੧੩. ਢੁਬ੍ਬਰਿਪੇਤਵਤ੍ਥੁਵਣ੍ਣਨਾ

ਅਹੁ ਰਾਜਾ ਬ੍ਰਹ੍ਮਦਤ੍ਤੋਤਿ ਇਦਂ ਉਬ੍ਬਰਿਪੇਤਵਤ੍ਥੁਂ ਸਤ੍ਥਾ ਜੇਤਵਨੇ ਵਿਹਰਨ੍ਤੋ ਅਞ੍ਞਤਰਂ ਉਪਾਸਿਕਂ ਆਰਬ੍ਭ ਕਥੇਸਿ. ਸਾਵਤ੍ਥਿਯਂ ਕਿਰ ਅਞ੍ਞਤਰਾਯ ਉਪਾਸਿਕਾਯ ਸਾਮਿਕੋ ਕਾਲਮਕਾਸਿ. ਸਾ ਪਤਿਵਿਯੋਗਦੁਕ੍ਖਾਤੁਰਾ ਸੋਚਨ੍ਤੀ ਆਲ਼ਾਹਨਂ ਗਨ੍ਤ੍ਵਾ ਰੋਦਤਿ. ਭਗਵਾ ਤਸ੍ਸਾ ਸੋਤਾਪਤ੍ਤਿਫਲਸ੍ਸ ਉਪਨਿਸ੍ਸਯਸਮ੍ਪਤ੍ਤਿਂ ਦਿਸ੍ਵਾ ਕਰੁਣਾਯ ਸਞ੍ਚੋਦਿਤਮਾਨਸੋ ਹੁਤ੍ਵਾ ਤਸ੍ਸਾ ਗੇਹਂ ਗਨ੍ਤ੍ਵਾ ਪਞ੍ਞਤ੍ਤੇ ਆਸਨੇ ਨਿਸੀਦਿ. ਉਪਾਸਿਕਾ ਸਤ੍ਥਾਰਂ ਉਪਸਙ੍ਕਮਿਤ੍ਵਾ ਵਨ੍ਦਿਤ੍ਵਾ ਏਕਮਨ੍ਤਂ ਨਿਸੀਦਿ. ਅਥ ਨਂ ਸਤ੍ਥਾ ‘‘ਕਿਂ, ਉਪਾਸਿਕੇ, ਸੋਚਸੀ’’ਤਿ ਵਤ੍ਵਾ ‘‘ਆਮ, ਭਗਵਾ, ਪਿਯਵਿਪ੍ਪਯੋਗੇਨ ਸੋਚਾਮੀ’’ਤਿ ਵੁਤ੍ਤੇ ਤਸ੍ਸਾ ਸੋਕਂ ਅਪਨੇਤੁਕਾਮੋ ਅਤੀਤਂ ਆਹਰਿ.

ਅਤੀਤੇ ਪਞ੍ਚਾਲਰਟ੍ਠੇ ਕਪਿਲਨਗਰੇ ਚੂਲ਼ਨੀਬ੍ਰਹ੍ਮਦਤ੍ਤੋ ਨਾਮ ਰਾਜਾ ਅਹੋਸਿ. ਸੋ ਅਗਤਿਗਮਨਂ ਪਹਾਯ ਅਤ੍ਤਨੋ ਵਿਜਿਤੇ ਪਜਾਯ ਹਿਤਕਰਣਨਿਰਤੋ ਦਸ ਰਾਜਧਮ੍ਮੇ ਅਕੋਪੇਤ੍ਵਾ ਰਜ੍ਜਂ ਅਨੁਸਾਸਮਾਨੋ ਕਦਾਚਿ ‘‘ਅਤ੍ਤਨੋ ਰਜ੍ਜੇ ਕਿਂ ਵਦਨ੍ਤੀ’’ਤਿ ਸੋਤੁਕਾਮੋ ਤੁਨ੍ਨਵਾਯਵੇਸਂ ਗਹੇਤ੍ਵਾ ਏਕੋ ਅਦੁਤਿਯੋ ਨਗਰਤੋ ਨਿਕ੍ਖਮਿਤ੍ਵਾ ਗਾਮਤੋ ਗਾਮਂ ਜਨਪਦਤੋ ਜਨਪਦਂ ਵਿਚਰਿਤ੍ਵਾ ਸਬ੍ਬਰਜ੍ਜਂ ਅਕਣ੍ਟਕਂ ਅਨੁਪਪੀਲ਼ਂ ਮਨੁਸ੍ਸੇ ਸਮ੍ਮੋਦਮਾਨੇ ਅਪਾਰੁਤਘਰੇ ਮਞ੍ਞੇ ਵਿਹਰਨ੍ਤੇ ਦਿਸ੍ਵਾ ਸੋਮਨਸ੍ਸਜਾਤੋ ਨਿਵਤ੍ਤਿਤ੍ਵਾ ਨਗਰਾਭਿਮੁਖੋ ਆਗਚ੍ਛਨ੍ਤੋ ਅਞ੍ਞਤਰਸ੍ਮਿਂ ਗਾਮੇ ਏਕਿਸ੍ਸਾ ਵਿਧਵਾਯ ਦੁਗ੍ਗਤਿਤ੍ਥਿਯਾ ਗੇਹਂ ਪਾਵਿਸਿ. ਸਾ ਤਂ ਦਿਸ੍ਵਾ ਆਹ – ‘‘ਕੋ ਨੁ ਤ੍ਵਂ, ਅਯ੍ਯੋ, ਕੁਤੋ ਵਾ ਆਗਤੋਸੀ’’ਤਿ? ‘‘ਅਹਂ ਤੁਨ੍ਨਵਾਯੋ, ਭਦ੍ਦੇ, ਭਤਿਯਾ ਤੁਨ੍ਨਵਾਯਕਮ੍ਮਂ ਕਰੋਨ੍ਤੋ ਵਿਚਰਾਮਿ. ਯਦਿ ਤੁਮ੍ਹਾਕਂ ਤੁਨ੍ਨਵਾਯਕਮ੍ਮਂ ਅਤ੍ਥਿ, ਭਤ੍ਤਞ੍ਚ ਵੇਤਨਞ੍ਚ ਦੇਥ, ਤੁਮ੍ਹਾਕਮ੍ਪਿ ਕਮ੍ਮਂ ਕਰੋਮੀ’’ਤਿ. ‘‘ਨਤ੍ਥਮ੍ਹਾਕਂ ਕਮ੍ਮਂ ਭਤ੍ਤਵੇਤਨਂ ਵਾ, ਅਞ੍ਞੇਸਂ ਕਰੋਹਿ, ਅਯ੍ਯਾ’’ਤਿ. ਸੋ ਤਤ੍ਥ ਕਤਿਪਾਹਂ ਵਸਨ੍ਤੋ ਧਞ੍ਞਪੁਞ੍ਞਲਕ੍ਖਣਸਮ੍ਪਨ੍ਨਂ ਤਸ੍ਸਾ ਧੀਤਰਂ ਦਿਸ੍ਵਾ ਮਾਤਰਂ ਆਹ – ‘‘ਅਯਂ ਦਾਰਿਕਾ ਕਿਂ ਕੇਨਚਿ ਕਤਪਰਿਗ੍ਗਹਾ, ਉਦਾਹੁ ਅਕਤਪਰਿਗ੍ਗਹਾ. ਸਚੇ ਪਨ ਕੇਨਚਿ ਅਕਤਪਰਿਗ੍ਗਹਾ, ਇਮਂ ਮਯ੍ਹਂ ਦੇਥ, ਅਹਂ ਤੁਮ੍ਹਾਕਂ ਸੁਖੇਨ ਜੀਵਨੂਪਾਯਂ ਕਾਤੁਂ ਸਮਤ੍ਥੋ’’ਤਿ. ‘‘ਸਾਧੁ, ਅਯ੍ਯਾ’’ਤਿ ਸਾ ਤਸ੍ਸ ਤਂ ਅਦਾਸਿ.

ਸੋ ਤਾਯ ਸਦ੍ਧਿਂ ਕਤਿਪਾਹਂ ਵਸਿਤ੍ਵਾ ਤਸ੍ਸਾ ਕਹਾਪਣਸਹਸ੍ਸਂ ਦਤ੍ਵਾ ‘‘ਅਹਂ ਕਤਿਪਾਹੇਨੇਵ ਨਿਵਤ੍ਤਿਸ੍ਸਾਮਿ. ਭਦ੍ਦੇ, ਤ੍ਵਂ ਮਾ ਉਕ੍ਕਣ੍ਠਸੀ’’ਤਿ ਵਤ੍ਵਾ ਅਤ੍ਤਨੋ ਨਗਰਂ ਗਨ੍ਤ੍ਵਾ, ਨਗਰਸ੍ਸ ਚ ਤਸ੍ਸ ਗਾਮਸ੍ਸ ਚ ਅਨ੍ਤਰੇ ਮਗ੍ਗਂ ਸਮਂ ਕਾਰਾਪੇਤ੍ਵਾ ਅਲਙ੍ਕਾਰਾਪੇਤ੍ਵਾ ਮਹਤਾ ਰਾਜਾਨੁਭਾਵੇਨ ਤਤ੍ਥ ਗਨ੍ਤ੍ਵਾ ਤਂ ਦਾਰਿਕਂ ਕਹਾਪਣਰਾਸਿਮ੍ਹਿ ਠਪੇਤ੍ਵਾ ਸੁਵਣ੍ਣਰਜਤਕਲਸੇਹਿ ਨ੍ਹਾਪੇਤ੍ਵਾ ‘‘ਉਬ੍ਬਰੀ’’ਤਿ ਨਾਮਂ ਕਾਰਾਪੇਤ੍ਵਾ ਅਗ੍ਗਮਹੇਸਿਟ੍ਠਾਨੇ ਠਪੇਤ੍ਵਾ ਤਞ੍ਚ ਗਾਮਂ ਤਸ੍ਸਾ ਞਾਤੀਨਂ ਦਤ੍ਵਾ ਮਹਤਾ ਰਾਜਾਨੁਭਾਵੇਨ ਤਂ ਨਗਰਂ ਆਨੇਤ੍ਵਾ ਤਾਯ ਸਦ੍ਧਿਂ ਅਭਿਰਮਮਾਨੋ ਯਾਵਜੀਵਂ ਰਜ੍ਜਸੁਖਂ ਅਨੁਭਵਿਤ੍ਵਾ ਆਯੁਪਰਿਯੋਸਾਨੇ ਕਾਲਮਕਾਸਿ. ਕਾਲਕਤੇ ਚ ਤਸ੍ਮਿਂ, ਕਤੇ ਚ ਸਰੀਰਕਿਚ੍ਚੇ ਉਬ੍ਬਰੀ ਪਤਿਵਿਯੋਗੇਨ ਸੋਕਸਲ੍ਲਸਮਪ੍ਪਿਤਹਦਯਾ ਆਲ਼ਾਹਨਂ ਗਨ੍ਤ੍ਵਾ ਬਹੂ ਦਿਵਸੇ ਗਨ੍ਧਪੁਪ੍ਫਾਦੀਹਿ ਪੂਜੇਤ੍ਵਾ ਰਞ੍ਞੋ ਗੁਣੇ ਕਿਤ੍ਤੇਤ੍ਵਾ ਉਮ੍ਮਾਦਪ੍ਪਤ੍ਤਾ ਵਿਯ ਕਨ੍ਦਨ੍ਤੀ ਪਰਿਦੇਵਨ੍ਤੀ ਆਲ਼ਾਹਨਂ ਪਦਕ੍ਖਿਣਂ ਕਰੋਤਿ.

ਤੇਨ ਚ ਸਮਯੇਨ ਅਮ੍ਹਾਕਂ ਭਗਵਾ ਬੋਧਿਸਤ੍ਤਭੂਤੋ ਇਸਿਪਬ੍ਬਜ੍ਜਂ ਪਬ੍ਬਜਿਤ੍ਵਾ ਅਧਿਗਤਜ੍ਝਾਨਾਭਿਞ੍ਞੋ ਹਿਮਵਨ੍ਤਸ੍ਸ ਸਾਮਨ੍ਤਾ ਅਞ੍ਞਤਰਸ੍ਮਿਂ ਅਰਞ੍ਞਾਯਤਨੇ ਵਿਹਰਨ੍ਤੋ ਸੋਕਸਲ੍ਲਸਮਪ੍ਪਿਤਂ ਉਬ੍ਬਰਿਂ ਦਿਬ੍ਬੇਨ ਚਕ੍ਖੁਨਾ ਦਿਸ੍ਵਾ ਆਕਾਸੇਨ ਆਗਨ੍ਤ੍ਵਾ ਦਿਸ੍ਸਮਾਨਰੂਪੋ ਆਕਾਸੇ ਠਤ੍ਵਾ ਤਤ੍ਥ ਠਿਤੇ ਮਨੁਸ੍ਸੇ ਪੁਚ੍ਛਿ – ‘‘ਕਸ੍ਸਿਦਂ ਆਲ਼ਾਹਨਂ, ਕਸ੍ਸਤ੍ਥਾਯ ਚਾਯਂ ਇਤ੍ਥੀ ‘ਬ੍ਰਹ੍ਮਦਤ੍ਤ, ਬ੍ਰਹ੍ਮਦਤ੍ਤਾ’ਤਿ ਕਨ੍ਦਨ੍ਤੀ ਪਰਿਦੇਵਤੀ’’ਤਿ. ਤਂ ਸੁਤ੍ਵਾ ਮਨੁਸ੍ਸਾ ‘‘ਬ੍ਰਹ੍ਮਦਤ੍ਤੋ ਨਾਮ ਪਞ੍ਚਾਲਾਨਂ ਰਾਜਾ, ਸੋ ਆਯੁਪਰਿਯੋਸਾਨੇ ਕਾਲਮਕਾਸਿ, ਤਸ੍ਸਿਦਂ ਆਲ਼ਾਹਨਂ, ਤਸ੍ਸ ਅਯਂ ਅਗ੍ਗਮਹੇਸੀ ਉਬ੍ਬਰੀ ਨਾਮ ‘ਬ੍ਰਹ੍ਮਦਤ੍ਤ, ਬ੍ਰਹ੍ਮਦਤ੍ਤਾ’ਤਿ ਤਸ੍ਸ ਨਾਮਂ ਗਹੇਤ੍ਵਾ ਕਨ੍ਦਨ੍ਤੀ ਪਰਿਦੇਵਤੀ’’ਤਿ ਆਹਂਸੁ. ਤਮਤ੍ਥਂ ਦੀਪੇਨ੍ਤਾ ਸਙ੍ਗੀਤਿਕਾਰਾ –

੩੬੮. ‘‘ਅਹੁ ਰਾਜਾ ਬ੍ਰਹ੍ਮਦਤ੍ਤੋ, ਪਞ੍ਚਾਲਾਨਂ ਰਥੇਸਭੋ;

ਅਹੋਰਤ੍ਤਾਨਮਚ੍ਚਯਾ, ਰਾਜਾ ਕਾਲਮਕ੍ਰੁਬ੍ਬਥ.

੩੬੯. ‘‘ਤਸ੍ਸ ਆਲ਼ਾਹਨਂ ਗਨ੍ਤ੍ਵਾ, ਭਰਿਯਾ ਕਨ੍ਦਤਿ ਉਬ੍ਬਰਿ;

ਬ੍ਰਹ੍ਮਦਤ੍ਤਂ ਅਪਸ੍ਸਨ੍ਤੀ, ਬ੍ਰਹ੍ਮਦਤ੍ਤਾਤਿ ਕਨ੍ਦਤਿ.

੩੭੦. ‘‘ਇਸਿ ਚ ਤਤ੍ਥ ਆਗਚ੍ਛਿ, ਸਮ੍ਪਨ੍ਨਚਰਣੋ ਮੁਨਿ;

ਸੋ ਚ ਤਤ੍ਥ ਅਪੁਚ੍ਛਿਤ੍ਥ, ਯੇ ਤਤ੍ਥ ਸੁ ਸਮਾਗਤਾ.

੩੭੧. ‘‘‘ਕਸ੍ਸ ਇਦਂ ਆਲ਼ਾਹਨਂ, ਨਾਨਾਗਨ੍ਧਸਮੇਰਿਤਂ;

ਕਸ੍ਸਾਯਂ ਕਨ੍ਦਤਿ ਭਰਿਯਾ, ਇਤੋ ਦੂਰਗਤਂ ਪਤਿਂ;

ਬ੍ਰਹ੍ਮਦਤ੍ਤਂ ਅਪਸ੍ਸਨ੍ਤੀ, ਬ੍ਰਹ੍ਮਦਤ੍ਤਾਤਿ ਕਨ੍ਦਤਿ’.

੩੭੨. ‘‘ਤੇ ਚ ਤਤ੍ਥ ਵਿਯਾਕਂਸੁ, ਯੇ ਤਤ੍ਥ ਸੁ ਸਮਾਗਤਾ;

ਬ੍ਰਹ੍ਮਦਤ੍ਤਸ੍ਸ ਭਦ੍ਦਨ੍ਤੇ, ਬ੍ਰਹ੍ਮਦਤ੍ਤਸ੍ਸ ਮਾਰਿਸ.

੩੭੩. ‘‘ਤਸ੍ਸ ਇਦਂ ਆਲ਼ਾਹਨਂ, ਨਾਨਾਗਨ੍ਧਸਮੇਰਿਤਂ;

ਤਸ੍ਸਾਯਂ ਕਨ੍ਦਤਿ ਭਰਿਯਾ, ਇਤੋ ਦੂਰਗਤਂ ਪਤਿਂ;

ਬ੍ਰਹ੍ਮਦਤ੍ਤਂ ਅਪਸ੍ਸਨ੍ਤੀ, ਬ੍ਰਹ੍ਮਦਤ੍ਤਾਤਿ ਕਨ੍ਦਤੀ’’ਤਿ. – ਛ ਗਾਥਾ ਠਪੇਸੁਂ;

੩੬੮-੯. ਤਤ੍ਥ ਅਹੂਤਿ ਅਹੋਸਿ. ਪਞ੍ਚਾਲਾਨਨ੍ਤਿ ਪਞ੍ਚਾਲਰਟ੍ਠਵਾਸੀਨਂ, ਪਞ੍ਚਾਲਰਟ੍ਠਸ੍ਸੇਵ ਵਾ. ਏਕੋਪਿ ਹਿ ਜਨਪਦੋ ਜਨਪਦਿਕਾਨਂ ਰਾਜਕੁਮਾਰਾਨਂ ਵਸੇਨ ਰੁਲ਼੍ਹਿਯਾ ‘‘ਪਞ੍ਚਾਲਾਨ’’ਨ੍ਤਿ ਬਹੁਵਚਨੇਨ ਨਿਦ੍ਦਿਸੀਯਤਿ. ਰਥੇਸਭੋਤਿ ਰਥੇਸੁ ਉਸਭਸਦਿਸੋ, ਮਹਾਰਥੋਤਿ ਅਤ੍ਥੋ. ਤਸ੍ਸ ਆਲ਼ਾਹਨਨ੍ਤਿ ਤਸ੍ਸ ਰਞ੍ਞੋ ਸਰੀਰਸ੍ਸ ਦਡ੍ਢਟ੍ਠਾਨਂ.

੩੭੦. ਇਸੀਤਿ ਝਾਨਾਦੀਨਂ ਗੁਣਾਨਂ ਏਸਨਟ੍ਠੇਨ ਇਸਿ. ਤਤ੍ਥਾਤਿ ਤਸ੍ਮਿਂ ਉਬ੍ਬਰਿਯਾ ਠਿਤਟ੍ਠਾਨੇ, ਸੁਸਾਨੇਤਿ ਅਤ੍ਥੋ. ਆਗਚ੍ਛੀਤਿ ਅਗਮਾਸਿ. ਸਮ੍ਪਨ੍ਨਚਰਣੋਤਿ ਸੀਲਸਮ੍ਪਦਾ, ਇਨ੍ਦ੍ਰਿਯੇਸੁ ਗੁਤ੍ਤਦ੍ਵਾਰਤਾ, ਭੋਜਨੇ ਮਤ੍ਤਞ੍ਞੁਤਾ, ਜਾਗਰਿਯਾਨੁਯੋਗੋ, ਸਦ੍ਧਾਦਯੋ ਸਤ੍ਤ ਸਦ੍ਧਮ੍ਮਾ, ਚਤ੍ਤਾਰਿ ਰੂਪਾਵਚਰਝਾਨਾਨੀਤਿ ਇਮੇਹਿ ਪਨ੍ਨਰਸਹਿ ਚਰਣਸਙ੍ਖਾਤੇਹਿ ਗੁਣੇਹਿ ਸਮ੍ਪਨ੍ਨੋ ਸਮਨ੍ਨਾਗਤੋ, ਚਰਣਸਮ੍ਪਨ੍ਨੋਤਿ ਅਤ੍ਥੋ. ਮੁਨੀਤਿ ਅਤ੍ਤਹਿਤਞ੍ਚ ਪਰਹਿਤਞ੍ਚ ਮੁਨਾਤਿ ਜਾਨਾਤੀਤਿ ਮੁਨਿ. ਸੋ ਚ ਤਤ੍ਥ ਅਪੁਚ੍ਛਿਤ੍ਥਾਤਿ ਸੋ ਤਸ੍ਮਿਂ ਠਾਨੇ ਠਿਤੇ ਜਨੇ ਪਟਿਪੁਚ੍ਛਿ. ਯੇ ਤਤ੍ਥ ਸੁ ਸਮਾਗਤਾਤਿ ਯੇ ਮਨੁਸ੍ਸਾ ਤਤ੍ਥ ਸੁਸਾਨੇ ਸਮਾਗਤਾ. ਸੂਤਿ ਨਿਪਾਤਮਤ੍ਤਂ. ‘‘ਯੇ ਤਤ੍ਥਾਸੁਂ ਸਮਾਗਤਾ’’ਤਿ ਵਾ ਪਾਠੋ. ਆਸੁਨ੍ਤਿ ਅਹੇਸੁਨ੍ਤਿ ਅਤ੍ਥੋ.

੩੭੧. ਨਾਨਾਗਨ੍ਧਸਮੇਰਿਤਨ੍ਤਿ ਨਾਨਾਵਿਧੇਹਿ ਗਨ੍ਧੇਹਿ ਸਮਨ੍ਤਤੋ ਏਰਿਤਂ ਉਪਵਾਸਿਤਂ. ਇਤੋਤਿ ਮਨੁਸ੍ਸਲੋਕਤੋ. ਦੂਰਗਤਨ੍ਤਿ ਪਰਲੋਕਂ ਗਤਤ੍ਤਾ ਵਦਤਿ. ਬ੍ਰਹ੍ਮਦਤ੍ਤਾਤਿ ਕਨ੍ਦਤੀਤਿ ਬ੍ਰਹ੍ਮਦਤ੍ਤਾਤਿ ਏਵਂ ਨਾਮਸਂਕਿਤ੍ਤਨਂ ਕਤ੍ਵਾ ਪਰਿਦੇਵਨਵਸੇਨ ਅਵ੍ਹਾਯਤਿ.

੩੭੨-੩. ਬ੍ਰਹ੍ਮਦਤ੍ਤਸ੍ਸ ਭਦ੍ਦਨ੍ਤੇ, ਬ੍ਰਹ੍ਮਦਤ੍ਤਸ੍ਸ ਮਾਰਿਸਾਤਿ ਮਾਰਿਸ, ਨਿਰਾਮਯਕਾਯਚਿਤ੍ਤ ਮਹਾਮੁਨਿ ਬ੍ਰਹ੍ਮਦਤ੍ਤਸ੍ਸ ਰਞ੍ਞੋ ਇਦਂ ਆਲ਼ਾਹਨਂ, ਤਸ੍ਸੇਵ ਬ੍ਰਹ੍ਮਦਤ੍ਤਸ੍ਸ ਰਞ੍ਞੋ ਅਯਂ ਭਰਿਯਾ, ਭਦ੍ਦਂ ਤੇ ਤਸ੍ਸ ਚ ਬ੍ਰਹ੍ਮਦਤ੍ਤਸ੍ਸ ਭਦ੍ਦਂ ਹੋਤੁ, ਤਾਦਿਸਾਨਂ ਮਹੇਸੀਨਂ ਹਿਤਾਨੁਚਿਨ੍ਤਨੇਨ ਪਰਲੋਕੇ ਠਿਤਾਨਮ੍ਪਿ ਹਿਤਸੁਖਂ ਹੋਤਿਯੇਵਾਤਿ ਅਧਿਪ੍ਪਾਯੋ.

ਅਥ ਸੋ ਤਾਪਸੋ ਤੇਸਂ ਵਚਨਂ ਸੁਤ੍ਵਾ ਅਨੁਕਮ੍ਪਂ ਉਪਾਦਾਯ ਉਬ੍ਬਰਿਯਾ ਸਨ੍ਤਿਕਂ ਗਨ੍ਤ੍ਵਾ ਤਸ੍ਸਾ ਸੋਕਵਿਨੋਦਨਤ੍ਥਂ –

੩੭੪. ‘‘ਛਲ਼ਾਸੀਤਿਸਹਸ੍ਸਾਨਿ, ਬ੍ਰਹ੍ਮਦਤ੍ਤਸ੍ਸਨਾਮਕਾ;

ਇਮਸ੍ਮਿਂ ਆਲ਼ਾਹਨੇ ਦਡ੍ਢਾ, ਤੇਸਂ ਕਮਨੁਸੋਚਸੀ’’ਤਿ. –

ਗਾਥਮਾਹ. ਤਤ੍ਥ ਛਲ਼ਾਸੀਤਿਸਹਸ੍ਸਾਨੀਤਿ ਛਸਹਸ੍ਸਾਧਿਕਅਸੀਤਿਸਹਸ੍ਸਸਙ੍ਖਾ. ਬ੍ਰਹ੍ਮਦਤ੍ਤਸ੍ਸਨਾਮਕਾਤਿ ਬ੍ਰਹ੍ਮਦਤ੍ਤੋਤਿ ਏਵਂਨਾਮਕਾ. ਤੇਸਂ ਕਮਨੁਸੋਚਸੀਤਿ ਤੇਸਂ ਛਲ਼ਾਸੀਤਿਸਹਸ੍ਸਸਙ੍ਖਾਤਾਨਂ ਬ੍ਰਹ੍ਮਦਤ੍ਤਾਨਂ ਕਤਮਂ ਬ੍ਰਹ੍ਮਦਤ੍ਤਂ ਤ੍ਵਂ ਅਨੁਸੋਚਸਿ, ਕਤਮਂ ਪਟਿਚ੍ਚ ਤੇ ਸੋਕੋ ਉਪ੍ਪਨ੍ਨੋਤਿ ਪੁਚ੍ਛਿ.

ਏਵਂ ਪਨ ਤੇਨ ਇਸਿਨਾ ਪੁਚ੍ਛਿਤਾ ਉਬ੍ਬਰੀ ਅਤ੍ਤਨਾ ਅਧਿਪ੍ਪੇਤਂ ਬ੍ਰਹ੍ਮਦਤ੍ਤਂ ਆਚਿਕ੍ਖਨ੍ਤੀ –

੩੭੫. ‘‘ਯੋ ਰਾਜਾ ਚੂਲ਼ਨੀਪੁਤ੍ਤੋ, ਪਞ੍ਚਾਲਾਨਂ ਰਥੇਸਭੋ;

ਤਂ ਭਨ੍ਤੇ ਅਨੁਸੋਚਾਮਿ, ਭਤ੍ਤਾਰਂ ਸਬ੍ਬਕਾਮਦ’’ਨ੍ਤਿ. –

ਗਾਥਮਾਹ. ਤਤ੍ਥ ਚੂਲ਼ਨੀਪੁਤ੍ਤੋਤਿ ਏਵਂਨਾਮਸ੍ਸ ਰਞ੍ਞੋ ਪੁਤ੍ਤੋ. ਸਬ੍ਬਕਾਮਦਨ੍ਤਿ ਮਯ੍ਹਂ ਸਬ੍ਬਸ੍ਸ ਇਚ੍ਛਿਤਿਚ੍ਛਿਤਸ੍ਸ ਦਾਤਾਰਂ, ਸਬ੍ਬੇਸਂ ਵਾ ਸਤ੍ਤਾਨਂ ਇਚ੍ਛਿਤਦਾਯਕਂ.

ਏਵਂ ਉਬ੍ਬਰਿਯਾ ਵੁਤ੍ਤੇ ਪੁਨ ਤਾਪਸੋ –

੩੭੬. ‘‘ਸਬ੍ਬੇਵਾਹੇਸੁਂ ਰਾਜਾਨੋ, ਬ੍ਰਹ੍ਮਦਤ੍ਤਸ੍ਸਨਾਮਕਾ;

ਸਬ੍ਬੇਵ ਚੂਲ਼ਨੀਪੁਤ੍ਤਾ, ਪਞ੍ਚਾਲਾਨਂ ਰਥੇਸਭਾ.

੩੭੭. ‘‘ਸਬ੍ਬੇਸਂ ਅਨੁਪੁਬ੍ਬੇਨ, ਮਹੇਸਿਤ੍ਤਮਕਾਰਯਿ;

ਕਸ੍ਮਾ ਪੁਰਿਮਕੇ ਹਿਤ੍ਵਾ, ਪਚ੍ਛਿਮਂ ਅਨੁਸੋਚਸੀ’’ਤਿ. – ਗਾਥਾਦ੍ਵਯਮਾਹ;

੩੭੬. ਤਤ੍ਥ ਸਬ੍ਬੇਵਾਹੇਸੁਨ੍ਤਿ ਸਬ੍ਬੇਵ ਤੇ ਛਲ਼ਾਸੀਤਿਸਹਸ੍ਸਸਙ੍ਖਾ ਰਾਜਾਨੋ ਬ੍ਰਹ੍ਮਦਤ੍ਤਸ੍ਸ ਨਾਮਕਾ ਚੂਲ਼ਨੀਪੁਤ੍ਤਾ ਪਞ੍ਚਾਲਾਨਂ ਰਥੇਸਭਾਵ ਅਹੇਸੁਂ. ਇਮੇ ਰਾਜਭਾਵਾਦਯੋ ਵਿਸੇਸਾ ਤੇਸੁ ਏਕਸ੍ਸਾਪਿ ਨਾਹੇਸੁਂ.

੩੭੭. ਮਹੇਸਿਤ੍ਤਮਕਾਰਯੀਤਿ ਤ੍ਵਞ੍ਚ ਤੇਸਂ ਸਬ੍ਬੇਸਮ੍ਪਿ ਅਨੁਪੁਬ੍ਬੇਨ ਅਗ੍ਗਮਹੇਸਿਭਾਵਂ ਅਕਾਸਿ, ਅਨੁਪ੍ਪਤ੍ਤਾਤਿ ਅਤ੍ਥੋ. ਕਸ੍ਮਾਤਿ ਗੁਣਤੋ ਚ ਸਾਮਿਕਭਾਵਤੋ ਚ ਅਵਿਸਿਟ੍ਠੇਸੁ ਏਤ੍ਤਕੇਸੁ ਜਨੇਸੁ ਪੁਰਿਮਕੇ ਰਾਜਾਨੋ ਪਹਾਯ ਪਚ੍ਛਿਮਂ ਏਕਂਮੇਵ ਕਸ੍ਮਾ ਕੇਨ ਕਾਰਣੇਨ ਅਨੁਸੋਚਸੀਤਿ ਪੁਚ੍ਛਿ.

ਤਂ ਸੁਤ੍ਵਾ ਉਬ੍ਬਰੀ ਸਂਵੇਗਜਾਤਾ ਪੁਨ ਤਾਪਸਂ –

੩੭੮. ‘‘ਆਤੁਮੇ ਇਤ੍ਥਿਭੂਤਾਯ, ਦੀਘਰਤ੍ਤਾਯ ਮਾਰਿਸ;

ਯਸ੍ਸਾ ਮੇ ਇਤ੍ਥਿਭੂਤਾਯ, ਸਂਸਾਰੇ ਬਹੁਭਾਸਸੀ’’ਤਿ. –

ਗਾਥਮਾਹ. ਤਤ੍ਥ ਆਤੁਮੇਤਿ ਅਤ੍ਤਨਿ. ਇਤ੍ਥਿਭੂਤਾਯਾਤਿ ਇਤ੍ਥਿਭਾਵਂ ਉਪਗਤਾਯ. ਦੀਘਰਤ੍ਤਾਯਾਤਿ ਦੀਘਰਤ੍ਤਂ. ਅਯਞ੍ਹੇਤ੍ਥ ਅਧਿਪ੍ਪਾਯੋ – ਇਤ੍ਥਿਭੂਤਾਯ ਅਤ੍ਤਨਿ ਸਬ੍ਬਕਾਲਂ ਇਤ੍ਥੀਯੇਵ ਹੋਤਿ, ਉਦਾਹੁ ਪੁਰਿਸਭਾਵਮ੍ਪਿ ਉਪਗਚ੍ਛਤੀਤਿ. ਯਸ੍ਸਾ ਮੇ ਇਤ੍ਥਿਭੂਤਾਯਾਤਿ ਯਸ੍ਸਾ ਮਯ੍ਹਂ ਇਤ੍ਥਿਭੂਤਾਯ ਏਵਂ ਤਾਵ ਬਹੁਸਂਸਾਰੇ ਮਹੇਸਿਭਾਵਂ ਮਹਾਮੁਨਿ ਤ੍ਵਂ ਭਾਸਸਿ ਕਥੇਸੀਤਿ ਅਤ੍ਥੋ. ‘‘ਆਹੁ ਮੇ ਇਤ੍ਥਿਭੂਤਾਯਾ’’ਤਿ ਵਾ ਪਾਠੋ. ਤਤ੍ਥ ਆਤਿ ਅਨੁਸ੍ਸਰਣਤ੍ਥੇ ਨਿਪਾਤੋ. ਆਹੁ ਮੇਤਿ ਸਯਂ ਅਨੁਸ੍ਸਰਿਤਂ ਅਞ੍ਞਾਤਮਿਦਂ ਮਯਾ, ਇਤ੍ਥਿਭੂਤਾਯ ਇਤ੍ਥਿਭਾਵਂ ਉਪਗਤਾਯ ਏਵਂ ਮਯ੍ਹਂ ਏਤ੍ਤਕਂ ਕਾਲਂ ਅਪਰਾਪਰੁਪ੍ਪਤ੍ਤਿ ਅਹੋਸਿ. ਕਸ੍ਮਾ? ਯਸ੍ਮਾ ਯਸ੍ਸਾ ਮੇ ਇਤ੍ਥਿਭੂਤਾਯ ਸਬ੍ਬੇਸਂ ਅਨੁਪੁਬ੍ਬੇਨ ਮਹੇਸਿਤ੍ਤਮਕਾਰਯਿ, ਕਿਂ ਤ੍ਵਂ, ਮਹਾਮੁਨਿ, ਸਂਸਾਰੇ ਬਹੁਂ ਭਾਸਸੀਤਿ ਯੋਜਨਾ.

ਤਂ ਸੁਤ੍ਵਾ ਤਾਪਸੋ ਅਯਂ ਨਿਯਮੋ ਸਂਸਾਰੇ ਨਤ੍ਥਿ ‘‘ਇਤ੍ਥੀ ਇਤ੍ਥੀਯੇਵ ਹੋਤਿ, ਪੁਰਿਸੋ ਪੁਰਿਸੋ ਏਵਾ’’ਤਿ ਦਸ੍ਸੇਨ੍ਤੋ –

੩੭੯. ‘‘ਅਹੁ ਇਤ੍ਥੀ ਅਹੁ ਪੁਰਿਸੋ, ਪਸੁਯੋਨਿਮ੍ਪਿ ਆਗਮਾ;

ਏਵਮੇਤਂ ਅਤੀਤਾਨਂ, ਪਰਿਯਨ੍ਤੋ ਨ ਦਿਸ੍ਸਤੀ’’ਤਿ. –

ਗਾਥਮਾਹ. ਤਤ੍ਥ ਅਹੁ ਇਤ੍ਥੀ ਅਹੁ ਪੁਰਿਸੋਤਿ ਤ੍ਵਂ ਕਦਾਚਿ ਇਤ੍ਥੀਪਿ ਅਹੋਸਿ, ਕਦਾਚਿ ਪੁਰਿਸੋਪਿ ਅਹੋਸਿ. ਨ ਕੇਵਲਂ ਇਤ੍ਥਿਪੁਰਿਸਭਾਵਮੇਵ, ਅਥ ਖੋ ਪਸੁ ਯੋਨਿਮ੍ਪਿ ਅਗਮਾਸਿ, ਕਦਾਚਿ ਪਸੁਭਾਵਮ੍ਪਿ ਅਗਮਾਸਿ, ਤਿਰਚ੍ਛਾਨਯੋਨਿਮ੍ਪਿ ਉਪਗਤਾ ਅਹੋਸਿ. ਏਵਮੇਤਂ ਅਤੀਤਾਨਂ, ਪਰਿਯਨ੍ਤੋ ਨ ਦਿਸ੍ਸਤੀਤਿ ਏਵਂ ਯਥਾਵੁਤ੍ਤਂ ਏਤਂ ਇਤ੍ਥਿਭਾਵਂ ਪੁਰਿਸਭਾਵਂ ਤਿਰਚ੍ਛਾਨਾਦਿਭਾਵਞ੍ਚ ਉਪਗਤਾਨਂ ਅਤੀਤਾਨਂ ਅਤ੍ਤਭਾਵਾਨਂ ਪਰਿਯਨ੍ਤੋ ਞਾਣਚਕ੍ਖੁਨਾ ਮਹਤਾ ਉਸ੍ਸਾਹੇਨ ਪਸ੍ਸਨ੍ਤਾਨਮ੍ਪਿ ਨ ਦਿਸ੍ਸਤਿ. ਨ ਕੇਵਲਂ ਤਵੇਵ, ਅਥ ਖੋ ਸਬ੍ਬੇਸਮ੍ਪਿ ਸਂਸਾਰੇ ਪਰਿਬ੍ਭਮਨ੍ਤਾਨਂ ਸਤ੍ਤਾਨਂ ਅਤ੍ਤਭਾਵਸ੍ਸ ਪਰਿਯਨ੍ਤੋ ਨ ਦਿਸ੍ਸਤੇਵ ਨ ਪਞ੍ਞਾਯਤੇਵ. ਤੇਨਾਹ ਭਗਵਾ –

‘‘ਅਨਮਤਗ੍ਗੋਯਂ, ਭਿਕ੍ਖਵੇ, ਸਂਸਾਰੋ, ਪੁਬ੍ਬਾ ਕੋਟਿ ਨ ਪਞ੍ਞਾਯਤਿ ਅਵਿਜ੍ਜਾਨੀਵਰਣਾਨਂ ਸਤ੍ਤਾਨਂ ਤਣ੍ਹਾਸਂਯੋਜਨਾਨਂ ਸਨ੍ਧਾਵਤਂ ਸਂਸਰਤ’’ਨ੍ਤਿ (ਸਂ. ਨਿ. ੨.੧੨੪).

ਏਵਂ ਤੇਨ ਤਾਪਸੇਨ ਸਂਸਾਰਸ੍ਸ ਅਪਰਿਯਨ੍ਤਤਂ ਕਮ੍ਮਸ੍ਸਕਤਞ੍ਚ ਵਿਭਾਵੇਨ੍ਤੇਨ ਦੇਸਿਤਂ ਧਮ੍ਮਂ ਸੁਤ੍ਵਾ ਸਂਸਾਰੇ ਸਂਵਿਗ੍ਗਹਦਯਾ ਧਮ੍ਮੇ ਚ ਪਸਨ੍ਨਮਾਨਸਾ ਵਿਗਤਸੋਕਸਲ੍ਲਾ ਹੁਤ੍ਵਾ ਅਤ੍ਤਨੋ ਪਸਾਦਂ ਸੋਕਵਿਗਮਨਞ੍ਚ ਪਕਾਸੇਨ੍ਤੀ –

੩੮੦. ‘‘ਆਦਿਤ੍ਤਂ ਵਤ ਮਂ ਸਨ੍ਤਂ, ਘਤਸਿਤ੍ਤਂਵ ਪਾਵਕਂ;

ਵਾਰਿਨਾ ਵਿਯ ਓਸਿਞ੍ਚਂ, ਸਬ੍ਬਂ ਨਿਬ੍ਬਾਪਯੇ ਦਰਂ.

੩੮੧. ‘‘ਅਬ੍ਬਹੀ ਵਤ ਮੇ ਸਲ੍ਲਂ, ਸੋਕਂ ਹਦਯਨਿਸ੍ਸਿਤਂ;

ਯੋ ਮੇ ਸੋਕਪਰੇਤਾਯ, ਪਤਿਸੋਕਂ ਅਪਾਨੁਦਿ.

੩੮੨. ‘‘ਸਾਹਂ ਅਬ੍ਬੂਲ਼੍ਹਸਲ੍ਲਾਸ੍ਮਿ, ਸੀਤਿਭੂਤਾਸ੍ਮਿ ਨਿਬ੍ਬੁਤਾ;

ਨ ਸੋਚਾਮਿ ਨ ਰੋਦਾਮਿ, ਤਵ ਸੁਤ੍ਵਾ ਮਹਾਮੁਨੀ’’ਤਿ. –

ਤਿਸ੍ਸੋ ਗਾਥਾ ਅਭਾਸਿ. ਤਾਸਂ ਅਤ੍ਥੋ ਹੇਟ੍ਠਾ ਵੁਤ੍ਤੋਯੇਵ.

ਇਦਾਨਿ ਸਂਵਿਗ੍ਗਹਦਯਾਯ ਉਬ੍ਬਰਿਯਾ ਪਟਿਪਤ੍ਤਿਂ ਦਸ੍ਸੇਨ੍ਤੋ ਸਤ੍ਥਾ –

੩੮੩. ‘‘ਤਸ੍ਸ ਤਂ ਵਚਨਂ ਸੁਤ੍ਵਾ, ਸਮਣਸ੍ਸ ਸੁਭਾਸਿਤਂ;

ਪਤ੍ਤਚੀਵਰਮਾਦਾਯ, ਪਬ੍ਬਜਿ ਅਨਗਾਰਿਯਂ.

੩੮੪. ‘‘ਸਾ ਚ ਪਬ੍ਬਜਿਤਾ ਸਨ੍ਤਾ, ਅਗਾਰਸ੍ਮਾ ਅਨਗਾਰਿਯਂ;

ਮੇਤ੍ਤਚਿਤ੍ਤਂ ਆਭਾਵੇਸਿ, ਬ੍ਰਹ੍ਮਲੋਕੂਪਪਤ੍ਤਿਯਾ.

੩੮੫. ‘‘ਗਾਮਾ ਗਾਮਂ ਵਿਚਰਨ੍ਤੀ, ਨਿਗਮੇ ਰਾਜਧਾਨਿਯੋ;

ਉਰੁਵੇਲ਼ਾ ਨਾਮ ਸੋ ਗਾਮੋ, ਯਤ੍ਥ ਕਾਲਮਕ੍ਰੁਬ੍ਬਥ.

੩੮੬. ‘‘ਮੇਤ੍ਤਚਿਤ੍ਤਂ ਆਭਾਵੇਤ੍ਵਾ, ਬ੍ਰਹ੍ਮਲੋਕੂਪਪਤ੍ਤਿਯਾ;

ਇਤ੍ਥਿਚਿਤ੍ਤਂ ਵਿਰਾਜੇਤ੍ਵਾ, ਬ੍ਰਹ੍ਮਲੋਕੂਪਗਾ ਅਹੂ’’ਤਿ. – ਚਤਸ੍ਸੋ ਗਾਥਾ ਅਭਾਸਿ;

੩੮੩-੪. ਤਤ੍ਥ ਤਸ੍ਸਾਤਿ ਤਸ੍ਸ ਤਾਪਸਸ੍ਸ. ਸੁਭਾਸਿਤਨ੍ਤਿ ਸੁਟ੍ਠੁ ਭਾਸਿਤਂ, ਧਮ੍ਮਨ੍ਤਿ ਅਤ੍ਥੋ. ਪਬ੍ਬਜਿਤਾ ਸਨ੍ਤਾਤਿ ਪਬ੍ਬਜ੍ਜਂ ਉਪਗਤਾ ਸਮਾਨਾ, ਪਬ੍ਬਜਿਤ੍ਵਾ ਵਾ ਹੁਤ੍ਵਾ ਸਨ੍ਤਕਾਯਵਾਚਾ. ਮੇਤ੍ਤਚਿਤ੍ਤਨ੍ਤਿ ਮੇਤ੍ਤਾਸਹਗਤਂ ਚਿਤ੍ਤਂ. ਚਿਤ੍ਤਸੀਸੇਨ ਮੇਤ੍ਤਜ੍ਝਾਨਂ ਵਦਤਿ. ਬ੍ਰਹ੍ਮਲੋਕੂਪਪਤ੍ਤਿਯਾਤਿ ਤਞ੍ਚ ਸਾ ਮੇਤ੍ਤਚਿਤ੍ਤਂ ਭਾਵੇਨ੍ਤੀ ਬ੍ਰਹ੍ਮਲੋਕੂਪਪਤ੍ਤਿਯਾ ਅਭਾਵੇਸਿ, ਨ ਵਿਪਸ੍ਸਨਾਪਾਦਕਾਦਿਅਤ੍ਥਂ. ਅਨੁਪ੍ਪਨ੍ਨੇ ਹਿ ਬੁਦ੍ਧੇ ਬ੍ਰਹ੍ਮਵਿਹਾਰਾਦਿਕੇ ਭਾਵੇਨ੍ਤਾ ਤਾਪਸਪਰਿਬ੍ਬਾਜਕਾ ਯਾਵਦੇਵ ਭਵਸਮ੍ਪਤ੍ਤਿਅਤ੍ਥਮੇਵ ਭਾਵੇਸੁਂ.

੩੮੫-੬. ਗਾਮਾ ਗਾਮਨ੍ਤਿ ਗਾਮਤੋ ਅਞ੍ਞਂ ਗਾਮਂ. ਆਭਾਵੇਤ੍ਵਾਤਿ ਵਡ੍ਢੇਤ੍ਵਾ ਬ੍ਰੂਹੇਤ੍ਵਾ. ‘‘ਅਭਾਵੇਤ੍ਵਾ’’ਤਿ ਕੇਚਿ ਪਠਨ੍ਤਿ, ਤੇਸਂ ਅ-ਕਾਰੋ ਨਿਪਾਤਮਤ੍ਤਂ. ਇਤ੍ਥਿਚਿਤ੍ਤਂ ਵਿਰਾਜੇਤ੍ਵਾਤਿ ਇਤ੍ਥਿਭਾਵੇ ਚਿਤ੍ਤਂ ਅਜ੍ਝਾਸਯਂ ਅਭਿਰੁਚਿਂ ਵਿਰਾਜੇਤ੍ਵਾ ਇਤ੍ਥਿਭਾਵੇ ਵਿਰਤ੍ਤਚਿਤ੍ਤਾ ਹੁਤ੍ਵਾ. ਬ੍ਰਹ੍ਮਲੋਕੂਪਗਾਤਿ ਪਟਿਸਨ੍ਧਿਗ੍ਗਹਣਵਸੇਨ ਬ੍ਰਹ੍ਮਲੋਕਂ ਉਪਗਮਨਕਾ ਅਹੋਸਿ. ਸੇਸਂ ਹੇਟ੍ਠਾ ਵੁਤ੍ਤਨਯਤ੍ਤਾ ਉਤ੍ਤਾਨਮੇਵ.

ਸਤ੍ਥਾ ਇਮਂ ਧਮ੍ਮਦੇਸਨਂ ਆਹਰਿਤ੍ਵਾ ਤਸ੍ਸਾ ਉਪਾਸਿਕਾਯ ਸੋਕਂ ਵਿਨੋਦੇਤ੍ਵਾ ਉਪਰਿ ਚਤੁਸਚ੍ਚਦੇਸਨਂ ਅਕਾਸਿ. ਸਚ੍ਚਪਰਿਯੋਸਾਨੇ ਸਾ ਉਪਾਸਿਕਾ ਸੋਤਾਪਤ੍ਤਿਫਲੇ ਪਤਿਟ੍ਠਹਿ. ਸਮ੍ਪਤ੍ਤਪਰਿਸਾਯ ਚ ਦੇਸਨਾ ਸਾਤ੍ਥਿਕਾ ਅਹੋਸੀਤਿ.

ਉਬ੍ਬਰਿਪੇਤਵਤ੍ਥੁਵਣ੍ਣਨਾ ਨਿਟ੍ਠਿਤਾ.

ਇਤਿ ਖੁਦ੍ਦਕ-ਅਟ੍ਠਕਥਾਯ ਪੇਤਵਤ੍ਥੁਸ੍ਮਿਂ

ਤੇਰਸਵਤ੍ਥੁਪਟਿਮਣ੍ਡਿਤਸ੍ਸ

ਦੁਤਿਯਸ੍ਸ ਉਬ੍ਬਰਿਵਗ੍ਗਸ੍ਸ ਅਤ੍ਥਸਂਵਣ੍ਣਨਾ ਨਿਟ੍ਠਿਤਾ.