੩. ਮਤ੍ਤਾਪੇਤਿਵਤ੍ਥੁਵਣ੍ਣਨਾ

ਨਗ੍ਗਾ ਦੁਬ੍ਬਣ੍ਣਰੂਪਾਸੀਤਿ ਇਦਂ ਸਤ੍ਥਰਿ ਜੇਤਵਨੇ ਵਿਹਰਨ੍ਤੇ ਮਤ੍ਤਂ ਨਾਮ ਪੇਤਿਂ ਆਰਬ੍ਭ ਵੁਤ੍ਤਂ. ਸਾਵਤ੍ਥਿਯਂ ਕਿਰ ਅਞ੍ਞਤਰੋ ਕੁਟੁਮ੍ਬਿਕੋ ਸਦ੍ਧੋ ਪਸਨ੍ਨੋ ਅਹੋਸਿ. ਤਸ੍ਸ ਭਰਿਯਾ ਅਸ੍ਸਦ੍ਧਾ ਅਪ੍ਪਸਨ੍ਨਾ ਕੋਧਨਾ ਵਞ੍ਝਾ ਚ ਅਹੋਸਿ ਨਾਮੇਨ ਮਤ੍ਤਾ ਨਾਮ. ਅਥ ਸੋ ਕੁਟੁਮ੍ਬਿਕੋ ਕੁਲਵਂਸੂਪਚ੍ਛੇਦਨਭਯੇਨ ਸਦਿਸਕੁਲਤੋ ਤਿਸ੍ਸਂ ਨਾਮ ਅਞ੍ਞਂ ਕਞ੍ਞਂ ਆਨੇਸਿ. ਸਾ ਅਹੋਸਿ ਸਦ੍ਧਾ ਪਸਨ੍ਨਾ ਸਾਮਿਨੋ ਚ ਪਿਯਾ ਮਨਾਪਾ, ਸਾ ਨਚਿਰਸ੍ਸੇਵ ਗਬ੍ਭਿਨੀ ਹੁਤ੍ਵਾ ਦਸਮਾਸਚ੍ਚਯੇਨ ਪੁਤ੍ਤਂ ਵਿਜਾਯਿ, ‘‘ਭੂਤੋ’’ਤਿਸ੍ਸ ਨਾਮਂ ਅਹੋਸਿ. ਸਾ ਗੇਹਸ੍ਸਾਮਿਨੀ ਹੁਤ੍ਵਾ ਚਤ੍ਤਾਰੋ ਭਿਕ੍ਖੂ ਸਕ੍ਕਚ੍ਚਂ ਉਪਟ੍ਠਹਿ, ਵਞ੍ਝਾ ਪਨ ਤਂ ਉਸੂਯਤਿ.

ਤਾ ਉਭੋਪਿ ਏਕਸ੍ਮਿਂ ਦਿਵਸੇ ਸੀਸਂ ਨ੍ਹਤ੍ਵਾ ਅਲ੍ਲਕੇਸਾ ਅਟ੍ਠਂਸੁ, ਕੁਟੁਮ੍ਬਿਕੋ ਗੁਣਵਸੇਨ ਤਿਸ੍ਸਾਯ ਆਬਦ੍ਧਸਿਨੇਹੋ ਮਨੁਞ੍ਞੇਨ ਹਦਯੇਨ ਤਾਯ ਸਦ੍ਧਿਂ ਬਹੁਂ ਸਲ੍ਲਪਨ੍ਤੋ ਅਟ੍ਠਾਸਿ. ਤਂ ਅਸਹਮਾਨਾ ਮਤ੍ਤਾ ਇਸ੍ਸਾਪਕਤਾ ਗੇਹੇ ਸਮ੍ਮਜ੍ਜਿਤ੍ਵਾ ਠਪਿਤਂ ਸਙ੍ਕਾਰਂ ਤਿਸ੍ਸਾਯ ਮਤ੍ਥਕੇ ਓਕਿਰਿ. ਸਾ ਅਪਰੇਨ ਸਮਯੇਨ ਕਾਲਂ ਕਤ੍ਵਾ ਪੇਤਯੋਨਿਯਂ ਨਿਬ੍ਬਤ੍ਤਿਤ੍ਵਾ ਅਤ੍ਤਨੋ ਕਮ੍ਮਬਲੇਨ ਪਞ੍ਚਵਿਧਂ ਦੁਕ੍ਖਂ ਅਨੁਭਵਤਿ. ਤਂ ਪਨ ਦੁਕ੍ਖਂ ਪਾਲ਼ਿਤੋ ਏਵ ਵਿਞ੍ਞਾਯਤਿ. ਅਥੇਕਦਿਵਸਂ ਸਾ ਪੇਤੀ ਸਞ੍ਝਾਯ ਵੀਤਿਵਤ੍ਤਾਯ ਗੇਹਸ੍ਸ ਪਿਟ੍ਠਿਪਸ੍ਸੇ ਨ੍ਹਾਯਨ੍ਤਿਯਾ ਤਿਸ੍ਸਾਯ ਅਤ੍ਤਾਨਂ ਦਸ੍ਸੇਸਿ. ਤਂ ਦਿਸ੍ਵਾ ਤਿਸ੍ਸਾ –

੧੩੪. ‘‘ਨਗ੍ਗਾ ਦੁਬ੍ਬਣ੍ਣਰੂਪਾਸਿ, ਕਿਸਾ ਧਮਨਿਸਨ੍ਥਤਾ;

ਉਪ੍ਫਾਸੁਲਿਕੇ ਕਿਸਿਕੇ, ਕਾ ਨੁ ਤ੍ਵਂ ਇਧ ਤਿਟ੍ਠਸੀ’’ਤਿ. –

ਗਾਥਾਯ ਪਟਿਪੁਚ੍ਛਿ. ਇਤਰਾ –

੧੩੫. ‘‘ਅਹਂ ਮਤ੍ਤਾ ਤੁਵਂ ਤਿਸ੍ਸਾ, ਸਪਤ੍ਤੀ ਤੇ ਪੁਰੇ ਅਹੁਂ;

ਪਾਪਕਮ੍ਮਂ ਕਰਿਤ੍ਵਾਨ, ਪੇਤਲੋਕਂ ਇਤੋ ਗਤਾ’’ਤਿ. –

ਗਾਥਾਯ ਪਟਿਵਚਨਂ ਅਦਾਸਿ. ਤਤ੍ਥ ਅਹਂ ਮਤ੍ਤਾ ਤੁਵਂ ਤਿਸ੍ਸਾਤਿ ਅਹਂ ਮਤ੍ਤਾ ਨਾਮ, ਤੁਵਂ ਤਿਸ੍ਸਾ ਨਾਮ. ਪੁਰੇਤਿ ਪੁਰਿਮਤ੍ਤਭਾਵੇ. ਤੇਤਿ ਤੁਯ੍ਹਂ ਸਪਤ੍ਤੀ ਅਹੁਂ, ਅਹੋਸਿਨ੍ਤਿ ਅਤ੍ਥੋ. ਪੁਨ ਤਿਸ੍ਸਾ –

੧੩੬. ‘‘ਕਿਂ ਨੁ ਕਾਯੇਨ ਵਾਚਾਯ, ਮਨਸਾ ਦੁਕ੍ਕਟਂ ਕਤਂ;

ਕਿਸ੍ਸਕਮ੍ਮਵਿਪਾਕੇਨ, ਪੇਤਲੋਕਂ ਇਤੋ ਗਤਾ’’ਤਿ. –

ਗਾਥਾਯ ਕਤਕਮ੍ਮਂ ਪੁਚ੍ਛਿ. ਪੁਨ ਇਤਰਾ –

੧੩੭. ‘‘ਚਣ੍ਡੀ ਚ ਫਰੁਸਾ ਚਾਸਿਂ, ਇਸ੍ਸੁਕੀ ਮਚ੍ਛਰੀ ਸਠਾ;

ਤਾਹਂ ਦੁਰੁਤ੍ਤਂ ਵਤ੍ਵਾਨ, ਪੇਤਲੋਕਂ ਇਤੋ ਗਤਾ’’ਤਿ. –

ਗਾਥਾਯ ਅਤ੍ਤਨਾ ਕਤਕਮ੍ਮਂ ਆਚਿਕ੍ਖਿ. ਤਤ੍ਥ ਚਣ੍ਡੀਤਿ ਕੋਧਨਾ. ਫਰੁਸਾਤਿ ਫਰੁਸਵਚਨਾ. ਆਸਿਨ੍ਤਿ ਅਹੋਸਿਂ. ਤਾਹਨ੍ਤਿ ਤਂ ਅਹਂ. ਦੁਰੁਤ੍ਤਨ੍ਤਿ ਦੁਬ੍ਭਾਸਿਤਂ ਨਿਰਤ੍ਥਕਵਚਨਂ. ਇਤੋ ਪਰਮ੍ਪਿ ਤਾਸਂ ਵਚਨਪਟਿਵਚਨਵਸੇਨੇਵ ਗਾਥਾ ਪਵਤ੍ਤਾ –

੧੩੮. ‘‘ਸਬ੍ਬਂ ਅਹਮ੍ਪਿ ਜਾਨਾਮਿ, ਯਥਾ ਤ੍ਵਂ ਚਣ੍ਡਿਕਾ ਅਹੁ;

ਅਞ੍ਞਞ੍ਚ ਖੋ ਤਂ ਪੁਚ੍ਛਾਮਿ, ਕੇਨਾਸਿ ਪਂਸੁਕੁਨ੍ਥਿਤਾ.

੧੩੯. ‘‘ਸੀਸਂਨ੍ਹਾਤਾ ਤੁਵਂ ਆਸਿ, ਸੁਚਿਵਤ੍ਥਾ ਅਲਙ੍ਕਤਾ;

ਅਹਞ੍ਚ ਖੋ ਅਧਿਮਤ੍ਤਂ, ਸਮਲਙ੍ਕਤਤਰਾ ਤਯਾ.

੧੪੦. ‘‘ਤਸ੍ਸਾ ਮੇ ਪੇਕ੍ਖਮਾਨਾਯ, ਸਾਮਿਕੇਨ ਸਮਨ੍ਤਯਿ;

ਤਤੋ ਮੇ ਇਸ੍ਸਾ ਵਿਪੁਲਾ, ਕੋਧੋ ਮੇ ਸਮਜਾਯਥ.

੧੪੧. ‘‘ਤਤੋ ਪਂਸੁਂ ਗਹੇਤ੍ਵਾਨ, ਪਂਸੁਨਾ ਤਞ੍ਹਿ ਓਕਿਰਿਂ;

ਤਸ੍ਸਕਮ੍ਮਵਿਪਾਕੇਨ, ਤੇਨਮ੍ਹਿ ਪਂਸੁਕੁਨ੍ਥਿਤਾ.

੧੪੨. ‘‘ਸਬ੍ਬਂ ਅਹਮ੍ਪਿ ਜਾਨਾਮਿ, ਪਂਸੁਨਾ ਮਂ ਤ੍ਵਮੋਕਿਰਿ;

ਅਞ੍ਞਞ੍ਚ ਖੋ ਤਂ ਪੁਚ੍ਛਾਮਿ, ਕੇਨ ਖਜ੍ਜਸਿ ਕਚ੍ਛੁਯਾ.

੧੪੩. ‘‘ਭੇਸਜ੍ਜਹਾਰੀ ਉਭਯੋ, ਵਨਨ੍ਤਂ ਅਗਮਿਮ੍ਹਸੇ;

ਤ੍ਵਞ੍ਚ ਭੇਸਜ੍ਜਮਾਹਰਿ, ਅਹਞ੍ਚ ਕਪਿਕਚ੍ਛੁਨੋ.

੧੪੪. ‘‘ਤਸ੍ਸਾ ਤ੍ਯਾਜਾਨਮਾਨਾਯ, ਸੇਯ੍ਯਂ ਤ੍ਯਾਹਂ ਸਮੋਕਿਰਿਂ;

ਤਸ੍ਸਕਮ੍ਮਵਿਪਾਕੇਨ, ਤੇਨ ਖਜ੍ਜਾਮਿ ਕਚ੍ਛੁਯਾ.

੧੪੫. ‘‘ਸਬ੍ਬਂ ਅਹਮ੍ਪਿ ਜਾਨਾਮਿ, ਸੇਯ੍ਯਂ ਮੇ ਤ੍ਵਂ ਸਮੋਕਿਰਿ;

ਅਞ੍ਞਞ੍ਚ ਖੋ ਤਂ ਪੁਚ੍ਛਾਮਿ, ਕੇਨਾਸਿ ਨਗ੍ਗਿਯਾ ਤੁਵਂ.

੧੪੬. ‘‘ਸਹਾਯਾਨਂ ਸਮਯੋ ਆਸਿ, ਞਾਤੀਨਂ ਸਮਿਤੀ ਅਹੁ;

ਤ੍ਵਞ੍ਚ ਆਮਨ੍ਤਿਤਾ ਆਸਿ, ਸਸਾਮਿਨੀ ਨੋ ਚ ਖੋਹਂ.

੧੪੭. ‘‘ਤਸ੍ਸਾ ਤ੍ਯਾਜਾਨਮਾਨਾਯ, ਦੁਸ੍ਸਂ ਤ੍ਯਾਹਂ ਅਪਾਨੁਦਿਂ;

ਤਸ੍ਸਕਮ੍ਮਵਿਪਾਕੇਨ, ਤੇਨਮ੍ਹਿ ਨਗ੍ਗਿਯਾ ਅਹਂ.

੧੪੮. ‘‘ਸਬ੍ਬਂ ਅਹਮ੍ਪਿ ਜਾਨਾਮਿ, ਦੁਸ੍ਸਂ ਮੇ ਤ੍ਵਂ ਅਪਾਨੁਦਿ;

ਅਞ੍ਞਞ੍ਚ ਖੋ ਤਂ ਪੁਚ੍ਛਾਮਿ, ਕੇਨਾਸਿ ਗੂਥਗਨ੍ਧਿਨੀ.

੧੪੯. ‘‘ਤਵ ਗਨ੍ਧਞ੍ਚ ਮਾਲਞ੍ਚ, ਪਚ੍ਚਗ੍ਘਞ੍ਚ ਵਿਲੇਪਨਂ;

ਗੂਥਕੂਪੇ ਅਤਾਰੇਸਿਂ, ਤਂ ਪਾਪਂ ਪਕਤਂ ਮਯਾ;

ਤਸ੍ਸਕਮ੍ਮਵਿਪਾਕੇਨ, ਤੇਨਮ੍ਹਿ ਗੂਥਗਨ੍ਧਿਨੀ.

੧੫੦. ‘‘ਸਬ੍ਬਂ ਅਹਮ੍ਪਿ ਜਾਨਾਮਿ, ਤਂ ਪਾਪਂ ਪਕਤਂ ਤਯਾ;

ਅਞ੍ਞਞ੍ਚ ਖੋ ਤਂ ਪੁਚ੍ਛਾਮਿ, ਕੇਨਾਸਿ ਦੁਗ੍ਗਤਾ ਤੁਵਂ.

੧੫੧. ‘‘ਉਭਿਨ੍ਨਂ ਸਮਕਂ ਆਸਿ, ਯਂ ਗੇਹੇ ਵਿਜ੍ਜਤੇ ਧਨਂ;

ਸਨ੍ਤੇਸੁ ਦੇਯ੍ਯਧਮ੍ਮੇਸੁ, ਦੀਪਂ ਨਾਕਾਸਿਮਤ੍ਤਨੋ;

ਤਸ੍ਸਕਮ੍ਮਵਿਪਾਕੇਨ, ਤੇਨਮ੍ਹਿ ਦੁਗ੍ਗਤਾ ਅਹਂ.

੧੫੨. ‘‘ਤਦੇਵ ਮਂ ਤ੍ਵਂ ਅਵਚ, ਪਾਪਕਮ੍ਮਂ ਨਿਸੇਵਸਿ;

ਨ ਹਿ ਪਾਪੇਹਿ ਕਮ੍ਮੇਹਿ, ਸੁਲਭਾ ਹੋਤਿ ਸੁਗ੍ਗਤਿ.

੧੫੩. ‘‘ਵਾਮਤੋ ਮਂ ਤ੍ਵਂ ਪਚ੍ਚੇਸਿ, ਅਥੋਪਿ ਮਂ ਉਸੂਯਸਿ;

ਪਸ੍ਸ ਪਾਪਾਨਂ ਕਮ੍ਮਾਨਂ, ਵਿਪਾਕੋ ਹੋਤਿ ਯਾਦਿਸੋ.

੧੫੪. ‘‘ਤੇ ਘਰਾ ਤਾ ਚ ਦਾਸਿਯੋ, ਤਾਨੇਵਾਭਰਣਾਨਿਮੇ;

ਤੇ ਅਞ੍ਞੇ ਪਰਿਚਾਰੇਨ੍ਤਿ, ਨ ਭੋਗਾ ਹੋਨ੍ਤਿ ਸਸ੍ਸਤਾ.

੧੫੫. ‘‘ਇਦਾਨਿ ਭੂਤਸ੍ਸ ਪਿਤਾ, ਆਪਣਾ ਗੇਹਮੇਹਿਤਿ;

ਅਪ੍ਪੇਵ ਤੇ ਦਦੇ ਕਿਞ੍ਚਿ, ਮਾ ਸੁ ਤਾਵ ਇਤੋ ਅਗਾ.

੧੫੬. ‘‘ਨਗ੍ਗਾ ਦੁਬ੍ਬਣ੍ਣਰੂਪਾਮ੍ਹਿ, ਕਿਸਾ ਧਮਨਿਸਨ੍ਥਤਾ;

ਕੋਪੀਨਮੇਤਂ ਇਤ੍ਥੀਨਂ, ਮਾ ਮਂ ਭੂਤਪਿਤਾਦ੍ਦਸ.

੧੫੭. ‘‘ਹਨ੍ਦ ਕਿਂ ਵਾ ਤ੍ਯਾਹਂ ਦਮ੍ਮਿ, ਕਿਂ ਵਾ ਤੇਚ ਕਰੋਮਹਂ;

ਯੇਨ ਤ੍ਵਂ ਸੁਖਿਤਾ ਅਸ੍ਸ, ਸਬ੍ਬਕਾਮਸਮਿਦ੍ਧਿਨੀ.

੧੫੮. ‘‘ਚਤ੍ਤਾਰੋ ਭਿਕ੍ਖੂ ਸਙ੍ਘਤੋ, ਚਤ੍ਤਾਰੋ ਪਨ ਪੁਗ੍ਗਲੇ;

ਅਟ੍ਠ ਭਿਕ੍ਖੂ ਭੋਜਯਿਤ੍ਵਾ, ਮਮ ਦਕ੍ਖਿਣਮਾਦਿਸ;

ਤਦਾਹਂ ਸੁਖਿਤਾ ਹੇਸ੍ਸਂ, ਸਬ੍ਬਕਾਮਸਮਿਦ੍ਧਿਨੀ.

੧੫੯. ‘‘ਸਾਧੂਤਿ ਸਾ ਪਟਿਸ੍ਸੁਤ੍ਵਾ, ਭੋਜਯਿਤ੍ਵਾਟ੍ਠ ਭਿਕ੍ਖਵੋ;

ਵਤ੍ਥੇਹਚ੍ਛਾਦਯਿਤ੍ਵਾਨ, ਤਸ੍ਸਾ ਦਕ੍ਖਿਣਮਾਦਿਸੀ.

੧੬੦. ‘‘ਸਮਨਨ੍ਤਰਾਨੁਦ੍ਦਿਟ੍ਠੇ, ਵਿਪਾਕੋ ਉਦਪਜ੍ਜਥ;

ਭੋਜਨਚ੍ਛਾਦਨਪਾਨੀਯਂ, ਦਕ੍ਖਿਣਾਯ ਇਦਂ ਫਲਂ.

੧੬੧. ‘‘ਤਤੋ ਸੁਦ੍ਧਾ ਸੁਚਿਵਸਨਾ, ਕਾਸਿਕੁਤ੍ਤਮਧਾਰਿਨੀ;

ਵਿਚਿਤ੍ਤਵਤ੍ਥਾਭਰਣਾ, ਸਪਤ੍ਤਿਂ ਉਪਸਙ੍ਕਮਿ.

੧੬੨. ‘‘ਅਭਿਕ੍ਕਨ੍ਤੇਨ ਵਣ੍ਣੇਨ, ਯਾ ਤ੍ਵਂ ਤਿਟ੍ਠਸਿ ਦੇਵਤੇ;

ਓਭਾਸੇਨ੍ਤੀ ਦਿਸਾ ਸਬ੍ਬਾ, ਓਸਧੀ ਵਿਯ ਤਾਰਕਾ.

੧੬੩. ‘‘ਕੇਨ ਤੇਤਾਦਿਸੋ ਵਣ੍ਣੋ, ਕੇਨ ਤੇ ਇਧ ਮਿਜ੍ਝਤਿ;

ਉਪ੍ਪਜ੍ਜਨ੍ਤਿ ਚ ਤੇ ਭੋਗਾ, ਯੇ ਕੇਚਿ ਮਨਸੋ ਪਿਯਾ.

੧੬੪. ‘‘ਪੁਚ੍ਛਾਮਿ ਤਂ ਦੇਵਿ ਮਹਾਨੁਭਾਵੇ, ਮਨੁਸ੍ਸਭੂਤਾ ਕਿਮਕਾਸੀ ਪੁਞ੍ਞਂ;

ਕੇਨਾਸਿ ਏਵਂ ਜਲਿਤਾਨੁਭਾਵਾ, ਵਣ੍ਣੋ ਚ ਤੇ ਸਬ੍ਬਦਿਸਾ ਪਭਾਸਤੀਤਿ.

੧੬੫. ‘‘ਅਹਂ ਮਤ੍ਤਾ ਤੁਵਂ ਤਿਸ੍ਸਾ, ਸਪਤ੍ਤੀ ਤੇ ਪੁਰੇ ਅਹੁਂ;

ਪਾਪਕਮ੍ਮਂ ਕਰਿਤ੍ਵਾਨ, ਪੇਤਲੋਕਂ ਇਤੋ ਗਤਾ.

੧੬੬. ‘‘ਤਵ ਦਿਨ੍ਨੇਨ ਦਾਨੇਨ, ਮੋਦਾਮਿ ਅਕੁਤੋਭਯਾ;

ਚਿਰਂ ਜੀਵਾਹਿ ਭਗਿਨਿ, ਸਹ ਸਬ੍ਬੇਹਿ ਞਾਤਿਭਿ;

ਅਸੋਕਂ ਵਿਰਜਂ ਠਾਨਂ, ਆਵਾਸਂ ਵਸਵਤ੍ਤਿਨਂ.

੧੬੭. ‘‘ਇਧ ਧਮ੍ਮਂ ਚਰਿਤ੍ਵਾਨ, ਦਾਨਂ ਦਤ੍ਵਾਨ ਸੋਭਨੇ;

ਵਿਨੇਯ੍ਯ ਮਚ੍ਛੇਰਮਲਂ ਸਮੂਲਂ, ਅਨਿਨ੍ਦਿਤਾ ਸਗ੍ਗਮੁਪੇਹਿ ਠਾਨ’’ਨ੍ਤਿ.

੧੩੮. ਤਤ੍ਥ ਸਬ੍ਬਂ ਅਹਮ੍ਪਿ ਜਾਨਾਮਿ, ਯਥਾ ਤ੍ਵਂ ਚਣ੍ਡਿਕਾ ਅਹੂਤਿ ‘‘ਚਣ੍ਡੀ ਚ ਫਰੁਸਾ ਚਾਸਿ’’ਨ੍ਤਿ ਯਂ ਤਯਾ ਵੁਤ੍ਤਂ, ਤਂ ਸਬ੍ਬਂ ਅਹਮ੍ਪਿ ਜਾਨਾਮਿ, ਯਥਾ ਤ੍ਵਂ ਚਣ੍ਡਿਕਾ ਕੋਧਨਾ ਫਰੁਸਵਚਨਾ ਇਸ੍ਸੁਕੀ ਮਚ੍ਛਰੀ ਸਠਾ ਚ ਅਹੋਸਿ. ਅਞ੍ਞਞ੍ਚ ਖੋ ਤਂ ਪੁਚ੍ਛਾਮੀਤਿ ਅਞ੍ਞਂ ਪੁਨ ਤਂ ਇਦਾਨਿ ਪੁਚ੍ਛਾਮਿ. ਕੇਨਾਸਿ ਪਂਸੁਕੁਨ੍ਥਿਤਾਤਿ ਕੇਨ ਕਮ੍ਮੇਨ ਸਙ੍ਕਾਰਪਂਸੂਤਿ ਓਗੁਣ੍ਠਿਤਾ ਸਬ੍ਬਸੋ ਓਕਿਣ੍ਣਸਰੀਰਾ ਅਹੂਤਿ ਅਤ੍ਥੋ.

੧੩੯-੪੦. ਸੀਸਂਨ੍ਹਾਤਾਤਿ ਸਸੀਸਂ ਨ੍ਹਾਤਾ. ਅਧਿਮਤ੍ਤਨ੍ਤਿ ਅਧਿਕਤਰਂ. ਸਮਲਙ੍ਕਤਤਰਾਤਿ ਸਮ੍ਮਾ ਅਤਿਸਯੇਨ ਅਲਙ੍ਕਤਾ. ‘‘ਅਧਿਮਤ੍ਤਾ’’ਤਿ ਵਾ ਪਾਠੋ, ਅਤਿਵਿਯ ਮਤ੍ਤਾ ਮਾਨਮਦਮਤ੍ਤਾ, ਮਾਨਨਿਸ੍ਸਿਤਾਤਿ ਅਤ੍ਥੋ. ਤਯਾਤਿ ਭੋਤਿਯਾ. ਸਾਮਿਕੇਨ ਸਮਨ੍ਤਯੀਤਿ ਸਾਮਿਕੇਨ ਸਦ੍ਧਿਂ ਅਲ੍ਲੋਪਸਲ੍ਲਾਪਵਸੇਨ ਕਥੇਸਿ.

੧੪੨-੧੪੪. ਖਜ੍ਜਸਿ ਕਚ੍ਛੁਯਾਤਿ ਕਚ੍ਛੁਰੋਗੇਨ ਖਾਦੀਯਸਿ, ਬਾਧੀਯਸੀਤਿ ਅਤ੍ਥੋ. ਭੇਸਜ੍ਜਹਾਰੀਤਿ ਭੇਸਜ੍ਜਹਾਰਿਨਿਯੋ ਓਸਧਹਾਰਿਕਾਯੋ. ਉਭਯੋਤਿ ਦੁਵੇ, ਤ੍ਵਞ੍ਚ ਅਹਞ੍ਚਾਤਿ ਅਤ੍ਥੋ. ਵਨਨ੍ਤਨ੍ਤਿ ਵਨਂ. ਤ੍ਵਞ੍ਚ ਭੇਸਜ੍ਜਮਾਹਰੀਤਿ ਤ੍ਵਂ ਵੇਜ੍ਜੇਹਿ ਵੁਤ੍ਤਂ ਅਤ੍ਤਨੋ ਉਪਕਾਰਾਵਹਂ ਭੇਸਜ੍ਜਂ ਆਹਰਿ. ਅਹਞ੍ਚ ਕਪਿਕਚ੍ਛੁਨੋਤਿ ਅਹਂ ਪਨ ਕਪਿਕਚ੍ਛੁਫਲਾਨਿ ਦੁਫਸ੍ਸਫਲਾਨਿ ਆਹਰਿਂ. ਕਪਿਕਚ੍ਛੂਤਿ ਵਾ ਸਯਂਭੂਤਾ ਵੁਚ੍ਚਤਿ, ਤਸ੍ਮਾ ਸਯਂਭੂਤਾਯ ਪਤ੍ਤਫਲਾਨਿ ਆਹਰਿਨ੍ਤਿ ਅਤ੍ਥੋ. ਸੇਯ੍ਯਂ ਤ੍ਯਾਹਂ ਸਮੋਕਿਰਿਨ੍ਤਿ ਤਵ ਸੇਯ੍ਯਂ ਅਹਂ ਕਪਿਕਚ੍ਛੁਫਲਪਤ੍ਤੇਹਿ ਸਮਨ੍ਤਤੋ ਅਵਕਿਰਿਂ.

੧੪੬-੧੪੭. ਸਹਾਯਾਨਨ੍ਤਿ ਮਿਤ੍ਤਾਨਂ. ਸਮਯੋਤਿ ਸਮਾਗਮੋ. ਞਾਤੀਨਨ੍ਤਿ ਬਨ੍ਧੂਨਂ. ਸਮਿਤੀਤਿ ਸਨ੍ਨਿਪਾਤੋ. ਆਮਨ੍ਤਿਤਾਤਿ ਮਙ੍ਗਲਕਿਰਿਯਾਵਸੇਨ ਨਿਮਨ੍ਤਿਤਾ. ਸਸਾਮਿਨੀਤਿ ਸਭਤ੍ਤਿਕਾ, ਸਹ ਭਤ੍ਤੁਨਾਤਿ ਅਤ੍ਥੋ. ਨੋ ਚ ਖੋਹਨ੍ਤਿ ਨੋ ਚ ਖੋ ਅਹਂ ਆਮਨ੍ਤਿਤਾ ਆਸਿਨ੍ਤਿ ਯੋਜਨਾ. ਦੁਸ੍ਸਂ ਤ੍ਯਾਹਨ੍ਤਿ ਦੁਸ੍ਸਂ ਤੇ ਅਹਂ. ਅਪਾਨੁਦਿਨ੍ਤਿ ਚੋਰਿਕਾਯ ਅਵਹਰਿਂ ਅਗ੍ਗਹੋਸਿਂ.

੧੪੯. ਪਚ੍ਚਗ੍ਘਨ੍ਤਿ ਅਭਿਨਵਂ, ਮਹਗ੍ਘਂ ਵਾ. ਅਤਾਰੇਸਿਨ੍ਤਿ ਖਿਪਿਂ. ਗੂਥਗਨ੍ਧਿਨੀਤਿ ਗੂਥਗਨ੍ਧਗਨ੍ਧਿਨੀ ਕਰੀਸਵਾਯਿਨੀ.

੧੫੧. ਯਂ ਗੇਹੇ ਵਿਜ੍ਜਤੇ ਧਨਨ੍ਤਿ ਯਂ ਗੇਹੇ ਧਨਂ ਉਪਲਬ੍ਭਤਿ, ਤਂ ਤੁਯ੍ਹਂ ਮਯ੍ਹਞ੍ਚਾਤਿ ਅਮ੍ਹਾਕਂ ਉਭਿਨ੍ਨ ਸਮਕਂ ਤੁਲ੍ਯਮੇਵ ਆਸਿ. ਸਨ੍ਤੇਸੂਤਿ ਵਿਜ੍ਜਮਾਨੇਸੁ. ਦੀਪਨ੍ਤਿ ਪਤਿਟ੍ਠਂ, ਪੁਞ੍ਞਕਮ੍ਮਂ ਸਨ੍ਧਾਯ ਵਦਤਿ.

੧੫੨. ਏਵਂ ਸਾ ਪੇਤੀ ਤਿਸ੍ਸਾਯ ਪੁਚ੍ਛਿਤਮਤ੍ਥਂ ਕਤ੍ਥੇਤ੍ਵਾ ਪੁਨ ਪੁਬ੍ਬੇ ਤਸ੍ਸਾ ਵਚਨਂ ਅਕਤ੍ਵਾ ਅਤ੍ਤਨਾ ਕਤਂ ਅਪਰਾਧਂ ਪਕਾਸੇਨ੍ਤੀ ‘‘ਤਦੇਵ ਮਂ ਤ੍ਵ’’ਨ੍ਤਿਆਦਿਮਾਹ. ਤਤ੍ਥ ਤਦੇਵਾਤਿ ਤਦਾ ਏਵ, ਮਯ੍ਹਂ ਮਨੁਸ੍ਸਤ੍ਤਭਾਵੇ ਠਿਤਕਾਲੇਯੇਵ. ਤਥੇਵਾਤਿ ਵਾ ਪਾਠੋ, ਯਥਾ ਏਤਰਹਿ ਜਾਤਂ, ਤਂ ਤਥਾ ਏਵਾਤਿ ਅਤ੍ਥੋ. ਮਨ੍ਤਿ ਅਤ੍ਤਾਨਂ ਨਿਦ੍ਦਿਸਤਿ, ਤ੍ਵਨ੍ਤਿ ਤਿਸ੍ਸਂ. ਅਵਚਾਤਿ ਅਭਣਿ. ਯਥਾ ਪਨ ਅਵਚ, ਤਂ ਦਸ੍ਸੇਤੁਂ ‘‘ਪਾਪਕਮ੍ਮ’’ਨ੍ਤਿਆਦਿ ਵੁਤ੍ਤਂ. ‘‘ਪਾਪਕਮ੍ਮਾਨੀ’’ਤਿ ਪਾਲ਼ਿ. ‘‘ਤ੍ਵਂ ਪਾਪਕਮ੍ਮਾਨਿਯੇਵ ਕਰੋਸਿ, ਪਾਪੇਹਿ ਪਨ ਕਮ੍ਮੇਹਿ ਸੁਗਤਿ ਸੁਲਭਾ ਨ ਹੋਤਿ, ਅਥ ਖੋ ਦੁਗ੍ਗਤਿ ਏਵ ਸੁਲਭਾ’’ਤਿ ਯਥਾ ਮਂ ਤ੍ਵਂ ਪੁਬ੍ਬੇ ਅਵਚ ਓਵਦਿ, ਤਂ ਤਥੇਵਾਤਿ ਵਦਤਿ.

੧੫੩. ਤਂ ਸੁਤ੍ਵਾ ਤਿਸ੍ਸਾ ‘‘ਵਾਮਤੋ ਮਂ ਤ੍ਵਂ ਪਚ੍ਚੇਸੀ’’ਤਿਆਦਿਨਾ ਤਿਸ੍ਸੋ ਗਾਥਾ ਆਹ. ਤਤ੍ਥ ਵਾਮਤੋ ਮਂ ਤ੍ਵਂ ਪਚ੍ਚੇਸੀਤਿ ਵਿਲੋਮਤੋ ਮਂ ਤ੍ਵਂ ਅਧਿਗਚ੍ਛਸਿ, ਤੁਯ੍ਹਂ ਹਿਤੇਸਿਮ੍ਪਿ ਵਿਪਚ੍ਚਨੀਕਕਾਰਿਨਿਂ ਕਤ੍ਵਾ ਮਂ ਗਣ੍ਹਾਸਿ. ਮਂ ਉਸੂਯਸੀਤਿ ਮਯ੍ਹਂ ਉਸੂਯਸਿ, ਮਯਿ ਇਸ੍ਸਂ ਕਰੋਸਿ. ਪਸ੍ਸ ਪਾਪਾਨਂ ਕਮ੍ਮਾਨਂ, ਵਿਪਾਕੋ ਹੋਤਿ ਯਾਦਿਸੋਤਿ ਪਾਪਕਾਨਂ ਨਾਮ ਕਮ੍ਮਾਨਂ ਵਿਪਾਕੋ ਯਾਦਿਸੋ ਯਥਾ ਘੋਰਤਰੋ, ਤਂ ਪਚ੍ਚਕ੍ਖਤੋ ਪਸ੍ਸਾਤਿ ਵਦਤਿ.

੧੫੪. ਤੇ ਅਞ੍ਞੇ ਪਰਿਚਾਰੇਨ੍ਤੀਤਿ ਤੇ ਘਰੇ ਦਾਸਿਯੋ ਆਭਰਣਾਨਿ ਚ ਇਮਾਨਿ ਤਯਾ ਪੁਬ੍ਬੇ ਪਰਿਗ੍ਗਹਿਤਾਨਿ ਇਦਾਨਿ ਅਞ੍ਞੇ ਪਰਿਚਾਰੇਨ੍ਤਿ ਪਰਿਭੁਞ੍ਜਨ੍ਤਿ. ‘‘ਇਮੇ’’ਤਿ ਹਿ ਲਿਙ੍ਗਵਿਪਲ੍ਲਾਸੇਨ ਵੁਤ੍ਤਂ. ਨ ਭੋਗਾ ਹੋਨ੍ਤਿ ਸਸ੍ਸਤਾਤਿ ਭੋਗਾ ਨਾਮੇਤੇ ਨ ਸਸ੍ਸਤਾ ਅਨਵਟ੍ਠਿਤਾ ਤਾਵਕਾਲਿਕਾ ਮਹਾਯਗਮਨੀਯਾ, ਤਸ੍ਮਾ ਤਦਤ੍ਥਂ ਇਸ੍ਸਾਮਚ੍ਛਰਿਯਾਦੀਨਿ ਨ ਕਤ੍ਤਬ੍ਬਾਨੀਤਿ ਅਧਿਪ੍ਪਾਯੋ.

੧੫੫. ਇਦਾਨਿ ਭੂਤਸ੍ਸ ਪਿਤਾਤਿ ਇਦਾਨੇਵ ਭੂਤਸ੍ਸ ਮਯ੍ਹਂ ਪੁਤ੍ਤਸ੍ਸ ਪਿਤਾ ਕੁਟੁਮ੍ਬਿਕੋ. ਆਪਣਾਤਿ ਆਪਣਤੋ ਇਮਂ ਗੇਹਂ ਏਹਿਤਿ ਆਗਮਿਸ੍ਸਤਿ. ਅਪ੍ਪੇਵ ਤੇ ਦਦੇ ਕਿਞ੍ਚੀਤਿ ਗੇਹਂ ਆਗਤੋ ਕੁਟੁਮ੍ਬਿਕੋ ਤੁਯ੍ਹਂ ਦਾਤਬ੍ਬਯੁਤ੍ਤਕਂ ਕਿਞ੍ਚਿ ਦੇਯ੍ਯਧਮ੍ਮਂ ਅਪਿ ਨਾਮ ਦਦੇਯ੍ਯ. ਮਾ ਸੁ ਤਾਵ ਇਤੋ ਅਗਾਤਿ ਇਤੋ ਗੇਹਸ੍ਸ ਪਚ੍ਛਾ ਵਤ੍ਥੁਤੋ ਮਾ ਤਾਵ ਅਗਮਾਸੀਤਿ ਤਂ ਅਨੁਕਮ੍ਪਮਾਨਾ ਆਹ.

੧੫੬. ਤਂ ਸੁਤ੍ਵਾ ਪੇਤੀ ਅਤ੍ਤਨੋ ਅਜ੍ਝਾਸਯਂ ਪਕਾਸੇਨ੍ਤੀ ‘‘ਨਗ੍ਗਾ ਦੁਬ੍ਬਣ੍ਣਰੂਪਾਮ੍ਹੀ’’ਤਿ ਗਾਥਮਾਹ. ਤਤ੍ਥ ਕੋਪੀਨਮੇਤਂ ਇਤ੍ਥੀਨਨ੍ਤਿ ਏਤਂ ਨਗ੍ਗਦੁਬ੍ਬਣ੍ਣਤਾਦਿਕਂ ਪਟਿਚ੍ਛਾਦੇਤਬ੍ਬਤਾਯ ਇਤ੍ਥੀਨਂ ਕੋਪੀਨਂ ਰੁਨ੍ਧਨੀਯਂ. ਮਾ ਮਂ ਭੂਤਪਿਤਾਦ੍ਦਸਾਤਿ ਤਸ੍ਮਾ ਭੂਤਸ੍ਸ ਪਿਤਾ ਕੁਟੁਮ੍ਬਿਕੋ ਮਂ ਮਾ ਅਦ੍ਦਕ੍ਖੀਤਿ ਲਜ੍ਜਮਾਨਾ ਵਦਤਿ.

੧੫੭. ਤਂ ਸੁਤ੍ਵਾ ਤਿਸ੍ਸਾ ਸਞ੍ਜਾਤਨੁਦ੍ਦਯਾ ‘‘ਹਨ੍ਦ ਕਿਂ ਵਾ ਤ੍ਯਾਹਂ ਦਮ੍ਮੀ’’ਤਿ ਗਾਥਮਾਹ. ਤਤ੍ਥ ਹਨ੍ਦਾਤਿ ਚੋਦਨਤ੍ਥੇ ਨਿਪਾਤੋ. ਕਿਂ ਵਾ ਤ੍ਯਾਹਂ ਦਮ੍ਮੀਤਿ ਕਿਂ ਤੇ ਅਹਂ ਦਮ੍ਮਿ, ਕਿਂ ਵਤ੍ਥਂ ਦਸ੍ਸਾਮਿ, ਉਦਾਹੁ ਭਤ੍ਤਨ੍ਤਿ. ਕਿਂ ਵਾ ਤੇਧ ਕਰੋਮਹਨ੍ਤਿ ਕਿਂ ਵਾ ਅਞ੍ਞਂ ਤੇ ਇਧ ਇਮਸ੍ਮਿਂ ਕਾਲੇ ਉਪਕਾਰਂ ਕਰਿਸ੍ਸਾਮਿ.

੧੫੮. ਤਂ ਸੁਤ੍ਵਾ ਪੇਤੀ ‘‘ਚਤ੍ਤਾਰੋ ਭਿਕ੍ਖੂ ਸਙ੍ਘਤੋ’’ਤਿ ਗਾਥਮਾਹ. ਤਤ੍ਥ ਚਤ੍ਤਾਰੋ ਭਿਕ੍ਖੂ ਸਙ੍ਘਤੋ, ਚਤ੍ਤਾਰੋ ਪਨ ਪੁਗ੍ਗਲੇਤਿ ਭਿਕ੍ਖੁਸਙ੍ਘਤੋ ਸਙ੍ਘਵਸੇਨ ਚਤ੍ਤਾਰੋ ਭਿਕ੍ਖੂ, ਪੁਗ੍ਗਲਵਸੇਨ ਚਤ੍ਤਾਰੋ ਭਿਕ੍ਖੂਤਿ ਏਵਂ ਅਟ੍ਠ ਭਿਕ੍ਖੂ ਯਥਾਰੁਚਿਂ ਭੋਜੇਤ੍ਵਾ ਤਂ ਦਕ੍ਖਿਣਂ ਮਮ ਆਦਿਸ, ਮਯ੍ਹਂ ਪਤ੍ਤਿਦਾਨਂ ਦੇਹਿ. ਤਦਾਹਂ ਸੁਖਿਤਾ ਹੇਸ੍ਸਨ੍ਤਿ ਯਦਾ ਤ੍ਵਂ ਦਕ੍ਖਿਣਂ ਮਮ ਉਦ੍ਦਿਸਿਸ੍ਸਸਿ, ਤਦਾ ਅਹਂ ਸੁਖਿਤਾ ਸੁਖਪ੍ਪਤ੍ਤਾ ਸਬ੍ਬਕਾਮਸਮਿਦ੍ਧਿਨੀ ਭਵਿਸ੍ਸਾਮੀਤਿ ਅਤ੍ਥੋ.

੧੫੯-੧੬੧. ਤਂ ਸੁਤ੍ਵਾ ਤਿਸ੍ਸਾ ਤਮਤ੍ਥਂ ਅਤ੍ਤਨੋ ਸਾਮਿਕਸ੍ਸ ਆਰੋਚੇਤ੍ਵਾ ਦੁਤਿਯਦਿਵਸੇ ਅਟ੍ਠ ਭਿਕ੍ਖੂ ਭੋਜੇਤ੍ਵਾ ਤਸ੍ਸਾ ਦਕ੍ਖਿਣਮਾਦਿਸਿ, ਸਾ ਤਾਵਦੇਵ ਪਟਿਲਦ੍ਧਦਿਬ੍ਬਸਮ੍ਪਤ੍ਤਿਕਾ ਪੁਨ ਤਿਸ੍ਸਾਯ ਸਨ੍ਤਿਕਂ ਉਪਸਙ੍ਕਮਿ. ਤਮਤ੍ਥਂ ਦਸ੍ਸੇਤੁਂ ਸਙ੍ਗੀਤਿਕਾਰੇਹਿ ‘‘ਸਾਧੂਤਿ ਸਾ ਪਟਿਸ੍ਸੁਤ੍ਵਾ’’ਤਿਆਦਿਕਾ ਤਿਸ੍ਸੋ ਗਾਥਾ ਠਪਿਤਾ.

੧੬੨-੧੬੭. ਉਪਸਙ੍ਕਮਿਤ੍ਵਾ ਠਿਤਂ ਪਨ ਨਂ ਤਿਸ੍ਸਾ ‘‘ਅਭਿਕ੍ਕਨ੍ਤੇਨ ਵਣ੍ਣੇਨਾ’’ਤਿਆਦੀਹਿ ਤੀਹਿ ਗਾਥਾਹਿ ਪਟਿਪੁਚ੍ਛਿ. ਇਤਰਾ ‘‘ਅਹਂ ਮਤ੍ਤਾ’’ਤਿ ਗਾਥਾਯ ਅਤ੍ਤਾਨਂ ਆਚਿਕ੍ਖਿਤ੍ਵਾ ‘‘ਚਿਰਂ ਜੀਵਾਹੀ’’ਤਿ ਗਾਥਾਯ ਤਸ੍ਸਾ ਅਨੁਮੋਦਨਂ ਦਤ੍ਵਾ ‘‘ਇਧ ਧਮ੍ਮਂ ਚਰਿਤ੍ਵਾਨਾ’’ਤਿ ਗਾਥਾਯ ਓਵਾਦਂ ਅਦਾਸਿ. ਤਤ੍ਥ ਤਵ ਦਿਨ੍ਨੇਨਾਤਿ ਤਯਾ ਦਿਨ੍ਨੇਨ. ਅਸੋਕਂ ਵਿਰਜਂ ਠਾਨਨ੍ਤਿ ਸੋਕਾਭਾਵੇਨ ਅਸੋਕਂ, ਸੇਦਜਲ੍ਲਿਕਾਨਂ ਪਨ ਅਭਾਵੇਨ ਵਿਰਜਂ ਦਿਬ੍ਬਟ੍ਠਾਨਂ, ਸਬ੍ਬਮੇਤਂ ਦੇਵਲੋਕਂ ਸਨ੍ਧਾਯ ਵਦਤਿ. ਆਵਾਸਨ੍ਤਿ ਠਾਨਂ. ਵਸਵਤ੍ਤਿਨਨ੍ਤਿ ਦਿਬ੍ਬੇਨ ਆਧਿਪਤੇਯ੍ਯੇਨ ਅਤ੍ਤਨੋ ਵਸਂ ਵਤ੍ਤੇਨ੍ਤਾਨਂ. ਸਮੂਲਨ੍ਤਿ ਸਲੋਭਦੋਸਂ. ਲੋਭਦੋਸਾ ਹਿ ਮਚ੍ਛਰਿਯਸ੍ਸ ਮੂਲਂ ਨਾਮ. ਅਨਿਨ੍ਦਿਤਾਤਿ ਅਗਰਹਿਤਾ ਪਾਸਂਸਾ, ਸਗ੍ਗਮੁਪੇਹਿ ਠਾਨਨ੍ਤਿ ਰੂਪਾਦੀਹਿ ਵਿਸਯੇਹਿ ਸੁਟ੍ਠੁ ਅਗ੍ਗਤ੍ਤਾ ‘‘ਸਗ੍ਗ’’ਨ੍ਤਿ ਲਦ੍ਧਨਾਮਂ ਦਿਬ੍ਬਟ੍ਠਾਨਂ ਉਪੇਹਿ, ਸੁਗਤਿਪਰਾਯਣਾ ਹੋਹੀਤਿ ਅਤ੍ਥੋ. ਸੇਸਂ ਉਤ੍ਤਾਨਮੇਵ.

ਅਥ ਤਿਸ੍ਸਾ ਤਂ ਪਵਤ੍ਤਿਂ ਕੁਟੁਮ੍ਬਿਕਸ੍ਸ ਆਰੋਚੇਸਿ, ਕੁਟੁਮ੍ਬਿਕੋ ਭਿਕ੍ਖੂਨਂ ਆਰੋਚੇਸਿ, ਭਿਕ੍ਖੂ ਭਗਵਤੋ ਆਰੋਚੇਸੁਂ. ਭਗਵਾ ਤਮਤ੍ਥਂ ਅਟ੍ਠੁਪ੍ਪਤ੍ਤਿਂ ਕਤ੍ਵਾ ਸਮ੍ਪਤ੍ਤਪਰਿਸਾਯ ਧਮ੍ਮਂ ਦੇਸੇਸਿ, ਤਂ ਸੁਤ੍ਵਾ ਮਹਾਜਨੋ ਪਟਿਲਦ੍ਧਸਂਵੇਗੋ ਵਿਨੇਯ੍ਯ ਮਚ੍ਛੇਰਾਦਿਮਲਂ ਦਾਨਸੀਲਾਦਿਰਤੋ ਸੁਗਤਿਪਰਾਯਣੋ ਅਹੋਸੀਤਿ.

ਮਤ੍ਤਾਪੇਤਿਵਤ੍ਥੁਵਣ੍ਣਨਾ ਨਿਟ੍ਠਿਤਾ.