੧੧. ਸੁਤ੍ਤਪੇਤਵਤ੍ਥੁਵਣ੍ਣਨਾ

ਅਹਂ ਪੁਰੇ ਪਬ੍ਬਜਿਤਸ੍ਸ ਭਿਕ੍ਖੁਨੋਤਿ ਇਦਂ ਸੁਤ੍ਤਪੇਤਵਤ੍ਥੁ. ਤਸ੍ਸ ਕਾ ਉਪ੍ਪਤ੍ਤਿ? ਸਾਵਤ੍ਥਿਯਾ ਕਿਰ ਅਵਿਦੂਰੇ ਅਞ੍ਞਤਰਸ੍ਮਿਂ ਗਾਮਕੇ ਅਮ੍ਹਾਕਂ ਸਤ੍ਥਰਿ ਅਨੁਪ੍ਪਨ੍ਨੇਯੇਵ ਸਤ੍ਤਨ੍ਨਂ ਵਸ੍ਸਸਤਾਨਂ ਉਪਰਿ ਅਞ੍ਞਤਰੋ ਦਾਰਕੋ ਏਕਂ ਪਚ੍ਚੇਕਬੁਦ੍ਧਂ ਉਪਟ੍ਠਹਿ. ਤਸ੍ਸ ਮਾਤਾ ਤਸ੍ਮਿਂ ਵਯਪ੍ਪਤ੍ਤੇ ਤਸ੍ਸਤ੍ਥਾਯ ਸਮਾਨਕੁਲਤੋ ਅਞ੍ਞਤਰਂ ਕੁਲਧੀਤਰਂ ਆਨੇਸਿ. ਵਿਵਾਹਦਿਵਸੇਯੇਵ ਚ ਸੋ ਕੁਮਾਰੋ ਸਹਾਯੇਹਿ ਸਦ੍ਧਿਂ ਨ੍ਹਾਯਿਤੁਂ ਗਤੋ ਅਹਿਨਾ ਦਟ੍ਠੋ ਕਾਲਮਕਾਸਿ, ‘‘ਯਕ੍ਖਗਾਹੇਨਾ’’ਤਿਪਿ ਵਦਨ੍ਤਿ. ਸੋ ਪਚ੍ਚੇਕਬੁਦ੍ਧਸ੍ਸ ਉਪਟ੍ਠਾਨੇਨ ਬਹੁਂ ਕੁਸਲਕਮ੍ਮਂ ਕਤ੍ਵਾ ਠਿਤੋਪਿ ਤਸ੍ਸਾ ਦਾਰਿਕਾਯ ਪਟਿਬਦ੍ਧਚਿਤ੍ਤਤਾਯ ਵਿਮਾਨਪੇਤੋ ਹੁਤ੍ਵਾ ਨਿਬ੍ਬਤ੍ਤਿ, ਮਹਿਦ੍ਧਿਕੋ ਪਨ ਅਹੋਸਿ ਮਹਾਨੁਭਾਵੋ.

ਅਥ ਸੋ ਤਂ ਦਾਰਿਕਂ ਅਤ੍ਤਨੋ ਵਿਮਾਨਂ ਨੇਤੁਕਾਮੋ ‘‘ਕੇਨ ਨੁ ਖੋ ਉਪਾਯੇਨ ਏਸਾ ਦਿਟ੍ਠਧਮ੍ਮਵੇਦਨੀਯਕਮ੍ਮਂ ਕਤ੍ਵਾ ਮਯਾ ਸਦ੍ਧਿਂ ਇਧ ਅਭਿਰਮੇਯ੍ਯਾ’’ਤਿ ਤਸ੍ਸਾ ਦਿਬ੍ਬਭੋਗਸਮ੍ਪਤ੍ਤਿਯਾ ਅਨੁਭਵਨਹੇਤੁਂ ਵੀਮਂਸਨ੍ਤੋ ਪਚ੍ਚੇਕਬੁਦ੍ਧਂ ਚੀਵਰਕਮ੍ਮਂ ਕਰੋਨ੍ਤਂ ਦਿਸ੍ਵਾ ਮਨੁਸ੍ਸਰੂਪੇਨ ਗਨ੍ਤ੍ਵਾ ਵਨ੍ਦਿਤ੍ਵਾ ‘‘ਕਿਂ, ਭਨ੍ਤੇ, ਸੁਤ੍ਤਕੇਨ ਅਤ੍ਥੋ ਅਤ੍ਥੀ’’ਤਿ ਆਹ. ‘‘ਚੀਵਰਕਮ੍ਮਂ ਕਰੋਮਿ, ਉਪਾਸਕਾ’’ਤਿ. ‘‘ਤੇਨ ਹਿ, ਭਨ੍ਤੇ, ਅਸੁਕਸ੍ਮਿਂ ਠਾਨੇ ਸੁਤ੍ਤਭਿਕ੍ਖਂ ਚਰਥਾ’’ਤਿ ਤਸ੍ਸਾ ਦਾਰਿਕਾਯ ਗੇਹਂ ਦਸ੍ਸੇਸਿ. ਪਚ੍ਚੇਕਬੁਦ੍ਧੋ ਤਤ੍ਥ ਗਨ੍ਤ੍ਵਾ ਘਰਦ੍ਵਾਰੇ ਅਟ੍ਠਾਸਿ. ਅਥ ਸਾ ਪਚ੍ਚੇਕਬੁਦ੍ਧਂ ਤਤ੍ਥ ਠਿਤਂ ਦਿਸ੍ਵਾ ਪਸਨ੍ਨਮਾਨਸਾ ‘‘ਸੁਤ੍ਤਕੇਨ ਮੇ ਅਯ੍ਯੋ ਅਤ੍ਥਿਕੋ’’ਤਿ ਞਤ੍ਵਾ ਏਕਂ ਸੁਤ੍ਤਗੁਲ਼ਂ ਅਦਾਸਿ. ਅਥ ਸੋ ਅਮਨੁਸ੍ਸੋ ਮਨੁਸ੍ਸਰੂਪੇਨ ਤਸ੍ਸ ਦਾਰਿਕਾਯ ਘਰਂ ਗਨ੍ਤ੍ਵਾ ਤਸ੍ਸਾ ਮਾਤਰਂ ਯਾਚਿਤ੍ਵਾ ਤਾਯ ਸਦ੍ਧਿਂ ਕਤਿਪਾਹਂ ਵਸਿਤ੍ਵਾ ਤਸ੍ਸਾ ਮਾਤੁਯਾ ਅਨੁਗ੍ਗਹਤ੍ਥਂ ਤਸ੍ਮਿਂ ਗੇਹੇ ਸਬ੍ਬਭਾਜਨਾਨਿ ਹਿਰਞ੍ਞਸੁਵਣ੍ਣਸ੍ਸ ਪੂਰੇਤ੍ਵਾ ਸਬ੍ਬਤ੍ਥ ਉਪਰਿ ਨਾਮਂ ਲਿਖਿ ‘‘ਇਦਂ ਦੇਵਦਤ੍ਤਿਯਂ ਧਨਂ ਨ ਕੇਨਚਿ ਗਹੇਤਬ੍ਬ’’ਨ੍ਤਿ, ਤਞ੍ਚ ਦਾਰਿਕਂ ਗਹੇਤ੍ਵਾ ਅਤ੍ਤਨੋ ਵਿਮਾਨਂ ਅਗਮਾਸਿ. ਤਸ੍ਸਾ ਮਾਤਾ ਪਹੂਤਂ ਧਨਂ ਲਭਿਤ੍ਵਾ ਅਤ੍ਤਨੋ ਞਾਤਕਾਨਂ ਕਪਣਦ੍ਧਿਕਾਦਿਨਞ੍ਚ ਦਤ੍ਵਾ ਅਤ੍ਤਨਾ ਚ ਪਰਿਭੁਞ੍ਜਿਤ੍ਵਾ ਕਾਲਂ ਕਰੋਨ੍ਤੀ ‘‘ਮਮ ਧੀਤਾ ਆਗਚ੍ਛਤਿ ਚੇ, ਇਦਂ ਧਨਂ ਦਸ੍ਸੇਥਾ’’ਤਿ ਞਾਤਕਾਨਂ ਕਥੇਤ੍ਵਾ ਕਾਲਮਕਾਸਿ.

ਤਤੋ ਸਤ੍ਤਨ੍ਨਂ ਵਸ੍ਸਸਤਾਨਂ ਅਚ੍ਚਯੇਨ ਅਮ੍ਹਾਕਂ ਭਗਵਤਿ ਲੋਕੇ ਉਪ੍ਪਜ੍ਜਿਤ੍ਵਾ ਪਵਤ੍ਤਿਤਵਰਧਮ੍ਮਚਕ੍ਕੇ ਅਨੁਕ੍ਕਮੇਨ ਸਾਵਤ੍ਥਿਯਂ ਵਿਹਰਨ੍ਤੇ ਤਸ੍ਸਾ ਇਤ੍ਥਿਯਾ ਤੇਨ ਅਮਨੁਸ੍ਸੇਨ ਸਦ੍ਧਿਂ ਵਸਨ੍ਤਿਯਾ ਉਕ੍ਕਣ੍ਠਾ ਉਪ੍ਪਜ੍ਜਿ. ਸਾ ਤਂ ‘‘ਸਾਧੁ, ਅਯ੍ਯਪੁਤ੍ਤ, ਮਂ ਸਕਞ੍ਞੇਵ ਗੇਹਂ ਪਟਿਨੇਹੀ’’ਤਿ ਵਦਨ੍ਤੀ –

੩੪੧. ‘‘ਅਹਂ ਪੁਰੇ ਪਬ੍ਬਜਿਤਸ੍ਸ ਭਿਕ੍ਖੁਨੋ,

ਸੁਤ੍ਤਂ ਅਦਾਸਿਂ ਉਪਸਙ੍ਕਮ੍ਮ ਯਾਚਿਤਾ;

ਤਸ੍ਸ ਵਿਪਾਕੋ ਵਿਪੁਲਫਲੂਪਲਬ੍ਭਤਿ,

ਬਹੁਕਾ ਚ ਮੇ ਉਪ੍ਪਜ੍ਜਰੇ ਵਤ੍ਥਕੋਟਿਯੋ.

੩੪੨. ‘‘ਪੁਪ੍ਫਾਭਿਕਿਣ੍ਣਂ ਰਮਿਤਂ ਵਿਮਾਨਂ, ਅਨੇਕਚਿਤ੍ਤਂ ਨਰਨਾਰਿਸੇਵਿਤਂ;

ਸਾਹਂ ਭੁਞ੍ਜਾਮਿ ਚ ਪਾਰੁਪਾਮਿ ਚ, ਪਹੂਤਵਿਤ੍ਤਾ ਨ ਚ ਤਾਵ ਖੀਯਤਿ.

੩੪੩. ‘‘ਤਸ੍ਸੇਵ ਕਮ੍ਮਸ੍ਸ ਵਿਪਾਕਮਨ੍ਵਯਾ, ਸੁਖਞ੍ਚ ਸਾਤਞ੍ਚ ਇਧੂਪਲਬ੍ਭਤਿ;

ਸਾਹਂ ਗਨ੍ਤ੍ਵਾ ਪੁਨਦੇਵ ਮਾਨੁਸਂ, ਕਾਹਾਮਿ ਪੁਞ੍ਞਾਨਿ ਨਯਯ੍ਯਪੁਤ੍ਤ ਮ’’ਨ੍ਤਿ. –

ਇਮਾ ਗਾਥਾ ਅਭਾਸਿ.

੩੪੧. ਤਤ੍ਥ ‘‘ਪਬ੍ਬਜਿਤਸ੍ਸ ਭਿਕ੍ਖੁਨੋ’’ਤਿ ਇਦਂ ਪਚ੍ਚੇਕਬੁਦ੍ਧਂ ਸਦ੍ਧਾਯ ਵੁਤ੍ਤਂ. ਸੋ ਹਿ ਕਾਮਾਦਿਮਲਾਨਂ ਅਤ੍ਤਨੋ ਸਨ੍ਤਾਨਤੋ ਅਨਵਸੇਸਤੋ ਪਬ੍ਬਾਜਿਤਤ੍ਤਾ ਪਹੀਨਤ੍ਤਾ ਪਰਮਤ੍ਥਤੋ ‘‘ਪਬ੍ਬਜਿਤੋ’’ਤਿ, ਭਿਨ੍ਨਕਿਲੇਸਤ੍ਤਾ ‘‘ਭਿਕ੍ਖੂ’’ਤਿ ਚ ਵਤ੍ਤਬ੍ਬਤਂ ਅਰਹਤਿ. ਸੁਤ੍ਤਨ੍ਤਿ ਕਪ੍ਪਾਸਿਯਸੁਤ੍ਤਂ. ਉਪਸਙ੍ਕਮ੍ਮਾਤਿ ਮਯ੍ਹਂ ਗੇਹਂ ਉਪਸਙ੍ਕਮਿਤ੍ਵਾ. ਯਾਚਿਤਾਤਿ ‘‘ਉਦ੍ਦਿਸ੍ਸ ਅਰਿਯਾ ਤਿਟ੍ਠਨ੍ਤਿ, ਏਸਾ ਅਰਿਯਾਨ ਯਾਚਨਾ’’ਤਿ (ਜਾ. ੧.੭.੫੯) ਏਵਂ ਵੁਤ੍ਤਾਯ ਕਾਯਵਿਞ੍ਞਤ੍ਤਿਪਯੋਗਸਙ੍ਖਾਤਾਯ ਭਿਕ੍ਖਾਚਰਿਯਾਯ ਯਾਚਿਤਾ. ਤਸ੍ਸਾਤਿ ਤਸ੍ਸ ਸੁਤ੍ਤਦਾਨਸ੍ਸ. ਵਿਪਾਕੋ ਵਿਪੁਲਫਲੂਪਲਬ੍ਭਤੀਤਿ ਵਿਪੁਲਫਲੋ ਉਲ਼ਾਰਉਦਯੋ ਮਹਾਉਦਯੋ ਵਿਪਾਕੋ ਏਤਰਹਿ ਉਪਲਬ੍ਭਤਿ ਪਚ੍ਚਨੁਭਵੀਯਤਿ. ਬਹੁਕਾਤਿ ਅਨੇਕਾ. ਵਤ੍ਥਕੋਟਿਯੋਤਿ ਵਤ੍ਥਾਨਂ ਕੋਟਿਯੋ, ਅਨੇਕਸਤਸਹਸ੍ਸਪਭੇਦਾਨਿ ਵਤ੍ਥਾਨੀਤਿ ਅਤ੍ਥੋ.

੩੪੨. ਅਨੇਕਚਿਤ੍ਤਨ੍ਤਿ ਨਾਨਾਵਿਧਚਿਤ੍ਤਕਮ੍ਮਂ, ਅਨੇਕੇਹਿ ਵਾ ਮੁਤ੍ਤਾਮਣਿਆਦੀਹਿ ਰਤਨੇਹਿ ਵਿਚਿਤ੍ਤਰੂਪਂ. ਨਰਨਾਰਿਸੇਵਿਤਨ੍ਤਿ ਪਰਿਚਾਰਕਭੂਤੇਹਿ ਨਰੇਹਿ ਨਾਰੀਹਿ ਚ ਉਪਸੇਵਿਤਂ. ਸਾਹਂ ਭੁਞ੍ਜਾਮੀਤਿ ਸਾ ਅਹਂ ਤਂ ਵਿਮਾਨਂ ਪਰਿਭੁਞ੍ਜਾਮਿ. ਪਾਰੁਪਾਮੀਤਿ ਅਨੇਕਾਸੁ ਵਤ੍ਥਕੋਟੀਸੁ ਇਚ੍ਛਿਤਿਚ੍ਛਿਤਂ ਨਿਵਾਸੇਮਿ ਚੇਵ ਪਰਿਦਹਾਮਿ ਚ. ਪਹੂਤਵਿਤ੍ਤਾਤਿ ਪਹੂਤਵਿਤ੍ਤੂਪਕਰਣਾ ਮਹਦ੍ਧਨਾ ਮਹਾਭੋਗਾ. ਨ ਚ ਤਾਵ ਖੀਯਤੀਤਿ ਤਞ੍ਚ ਵਿਤ੍ਤਂ ਨ ਖੀਯਤਿ, ਨ ਪਰਿਕ੍ਖਯਂ ਪਰਿਯਾਦਾਨਂ ਗਚ੍ਛਤਿ.

੩੪੩. ਤਸ੍ਸੇਵ ਕਮ੍ਮਸ੍ਸ ਵਿਪਾਕਮਨ੍ਵਯਾਤਿ ਤਸ੍ਸੇਵ ਸੁਤ੍ਤਦਾਨਮਯਪੁਞ੍ਞਕਮ੍ਮਸ੍ਸ ਅਨ੍ਵਯਾ ਪਚ੍ਚਯਾ ਹੇਤੁਭਾਵੇਨ ਵਿਪਾਕਭੂਤਂ ਸੁਖਂ, ਇਟ੍ਠਮਧੁਰਸਙ੍ਖਾਤਂ ਸਾਤਞ੍ਚ ਇਧ ਇਮਸ੍ਮਿਂ ਵਿਮਾਨੇ ਉਪਲਬ੍ਭਤਿ. ਗਨ੍ਤ੍ਵਾ ਪੁਨਦੇਵ ਮਾਨੁਸਨ੍ਤਿ ਪੁਨ ਏਵ ਮਨੁਸ੍ਸਲੋਕਂ ਉਪਗਨ੍ਤ੍ਵਾ. ਕਾਹਾਮਿ ਪੁਞ੍ਞਾਨੀਤਿ ਮਯ੍ਹਂ ਸੁਖਵਿਸੇਸਨਿਪ੍ਫਾਦਕਾਨਿ ਪੁਞ੍ਞਾਨਿ ਕਰਿਸ੍ਸਾਮਿ, ਯੇਸਂ ਵਾ ਮਯਾ ਅਯਂ ਸਮ੍ਪਤ੍ਤਿ ਲਦ੍ਧਾਤਿ ਅਧਿਪ੍ਪਾਯੋ. ਨਯਯ੍ਯਪੁਤ੍ਤ ਮਨ੍ਤਿ, ਅਯ੍ਯਪੁਤ੍ਤ, ਮਂ ਮਨੁਸ੍ਸਲੋਕਂ ਨਯ, ਨੇਹੀਤਿ ਅਤ੍ਥੋ.

ਤਂ ਸੁਤ੍ਵਾ ਸੋ ਅਮਨੁਸ੍ਸੋ ਤਸ੍ਸਾ ਪਟਿਬਦ੍ਧਚਿਤ੍ਤਤਾਯ ਅਨੁਕਮ੍ਪਾਯ ਗਮਨਂ ਅਨਿਚ੍ਛਨ੍ਤੋ –

੩੪੪. ‘‘ਸਤ੍ਤ ਤੁਵਂ ਵਸ੍ਸਸਤਾ ਇਧਾਗਤਾ,

ਜਿਣ੍ਣਾ ਚ ਵੁਡ੍ਢਾ ਚ ਤਹਿਂ ਭਵਿਸ੍ਸਸਿ;

ਸਬ੍ਬੇਵ ਤੇ ਕਾਲਕਤਾ ਚ ਞਾਤਕਾ,

ਕਿਂ ਤਤ੍ਥ ਗਨ੍ਤ੍ਵਾਨ ਇਤੋ ਕਰਿਸ੍ਸਸੀ’’ਤਿ. –

ਗਾਥਮਾਹ. ਤਤ੍ਥ ਸਤ੍ਤਾਤਿ ਵਿਭਤ੍ਤਿਲੋਪੇਨ ਨਿਦ੍ਦੇਸੋ, ਨਿਸ੍ਸਕ੍ਕੇ ਵਾ ਏਤਂ ਪਚ੍ਚਤ੍ਤਵਚਨਂ. ਵਸ੍ਸਸਤਾਤਿ ਵਸ੍ਸਸਤਤੋ, ਸਤ੍ਤਹਿ ਵਸ੍ਸਸਤੇਹਿ ਉਦ੍ਧਂ ਤੁਵਂ ਇਧਾਗਤਾ ਇਮਂ ਵਿਮਾਨਂ ਆਗਤਾ, ਇਧਾਗਤਾਯ ਤੁਯ੍ਹਂ ਸਤ੍ਤ ਵਸ੍ਸਸਤਾਨਿ ਹੋਨ੍ਤੀਤਿ ਅਤ੍ਥੋ. ਜਿਣ੍ਣਾ ਚ ਵੁਡ੍ਢਾ ਚ ਤਹਿਂ ਭਵਿਸ੍ਸਸੀਤਿ ਇਧ ਦਿਬ੍ਬੇਹਿ ਉਤੁਆਹਾਰੇਹਿ ਉਪਥਮ੍ਭਿਤਤ੍ਤਭਾਵਾ ਕਮ੍ਮਾਨੁਭਾਵੇਨ ਏਤ੍ਤਕਂ ਕਾਲਂ ਦਹਰਾਕਾਰੇਨੇਵ ਠਿਤਾ. ਇਤੋ ਪਨ ਗਤਾ ਕਮ੍ਮਸ੍ਸ ਚ ਪਰਿਕ੍ਖੀਣਤ੍ਤਾ ਮਨੁਸ੍ਸਾਨਞ੍ਚ ਉਤੁਆਹਾਰਵਸੇਨ ਜਰਾਜਿਣ੍ਣਾ ਵਯੋਵੁਡ੍ਢਾ ਚ ਤਹਿਂ ਮਨੁਸ੍ਸਲੋਕੇ ਭਵਿਸ੍ਸਸਿ. ਕਿਨ੍ਤਿ? ਸਬ੍ਬੇਵ ਤੇ ਕਾਲਕਤਾ ਚ ਞਾਤਕਾਤਿ ਦੀਘਸ੍ਸ ਅਦ੍ਧੁਨੋ ਗਤਤ੍ਤਾ ਤਵ ਞਾਤਯੋਪਿ ਸਬ੍ਬੇ ਏਵ ਮਤਾ, ਤਸ੍ਮਾ ਇਤੋ ਦੇਵਲੋਕਤੋ ਤਤ੍ਥ ਮਨੁਸ੍ਸਲੋਕਂ ਗਨ੍ਤ੍ਵਾ ਕਿਂ ਕਰਿਸ੍ਸਸਿ, ਅਵਸੇਸਮ੍ਪਿ ਆਯੁਞ੍ਚ ਇਧੇਵ ਖੇਪੇਹਿ, ਇਧ ਵਸਾਹੀਤਿ ਅਧਿਪ੍ਪਾਯੋ.

ਏਵਂ ਤੇਨ ਵੁਤ੍ਤਾ ਸਾ ਤਸ੍ਸ ਵਚਨਂ ਅਸਦ੍ਦਹਨ੍ਤੀ ਪੁਨਦੇਵ –

੩੪੫. ‘‘ਸਤ੍ਤੇਵ ਵਸ੍ਸਾਨਿ ਇਧਾਗਤਾਯ ਮੇ, ਦਿਬ੍ਬਞ੍ਚ ਸੁਖਞ੍ਚ ਸਮਪ੍ਪਿਤਾਯ;

ਸਾਹਂ ਗਨ੍ਤ੍ਵਾ ਪੁਨਦੇਵ ਮਾਨੁਸਂ, ਕਾਹਾਮਿ ਪੁਞ੍ਞਾਨਿ ਨਯਯ੍ਯਪੁਤ੍ਤ ਮ’’ਨ੍ਤਿ. –

ਗਾਥਮਾਹ. ਤਤ੍ਥ ਸਤ੍ਤੇਵ ਵਸ੍ਸਾਨਿ ਇਧਾਗਤਾਯ ਮੇਤਿ, ਅਯ੍ਯਪੁਤ੍ਤ, ਮਯ੍ਹਂ ਇਧਾਗਤਾਯ ਸਤ੍ਤੇਵ ਵਸ੍ਸਾਨਿ ਮਞ੍ਞੇ ਵੀਤਿਵਤ੍ਤਾਨਿ. ਸਤ੍ਤ ਵਸ੍ਸਸਤਾਨਿ ਦਿਬ੍ਬਸੁਖਸਮਪ੍ਪਿਤਾਯ ਬਹੁਮ੍ਪਿ ਕਾਲਂ ਗਤਂ ਅਸਲ੍ਲਕ੍ਖੇਨ੍ਤੀ ਏਵਮਾਹ.

ਏਵਂ ਪਨ ਤਾਯ ਵੁਤ੍ਤੋ ਸੋ ਵਿਮਾਨਪੇਤੋ ਨਾਨਪ੍ਪਕਾਰਂ ਤਂ ਅਨੁਸਾਸਿਤ੍ਵਾ ‘‘ਤ੍ਵਂ ਇਦਾਨਿ ਸਤ੍ਤਾਹਤੋ ਉਤ੍ਤਰਿ ਤਤ੍ਥ ਨ ਜੀਵਿਸ੍ਸਸਿ, ਮਾਤੁਯਾ ਤੇ ਨਿਕ੍ਖਿਤ੍ਤਂ ਮਯਾ ਦਿਨ੍ਨਂ ਧਨਂ ਅਤ੍ਥਿ, ਤਂ ਸਮਣਬ੍ਰਾਹ੍ਮਣਾਨਂ ਦਤ੍ਵਾ ਇਧੇਵ ਉਪ੍ਪਤ੍ਤਿਂ ਪਤ੍ਥੇਹੀ’’ਤਿ ਵਤ੍ਵਾ ਤਂ ਬਾਹਾਯਂ ਗਹੇਤ੍ਵਾ ਗਾਮਮਜ੍ਝੇ ਠਪੇਤ੍ਵਾ ‘‘ਇਧਾਗਤੇ ਅਞ੍ਞੇਪਿ ਜਨੇ ‘ਯਥਾਬਲਂ ਪੁਞ੍ਞਾਨਿ ਕਰੋਥਾ’ਤਿ ਓਵਦੇਯ੍ਯਾਸੀ’’ਤਿ ਵਤ੍ਵਾ ਗਤੋ. ਤੇਨ ਵੁਤ੍ਤਂ –

੩੪੬. ‘‘ਸੋ ਤਂ ਗਹੇਤ੍ਵਾਨ ਪਸਯ੍ਹ ਬਾਹਾਯਂ, ਪਚ੍ਚਾਨਯਿਤ੍ਵਾਨ ਥੇਰਿਂ ਸੁਦੁਬ੍ਬਲਂ;

ਵਜ੍ਜੇਸਿ ‘ਅਞ੍ਞਮ੍ਪਿ ਜਨਂ ਇਧਾਗਤਂ, ਕਰੋਥ ਪੁਞ੍ਞਾਨਿ ਸੁਖੂਪਲਬ੍ਭਤੀ’’’ਤਿ.

ਤਤ੍ਥ ਸੋਤਿ ਸੋ ਵਿਮਾਨਪੇਤੋ. ਤਨ੍ਤਿ ਤਂ ਇਤ੍ਥਿਂ. ਗਹੇਤ੍ਵਾਨ ਪਸਯ੍ਹ ਬਾਹਾਯਨ੍ਤਿ ਪਸਯ੍ਹ ਨੇਤਾ ਵਿਯ ਬਾਹਾਯਂ ਤਂ ਗਹੇਤ੍ਵਾ. ਪਚ੍ਚਾਨਯਿਤ੍ਵਾਨਾਤਿ ਤਸ੍ਸਾ ਜਾਤਸਂਵੁਡ੍ਢਗਾਮਂ ਪੁਨਦੇਵ ਆਨਯਿਤ੍ਵਾ. ਥੇਰਿਨ੍ਤਿ ਥਾਵਰਿਂ, ਜਿਣ੍ਣਂ ਵੁਡ੍ਢਨ੍ਤਿ ਅਤ੍ਥੋ. ਸੁਦੁਬ੍ਬਲਨ੍ਤਿ ਜਰਾਜਿਣ੍ਣਤਾਯ ਏਵ ਸੁਟ੍ਠੁ ਦੁਬ੍ਬਲਂ. ਸਾ ਕਿਰ ਤਤੋ ਵਿਮਾਨਤੋ ਅਪਗਮਨਸਮਨਨ੍ਤਰਮੇਵ ਜਿਣ੍ਣਾ ਵੁਡ੍ਢਾ ਮਹਲ੍ਲਿਕਾ ਅਦ੍ਧਗਤਾ ਵਯੋਅਨੁਪ੍ਪਤ੍ਤਾ ਅਹੋਸਿ. ਵਜ੍ਜੇਸੀਤਿ ਵਦੇਯ੍ਯਾਸਿ. ਵਤ੍ਤਬ੍ਬਵਚਨਾਕਾਰਞ੍ਚ ਦਸ੍ਸੇਤੁਂ ‘‘ਅਞ੍ਞਮ੍ਪਿ ਜਨ’’ਨ੍ਤਿਆਦਿ ਵੁਤ੍ਤਂ. ਤਸ੍ਸਤ੍ਥੋ – ਭਦ੍ਦੇ, ਤ੍ਵਮ੍ਪਿ ਪੁਞ੍ਞਂ ਕਰੇਯ੍ਯਾਸਿ, ਅਞ੍ਞਮ੍ਪਿ ਜਨਂ ਇਧ ਤਵ ਦਸ੍ਸਨਤ੍ਥਾਯ ਆਗਤਂ ‘‘ਭਦ੍ਰਮੁਖਾ, ਆਦਿਤ੍ਤਂ ਸੀਸਂ ਵਾ ਚੇਲਂ ਵਾ ਅਜ੍ਝੁਪੇਕ੍ਖਿਤ੍ਵਾਪਿ ਦਾਨਸੀਲਾਦੀਨਿ ਪੁਞ੍ਞਾਨਿ ਕਰੋਥਾਤਿ, ਕਤੇ ਚ ਪੁਞ੍ਞੇ ਏਕਂਸੇਨੇਵ ਤਸ੍ਸ ਫਲਭੂਤਂ ਸੁਖਂ ਉਪਲਬ੍ਭਤਿ, ਨ ਏਤ੍ਥ ਸਂਸਯੋ ਕਾਤਬ੍ਬੋ’’ਤਿ ਵਦੇਯ੍ਯਾਸਿ ਓਵਦੇਯ੍ਯਾਸੀਤਿ.

ਏਵਞ੍ਚ ਵਤ੍ਵਾ ਤਸ੍ਮਿਂ ਗਤੇ ਸਾ ਇਤ੍ਥੀ ਅਤ੍ਤਨੋ ਞਾਤਕਾਨਂ ਵਸਨਟ੍ਠਾਨਂ ਗਨ੍ਤ੍ਵਾ ਤੇਸਂ ਅਤ੍ਤਾਨਂ ਜਾਨਾਪੇਤ੍ਵਾ ਤੇਹਿ ਨਿਯ੍ਯਾਦਿਤਧਨਂ ਗਹੇਤ੍ਵਾ ਸਮਣਬ੍ਰਾਹ੍ਮਣਾਨਂ ਦਾਨਂ ਦੇਨ੍ਤੀ ਅਤ੍ਤਨੋ ਸਨ੍ਤਿਕਂ ਆਗਤਾਗਤਾਨਂ –

੩੪੭. ‘‘ਦਿਟ੍ਠਾ ਮਯਾ ਅਕਤੇਨ ਸਾਧੁਨਾ, ਪੇਤਾ ਵਿਹਞ੍ਞਨ੍ਤਿ ਤਥੇਵ ਮਨੁਸ੍ਸਾ;

ਕਮ੍ਮਞ੍ਚ ਕਤ੍ਵਾ ਸੁਖਵੇਦਨੀਯਂ, ਦੇਵਾ ਮਨੁਸ੍ਸਾ ਚ ਸੁਖੇ ਠਿਤਾ ਪਜਾ’’ਤਿ. –

ਗਾਥਾਯ ਓਵਾਦਮਦਾਸਿ.

ਤਤ੍ਥ ਅਕਤੇਨਾਤਿ ਅਨਿਬ੍ਬਤ੍ਤਿਤੇਨ ਅਤ੍ਤਨਾ ਅਨੁਪਚਿਤੇਨ. ਸਾਧੁਨਾਤਿ ਕੁਸਲਕਮ੍ਮੇਨ, ਇਤ੍ਥਮ੍ਭੂਤਲਕ੍ਖਣੇ ਕਰਣਵਚਨਂ. ਵਿਹਞ੍ਞਨ੍ਤੀਤਿ ਵਿਘਾਤਂ ਆਪਜ੍ਜਨ੍ਤਿ. ਸੁਖਵੇਦਨੀਯਨ੍ਤਿ ਸੁਖਵਿਪਾਕਂ ਪੁਞ੍ਞਕਮ੍ਮਂ. ਸੁਖੇ ਠਿਤਾਤਿ ਸੁਖੇ ਪਤਿਟ੍ਠਿਤਾ. ‘‘ਸੁਖੇਧਿਤਾ’’ਤਿ ਵਾ ਪਾਠੋ, ਸੁਖੇਨ ਅਭਿਵੁਡ੍ਢਾ ਫੀਤਾਤਿ ਅਤ੍ਥੋ. ਅਯਞ੍ਹੇਤ੍ਥ ਅਧਿਪ੍ਪਾਯੋ – ਯਥਾ ਪੇਤਾ ਤਥੇਵ ਮਨੁਸ੍ਸਾ ਅਕਤੇਨ ਕੁਸਲੇਨ, ਕਤੇਨ ਚ ਅਕੁਸਲੇਨ ਵਿਹਞ੍ਞਮਾਨਾ ਖੁਪ੍ਪਿਪਾਸਾਦਿਨਾ ਵਿਘਾਤਂ ਆਪਜ੍ਜਨ੍ਤਾ ਮਹਾਦੁਕ੍ਖਂ ਅਨੁਭਵਨ੍ਤਾ ਦਿਟ੍ਠਾ ਮਯਾ. ਸੁਖਵੇਦਨੀਯਂ ਪਨ ਕਮ੍ਮਂ ਕਤ੍ਵਾ ਤੇਨ ਕਤੇਨ ਕੁਸਲਕਮ੍ਮੇਨ, ਅਕਤੇਨ ਚ ਅਕੁਸਲਕਮ੍ਮੇਨ ਦੇਵਮਨੁਸ੍ਸਪਰਿਯਾਪਨ੍ਨਾ ਪਜਾ ਸੁਖੇ ਠਿਤਾ ਦਿਟ੍ਠਾ ਮਯਾ, ਅਤ੍ਤਪਚ੍ਚਕ੍ਖਮੇਤਂ, ਤਸ੍ਮਾ ਪਾਪਂ ਦੂਰਤੋਵ ਪਰਿਵਜ੍ਜੇਨ੍ਤਾ ਪੁਞ੍ਞਕਿਰਿਯਾਯ ਯੁਤ੍ਤਪਯੁਤ੍ਤਾ ਹੋਥਾਤਿ.

ਏਵਂ ਪਨ ਓਵਾਦਂ ਦੇਨ੍ਤੀ ਸਮਣਬ੍ਰਾਹ੍ਮਣਾਦੀਨਂ ਸਤ੍ਤਾਹਂ ਮਹਾਦਾਨਂ ਪਵਤ੍ਤੇਤ੍ਵਾ ਸਤ੍ਤਮੇ ਦਿਵਸੇ ਕਾਲਂ ਕਤ੍ਵਾ ਤਾਵਤਿਂਸੇਸੁ ਨਿਬ੍ਬਤ੍ਤਿ. ਭਿਕ੍ਖੂ ਤਂ ਪਵਤ੍ਤਿਂ ਭਗਵਤੋ ਆਰੋਚੇਸੁਂ. ਭਗਵਾ ਤਮਤ੍ਥਂ ਅਟ੍ਠੁਪ੍ਪਤ੍ਤਿਂ ਕਤ੍ਵਾ ਸਮ੍ਪਤ੍ਤਪਰਿਸਾਯ ਧਮ੍ਮਂ ਦੇਸੇਸਿ, ਵਿਸੇਸਤੋ ਚ ਪਚ੍ਚੇਕਬੁਦ੍ਧੇਸੁ ਪਵਤ੍ਤਿਤਦਾਨਸ੍ਸ ਮਹਪ੍ਫਲਤਂ ਮਹਾਨਿਸਂਸਤਞ੍ਚ ਪਕਾਸੇਸਿ. ਤਂ ਸੁਤ੍ਵਾ ਮਹਾਜਨੋ ਵਿਗਤਮਲਮਚ੍ਛੇਰੋ ਦਾਨਾਦਿਪੁਞ੍ਞਾਭਿਰਤੋ ਅਹੋਸੀਤਿ.

ਸੁਤ੍ਤਪੇਤਵਤ੍ਥੁਵਣ੍ਣਨਾ ਨਿਟ੍ਠਿਤਾ.