੧੨. ਕਣ੍ਣਮੁਣ੍ਡਪੇਤਿਵਤ੍ਥੁਵਣ੍ਣਨਾ

ਸੋਣ੍ਣਸੋਪਾਨਫਲਕਾਤਿ ਇਦਂ ਸਤ੍ਥਰਿ ਸਾਵਤ੍ਥਿਯਂ ਵਿਹਰਨ੍ਤੇ ਕਣ੍ਣਮੁਣ੍ਡਪੇਤਿਂ ਆਰਬ੍ਭ ਵੁਤ੍ਤਂ. ਅਤੀਤੇ ਕਿਰ ਕਸ੍ਸਪਬੁਦ੍ਧਕਾਲੇ ਕਿਮਿਲਨਗਰੇ ਅਞ੍ਞਤਰੋ ਉਪਾਸਕੋ ਸੋਤਾਪਨ੍ਨੋ ਪਞ੍ਚਹਿ ਉਪਾਸਕਸਤੇਹਿ ਸਦ੍ਧਿਂ ਸਮਾਨਚ੍ਛਨ੍ਦੋ ਹੁਤ੍ਵਾ ਆਰਾਮਰੋਪਨਸੇਤੁਬਨ੍ਧਨਚਙ੍ਕਮਨਕਰਣਾਦੀਸੁ ਪੁਞ੍ਞਕਮ੍ਮੇਸੁ ਪਸੁਤੋ ਹੁਤ੍ਵਾ ਵਿਹਰਨ੍ਤੋ ਸਙ੍ਘਸ੍ਸ ਵਿਹਾਰਂ ਕਾਰੇਤ੍ਵਾ ਤੇਹਿ ਸਦ੍ਧਿਂ ਕਾਲੇਨ ਕਾਲਂ ਵਿਹਾਰਂ ਗਚ੍ਛਤਿ. ਤੇਸਂ ਭਰਿਯਾਯੋਪਿ ਉਪਾਸਿਕਾ ਹੁਤ੍ਵਾ ਅਞ੍ਞਮਞ੍ਞਂ ਸਮਗ੍ਗਾ ਮਾਲਾਗਨ੍ਧਵਿਲੇਪਨਾਦਿਹਤ੍ਥਾ ਕਾਲੇਨ ਕਾਲਂ ਵਿਹਾਰਂ ਗਚ੍ਛਨ੍ਤਿਯੋ ਅਨ੍ਤਰਾਮਗ੍ਗੇ ਆਰਾਮਸਭਾਦੀਸੁ ਵਿਸ੍ਸਮਿਤ੍ਵਾ ਗਚ੍ਛਨ੍ਤਿ.

ਅਥੇਕਦਿਵਸਂ ਕਤਿਪਯਾ ਧੁਤ੍ਤਾ ਏਕਿਸ੍ਸਾ ਸਭਾਯ ਸਨ੍ਨਿਸਿਨ੍ਨਾ ਤਾਸੁ ਤਤ੍ਥ ਵਿਸ੍ਸਮਿਤ੍ਵਾ ਗਤਾਸੁ ਤਾਸਂ ਰੂਪਸਮ੍ਪਤ੍ਤਿਂ ਦਿਸ੍ਵਾ ਪਟਿਬਦ੍ਧਚਿਤ੍ਤਾ ਹੁਤ੍ਵਾ ਤਾਸਂ ਸੀਲਾਚਾਰਗੁਣਸਮ੍ਪਨ੍ਨਤਂ ਞਤ੍ਵਾ ਕਥਂ ਸਮੁਟ੍ਠਾਪੇਸੁਂ ‘‘ਕੋ ਏਤਾਸੁ ਏਕਿਸ੍ਸਾਪਿ ਸੀਲਭੇਦਂ ਕਾਤੁਂ ਸਮਤ੍ਥੋ’’ਤਿ. ਤਤ੍ਥ ਅਞ੍ਞਤਰੋ ‘‘ਅਹਂ ਸਮਤ੍ਥੋ’’ਤਿ ਆਹ. ਤੇ ਤੇਨ ‘‘ਸਹਸ੍ਸੇਨ ਅਬ੍ਭੁਤਂ ਕਰੋਮਾ’’ਤਿ ਅਬ੍ਭੁਤਂ ਅਕਂਸੁ. ਸੋ ਅਨੇਕੇਹਿ ਉਪਾਯੇਹਿ ਵਾਯਮਮਾਨੋ ਤਾਸੁ ਸਭਂ ਆਗਤਾਸੁ ਸੁਮੁਞ੍ਚਿਤਂ ਸਤ੍ਤਤਨ੍ਤਿਂ ਮਧੁਰਸ੍ਸਰਂ ਵੀਣਂ ਵਾਦੇਨ੍ਤੋ ਮਧੁਰੇਨੇਵ ਸਰੇਨ ਕਾਮਪਟਿਸਂਯੁਤ੍ਤਗੀਤਾਨਿ ਗਾਯਨ੍ਤੋ ਗੀਤਸਦ੍ਦੇਨ ਤਾਸੁ ਅਞ੍ਞਤਰਂ ਇਤ੍ਥਿਂ ਸੀਲਭੇਦਂ ਪਾਪੇਨ੍ਤੋ ਅਤਿਚਾਰਿਨਿਂ ਕਤ੍ਵਾ ਤੇ ਧੁਤ੍ਤੇ ਸਹਸ੍ਸਂ ਪਰਾਜੇਸਿ. ਤੇ ਸਹਸ੍ਸਪਰਾਜਿਤਾ ਤਸ੍ਸਾ ਸਾਮਿਕਸ੍ਸ ਆਰੋਚੇਸੁਂ. ਸਾਮਿਕੋ ਤਂ ਪੁਚ੍ਛਿ – ‘‘ਕਿਂ ਤ੍ਵਂ ਏਵਰੂਪਾ, ਯਥਾ ਤੇ ਪੁਰਿਸਾ ਅਵੋਚੁ’’ਨ੍ਤਿ. ਸਾ ‘‘ਨਾਹਂ ਈਦਿਸਂ ਜਾਨਾਮੀ’’ਤਿ ਪਟਿਕ੍ਖਿਪਿਤ੍ਵਾ ਤਸ੍ਮਿਂ ਅਸਦ੍ਦਹਨ੍ਤੇ ਸਮੀਪੇ ਠਿਤਂ ਸੁਨਖਂ ਦਸ੍ਸੇਤ੍ਵਾ ਸਪਥਂ ਅਕਾਸਿ ‘‘ਸਚੇ ਮਯਾ ਤਾਦਿਸਂ ਪਾਪਕਮ੍ਮਂ ਕਤਂ, ਅਯਂ ਛਿਨ੍ਨਕਣ੍ਣੋ ਕਾਲ਼ਸੁਨਖੋ ਤਤ੍ਥ ਤਤ੍ਥ ਭਵੇ ਜਾਤਂ ਮਂ ਖਾਦਤੂ’’ਤਿ. ਇਤਰਾਪਿ ਪਞ੍ਚਸਤਾ ਇਤ੍ਥਿਯੋ ਤਂ ਇਤ੍ਥਿਂ ਅਤਿਚਾਰਿਨਿਂ ਜਾਨਨ੍ਤੀ ਕਿਂ ਅਯਂ ਤਥਾਰੂਪਂ ਪਾਪਂ ਅਕਾਸਿ, ਉਦਾਹੁ ਨਾਕਾਸੀ’’ਤਿ ਚੋਦਿਤਾ ‘‘ਨ ਮਯਂ ਏਵਰੂਪਂ ਜਾਨਾਮਾ’’ਤਿ ਮੁਸਾ ਵਤ੍ਵਾ ‘‘ਸਚੇ ਮਯਂ ਜਾਨਾਮ, ਭਵੇ ਭਵੇ ਏਤਿਸ੍ਸਾਯੇਵ ਦਾਸਿਯੋ ਭਵੇਯ੍ਯਾਮਾ’’ਤਿ ਸਪਥਂ ਅਕਂਸੁ.

ਅਥ ਸਾ ਅਤਿਚਾਰਿਨੀ ਇਤ੍ਥੀ ਤੇਨੇਵ ਵਿਪ੍ਪਟਿਸਾਰੇਨ ਡਯ੍ਹਮਾਨਹਦਯਾ ਸੁਸ੍ਸਿਤ੍ਵਾ ਨ ਚਿਰੇਨੇਵ ਕਾਲਂ ਕਤ੍ਵਾ ਹਿਮਵਤਿ ਪਬ੍ਬਤਰਾਜੇ ਸਤ੍ਤਨ੍ਨਂ ਮਹਾਸਰਾਨਂ ਅਞ੍ਞਤਰਸ੍ਸ ਕਣ੍ਣਮੁਣ੍ਡਦਹਸ੍ਸ ਤੀਰੇ ਵਿਮਾਨਪੇਤੀ ਹੁਤ੍ਵਾ ਨਿਬ੍ਬਤ੍ਤਿ. ਵਿਮਾਨਸਾਮਨ੍ਤਾ ਚਸ੍ਸਾ ਕਮ੍ਮਵਿਪਾਕਾਨੁਭਵਨਯੋਗ੍ਗਾ ਏਕਾ ਪੋਕ੍ਖਰਣੀ ਨਿਬ੍ਬਤ੍ਤਿ. ਸੇਸਾ ਚ ਪਞ੍ਚਸਤਾ ਇਤ੍ਥਿਯੋ ਕਾਲਂ ਕਤ੍ਵਾ ਸਪਥਕਮ੍ਮਵਸੇਨ ਤਸ੍ਸਾਯੇਵ ਦਾਸਿਯੋ ਹੁਤ੍ਵਾ ਨਿਬ੍ਬਤ੍ਤਿਂਸੁ. ਸਾ ਤਤ੍ਥ ਪੁਬ੍ਬੇ ਕਤਸ੍ਸ ਪੁਞ੍ਞਕਮ੍ਮਸ੍ਸ ਫਲੇਨ ਦਿਵਸਭਾਗਂ ਦਿਬ੍ਬਸਮ੍ਪਤ੍ਤਿਂ ਅਨੁਭਵਿਤ੍ਵਾ ਅਡ੍ਢਰਤ੍ਤੇ ਪਾਪਕਮ੍ਮਬਲਸਞ੍ਚੋਦਿਤਾ ਸਯਨਤੋ ਉਟ੍ਠਹਿਤ੍ਵਾ ਪੋਕ੍ਖਰਣਿਤੀਰਂ ਗਚ੍ਛਤਿ. ਤਤ੍ਥ ਗਤਂ ਗਜਪੋਤਕਪ੍ਪਮਾਣੋ ਏਕੋ ਕਾਲ਼ਸੁਨਖੋ ਭੇਰਵਰੂਪੋ ਛਿਨ੍ਨਕਣ੍ਣੋ ਤਿਖਿਣਾਯਤਕਥਿਨਦਾਠੋ ਸੁਵਿਪ੍ਫੁਲਿਤਖਦਿਰਙ੍ਗਾਰਪੁਞ੍ਜਸਦਿਸਨਯਨੋ ਨਿਰਨ੍ਤਰਪ੍ਪਵਤ੍ਤਵਿਜ੍ਜੁਲਤਾਸਙ੍ਘਾਤਸਦਿਸਜਿਵ੍ਹੋ ਕਥਿਨਤਿਖਿਣਨਖੋ ਖਰਾਯਤਦੁਬ੍ਬਣ੍ਣਲੋਮੋ ਤਤੋ ਆਗਨ੍ਤ੍ਵਾ ਤਂ ਭੂਮਿਯਂ ਨਿਪਾਤੇਤ੍ਵਾ ਅਤਿਸਯਜਿਘਚ੍ਛਾਭਿਭੂਤੋ ਵਿਯ ਪਸਯ੍ਹ ਖਾਦਨ੍ਤੋ ਅਟ੍ਠਿਸਙ੍ਖਲਿਕਮਤ੍ਤਂ ਕਤ੍ਵਾ ਦਨ੍ਤੇਹਿ ਗਹੇਤ੍ਵਾ ਪੋਕ੍ਖਰਣਿਯਂ ਖਿਪਿਤ੍ਵਾ ਅਨ੍ਤਰਧਾਯਤਿ. ਸਾ ਚ ਤਤ੍ਥ ਪਕ੍ਖਿਤ੍ਤਸਮਨਨ੍ਤਰਮੇਵ ਪਕਤਿਰੂਪਧਾਰਿਨੀ ਹੁਤ੍ਵਾ ਵਿਮਾਨਂ ਅਭਿਰੁਯ੍ਹ ਸਯਨੇ ਨਿਪਜ੍ਜਤਿ. ਇਤਰਾ ਪਨ ਤਸ੍ਸਾ ਦਾਸਬ੍ਯਮੇਵ ਦੁਕ੍ਖਂ ਅਨੁਭਵਨ੍ਤਿ. ਏਵਂ ਤਾਸਂ ਤਤ੍ਥ ਵਸਨ੍ਤੀਨਂ ਪਞ੍ਞਾਸਾਧਿਕਾਨਿ ਪਞ੍ਚ ਵਸ੍ਸਸਤਾਨਿ ਵੀਤਿਵਤ੍ਤਾਨਿ.

ਅਥ ਤਾਸਂ ਪੁਰਿਸੇਹਿ ਵਿਨਾ ਦਿਬ੍ਬਸਮ੍ਪਤ੍ਤਿਂ ਅਨੁਭਵਨ੍ਤੀਨਂ ਉਕ੍ਕਣ੍ਠਾ ਅਹੇਸੁਂ. ਤਤ੍ਥ ਚ ਕਣ੍ਣਮੁਣ੍ਡਦਹਤੋ ਨਿਗ੍ਗਤਾ ਪਬ੍ਬਤਵਿਵਰੇਨ ਆਗਨ੍ਤ੍ਵਾ ਗਙ੍ਗਂ ਨਦਿਂ ਅਨੁਪਵਿਟ੍ਠਾ ਏਕਾ ਨਦੀ ਅਤ੍ਥਿ. ਤਾਸਞ੍ਚ ਵਸਨਟ੍ਠਾਨਸਮੀਪੇ ਏਕੋ ਦਿਬ੍ਬਫਲੇਹਿ ਅਮ੍ਬਰੁਕ੍ਖੇਹਿ ਪਨਸਲਬੁਜਾਦੀਹਿ ਚ ਉਪਸੋਭਿਤੋ ਆਰਾਮਸਦਿਸੋ ਅਰਞ੍ਞਪ੍ਪਦੇਸੋ ਅਤ੍ਥਿ. ਤਾ ਏਵਂ ਸਮਚਿਨ੍ਤੇਸੁਂ – ‘‘ਹਨ੍ਦ, ਮਯਂ ਇਮਾਨਿ ਅਮ੍ਬਫਲਾਨਿ ਇਮਿਸ੍ਸਾ ਨਦਿਯਾ ਪਕ੍ਖਿਪਿਸ੍ਸਾਮ, ਅਪ੍ਪੇਵ ਨਾਮ ਇਮਂ ਫਲਂ ਦਿਸ੍ਵਾ ਫਲਲੋਭੇਨ ਕੋਚਿਦੇਵ ਪੁਰਿਸੋ ਇਧਾਗਚ੍ਛੇਯ੍ਯ, ਤੇਨ ਸਦ੍ਧਿਂ ਰਮਿਸ੍ਸਾਮਾਤਿ. ਤਾ ਤਥਾ ਅਕਂਸੁ. ਤਾਹਿ ਪਨ ਪਕ੍ਖਿਤ੍ਤਾਨਿ ਅਮ੍ਬਫਲਾਨਿ ਕਾਨਿਚਿ ਤਾਪਸਾ ਗਣ੍ਹਿਂਸੁ, ਕਾਨਿਚਿ ਵਨਚਰਕਾ, ਕਾਨਿਚਿ ਕਾਕਾ ਵਿਲੁਜ੍ਜਿਂਸੁ, ਕਾਨਿਚਿ ਤੀਰੇ ਲਗ੍ਗਿਂਸੁ. ਏਕਂ ਪਨ ਗਙ੍ਗਾਯ ਸੋਤਂ ਪਤ੍ਵਾ ਅਨੁਕ੍ਕਮੇਨ ਬਾਰਾਣਸਿਂ ਸਮ੍ਪਾਪੁਣਿ.

ਤੇਨ ਚ ਸਮਯੇਨ ਬਾਰਾਣਸਿਰਾਜਾ ਲੋਹਜਾਲਪਰਿਕ੍ਖਿਤ੍ਤੇ ਗਙ੍ਗਾਜਲੇ ਨ੍ਹਾਯਤਿ. ਅਥ ਤਂ ਫਲਂ ਨਦਿਸੋਤੇਨ ਵੁਯ੍ਹਮਾਨਂ ਅਨੁਕ੍ਕਮੇਨ ਆਗਨ੍ਤ੍ਵਾ ਲੋਹਜਾਲੇ ਲਗ੍ਗਿ. ਤਂ ਵਣ੍ਣਗਨ੍ਧਰਸਸਮ੍ਪਨ੍ਨਂ ਮਹਨ੍ਤਂ ਦਿਬ੍ਬਂ ਅਮ੍ਬਫਲਂ ਦਿਸ੍ਵਾ ਰਾਜਪੁਰਿਸਾ ਰਞ੍ਞੋ ਉਪਨੇਸੁਂ. ਰਾਜਾ ਤਸ੍ਸ ਏਕਦੇਸਂ ਗਹੇਤ੍ਵਾ ਵੀਮਂਸਨਤ੍ਥਾਯ ਏਕਸ੍ਸ ਬਨ੍ਧਨਾਗਾਰੇ ਠਪਿਤਸ੍ਸ ਵਜ੍ਝਚੋਰਸ੍ਸ ਖਾਦਿਤੁਂ ਅਦਾਸਿ. ਸੋ ਤਂ ਖਾਦਿਤ੍ਵਾ ‘‘ਦੇਵ, ਮਯਾ ਏਵਰੂਪਂ ਨ ਖਾਦਿਤਪੁਬ੍ਬਂ, ਦਿਬ੍ਬਮਿਦਂ ਮਞ੍ਞੇ ਅਮ੍ਬਫਲ’’ਨ੍ਤਿ ਆਹ. ਰਾਜਾ ਪੁਨਪਿ ਤਸ੍ਸ ਏਕਂ ਖਣ੍ਡਂ ਅਦਾਸਿ. ਸੋ ਤਂ ਖਾਦਿਤ੍ਵਾ ਵਿਗਤਵਲਿਤਪਲਿਤੋ ਅਤਿਵਿਯ ਮਨੋਹਰਰੂਪੋ ਯੋਬ੍ਬਨੇ ਠਿਤੋ ਵਿਯ ਅਹੋਸਿ. ਤਂ ਦਿਸ੍ਵਾ ਰਾਜਾ ਅਚ੍ਛਰਿਯਬ੍ਭੁਤਜਾਤੋ ਤਂ ਅਮ੍ਬਫਲਂ ਪਰਿਭੁਞ੍ਜਿਤ੍ਵਾ ਸਰੀਰੇ ਵਿਸੇਸਂ ਲਭਿਤ੍ਵਾ ਮਨੁਸ੍ਸੇ ਪੁਚ੍ਛਿ – ‘‘ਕਤ੍ਥ ਏਵਰੂਪਾਨਿ ਦਿਬ੍ਬਅਮ੍ਬਫਲਾਨਿ ਸਂਵਿਜ੍ਜਨ੍ਤੀ’’ਤਿ? ਮਨੁਸ੍ਸਾ ਏਵਮਾਹਂਸੁ – ‘‘ਹਿਮਵਨ੍ਤੇ ਕਿਰ, ਦੇਵ, ਪਬ੍ਬਤਰਾਜੇ’’ਤਿ. ‘‘ਸਕ੍ਕਾ ਪਨ ਤਾਨਿ ਆਨੇਤੁ’’ਨ੍ਤਿ? ‘‘ਵਨਚਰਕਾ, ਦੇਵ, ਜਾਨਨ੍ਤੀ’’ਤਿ.

ਰਾਜਾ ਵਨਚਰਕੇ ਪਕ੍ਕੋਸਾਪੇਤ੍ਵਾ ਤੇਸਂ ਤਮਤ੍ਥਂ ਆਚਿਕ੍ਖਿਤ੍ਵਾ ਤੇਹਿ ਸਮ੍ਮਨ੍ਤੇਤ੍ਵਾ ਦਿਨ੍ਨਸ੍ਸ ਏਕਸ੍ਸ ਵਨਚਰਕਸ੍ਸ ਸਹਸ੍ਸਂ ਦਤ੍ਵਾ ਤਂ ਵਿਸ੍ਸਜ੍ਜੇਸਿ – ‘‘ਗਚ੍ਛ, ਸੀਘਂ ਤਂ ਮੇ ਅਮ੍ਬਫਲਂ ਆਨੇਹੀ’’ਤਿ. ਸੋ ਤਂ ਕਹਾਪਣਸਹਸ੍ਸਂ ਪੁਤ੍ਤਦਾਰਸ੍ਸ ਦਤ੍ਵਾ ਪਾਥੇਯ੍ਯਂ ਗਹੇਤ੍ਵਾ ਪਟਿਗਙ੍ਗਂ ਕਣ੍ਣਮੁਣ੍ਡਦਹਾਭਿਮੁਖੋ ਗਨ੍ਤ੍ਵਾ ਮਨੁਸ੍ਸਪਥਂ ਅਤਿਕ੍ਕਮਿਤ੍ਵਾ ਕਣ੍ਣਮੁਣ੍ਡਦਹਤੋ ਓਰਂ ਸਟ੍ਠਿਯੋਜਨਪ੍ਪਮਾਣੇ ਪਦੇਸੇ ਏਕਂ ਤਾਪਸਂ ਦਿਸ੍ਵਾ ਤੇਨ ਆਚਿਕ੍ਖਿਤਮਗ੍ਗੇਨ ਗਚ੍ਛਨ੍ਤੋ ਪੁਨ ਤਿਂਸਯੋਜਨਪ੍ਪਮਾਣੇ ਪਦੇਸੇ ਏਕਂ ਤਾਪਸਂ ਦਿਸ੍ਵਾ, ਤੇਨ ਆਚਿਕ੍ਖਿਤਮਗ੍ਗੇਨ ਗਚ੍ਛਨ੍ਤੋ ਪੁਨ ਪਨ੍ਨਰਸਯੋਜਨਪ੍ਪਮਾਣੇ ਠਾਨੇ ਅਞ੍ਞਂ ਤਾਪਸਂ ਦਿਸ੍ਵਾ, ਤਸ੍ਸ ਅਤ੍ਤਨੋ ਆਗਮਨਕਾਰਣਂ ਕਥੇਸਿ. ਤਾਪਸੋ ਤਂ ਅਨੁਸਾਸਿ – ‘‘ਇਤੋ ਪਟ੍ਠਾਯ ਇਮਂ ਮਹਾਗਙ੍ਗਂ ਪਹਾਯ ਇਮਂ ਖੁਦ੍ਦਕਨਦਿਂ ਨਿਸ੍ਸਾਯ ਪਟਿਸੋਤਂ ਗਚ੍ਛਨ੍ਤੋ ਯਦਾ ਪਬ੍ਬਤਵਿਵਰਂ ਪਸ੍ਸਸਿ, ਤਦਾ ਰਤ੍ਤਿਯਂ ਉਕ੍ਕਂ ਗਹੇਤ੍ਵਾ ਪਵਿਸੇਯ੍ਯਾਸਿ. ਅਯਞ੍ਚ ਨਦੀ ਰਤ੍ਤਿਯਂ ਨਪ੍ਪਵਤ੍ਤਤਿ, ਤੇਨ ਤੇ ਗਮਨਯੋਗ੍ਗਾ ਹੋਤਿ, ਕਤਿਪਯਯੋਜਨਾਤਿਕ੍ਕਮੇਨ ਤੇ ਅਮ੍ਬੇ ਪਸ੍ਸਿਸ੍ਸਸੀ’’ਤਿ. ਸੋ ਤਥਾ ਕਤ੍ਵਾ ਉਦਯਨ੍ਤੇ ਸੂਰਿਯੇ ਵਿਵਿਧਰਤਨਰਂਸਿਜਾਲਪਜ੍ਜੋਤਿਤਭੂਮਿਭਾਗਂ ਫਲਭਾਰਾਵਨਤਸਾਖਾਵਿਤਾਨਤਰੁਗਣੋਪਸੋਭਿਤਂ ਨਾਨਾਵਿਧਵਿਹਙ੍ਗਗਣੂਪਕੂਜਿਤਂ ਅਤਿਵਿਯ ਮਨੋਹਰਂ ਅਮ੍ਬਵਨਂ ਸਮ੍ਪਾਪੁਣਿ.

ਅਥ ਨਂ ਤਾ ਅਮਨੁਸ੍ਸਿਤ੍ਥਿਯੋ ਦੂਰਤੋਵ ਆਗਚ੍ਛਨ੍ਤਂ ਦਿਸ੍ਵਾ ‘‘ਏਸ ਮਮ ਪਰਿਗ੍ਗਹੋ, ਏਸ ਮਮ ਪਰਿਗ੍ਗਹੋ’’ਤਿ ਉਪਧਾਵਿਂਸੁ. ਸੋ ਪਨ ਤਾਹਿ ਸਦ੍ਧਿਂ ਤਤ੍ਥ ਦਿਬ੍ਬਸਮ੍ਪਤ੍ਤਿਂ ਅਨੁਭਵਿਤੁਂ ਯੋਗ੍ਗਸ੍ਸ ਪੁਞ੍ਞਕਮ੍ਮਸ੍ਸ ਅਕਤਤ੍ਤਾ ਤਾ ਦਿਸ੍ਵਾਵ ਭੀਤੋ ਵਿਰਵਨ੍ਤੋ ਪਲਾਯਿਤ੍ਵਾ ਅਨੁਕ੍ਕਮੇਨ ਬਾਰਾਣਸਿਂ ਪਤ੍ਵਾ ਤਂ ਪਵਤ੍ਤਿਂ ਰਞ੍ਞੋ ਆਰੋਚੇਸਿ. ਰਾਜਾ ਤਂ ਸੁਤ੍ਵਾ ਤਾ ਇਤ੍ਥਿਯੋ ਦਟ੍ਠੁਂ ਅਮ੍ਬਫਲਾਨਿ ਚ ਪਰਿਭੁਞ੍ਜਿਤੁਂ ਸਞ੍ਜਾਤਾਭਿਲਾਸੋ ਰਜ੍ਜਭਾਰਂ ਅਮਚ੍ਚੇਸੁ ਆਰੋਪੇਤ੍ਵਾ ਮਿਗਵਾਪਦੇਸੇਨ ਸਨ੍ਨਦ੍ਧਧਨੁਕਲਾਪੋ ਖਗ੍ਗਂ ਬਨ੍ਧਿਤ੍ਵਾ ਕਤਿਪਯਮਨੁਸ੍ਸਪਰਿਵਾਰੋ ਤੇਨੇਵ ਵਨਚਰਕੇਨ ਦਸ੍ਸਿਤਮਗ੍ਗੇਨ ਗਨ੍ਤ੍ਵਾ ਕਤਿਪਯਯੋਜਨਨ੍ਤਰੇ ਠਾਨੇ ਮਨੁਸ੍ਸੇਪਿ ਠਪੇਤ੍ਵਾ ਵਨਚਰਕਮੇਵ ਗਹੇਤ੍ਵਾ ਅਨੁਕ੍ਕਮੇਨ ਗਨ੍ਤ੍ਵਾ ਤਮ੍ਪਿ ਤਤੋ ਨਿਵਤ੍ਤਾਪੇਤ੍ਵਾ ਉਦਯਨ੍ਤੇ ਦਿਵਾਕਰੇ ਅਮ੍ਬਵਨਂ ਪਾਵਿਸਿ. ਅਥ ਨਂ ਤਾ ਇਤ੍ਥਿਯੋ ਅਭਿਨਵਉਪ੍ਪਨ੍ਨਮਿਵ ਦੇਵਪੁਤ੍ਤਂ ਦਿਸ੍ਵਾ ਪਚ੍ਚੁਗ੍ਗਨ੍ਤ੍ਵਾ ‘‘ਰਾਜਾ’’ਤਿ ਞਤ੍ਵਾ ਸਞ੍ਜਾਤਸਿਨੇਹਬਹੁਮਾਨਾ ਸਕ੍ਕਚ੍ਚਂ ਨ੍ਹਾਪੇਤ੍ਵਾ ਦਿਬ੍ਬੇਹਿ ਵਤ੍ਥਾਲਙ੍ਕਾਰਮਾਲਾਗਨ੍ਧਵਿਲੇਪਨੇਹਿ ਸੁਮਣ੍ਡਿਤਪਸਾਧਿਤਂ ਕਤ੍ਵਾ ਵਿਮਾਨਂ ਆਰੋਪੇਤ੍ਵਾ ਨਾਨਗ੍ਗਰਸਂ ਦਿਬ੍ਬਭੋਜਨਂ ਭੋਜੇਤ੍ਵਾ ਤਸ੍ਸ ਇਚ੍ਛਾਨੁਰੂਪਂ ਪਯਿਰੁਪਾਸਿਂਸੁ.

ਅਥ ਦਿਯਡ੍ਢਵਸ੍ਸਸਤੇ ਅਤਿਕ੍ਕਨ੍ਤੇ ਰਾਜਾ ਅਡ੍ਢਰਤ੍ਤਿਸਮਯੇ ਉਟ੍ਠਹਿਤ੍ਵਾ ਨਿਸਿਨ੍ਨੋ ਤਂ ਅਤਿਚਾਰਿਨਿਂ ਪੇਤਿਂ ਪੋਕ੍ਖਰਣਿਤੀਰਂ ਗਚ੍ਛਨ੍ਤਿਂ ਦਿਸ੍ਵਾ ‘‘ਕਿਂ ਨੁ ਖੋ ਏਸਾ ਇਮਾਯ ਵੇਲਾਯ ਗਚ੍ਛਤੀ’’ਤਿ ਵੀਮਂਸਿਤੁਕਾਮੋ ਅਨੁਬਨ੍ਧਿ. ਅਥ ਨਂ ਤਤ੍ਥ ਗਤਂ ਸੁਨਖੇਨ ਖਜ੍ਜਮਾਨਂ ਦਿਸ੍ਵਾ ‘‘ਕਿਂ ਨੁ ਖੋ ਇਦ’’ਨ੍ਤਿ ਅਜਾਨਨ੍ਤੋ ਤਯੋ ਚ ਦਿਵਸੇ ਵੀਮਂਸਿਤ੍ਵਾ ‘‘ਏਸੋ ਏਤਿਸ੍ਸਾ ਪਚ੍ਚਾਮਿਤ੍ਤੋ ਭਵਿਸ੍ਸਤੀ’’ਤਿ ਨਿਸਿਤੇਨ ਉਸੁਨਾ ਵਿਜ੍ਝਿਤ੍ਵਾ ਜੀਵਿਤਾ ਵੋਰੋਪੇਤ੍ਵਾ ਤਞ੍ਚ ਇਤ੍ਥਿਂ ਪੋਥੇਤ੍ਵਾ ਪੋਕ੍ਖਰਣਿਂ ਓਤਾਰੇਤ੍ਵਾ ਪਟਿਲਦ੍ਧਪੁਰਿਮਰੂਪਂ ਦਿਸ੍ਵਾ –

੩੪੮. ‘‘ਸੋਣ੍ਣਸੋਪਾਨਫਲਕਾ, ਸੋਣ੍ਣਵਾਲੁਕਸਨ੍ਥਤਾ;

ਤਤ੍ਥ ਸੋਗਨ੍ਧਿਯਾ ਵਗ੍ਗੂ, ਸੁਚਿਗਨ੍ਧਾ ਮਨੋਰਮਾ.

੩੪੯. ‘‘ਨਾਨਾਰੁਕ੍ਖੇਹਿ ਸਞ੍ਛਨ੍ਨਾ, ਨਾਨਾਗਨ੍ਧਸਮੇਰਿਤਾ;

ਨਾਨਾਪਦੁਮਸਞ੍ਛਨ੍ਨਾ, ਪੁਣ੍ਡਰੀਕਸਮੋਤਤਾ.

੩੫੦. ‘‘ਸੁਰਭਿਂ ਸਮ੍ਪਵਾਯਨ੍ਤਿ, ਮਨੁਞ੍ਞਾ ਮਾਲੁਤੇਰਿਤਾ;

ਹਂਸਕੋਞ੍ਚਾਭਿਰੁਦਾ ਚ, ਚਕ੍ਕਵਕ੍ਕਾਭਿਕੂਜਿਤਾ.

੩੫੧. ‘‘ਨਾਨਾਦਿਜਗਣਾਕਿਣ੍ਣਾ, ਨਾਨਾਸਰਗਣਾਯੁਤਾ;

ਨਾਨਾਫਲਧਰਾ ਰੁਕ੍ਖਾ, ਨਾਨਾਪੁਪ੍ਫਧਰਾ ਵਨਾ.

੩੫੨. ‘‘ਨ ਮਨੁਸ੍ਸੇਸੁ ਈਦਿਸਂ, ਨਗਰਂ ਯਾਦਿਸਂ ਇਦਂ;

ਪਾਸਾਦਾ ਬਹੁਕਾ ਤੁਯ੍ਹਂ, ਸੋਵਣ੍ਣਰੂਪਿਯਾਮਯਾ;

ਦਦ੍ਦਲ੍ਲਮਾਨਾ ਆਭੇਨ੍ਤਿ, ਸਮਨ੍ਤਾ ਚਤੁਰੋ ਦਿਸਾ.

੩੫੩. ‘‘ਪਞ੍ਚ ਦਾਸਿਸਤਾ ਤੁਯ੍ਹਂ, ਯਾ ਤੇਮਾ ਪਰਿਚਾਰਿਕਾ;

ਤਾ ਕਮ੍ਬੁਕਾਯੂਰਧਰਾ, ਕਞ੍ਚਨਾਵੇਲ਼ਭੂਸਿਤਾ.

੩੫੪. ‘‘ਪਲ੍ਲਙ੍ਕਾ ਬਹੁਕਾ ਤੁਯ੍ਹਂ, ਸੋਵਣ੍ਣਰੂਪਿਯਾਮਯਾ;

ਕਦਲਿਮਿਗਸਞ੍ਛਨ੍ਨਾ, ਸਜ੍ਜਾ ਗੋਨਕਸਨ੍ਥਤਾ.

੩੫੫. ‘‘ਯਤ੍ਥ ਤੁਵਂ ਵਾਸੂਪਗਤਾ, ਸਬ੍ਬਕਾਮਸਮਿਦ੍ਧਿਨੀ;

ਸਮ੍ਪਤ੍ਤਾਯਡ੍ਢਰਤ੍ਤਾਯ, ਤਤੋ ਉਟ੍ਠਾਯ ਗਚ੍ਛਸਿ.

੩੫੬. ‘‘ਉਯ੍ਯਾਨਭੂਮਿਂ ਗਨ੍ਤ੍ਵਾਨ, ਪੋਕ੍ਖਰਞ੍ਞਾ ਸਮਨ੍ਤਤੋ;

ਤਸ੍ਸਾ ਤੀਰੇ ਤੁਵਂ ਠਾਸਿ, ਹਰਿਤੇ ਸਦ੍ਦਲੇ ਸੁਭੇ.

੩੫੭. ‘‘ਤਤੋ ਤੇ ਕਣ੍ਣਮੁਣ੍ਡੋ ਸੁਨਖੋ, ਅਙ੍ਗਮਙ੍ਗਾਨਿ ਖਾਦਤਿ;

ਯਦਾ ਚ ਖਾਯਿਤਾ ਆਸਿ, ਅਟ੍ਠਿਸਙ੍ਖਲਿਕਾ ਕਤਾ;

ਓਗਾਹਸਿ ਪੋਕ੍ਖਰਣਿਂ, ਹੋਤਿ ਕਾਯੋ ਯਥਾ ਪੁਰੇ.

੩੫੮. ‘‘ਤਤੋ ਤ੍ਵਂ ਅਙ੍ਗਪਚ੍ਚਙ੍ਗੀ, ਸੁਚਾਰੁ ਪਿਯਦਸ੍ਸਨਾ;

ਵਤ੍ਥੇਨ ਪਾਰੁਪਿਤ੍ਵਾਨ, ਆਯਾਸਿ ਮਮ ਸਨ੍ਤਿਕਂ.

੩੫੯. ‘‘ਕਿਂ ਨੁ ਕਾਯੇਨ ਵਾਚਾਯ, ਮਨਸਾ ਦੁਕ੍ਕਟਂ ਕਤਂ;

ਕਿਸ੍ਸਕਮ੍ਮਵਿਪਾਕੇਨ, ਕਣ੍ਣਮੁਣ੍ਡੋ ਸੁਨਖੋ ਤਵ;

ਅਙ੍ਗਮਙ੍ਗਾਨਿ ਖਾਦਤੀ’’ਤਿ. –

ਦ੍ਵਾਦਸਹਿ ਗਾਥਾਹਿ ਤਂ ਤਸ੍ਸ ਪਵਤ੍ਤਿਂ ਪਟਿਪੁਚ੍ਛਿ.

੩੪੮. ਤਤ੍ਥ ਸੋਣ੍ਣਸੋਪਾਨਫਲਕਾਤਿ ਸੁਵਣ੍ਣਮਯਸੋਪਾਨਫਲਕਾ. ਸੋਣ੍ਣਵਾਲੁਕਸਨ੍ਥਤਾਤਿ ਸਮਨ੍ਤਤੋ ਸੁਵਣ੍ਣਮਯਾਹਿ ਵਾਲੁਕਾਹਿ ਸਨ੍ਥਤਾ. ਤਤ੍ਥਾਤਿ ਪੋਕ੍ਖਰਣਿਯਂ. ਸੋਗਨ੍ਧਿਯਾਤਿ ਸੋਗਨ੍ਧਿਕਾ. ਵਗ੍ਗੂਤਿ ਸੁਨ੍ਦਰਾ ਰੁਚਿਰਾ. ਸੁਚਿਗਨ੍ਧਾਤਿ ਮਨੁਞ੍ਞਗਨ੍ਧਾ.

੩੪੯. ਨਾਨਾਗਨ੍ਧਸਮੇਰਿਤਾਤਿ ਨਾਨਾਵਿਧਸੁਰਭਿਗਨ੍ਧਵਸੇਨ ਗਨ੍ਧਵਾਯੁਨਾ ਸਮਨ੍ਤਤੋ ਏਰਿਤਾ. ਨਾਨਾਪਦੁਮਸਞ੍ਛਨ੍ਨਾਤਿ ਨਾਨਾਵਿਧਰਤ੍ਤਪਦੁਮਸਞ੍ਛਾਦਿਤਸਲਿਲਤਲਾ. ਪੁਣ੍ਡਰੀਕਸਮੋਤਤਾਤਿ ਸੇਤਪਦੁਮੇਹਿ ਚ ਸਮੋਕਿਣ੍ਣਾ.

੩੫੦. ਸੁਰਭਿਂ ਸਮ੍ਪਵਾਯਨ੍ਤੀਤਿ ਸਮ੍ਮਦੇਵ ਸੁਗਨ੍ਧਂ ਵਾਯਤਿ ਪੋਕ੍ਖਰਣੀਤਿ ਅਧਿਪ੍ਪਾਯੋ. ਹਂਸਕੋਞ੍ਚਾਭਿਰੁਦਾਤਿ ਹਂਸੇਹਿ ਚ ਕੋਞ੍ਚੇਹਿ ਚ ਅਭਿਨਾਦਿਤਾ.

੩੫੧. ਨਾਨਾਦਿਜਗਣਾਕਿਣ੍ਣਾਤਿ ਨਾਨਾਦਿਜਗਣਾਕਿਣ੍ਣਾ. ਨਾਨਾਸਰਗਣਾਯੁਤਾਤਿ ਨਾਨਾਵਿਧਵਿਹਙ੍ਗਮਾਭਿਰੁਦਸਮੂਹਯੁਤ੍ਤਾ. ਨਾਨਾਫਲਧਰਾਤਿ ਨਾਨਾਵਿਧਫਲਧਾਰਿਨੋ ਸਬ੍ਬਕਾਲਂ ਵਿਵਿਧਫਲਭਾਰਨਮਿਤਸਾਖਤ੍ਤਾ. ਨਾਨਾਪੁਪ੍ਫਧਰਾ ਵਨਾਤਿ ਨਾਨਾਵਿਧਸੁਰਭਿਕੁਸੁਮਦਾਯਿਕਾਨਿ ਵਨਾਨੀਤਿ ਅਤ੍ਥੋ. ਲਿਙ੍ਗਵਿਪਲ੍ਲਾਸੇਨ ਹਿ ‘‘ਵਨਾ’’ਤਿ ਵੁਤ੍ਤਂ.

੩੫੨. ਨ ਮਨੁਸ੍ਸੇਸੁ ਈਦਿਸਂ ਨਗਰਨ੍ਤਿ ਯਾਦਿਸਂ ਤਵ ਇਦਂ ਨਗਰਂ, ਈਦਿਸਂ ਮਨੁਸ੍ਸੇਸੁ ਨਤ੍ਥਿ, ਮਨੁਸ੍ਸਲੋਕੇ ਨ ਉਪਲਬ੍ਭਤੀਤਿ ਅਤ੍ਥੋ. ਰੂਪਿਯਮਯਾਤਿ ਰਜਤਮਯਾ. ਦਦ੍ਦਲ੍ਲਮਾਨਾਤਿ ਅਤਿਵਿਯ ਵਿਰੋਚਮਾਨਾ. ਆਭੇਨ੍ਤੀਤਿ ਸੋਭਯਨ੍ਤਿ. ਸਮਨ੍ਤਾ ਚਤੁਰੋ ਦਿਸਾਤਿ ਸਮਨ੍ਤਤੋ ਚਤਸ੍ਸੋਪਿ ਦਿਸਾਯੋ.

੩੫੩. ਯਾ ਤੇਮਾਤਿ ਯਾ ਤੇ ਇਮਾ. ਪਰਿਚਾਰਿਕਾਤਿ ਵੇਯ੍ਯਾਵਚ੍ਚਕਾਰਿਨਿਯੋ. ਤਾਤਿ ਤਾ ਪਰਿਚਾਰਿਕਾਯੋ. ਕਮ੍ਬੁਕਾਯੂਰਧਰਾਤਿ ਸਙ੍ਖਵਲਯਕਾਯੂਰਵਿਭੂਸਿਤਾ. ਕਞ੍ਚਨਾਵੇਲ਼ਭੂਸਿਤਾਤਿ ਸੁਵਣ੍ਣਵਟਂਸਕਸਮਲਙ੍ਕਤਕੇਸਹਤ੍ਥਾ.

੩੫੪. ਕਦਲਿਮਿਗਸਞ੍ਛਨ੍ਨਾਤਿ ਕਦਲਿਮਿਗਚਮ੍ਮਪਚ੍ਚਤ੍ਥਰਣਤ੍ਥਤਾ. ਸਜ੍ਜਾਤਿ ਸਜ੍ਜਿਤਾ ਸਯਿਤੁਂ ਯੁਤ੍ਤਰੂਪਾ. ਗੋਨਕਸਨ੍ਥਤਾਤਿ ਦੀਘਲੋਮਕੇਨ ਕੋਜਵੇਨ ਸਨ੍ਥਤਾ.

੩੫੫. ਯਤ੍ਥਾਤਿ ਯਸ੍ਮਿਂ ਪਲ੍ਲਙ੍ਕੇ. ਵਾਸੂਪਗਤਾਤਿ ਵਾਸਂ ਉਪਗਤਾ, ਸਯਿਤਾਤਿ ਅਤ੍ਥੋ. ਸਮ੍ਪਤ੍ਤਾਯਡ੍ਢਰਤ੍ਤਾਯਾਤਿ ਅਡ੍ਢਰਤ੍ਤਿਯਾ ਉਪਗਤਾਯ. ਤਤੋਤਿ ਪਲ੍ਲਙ੍ਕਤੋ.

੩੫੬. ਪੋਕ੍ਖਰਞ੍ਞਾਤਿ ਪੋਕ੍ਖਰਣਿਯਾ. ਹਰਿਤੇਤਿ ਨੀਲੇ. ਸਦ੍ਦਲੇਤਿ ਤਰੁਣਤਿਣਸਞ੍ਛਨ੍ਨੇ. ਸੁਭੇਤਿ ਸੁਦ੍ਧੇ. ਸੁਭੇਤਿ ਵਾ ਤਸ੍ਸਾ ਆਲਪਨਂ. ਭਦ੍ਦੇ, ਸਮਨ੍ਤਤੋ ਹਰਿਤੇ ਸਦ੍ਦਲੇ ਤਸ੍ਸਾ ਪੋਕ੍ਖਰਣਿਯਾ ਤੀਰੇ ਤ੍ਵਂ ਗਨ੍ਤ੍ਵਾਨ ਠਾਸਿ ਤਿਟ੍ਠਸੀਤਿ ਯੋਜਨਾ.

੩੫੭. ਕਣ੍ਣਮੁਣ੍ਡੋਤਿ ਖਣ੍ਡਿਤਕਣ੍ਣੋ ਛਿਨ੍ਨਕਣ੍ਣੋ. ਖਾਯਿਤਾ ਆਸੀਤਿ ਖਾਦਿਤਾ ਅਹੋਸਿ. ਅਟ੍ਠਿਸਙ੍ਖਲਿਕਾ ਕਤਾਤਿ ਅਟ੍ਠਿਸਙ੍ਖਲਿਕਮਤ੍ਤਾ ਕਤਾ. ਯਥਾ ਪੁਰੇਤਿ ਸੁਨਖੇਨ ਖਾਦਨਤੋ ਪੁਬ੍ਬੇ ਵਿਯ.

੩੫੮. ਤਤੋਤਿ ਪੋਕ੍ਖਰਣਿਂ ਓਗਾਹਨਤੋ ਪਚ੍ਛਾ. ਅਙ੍ਗਪਚ੍ਚਙ੍ਗੀਤਿ ਪਰਿਪੁਣ੍ਣਸਬ੍ਬਙ੍ਗਪਚ੍ਚਙ੍ਗਵਤੀ. ਸੁਚਾਰੂਤਿ ਸੁਟ੍ਠੁ ਮਨੋਰਮਾ. ਪਿਯਦਸ੍ਸਨਾਤਿ ਦਸ੍ਸਨੀਯਾ. ਆਯਾਸੀਤਿ ਆਗਚ੍ਛਸਿ.

ਏਵਂ ਤੇਨ ਰਞ੍ਞਾ ਪੁਚ੍ਛਿਤਾ ਸਾ ਪੇਤੀ ਆਦਿਤੋ ਪਟ੍ਠਾਯ ਅਤ੍ਤਨੋ ਪਵਤ੍ਤਿਂ ਤਸ੍ਸ ਕਥੇਨ੍ਤੀ –

੩੬੦. ‘‘ਕਿਮਿਲਾਯਂ ਗਹਪਤਿ, ਸਦ੍ਧੋ ਆਸਿ ਉਪਾਸਕੋ;

ਤਸ੍ਸਾਹਂ ਭਰਿਯਾ ਆਸਿਂ, ਦੁਸ੍ਸੀਲਾ ਅਤਿਚਾਰਿਨੀ.

੩੬੧. ‘‘ਸੋ ਮਂ ਅਤਿਚਰਮਾਨਾਯ, ਸਾਮਿਕੋ ਏਤਦਬ੍ਰਵਿ;

‘ਨੇਤਂ ਤਂ ਛਨ੍ਨਂ ਪਤਿਰੂਪਂ, ਯਂ ਤ੍ਵਂ ਅਤਿਚਰਾਸਿ ਮਂ’.

੩੬੨. ‘‘ਸਾਹਂ ਘੋਰਞ੍ਚ ਸਪਥਂ, ਮੁਸਾਵਾਦਞ੍ਚ ਭਾਸਿਸਂ;

‘ਨਾਹਂ ਤਂ ਅਤਿਚਰਾਮਿ, ਕਾਯੇਨ ਉਦ ਚੇਤਸਾ.

੩੬੩. ‘‘‘ਸਚਾਹਂ ਤਂ ਅਤਿਚਰਾਮਿ, ਕਾਯੇਨ ਉਦ ਚੇਤਸਾ;

ਕਣ੍ਣਮੁਣ੍ਡੋਯਂ ਸੁਨਖੋ, ਅਙ੍ਗਮਙ੍ਗਾਨਿ ਖਾਦਤੁ’.

੩੬੪. ‘‘ਤਸ੍ਸ ਕਮ੍ਮਸ੍ਸ ਵਿਪਾਕਂ, ਮੁਸਾਵਾਦਸ੍ਸ ਚੂਭਯਂ;

ਸਤ੍ਤੇਵ ਵਸ੍ਸਸਤਾਨਿ, ਅਨੁਭੂਤਂ ਯਤੋ ਹਿ ਮੇ;

ਕਣ੍ਣਮੁਣ੍ਡੋ ਚ ਸੁਨਖੋ, ਅਙ੍ਗਮਙ੍ਗਾਨਿ ਖਾਦਤੀ’’ਤਿ. – ਪਞ੍ਚ ਗਾਥਾ ਆਹ;

੩੬੦-੧. ਤਤ੍ਥ ਕਿਮਿਲਾਯਨ੍ਤਿ ਏਵਂਨਾਮਕੇ ਨਗਰੇ. ਅਤਿਚਾਰਿਨੀਤਿ ਭਰਿਯਾ ਹਿ ਪਤਿਂ ਅਤਿਕ੍ਕਮ੍ਮ ਚਰਣਤੋ ‘‘ਅਤਿਚਾਰਿਨੀ’’ਤਿ ਵੁਚ੍ਚਤਿ. ਅਤਿਚਰਮਾਨਾਯ ਮਯਿ ਸੋ ਸਾਮਿਕੋ ਮਂ ਏਤਦਬ੍ਰਵੀਤਿ ਯੋਜਨਾ. ਨੇਤਂ ਛਨ੍ਨਨ੍ਤਿਆਦਿ ਵੁਤ੍ਤਾਕਾਰਦਸ੍ਸਨਂ. ਤਤ੍ਥ ਨੇਤਂ ਛਨ੍ਨਨ੍ਤਿ ਨ ਏਤਂ ਯੁਤ੍ਤਂ. ਨ ਪਤਿਰੂਪਨ੍ਤਿ ਤਸ੍ਸੇਵ ਵੇਵਚਨਂ. ਯਨ੍ਤਿ ਕਿਰਿਯਾਪਰਾਮਸਨਂ. ਅਤਿਚਰਾਸੀਤਿ ਅਤਿਚਰਸਿ, ਅਯਮੇਵ ਵਾ ਪਾਠੋ. ਯਂ ਮਂ ਤ੍ਵਂ ਅਤਿਚਰਸਿ, ਤਤ੍ਥ ਯਂ ਅਤਿਚਰਣਂ, ਨੇਤਂ ਛਨ੍ਨਂ ਨੇਤਂ ਪਤਿਰੂਪਨ੍ਤਿ ਅਤ੍ਥੋ.

੩੬੨-੪. ਘੋਰਨ੍ਤਿ ਦਾਰੁਣਂ. ਸਪਥਨ੍ਤਿ ਸਪਨਂ. ਭਾਸਿਸਨ੍ਤਿ ਅਭਾਸਿਂ. ਸਚਾਹਨ੍ਤਿ ਸਚੇ ਅਹਂ. ਤਨ੍ਤਿ ਤ੍ਵਂ. ਤਸ੍ਸ ਕਮ੍ਮਸ੍ਸਾਤਿ ਤਸ੍ਸ ਪਾਪਕਮ੍ਮਸ੍ਸ ਦੁਸ੍ਸੀਲ੍ਯਕਮ੍ਮਸ੍ਸ. ਮੁਸਾਵਾਦਸ੍ਸ ਚਾਤਿ ‘‘ਨਾਹਂ ਤਂ ਅਤਿਚਰਾਮੀ’’ਤਿ ਵੁਤ੍ਤਮੁਸਾਵਾਦਸ੍ਸ ਚ. ਉਭਯਨ੍ਤਿ ਉਭਯਸ੍ਸ ਵਿਪਾਕਂ. ਅਨੁਭੂਤਨ੍ਤਿ ਅਨੁਭੂਯਮਾਨਂ ਮਯਾਤਿ ਅਤ੍ਥੋ. ਯਤੋਤਿ ਯਤੋ ਪਾਪਕਮ੍ਮਤੋ.

ਏਵਞ੍ਚ ਪਨ ਵਤ੍ਵਾ ਤੇਨ ਅਤ੍ਤਨੋ ਕਤਂ ਉਪਕਾਰਂ ਕਿਤ੍ਤੇਨ੍ਤੀ –

੩੬੫. ‘‘ਤ੍ਵਞ੍ਚ ਦੇਵ ਬਹੁਕਾਰੋ, ਅਤ੍ਥਾਯ ਮੇ ਇਧਾਗਤੋ;

ਸੁਮੁਤ੍ਤਾਹਂ ਕਣ੍ਣਮੁਣ੍ਡਸ੍ਸ, ਅਸੋਕਾ ਅਕੁਤੋਭਯਾ.

੩੬੬. ‘‘ਤਾਹਂ ਦੇਵ ਨਮਸ੍ਸਾਮਿ, ਯਾਚਾਮਿ ਪਞ੍ਜਲੀਕਤਾ;

ਭੁਞ੍ਜ ਅਮਾਨੁਸੇ ਕਾਮੇ, ਰਮ ਦੇਵ ਮਯਾ ਸਹਾ’’ਤਿ. –

ਦ੍ਵੇ ਗਾਥਾ ਆਹ. ਤਤ੍ਥ ਦੇਵਾਤਿ ਰਾਜਾਨਂ ਆਲਪਤਿ. ਕਣ੍ਣਮੁਣ੍ਡਸ੍ਸਾਤਿ ਕਣ੍ਣਮੁਣ੍ਡਤੋ. ਨਿਸ੍ਸਕ੍ਕੇ ਹਿ ਇਦਂ ਸਾਮਿਵਚਨਂ. ਅਥ ਰਾਜਾ ਤਤ੍ਥ ਵਾਸੇਨ ਨਿਬ੍ਬਿਨ੍ਨਮਾਨਸੋ ਗਮਨਜ੍ਝਾਸਯਂ ਪਕਾਸੇਸਿ. ਤਂ ਸੁਤ੍ਵਾ ਪੇਤੀ ਰਞ੍ਞੋ ਪਟਿਬਦ੍ਧਚਿਤ੍ਤਾ ਤਤ੍ਥੇਵਸ੍ਸ ਵਾਸਂ ਯਾਚਨ੍ਤੀ ‘‘ਤਾਹਂ, ਦੇਵ, ਨਮਸ੍ਸਾਮੀ’’ਤਿ ਗਾਥਮਾਹ.

ਪੁਨ ਰਾਜਾ ਏਕਂਸੇਨ ਨਗਰਂ ਗਨ੍ਤੁਕਾਮੋਵ ਹੁਤ੍ਵਾ ਅਤ੍ਤਨੋ ਅਜ੍ਝਾਸਯਂ ਪਵੇਦੇਨ੍ਤੋ –

੩੬੭. ‘‘ਭੁਤ੍ਤਾ ਅਮਾਨੁਸਾ ਕਾਮਾ, ਰਮਿਤੋਮ੍ਹਿ ਤਯਾ ਸਹ;

ਤਾਹਂ ਸੁਭਗੇ ਯਾਚਾਮਿ, ਖਿਪ੍ਪਂ ਪਟਿਨਯਾਹਿ ਮ’’ਨ੍ਤਿ. –

ਓਸਾਨਗਾਥਮਾਹ. ਤਤ੍ਥ ਤਾਹਨ੍ਤਿ ਤਂ ਅਹਂ. ਸੁਭਗੇਤਿ ਸੁਭਗਯੁਤ੍ਤੇ. ਪਟਿਨਯਾਹਿ ਮਨ੍ਤਿ ਮਯ੍ਹਂ ਨਗਰਮੇਵ ਮਂ ਪਟਿਨੇਹਿ. ਸੇਸਂ ਸਬ੍ਬਤ੍ਥ ਪਾਕਟਮੇਵ.

ਅਥ ਸਾ ਵਿਮਾਨਪੇਤੀ ਰਞ੍ਞੋ ਵਚਨਂ ਸੁਤ੍ਵਾ ਵਿਯੋਗਂ ਅਸਹਮਾਨਾ ਸੋਕਾਤੁਰਤਾਯ ਬ੍ਯਾਕੁਲਹਦਯਾ ਵੇਧਮਾਨਸਰੀਰਾ ਨਾਨਾਵਿਧੇਹਿ ਉਪਾਯੇਹਿ ਆਯਾਚਿਤ੍ਵਾਪਿ ਤਂ ਤਤ੍ਥ ਵਾਸੇਤੁਂ ਅਸਕ੍ਕੋਨ੍ਤੀ ਬਹੂਹਿ ਮਹਾਰਹੇਹਿ ਰਤਨੇਹਿ ਸਦ੍ਧਿਂ ਰਾਜਾਨਂ ਨਗਰਂ ਨੇਤ੍ਵਾ ਪਾਸਾਦਂ ਆਰੋਪੇਤ੍ਵਾ ਕਨ੍ਦਿਤ੍ਵਾ ਪਰਿਦੇਵਿਤ੍ਵਾ ਅਤ੍ਤਨੋ ਵਸਨਟ੍ਠਾਨਮੇਵ ਗਤਾ. ਰਾਜਾ ਪਨ ਤਂ ਦਿਸ੍ਵਾ ਸਞ੍ਜਾਤਸਂਵੇਗੋ ਦਾਨਾਦੀਨਿ ਪੁਞ੍ਞਕਮ੍ਮਾਨਿ ਕਤ੍ਵਾ ਸਗ੍ਗਪਰਾਯਣੋ ਅਹੋਸਿ. ਅਥ ਅਮ੍ਹਾਕਂ ਭਗਵਤਿ ਲੋਕੇ ਉਪ੍ਪਜ੍ਜਿਤ੍ਵਾ ਪਵਤ੍ਤਿਤਵਰਧਮ੍ਮਚਕ੍ਕੇ ਅਨੁਕ੍ਕਮੇਨ ਸਾਵਤ੍ਥਿਯਂ ਵਿਹਰਨ੍ਤੇ ਏਕਦਿਵਸਂ ਆਯਸ੍ਮਾ ਮਹਾਮੋਗ੍ਗਲ੍ਲਾਨੋ ਪਬ੍ਬਤਚਾਰਿਕਂ ਚਰਮਾਨੋ ਤਂ ਇਤ੍ਥਿਂ ਸਪਰਿਵਾਰਂ ਦਿਸ੍ਵਾ ਤਾਯ ਕਤਕਮ੍ਮਂ ਪੁਚ੍ਛਿ. ਸਾ ਆਦਿਤੋ ਪਟ੍ਠਾਯ ਸਬ੍ਬਂ ਥੇਰਸ੍ਸ ਕਥੇਸਿ. ਥੇਰੋ ਤਾਸਂ ਧਮ੍ਮਂ ਦੇਸੇਸਿ. ਤਂ ਪਵਤ੍ਤਿਂ ਥੇਰੋ ਭਗਵਤੋ ਆਰੋਚੇਸਿ. ਭਗਵਾ ਤਮਤ੍ਥਂ ਅਟ੍ਠੁਪ੍ਪਤ੍ਤਿਂ ਕਤ੍ਵਾ ਸਮ੍ਪਤ੍ਤਪਰਿਸਾਯ ਧਮ੍ਮਂ ਦੇਸੇਸਿ. ਮਹਾਜਨੋ ਪਟਿਲਦ੍ਧਸਂਵੇਗੋ ਪਾਪਤੋ ਓਰਮਿਤ੍ਵਾ ਦਾਨਾਦੀਨਿ ਪੁਞ੍ਞਕਮ੍ਮਾਨਿ ਕਤ੍ਵਾ ਸਗ੍ਗਪਰਾਯਣੋ ਅਹੋਸੀਤਿ.

ਕਣ੍ਣਮੁਣ੍ਡਪੇਤਿਵਤ੍ਥੁਵਣ੍ਣਨਾ ਨਿਟ੍ਠਿਤਾ.