੨. ਉਬ੍ਬਰਿਵਗ੍ਗੋ

੧. ਸਂਸਾਰਮੋਚਕਪੇਤਿਵਤ੍ਥੁਵਣ੍ਣਨਾ

ਨਗ੍ਗਾ ਦੁਬ੍ਬਣ੍ਣਰੂਪਾਸੀਤਿ ਇਦਂ ਸਤ੍ਥਰਿ ਵੇਲ਼ੁਵਨੇ ਵਿਹਰਨ੍ਤੇ ਮਗਧਰਟ੍ਠੇ ਇਟ੍ਠਕਵਤੀਨਾਮਕੇ ਗਾਮੇ ਅਞ੍ਞਤਰਂ ਪੇਤਿਂ ਆਰਬ੍ਭ ਵੁਤ੍ਤਂ. ਮਗਧਰਟ੍ਠੇ ਕਿਰ ਇਟ੍ਠਕਵਤੀ ਚ ਦੀਘਰਾਜਿ ਚਾਤਿ ਦ੍ਵੇ ਗਾਮਕਾ ਅਹੇਸੁਂ, ਤਤ੍ਥ ਬਹੂ ਸਂਸਾਰਮੋਚਕਾ ਮਿਚ੍ਛਾਦਿਟ੍ਠਿਕਾ ਪਟਿਵਸਨ੍ਤਿ. ਅਤੀਤੇ ਚ ਕਾਲੇ ਪਞ੍ਚਨ੍ਨਂ ਵਸ੍ਸਸਤਾਨਂ ਮਤ੍ਥਕੇ ਅਞ੍ਞਤਰਾ ਇਤ੍ਥੀ ਤਤ੍ਥੇਵ ਇਟ੍ਠਕਵਤਿਯਂ ਅਞ੍ਞਤਰਸ੍ਮਿਂ ਸਂਸਾਰਮੋਚਕਕੁਲੇ ਨਿਬ੍ਬਤ੍ਤਿਤ੍ਵਾ ਮਿਚ੍ਛਾਦਿਟ੍ਠਿਵਸੇਨ ਬਹੂ ਕੀਟਪਟਙ੍ਗੇ ਜੀਵਿਤਾ ਵੋਰੋਪੇਤ੍ਵਾ ਪੇਤੇਸੁ ਨਿਬ੍ਬਤ੍ਤਿ.

ਸਾ ਪਞ੍ਚ ਵਸ੍ਸਸਤਾਨਿ ਖੁਪ੍ਪਿਪਾਸਾਦਿਦੁਕ੍ਖਂ ਅਨੁਭਵਿਤ੍ਵਾ ਅਮ੍ਹਾਕਂ ਭਗਵਤਿ ਲੋਕੇ ਉਪ੍ਪਜ੍ਜਿਤ੍ਵਾ ਪਵਤ੍ਤਿਤਵਰਧਮ੍ਮਚਕ੍ਕੇ ਅਨੁਕ੍ਕਮੇਨ ਰਾਜਗਹਂ ਉਪਨਿਸ੍ਸਾਯ ਵੇਲ਼ੁਵਨੇ ਵਿਹਰਨ੍ਤੇ ਪੁਨਪਿ ਇਟ੍ਠਕਵਤਿਯਂਯੇਵ ਅਞ੍ਞਤਰਸ੍ਮਿਂ ਸਂਸਾਰਮੋਚਕਕੁਲੇਯੇਵ ਨਿਬ੍ਬਤ੍ਤਿਤ੍ਵਾ ਯਦਾ ਸਤ੍ਤਟ੍ਠਵਸ੍ਸੁਦ੍ਦੇਸਿਕਕਾਲੇ ਅਞ੍ਞਾਹਿ ਦਾਰਿਕਾਹਿ ਸਦ੍ਧਿਂ ਰਥਿਕਾਯ ਕੀਲ਼ਨਸਮਤ੍ਥਾ ਅਹੋਸਿ, ਤਦਾ ਆਯਸ੍ਮਾ ਸਾਰਿਪੁਤ੍ਤਤ੍ਥੇਰੋ ਤਮੇਵ ਗਾਮਂ ਉਪਨਿਸ੍ਸਾਯ ਅਰੁਣਵਤੀਵਿਹਾਰੇ ਵਿਹਰਨ੍ਤੋ ਏਕਦਿਵਸਂ ਦ੍ਵਾਦਸਹਿ ਭਿਕ੍ਖੂਹਿ ਸਦ੍ਧਿਂ ਤਸ੍ਸ ਗਾਮਸ੍ਸ ਦ੍ਵਾਰਸਮੀਪੇਨ ਮਗ੍ਗੇਨ ਅਤਿਕ੍ਕਮਤਿ. ਤਸ੍ਮਿਂ ਖਣੇ ਬਹੂ ਗਾਮਦਾਰਿਕਾ ਗਾਮਤੋ ਨਿਕ੍ਖਮਿਤ੍ਵਾ ਦ੍ਵਾਰਸਮੀਪੇ ਕੀਲ਼ਨ੍ਤਿਯੋ ਪਸਨ੍ਨਮਾਨਸਾ ਮਾਤਾਪਿਤੂਨਂ ਪਟਿਪਤ੍ਤਿਦਸ੍ਸਨੇਨ ਵੇਗੇਨਾਗਨ੍ਤ੍ਵਾ ਥੇਰਂ ਅਞ੍ਞੇ ਚ ਭਿਕ੍ਖੂ ਪਞ੍ਚਪਤਿਟ੍ਠਿਤੇਨ ਵਨ੍ਦਿਂਸੁ. ਸਾ ਪਨੇਸਾ ਅਸ੍ਸਦ੍ਧਕੁਲਸ੍ਸ ਧੀਤਾ ਚਿਰਕਾਲਂ ਅਪਰਿਚਿਤਕੁਸਲਤਾਯ ਸਾਧੁਜਨਾਚਾਰਵਿਰਹਿਤਾ ਅਨਾਦਰਾ ਅਲਕ੍ਖਿਕਾ ਵਿਯ ਅਟ੍ਠਾਸਿ. ਥੇਰੋ ਤਸ੍ਸਾ ਪੁਬ੍ਬਚਰਿਤਂ ਇਦਾਨਿ ਚ ਸਂਸਾਰਮੋਚਕਕੁਲੇ ਨਿਬ੍ਬਤ੍ਤਨਂ ਆਯਤਿਞ੍ਚ ਨਿਰਯੇ ਨਿਬ੍ਬਤ੍ਤਨਾਰਹਤਂ ਦਿਸ੍ਵਾ ‘‘ਸਚਾਯਂ ਮਂ ਵਨ੍ਦਿਸ੍ਸਤਿ, ਨਿਰਯੇ ਨ ਉਪ੍ਪਜ੍ਜਿਸ੍ਸਤਿ, ਪੇਤੇਸੁ ਨਿਬ੍ਬਤ੍ਤਿਤ੍ਵਾਪਿ ਮਮਂਯੇਵ ਨਿਸ੍ਸਾਯ ਸਮ੍ਪਤ੍ਤਿਂ ਪਟਿਲਭਿਸ੍ਸਤੀ’’ਤਿ ਞਤ੍ਵਾ ਕਰੁਣਾਸਞ੍ਚੋਦਿਤਮਾਨਸੋ ਤਾ ਦਾਰਿਕਾਯੋ ਆਹ – ‘‘ਤੁਮ੍ਹੇ ਭਿਕ੍ਖੂ ਵਨ੍ਦਥ, ਅਯਂ ਪਨ ਦਾਰਿਕਾ ਅਲਕ੍ਖਿਕਾ ਵਿਯ ਠਿਤਾ’’ਤਿ. ਅਥ ਨਂ ਤਾ ਦਾਰਿਕਾ ਹਤ੍ਥੇਸੁ ਪਰਿਗ੍ਗਹੇਤ੍ਵਾ ਆਕਡ੍ਢਿਤ੍ਵਾ ਬਲਕ੍ਕਾਰੇਨ ਥੇਰਸ੍ਸ ਪਾਦੇ ਵਨ੍ਦਾਪੇਸੁਂ.

ਸਾ ਅਪਰੇਨ ਸਮਯੇਨ ਵਯਪ੍ਪਤ੍ਤਾ ਦੀਘਰਾਜਿਯਂ ਸਂਸਾਰਮੋਚਕਕੁਲੇ ਅਞ੍ਞਤਰਸ੍ਸ ਕੁਮਾਰਸ੍ਸ ਦਿਨ੍ਨਾ ਪਰਿਪੁਣ੍ਣਗਬ੍ਭਾ ਹੁਤ੍ਵਾ ਕਾਲਕਤਾ ਪੇਤੇਸੁ ਉਪ੍ਪਜ੍ਜਿਤ੍ਵਾ ਨਗ੍ਗਾ ਦੁਬ੍ਬਣ੍ਣਰੂਪਾ ਖੁਪ੍ਪਿਪਾਸਾਭਿਭੂਤਾ ਅਤਿਵਿਯ ਬੀਭਚ੍ਛਦਸ੍ਸਨਾ ਵਿਚਰਨ੍ਤੀ ਰਤ੍ਤਿਯਂ ਆਯਸ੍ਮਤੋ ਸਾਰਿਪੁਤ੍ਤਤ੍ਥੇਰਸ੍ਸ ਅਤ੍ਤਾਨਂ ਦਸ੍ਸੇਤ੍ਵਾ ਏਕਮਨ੍ਤਂ ਅਟ੍ਠਾਸਿ. ਤਂ ਦਿਸ੍ਵਾ ਥੇਰੋ –

੯੫. ‘‘ਨਗ੍ਗਾ ਦੁਬ੍ਬਣ੍ਣਰੂਪਾਸਿ, ਕਿਸਾ ਧਮਨਿਸਨ੍ਥਤਾ;

ਉਪ੍ਫਾਸੁਲਿਕੇ ਕਿਸਿਕੇ, ਕਾ ਨੁ ਤ੍ਵਂ ਇਧ ਤਿਟ੍ਠਸੀ’’ਤਿ. –

ਗਾਥਾਯ ਪੁਚ੍ਛਿ. ਤਤ੍ਥ ਧਮਨਿਸਨ੍ਥਤਾਤਿ ਨਿਮ੍ਮਂਸਲੋਹਿਤਤਾਯ ਸਿਰਾਜਾਲੇਹਿ ਪਤ੍ਥਤਗਤ੍ਤਾ. ਉਪ੍ਫਾਸੁਲਿਕੇਤਿ ਉਗ੍ਗਤਫਾਸੁਲਿਕੇ. ਕਿਸਿਕੇਤਿ ਕਿਸਸਰੀਰੇ. ਪੁਬ੍ਬੇਪਿ ‘‘ਕਿਸਾ’’ਤਿ ਵਤ੍ਵਾ ਪੁਨ ‘‘ਕਿਸਿਕੇ’’ਤਿ ਵਚਨਂ ਅਟ੍ਠਿਚਮ੍ਮਨ੍ਹਾਰੁਮਤ੍ਤਸਰੀਰਤਾਯ ਅਤਿਵਿਯ ਕਿਸਭਾਵਦਸ੍ਸਨਤ੍ਥਂ ਵੁਤ੍ਤਂ. ਤਂ ਸੁਤ੍ਵਾ ਪੇਤੀ ਅਤ੍ਤਾਨਂ ਪਵੇਦੇਨ੍ਤੀ –

੯੬. ‘‘ਅਹਂ ਭਦਨ੍ਤੇ ਪੇਤੀਮ੍ਹਿ, ਦੁਗ੍ਗਤਾ ਯਮਲੋਕਿਕਾ;

ਪਾਪਕਮ੍ਮਂ ਕਰਿਤ੍ਵਾਨ, ਪੇਤਲੋਕਂ ਇਤੋ ਗਤਾ’’ਤਿ. – ਗਾਥਂ ਵਤ੍ਵਾ ਪੁਨ ਥੇਰੇਨ –

੯੭. ‘‘ਕਿਂ ਨੁ ਕਾਯੇਨ ਵਾਚਾਯ, ਮਨਸਾ ਦੁਕ੍ਕਟਂ ਕਤਂ;

ਕਿਸ੍ਸਕਮ੍ਮਵਿਪਾਕੇਨ, ਪੇਤਲੋਕਂ ਇਤੋ ਗਤਾ’’ਤਿ. –

ਕਤਕਮ੍ਮਂ ਪੁਟ੍ਠਾ ‘‘ਅਦਾਨਸੀਲਾ ਮਚ੍ਛਰਿਨੀ ਹੁਤ੍ਵਾ ਪੇਤਯੋਨਿਯਂ ਨਿਬ੍ਬਤ੍ਤਿਤ੍ਵਾ ਏਵਂ ਮਹਾਦੁਕ੍ਖਂ ਅਨੁਭਵਾਮੀ’’ਤਿ ਦਸ੍ਸੇਨ੍ਤੀ ਤਿਸ੍ਸੋ ਗਾਥਾ ਅਭਾਸਿ –

੯੮. ‘‘ਅਨੁਕਮ੍ਪਕਾ ਮਯ੍ਹਂ ਨਾਹੇਸੁਂ ਭਨ੍ਤੇ, ਪਿਤਾ ਚ ਮਾਤਾ ਅਥਵਾਪਿ ਞਾਤਕਾ;

ਯੇ ਮਂ ਨਿਯੋਜੇਯ੍ਯੁਂ ਦਦਾਹਿ ਦਾਨਂ, ਪਸਨ੍ਨਚਿਤ੍ਤਾ ਸਮਣਬ੍ਰਾਹ੍ਮਣਾਨਂ.

੯੯. ‘‘ਇਤੋ ਅਹਂ ਵਸ੍ਸਸਤਾਨਿ ਪਞ੍ਚ, ਯਂ ਏਵਰੂਪਾ ਵਿਚਰਾਮਿ ਨਗ੍ਗਾ;

ਖੁਦਾਯ ਤਣ੍ਹਾਯ ਚ ਖਜ੍ਜਮਾਨਾ, ਪਾਪਸ੍ਸ ਕਮ੍ਮਸ੍ਸ ਫਲਂ ਮਮੇਦਂ.

੧੦੦. ‘‘ਵਨ੍ਦਾਮਿ ਤਂ ਅਯ੍ਯ ਪਸਨ੍ਨਚਿਤ੍ਤਾ, ਅਨੁਕਮ੍ਪ ਮਂ ਵੀਰ ਮਹਾਨੁਭਾਵ;

ਦਤ੍ਵਾ ਚ ਮੇ ਆਦਿਸ ਯਞ੍ਹਿ ਕਿਞ੍ਚਿ, ਮੋਚੇਹਿ ਮਂ ਦੁਗ੍ਗਤਿਯਾ ਭਦਨ੍ਤੇ’’ਤਿ.

੯੮. ਤਤ੍ਥ ਅਨੁਕਮ੍ਪਕਾਤਿ ਸਮ੍ਪਰਾਯਿਕੇਨ ਅਤ੍ਥੇਨ ਅਨੁਗ੍ਗਣ੍ਹਕਾ. ਭਨ੍ਤੇਤਿ ਥੇਰਂ ਆਲਪਤਿ. ਯੇ ਮਂ ਨਿਯੋਜੇਯ੍ਯੁਨ੍ਤਿ ਮਾਤਾ ਵਾ ਪਿਤਾ ਵਾ ਅਥ ਵਾ ਞਾਤਕਾ ਏਦਿਸਾ ਪਸਨ੍ਨਚਿਤ੍ਤਾ ਹੁਤ੍ਵਾ ‘‘ਸਮਣਬ੍ਰਾਹ੍ਮਣਾਨਂ ਦਦਾਹਿ ਦਾਨ’’ਨ੍ਤਿ ਯੇ ਮਂ ਨਿਯੋਜੇਯ੍ਯੁਂ, ਤਾਦਿਸਾ ਅਨੁਕਮ੍ਪਕਾ ਮਯ੍ਹਂ ਨਾਹੇਸੁਨ੍ਤਿ ਯੋਜਨਾ.

੯੯. ਇਤੋ ਅਹਂ ਵਸ੍ਸਸਤਾਨਿ ਪਞ੍ਚ, ਯਂ ਏਵਰੂਪਾ ਵਿਚਰਾਮਿ ਨਗ੍ਗਾਤਿ ਇਦਂ ਸਾ ਪੇਤੀ ਇਤੋ ਤਤਿਯਾਯ ਜਾਤਿਯਾ ਅਤ੍ਤਨੋ ਪੇਤਤ੍ਤਭਾਵਂ ਅਨੁਸ੍ਸਰਿਤ੍ਵਾ ਇਦਾਨਿਪਿ ਤਥਾ ਪਞ੍ਚਵਸ੍ਸਸਤਾਨਿ ਵਿਚਰਾਮੀਤਿ ਅਧਿਪ੍ਪਾਯੇਨਾਹ. ਤਤ੍ਥ ਯਨ੍ਤਿ ਯਸ੍ਮਾ, ਦਾਨਾਦੀਨਂ ਪੁਞ੍ਞਾਨਂ ਅਕਤਤ੍ਤਾ ਏਵਰੂਪਾ ਨਗ੍ਗਾ ਪੇਤੀ ਹੁਤ੍ਵਾ ਇਤੋ ਪਟ੍ਠਾਯ ਵਸ੍ਸਸਤਾਨਿ ਪਞ੍ਚ ਵਿਚਰਾਮੀਤਿ ਯੋਜਨਾ. ਤਣ੍ਹਾਯਾਤਿ ਪਿਪਾਸਾਯ. ਖਜ੍ਜਮਾਨਾਤਿ ਖਾਦਿਯਮਾਨਾ, ਬਾਧਿਯਮਾਨਾਤਿ ਅਤ੍ਥੋ.

੧੦੦. ਵਨ੍ਦਾਮਿ ਤਂ ਅਯ੍ਯ ਪਸਨ੍ਨਚਿਤ੍ਤਾਤਿ ਅਯ੍ਯ, ਤਮਹਂ ਪਸਨ੍ਨਚਿਤ੍ਤਾ ਹੁਤ੍ਵਾ ਵਨ੍ਦਾਮਿ, ਏਤ੍ਤਕਮੇਵ ਪੁਞ੍ਞਂ ਇਦਾਨਿ ਮਯਾ ਕਾਤੁਂ ਸਕ੍ਕਾਤਿ ਦਸ੍ਸੇਤਿ. ਅਨੁਕਮ੍ਪ ਮਨ੍ਤਿ ਅਨੁਗ੍ਗਣ੍ਹ ਮਮਂ ਉਦ੍ਦਿਸ੍ਸ ਅਨੁਦ੍ਦਯਂ ਕਰੋਹਿ. ਦਤ੍ਵਾ ਚ ਮੇ ਆਦਿਸ ਯਞ੍ਹਿ ਕਿਞ੍ਚੀਤਿ ਕਿਞ੍ਚਿਦੇਵ ਦੇਯ੍ਯਧਮ੍ਮਂ ਸਮਣਬ੍ਰਾਹ੍ਮਣਾਨਂ ਦਤ੍ਵਾ ਤਂ ਦਕ੍ਖਿਣਂ ਮਯ੍ਹਂ ਆਦਿਸ, ਤੇਨ ਮੇ ਇਤੋ ਪੇਤਯੋਨਿਤੋ ਮੋਕ੍ਖੋ ਭਵਿਸ੍ਸਤੀਤਿ ਅਧਿਪ੍ਪਾਯੇਨ ਵਦਤਿ. ਤੇਨੇਵਾਹ ‘‘ਮੋਚੇਹਿ ਮਂ ਦੁਗ੍ਗਤਿਯਾ ਭਦਨ੍ਤੇ’’ਤਿ.

ਏਵਂ ਪੇਤਿਯਾ ਵੁਤ੍ਤੇ ਯਥਾ ਸੋ ਥੇਰੋ ਪਟਿਪਜ੍ਜਿ, ਤਂ ਦਸ੍ਸੇਤੁਂ ਸਙ੍ਗੀਤਿਕਾਰੇਹਿ ਤਿਸ੍ਸੋ ਗਾਥਾ ਵੁਤ੍ਤਾ –

੧੦੧. ‘‘ਸਾਧੂਤਿ ਸੋ ਪਟਿਸ੍ਸੁਤ੍ਵਾ, ਸਾਰਿਪੁਤ੍ਤੋਨੁਕਮ੍ਪਕੋ;

ਭਿਕ੍ਖੂਨਂ ਆਲੋਪਂ ਦਤ੍ਵਾ, ਪਾਣਿਮਤ੍ਤਞ੍ਚ ਚੋਲ਼ਕਂ;

ਥਾਲਕਸ੍ਸ ਚ ਪਾਨੀਯਂ, ਤਸ੍ਸਾ ਦਕ੍ਖਿਣਮਾਦਿਸਿ.

੧੦੨. ‘‘ਸਮਨਨ੍ਤਰਾਨੁਦ੍ਦਿਟ੍ਠੇ, ਵਿਪਾਕੋ ਉਦਪਜ੍ਜਥ;

ਭੋਜਨਚ੍ਛਾਦਨਪਾਨੀਯਂ, ਦਕ੍ਖਿਣਾਯ ਇਦਂ ਫਲਂ.

੧੦੩. ‘‘ਤਤੋ ਸੁਦ੍ਧਾ ਸੁਚਿਵਸਨਾ, ਕਾਸਿਕੁਤ੍ਤਮਧਾਰਿਨੀ;

ਵਿਚਿਤ੍ਤਵਤ੍ਥਾਭਰਣਾ, ਸਾਰਿਪੁਤ੍ਤਂ ਉਪਸਙ੍ਕਮੀ’’ਤਿ.

੧੦੧-੧੦੩. ਤਤ੍ਥ ਭਿਕ੍ਖੂਨਨ੍ਤਿ ਭਿਕ੍ਖੁਨੋ, ਵਚਨਵਿਪਲ੍ਲਾਸੇਨ ਹੇਤਂ ਵੁਤ੍ਤਂ. ‘‘ਆਲੋਪਂ ਭਿਕ੍ਖੁਨੋ ਦਤ੍ਵਾ’’ਤਿ ਕੇਚਿ ਪਠਨ੍ਤਿ. ਆਲੋਪਨ੍ਤਿ ਕਬਲ਼ਂ, ਏਕਾਲੋਪਮਤ੍ਤਂ ਭੋਜਨਨ੍ਤਿ ਅਤ੍ਥੋ. ਪਾਣਿਮਤ੍ਤਞ੍ਚ ਚੋਲ਼ਕਨ੍ਤਿ ਏਕਹਤ੍ਥਪ੍ਪਮਾਣਂ ਚੋਲ਼ਖਣ੍ਡਨ੍ਤਿ ਅਤ੍ਥੋ. ਥਾਲਕਸ੍ਸ ਚ ਪਾਨੀਯਨ੍ਤਿ ਏਕਥਾਲਕਪੂਰਣਮਤ੍ਤਂ ਉਦਕਂ. ਸੇਸਂ ਖਲ੍ਲਾਟਿਯਪੇਤਵਤ੍ਥੁਸ੍ਮਿਂ ਵੁਤ੍ਤਨਯਮੇਵ.

ਅਥਾਯਸ੍ਮਾ ਸਾਰਿਪੁਤ੍ਤੋ ਤਂ ਪੇਤਿਂ ਪੀਣਿਨ੍ਦ੍ਰਿਯਂ ਪਰਿਸੁਦ੍ਧਛਵਿਵਣ੍ਣਂ ਦਿਬ੍ਬਵਤ੍ਥਾਭਰਣਾਲਙ੍ਕਾਰਂ ਸਮਨ੍ਤਤੋ ਅਤ੍ਤਨੋ ਪਭਾਯ ਓਭਾਸੇਨ੍ਤਿਂ ਅਤ੍ਤਨੋ ਸਨ੍ਤਿਕਂ ਉਪਗਨ੍ਤ੍ਵਾ ਠਿਤਂ ਦਿਸ੍ਵਾ ਪਚ੍ਚਕ੍ਖਤੋ ਕਮ੍ਮਫਲਂ ਤਾਯ ਵਿਭਾਵੇਤੁਕਾਮੋ ਹੁਤ੍ਵਾ ਤਿਸ੍ਸੋ ਗਾਥਾ ਅਭਾਸਿ –

੧੦੪. ‘‘ਅਭਿਕ੍ਕਨ੍ਤੇਨ ਵਣ੍ਣੇਨ, ਯਾ ਤ੍ਵਂ ਤਿਟ੍ਠਸਿ ਦੇਵਤੇ;

ਓਭਾਸੇਨ੍ਤੀ ਦਿਸਾ ਸਬ੍ਬਾ, ਓਸਧੀ ਵਿਯ ਤਾਰਕਾ.

੧੦੫. ‘‘ਕੇਨ ਤੇਤਾਦਿਸੋ ਵਣ੍ਣੋ, ਕੇਨ ਤੇ ਇਧ ਮਿਜ੍ਝਤਿ;

ਉਪ੍ਪਜ੍ਜਨ੍ਤਿ ਚ ਤੇ ਭੋਗਾ, ਯੇ ਕੇਚਿ ਮਨਸੋ ਪਿਯਾ.

੧੦੬. ‘‘ਪੁਚ੍ਛਾਮਿ ਤਂ ਦੇਵਿ ਮਹਾਨੁਭਾਵੇ, ਮਨੁਸ੍ਸਭੂਤਾ ਕਿਮਕਾਸਿ ਪੁਞ੍ਞਂ;

ਕੇਨਾਸਿ ਏਵਂ ਜਲਿਤਾਨੁਭਾਵਾ, ਵਣ੍ਣੋ ਚ ਤੇ ਸਬ੍ਬਦਿਸਾ ਪਭਾਸਤੀ’’ਤਿ.

੧੦੪. ਤਤ੍ਥ ਅਭਿਕ੍ਕਨ੍ਤੇਨਾਤਿ ਅਤਿਮਨਾਪੇਨ, ਅਭਿਰੂਪੇਨਾਤਿ ਅਤ੍ਥੋ. ਵਣ੍ਣੇਨਾਤਿ ਛਵਿਵਣ੍ਣੇਨ. ਓਭਾਸੇਨ੍ਤੀ ਦਿਸਾ ਸਬ੍ਬਾਤਿ ਸਬ੍ਬਾਪਿ ਦਸ ਦਿਸਾ ਜੋਤੇਨ੍ਤੀ ਏਕਾਲੋਕਂ ਕਰੋਨ੍ਤੀ. ਯਥਾ ਕਿਨ੍ਤਿ ਆਹ ‘‘ਓਸਧੀ ਵਿਯ ਤਾਰਕਾ’’ਤਿ. ਉਸ੍ਸਨ੍ਨਾ ਪਭਾ ਏਤਾਯ ਧੀਯਤਿ, ਓਸਧਾਨਂ ਵਾ ਅਨੁਬਲਪ੍ਪਦਾਯਿਕਾਤਿ ਕਤ੍ਵਾ ‘‘ਓਸਧੀ’’ਤਿ ਲਦ੍ਧਨਾਮਾ ਤਾਰਕਾ ਯਥਾ ਸਮਨ੍ਤਤੋ ਆਲੋਕਂ ਕੁਰੁਮਾਨਾ ਤਿਟ੍ਠਤਿ, ਏਵਮੇਵ ਤ੍ਵਂ ਸਬ੍ਬਦਿਸਾ ਓਭਾਸੇਨ੍ਤੀਤਿ ਅਤ੍ਥੋ.

੧੦੫. ਕੇਨਾਤਿ ਕਿਂ-ਸਦ੍ਦੋ ਪੁਚ੍ਛਾਯਂ. ਹੇਤੁਅਤ੍ਥੇ ਚੇਤਂ ਕਰਣਵਚਨਂ, ਕੇਨ ਹੇਤੁਨਾਤਿ ਅਤ੍ਥੋ. ਤੇਤਿ ਤਵ. ਏਤਾਦਿਸੋਤਿ ਏਦਿਸੋ, ਏਤਰਹਿ ਯਥਾਦਿਸ੍ਸਮਾਨੋਤਿ ਵੁਤ੍ਤਂ ਹੋਤਿ. ਕੇਨ ਤੇ ਇਧ ਮਿਜ੍ਝਤੀਤਿ ਕੇਨ ਪੁਞ੍ਞਵਿਸੇਸੇਨ ਇਧ ਇਮਸ੍ਮਿਂ ਠਾਨੇ ਇਦਾਨਿ ਤਯਾ ਲਬ੍ਭਮਾਨਂ ਸੁਚਰਿਤਫਲਂ ਇਜ੍ਝਤਿ ਨਿਪ੍ਫਜ੍ਜਤਿ. ਉਪ੍ਪਜ੍ਜਨ੍ਤੀਤਿ ਨਿਬ੍ਬਤ੍ਤਨ੍ਤਿ. ਭੋਗਾਤਿ ਪਰਿਭੁਞ੍ਜਿਤਬ੍ਬਟ੍ਠੇਨ ‘‘ਭੋਗਾ’’ਤਿ ਲਦ੍ਧਨਾਮਾ ਵਤ੍ਥਾਭਰਣਾਦਿਵਿਤ੍ਤੂਪਕਰਣਵਿਸੇਸਾ. ਯੇ ਕੇਚੀਤਿ ਭੋਗੇ ਅਨਵਸੇਸਤੋ ਬ੍ਯਾਪੇਤ੍ਵਾ ਸਙ੍ਗਣ੍ਹਾਤਿ. ਅਨਵਸੇਸਬ੍ਯਾਪਕੋ ਹਿ ਅਯਂ ਨਿਦ੍ਦੇਸੋ ਯਥਾ ‘‘ਯੇ ਕੇਚਿ ਸਙ੍ਖਾਰਾ’’ਤਿ. ਮਨਸੋ ਪਿਯਾਤਿ ਮਨਸਾ ਪਿਯਾਯਿਤਬ੍ਬਾ, ਮਨਾਪਿਯਾਤਿ ਅਤ੍ਥੋ.

੧੦੬. ਪੁਚ੍ਛਾਮੀਤਿ ਪੁਚ੍ਛਂ ਕਰੋਮਿ, ਞਾਤੁਂ ਇਚ੍ਛਾਮੀਤਿ ਅਤ੍ਥੋ. ਤਨ੍ਤਿ ਤ੍ਵਂ. ਦੇਵੀਤਿ ਦਿਬ੍ਬਾਨਭਾਵਸਮਙ੍ਗਿਤਾਯ, ਦੇਵਿ. ਤੇਨਾਹ ‘‘ਮਹਾਨੁਭਾਵੇ’’ਤਿ. ਮਨੁਸ੍ਸਭੂਤਾਤਿ ਮਨੁਸ੍ਸੇਸੁ ਜਾਤਾ ਮਨੁਸ੍ਸਭਾਵਂ ਪਤ੍ਤਾ. ਇਦਂ ਯੇਭੁਯ੍ਯੇਨ ਸਤ੍ਤਾ ਮਨੁਸ੍ਸਤ੍ਤਭਾਵੇ ਠਿਤਾ ਪੁਞ੍ਞਾਨਿ ਕਰੋਨ੍ਤੀਤਿ ਕਤ੍ਵਾ ਵੁਤ੍ਤਂ. ਅਯਮੇਤਾਯਂ ਗਾਥਾਨਂ ਸਙ੍ਖੇਪਤੋ ਅਤ੍ਥੋ, ਵਿਤ੍ਥਾਰਤੋ ਪਨ ਪਰਮਤ੍ਥਦੀਪਨਿਯਂ ਵਿਮਾਨਵਤ੍ਥੁਅਟ੍ਠਕਥਾਯਂ ਵੁਤ੍ਤਨਯੇਨੇਵ ਵੇਦਿਤਬ੍ਬੋ.

ਏਵਂ ਪੁਨ ਥੇਰੇਨ ਪੁਟ੍ਠਾ ਪੇਤੀ ਤਸ੍ਸਾ ਸਮ੍ਪਤ੍ਤਿਯਾ ਲਦ੍ਧਕਾਰਣਂ ਪਕਾਸੇਨ੍ਤੀ ਸੇਸਗਾਥਾ ਅਭਾਸਿ –

੧੦੭. ‘‘ਉਪ੍ਪਣ੍ਡੁਕਿਂ ਕਿਸਂ ਛਾਤਂ, ਨਗ੍ਗਂ ਸਮ੍ਪਤਿਤਚ੍ਛਵਿਂ;

ਮੁਨਿ ਕਾਰੁਣਿਕੋ ਲੋਕੇ, ਤਂ ਮਂ ਅਦ੍ਦਕ੍ਖਿ ਦੁਗ੍ਗਤਂ.

੧੦੮. ‘‘ਭਿਕ੍ਖੂਨਂ ਆਲੋਪਂ ਦਤ੍ਵਾ, ਪਾਣਿਮਤ੍ਤਞ੍ਚ ਚੋਲ਼ਕਂ;

ਥਾਲਕਸ੍ਸ ਚ ਪਾਨੀਯਂ, ਮਮ ਦਕ੍ਖਿਣਮਾਦਿਸਿ.

੧੦੯. ‘‘ਆਲੋਪਸ੍ਸ ਫਲਂ ਪਸ੍ਸ, ਭਤ੍ਤਂ ਵਸ੍ਸਸਤਂ ਦਸ;

ਭੁਞ੍ਜਾਮਿ ਕਾਮਕਾਮਿਨੀ, ਅਨੇਕਰਸਬ੍ਯਞ੍ਜਨਂ.

੧੧੦. ‘‘ਪਾਣਿਮਤ੍ਤਸ੍ਸ ਚੋਲ਼ਸ੍ਸ, ਵਿਪਾਕਂ ਪਸ੍ਸ ਯਾਦਿਸਂ;

ਯਾਵਤਾ ਨਨ੍ਦਰਾਜਸ੍ਸ, ਵਿਜਿਤਸ੍ਮਿਂ ਪਟਿਚ੍ਛਦਾ.

੧੧੧. ‘‘ਤਤੋ ਬਹੁਤਰਾ ਭਨ੍ਤੇ, ਵਤ੍ਥਾਨਚ੍ਛਾਦਨਾਨਿ ਮੇ;

ਕੋਸੇਯ੍ਯਕਮ੍ਬਲੀਯਾਨਿ, ਖੋਮਕਪ੍ਪਾਸਿਕਾਨਿ ਚ.

੧੧੨. ‘‘ਵਿਪੁਲਾ ਚ ਮਹਗ੍ਘਾ ਚ, ਤੇਪਾਕਾਸੇਵਲਮ੍ਬਰੇ;

ਸਾਹਂ ਤਂ ਪਰਿਦਹਾਮਿ, ਯਂ ਯਞ੍ਹਿ ਮਨਸੋ ਪਿਯਂ.

੧੧੩. ‘‘ਥਾਲਕਸ੍ਸ ਚ ਪਾਨੀਯਂ, ਵਿਪਾਕਂ ਪਸ੍ਸ ਯਾਦਿਸਂ;

ਗਮ੍ਭੀਰਾ ਚਤੁਰਸ੍ਸਾ ਚ, ਪੋਕ੍ਖਰਞ੍ਞੋ ਸੁਨਿਮ੍ਮਿਤਾ.

੧੧੪. ‘‘ਸੇਤੋਦਕਾ ਸੁਪ੍ਪਤਿਤ੍ਥਾ, ਸੀਤਾ ਅਪ੍ਪਟਿਗਨ੍ਧਿਯਾ;

ਪਦੁਮੁਪ੍ਪਲਸਞ੍ਛਨ੍ਨਾ, ਵਾਰਿਕਿਞ੍ਜਕ੍ਖਪੂਰਿਤਾ.

੧੧੫. ‘‘ਸਾਹਂ ਰਮਾਮਿ ਕੀਲ਼ਾਮਿ, ਮੋਦਾਮਿ ਅਕੁਤੋਭਯਾ;

ਮੁਨਿਂ ਕਾਰੁਣਿਕਂ ਲੋਕੇ, ਭਨ੍ਤੇ ਵਨ੍ਦਿਤੁਮਾਗਤਾ’’ਤਿ.

੧੦੭. ਤਤ੍ਥ ਉਪ੍ਪਣ੍ਡੁਕਿਨ੍ਤਿ ਉਪ੍ਪਣ੍ਡੁਕਜਾਤਂ. ਛਾਤਨ੍ਤਿ ਬੁਭੁਕ੍ਖਿਤਂ ਖੁਦਾਯ ਅਭਿਭੂਤਂ. ਸਮ੍ਪਤਿਤਚ੍ਛਵਿਨ੍ਤਿ ਛਿਨ੍ਨਭਿਨ੍ਨਸਰੀਰਚ੍ਛਵਿਂ. ਲੋਕੇਤਿ ਇਦਂ ‘‘ਕਾਰੁਣਿਕੋ’’ਤਿ ਏਤ੍ਥ ਵੁਤ੍ਤਕਰੁਣਾਯ ਵਿਸਯਦਸ੍ਸਨਂ. ਤਂ ਮਨ੍ਤਿ ਤਾਦਿਸਂ ਮਮਂ, ਵੁਤ੍ਤਨਯੇਨ ਏਕਨ੍ਤਤੋ ਕਰੁਣਟ੍ਠਾਨਿਯਂ ਮਂ. ਦੁਗ੍ਗਤਨ੍ਤਿ ਦੁਗ੍ਗਤਿਂ ਗਤਂ.

੧੦੮-੧੦੯. ਭਿਕ੍ਖੂਨਂ ਆਲੋਪਂ ਦਤ੍ਵਾਤਿਆਦਿ ਥੇਰੇਨ ਅਤ੍ਤਨੋ ਕਰੁਣਾਯ ਕਤਾਕਾਰਦਸ੍ਸਨਂ. ਤਤ੍ਥ ਭਤ੍ਤਨ੍ਤਿ ਓਦਨਂ, ਦਿਬ੍ਬਭੋਜਨਨ੍ਤਿ ਅਤ੍ਥੋ. ਵਸ੍ਸਸਤਂ ਦਸਾਤਿ ਦਸ ਵਸ੍ਸਸਤਾਨਿ, ਵਸ੍ਸਸਹਸ੍ਸਨ੍ਤਿ ਵੁਤ੍ਤਂ ਹੋਤਿ. ਅਚ੍ਚਨ੍ਤਸਂਯੋਗੇ ਚੇਤਂ ਉਪਯੋਗਵਚਨਂ. ਭੁਞ੍ਜਾਮਿ ਕਾਮਕਾਮਿਨੀ, ਅਨੇਕਰਸਬ੍ਯਞ੍ਜਨਨ੍ਤਿ ਅਞ੍ਞੇਹਿਪਿ ਕਾਮੇਤਬ੍ਬਕਾਮੇਹਿ ਸਮਨ੍ਨਾਗਤਾ ਅਨੇਕਰਸਬ੍ਯਞ੍ਜਨਂ ਭਤ੍ਤਂ ਭੁਞ੍ਜਾਮੀਤਿ ਯੋਜਨਾ.

੧੧੦. ਚੋਲ਼ਸ੍ਸਾਤਿ ਦੇਯ੍ਯਧਮ੍ਮਸੀਸੇਨ ਤਬ੍ਬਿਸਯਂ ਦਾਨਮਯਂ ਪੁਞ੍ਞਮੇਵ ਦਸ੍ਸੇਤਿ. ਵਿਪਾਕਂ ਪਸ੍ਸ ਯਾਦਿਸਨ੍ਤਿ ਤਸ੍ਸ ਚੋਲ਼ਦਾਨਸ੍ਸ ਵਿਪਾਕਸਙ੍ਖਾਤਂ ਫਲਂ ਪਸ੍ਸ, ਭਨ੍ਤੇ. ਤਂ ਪਨ ਯਾਦਿਸਂ ਯਥਾਰੂਪਂ, ਕਿਨ੍ਤਿ ਚੇਤਿ ਆਹ ‘‘ਯਾਵਤਾ ਨਨ੍ਦਰਾਜਸ੍ਸਾ’’ਤਿਆਦਿ.

ਤਤ੍ਥ ਕੋਯਂ ਨਨ੍ਦਰਾਜਾ ਨਾਮ? ਅਤੀਤੇ ਕਿਰ ਦਸਵਸ੍ਸਸਹਸ੍ਸਾਯੁਕੇਸੁ ਮਨੁਸ੍ਸੇਸੁ ਬਾਰਾਣਸਿਵਾਸੀ ਏਕੋ ਕੁਟੁਮ੍ਬਿਕੋ ਅਰਞ੍ਞੇ ਜਙ੍ਘਾਵਿਹਾਰਂ ਵਿਚਰਨ੍ਤੋ ਅਰਞ੍ਞਟ੍ਠਾਨੇ ਅਞ੍ਞਤਰਂ ਪਚ੍ਚੇਕਬੁਦ੍ਧਂ ਅਦ੍ਦਸ. ਸੋ ਪਚ੍ਚੇਕਬੁਦ੍ਧੋ ਤਤ੍ਥ ਚੀਵਰਕਮ੍ਮਂ ਕਰੋਨ੍ਤੋ ਅਨੁਵਾਤੇ ਅਪ੍ਪਹੋਨ੍ਤੇ ਸਂਹਰਿਤ੍ਵਾਵ ਠਪੇਤੁਂ ਆਰਦ੍ਧੋ. ਸੋ ਕੁਟੁਮ੍ਬਿਕੋ ਤਂ ਦਿਸ੍ਵਾ, ‘‘ਭਨ੍ਤੇ, ਕਿਂ ਕਰੋਥਾ’’ਤਿ ਵਤ੍ਵਾ ਤੇਨ ਅਪ੍ਪਿਚ੍ਛਤਾਯ ਕਿਞ੍ਚਿ ਅਵੁਤ੍ਤੇਪਿ ‘‘ਚੀਵਰਦੁਸ੍ਸਂ ਨਪ੍ਪਹੋਤੀ’’ਤਿ ਞਤ੍ਵਾ ਅਤ੍ਤਨੋ ਉਤ੍ਤਰਾਸਙ੍ਗਂ ਪਚ੍ਚੇਕਬੁਦ੍ਧਸ੍ਸ ਪਾਦਮੂਲੇ ਠਪੇਤ੍ਵਾ ਅਗਮਾਸਿ. ਪਚ੍ਚੇਕਬੁਦ੍ਧੋ ਤਂ ਗਹੇਤ੍ਵਾ ਅਨੁਵਾਤਂ ਆਰੋਪੇਨ੍ਤੋ ਚੀਵਰਂ ਕਤ੍ਵਾ ਪਾਰੁਪਿ. ਸੋ ਕੁਟੁਮ੍ਬਿਕਾ ਜੀਵਿਤਪਰਿਯੋਸਾਨੇ ਕਾਲਂ ਕਤ੍ਵਾ ਤਾਵਤਿਂਸਭਵਨੇ ਨਿਬ੍ਬਤ੍ਤਿਤ੍ਵਾ ਤਤ੍ਥ ਯਾਵਤਾਯੁਕਂ ਦਿਬ੍ਬਸਮ੍ਪਤ੍ਤਿਂ ਅਨੁਭਵਿਤ੍ਵਾ ਤਤੋ ਚਵਿਤ੍ਵਾ ਬਾਰਾਣਸਿਤੋ ਯੋਜਨਮਤ੍ਤੇ ਠਾਨੇ ਅਞ੍ਞਤਰਸ੍ਮਿਂ ਗਾਮੇ ਅਮਚ੍ਚਕੁਲੇ ਨਿਬ੍ਬਤ੍ਤਿ.

ਤਸ੍ਸ ਵਯਪ੍ਪਤ੍ਤਕਾਲੇ ਤਸ੍ਮਿਂ ਗਾਮੇ ਨਕ੍ਖਤ੍ਤਂ ਸਙ੍ਘੁਟ੍ਠਂ ਅਹੋਸਿ. ਸੋ ਮਾਤਰਂ ਆਹ – ‘‘ਅਮ੍ਮ, ਸਾਟਕਂ ਮੇ ਦੇਹਿ, ਨਕ੍ਖਤ੍ਤਂ ਕੀਲ਼ਿਸ੍ਸਾਮੀ’’ਤਿ. ਸਾ ਸੁਧੋਤਵਤ੍ਥਂ ਨੀਹਰਿਤ੍ਵਾ ਅਦਾਸਿ. ‘‘ਅਮ੍ਮ, ਥੂਲਂ ਇਦ’’ਨ੍ਤਿ. ਅਞ੍ਞਂ ਨੀਹਰਿਤ੍ਵਾ ਅਦਾਸਿ, ਤਮ੍ਪਿ ਪਟਿਕ੍ਖਿਪਿ. ਅਥ ਨਂ ਮਾਤਾ ਆਹ – ‘‘ਤਾਤ, ਯਾਦਿਸੇ ਗੇਹੇ ਮਯਂ ਜਾਤਾ, ਨਤ੍ਥਿ ਨੋ ਇਤੋ ਸੁਖੁਮਤਰਸ੍ਸ ਵਤ੍ਥਸ੍ਸ ਪਟਿਲਾਭਾਯ ਪੁਞ੍ਞ’’ਨ੍ਤਿ. ‘‘ਲਭਨਟ੍ਠਾਨਂ ਗਚ੍ਛਾਮਿ, ਅਮ੍ਮਾ’’ਤਿ. ‘‘ਗਚ੍ਛ, ਪੁਤ੍ਤ, ਅਹਂ ਅਜ੍ਜੇਵ ਤੁਯ੍ਹਂ ਬਾਰਾਣਸਿਨਗਰੇ ਰਜ੍ਜਪਟਿਲਾਭਂ ਇਚ੍ਛਾਮੀ’’ਤਿ. ਸੋ ‘‘ਸਾਧੁ, ਅਮ੍ਮਾ’’ਤਿ ਮਾਤਰਂ ਵਨ੍ਦਿਤ੍ਵਾ ਪਦਕ੍ਖਿਣਂ ਕਤ੍ਵਾ ਆਹ – ‘‘ਗਚ੍ਛਾਮਿ, ਅਮ੍ਮਾ’’ਤਿ. ‘‘ਗਚ੍ਛ, ਤਾਤਾ’’ਤਿ. ਏਵਂ ਕਿਰਸ੍ਸਾ ਚਿਤ੍ਤਂ ਅਹੋਸਿ – ‘‘ਕਹਂ ਗਮਿਸ੍ਸਤਿ, ਇਧ ਵਾ ਏਤ੍ਥ ਵਾ ਗੇਹੇ ਨਿਸੀਦਿਸ੍ਸਤੀ’’ਤਿ. ਸੋ ਪਨ ਪੁਞ੍ਞਨਿਯਾਮੇਨ ਚੋਦਿਯਮਾਨੋ ਗਾਮਤੋ ਨਿਕ੍ਖਮਿਤ੍ਵਾ ਬਾਰਾਣਸਿਂ ਗਨ੍ਤ੍ਵਾ ਮਙ੍ਗਲਸਿਲਾਪਟ੍ਟੇ ਸਸੀਸਂ ਪਾਰੁਪਿਤ੍ਵਾ ਨਿਪਜ੍ਜਿ. ਸੋ ਚ ਬਾਰਾਣਸਿਰਞ੍ਞੋ ਕਾਲਕਤਸ੍ਸ ਸਤ੍ਤਮੋ ਦਿਵਸੋ ਹੋਤਿ.

ਅਮਚ੍ਚਾ ਚ ਪੁਰੋਹਿਤੋ ਚ ਰਞ੍ਞੋ ਸਰੀਰਕਿਚ੍ਚਂ ਕਤ੍ਵਾ ਰਾਜਙ੍ਗਣੇ ਨਿਸੀਦਿਤ੍ਵਾ ਮਨ੍ਤਯਿਂਸੁ – ‘‘ਰਞ੍ਞੋ ਏਕਾ ਧੀਤਾ ਅਤ੍ਥਿ, ਪੁਤ੍ਤੋ ਨਤ੍ਥਿ, ਅਰਾਜਕਂ ਰਜ੍ਜਂ ਨ ਤਿਟ੍ਠਤਿ, ਫੁਸ੍ਸਰਥਂ ਵਿਸ੍ਸਜ੍ਜੇਮਾ’’ਤਿ. ਤੇ ਕੁਮੁਦਵਣ੍ਣੇ ਚਤ੍ਤਾਰੋ ਸਿਨ੍ਧਵੇ ਯੋਜੇਤ੍ਵਾ ਸੇਤਚ੍ਛਤ੍ਤਪ੍ਪਮੁਖਂ ਪਞ੍ਚਵਿਧਂ ਰਾਜਕਕੁਧਭਣ੍ਡਂ ਰਥਸ੍ਮਿਂਯੇਵ ਠਪੇਤ੍ਵਾ ਰਥਂ ਵਿਸ੍ਸਜ੍ਜੇਤ੍ਵਾ ਪਚ੍ਛਤੋ ਤੂਰਿਯਾਨਿ ਪਗ੍ਗਣ੍ਹਾਪੇਸੁਂ. ਰਥੋ ਪਾਚੀਨਦ੍ਵਾਰੇਨ ਨਿਕ੍ਖਮਿਤ੍ਵਾ ਉਯ੍ਯਾਨਾਭਿਮੁਕ੍ਖੋ ਅਹੋਸਿ. ‘‘ਪਰਿਚਯੇਨ ਉਯ੍ਯਾਨਾਭਿਮੁਖੋ ਗਚ੍ਛਤਿ, ਨਿਵਤ੍ਤੇਮਾ’’ਤਿ ਕੇਚਿ ਆਹਂਸੁ. ਪੁਰੋਹਿਤੋ ‘‘ਮਾ ਨਿਵਤ੍ਤਯਿਤ੍ਥਾ’’ਤਿ ਆਹ. ਰਥੋ ਕੁਮਾਰਂ ਪਦਕ੍ਖਿਣਂ ਕਤ੍ਵਾ ਆਰੋਹਨਸਜ੍ਜੋ ਹੁਤ੍ਵਾ ਅਟ੍ਠਾਸਿ, ਪੁਰੋਹਿਤੋ ਪਾਰੁਪਨਕਣ੍ਣਂ ਅਪਨੇਤ੍ਵਾ ਪਾਦਤਲਾਨਿ ਓਲੋਕੇਨ੍ਤੋ ‘‘ਤਿਟ੍ਠਤੁ ਅਯਂ ਦੀਪੋ, ਦ੍ਵਿਸਹਸ੍ਸਦੀਪਪਰਿਵਾਰੇਸੁ ਚਤੂਸੁ ਮਹਾਦੀਪੇਸੁ ਏਕਰਜ੍ਜਂ ਕਾਰੇਤੁਂ ਯੁਤ੍ਤੋ’’ਤਿ ਵਤ੍ਵਾ ‘‘ਤੂਰਿਯਾਨਿ ਪਗ੍ਗਣ੍ਹਥ, ਪੁਨਪਿ ਪਗ੍ਗਣ੍ਹਥਾ’’ਤਿ ਤਿਕ੍ਖਤ੍ਤੁਂ ਤੂਰਿਯਾਨਿ ਪਗ੍ਗਣ੍ਹਾਪੇਸਿ.

ਅਥ ਕੁਮਾਰੋ ਮੁਖਂ ਵਿਵਰਿਤ੍ਵਾ ਓਲੋਕੇਤ੍ਵਾ ‘‘ਕੇਨ ਕਮ੍ਮੇਨ ਆਗਤਤ੍ਥ, ਤਾਤਾ’’ਤਿ ਆਹ. ‘‘ਦੇਵ, ਤੁਮ੍ਹਾਕਂ ਰਜ੍ਜਂ ਪਾਪੁਣਾਤੀ’’ਤਿ. ‘‘ਤੁਮ੍ਹਾਕਂ ਰਾਜਾ ਕਹ’’ਨ੍ਤਿ? ‘‘ਦਿਵਙ੍ਗਤੋ, ਸਾਮੀ’’ਤਿ. ‘‘ਕਤਿ ਦਿਵਸਾ ਅਤਿਕ੍ਕਨ੍ਤਾ’’ਤਿ? ‘‘ਅਜ੍ਜ ਸਤ੍ਤਮੋ ਦਿਵਸੋ’’ਤਿ. ‘‘ਪੁਤ੍ਤੋ ਵਾ ਧੀਤਾ ਵਾ ਨਤ੍ਥੀ’’ਤਿ? ‘‘ਧੀਤਾ ਅਤ੍ਥਿ, ਦੇਵ, ਪੁਤ੍ਤੋ ਨਤ੍ਥੀ’’ਤਿ. ‘‘ਤੇਨ ਹਿ ਕਰਿਸ੍ਸਾਮਿ ਰਜ੍ਜ’’ਨ੍ਤਿ. ਤੇ ਤਾਵਦੇਵ ਅਭਿਸੇਕਮਣ੍ਡਪਂ ਕਤ੍ਵਾ ਰਾਜਧੀਤਰਂ ਸਬ੍ਬਾਲਙ੍ਕਾਰੇਹਿ ਅਲਙ੍ਕਰਿਤ੍ਵਾ ਉਯ੍ਯਾਨਂ ਆਨੇਤ੍ਵਾ ਕੁਮਾਰਸ੍ਸ ਅਭਿਸੇਕਂ ਅਕਂਸੁ.

ਅਥਸ੍ਸ ਕਤਾਭਿਸੇਕਸ੍ਸ ਸਤਸਹਸ੍ਸਗ੍ਘਨਿਕਂ ਵਤ੍ਥਂ ਉਪਨੇਸੁਂ. ਸੋ ‘‘ਕਿਮਿਦਂ, ਤਾਤਾ’’ਤਿ ਆਹ. ‘‘ਨਿਵਾਸਨਵਤ੍ਥਂ, ਦੇਵਾ’’ਤਿ. ‘‘ਨਨੁ, ਤਾਤਾ, ਥੂਲ’’ਨ੍ਤਿ? ‘‘ਮਨੁਸ੍ਸਾਨਂ ਪਰਿਭੋਗਵਤ੍ਥੇਸੁ ਇਤੋ ਸੁਖੁਮਤਰਂ ਨਤ੍ਥਿ, ਦੇਵਾ’’ਤਿ. ‘‘ਤੁਮ੍ਹਾਕਂ ਰਾਜਾ ਏਵਰੂਪਂ ਨਿਵਾਸੇਸੀ’’ਤਿ? ‘‘ਆਮ, ਦੇਵਾ’’ਤਿ. ‘‘ਨ ਮਞ੍ਞੇ ਪੁਞ੍ਞਵਾ ਤੁਮ੍ਹਾਕਂ ਰਾਜਾ (ਅ. ਨਿ. ਅਟ੍ਠ. ੧.੧.੧੯੧) ਸੁਵਣ੍ਣਭਿਙ੍ਕਾਰਂ ਆਹਰਥ, ਲਭਿਸ੍ਸਾਮਿ ਵਤ੍ਥ’’ਨ੍ਤਿ. ਸੁਵਣ੍ਣਭਿਙ੍ਕਾਰਂ ਆਹਰਿਂਸੁ. ਸੋ ਉਟ੍ਠਾਯ ਹਤ੍ਥੇ ਧੋਵਿਤ੍ਵਾ ਮੁਖਂ ਵਿਕ੍ਖਾਲੇਤ੍ਵਾ ਹਤ੍ਥੇਨ ਉਦਕਂ ਆਦਾਯ ਪੁਰਤ੍ਥਿਮਦਿਸਾਯਂ ਅਬ੍ਭੁਕ੍ਕਿਰਿ. ਤਦਾ ਘਨਪਥਵਿਂ ਭਿਨ੍ਦਿਤ੍ਵਾ ਅਟ੍ਠ ਕਪ੍ਪਰੁਕ੍ਖਾ ਉਟ੍ਠਹਿਂਸੁ. ਪੁਨ ਉਦਕਂ ਗਹੇਤ੍ਵਾ ਦਕ੍ਖਿਣਾਯ ਪਚ੍ਛਿਮਾਯ ਉਤ੍ਤਰਾਯਾਤਿ ਏਵਂ ਚਤੂਸੁ ਦਿਸਾਸੁ ਅਬ੍ਭੁਕ੍ਕਿਰਿ. ਸਬ੍ਬਦਿਸਾਸੁ ਅਟ੍ਠ ਅਟ੍ਠ ਕਤ੍ਵਾ ਦ੍ਵਤ੍ਤਿਂਸ ਕਪ੍ਪਰੁਕ੍ਖਾ ਉਟ੍ਠਹਿਂਸੁ. ਏਕੇਕਾਯ ਦਿਸਾਯ ਸੋਲ਼ਸ ਸੋਲ਼ਸ ਕਤ੍ਵਾ ਚਤੁਸਟ੍ਠਿ ਕਮ੍ਮਰੁਕ੍ਖਾਤਿ ਕੇਚਿ ਵਦਨ੍ਤਿ. ਸੋ ਏਕਂ ਦਿਬ੍ਬਦੁਸ੍ਸਂ ਨਿਵਾਸੇਤ੍ਵਾ ਏਕਂ ਪਾਰੁਪਿਤ੍ਵਾ ‘‘ਨਨ੍ਦਰਞ੍ਞੋ ਵਿਜਿਤੇ ਸੁਤ੍ਤਕਨ੍ਤਿਕਾ ਇਤ੍ਥਿਯੋ ਮਾ ਸੁਤ੍ਤਂ ਕਨ੍ਤਿਂਸੂਤਿ ਭੇਰਿਂ ਚਰਾਪੇਥਾ’’ਤਿ ਵਤ੍ਵਾ ਛਤ੍ਤਂ ਉਸ੍ਸਾਪੇਤ੍ਵਾ ਅਲਙ੍ਕਤਪਟਿਯਤ੍ਤੋ ਹਤ੍ਥਿਕ੍ਖਨ੍ਧਵਰਗਤੋ ਨਗਰਂ ਪਵਿਸਿਤ੍ਵਾ ਪਾਸਾਦਂ ਆਰੁਯ੍ਹ ਮਹਾਸਮ੍ਪਤ੍ਤਿਂ ਅਨੁਭਵਿ.

ਏਵਂ ਗਚ੍ਛਨ੍ਤੇ ਕਾਲੇ ਏਕਦਿਵਸਂ ਦੇਵੀ ਰਞ੍ਞੋ ਸਮ੍ਪਤ੍ਤਿਂ ਦਿਸ੍ਵਾ ‘‘ਅਹੋ ਤਪਸ੍ਸੀ’’ਤਿ ਕਾਰੁਞ੍ਞਾਕਾਰਂ ਦਸ੍ਸੇਸਿ. ‘‘ਕਿਮਿਦਂ, ਦੇਵੀ’’ਤਿ ਚ ਪੁਟ੍ਠਾ ‘‘ਅਤਿਮਹਤੀ ਤੇ, ਦੇਵ, ਸਮ੍ਪਤ੍ਤਿ. ਅਤੀਤੇ ਅਦ੍ਧਨਿ ਕਲ੍ਯਾਣਂ ਅਕਤ੍ਥ, ਇਦਾਨਿ ਅਨਾਗਤਸ੍ਸ ਅਤ੍ਥਾਯ ਕੁਸਲਂ ਨ ਕਰੋਥਾ’’ਤਿ ਆਹ. ‘‘ਕਸ੍ਸ ਦੇਮ? ਸੀਲਵਨ੍ਤੋ ਨਤ੍ਥੀ’’ਤਿ. ‘‘ਅਸੁਞ੍ਞੋ, ਦੇਵ, ਜਮ੍ਬੁਦੀਪੋ ਅਰਹਨ੍ਤੇਹਿ, ਤੁਮ੍ਹੇ ਦਾਨਮੇਵ ਸਜ੍ਜੇਥ, ਅਹਂ ਅਰਹਨ੍ਤੇ ਲਚ੍ਛਾਮੀ’’ਤਿ ਆਹ. ਪੁਨਦਿਵਸੇ ਰਾਜਾ ਮਹਾਰਹਂ ਦਾਨਂ ਸਜ੍ਜਾਪੇਸਿ. ਦੇਵੀ ‘‘ਸਚੇ ਇਮਿਸ੍ਸਾਯ ਦਿਸਾਯ ਅਰਹਨ੍ਤੋ ਅਤ੍ਥਿ, ਇਧਾਗਨ੍ਤ੍ਵਾ ਅਮ੍ਹਾਕਂ ਭਿਕ੍ਖਂ ਗਣ੍ਹਨ੍ਤੂ’’ਤਿ ਅਧਿਟ੍ਠਹਿਤ੍ਵਾ ਉਤ੍ਤਰਦਿਸਾਭਿਮੁਖਾ ਉਰੇਨ ਨਿਪਜ੍ਜਿ. ਨਿਪਨ੍ਨਮਤ੍ਤਾਯ ਏਵ ਦੇਵਿਯਾ ਹਿਮਵਨ੍ਤੇ ਵਸਨ੍ਤਾਨਂ ਪਦੁਮਵਤਿਯਾ ਪੁਤ੍ਤਾਨਂ ਪਞ੍ਚਸਤਾਨਂ ਪਚ੍ਚੇਕਬੁਦ੍ਧਾਨਂ ਜੇਟ੍ਠਕੋ ਮਹਾਪਦੁਮਪਚ੍ਚੇਕਬੁਦ੍ਧੋ ਭਾਤਿਕੇ ਆਮਨ੍ਤੇਸਿ – ‘‘ਮਾਰਿਸਾ ਨਨ੍ਦਰਾਜਾ ਤੁਮ੍ਹੇ ਨਿਮਨ੍ਤੇਤਿ, ਅਧਿਵਾਸੇਥ ਤਸ੍ਸਾ’’ਤਿ. ਤੇ ਅਧਿਵਾਸੇਤ੍ਵਾ ਤਾਵਦੇਵ ਆਕਾਸੇਨਾਗਨ੍ਤ੍ਵਾ ਉਤ੍ਤਰਦ੍ਵਾਰੇ ਓਤਰਿਂਸੁ. ਮਨੁਸ੍ਸਾ ‘‘ਪਞ੍ਚਸਤਾ, ਦੇਵ, ਪਚ੍ਚੇਕਬੁਦ੍ਧਾ ਆਗਤਾ’’ਤਿ ਰਞ੍ਞੋ ਆਰੋਚੇਸੁਂ. ਰਾਜਾ ਸਦ੍ਧਿਂ ਦੇਵਿਯਾ ਆਗਨ੍ਤ੍ਵਾ ਵਨ੍ਦਿਤ੍ਵਾ ਪਤ੍ਤਂ ਗਹੇਤ੍ਵਾ ਪਚ੍ਚੇਕਬੁਦ੍ਧੇ ਪਾਸਾਦਂ ਆਰੋਪੇਤ੍ਵਾ ਤਤ੍ਥ ਤੇਸਂ ਦਾਨਂ ਦਤ੍ਵਾ ਭਤ੍ਤਕਿਚ੍ਚਾਵਸਾਨੇ ਰਾਜਾ ਸਙ੍ਘਤ੍ਥੇਰਸ੍ਸ, ਦੇਵੀ ਸਙ੍ਘਨਵਕਸ੍ਸ ਪਾਦਮੂਲੇ ਨਿਪਜ੍ਜਿਤ੍ਵਾ ‘‘ਅਯ੍ਯਾ, ਪਚ੍ਚਯੇਹਿ ਨ ਕਿਲਮਿਸ੍ਸਨ੍ਤਿ, ਮਯਂ ਪੁਞ੍ਞੇਨ ਨ ਹਾਯਿਸ੍ਸਾਮ, ਅਮ੍ਹਾਕਂ ਇਧ ਨਿਵਾਸਾਯ ਪਟਿਞ੍ਞਂ ਦੇਥਾ’’ਤਿ ਪਟਿਞ੍ਞਂ ਕਾਰੇਤ੍ਵਾ ਉਯ੍ਯਾਨੇ ਨਿਵਾਸਟ੍ਠਾਨਾਨਿ ਕਾਰੇਤ੍ਵਾ ਯਾਵਜੀਵਂ ਪਚ੍ਚੇਕਬੁਦ੍ਧੇ ਉਪਟ੍ਠਹਿਤ੍ਵਾ ਤੇਸੁ ਪਰਿਨਿਬ੍ਬੁਤੇਸੁ ਸਾਧੁਕੀਲ਼ਿਤਂ ਕਾਰੇਤ੍ਵਾ ਗਨ੍ਧਦਾਰੁਆਦੀਹਿ ਸਰੀਰਕਿਚ੍ਚਂ ਕਾਰੇਤ੍ਵਾ ਧਾਤੁਯੋ ਗਹੇਤ੍ਵਾ ਚੇਤਿਯਂ ਪਤਿਟ੍ਠਾਪੇਤ੍ਵਾ ‘‘ਏਵਰੂਪਾਨਮ੍ਪਿ ਨਾਮ ਮਹਾਨੁਭਾਵਾਨਂ ਮਹੇਸੀਨਂ ਮਰਣਂ ਭਵਿਸ੍ਸਤਿ, ਕਿਮਙ੍ਗਂ ਪਨ ਮਾਦਿਸਾਨ’’ਨ੍ਤਿ ਸਂਵੇਗਜਾਤੋ ਜੇਟ੍ਠਪੁਤ੍ਤਂ ਰਜ੍ਜੇ ਪਤਿਟ੍ਠਾਪੇਤ੍ਵਾ ਸਯਂ ਤਾਪਸਪਬ੍ਬਜ੍ਜਂ ਪਬ੍ਬਜਿ. ਦੇਵੀਪਿ ‘‘ਰਞ੍ਞੇ ਪਬ੍ਬਜਿਤੇ ਅਹਂ ਕਿਂ ਕਰਿਸ੍ਸਾਮੀ’’ਤਿ ਪਬ੍ਬਜਿ. ਦ੍ਵੇਪਿ ਉਯ੍ਯਾਨੇ ਵਸਨ੍ਤਾ ਝਾਨਾਨਿ ਨਿਬ੍ਬਤ੍ਤੇਤ੍ਵਾ ਝਾਨਸੁਖੇਨ ਵੀਤਿਨਾਮੇਤ੍ਵਾ ਆਯੁਪਰਿਯੋਸਾਨੇ ਬ੍ਰਹ੍ਮਲੋਕੇ ਨਿਬ੍ਬਤ੍ਤਿਂਸੁ. ਸੋ ਕਿਰ ਨਨ੍ਦਰਾਜਾ ਅਮ੍ਹਾਕਂ ਸਤ੍ਥੁ ਮਹਾਸਾਵਕੋ ਮਹਾਕਸ੍ਸਪਤ੍ਥੇਰੋ ਅਹੋਸੀ, ਤਸ੍ਸ ਅਗ੍ਗਮਹੇਸੀ ਭਦ੍ਦਾ ਕਾਪਿਲਾਨੀ ਨਾਮ.

ਅਯਂ ਪਨ ਨਨ੍ਦਰਾਜਾ ਦਸ ਵਸ੍ਸਸਹਸ੍ਸਾਨਿ ਸਯਂ ਦਿਬ੍ਬਵਤ੍ਥਾਨਿ ਪਰਿਦਹਨ੍ਤੋ ਸਬ੍ਬਮੇਵ ਅਤ੍ਤਨੋ ਵਿਜਿਤਂ ਉਤ੍ਤਰਕੁਰੁਸਦਿਸਂ ਕਰੋਨ੍ਤੋ ਆਗਤਾਗਤਾਨਂ ਮਨੁਸ੍ਸਾਨਂ ਦਿਬ੍ਬਦੁਸ੍ਸਾਨਿ ਅਦਾਸਿ. ਤਯਿਦਂ ਦਿਬ੍ਬਵਤ੍ਥਸਮਿਦ੍ਧਿਂ ਸਨ੍ਧਾਯ ਸਾ ਪੇਤੀ ਆਹ ‘‘ਯਾਵਤਾ ਨਨ੍ਦਰਾਜਸ੍ਸ, ਵਿਜਿਤਸ੍ਮਿਂ ਪਟਿਚ੍ਛਦਾ’’ਤਿ. ਤਤ੍ਥ ਵਿਜਿਤਸ੍ਮਿਨ੍ਤਿ ਰਟ੍ਠੇ. ਪਟਿਚ੍ਛਦਾਤਿ ਵਤ੍ਥਾਨਿ. ਤਾਨਿ ਹਿ ਪਟਿਚ੍ਛਾਦੇਨ੍ਤਿ ਏਤੇਹੀਤਿ ‘‘ਪਟਿਚ੍ਛਦਾ’’ਤਿ ਵੁਚ੍ਚਨ੍ਤਿ.

੧੧੧. ਇਦਾਨਿ ਸਾ ਪੇਤੀ ‘‘ਨਨ੍ਦਰਾਜਸਮਿਦ੍ਧਿਤੋਪਿ ਏਤਰਹਿ ਮਯ੍ਹਂ ਸਮਿਦ੍ਧਿ ਵਿਪੁਲਤਰਾ’’ਤਿ ਦਸ੍ਸੇਨ੍ਤੀ ‘‘ਤਤੋ ਬਹੁਤਰਾ, ਭਨ੍ਤੇ, ਵਤ੍ਥਾਨਚ੍ਛਾਦਨਾਨਿ ਮੇ’’ਤਿਆਦਿਮਾਹ. ਤਤ੍ਥ ਤਤੋਤਿ ਨਨ੍ਦਰਾਜਸ੍ਸ ਪਰਿਗ੍ਗਹਭੂਤਵਤ੍ਥਤੋਪਿ ਬਹੁਤਰਾਨਿ ਮਯ੍ਹਂ ਵਤ੍ਥਚ੍ਛਾਦਨਾਨੀਤਿ ਅਤ੍ਥੋ. ਵਤ੍ਥਾਨਚ੍ਛਾਦਨਾਨੀਤਿ ਨਿਵਾਸਨਵਤ੍ਥਾਨਿ ਚੇਵ ਪਾਰੁਪਨਵਤ੍ਥਾਨਿ ਚ. ਕੋਸੇਯ੍ਯਕਮ੍ਬਲੀਯਾਨੀਤਿ ਕੋਸੇਯ੍ਯਾਨਿ ਚੇਵ ਕਮ੍ਬਲਾਨਿ ਚ. ਖੋਮਕਪ੍ਪਾਸਿਕਾਨੀਤਿ ਖੋਮਵਤ੍ਥਾਨਿ ਚੇਵ ਕਪ੍ਪਾਸਮਯਵਤ੍ਥਾਨਿ ਚ.

੧੧੨. ਵਿਪੁਲਾਤਿ ਆਯਾਮਤੋ ਚ ਵਿਤ੍ਥਾਰਤੋ ਚ ਵਿਪੁਲਾ. ਮਹਗ੍ਘਾਤਿ ਮਹਗ੍ਘਵਸੇਨ ਮਹਨ੍ਤਾ ਮਹਾਰਹਾ. ਆਕਾਸੇਵਲਮ੍ਬਰੇਤਿ ਆਕਾਸੇਯੇਵ ਓਲਮ੍ਬਮਾਨਾ ਤਿਟ੍ਠਨ੍ਤਿ. ਯਂ ਯਞ੍ਹਿ ਮਨਸੋ ਪਿਯਨ੍ਤਿ ਯਂ ਯਂ ਮਯ੍ਹਂ ਮਨਸੋ ਪਿਯਂ, ਤਂ ਤਂ ਗਹੇਤ੍ਵਾ ਪਰਿਦਹਾਮਿ ਪਾਰੁਪਾਮਿ ਚਾਤਿ ਯੋਜਨਾ.

੧੧੩. ਥਾਲਕਸ੍ਸ ਚ ਪਾਨੀਯਂ, ਵਿਪਾਕਂ ਪਸ੍ਸ ਯਾਦਿਸਨ੍ਤਿ ਥਾਲਕਪੂਰਣਮਤ੍ਤਂ ਪਾਨੀਯਂ ਦਿਨ੍ਨਂ ਅਨੁਮੋਦਿਤਂ, ਤਸ੍ਸ ਪਨ ਵਿਪਾਕਂ ਯਾਦਿਸਂ ਯਾਵ ਮਹਨ੍ਤਂ ਪਸ੍ਸਾਤਿ ਦਸ੍ਸੇਨ੍ਤੀ ‘‘ਗਮ੍ਭੀਰਾ ਚਤੁਰਸ੍ਸਾ ਚਾ’’ਤਿਆਦਿਮਾਹ. ਤਤ੍ਥ ਗਮ੍ਭੀਰਾਤਿ ਅਗਾਧਾ. ਚਤੁਰਸ੍ਸਾਤਿ ਚਤੁਰਸ੍ਸਸਣ੍ਠਾਨਾ. ਪੋਕ੍ਖਰਞ੍ਞੋਤਿ ਪੋਕ੍ਖਰਣਿਯੋ. ਸੁਨਿਮ੍ਮਿਤਾਤਿ ਕਮ੍ਮਾਨੁਭਾਵੇਨੇਵ ਸੁਟ੍ਠੁ ਨਿਮ੍ਮਿਤਾ.

੧੧੪. ਸੇਤੋਦਕਾਤਿ ਸੇਤਉਦਕਾ ਸੇਤਵਾਲੁਕਸਮ੍ਪਰਿਕਿਣ੍ਣਾ. ਸੁਪ੍ਪਤਿਤ੍ਥਾਤਿ ਸੁਨ੍ਦਰਤਿਤ੍ਥਾ. ਸੀਤਾਤਿ ਸੀਤਲੋਦਕਾ. ਅਪ੍ਪਟਿਗਨ੍ਧਿਯਾਤਿ ਪਟਿਕੂਲਗਨ੍ਧਰਹਿਤਾ ਸੁਰਭਿਗਨ੍ਧਾ. ਵਾਰਿਕਿਞ੍ਜਕ੍ਖਪੂਰਿਤਾਤਿ ਕਮਲਕੁਵਲਯਾਦੀਨਂ ਕੇਸਰਸਞ੍ਛਨ੍ਨੇਨ ਵਾਰਿਨਾ ਪਰਿਪੁਣ੍ਣਾ.

੧੧੫. ਸਾਹਨ੍ਤਿ ਸਾ ਅਹਂ. ਰਮਾਮੀਤਿ ਰਤਿਂ ਵਿਨ੍ਦਾਮਿ. ਕੀਲ਼ਾਮੀਤਿ ਇਨ੍ਦ੍ਰਿਯਾਨਿ ਪਰਿਚਾਰੇਮਿ. ਮੋਦਾਮੀਤਿ ਭੋਗਸਮ੍ਪਤ੍ਤਿਯਾ ਪਮੁਦਿਤਾ ਹੋਮਿ. ਅਕੁਤੋਭਯਾਤਿ ਕੁਤੋਚਿਪਿ ਅਸਞ੍ਜਾਤਭਯਾ, ਸੇਰੀ ਸੁਖਵਿਹਾਰਿਨੀ ਹੋਮਿ. ਭਨ੍ਤੇ, ਵਨ੍ਦਿਤੁਮਾਗਤਾਤਿ, ਭਨ੍ਤੇ, ਇਮਿਸ੍ਸਾ ਦਿਬ੍ਬਸਮ੍ਪਤ੍ਤਿਯਾ ਪਟਿਲਾਭਸ੍ਸ ਕਾਰਣਭੂਤਂ ਤ੍ਵਂ ਵਨ੍ਦਿਤੁਂ ਆਗਤਾ ਉਪਗਤਾਤਿ ਅਤ੍ਥੋ. ਯਂ ਪਨੇਤ੍ਥ ਅਤ੍ਥਤੋ ਅਵਿਭਤ੍ਤਂ, ਤਂ ਤਤ੍ਥ ਤਤ੍ਥ ਵੁਤ੍ਤਮੇਵ.

ਏਵਂ ਤਾਯ ਪੇਤਿਯਾ ਵੁਤ੍ਤੇ ਆਯਸ੍ਮਾ ਸਾਰਿਪੁਤ੍ਤੋ ਇਟ੍ਠਕਵਤਿਯਂ ਦੀਘਰਾਜਿਯਨ੍ਤਿ ਗਾਮਦ੍ਵਯਵਾਸਿਕੇਸੁ ਅਤ੍ਤਨੋ ਸਨ੍ਤਿਕਂ ਉਪਗਤੇਸੁ ਮਨੁਸ੍ਸੇਸੁ ਇਮਮਤ੍ਥਂ ਵਿਤ੍ਥਾਰਤੋ ਕਥੇਨ੍ਤੋ ਸਂਵੇਜੇਤ੍ਵਾ ਸਂਸਾਰਮੋਚਨਪਾਪਕਮ੍ਮਤੋ ਮੋਚੇਤ੍ਵਾ ਉਪਾਸਕਭਾਵੇ ਪਤਿਟ੍ਠਾਪੇਸਿ. ਸਾ ਪਵਤ੍ਤਿ ਭਿਕ੍ਖੂਸੁ ਪਾਕਟਾ ਜਾਤਾ. ਤਂ ਭਿਕ੍ਖੂ ਭਗਵਤੋ ਆਰੋਚੇਸੁਂ. ਭਗਵਾ ਤਮਤ੍ਥਂ ਅਟ੍ਠੁਪ੍ਪਤ੍ਤਿਂ ਕਤ੍ਵਾ ਸਮ੍ਪਤ੍ਤਪਰਿਸਾਯ ਧਮ੍ਮਂ ਦੇਸੇਸਿ, ਸਾ ਦੇਸਨਾ ਮਹਾਜਨਸ੍ਸ ਸਾਤ੍ਥਿਕਾ ਅਹੋਸੀਤਿ.

ਸਂਸਾਰਮੋਚਕਪੇਤਿਵਤ੍ਥੁਵਣ੍ਣਨਾ ਨਿਟ੍ਠਿਤਾ.

੨. ਸਾਰਿਪੁਤ੍ਤਤ੍ਥੇਰਮਾਤੁਪੇਤਿਵਤ੍ਥੁਵਣ੍ਣਨਾ

ਨਗ੍ਗਾ ਦੁਬ੍ਬਣ੍ਣਰੂਪਾਸੀਤਿ ਇਦਂ ਸਤ੍ਥਰਿ ਵੇਲ਼ੁਵਨੇ ਵਿਹਰਨ੍ਤੇ ਆਯਸ੍ਮਤੋ ਸਾਰਿਪੁਤ੍ਤਤ੍ਥੇਰਸ੍ਸ ਇਤੋ ਪਞ੍ਚਮਾਯ ਜਾਤਿਯਾ ਮਾਤੁਭੂਤਂ ਪੇਤਿਂ ਆਰਬ੍ਭ ਵੁਤ੍ਤਂ. ਏਕਦਿਵਸਂ ਆਯਸ੍ਮਾ ਚ ਸਾਰਿਪੁਤ੍ਤੋ ਆਯਸ੍ਮਾ ਚ ਮਹਾਮੋਗ੍ਗਲ੍ਲਾਨੋ ਆਯਸ੍ਮਾ ਚ ਅਨੁਰੁਦ੍ਧੋ ਆਯਸ੍ਮਾ ਚ ਕਪ੍ਪਿਨੋ ਰਾਜਗਹਸ੍ਸ ਅਵਿਦੂਰੇ ਅਞ੍ਞਤਰਸ੍ਮਿਂ ਅਰਞ੍ਞਾਯਤਨੇ ਵਿਹਰਨ੍ਤਿ. ਤੇਨ ਚ ਸਮਯੇਨ ਬਾਰਾਣਸਿਯਂ ਅਞ੍ਞਤਰੋ ਬ੍ਰਾਹ੍ਮਣੋ ਅਡ੍ਢੋ ਮਹਦ੍ਧਨੋ ਮਹਾਭੋਗੋ ਸਮਣਬ੍ਰਾਹ੍ਮਣਕਪਣਦ੍ਧਿਕਵਨਿਬ੍ਬਕਯਾਚਕਾਨਂ ਓਪਾਨਭੂਤੋ ਅਨ੍ਨਪਾਨਵਤ੍ਥਸਯਨਾਦੀਨਿ ਦੇਤਿ. ਦੇਨ੍ਤੋ ਚ ਆਗਤਾਗਤਾਨਂ ਯਥਾਕਾਲਂ ਯਥਾਰਹਞ੍ਚ ਪਾਦੋਦਕਪਾਦਬ੍ਭਞ੍ਜਨਾਦਿਦਾਨਾਨੁਪੁਬ੍ਬਕਂ ਸਬ੍ਬਾਭਿਦੇਯ੍ਯਂ ਪਟਿਪਨ੍ਨੋ ਹੋਤਿ, ਪੁਰੇਭਤ੍ਤਂ ਭਿਕ੍ਖੂ ਅਨ੍ਨਪਾਨਾਦਿਨਾ ਸਕ੍ਕਚ੍ਚਂ ਪਰਿਵਿਸਤਿ. ਸੋ ਦੇਸਨ੍ਤਰਂ ਗਚ੍ਛਨ੍ਤੋ ਭਰਿਯਂ ਆਹ – ‘‘ਭੋਤਿ, ਯਥਾਪਞ੍ਞਤ੍ਤਂ ਇਮਂ ਦਾਨਵਿਧਿਂ ਅਪਰਿਹਾਪੇਨ੍ਤੀ ਸਕ੍ਕਚ੍ਚਂ ਅਨੁਪਤਿਟ੍ਠਾਹੀ’’ਤਿ. ਸਾ ‘‘ਸਾਧੂ’’ਤਿ ਪਟਿਸ੍ਸੁਣਿਤ੍ਵਾ ਤਸ੍ਮਿਂ ਪਕ੍ਕਨ੍ਤੇ ਏਵ ਤਾਵ ਭਿਕ੍ਖੂਨਂ ਪਞ੍ਞਤ੍ਤਂ ਦਾਨਵਿਧਿਂ ਪਚ੍ਛਿਨ੍ਦਿ, ਅਦ੍ਧਿਕਾਨਂ ਪਨ ਨਿਵਾਸਤ੍ਥਾਯ ਉਪਗਤਾਨਂ ਗੇਹਪਿਟ੍ਠਿਤੋ ਛਡ੍ਡਿਤਂ ਜਰਸਾਲਂ ਦਸ੍ਸੇਸਿ ‘‘ਏਤ੍ਥ ਵਸਥਾ’’ਤਿ. ਅਨ੍ਨਪਾਨਾਦੀਨਂ ਅਤ੍ਥਾਯ ਤਤ੍ਥ ਅਦ੍ਧਿਕੇਸੁ ਆਗਤੇਸੁ ‘‘ਗੂਥਂ ਖਾਦਥ, ਮੁਤ੍ਤਂ ਪਿਵਥ, ਲੋਹਿਤਂ ਪਿਵਥ, ਤੁਮ੍ਹਾਕਂ ਮਾਤੁ ਮਤ੍ਥਲੁਙ੍ਗਂ ਖਾਦਥਾ’’ਤਿ ਯਂ ਯਂ ਅਸੁਚਿ ਜੇਗੁਚ੍ਛਂ, ਤਸ੍ਸ ਤਸ੍ਸ ਨਾਮਂ ਗਹੇਤ੍ਵਾ ਨਿਟ੍ਠੁਰਂ ਵਦਤਿ.

ਸਾ ਅਪਰੇਨ ਸਮਯੇਨ ਕਾਲਂ ਕਤ੍ਵਾ ਕਮ੍ਮਾਨੁਭਾਵੁਕ੍ਖਿਤ੍ਤਾ ਪੇਤਯੋਨਿਯਂ ਨਿਬ੍ਬਤ੍ਤਿਤ੍ਵਾ ਅਤ੍ਤਨੋ ਵਚੀਦੁਚ੍ਚਰਿਤਾਨੁਰੂਪਂ ਦੁਕ੍ਖਂ ਅਨੁਭਵਨ੍ਤੀ ਪੁਰਿਮਜਾਤਿਸਮ੍ਬਨ੍ਧਂ ਅਨੁਸ੍ਸਰਿਤ੍ਵਾ ਆਯਸ੍ਮਤੋ ਸਾਰਿਪੁਤ੍ਤਸ੍ਸ ਸਨ੍ਤਿਕਂ ਉਪਸਙ੍ਕਮਿਤੁਕਾਮਾ ਤਸ੍ਸ ਵਿਹਾਰਦ੍ਵਾਰਂ ਸਮ੍ਪਾਪੁਣਿ, ਤਸ੍ਸ ਵਿਹਾਰਦ੍ਵਾਰਦੇਵਤਾਯੋ ਵਿਹਾਰਪ੍ਪਵੇਸਨਂ ਨਿਵਾਰੇਸੁਂ. ਸਾ ਕਿਰ ਇਤੋ ਪਞ੍ਚਮਾਯ ਜਾਤਿਯਾ ਥੇਰਸ੍ਸ ਮਾਤੁਭੂਤਪੁਬ੍ਬਾ, ਤਸ੍ਮਾ ਏਵਮਾਹ – ‘‘ਅਹਂ ਅਯ੍ਯਸ੍ਸ ਸਾਰਿਪੁਤ੍ਤਤ੍ਥੇਰਸ੍ਸ ਇਤੋ ਪਞ੍ਚਮਾਯ ਜਾਤੀਯਾ ਮਾਤਾ, ਦੇਥ ਮੇ ਦ੍ਵਾਰਪ੍ਪਵੇਸਨਂ ਥੇਰਂ ਦਟ੍ਠੁ’’ਨ੍ਤਿ. ਤਂ ਸੁਤ੍ਵਾ ਦੇਵਤਾ ਤਸ੍ਸਾ ਪਵੇਸਨਂ ਅਨੁਜਾਨਿਂਸੁ. ਸਾ ਪਵਿਸਿਤ੍ਵਾ ਚਙ੍ਕਮਨਕੋਟਿਯਂ ਠਤ੍ਵਾ ਥੇਰਸ੍ਸ ਅਤ੍ਤਾਨਂ ਦਸ੍ਸੇਸਿ. ਥੇਰੋ ਤਂ ਦਿਸ੍ਵਾ ਕਰੁਣਾਯ ਸਞ੍ਚੋਦਿਤਮਾਨਸੋ ਹੁਤ੍ਵਾ –

੧੧੬. ‘‘ਨਗ੍ਗਾ ਦੁਬ੍ਬਣ੍ਣਰੂਪਾਸਿ, ਕਿਸਾ ਧਮਨਿਸਨ੍ਥਤਾ;

ਉਪ੍ਫਾਸੁਲਿਕੇ ਕਿਸਿਕੇ, ਕਾ ਨੁ ਤ੍ਵਂ ਇਧ ਤਿਟ੍ਠਸੀ’’ਤਿ. –

ਗਾਥਾਯ ਪੁਚ੍ਛਿ. ਸਾ ਥੇਰੇਨ ਪੁਟ੍ਠਾ ਪਟਿਵਚਨਂ ਦੇਨ੍ਤੀ –

੧੧੭. ‘‘ਅਹਂ ਤੇ ਸਕਿਯਾ ਮਾਤਾ, ਪੁਬ੍ਬੇ ਅਞ੍ਞਾਸੁ ਜਾਤੀਸੁ;

ਉਪਪਨ੍ਨਾ ਪੇਤ੍ਤਿਵਿਸਯਂ, ਖੁਪ੍ਪਿਪਾਸਸਮਪ੍ਪਿਤਾ.

੧੧੮. ‘‘ਛਡ੍ਡਿਤਂ ਖਿਪਿਤਂ ਖੇਲ਼ਂ, ਸਿਙ੍ਘਾਣਿਕਂ ਸਿਲੇਸੁਮਂ;

ਵਸਞ੍ਚ ਡਯ੍ਹਮਾਨਾਨਂ, ਵਿਜਾਤਾਨਞ੍ਚ ਲੋਹਿਤਂ.

੧੧੯. ‘‘ਵਣਿਕਾਨਞ੍ਚ ਯਂ ਘਾਨ-ਸੀਸਚ੍ਛਿਨ੍ਨਾਨ ਲੋਹਿਤਂ;

ਖੁਦਾਪਰੇਤਾ ਭੁਞ੍ਜਾਮਿ, ਇਚ੍ਛਿਪੁਰਿਸਨਿਸ੍ਸਿਤਂ.

੧੨੦. ‘‘ਪੁਬ੍ਬਲੋਹਿਤਂ ਭਕ੍ਖਾਮਿ, ਪਸੂਨਂ ਮਾਨੁਸਾਨ ਚ;

ਅਲੇਣਾ ਅਨਗਾਰਾ ਚ, ਨੀਲਮਞ੍ਚਪਰਾਯਣਾ.

੧੨੧. ‘‘ਦੇਹਿ ਪੁਤ੍ਤਕ ਮੇ ਦਾਨਂ, ਦਤ੍ਵਾ ਅਨ੍ਵਾਦਿਸਾਹਿ ਮੇ;

ਅਪ੍ਪੇਵ ਨਾਮ ਮੁਚ੍ਚੇਯ੍ਯਂ, ਪੁਬ੍ਬਲੋਹਿਤਭੋਜਨਾ’’ਤਿ. – ਪਞ੍ਚਗਾਥਾ ਅਭਾਸਿ;

੧੧੭. ਤਤ੍ਥ ਅਹਂ ਤੇ ਸਕਿਯਾ ਮਾਤਾਤਿ ਅਹਂ ਤੁਯ੍ਹਂ ਜਨਨਿਭਾਵਤੋ ਸਕਿਯਾ ਮਾਤਾ. ਪੁਬ੍ਬੇ ਅਞ੍ਞਾਸੁ ਜਾਤੀਸੂਤਿ ਮਾਤਾ ਹੋਨ੍ਤੀਪਿ ਨ ਇਮਿਸ੍ਸਂ ਜਾਤਿਯਂ, ਅਥ ਖੋ ਪੁਬ੍ਬੇ ਅਞ੍ਞਾਸੁ ਜਾਤੀਸੁ, ਇਤੋ ਪਞ੍ਚਮਿਯਨ੍ਤਿ ਦਟ੍ਠਬ੍ਬਂ. ਉਪਪਨ੍ਨਾ ਪੇਤ੍ਤਿਵਿਸਯਨ੍ਤਿ ਪਟਿਸਨ੍ਧਿਵਸੇਨ ਪੇਤਲੋਕਂ ਉਪਗਤਾ. ਖੁਪ੍ਪਿਪਾਸਸਮਪ੍ਪਿਤਾਤਿ ਖੁਦਾਯ ਚ ਪਿਪਾਸਾਯ ਚ ਅਭਿਭੂਤਾ, ਨਿਰਨ੍ਤਰਂ ਜਿਘਚ੍ਛਾਪਿਪਾਸਾਹਿ ਅਭਿਭੁਯ੍ਯਮਾਨਾਤਿ ਅਤ੍ਥੋ.

੧੧੮-੧੧੯. ਛਡ੍ਡਿਤਨ੍ਤਿ ਉਚ੍ਛਿਟ੍ਠਕਂ, ਵਨ੍ਤਨ੍ਤਿ ਅਤ੍ਥੋ. ਖਿਪਿਤਨ੍ਤਿ ਖਿਪਿਤੇਨ ਸਦ੍ਧਿਂ ਮੁਖਤੋ ਨਿਕ੍ਖਨ੍ਤਮਲਂ. ਖੇਲ਼ਨ੍ਤਿ ਨਿਟ੍ਠੁਭਂ. ਸਿਙ੍ਘਾਣਿਕਨ੍ਤਿ ਮਤ੍ਥਲੁਙ੍ਗਤੋ ਵਿਸ੍ਸਨ੍ਦਿਤ੍ਵਾ ਨਾਸਿਕਾਯ ਨਿਕ੍ਖਨ੍ਤਮਲਂ. ਸਿਲੇਸੁਮਨ੍ਤਿ ਸੇਮ੍ਹਂ. ਵਸਞ੍ਚ ਡਯ੍ਹਮਾਨਾਨਨ੍ਤਿ ਚਿਤਕਸ੍ਮਿਂ ਡਯ੍ਹਮਾਨਾਨਂ ਕਲ਼ੇਵਰਾਨਂ ਵਸਾਤੇਲਞ੍ਚ. ਵਿਜਾਤਾਨਞ੍ਚ ਲੋਹਿਤਨ੍ਤਿ ਪਸੂਤਾਨਂ ਇਤ੍ਥੀਨਂ ਲੋਹਿਤਂ, ਗਬ੍ਭਮਲਂ ਚ-ਸਦ੍ਦੇਨ ਸਙ੍ਗਣ੍ਹਾਤਿ. ਵਣਿਕਾਨਨ੍ਤਿ ਸਞ੍ਜਾਤਵਣਾਨਂ. ਯਨ੍ਤਿ ਯਂ ਲੋਹਿਤਨ੍ਤਿ ਸਮ੍ਬਨ੍ਧੋ. ਘਾਨਸੀਸਚ੍ਛਿਨ੍ਨਾਨਨ੍ਤਿ ਘਾਨਚ੍ਛਿਨ੍ਨਾਨਂ ਸੀਸਚ੍ਛਿਨ੍ਨਾਨਞ੍ਚ ਯਂ ਲੋਹਿਤਂ, ਤਂ ਭੁਞ੍ਜਾਮੀਤਿ ਯੋਜਨਾ. ਦੇਸਨਾਸੀਸਮੇਤਂ ‘‘ਘਾਨਸੀਸਚ੍ਛਿਨ੍ਨਾਨ’’ਨ੍ਤਿ, ਯਸ੍ਮਾ ਹਤ੍ਥਪਾਦਾਦਿਚ੍ਛਿਨ੍ਨਾਨਮ੍ਪਿ ਲੋਹਿਤਂ ਭੁਞ੍ਜਾਮਿਯੇਵ. ਤਥਾ ‘‘ਵਣਿਕਾਨ’’ਨ੍ਤਿ ਇਮਿਨਾ ਤੇਸਮ੍ਪਿ ਲੋਹਿਤਂ ਸਙ੍ਗਹਿਤਨ੍ਤਿ ਦਟ੍ਠਬ੍ਬਂ. ਖੁਦਾਪਰੇਤਾਤਿ ਜਿਘਚ੍ਛਾਭਿਭੂਤਾ ਹੁਤ੍ਵਾ. ਇਤ੍ਥਿਪੁਰਿਸਨਿਸ੍ਸਿਤਨ੍ਤਿ ਇਤ੍ਥਿਪੁਰਿਸਸਰੀਰਨਿਸ੍ਸਿਤਂ ਯਥਾਵੁਤ੍ਤਂ ਅਞ੍ਞਞ੍ਚ ਚਮ੍ਮਮਂਸਨ੍ਹਾਰੁਪੁਬ੍ਬਾਦਿਕਂ ਪਰਿਭੁਞ੍ਜਾਮੀਤਿ ਦਸ੍ਸੇਤਿ.

੧੨੦-੧੨੧. ਪਸੂਨਨ੍ਤਿ ਅਜਗੋਮਹਿਂਸਾਦੀਨਂ. ਅਲੇਣਾਤਿ ਅਸਰਣਾ. ਅਨਗਾਰਾਤਿ ਅਨਾਵਾਸਾ. ਨੀਲਮਞ੍ਚਪਰਾਯਣਾਤਿ ਸੁਸਾਨੇ ਛਡ੍ਡਿਤਮਲਮਞ੍ਚਸਯਨਾ. ਅਥ ਵਾ ਨੀਲਾਤਿ ਛਾਰਿਕਙ੍ਗਾਰਬਹੁਲਾ ਸੁਸਾਨਭੂਮਿ ਅਧਿਪ੍ਪੇਤਾ, ਤਂਯੇਵ ਮਞ੍ਚਂ ਵਿਯ ਅਧਿਸਯਨਾਤਿ ਅਤ੍ਥੋ. ਅਨ੍ਵਾਦਿਸਾਹਿ ਮੇਤਿ ਯਥਾ ਦਿਨ੍ਨਂ ਦਕ੍ਖਿਣਂ ਮਯ੍ਹਂ ਉਪਕਪ੍ਪਤਿ, ਤਥਾ ਉਦ੍ਦਿਸ ਪਤ੍ਤਿਦਾਨਂ ਦੇਹਿ. ਅਪ੍ਪੇਵ ਨਾਮ ਮੁਚ੍ਚੇਯ੍ਯਂ, ਪੁਬ੍ਬਲੋਹਿਤਭੋਜਨਾਤਿ ਤਵ ਉਦ੍ਦਿਸਨੇਨ ਏਤਸ੍ਮਾ ਪੁਬ੍ਬਲੋਹਿਤਭੋਜਨਾ ਪੇਤਜੀਵਿਕਾ ਅਪਿ ਨਾਮ ਮੁਚ੍ਚੇਯ੍ਯਂ.

ਤਂ ਸੁਤ੍ਵਾ ਆਯਸ੍ਮਾ ਸਾਰਿਪੁਤ੍ਤਤ੍ਥੇਰੋ ਦੁਤਿਯਦਿਵਸੇ ਮਹਾਮੋਗ੍ਗਲ੍ਲਾਨਤ੍ਥੇਰਾਦਿਕੇ ਤਯੋ ਥੇਰੇ ਆਮਨ੍ਤੇਤ੍ਵਾ ਤੇਹਿ ਸਦ੍ਧਿਂ ਰਾਜਗਹੇ ਪਿਣ੍ਡਾਯ ਚਰਨ੍ਤੋ ਰਞ੍ਞੋ ਬਿਮ੍ਬਿਸਾਰਸ੍ਸ ਨਿਵੇਸਨਂ ਅਗਮਾਸਿ. ਰਾਜਾ ਥੇਰੇ ਦਿਸ੍ਵਾ ਵਨ੍ਦਿਤ੍ਵਾ ‘‘ਕਿਂ, ਭਨ੍ਤੇ, ਆਗਤਤ੍ਥਾ’’ਤਿ ਆਗਮਨਕਾਰਣਂ ਪੁਚ੍ਛਿ. ਆਯਸ੍ਮਾ ਮਹਾਮੋਗ੍ਗਲ੍ਲਾਨੋ ਤਂ ਪਵਤ੍ਤਿਂ ਰਞ੍ਞੋ ਆਰੋਚੇਸਿ. ਰਾਜਾ ‘‘ਅਞ੍ਞਾਤਂ, ਭਨ੍ਤੇ’’ਤਿ ਵਤ੍ਵਾ ਥੇਰੇ ਵਿਸ੍ਸਜ੍ਜੇਤ੍ਵਾ ਸਬ੍ਬਕਮ੍ਮਿਕਂ ਅਮਚ੍ਚਂ ਪਕ੍ਕੋਸਾਪੇਤ੍ਵਾ ਆਣਾਪੇਸਿ ‘‘ਨਗਰਸ੍ਸ ਅਵਿਦੂਰੇ ਵਿਵਿਤ੍ਤੇ ਛਾਯੂਦਕਸਮ੍ਪਨ੍ਨੇ ਠਾਨੇ ਚਤਸ੍ਸੋ ਕੁਟਿਯੋ ਕਾਰੇਹੀ’’ਤਿ. ਅਨ੍ਤੇਪੁਰੇ ਚ ਪਹੋਨਕਵਿਸੇਸਵਸੇਨ ਤਿਧਾ ਵਿਭਜਿਤ੍ਵਾ ਚਤਸ੍ਸੋ ਕੁਟਿਯੋ ਪਟਿਚ੍ਛਾਪੇਸਿ, ਸਯਞ੍ਚ ਤਤ੍ਥ ਗਨ੍ਤ੍ਵਾ ਕਾਤਬ੍ਬਯੁਤ੍ਤਕਂ ਅਕਾਸਿ. ਨਿਟ੍ਠਿਤਾਸੁ ਕੁਟਿਕਾਸੁ ਸਬ੍ਬਂ ਬਲਿਕਰਣਂ ਸਜ੍ਜਾਪੇਤ੍ਵਾ ਅਨ੍ਨਪਾਨਵਤ੍ਥਾਦੀਨਿ ਬੁਦ੍ਧਪ੍ਪਮੁਖਸ੍ਸ ਚਾਤੁਦ੍ਦਿਸਸ੍ਸ ਭਿਕ੍ਖੁਸਙ੍ਘਸ੍ਸ ਅਨੁਚ੍ਛਵਿਕੇ ਸਬ੍ਬਪਰਿਕ੍ਖਾਰੇ ਚ ਉਪਟ੍ਠਾਪੇਤ੍ਵਾ ਆਯਸ੍ਮਤੋ ਸਾਰਿਪੁਤ੍ਤਤ੍ਥੇਰਸ੍ਸ ਤਂ ਸਬ੍ਬਂ ਨਿਯ੍ਯਾਦੇਸਿ. ਅਥ ਥੇਰੋ ਤਂ ਪੇਤਿਂ ਉਦ੍ਦਿਸ੍ਸ ਤਂ ਸਬ੍ਬਂ ਬੁਦ੍ਧਪ੍ਪਮੁਖਸ੍ਸ ਚਾਤੁਦ੍ਦਿਸਸ੍ਸ ਭਿਕ੍ਖੁਸਙ੍ਘਸ੍ਸ ਅਦਾਸਿ. ਸਾ ਪੇਤੀ ਤਂ ਅਨੁਮੋਦਿਤ੍ਵਾ ਦੇਵਲੋਕੇ ਨਿਬ੍ਬਤ੍ਤਿਤ੍ਵਾ ਸਬ੍ਬਕਾਮਸਮਿਦ੍ਧਾ ਚ ਹੁਤ੍ਵਾ ਅਪਰਦਿਵਸੇ ਆਯਸ੍ਮਤੋ ਮਹਾਮੋਗ੍ਗਲ੍ਲਾਨਤ੍ਥੇਰਸ੍ਸ ਸਨ੍ਤਿਕਂ ਉਪਗਨ੍ਤ੍ਵਾ ਵਨ੍ਦਿਤ੍ਵਾ ਅਟ੍ਠਾਸਿ. ਤਂ ਥੇਰੋ ਪਟਿਪੁਚ੍ਛਿ, ਸਾ ਅਤ੍ਤਨੋ ਪੇਤੂਪਪਤ੍ਤਿਂ ਪੁਨ ਦੇਵੂਪਪਤ੍ਤਿਞ੍ਚ ਵਿਤ੍ਥਾਰਤੋ ਕਥੇਸਿ. ਤੇਨ ਵੁਤ੍ਤਂ –

੧੨੨. ‘‘ਮਾਤੁਯਾ ਵਚਨਂ ਸੁਤ੍ਵਾ, ਉਪਤਿਸ੍ਸੋਨੁਕਮ੍ਪਕੋ;

ਆਮਨ੍ਤਯਿ ਮੋਗ੍ਗਲ੍ਲਾਨਂ, ਅਨੁਰੁਦ੍ਧਞ੍ਚ ਕਪ੍ਪਿਨਂ.

੧੨੩. ‘‘ਚਤਸ੍ਸੋ ਕੁਟਿਯੋ ਕਤ੍ਵਾ, ਸਙ੍ਘੇ ਚਾਤੁਦ੍ਦਿਸੇ ਅਦਾ;

ਕੁਟਿਯੋ ਅਨ੍ਨਪਾਨਞ੍ਚ, ਮਾਤੁ ਦਕ੍ਖਿਣਮਾਦਿਸੀ.

੧੨੪. ‘‘ਸਮਨਨ੍ਤਰਾਨੁਦ੍ਦਿਟ੍ਠੇ, ਵਿਪਾਕੋ ਉਦਪਜ੍ਜਥ;

ਭੋਜਨਂ ਪਾਨੀਯਂ ਵਤ੍ਥਂ, ਦਕ੍ਖਿਣਾਯ ਇਦਂ ਫਲਂ.

੧੨੫. ‘‘ਤਤੋ ਸੁਦ੍ਧਾ ਸੁਚਿਵਸਨਾ, ਕਾਸਿਕੁਤ੍ਤਮਧਾਰਿਨੀ;

ਵਿਚਿਤ੍ਤਵਤ੍ਥਾਭਰਣਾ, ਕੋਲਿਕਂ ਉਪਸਙ੍ਕਮੀ’’ਤਿ.

੧੨੩. ਤਤ੍ਥ ਸਙ੍ਘੇ ਚਾਤੁਦ੍ਦਿਸੇ ਅਦਾਤਿ ਚਾਤੁਦ੍ਦਿਸਸ੍ਸ ਸਙ੍ਘਸ੍ਸ ਅਦਾਸਿ, ਨਿਯ੍ਯਾਦੇਸੀਤਿ ਅਤ੍ਥੋ. ਸੇਸਂ ਵੁਤ੍ਤਤ੍ਥਮੇਵ.

ਅਥਾਯਸ੍ਮਾ ਮਹਾਮੋਗ੍ਗਲ੍ਲਾਨੋ ਤਂ ਪੇਤਿਂ –

੧੨੬. ‘‘ਅਭਿਕ੍ਕਨ੍ਤੇਨ ਵਣ੍ਣੇਨ, ਯਾ ਤ੍ਵਂ ਤਿਟ੍ਠਸਿ ਦੇਵਤੇ;

ਓਭਾਸੇਨ੍ਤੀ ਦਿਸਾ ਸਬ੍ਬਾ, ਓਸਧੀ ਵਿਯ ਤਾਰਕਾ.

੧੨੭. ‘‘ਕੇਨ ਤੇਤਾਦਿਸੋ ਵਣ੍ਣੋ, ਤੇਨ ਤੇ ਇਧ ਮਿਜ੍ਝਤਿ;

ਉਪ੍ਪਜ੍ਜਨ੍ਤਿ ਚ ਤੇ ਭੋਗਾ, ਯੇ ਕੇਚਿ ਮਨਸੋ ਪਿਯਾ.

੧੨੮. ‘‘ਪੁਚ੍ਛਾਮਿ ਤਂ ਦੇਵਿ ਮਹਾਨੁਭਾਵੇ, ਮਨੁਸ੍ਸਭੂਤਾ ਕਿਮਕਾਸਿ ਪੁਞ੍ਞਂ;

ਕੇਨਾਸਿ ਏਵਂ ਜਲਿਤਾਨੁਭਾਵਾ,

ਵਣ੍ਣੋ ਚ ਤੇ ਸਬ੍ਬਦਿਸਾ ਪਭਾਸਤੀ’’ਤਿ. – ਪੁਚ੍ਛਿ;

੧੨੯-੧੩੩. ਅਥ ਸਾ ‘‘ਸਾਰਿਪੁਤ੍ਤਸ੍ਸਾਹਂ ਮਾਤਾ’’ਤਿਆਦਿਨਾ ਵਿਸ੍ਸਜ੍ਜੇਸਿ. ਸੇਸਂ ਵੁਤ੍ਤਤ੍ਥਮੇਵ. ਅਥਾਯਸ੍ਮਾ ਮਹਾਮੋਗ੍ਗਲ੍ਲਾਨੋ ਤਂ ਪਵਤ੍ਤਿਂ ਭਗਵਤੋ ਆਰੋਚੇਸਿ. ਭਗਵਾ ਤਮਤ੍ਥਂ ਅਟ੍ਠੁਪ੍ਪਤ੍ਤਿਂ ਕਤ੍ਵਾ ਸਮ੍ਪਤ੍ਤਪਰਿਸਾਯ ਧਮ੍ਮਂ ਦੇਸੇਸਿ, ਸਾ ਦੇਸਨਾ ਮਹਾਜਨਸ੍ਸ ਸਾਤ੍ਥਿਕਾ ਅਹੋਸੀਤਿ.

ਸਾਰਿਪੁਤ੍ਤਤ੍ਥੇਰਮਾਤੁਪੇਤਿਵਤ੍ਥੁਵਣ੍ਣਨਾ ਨਿਟ੍ਠਿਤਾ.

੩. ਮਤ੍ਤਾਪੇਤਿਵਤ੍ਥੁਵਣ੍ਣਨਾ

ਨਗ੍ਗਾ ਦੁਬ੍ਬਣ੍ਣਰੂਪਾਸੀਤਿ ਇਦਂ ਸਤ੍ਥਰਿ ਜੇਤਵਨੇ ਵਿਹਰਨ੍ਤੇ ਮਤ੍ਤਂ ਨਾਮ ਪੇਤਿਂ ਆਰਬ੍ਭ ਵੁਤ੍ਤਂ. ਸਾਵਤ੍ਥਿਯਂ ਕਿਰ ਅਞ੍ਞਤਰੋ ਕੁਟੁਮ੍ਬਿਕੋ ਸਦ੍ਧੋ ਪਸਨ੍ਨੋ ਅਹੋਸਿ. ਤਸ੍ਸ ਭਰਿਯਾ ਅਸ੍ਸਦ੍ਧਾ ਅਪ੍ਪਸਨ੍ਨਾ ਕੋਧਨਾ ਵਞ੍ਝਾ ਚ ਅਹੋਸਿ ਨਾਮੇਨ ਮਤ੍ਤਾ ਨਾਮ. ਅਥ ਸੋ ਕੁਟੁਮ੍ਬਿਕੋ ਕੁਲਵਂਸੂਪਚ੍ਛੇਦਨਭਯੇਨ ਸਦਿਸਕੁਲਤੋ ਤਿਸ੍ਸਂ ਨਾਮ ਅਞ੍ਞਂ ਕਞ੍ਞਂ ਆਨੇਸਿ. ਸਾ ਅਹੋਸਿ ਸਦ੍ਧਾ ਪਸਨ੍ਨਾ ਸਾਮਿਨੋ ਚ ਪਿਯਾ ਮਨਾਪਾ, ਸਾ ਨਚਿਰਸ੍ਸੇਵ ਗਬ੍ਭਿਨੀ ਹੁਤ੍ਵਾ ਦਸਮਾਸਚ੍ਚਯੇਨ ਪੁਤ੍ਤਂ ਵਿਜਾਯਿ, ‘‘ਭੂਤੋ’’ਤਿਸ੍ਸ ਨਾਮਂ ਅਹੋਸਿ. ਸਾ ਗੇਹਸ੍ਸਾਮਿਨੀ ਹੁਤ੍ਵਾ ਚਤ੍ਤਾਰੋ ਭਿਕ੍ਖੂ ਸਕ੍ਕਚ੍ਚਂ ਉਪਟ੍ਠਹਿ, ਵਞ੍ਝਾ ਪਨ ਤਂ ਉਸੂਯਤਿ.

ਤਾ ਉਭੋਪਿ ਏਕਸ੍ਮਿਂ ਦਿਵਸੇ ਸੀਸਂ ਨ੍ਹਤ੍ਵਾ ਅਲ੍ਲਕੇਸਾ ਅਟ੍ਠਂਸੁ, ਕੁਟੁਮ੍ਬਿਕੋ ਗੁਣਵਸੇਨ ਤਿਸ੍ਸਾਯ ਆਬਦ੍ਧਸਿਨੇਹੋ ਮਨੁਞ੍ਞੇਨ ਹਦਯੇਨ ਤਾਯ ਸਦ੍ਧਿਂ ਬਹੁਂ ਸਲ੍ਲਪਨ੍ਤੋ ਅਟ੍ਠਾਸਿ. ਤਂ ਅਸਹਮਾਨਾ ਮਤ੍ਤਾ ਇਸ੍ਸਾਪਕਤਾ ਗੇਹੇ ਸਮ੍ਮਜ੍ਜਿਤ੍ਵਾ ਠਪਿਤਂ ਸਙ੍ਕਾਰਂ ਤਿਸ੍ਸਾਯ ਮਤ੍ਥਕੇ ਓਕਿਰਿ. ਸਾ ਅਪਰੇਨ ਸਮਯੇਨ ਕਾਲਂ ਕਤ੍ਵਾ ਪੇਤਯੋਨਿਯਂ ਨਿਬ੍ਬਤ੍ਤਿਤ੍ਵਾ ਅਤ੍ਤਨੋ ਕਮ੍ਮਬਲੇਨ ਪਞ੍ਚਵਿਧਂ ਦੁਕ੍ਖਂ ਅਨੁਭਵਤਿ. ਤਂ ਪਨ ਦੁਕ੍ਖਂ ਪਾਲ਼ਿਤੋ ਏਵ ਵਿਞ੍ਞਾਯਤਿ. ਅਥੇਕਦਿਵਸਂ ਸਾ ਪੇਤੀ ਸਞ੍ਝਾਯ ਵੀਤਿਵਤ੍ਤਾਯ ਗੇਹਸ੍ਸ ਪਿਟ੍ਠਿਪਸ੍ਸੇ ਨ੍ਹਾਯਨ੍ਤਿਯਾ ਤਿਸ੍ਸਾਯ ਅਤ੍ਤਾਨਂ ਦਸ੍ਸੇਸਿ. ਤਂ ਦਿਸ੍ਵਾ ਤਿਸ੍ਸਾ –

੧੩੪. ‘‘ਨਗ੍ਗਾ ਦੁਬ੍ਬਣ੍ਣਰੂਪਾਸਿ, ਕਿਸਾ ਧਮਨਿਸਨ੍ਥਤਾ;

ਉਪ੍ਫਾਸੁਲਿਕੇ ਕਿਸਿਕੇ, ਕਾ ਨੁ ਤ੍ਵਂ ਇਧ ਤਿਟ੍ਠਸੀ’’ਤਿ. –

ਗਾਥਾਯ ਪਟਿਪੁਚ੍ਛਿ. ਇਤਰਾ –

੧੩੫. ‘‘ਅਹਂ ਮਤ੍ਤਾ ਤੁਵਂ ਤਿਸ੍ਸਾ, ਸਪਤ੍ਤੀ ਤੇ ਪੁਰੇ ਅਹੁਂ;

ਪਾਪਕਮ੍ਮਂ ਕਰਿਤ੍ਵਾਨ, ਪੇਤਲੋਕਂ ਇਤੋ ਗਤਾ’’ਤਿ. –

ਗਾਥਾਯ ਪਟਿਵਚਨਂ ਅਦਾਸਿ. ਤਤ੍ਥ ਅਹਂ ਮਤ੍ਤਾ ਤੁਵਂ ਤਿਸ੍ਸਾਤਿ ਅਹਂ ਮਤ੍ਤਾ ਨਾਮ, ਤੁਵਂ ਤਿਸ੍ਸਾ ਨਾਮ. ਪੁਰੇਤਿ ਪੁਰਿਮਤ੍ਤਭਾਵੇ. ਤੇਤਿ ਤੁਯ੍ਹਂ ਸਪਤ੍ਤੀ ਅਹੁਂ, ਅਹੋਸਿਨ੍ਤਿ ਅਤ੍ਥੋ. ਪੁਨ ਤਿਸ੍ਸਾ –

੧੩੬. ‘‘ਕਿਂ ਨੁ ਕਾਯੇਨ ਵਾਚਾਯ, ਮਨਸਾ ਦੁਕ੍ਕਟਂ ਕਤਂ;

ਕਿਸ੍ਸਕਮ੍ਮਵਿਪਾਕੇਨ, ਪੇਤਲੋਕਂ ਇਤੋ ਗਤਾ’’ਤਿ. –

ਗਾਥਾਯ ਕਤਕਮ੍ਮਂ ਪੁਚ੍ਛਿ. ਪੁਨ ਇਤਰਾ –

੧੩੭. ‘‘ਚਣ੍ਡੀ ਚ ਫਰੁਸਾ ਚਾਸਿਂ, ਇਸ੍ਸੁਕੀ ਮਚ੍ਛਰੀ ਸਠਾ;

ਤਾਹਂ ਦੁਰੁਤ੍ਤਂ ਵਤ੍ਵਾਨ, ਪੇਤਲੋਕਂ ਇਤੋ ਗਤਾ’’ਤਿ. –

ਗਾਥਾਯ ਅਤ੍ਤਨਾ ਕਤਕਮ੍ਮਂ ਆਚਿਕ੍ਖਿ. ਤਤ੍ਥ ਚਣ੍ਡੀਤਿ ਕੋਧਨਾ. ਫਰੁਸਾਤਿ ਫਰੁਸਵਚਨਾ. ਆਸਿਨ੍ਤਿ ਅਹੋਸਿਂ. ਤਾਹਨ੍ਤਿ ਤਂ ਅਹਂ. ਦੁਰੁਤ੍ਤਨ੍ਤਿ ਦੁਬ੍ਭਾਸਿਤਂ ਨਿਰਤ੍ਥਕਵਚਨਂ. ਇਤੋ ਪਰਮ੍ਪਿ ਤਾਸਂ ਵਚਨਪਟਿਵਚਨਵਸੇਨੇਵ ਗਾਥਾ ਪਵਤ੍ਤਾ –

੧੩੮. ‘‘ਸਬ੍ਬਂ ਅਹਮ੍ਪਿ ਜਾਨਾਮਿ, ਯਥਾ ਤ੍ਵਂ ਚਣ੍ਡਿਕਾ ਅਹੁ;

ਅਞ੍ਞਞ੍ਚ ਖੋ ਤਂ ਪੁਚ੍ਛਾਮਿ, ਕੇਨਾਸਿ ਪਂਸੁਕੁਨ੍ਥਿਤਾ.

੧੩੯. ‘‘ਸੀਸਂਨ੍ਹਾਤਾ ਤੁਵਂ ਆਸਿ, ਸੁਚਿਵਤ੍ਥਾ ਅਲਙ੍ਕਤਾ;

ਅਹਞ੍ਚ ਖੋ ਅਧਿਮਤ੍ਤਂ, ਸਮਲਙ੍ਕਤਤਰਾ ਤਯਾ.

੧੪੦. ‘‘ਤਸ੍ਸਾ ਮੇ ਪੇਕ੍ਖਮਾਨਾਯ, ਸਾਮਿਕੇਨ ਸਮਨ੍ਤਯਿ;

ਤਤੋ ਮੇ ਇਸ੍ਸਾ ਵਿਪੁਲਾ, ਕੋਧੋ ਮੇ ਸਮਜਾਯਥ.

੧੪੧. ‘‘ਤਤੋ ਪਂਸੁਂ ਗਹੇਤ੍ਵਾਨ, ਪਂਸੁਨਾ ਤਞ੍ਹਿ ਓਕਿਰਿਂ;

ਤਸ੍ਸਕਮ੍ਮਵਿਪਾਕੇਨ, ਤੇਨਮ੍ਹਿ ਪਂਸੁਕੁਨ੍ਥਿਤਾ.

੧੪੨. ‘‘ਸਬ੍ਬਂ ਅਹਮ੍ਪਿ ਜਾਨਾਮਿ, ਪਂਸੁਨਾ ਮਂ ਤ੍ਵਮੋਕਿਰਿ;

ਅਞ੍ਞਞ੍ਚ ਖੋ ਤਂ ਪੁਚ੍ਛਾਮਿ, ਕੇਨ ਖਜ੍ਜਸਿ ਕਚ੍ਛੁਯਾ.

੧੪੩. ‘‘ਭੇਸਜ੍ਜਹਾਰੀ ਉਭਯੋ, ਵਨਨ੍ਤਂ ਅਗਮਿਮ੍ਹਸੇ;

ਤ੍ਵਞ੍ਚ ਭੇਸਜ੍ਜਮਾਹਰਿ, ਅਹਞ੍ਚ ਕਪਿਕਚ੍ਛੁਨੋ.

੧੪੪. ‘‘ਤਸ੍ਸਾ ਤ੍ਯਾਜਾਨਮਾਨਾਯ, ਸੇਯ੍ਯਂ ਤ੍ਯਾਹਂ ਸਮੋਕਿਰਿਂ;

ਤਸ੍ਸਕਮ੍ਮਵਿਪਾਕੇਨ, ਤੇਨ ਖਜ੍ਜਾਮਿ ਕਚ੍ਛੁਯਾ.

੧੪੫. ‘‘ਸਬ੍ਬਂ ਅਹਮ੍ਪਿ ਜਾਨਾਮਿ, ਸੇਯ੍ਯਂ ਮੇ ਤ੍ਵਂ ਸਮੋਕਿਰਿ;

ਅਞ੍ਞਞ੍ਚ ਖੋ ਤਂ ਪੁਚ੍ਛਾਮਿ, ਕੇਨਾਸਿ ਨਗ੍ਗਿਯਾ ਤੁਵਂ.

੧੪੬. ‘‘ਸਹਾਯਾਨਂ ਸਮਯੋ ਆਸਿ, ਞਾਤੀਨਂ ਸਮਿਤੀ ਅਹੁ;

ਤ੍ਵਞ੍ਚ ਆਮਨ੍ਤਿਤਾ ਆਸਿ, ਸਸਾਮਿਨੀ ਨੋ ਚ ਖੋਹਂ.

੧੪੭. ‘‘ਤਸ੍ਸਾ ਤ੍ਯਾਜਾਨਮਾਨਾਯ, ਦੁਸ੍ਸਂ ਤ੍ਯਾਹਂ ਅਪਾਨੁਦਿਂ;