹਮਪਿ ਕਸ੍ਸਂ ਪੂਜਂ;

ਆਚਿਕ੍ਖ ਮੇ ਤਂ ਯਦਿ ਅਤ੍ਥਿ ਹੇਤੁ,

ਸਦ੍ਧਾਯਿਤਂ ਹੇਤੁਵਚੋ ਸੁਣੋਮ’.

੨੫੧. ‘‘ਤਥਾਤਿ ਵਤ੍ਵਾ ਅਗਮਾਸਿ ਤਤ੍ਥ, ਭੁਞ੍ਜਿਂਸੁ ਭਤ੍ਤਂ ਨ ਚ ਦਕ੍ਖਿਣਾਰਹਾ;

ਪਚ੍ਚਾਗਮਿ ਰਾਜਗਹਂ ਪੁਨਾਪਰਂ, ਪਾਤੁਰਹੋਸਿ ਪੁਰਤੋ ਜਨਾਧਿਪਸ੍ਸ.

੨੫੨. ‘‘ਦਿਸ੍ਵਾਨ ਪੇਤਂ ਪੁਨਦੇਵ ਆਗਤਂ, ਰਾਜਾ ਅਵੋਚ ‘ਅਹਮਪਿ ਕਿਂ ਦਦਾਮਿ;

ਆਚਿਕ੍ਖ ਮੇ ਤਂ ਯਦਿ ਅਤ੍ਥਿ ਹੇਤੁ, ਯੇਨ ਤੁਵਂ ਚਿਰਤਰਂ ਪੀਣਿਤੋ ਸਿਯਾ’.

੨੫੩. ‘‘ਬੁਦ੍ਧਞ੍ਚ ਸਙ੍ਘਂ ਪਰਿਵਿਸਿਯਾਨ ਰਾਜ, ਅਨ੍ਨੇਨ ਪਾਨੇਨ ਚ ਚੀਵਰੇਨ;

ਤਂ ਦਕ੍ਖਿਣਂ ਆਦਿਸ ਮੇ ਹਿਤਾਯ, ਏਵਂ ਅਹਂ ਚਿਰਤਰਂ ਪੀਣਿਤੋ ਸਿਯਾ.

੨੫੪. ‘‘ਤਤੋ ਚ ਰਾਜਾ ਨਿਪਤਿਤ੍ਵਾ ਤਾਵਦੇ, ਦਾਨਂ ਸਹਤ੍ਥਾ ਅਤੁਲਂ ਦਦਿਤ੍ਵਾ ਸਙ੍ਘੇ;

ਆਰੋਚੇਸਿ ਪਕਤਂ ਤਥਾਗਤਸ੍ਸ, ਤਸ੍ਸ ਚ ਪੇਤਸ੍ਸ ਦਕ੍ਖਿਣਂ ਆਦਿਸਿਤ੍ਥ.

੨੫੫. ‘‘ਸੋ ਪੂਜਿਤੋ ਅਤਿਵਿਯ ਸੋਭਮਾਨੋ, ਪਾਤੁਰਹੋਸਿ ਪੁਰਤੋ ਜਨਾਧਿਪਸ੍ਸ;

ਯਕ੍ਖੋਹਮਸ੍ਮਿ ਪਰਮਿਦ੍ਧਿਪਤ੍ਤੋ, ਨ ਮਯ੍ਹਮਤ੍ਥਿ ਸਮਾ ਸਦਿਸਾ ਮਾਨੁਸਾ.

੨੫੬. ‘‘ਪਸ੍ਸਾਨੁਭਾਵਂ ਅਪਰਿਮਿਤਂ ਮਮਯਿਦਂ, ਤਯਾਨੁਦਿਟ੍ਠਂ ਅਤੁਲਂ ਦਤ੍ਵਾ ਸਙ੍ਘੇ;

ਸਨ੍ਤਪ੍ਪਿਤੋ ਸਤਤਂ ਸਦਾ ਬਹੂਹਿ, ਯਾਮਿ ਅਹਂ ਸੁਖਿਤੋ ਮਨੁਸ੍ਸਦੇਵਾ’’ਤਿ.

੨੫੦. ਤਤ੍ਥ ਤਮਵੋਚ ਰਾਜਾਤਿ ਤਂ ਪੇਤਂ ਤਥਾ ਵਤ੍ਵਾ ਠਿਤਂ ਰਾਜਾ ਅਜਾਤਸਤ੍ਤੁ ਅਵੋਚ. ਅਨੁਭਵਿਯਾਨ ਤਮ੍ਪੀਤਿ ਤਂ ਤਵ ਧੀਤੁਯਾ ਉਪਕ੍ਖਟਂ ਦਾਨਮ੍ਪਿ ਅਨੁਭਵਿਤ੍ਵਾ. ਏਯ੍ਯਾਸੀਤਿ ਆਗਚ੍ਛੇਯ੍ਯਾਸਿ. ਕਸ੍ਸਨ੍ਤਿ ਕਰਿਸ੍ਸਾਮਿ. ਆਚਿਕ੍ਖ ਮੇ ਤਂ ਯਦਿ ਅਤ੍ਥਿ ਹੇਤੂਤਿ ਸਚੇ ਕਿਞ੍ਚਿ ਕਾਰਣਂ ਅਤ੍ਥਿ, ਤਂ ਕਾਰਣਂ ਮਯ੍ਹਂ ਆਚਿਕ੍ਖ ਕਥੇਹਿ. ਸਦ੍ਧਾਯਿਤਨ੍ਤਿ ਸਦ੍ਧਾਯਿਤਬ੍ਬਂ. ਹੇਤੁਵਚੋਤਿ ਹੇਤੁਯੁਤ੍ਤਵਚਨਂ, ‘‘ਅਮੁਕਸ੍ਮਿਂ ਠਾਨੇ ਅਸੁਕੇਨ ਪਕਾਰੇਨ ਦਾਨੇ ਕਤੇ ਮਯ੍ਹਂ ਉਪਕਪ੍ਪਤੀ’’ਤਿ ਸਕਾਰਣਂ ਵਚਨਂ ਵਦਾਤਿ ਅਤ੍ਥੋ.

੨੫੧. ਤਥਾਤਿ ਵਤ੍ਵਾਤਿ ਸਾਧੂਤਿ ਵਤ੍ਵਾ. ਤਤ੍ਥਾਤਿ ਤਸ੍ਮਿਂ ਅਨ੍ਧਕਵਿਨ੍ਦੇ ਪਰਿਵੇਸਨਟ੍ਠਾਨੇ. ਭੁਞ੍ਜਿਂਸੁ ਭਤ੍ਤਂ ਨ ਚ ਦਕ੍ਖਿਣਾਰਹਾਤਿ ਭਤ੍ਤਂ ਭੁਞ੍ਜਿਂਸੁ ਦੁਸ੍ਸੀਲਬ੍ਰਾਹ੍ਮਣਾ, ਨ ਚ ਪਨ ਦਕ੍ਖਿਣਾਰਹਾ ਸੀਲਵਨ੍ਤੋ ਭੁਞ੍ਜਿਂਸੂਤਿ ਅਤ੍ਥੋ. ਪੁਨਾਪਰਨ੍ਤਿ ਪੁਨ ਅਪਰਂ ਵਾਰਂ ਰਾਜਗਹਂ ਪਚ੍ਚਾਗਮਿ.

੨੫੨. ਕਿਂ ਦਦਾਮੀਤਿ ‘‘ਕੀਦਿਸਂ ਤੇ ਦਾਨਂ ਦਸ੍ਸਾਮੀ’’ਤਿ ਰਾਜਾ ਪੇਤਂ ਪੁਚ੍ਛਿ. ਯੇਨ ਤੁਵਨ੍ਤਿ ਯੇਨ ਕਾਰਣੇਨ ਤ੍ਵਂ. ਚਿਰਤਰਨ੍ਤਿ ਚਿਰਕਾਲਂ. ਪੀਣਿਤੋਤਿ ਤਿਤ੍ਤੋ ਸਿਯਾ, ਤਂ ਕਥੇਹੀਤਿ ਅਤ੍ਥੋ.

੨੫੩. ਪਰਿਵਿਸਿਯਾਨਾਤਿ ਭੋਜੇਤ੍ਵਾ. ਰਾਜਾਤਿ ਅਜਾਤਸਤ੍ਤੁਂ ਆਲਪਤਿ. ਮੇ ਹਿਤਾਯਾਤਿ ਮਯ੍ਹਂ ਹਿਤਤ੍ਥਾਯ ਪੇਤਤ੍ਤਭਾਵਤੋ ਪਰਿਮੁਤ੍ਤਿਯਾ.

੨੫੪. ਤਤੋਤਿ ਤਸ੍ਮਾ ਤੇਨ ਵਚਨੇਨ, ਤਤੋ ਵਾ ਪਾਸਾਦਤੋ. ਨਿਪਤਿਤ੍ਵਾਤਿ ਨਿਕ੍ਖਮਿਤ੍ਵਾ. ਤਾਵਦੇਤਿ ਤਦਾ ਏਵ ਅਰੁਣੁਗ੍ਗਮਨਵੇਲਾਯ. ਯਮ੍ਹਿ ਪੇਤੋ ਪਚ੍ਚਾਗਨ੍ਤ੍ਵਾ ਰਞ੍ਞੋ ਅਤ੍ਤਾਨਂ ਦਸ੍ਸੇਸਿ, ਤਸ੍ਮਿਂ ਪੁਰੇਭਤ੍ਤੇ ਏਵ ਦਾਨਂ ਅਦਾਸਿ. ਸਹਤ੍ਥਾਤਿ ਸਹਤ੍ਥੇਨ. ਅਤੁਲਨ੍ਤਿ ਅਪ੍ਪਮਾਣਂ ਉਲ਼ਾਰਂ ਪਣੀਤਂ. ਦਤ੍ਵਾ ਸਙ੍ਘੇਤਿ ਸਙ੍ਘਸ੍ਸ ਦਤ੍ਵਾ. ਆਰੋਚੇਸਿ ਪਕਤਂ ਤਥਾਗਤਸ੍ਸਾਤਿ ‘‘ਇਦਂ, ਭਨ੍ਤੇ, ਦਾਨਂ ਅਞ੍ਞਤਰਂ ਪੇਤਂ ਸਨ੍ਧਾਯ ਪਕਤ’’ਨ੍ਤਿ ਤਂ ਪਵਤ੍ਤਿਂ ਭਗਵਤੋ ਆਰੋਚੇਸਿ. ਆਰੋਚੇਤ੍ਵਾ ਚ ਯਥਾ ਤਂ ਦਾਨਂ ਤਸ੍ਸ ਉਪਕਪ੍ਪਤਿ, ਏਵਂ ਤਸ੍ਸ ਚ ਪੇਤਸ੍ਸ ਦਕ੍ਖਿਣਂ ਆਦਿਸਿਤ੍ਥ ਆਦਿਸਿ.

੨੫੫. ਸੋਤਿ ਸੋ ਪੇਤੋ. ਪੂਜਿਤੋਤਿ ਦਕ੍ਖਿਣਾਯ ਦਿਯ੍ਯਮਾਨਾਯ ਪੂਜਿਤੋ. ਅਤਿਵਿਯ ਸੋਭਮਾਨੋਤਿ ਦਿਬ੍ਬਾਨੁਭਾਵੇਨ ਅਤਿਵਿਯ ਵਿਰੋਚਮਾਨੋ. ਪਾਤੁਰਹੋਸੀਤਿ ਪਾਤੁਭਵਿ, ਰਞ੍ਞੋ ਪੁਰਤੋ ਅਤ੍ਤਾਨਂ ਦਸ੍ਸੇਸਿ. ਯਕ੍ਖੋਹਮਸ੍ਮੀਤਿ ਪੇਤਤ੍ਤਭਾਵਤੋ ਮੁਤ੍ਤੋ ਯਕ੍ਖੋ ਅਹਂ ਜਾਤੋ ਦੇਵਭਾਵਂ ਪਤ੍ਤੋਸ੍ਮਿ. ਨ ਮਯ੍ਹਮਤ੍ਥਿ ਸਮਾ ਸਦਿਸਾ ਮਾਨੁਸਾਤਿ ਮਯ੍ਹਂ ਆਨੁਭਾਵਸਮ੍ਪਤ੍ਤਿਯਾ ਸਮਾ ਵਾ ਭੋਗਸਮ੍ਪਤ੍ਤਿਯਾ ਸਦਿਸਾ ਵਾ ਮਨੁਸ੍ਸਾ ਨ ਸਨ੍ਤਿ.

੨੫੬. ਪਸ੍ਸਾਨੁਭਾਵਂ ਅਪਰਿਮਿਤਂ ਮਮਯਿਦਨ੍ਤਿ ‘‘ਮਮ ਇਦਂ ਅਪਰਿਮਾਣਂ ਦਿਬ੍ਬਾਨੁਭਾਵਂ ਪਸ੍ਸਾ’’ਤਿ ਅਤ੍ਤਨੋ ਸਮ੍ਪਤ੍ਤਿਂ ਪਚ੍ਚਕ੍ਖਤੋ ਰਞ੍ਞੋ ਦਸ੍ਸੇਨ੍ਤੋ ਵਦਤਿ. ਤਯਾਨੁਦਿਟ੍ਠਂ ਅਤੁਲਂ ਦਤ੍ਵਾ ਸਙ੍ਘੇਤਿ ਅਰਿਯਸਙ੍ਘਸ੍ਸ ਅਤੁਲਂ ਉਲ਼ਾਰਂ ਦਾਨਂ ਦਤ੍ਵਾ ਮਯ੍ਹਂ ਅਨੁਕਮ੍ਪਾਯ ਤਯਾ ਅਨੁਦਿਟ੍ਠਂ. ਸਨ੍ਤਪ੍ਪਿਤੋ ਸਤਤਂ ਸਦਾ ਬਹੂਹੀਤਿ ਅਨ੍ਨਪਾਨਵਤ੍ਥਾਦੀਹਿ ਬਹੂਹਿ ਦੇਯ੍ਯਧਮ੍ਮੇਹਿ ਅਰਿਯਸਙ੍ਘਂ ਸਨ੍ਤਪ੍ਪੇਨ੍ਤੇਨ ਤਯਾ ਸਦਾ ਸਬ੍ਬਕਾਲਂ ਯਾਵਜੀਵਂ ਤਤ੍ਥਾਪਿ ਸਤਤਂ ਨਿਰਨ੍ਤਰਂ ਅਹਂ ਸਨ੍ਤਪ੍ਪਿਤੋ ਪੀਣਿਤੋ. ਯਾਮਿ ਅਹਂ ਸੁਖਿਤੋ ਮਨੁਸ੍ਸਦੇਵਾਤਿ ‘‘ਤਸ੍ਮਾ ਅਹਂ ਇਦਾਨਿ ਸੁਖਿਤੋ ਮਨੁਸ੍ਸਦੇਵ ਮਹਾਰਾਜ ਯਥਿਚ੍ਛਿਤਟ੍ਠਾਨਂ ਯਾਮੀ’’ਤਿ ਰਾਜਾਨਂ ਆਪੁਚ੍ਛਿ.

ਏਵਂ ਪੇਤੇ ਆਪੁਚ੍ਛਿਤ੍ਵਾ ਗਤੇ ਰਾਜਾ ਅਜਾਤਸਤ੍ਤੁ ਤਮਤ੍ਥਂ ਭਿਕ੍ਖੂਨਂ ਆਰੋਚੇਸਿ, ਭਿਕ੍ਖੂ ਭਗਵਤੋ ਸਨ੍ਤਿਕਂ ਉਪਸਙ੍ਕਮਿਤ੍ਵਾ ਆਰੋਚੇਸੁਂ. ਭਗਵਾ ਤਮਤ੍ਥਂ ਅਟ੍ਠੁਪ੍ਪਤ੍ਤਿਂ ਕਤ੍ਵਾ ਸਮ੍ਪਤ੍ਤਪਰਿਸਾਯ ਧਮ੍ਮਂ ਦੇਸੇਸਿ. ਤਂ ਸੁਤ੍ਵਾ ਮਹਾਜਨੋ ਮਚ੍ਛੇਰਮਲਂ ਪਹਾਯ ਦਾਨਾਦਿਪੁਞ੍ਞਾਭਿਰਤੋ ਅਹੋਸੀਤਿ.

ਚੂਲ਼ਾਸੇਟ੍ਠਿਪੇਤਵਤ੍ਥੁਵਣ੍ਣਨਾ ਨਿਟ੍ਠਿਤਾ.