੪. ਨਨ੍ਦਾਪੇਤਿਵਤ੍ਥੁਵਣ੍ਣਨਾ

ਕਾਲ਼ੀ ਦੁਬ੍ਬਣ੍ਣਰੂਪਾਸੀਤਿ ਇਦਂ ਸਤ੍ਥਰਿ ਜੇਤਵਨੇ ਵਿਹਰਨ੍ਤੇ ਨਨ੍ਦਂ ਨਾਮ ਪੇਤਿਂ ਆਰਬ੍ਭ ਵੁਤ੍ਤਂ. ਸਾਵਤ੍ਥਿਯਾ ਕਿਰ ਅਵਿਦੂਰੇ ਅਞ੍ਞਤਰਸ੍ਮਿਂ ਗਾਮਕੇ ਨਨ੍ਦਿਸੇਨੋ ਨਾਮ ਉਪਾਸਕੋ ਅਹੋਸਿ ਸਦ੍ਧੋ ਪਸਨ੍ਨੋ. ਭਰਿਯਾ ਪਨਸ੍ਸ ਨਨ੍ਦਾ ਨਾਮ ਅਸ੍ਸਦ੍ਧਾ ਅਪ੍ਪਸਨ੍ਨਾ ਮਚ੍ਛਰਿਨੀ ਚਣ੍ਡੀ ਫਰੁਸਵਚਨਾ ਸਾਮਿਕੇ ਅਗਾਰਵਾ ਅਗ੍ਗਤਿਸ੍ਸਾ ਸਸ੍ਸੁਂ ਚੋਰਿਵਾਦੇਨ ਅਕ੍ਕੋਸਤਿ ਪਰਿਭਾਸਤਿ. ਸਾ ਅਪਰੇਨ ਸਮਯੇਨ ਕਾਲਂ ਕਤ੍ਵਾ ਪੇਤਯੋਨਿਯਂ ਨਿਬ੍ਬਤ੍ਤਿਤ੍ਵਾ ਤਸ੍ਸੇਵ ਗਾਮਸ੍ਸ ਅਵਿਦੂਰੇ ਵਿਚਰਨ੍ਤੀ ਏਕਦਿਵਸਂ ਨਨ੍ਦਿਸੇਨਸ੍ਸ ਉਪਾਸਕਸ੍ਸ ਗਾਮਤੋ ਨਿਕ੍ਖਮਨ੍ਤਸ੍ਸ ਅਵਿਦੂਰੇ ਅਤ੍ਤਾਨਂ ਦਸ੍ਸੇਸਿ. ਸੋ ਤਂ ਦਿਸ੍ਵਾ –

੧੬੮. ‘‘ਕਾਲ਼ੀ ਦੁਬ੍ਬਣ੍ਣਰੂਪਾਸਿ, ਫਰੁਸਾ ਭੀਰੁਦਸ੍ਸਨਾ;

ਪਿਙ੍ਗਲਾਸਿ ਕਲ਼ਾਰਾਸਿ, ਨ ਤਂ ਮਞ੍ਞਾਮਿ ਮਾਨੁਸਿ’’ਨ੍ਤਿ. –

ਗਾਥਾਯ ਅਜ੍ਝਭਾਸਿ. ਤਤ੍ਥ ਕਾਲ਼ੀਤਿ ਕਾਲ਼ਵਣ੍ਣਾ, ਝਾਮਙ੍ਗਾਰਸਦਿਸੋ ਹਿਸ੍ਸਾ ਵਣ੍ਣੋ ਅਹੋਸਿ. ਫਰੁਸਾਤਿ ਖਰਗਤ੍ਤਾ. ਭੀਰੁਦਸ੍ਸਨਾਤਿ ਭਯਾਨਕਦਸ੍ਸਨਾ ਸਪ੍ਪਟਿਭਯਾਕਾਰਾ. ‘‘ਭਾਰੁਦਸ੍ਸਨਾ’’ਤਿ ਵਾ ਪਾਠੋ, ਭਾਰਿਯਦਸ੍ਸਨਾ, ਦੁਬ੍ਬਣ੍ਣਤਾਦਿਨਾ ਦੁਦ੍ਦਸਿਕਾਤਿ ਅਤ੍ਥੋ. ਪਿਙ੍ਗਲਾਤਿ ਪਿਙ੍ਗਲਲੋਚਨਾ. ਕਲ਼ਾਰਾਤਿ ਕਲ਼ਾਰਦਨ੍ਤਾ. ਨ ਤਂ ਮਞ੍ਞਾਮਿ ਮਾਨੁਸਿਨ੍ਤਿ ਅਹਂ ਤਂ ਮਾਨੁਸਿਨ੍ਤਿ ਨ ਮਞ੍ਞਾਮਿ, ਪੇਤਿਮੇਵ ਚ ਤਂ ਮਞ੍ਞਾਮੀਤਿ ਅਧਿਪ੍ਪਾਯੋ. ਤਂ ਸੁਤ੍ਵਾ ਪੇਤੀ ਅਤ੍ਤਾਨਂ ਪਕਾਸੇਨ੍ਤੀ –

੧੬੯. ‘‘ਅਹਂ ਨਨ੍ਦਾ ਨਨ੍ਦਿਸੇਨ, ਭਰਿਯਾ ਤੇ ਪੁਰੇ ਅਹੁਂ;

ਪਾਪਕਮ੍ਮਂ ਕਰਿਤ੍ਵਾਨ, ਪੇਤਲੋਕਂ ਇਤੋ ਗਤਾ’’ਤਿ. –

ਗਾਥਮਾਹ. ਤਤ੍ਥ ਅਹਂ ਨਨ੍ਦਾ ਨਨ੍ਦਿਸੇਨਾਤਿ ਸਾਮਿ ਨਨ੍ਦਿਸੇਨ ਅਹਂ ਨਨ੍ਦਾ ਨਾਮ. ਭਰਿਯਾ ਤੇ ਪੁਰੇ ਅਹੁਨ੍ਤਿ ਪੁਰਿਮਜਾਤਿਯਂ ਤੁਯ੍ਹਂ ਭਰਿਯਾ ਅਹੋਸਿਂ. ਇਤੋ ਪਰਂ –

੧੭੦. ‘‘ਕਿਂ ਨੁ ਕਾਯੇਨ ਵਾਚਾਯ, ਮਨਸਾ ਦੁਕ੍ਕਟਂ ਕਤਂ;

ਕਿਸ੍ਸ ਕਮ੍ਮਵਿਪਾਕੇਨ, ਪੇਤਲੋਕਂ ਇਤੋ ਗਤਾ’’ਤਿ. –

ਤਸ੍ਸ ਉਪਾਸਕਸ੍ਸ ਪੁਚ੍ਛਾ. ਅਥਸ੍ਸ ਸਾ –

੧੭੧. ‘‘ਚਣ੍ਡੀ ਚ ਫਰੁਸਾ ਚਾਸਿਂ, ਤਯਿ ਚਾਪਿ ਅਗਾਰਵਾ;

ਤਾਹਂ ਦੁਰੁਤ੍ਤਂ ਵਤ੍ਵਾਨ, ਪੇਤਲੋਕਂ ਇਤੋ ਗਤਾ’’ਤਿ. –

ਵਿਸ੍ਸਜ੍ਜੇਸਿ. ਪੁਨ ਸੋ –

੧੭੨. ‘‘ਹਨ੍ਦੁਤ੍ਤਰੀਯਂ ਦਦਾਮਿ ਤੇ, ਇਮਂ ਦੁਸ੍ਸਂ ਨਿਵਾਸਯ;

ਇਮਂ ਦੁਸ੍ਸਂ ਨਿਵਾਸੇਤ੍ਵਾ, ਏਹਿ ਨੇਸ੍ਸਾਮਿ ਤਂ ਘਰਂ.

੧੭੩. ‘‘ਵਤ੍ਥਞ੍ਚ ਅਨ੍ਨਪਾਨਞ੍ਚ, ਲਚ੍ਛਸਿ ਤ੍ਵਂ ਘਰਂ ਗਤਾ;

ਪੁਤ੍ਤੇ ਚ ਤੇ ਪਸ੍ਸਿਸ੍ਸਸਿ, ਸੁਣਿਸਾਯੋ ਚ ਦਕ੍ਖਸੀ’’ਤਿ. – ਅਥਸ੍ਸ ਸਾ –

੧੭੪. ‘‘ਹਤ੍ਥੇਨ ਹਤ੍ਥੇ ਤੇ ਦਿਨ੍ਨਂ, ਨ ਮਯ੍ਹਂ ਉਪਕਪ੍ਪਤਿ;

ਭਿਕ੍ਖੂ ਚ ਸੀਲਸਮ੍ਪਨ੍ਨੇ, ਵੀਤਰਾਗੇ ਬਹੁਸ੍ਸੁਤੇ.

੧੭੫. ‘‘ਤਪ੍ਪੇਹਿ ਅਨ੍ਨਪਾਨੇਨ, ਮਮ ਦਕ੍ਖਿਣਮਾਦਿਸ;

ਤਦਾਹਂ ਸੁਖਿਤਾ ਹੇਸ੍ਸਂ, ਸਬ੍ਬਕਾਮਸਮਿਦ੍ਧਿਨੀ’’ਤਿ. –

ਦ੍ਵੇ ਗਾਥਾ ਅਭਾਸਿ. ਤਤੋ –

੧੭੬. ‘‘ਸਾਧੂਤਿ ਸੋ ਪਟਿਸ੍ਸੁਤ੍ਵਾ, ਦਾਨਂ ਵਿਪੁਲਮਾਕਿਰਿ;

ਅਨ੍ਨਂ ਪਾਨਂ ਖਾਦਨੀਯਂ, ਵਤ੍ਥਸੇਨਾਸਨਾਨਿ ਚ;

ਛਤ੍ਤਂ ਗਨ੍ਧਞ੍ਚ ਮਾਲਞ੍ਚ, ਵਿਵਿਧਾ ਚ ਉਪਾਹਨਾ.

੧੭੭. ‘‘ਭਿਕ੍ਖੂ ਚ ਸੀਲਸਮ੍ਪਨ੍ਨੇ, ਵੀਤਰਾਗੇ ਬਹੁਸ੍ਸੁਤੇ;

ਤਪ੍ਪੇਤ੍ਵਾ ਅਨ੍ਨਪਾਨੇਨ, ਤਸ੍ਸਾ ਦਕ੍ਖਿਣਮਾਦਿਸੀ.

੧੭੮. ‘‘ਸਮਨਨ੍ਤਰਾਨੁਦ੍ਦਿਟ੍ਠੇ, ਵਿਪਾਕੋ ਉਦਪਜ੍ਜਥ;

ਭੋਜਨਚ੍ਛਾਦਨਪਾਨੀਯਂ, ਦਕ੍ਖਿਣਾਯ ਇਦਂ ਫਲਂ.

੧੭੯. ‘‘ਤਤੋ ਸੁਦ੍ਧਾ ਸੁਚਿਵਸਨਾ, ਕਾਸਿਕੁਤ੍ਤਮਧਾਰਿਨੀ;

ਵਿਚਿਤ੍ਤਵਤ੍ਥਾਭਰਣਾ, ਸਾਮਿਕਂ ਉਪਸਙ੍ਕਮੀ’’ਤਿ. –

ਚਤਸ੍ਸੋ ਗਾਥਾ ਸਙ੍ਗੀਤਿਕਾਰੇਹਿ ਵੁਤ੍ਤਾ. ਤਤੋ ਪਰਂ –

੧੮੦. ‘‘ਅਭਿਕ੍ਕਨ੍ਤੇਨ ਵਣ੍ਣੇਨ, ਯਾ ਤ੍ਵਂ ਤਿਟ੍ਠਸਿ ਦੇਵਤੇ;

ਓਭਾਸੇਨ੍ਤੀ ਦਿਸਾ ਸਬ੍ਬਾ, ਓਸਧੀ ਵਿਯ ਤਾਰਕਾ.

੧੮੧. ‘‘ਕੇਨ ਤੇਤਾਦਿਸੋ ਵਣ੍ਣੋ, ਕੇਨ ਤੇ ਇਧ ਮਿਜ੍ਝਤਿ;

ਉਪ੍ਪਜ੍ਜਨ੍ਤਿ ਚ ਤੇ ਭੋਗਾ, ਯੇ ਕੇਚਿ ਮਨਸੋ ਪਿਯਾ.

੧੮੨. ‘‘ਪੁਚ੍ਛਾਮਿ ਤਂ ਦੇਵਿ ਮਹਾਨੁਭਾਵੇ, ਮਨੁਸ੍ਸਭੂਤਾ ਕਿਮਕਾਸਿ ਪੁਞ੍ਞਂ;

ਕੇਨਾਸਿ ਏਵਂ ਜਲਿਤਾਨੁਭਾਵਾ, ਵਣ੍ਣੋ ਚ ਤੇ ਸਬ੍ਬਦਿਸਾ ਪਭਾਸਤੀ’’ਤਿ.

੧੮੩. ‘‘ਅਹਂ ਨਨ੍ਦਾ ਨਨ੍ਦਿਸੇਨ, ਭਰਿਯਾ ਤੇ ਪੁਰੇ ਅਹੁਂ;

ਪਾਪਕਮ੍ਮਂ ਕਰਿਤ੍ਵਾਨ, ਪੇਤਲੋਕਂ ਇਤੋ ਗਤਾ.

੧੮੪. ‘‘ਤਵ ਦਿਨ੍ਨੇਨ ਦਾਨੇਨ, ਮੋਦਾਮਿ ਅਕੁਤੋਭਯਾ;

ਚਿਰਂ ਜੀਵ ਗਹਪਤਿ, ਸਹ ਸਬ੍ਬੇਹਿ ਞਾਤਿਭਿ;

ਅਸੋਕਂ ਵਿਰਜਂ ਖੇਮਂ, ਆਵਾਸਂ ਵਸਵਤ੍ਤਿਨਂ.

੧੮੫. ‘‘ਇਧ ਧਮ੍ਮਂ ਚਰਿਤ੍ਵਾਨ, ਦਾਨਂ ਦਤ੍ਵਾ ਗਹਪਤਿ;

ਵਿਨੇਯ੍ਯ ਮਚ੍ਛੇਰਮਲਂ ਸਮੂਲਂ, ਅਨਿਨ੍ਦਿਤੋ ਸਗ੍ਗਮੁਪੇਹਿ ਠਾਨ’’ਨ੍ਤਿ. –

ਉਪਾਸਕਸ੍ਸ ਚ ਪੇਤਿਯਾ ਚ ਵਚਨਪਟਿਵਚਨਗਾਥਾ.

੧੭੬. ਤਤ੍ਥ ਦਾਨਂ ਵਿਪੁਲਮਾਕਿਰੀਤਿ ਉਕ੍ਖਿਣੇਯ੍ਯਖੇਤ੍ਤੇ ਦੇਯ੍ਯਧਮ੍ਮਬੀਜਂ ਵਿਪ੍ਪਕਿਰਨ੍ਤੋ ਵਿਯ ਮਹਾਦਾਨਂ ਪਵਤ੍ਤੇਸਿ. ਸੇਸਂ ਅਨਨ੍ਤਰਵਤ੍ਥੁਸਦਿਸਮੇਵ.

ਏਵਂ ਸਾ ਅਤ੍ਤਨੋ ਦਿਬ੍ਬਸਮ੍ਪਤ੍ਤਿਂ ਤਸ੍ਸਾ ਚ ਕਾਰਣਂ ਨਨ੍ਦਿਸੇਨਸ੍ਸ ਵਿਭਾਵੇਤ੍ਵਾ ਅਤ੍ਤਨੋ ਵਸਨਟ੍ਠਾਨਮੇਵ ਗਤਾ. ਉਪਾਸਕੋ ਤਂ ਪਵਤ੍ਤਿਂ ਭਿਕ੍ਖੂਨਂ ਆਰੋਚੇਸਿ, ਭਿਕ੍ਖੂ ਭਗਵਤੋ ਆਰੋਚੇਸੁਂ. ਭਗਵਾ ਤਮਤ੍ਥਂ ਅਟ੍ਠੁਪ੍ਪਤ੍ਤਿਂ ਕਤ੍ਵਾ ਸਮ੍ਪਤ੍ਤਪਰਿਸਾਯ ਧਮ੍ਮਂ ਦੇਸੇਸਿ. ਸਾ ਦੇਸਨਾ ਮਹਾਜਨਸ੍ਸ ਸਾਤ੍ਥਿਕਾ ਅਹੋਸੀਤਿ.

ਨਨ੍ਦਾਪੇਤਿਵਤ੍ਥੁਵਣ੍ਣਨਾ ਨਿਟ੍ਠਿਤਾ.