੬. ਕਣ੍ਹਪੇਤਵਤ੍ਥੁਵਣ੍ਣਨਾ

ਉਟ੍ਠੇਹਿ ਕਣ੍ਹ ਕਿਂ ਸੇਸੀਤਿ ਇਦਂ ਸਤ੍ਥਾ ਜੇਤਵਨੇ ਵਿਹਰਨ੍ਤੋ ਅਞ੍ਞਤਰਂ ਮਤਪੁਤ੍ਤਂ ਉਪਾਸਕਂ ਆਰਬ੍ਭ ਕਥੇਸਿ. ਸਾਵਤ੍ਥਿਯਂ ਕਿਰ ਅਞ੍ਞਤਰਸ੍ਸ ਉਪਾਸਕਸ੍ਸ ਪੁਤ੍ਤੋ ਕਾਲਮਕਾਸਿ. ਸੋ ਤੇਨ ਸੋਕਸਲ੍ਲਸਮਪ੍ਪਿਤੋ ਨ ਨ੍ਹਾਯਤਿ, ਨ ਭੁਞ੍ਜਤਿ, ਨ ਕਮ੍ਮਨ੍ਤੇ ਵਿਚਾਰੇਤਿ, ਨ ਬੁਦ੍ਧੁਪਟ੍ਠਾਨਂ ਗਚ੍ਛਤਿ, ਕੇਵਲਂ, ‘‘ਤਾਤ ਪਿਯਪੁਤ੍ਤਕ, ਮਂ ਓਹਾਯ ਕਹਂ ਪਠਮਤਰਂ ਗਤੋਸੀ’’ਤਿਆਦੀਨਿ ਵਦਨ੍ਤੋ ਵਿਪ੍ਪਲਪਤਿ. ਸਤ੍ਥਾ ਪਚ੍ਚੂਸਸਮਯੇ ਲੋਕਂ ਓਲੋਕੇਨ੍ਤੋ ਤਸ੍ਸ ਸੋਤਾਪਤ੍ਤਿਫਲੂਪਨਿਸ੍ਸਯਂ ਦਿਸ੍ਵਾ ਪੁਨਦਿਵਸੇ ਭਿਕ੍ਖੁਸਙ੍ਘਪਰਿਵੁਤੋ ਸਾਵਤ੍ਥਿਯਂ ਪਿਣ੍ਡਾਯ ਚਰਿਤ੍ਵਾ ਕਤਭਤ੍ਤਕਿਚ੍ਚੋ ਭਿਕ੍ਖੂ ਉਯ੍ਯੋਜੇਤ੍ਵਾ ਆਨਨ੍ਦਤ੍ਥੇਰੇਨ ਪਚ੍ਛਾਸਮਣੇਨ ਤਸ੍ਸ ਘਰਦ੍ਵਾਰਂ ਅਗਮਾਸਿ. ਸਤ੍ਥੁ ਆਗਤਭਾਵਂ ਉਪਾਸਕਸ੍ਸ ਆਰੋਚੇਸੁਂ. ਅਥਸ੍ਸ ਗੇਹਜਨੋ ਗੇਹਦ੍ਵਾਰੇ ਆਸਨਂ ਪਞ੍ਞਾਪੇਤ੍ਵਾ ਸਤ੍ਥਾਰਂ ਨਿਸੀਦਾਪੇਤ੍ਵਾ ਉਪਾਸਕਂ ਪਰਿਗ੍ਗਹੇਤ੍ਵਾ ਸਤ੍ਥੁ ਸਨ੍ਤਿਕਂ ਉਪਨੇਸਿ. ਏਕਮਨ੍ਤਂ ਨਿਸਿਨ੍ਨਂ ਤਂ ਦਿਸ੍ਵਾ ‘‘ਕਿਂ, ਉਪਾਸਕ, ਸੋਚਸੀ’’ਤਿ ਵਤ੍ਵਾ ‘‘ਆਮ, ਭਨ੍ਤੇ’’ਤਿ ਵੁਤ੍ਤੇ, ‘‘ਉਪਾਸਕ, ਪੋਰਾਣਕਪਣ੍ਡਿਤਾ ਪਣ੍ਡਿਤਾਨਂ ਕਥਂ ਸੁਤ੍ਵਾ ਮਤਪੁਤ੍ਤਂ ਨਾਨੁਸੋਚਿਂਸੂ’’ਤਿ ਵਤ੍ਵਾ ਤੇਨ ਯਾਚਿਤੋ ਅਤੀਤਂ ਆਹਰਿ.

ਅਤੀਤੇ ਦ੍ਵਾਰਵਤੀਨਗਰੇ ਦਸ ਭਾਤਿਕਰਾਜਾਨੋ ਅਹੇਸੁਂ – ਵਾਸੁਦੇਵੋ ਬਲਦੇਵੋ ਚਨ੍ਦਦੇਵਾ ਸੂਰਿਯਦੇਵੋ ਅਗ੍ਗਿਦੇਵੋ ਵਰੁਣਦੇਵੋ ਅਜ੍ਜੁਨੋ ਪਜ੍ਜੁਨੋ ਘਟਪਣ੍ਡਿਤੋ ਅਙ੍ਕੁਰੋ ਚਾਤਿ. ਤੇਸੁ ਵਾਸੁਦੇਵਮਹਾਰਾਜਸ੍ਸ ਪਿਯਪੁਤ੍ਤੋ ਕਾਲਮਕਾਸਿ. ਤੇਨ ਰਾਜਾ ਸੋਕਪਰੇਤੋ ਸਬ੍ਬਕਿਚ੍ਚਾਨਿ ਪਹਾਯ ਮਞ੍ਚਸ੍ਸ ਅਟਨਿਂ ਪਰਿਗ੍ਗਹੇਤ੍ਵਾ ਵਿਪ੍ਪਲਪਨ੍ਤੋ ਨਿਪਜ੍ਜਿ. ਤਸ੍ਮਿਂ ਕਾਲੇ ਘਟਪਣ੍ਡਿਤੋ ਚਿਨ੍ਤੇਸਿ – ‘‘ਠਪੇਤ੍ਵਾ ਮਂ ਅਞ੍ਞੋ ਕੋਚਿ ਮਮ ਭਾਤੁ ਸੋਕਂ ਪਰਿਹਰਿਤੁਂ ਸਮਤ੍ਥੋ ਨਾਮ ਨਤ੍ਥਿ, ਉਪਾਯੇਨਸ੍ਸ ਸੋਕਂ ਹਰਿਸ੍ਸਾਮੀ’’ਤਿ. ਸੋ ਉਮ੍ਮਤ੍ਤਕਵੇਸਂ ਗਹੇਤ੍ਵਾ ‘‘ਸਸਂ ਮੇ ਦੇਥ, ਸਸਂ ਮੇ ਦੇਥਾ’’ਤਿ ਆਕਾਸਂ ਓਲੋਕੇਨ੍ਤੋ ਸਕਲਨਗਰਂ ਵਿਚਰਿ. ‘‘ਘਟਪਣ੍ਡਿਤੋ ਉਮ੍ਮਤ੍ਤਕੋ ਜਾਤੋ’’ਤਿ ਸਕਲਨਗਰਂ ਸਙ੍ਖੁਭਿ.

ਤਸ੍ਮਿਂ ਕਾਲੇ ਰੋਹਿਣੇਯ੍ਯੋ ਨਾਮ ਅਮਚ੍ਚੋ ਵਾਸੁਦੇਵਰਞ੍ਞੋ ਸਨ੍ਤਿਕਂ ਗਨ੍ਤ੍ਵਾ ਤੇਨ ਸਦ੍ਧਿਂ ਕਥਂ ਸਮੁਟ੍ਠਾਪੇਨ੍ਤੋ –

੨੦੭. ‘‘ਉਟ੍ਠੇਹਿ ਕਣ੍ਹ ਕਿਂ ਸੇਸਿ, ਕੋ ਅਤ੍ਥੋ ਸੁਪਨੇਨ ਤੇ;

ਯੋ ਚ ਤੁਯ੍ਹਂ ਸਕੋ ਭਾਤਾ, ਹਦਯਂ ਚਕ੍ਖੁ ਚ ਦਕ੍ਖਿਣਂ;

ਤਸ੍ਸ ਵਾਤਾ ਬਲੀਯਨ੍ਤਿ, ਸਸਂ ਜਪ੍ਪਤਿ ਕੇਸਵਾ’’ਤਿ. – ਇਮਂ ਗਾਥਮਾਹ;

੨੦੭. ਤਤ੍ਥ ਕਣ੍ਹਾਤਿ ਵਾਸੁਦੇਵਂ ਗੋਤ੍ਤੇਨਾਲਪਤਿ. ਕੋ ਅਤ੍ਥੋ ਸੁਪਨੇਨ ਤੇਤਿ ਸੁਪਨੇਨ ਤੁਯ੍ਹਂ ਕਾ ਨਾਮ ਵਡ੍ਢਿ. ਸਕੋ ਭਾਤਾਤਿ ਸੋਦਰਿਯੋ ਭਾਤਾ. ਹਦਯਂ ਚਕ੍ਖੁ ਚ ਦਕ੍ਖਿਣਨ੍ਤਿ ਹਦਯੇਨ ਚੇਵ ਦਕ੍ਖਿਣਚਕ੍ਖੁਨਾ ਚ ਸਦਿਸੋਤਿ ਅਤ੍ਥੋ. ਤਸ੍ਸ ਵਾਤਾ ਬਲੀਯਨ੍ਤੀਤਿ ਤਸ੍ਸ ਅਪਰਾਪਰਂ ਉਪ੍ਪਜ੍ਜਮਾਨਾ ਉਮ੍ਮਾਦਵਾਤਾ ਬਲਵਨ੍ਤੋ ਹੋਨ੍ਤਿ ਵਡ੍ਢਨ੍ਤਿ ਅਭਿਭਵਨ੍ਤਿ. ਸਸਂ ਜਪ੍ਪਤੀਤਿ ‘‘ਸਸਂ ਮੇ ਦੇਥਾ’’ਤਿ ਵਿਪ੍ਪਲਪਤਿ. ਕੇਸਵਾਤਿ ਸੋ ਕਿਰ ਕੇਸਾਨਂ ਸੋਭਨਾਨਂ ਅਤ੍ਥਿਤਾਯ ‘‘ਕੇਸਵੋ’’ਤਿ ਵੋਹਰੀਯਤਿ. ਤੇਨ ਨਂ ਨਾਮੇਨ ਆਲਪਤਿ.

ਤਸ੍ਸ ਵਚਨਂ ਸੁਤ੍ਵਾ ਸਯਨਤੋ ਉਟ੍ਠਿਤਭਾਵਂ ਦੀਪੇਨ੍ਤੋ ਸਤ੍ਥਾ ਅਭਿਸਮ੍ਬੁਦ੍ਧੋ ਹੁਤ੍ਵਾ –

੨੦੮. ‘‘ਤਸ੍ਸ ਤਂ ਵਚਨਂ ਸੁਤ੍ਵਾ, ਰੋਹਿਣੇਯ੍ਯਸ੍ਸ ਕੇਸਵੋ;

ਤਰਮਾਨਰੂਪੋ ਵੁਟ੍ਠਾਸਿ, ਭਾਤੁ ਸੋਕੇਨ ਅਟ੍ਟਿਤੋ’’ਤਿ. – ਇਮਂ ਗਾਥਮਾਹ;

ਰਾਜਾ ਉਟ੍ਠਾਯ ਸੀਘਂ ਪਾਸਾਦਾ ਓਤਰਿਤ੍ਵਾ ਘਟਪਣ੍ਡਿਤਸ੍ਸ ਸਨ੍ਤਿਕਂ ਗਨ੍ਤ੍ਵਾ ਉਭੋਸੁ ਹਤ੍ਥੇਸੁ ਨਂ ਦਲ਼੍ਹਂ ਗਹੇਤ੍ਵਾ ਤੇਨ ਸਦ੍ਧਿਂ ਸਲ੍ਲਪਨ੍ਤੋ –

੨੦੯. ‘‘ਕਿਂ ਨੁ ਉਮ੍ਮਤ੍ਤਰੂਪੋਵ, ਕੇਵਲਂ ਦ੍ਵਾਰਕਂ ਇਮਂ;

ਸਸੋ ਸਸੋਤਿ ਲਪਸਿ, ਕੀਦਿਸਂ ਸਸਮਿਚ੍ਛਸਿ.

੨੧੦. ‘‘ਸੋਵਣ੍ਣਮਯਂ ਮਣਿਮਯਂ, ਲੋਹਮਯਂ ਅਥ ਰੂਪਿਯਮਯਂ;

ਸਙ੍ਖਸਿਲਾਪਵਾਲ਼ਮਯਂ, ਕਾਰਯਿਸ੍ਸਾਮਿ ਤੇ ਸਸਂ.

੨੧੧. ‘‘ਸਨ੍ਤਿ ਅਞ੍ਞੇਪਿ ਸਸਕਾ, ਅਰਞ੍ਞਵਨਗੋਚਰਾ;

ਤੇਪਿ ਤੇ ਆਨਯਿਸ੍ਸਾਮਿ, ਕੀਦਿਸਂ ਸਸਮਿਚ੍ਛਸੀ’’ਤਿ. –

ਤਿਸ੍ਸੋ ਗਾਥਾਯੋ ਅਭਾਸਿ.

੨੦੯-੨੧੧. ਤਤ੍ਥ ਉਮ੍ਮਤ੍ਤਰੂਪੋਵਾਤਿ ਉਮ੍ਮਤ੍ਤਕੋ ਵਿਯ. ਕੇਵਲਨ੍ਤਿ ਸਕਲਂ. ਦ੍ਵਾਰਕਨ੍ਤਿ ਦ੍ਵਾਰਵਤੀਨਗਰਂ ਵਿਚਰਨ੍ਤੋ. ਸਸੋ ਸਸੋਤਿ ਲਪਸੀਤਿ ਸਸੋ ਸਸੋਤਿ ਵਿਲਪਸਿ. ਸੋਵਣ੍ਣਮਯਨ੍ਤਿ ਸੁਵਣ੍ਣਮਯਂ. ਲੋਹਮਯਨ੍ਤਿ ਤਮ੍ਬਲੋਹਮਯਂ. ਰੂਪਿਯਮਯਨ੍ਤਿ ਰਜਤਮਯਂ. ਯਂ ਇਚ੍ਛਸਿ ਤਂ ਵਦੇਹਿ, ਅਥ ਕੇਨ ਸੋਚਸਿ. ਅਞ੍ਞੇਪਿ ਅਰਞ੍ਞੇ ਵਨਗੋਚਰਾ ਸਸਕਾ ਅਤ੍ਥਿ, ਤੇ ਤੇ ਆਨਯਿਸ੍ਸਾਮਿ, ਵਦ, ਭਦ੍ਰਮੁਖ, ਕੀਦਿਸਂ ਸਸਮਿਚ੍ਛਸੀਤਿ ਘਟਪਣ੍ਡਿਤਂ ‘‘ਸਸੇਨ ਅਤ੍ਥਿਕੋ’’ਤਿ ਅਧਿਪ੍ਪਾਯੇਨ ਸਸੇਨ ਨਿਮਨ੍ਤੇਸਿ. ਤਂ ਸੁਤ੍ਵਾ ਘਟਪਣ੍ਡਿਤੋ –

੨੧੨. ‘‘ਨਾਹਮੇਤੇ ਸਸੇ ਇਚ੍ਛੇ, ਯੇ ਸਸਾ ਪਥਵਿਸ੍ਸਿਤਾ;

ਚਨ੍ਦਤੋ ਸਸਮਿਚ੍ਛਾਮਿ, ਤਂ ਮੇ ਓਹਰ ਕੇਸਵਾ’’ਤਿ. –

ਗਾਥਮਾਹ. ਤਤ੍ਥ ਓਹਰਾਤਿ ਓਹਾਰੇਹਿ. ਤਂ ਸੁਤ੍ਵਾ ਰਾਜਾ ‘‘ਨਿਸ੍ਸਂਸਯਂ ਮੇ ਭਾਤਾ ਉਮ੍ਮਤ੍ਤਕੋ ਜਾਤੋ’’ਤਿ ਦੋਮਨਸ੍ਸਪ੍ਪਤ੍ਤੋ –

੨੧੩. ‘‘ਸੋ ਨੂਨ ਮਧੁਰਂ ਞਾਤਿ, ਜੀਵਿਤਂ ਵਿਜਹਿਸ੍ਸਸਿ;

ਅਪਤ੍ਥਿਯਂ ਪਤ੍ਥਯਸਿ, ਚਨ੍ਦਤੋ ਸਸਮਿਚ੍ਛਸੀ’’ਤਿ. –

ਗਾਥਮਾਹ. ਤਤ੍ਥ ਞਾਤੀਤਿ ਕਨਿਟ੍ਠਂ ਆਲਪਤਿ. ਅਯਮੇਤ੍ਥ ਅਤ੍ਥੋ – ਮਯ੍ਹਂ ਪਿਯਞਾਤਿ ਯਂ ਅਤਿਮਧੁਰਂ ਅਤ੍ਤਨੋ ਜੀਵਿਤਂ, ਤਂ ਵਿਜਹਿਸ੍ਸਸਿ ਮਞ੍ਞੇ, ਯੋ ਅਪਤ੍ਥਯਿਤਬ੍ਬਂ ਪਤ੍ਥੇਸੀਤਿ.

ਘਟਪਣ੍ਡਿਤੋ ਰਞ੍ਞੋ ਵਚਨਂ ਸੁਤ੍ਵਾ ਨਿਚ੍ਚਲੋਵ ਠਤ੍ਵਾ ‘‘ਭਾਤਿਕ, ਤ੍ਵਂ ਚਨ੍ਦਤੋ ਸਸਂ ਪਤ੍ਥੇਨ੍ਤਸ੍ਸ ਤਂ ਅਲਭਿਤ੍ਵਾ ਜੀਵਿਤਕ੍ਖਯੋ ਭਵਿਸ੍ਸਤੀਤਿ ਜਾਨਨ੍ਤੋ ਕਸ੍ਮਾ ਮਤਂ ਪੁਤ੍ਤਂ ਅਲਭਿਤ੍ਵਾ ਅਨੁਸੋਚਸੀ’’ਤਿ ਇਮਮਤ੍ਥਂ ਦੀਪੇਨ੍ਤੋ –

੨੧੪. ‘‘ਏਵਂ ਚੇ ਕਣ੍ਹ ਜਾਨਾਸਿ, ਯਥਞ੍ਞਮਨੁਸਾਸਸਿ;

ਕਸ੍ਮਾ ਪੁਰੇ ਮਤਂ ਪੁਤ੍ਤਂ, ਅਜ੍ਜਾਪਿ ਮਨੁਸੋਚਸੀ’’ਤਿ. –

ਗਾਥਮਾਹ. ਤਤ੍ਥ ਏਵਂ ਚੇ, ਕਣ੍ਹ, ਜਾਨਾਸੀਤਿ, ਭਾਤਿਕ, ਕਣ੍ਹਨਾਮਕ ਮਹਾਰਾਜ, ‘‘ਅਲਬ੍ਭਨੇਯ੍ਯਵਤ੍ਥੁ ਨਾਮ ਨ ਪਤ੍ਥੇਤਬ੍ਬ’’ਨ੍ਤਿ ਯਦਿ ਏਵਂ ਜਾਨਾਸਿ. ਯਥਞ੍ਞਨ੍ਤਿ ਏਵਂ ਜਾਨਨ੍ਤੋਵ ਯਥਾ ਅਞ੍ਞਂ ਅਨੁਸਾਸਸਿ, ਤਥਾ ਅਕਤ੍ਵਾ. ਕਸ੍ਮਾ ਪੁਰੇ ਮਤਂ ਪੁਤ੍ਤਨ੍ਤਿ ਅਥ ਕਸ੍ਮਾ ਇਤੋ ਚਤੁਮਾਸਮਤ੍ਥਕੇ ਮਤਂ ਪੁਤ੍ਤਂ ਅਜ੍ਜਾਪਿ ਅਨੁਸੋਚਸੀਤਿ.

ਏਵਂ ਸੋ ਅਨ੍ਤਰਵੀਥਿਯਂ ਠਿਤਕੋਵ ‘‘ਅਹਂ ਤਾਵ ਏਵਂ ਪਞ੍ਞਾਯਮਾਨਂ ਪਤ੍ਥੇਮਿ, ਤ੍ਵਂ ਪਨ ਅਪਞ੍ਞਾਯਮਾਨਸ੍ਸਤ੍ਥਾਯ ਸੋਚਸੀ’’ਤਿ ਵਤ੍ਵਾ ਤਸ੍ਸ ਧਮ੍ਮਂ ਦੇਸੇਨ੍ਤੋ –

੨੧੫. ‘‘ਨ ਯਂ ਲਬ੍ਭਾ ਮਨੁਸ੍ਸੇਨ, ਅਮਨੁਸ੍ਸੇਨ ਵਾ ਪਨ;

ਜਾਤੋ ਮੇ ਮਾ ਮਰਿ ਪੁਤ੍ਤੋ, ਕੁਤੋ ਲਬ੍ਭਾ ਅਲਬ੍ਭਿਯਂ.

੨੧੬. ‘‘ਨ ਮਨ੍ਤਾ ਮੂਲਭੇਸਜ੍ਜਾ, ਓਸਧੇਹਿ ਧਨੇਨ ਵਾ;

ਸਕ੍ਕਾ ਆਨਯਿਤੁਂ ਕਣ੍ਹ, ਯਂ ਪੇਤਮਨੁਸੋਚਸੀ’’ਤਿ. – ਗਾਥਾਦ੍ਵਯਮਾਹ;

੨੧੫. ਤਤ੍ਥ ਯਨ੍ਤਿ, ਭਾਤਿਕ, ਯਂ ‘‘ਏਵਂ ਜਾਤੋ ਮੇ ਪੁਤ੍ਤੋ ਮਾ ਮਰੀ’’ਤਿ ਮਨੁਸ੍ਸੇਨ ਵਾ ਦੇਵੇਨ ਵਾ ਪਨ ਨ ਲਬ੍ਭਾ ਨ ਸਕ੍ਕਾ ਲਦ੍ਧੁਂ, ਤਂ ਤ੍ਵਂ ਪਤ੍ਥੇਸਿ, ਤਂ ਪਨੇਤਂ ਕੁਤੋ ਲਬ੍ਭਾ, ਕੇਨ ਕਾਰਣੇਨ ਲਦ੍ਧੁਂ ਸਕ੍ਕਾ. ਯਸ੍ਮਾ ਅਲਬ੍ਭਿਯਂ ਅਲਬ੍ਭਨੇਯ੍ਯਵਤ੍ਥੁ ਨਾਮੇਤਨ੍ਤਿ ਅਤ੍ਥੋ.

੨੧੬. ਮਨ੍ਤਾਤਿ ਮਨ੍ਤਪ੍ਪਯੋਗੇਨ. ਮੂਲਭੇਸਜ੍ਜਾਤਿ ਮੂਲਭੇਸਜ੍ਜੇਨ. ਓਸਧੇਹੀਤਿ ਨਾਨਾਵਿਧੇਹਿ ਓਸਧੇਹਿ. ਧਨੇਨ ਵਾਤਿ ਕੋਟਿਸਤਸਙ੍ਖੇਨ ਧਨੇਨ ਵਾਪਿ. ਇਦਂ ਵੁਤ੍ਤਂ ਹੋਤਿ – ਯਂ ਪੇਤਮਨੁਸੋਚਸਿ, ਤਂ ਏਤੇਹਿ ਮਨ੍ਤਪ੍ਪਯੋਗਾਦੀਹਿਪਿ ਆਨੇਤੁਂ ਨ ਸਕ੍ਕਾਤਿ.

ਪੁਨ ਘਟਪਣ੍ਡਿਤੋ ‘‘ਭਾਤਿਕ, ਇਦਂ ਮਰਣਂ ਨਾਮ ਧਨੇਨ ਵਾ ਜਾਤਿਯਾ ਵਾ ਵਿਜ੍ਜਾਯ ਵਾ ਸੀਲੇਨ ਵਾ ਭਾਵਨਾਯ ਵਾ ਨ ਸਕ੍ਕਾ ਪਟਿਬਾਹਿਤੁ’’ਨ੍ਤਿ ਦਸ੍ਸੇਨ੍ਤੋ –

੨੧੭. ‘‘ਮਹਦ੍ਧਨਾ ਮਹਾਭੋਗਾ, ਰਟ੍ਠਵਨ੍ਤੋਪਿ ਖਤ੍ਤਿਯਾ;

ਪਹੂਤਧਨਧਞ੍ਞਾਸੇ, ਤੇਪਿ ਨੋ ਅਜਰਾਮਰਾ.

੨੧੮. ‘‘ਖਤ੍ਤਿਯਾ ਬ੍ਰਾਹ੍ਮਣਾ ਵੇਸ੍ਸਾ, ਸੁਦ੍ਦਾ ਚਣ੍ਡਾਲਪੁਕ੍ਕੁਸ੍ਸਾ;

ਏਤੇ ਚਞ੍ਞੇ ਚ ਜਾਤਿਯਾ, ਤੇਪਿ ਨੋ ਅਜਰਾਮਰਾ.

੨੧੯. ‘‘ਯੇ ਮਨ੍ਤਂ ਪਰਿਵਤ੍ਤੇਨ੍ਤਿ, ਛਲ਼ਙ੍ਗਂ ਬ੍ਰਹ੍ਮਚਿਨ੍ਤਿਤਂ;

ਏਤੇ ਚਞ੍ਞੇ ਚ ਵਿਜ੍ਜਾਯ, ਤੇਪਿ ਨੋ ਅਜਰਾਮਰਾ.

੨੨੦. ‘‘ਇਸਯੋ ਵਾਪਿ ਯੇ ਸਨ੍ਤਾ, ਸਞ੍ਞਤਤ੍ਤਾ ਤਪਸ੍ਸਿਨੋ;

ਸਰੀਰਂ ਤੇਪਿ ਕਾਲੇਨ, ਵਿਜਹਨ੍ਤਿ ਤਪਸ੍ਸਿਨੋ.

੨੨੧. ‘‘ਭਾਵਿਤਤ੍ਤਾ ਅਰਹਨ੍ਤੋ, ਕਤਕਿਚ੍ਚਾ ਅਨਾਸਵਾ;

ਨਿਕ੍ਖਿਪਨ੍ਤਿ ਇਮਂ ਦੇਹਂ, ਪੁਞ੍ਞਪਾਪਪਰਿਕ੍ਖਯਾ’’ਤਿ. –

ਪਞ੍ਚਹਿ ਗਾਥਾਹਿ ਰਞ੍ਞੋ ਧਮ੍ਮਂ ਦੇਸੇਸਿ.

੨੧੭. ਤਤ੍ਥ ਮਹਦ੍ਧਨਾਤਿ ਨਿਧਾਨਗਤਸ੍ਸੇਵ ਮਹਤੋ ਧਨਸ੍ਸ ਅਤ੍ਥਿਤਾਯ ਬਹੁਧਨਾ. ਮਹਾਭੋਗਾਤਿ ਦੇਵਭੋਗਸਦਿਸਾਯ ਮਹਤਿਯਾ ਭੋਗਸਮ੍ਪਤ੍ਤਿਯਾ ਸਮਨ੍ਨਾਗਤਾ. ਰਟ੍ਠਵਨ੍ਤੋਤਿ ਸਕਲਰਟ੍ਠਵਨ੍ਤੋ. ਪਹੂਤਧਨਧਞ੍ਞਾਸੇਤਿ ਤਿਣ੍ਣਂ ਚਤੁਨ੍ਨਂ ਵਾ ਸਂਵਚ੍ਛਰਾਨਂ ਅਤ੍ਥਾਯ ਨਿਦਹਿਤ੍ਵਾ ਠਪੇਤਬ੍ਬਸ੍ਸ ਨਿਚ੍ਚਪਰਿਬ੍ਬਯਭੂਤਸ੍ਸ ਧਨਧਞ੍ਞਸ੍ਸ ਵਸੇਨ ਅਪਰਿਯਨ੍ਤਧਨਧਞ੍ਞਾ. ਤੇਪਿ ਨੋ ਅਜਰਾਮਰਾਤਿ ਤੇਪਿ ਏਵਂ ਮਹਾਵਿਭਵਾ ਮਨ੍ਧਾਤੁਮਹਾਸੁਦਸ੍ਸਨਾਦਯੋ ਖਤ੍ਤਿਯਾ ਅਜਰਾਮਰਾ ਨਾਹੇਸੁਂ, ਅਞ੍ਞਦਤ੍ਥੁ ਮਰਣਮੁਖਮੇਵ ਅਨੁਪਵਿਟ੍ਠਾਤਿ ਅਤ੍ਥੋ.

੨੧੮. ਏਤੇਤਿ ਯਥਾਵੁਤ੍ਤਖਤ੍ਤਿਯਾਦਯੋ. ਅਞ੍ਞੇਤਿ ਅਞ੍ਞਤਰਾ ਏਵਂਭੂਤਾ ਅਮ੍ਬਟ੍ਠਾਦਯੋ. ਜਾਤਿਯਾਤਿ ਅਤ੍ਤਨੋ ਜਾਤਿਨਿਮਿਤ੍ਤਂ ਅਜਰਾਮਰਾ ਨਾਹੇਸੁਨ੍ਤਿ ਅਤ੍ਥੋ.

੨੧੯. ਮਨ੍ਤਨ੍ਤਿ ਵੇਦਂ. ਪਰਿਵਤ੍ਤੇਨ੍ਤੀਤਿ ਸਜ੍ਝਾਯਨ੍ਤਿ ਵਾਚੇਨ੍ਤਿ ਚ. ਅਥ ਵਾ ਪਰਿਵਤ੍ਤੇਨ੍ਤੀਤਿ ਵੇਦਂ ਅਨੁਪਰਿਵਤ੍ਤੇਨ੍ਤਾ ਹੋਮਂ ਕਰੋਨ੍ਤਾ ਜਪਨ੍ਤਿ. ਛਲ਼ਙ੍ਗਨ੍ਤਿ ਸਿਕ੍ਖਾਕਪ੍ਪਨਿਰੁਤ੍ਤਿਬ੍ਯਾਕਰਣਜੋਤਿਸਤ੍ਥਛਨ੍ਦੋਵਿਚਿਤਿਸਙ੍ਖਾਤੇਹਿ ਛਹਿ ਅਙ੍ਗੇਹਿ ਯੁਤ੍ਤਂ. ਬ੍ਰਹ੍ਮਚਿਨ੍ਤਿਤਨ੍ਤਿ ਬ੍ਰਾਹ੍ਮਣਾਨਮਤ੍ਥਾਯ ਬ੍ਰਹ੍ਮਨਾ ਚਿਨ੍ਤਿਤਂ ਕਥਿਤਂ. ਵਿਜ੍ਜਾਯਾਤਿ ਬ੍ਰਹ੍ਮਸਦਿਸਵਿਜ੍ਜਾਯ ਸਮਨ੍ਨਾਗਤਾ, ਤੇਪਿ ਨੋ ਅਜਰਾਮਰਾਤਿ ਅਤ੍ਥੋ.

੨੨੦-੨੨੧. ਇਸਯੋਤਿ ਯਮਨਿਯਮਾਦੀਨਂ ਪਟਿਕੂਲਸਞ੍ਞਾਦੀਨਞ੍ਚ ਏਸਨਟ੍ਠੇਨ ਇਸਯੋ. ਸਨ੍ਤਾਤਿ ਕਾਯਵਾਚਾਹਿ ਸਨ੍ਤਸਭਾਵਾ. ਸਞ੍ਞਤਤ੍ਤਾਤਿ ਰਾਗਾਦੀਨਂ ਸਂਯਮੇਨ ਸਂਯਤਚਿਤ੍ਤਾ. ਕਾਯਤਪਨਸਙ੍ਖਾਤੋ ਤਪੋ ਏਤੇਸਂ ਅਤ੍ਥੀਤਿ ਤਪਸ੍ਸਿਨੋ. ਪੁਨ ਤਪਸ੍ਸਿਨੋਤਿ ਸਂਵਰਕਾ. ਤੇਨ ਏਵਂ ਤਪਨਿਸ੍ਸਿਤਕਾ ਹੁਤ੍ਵਾ ਸਰੀਰੇਨ ਚ ਵਿਮੋਕ੍ਖਂ ਪਤ੍ਤੁਕਾਮਾਪਿ ਸਂਵਰਕਾ ਸਰੀਰਂ ਵਿਜਹਨ੍ਤਿ ਏਵਾਤਿ ਦਸ੍ਸੇਤਿ. ਅਥ ਵਾ ਇਸਯੋਤਿ ਅਧਿਸੀਲਸਿਕ੍ਖਾਦੀਨਂ ਏਸਨਟ੍ਠੇਨ ਇਸਯੋ, ਤਦਤ੍ਥਂ ਤਪ੍ਪਟਿਪਕ੍ਖਾਨਂ ਪਾਪਧਮ੍ਮਾਨਂ ਵੂਪਸਮੇਨ ਸਨ੍ਤਾ, ਏਕਾਰਮ੍ਮਣੇ ਚਿਤ੍ਤਸ੍ਸ ਸਂਯਮੇਨ ਸਞ੍ਞਤਤ੍ਤਾ, ਸਮ੍ਮਪ੍ਪਧਾਨਯੋਗਤੋ ਵੀਰਿਯਤਾਪੇਨ ਤਪਸ੍ਸਿਨੋ, ਸਪ੍ਪਯੋਗਾ ਰਾਗਾਦੀਨਂ ਸਨ੍ਤਪਨੇਨ ਤਪਸ੍ਸਿਨੋਤਿ ਯੋਜੇਤਬ੍ਬਂ. ਭਾਵਿਤਤ੍ਤਾਤਿ ਚਤੁਸਚ੍ਚਕਮ੍ਮਟ੍ਠਾਨਭਾਵਨਾਯ ਭਾਵਿਤਚਿਤ੍ਤਾ.

ਏਵਂ ਘਟਪਣ੍ਡਿਤੇਨ ਧਮ੍ਮੇ ਕਥਿਤੇ ਤਂ ਸੁਤ੍ਵਾ ਰਾਜਾ ਅਪਗਤਸੋਕਸਲ੍ਲੋ ਪਸਨ੍ਨਮਾਨਸੋ ਘਟਪਣ੍ਡਿਤਂ ਪਸਂਸਨ੍ਤੋ –

੨੨੨. ‘‘ਆਦਿਤ੍ਤਂ ਵਤ ਮਂ ਸਨ੍ਤਂ, ਘਟਸਿਤ੍ਤਂਵ ਪਾਵਕਂ;

ਵਾਰਿਨਾ ਵਿਯ ਓਸਿਞ੍ਚਂ, ਸਬ੍ਬਂ ਨਿਬ੍ਬਾਪਯੇ ਦਰਂ.

੨੨੩. ‘‘ਅਬ੍ਬਹੀ ਵਤ ਮੇ ਸਲ੍ਲਂ, ਸੋਕਂ ਹਦਯਨਿਸ੍ਸਿਤਂ;

ਯੋ ਮੇ ਸੋਕਪਰੇਤਸ੍ਸ, ਪੁਤ੍ਤਸੋਕਂ ਅਪਾਨੁਦਿ.

੨੨੪. ‘‘ਸ੍ਵਾਹਂ ਅਬ੍ਬੂਲ਼੍ਹਸਲ੍ਲੋਸ੍ਮਿ, ਸੀਤਿਭੂਤੋਸ੍ਮਿ ਨਿਬ੍ਬੁਤੋ;

ਨ ਸੋਚਾਮਿ ਨ ਰੋਦਾਮਿ, ਤਵ ਸੁਤ੍ਵਾਨ ਭਾਤਿਕ.

੨੨੫. ‘‘ਏਵਂ ਕਰੋਨ੍ਤਿ ਸਪ੍ਪਞ੍ਞਾ, ਯੇ ਹੋਨ੍ਤਿ ਅਨੁਕਮ੍ਪਕਾ;

ਨਿਵਤ੍ਤਯਨ੍ਤਿ ਸੋਕਮ੍ਹਾ, ਘਟੋ ਜੇਟ੍ਠਂਵ ਭਾਤਰਂ.

੨੨੬. ‘‘ਯਸ੍ਸ ਏਤਾਦਿਸਾ ਹੋਨ੍ਤਿ, ਅਮਚ੍ਚਾ ਪਰਿਚਾਰਕਾ;

ਸੁਭਾਸਿਤੇਨ ਅਨ੍ਵੇਨ੍ਤਿ, ਘਟੋ ਜੇਟ੍ਠਂਵ ਭਾਤਰ’’ਨ੍ਤਿ. – ਸੇਸਗਾਥਾ ਅਭਾਸਿ;

੨੨੫. ਤਤ੍ਥ ਘਟੋ ਜੇਟ੍ਠਂਵ ਭਾਤਰਨ੍ਤਿ ਯਥਾ ਘਟਪਣ੍ਡਿਤੋ ਅਤ੍ਤਨੋ ਜੇਟ੍ਠਭਾਤਰਂ ਮਤਪੁਤ੍ਤਸੋਕਾਭਿਭੂਤਂ ਅਤ੍ਤਨੋ ਉਪਾਯਕੋਸਲ੍ਲੇਨ ਚੇਵ ਧਮ੍ਮਕਥਾਯ ਚ ਤਤੋ ਪੁਤ੍ਤਸੋਕਤੋ ਵਿਨਿਵਤ੍ਤਯਿ, ਏਵਂ ਅਞ੍ਞੇਪਿ ਸਪ੍ਪਞ੍ਞਾ ਯੇ ਹੋਨ੍ਤਿ ਅਨੁਕਮ੍ਪਕਾ, ਤੇ ਞਾਤੀਨਂ ਉਪਕਾਰਂ ਕਰੋਨ੍ਤੀਤਿ ਅਤ੍ਥੋ.

੨੨੬. ਯਸ੍ਸ ਏਤਾਦਿਸਾ ਹੋਨ੍ਤੀਤਿ ਅਯਂ ਅਭਿਸਮ੍ਬੁਦ੍ਧਗਾਥਾ. ਤਸ੍ਸਤ੍ਥੋ – ਯਥਾ ਯੇਨ ਕਾਰਣੇਨ ਪੁਤ੍ਤਸੋਕਪਰੇਤਂ ਰਾਜਾਨਂ ਵਾਸੁਦੇਵਂ ਘਟਪਣ੍ਡਿਤੋ ਸੋਕਹਰਣਤ੍ਥਾਯ ਸੁਭਾਸਿਤੇਨ ਅਨ੍ਵੇਸਿ ਅਨੁਏਸਿ, ਯਸ੍ਸ ਅਞ੍ਞਸ੍ਸਾਪਿ ਏਤਾਦਿਸਾ ਪਣ੍ਡਿਤਾ ਅਮਚ੍ਚਾ ਪਟਿਲਦ੍ਧਾ ਅਸ੍ਸੁ, ਤਸ੍ਸ ਕੁਤੋ ਸੋਕੋਤਿ! ਸੇਸਗਾਥਾ ਹੇਟ੍ਠਾ ਵੁਤ੍ਤਤ੍ਥਾ ਏਵਾਤਿ.

ਸਤ੍ਥਾ ਇਮਂ ਧਮ੍ਮਦੇਸਨਂ ਆਹਰਿਤ੍ਵਾ ‘‘ਏਵਂ, ਉਪਾਸਕ, ਪੋਰਾਣਕਪਣ੍ਡਿਤਾ ਪਣ੍ਡਿਤਾਨਂ ਕਥਂ ਸੁਤ੍ਵਾ ਪੁਤ੍ਤਸੋਕਂ ਹਰਿਂਸੂ’’ਤਿ ਵਤ੍ਵਾ ਸਚ੍ਚਾਨਿ ਪਕਾਸੇਤ੍ਵਾ ਜਾਤਕਂ ਸਮੋਧਾਨੇਸਿ. ਸਚ੍ਚਪਰਿਯੋਸਾਨੇ ਉਪਾਸਕੋ ਸੋਤਾਪਤ੍ਤਿਫਲੇ ਪਤਿਟ੍ਠਹੀਤਿ.

ਕਣ੍ਹਪੇਤਵਤ੍ਥੁਵਣ੍ਣਨਾ ਨਿਟ੍ਠਿਤਾ.