੧੦. ਉਤ੍ਤਰਮਾਤੁਪੇਤਿਵਤ੍ਥੁਵਣ੍ਣਨਾ

ਦਿਵਾਵਿਹਾਰਗਤਂ ਭਿਕ੍ਖੁਨ੍ਤਿ ਇਦਂ ਉਤ੍ਤਰਮਾਤੁਪੇਤਿਵਤ੍ਥੁ. ਤਤ੍ਰਾਯਂ ਅਤ੍ਥਵਿਭਾਵਨਾ – ਸਤ੍ਥਰਿ ਪਰਿਨਿਬ੍ਬੁਤੇ ਪਠਮਮਹਾਸਙ੍ਗੀਤਿਯਾ ਪਵਤ੍ਤਿਤਾਯ ਆਯਸ੍ਮਾ ਮਹਾਕਚ੍ਚਾਯਨੋ ਦ੍ਵਾਦਸਹਿ ਭਿਕ੍ਖੂਹਿ ਸਦ੍ਧਿਂ ਕੋਸਮ੍ਬਿਯਾ ਅਵਿਦੂਰੇ ਅਞ੍ਞਤਰਸ੍ਮਿਂ ਅਰਞ੍ਞਾਯਤਨੇ ਵਿਹਾਸਿ. ਤੇਨ ਚ ਸਮਯੇਨ ਰਞ੍ਞੋ ਉਦੇਨਸ੍ਸ ਅਞ੍ਞਤਰੋ ਅਮਚ੍ਚੋ ਕਾਲਮਕਾਸਿ, ਤੇਨ ਚ ਪੁਬ੍ਬੇ ਨਗਰੇ ਕਮ੍ਮਨ੍ਤਾ ਅਧਿਟ੍ਠਿਤਾ ਅਹੇਸੁਂ. ਅਥ ਰਾਜਾ ਤਸ੍ਸ ਪੁਤ੍ਤਂ ਉਤ੍ਤਰਂ ਨਾਮ ਮਾਣਵਂ ਪਕ੍ਕੋਸਾਪੇਤ੍ਵਾ ‘‘ਤ੍ਵਞ੍ਚ ਪਿਤਰਾ ਅਧਿਟ੍ਠਿਤੇ ਕਮ੍ਮਨ੍ਤੇ ਸਮਨੁਸਾਸਾ’’ਤਿ ਤੇਨ ਠਿਤਟ੍ਠਾਨੇ ਠਪੇਸਿ.

ਸੋ ਚ ਸਾਧੂਤਿ ਸਮ੍ਪਟਿਚ੍ਛਿਤ੍ਵਾ ਏਕਦਿਵਸਂ ਨਗਰਪਟਿਸਙ੍ਖਰਣਿਯਾਨਂ ਦਾਰੂਨਂ ਅਤ੍ਥਾਯ ਵਡ੍ਢਕਿਯੋ ਗਹੇਤ੍ਵਾ ਅਰਞ੍ਞਂ ਗਤੋ. ਤਤ੍ਥ ਆਯਸ੍ਮਤੋ ਮਹਾਕਚ੍ਚਾਯਨਤ੍ਥੇਰਸ੍ਸ ਵਸਨਟ੍ਠਾਨਂ ਉਪਗਨ੍ਤ੍ਵਾ ਥੇਰਂ ਤਤ੍ਥ ਪਂਸੁਕੂਲਚੀਵਰਧਰਂ ਵਿਵਿਤ੍ਤਂ ਨਿਸਿਨ੍ਨਂ ਦਿਸ੍ਵਾ ਇਰਿਯਾਪਥੇਯੇਵ ਪਸੀਦਿਤ੍ਵਾ ਕਤਪਟਿਸਨ੍ਥਾਰੋ ਵਨ੍ਦਿਤ੍ਵਾ ਏਕਮਨ੍ਤਂ ਨਿਸੀਦਿ. ਥੇਰੋ ਤਸ੍ਸ ਧਮ੍ਮਂ ਕਥੇਸਿ. ਸੋ ਧਮ੍ਮਂ ਸੁਤ੍ਵਾ ਰਤਨਤ੍ਤਯੇ ਸਞ੍ਜਾਤਪ੍ਪਸਾਦੋ ਸਰਣੇਸੁ ਪਤਿਟ੍ਠਾਯ ਥੇਰਂ ਨਿਮਨ੍ਤੇਸਿ – ‘‘ਅਧਿਵਾਸੇਥ ਮੇ, ਭਨ੍ਤੇ, ਸ੍ਵਾਤਨਾਯ ਭਤ੍ਤਂ ਸਦ੍ਧਿਂ ਭਿਕ੍ਖੂਹਿ ਅਨੁਕਮ੍ਪਂ ਉਪਾਦਾਯਾ’’ਤਿ. ਅਧਿਵਾਸੇਸਿ ਥੇਰੋ ਤੁਣ੍ਹੀਭਾਵੇਨ. ਸੋ ਤਤੋ ਨਿਕ੍ਖਮਿਤ੍ਵਾ ਨਗਰਂ ਗਨ੍ਤ੍ਵਾ ਅਞ੍ਞੇਸਂ ਉਪਾਸਕਾਨਂ ਆਚਿਕ੍ਖਿ – ‘‘ਥੇਰੋ ਮਯਾ ਸ੍ਵਾਤਨਾਯ ਨਿਮਨ੍ਤਿਤੋ, ਤੁਮ੍ਹੇਹਿਪਿ ਮਮ ਦਾਨਗ੍ਗਂ ਆਗਨ੍ਤਬ੍ਬ’’ਨ੍ਤਿ.

ਸੋ ਦੁਤਿਯਦਿਵਸੇ ਕਾਲਸ੍ਸੇਵ ਪਣੀਤਂ ਖਾਦਨੀਯਂ ਭੋਜਨੀਯਂ ਪਟਿਯਾਦਾਪੇਤ੍ਵਾ ਕਾਲਂ ਆਰੋਚਾਪੇਤ੍ਵਾ ਸਦ੍ਧਿਂ ਭਿਕ੍ਖੂਹਿ ਆਗਚ੍ਛਨ੍ਤਸ੍ਸ ਥੇਰਸ੍ਸ ਪਚ੍ਚੁਗ੍ਗਮਨਂ ਕਤ੍ਵਾ ਵਨ੍ਦਿਤ੍ਵਾ ਪੁਰਕ੍ਖਤ੍ਵਾ ਗੇਹਂ ਪਵੇਸੇਸਿ. ਅਥ ਮਹਾਰਹਕਪ੍ਪਿਯਪਚ੍ਚਤ੍ਥਰਣਅਤ੍ਥਤੇਸੁ ਆਸਨੇਸੁ ਥੇਰੇ ਚ ਭਿਕ੍ਖੂਸੁ ਚ ਨਿਸਿਨ੍ਨੇਸੁ ਗਨ੍ਧਪੁਪ੍ਫਧੂਪੇਹਿ ਪੂਜਂ ਕਤ੍ਵਾ ਪਣੀਤੇਨ ਅਨ੍ਨਪਾਨੇਨ ਤੇ ਸਨ੍ਤਪ੍ਪੇਤ੍ਵਾ ਸਞ੍ਜਾਤਪ੍ਪਸਾਦੋ ਕਤਞ੍ਜਲੀ ਅਨੁਮੋਦਨਂ ਸੁਣਿਤ੍ਵਾ ਕਤਭਤ੍ਤਾਨੁਮੋਦਨੇ ਥੇਰੇ ਗਚ੍ਛਨ੍ਤੇ ਪਤ੍ਤਂ ਗਹੇਤ੍ਵਾ ਅਨੁਗਚ੍ਛਨ੍ਤੋ ਨਗਰਤੋ ਨਿਕ੍ਖਮਿਤ੍ਵਾ ਪਟਿਨਿਵਤ੍ਤਨ੍ਤੋ ‘‘ਭਨ੍ਤੇ, ਤੁਮ੍ਹੇਹਿ ਨਿਚ੍ਚਂ ਮਮ ਗੇਹਂ ਪਵਿਸਿਤਬ੍ਬ’’ਨ੍ਤਿ ਯਾਚਿਤ੍ਵਾ ਥੇਰਸ੍ਸ ਅਧਿਵਾਸਨਂ ਞਤ੍ਵਾ ਨਿਵਤ੍ਤਿ. ਏਵਂ ਸੋ ਥੇਰਂ ਉਪਟ੍ਠਹਨ੍ਤੋ ਤਸ੍ਸ ਓਵਾਦੇ ਪਤਿਟ੍ਠਾਯ ਸੋਤਾਪਤ੍ਤਿਫਲਂ ਪਾਪੁਣਿ, ਵਿਹਾਰਞ੍ਚ ਕਾਰੇਸਿ, ਸਬ੍ਬੇ ਚ ਅਤ੍ਤਨੋ ਞਾਤਕੇ ਸਾਸਨੇ ਅਭਿਪ੍ਪਸਨ੍ਨੇ ਅਕਾਸਿ.

ਮਾਤਾ ਪਨਸ੍ਸ ਮਚ੍ਛੇਰਮਲਪਰਿਯੁਟ੍ਠਿਤਚਿਤ੍ਤਾ ਹੁਤ੍ਵਾ ਏਵਂ ਪਰਿਭਾਸਿ – ‘‘ਯਂ ਤ੍ਵਂ ਮਮ ਅਨਿਚ੍ਛਨ੍ਤਿਯਾ ਏਵ ਸਮਣਾਨਂ ਅਨ੍ਨਪਾਨਂ ਦੇਸਿ, ਤਂ ਤੇ ਪਰਲੋਕੇ ਲੋਹਿਤਂ ਸਮ੍ਪਜ੍ਜਤੂ’’ਤਿ. ਏਕਂ ਪਨ ਮੋਰਪਿਞ੍ਛਕਲਾਪਂ ਵਿਹਾਰਮਹਦਿਵਸੇ ਦਿਯ੍ਯਮਾਨਂ ਅਨੁਜਾਨਿ. ਸਾ ਕਾਲਂ ਕਤ੍ਵਾ ਪੇਤਯੋਨਿਯਂ ਉਪ੍ਪਜ੍ਜਿ, ਮੋਰਪਿਞ੍ਛਕਲਾਪਦਾਨਾਨੁਮੋਦਨੇਨ ਪਨਸ੍ਸਾ ਕੇਸਾ ਨੀਲਾ ਸਿਨਿਦ੍ਧਾ ਵੇਲ੍ਲਿਤਗ੍ਗਾ ਸੁਖੁਮਾ ਦੀਘਾ ਚ ਅਹੇਸੁਂ. ਸਾ ਯਦਾ ਗਙ੍ਗਾਨਦਿਂ ‘‘ਪਾਨੀਯਂ ਪਿਵਿਸ੍ਸਾਮੀ’’ਤਿ ਓਤਰਤਿ, ਤਦਾ ਨਦੀ ਲੋਹਿਤਪੂਰਾ ਹੋਤਿ. ਸਾ ਪਞ੍ਚਪਣ੍ਣਾਸ ਵਸ੍ਸਾਨਿ ਖੁਪ੍ਪਿਪਾਸਾਭਿਭੂਤਾ ਵਿਚਰਿਤ੍ਵਾ ਏਕਦਿਵਸਂ ਕਙ੍ਖਾਰੇਵਤਤ੍ਥੇਰਂ ਗਙ੍ਗਾਯ ਤੀਰੇ ਦਿਵਾਵਿਹਾਰਂ ਨਿਸਿਨ੍ਨਂ ਦਿਸ੍ਵਾ ਅਤ੍ਤਾਨਂ ਅਤ੍ਤਨੋ ਕੇਸੇਹਿ ਪਟਿਚ੍ਛਾਦੇਤ੍ਵਾ ਉਪਸਙ੍ਕਮਿਤ੍ਵਾ ਪਾਨੀਯਂ ਯਾਚਿ. ਤਂ ਸਨ੍ਧਾਯ ਵੁਤ੍ਤਂ –

੩੩੧. ‘‘ਦਿਵਾਵਿਹਾਰਗਤਂ ਭਿਕ੍ਖੁਂ, ਗਙ੍ਗਾਤੀਰੇ ਨਿਸਿਨ੍ਨਕਂ;

ਤਂ ਪੇਤੀ ਉਪਸਙ੍ਕਮ੍ਮ, ਦੁਬ੍ਬਣ੍ਣਾ ਭੀਰੁਦਸ੍ਸਨਾ.

੩੩੨. ‘‘ਕੇਸਾ ਚਸ੍ਸਾ ਅਤਿਦੀਘਾ, ਯਾਵਭੂਮਾਵਲਮ੍ਬਰੇ;

ਕੇਸੇਹਿ ਸਾ ਪਟਿਚ੍ਛਨ੍ਨਾ, ਸਮਣਂ ਏਤਦਬ੍ਰਵੀ’’ਤਿ. –

ਇਮਾ ਦ੍ਵੇ ਗਾਥਾ ਸਙ੍ਗੀਤਿਕਾਰਕੇਹਿ ਇਧ ਆਦਿਤੋ ਠਪਿਤਾ.

ਤਤ੍ਥ ਭੀਰੁਦਸ੍ਸਨਾਤਿ ਭਯਾਨਕਦਸ੍ਸਨਾ. ‘‘ਰੁਦ੍ਦਦਸ੍ਸਨਾ’’ਤਿ ਵਾ ਪਾਠੋ, ਬੀਭਚ੍ਛਭਾਰਿਯਦਸ੍ਸਨਾਤਿ ਅਤ੍ਥੋ. ਯਾਵਭੂਮਾਵਲਮ੍ਬਰੇਤਿ ਯਾਵ ਭੂਮਿ, ਤਾਵ ਓਲਮ੍ਬਨ੍ਤਿ. ਪੁਬ੍ਬੇ ‘‘ਭਿਕ੍ਖੁ’’ਨ੍ਤਿ ਚ ਪਚ੍ਛਾ ‘‘ਸਮਣ’’ਨ੍ਤਿ ਚ ਕਙ੍ਖਾਰੇਵਤਤ੍ਥੇਰਮੇਵ ਸਨ੍ਧਾਯ ਵੁਤ੍ਤਂ.

ਸਾ ਪਨ ਪੇਤੀ ਥੇਰਂ ਉਪਸਙ੍ਕਮਿਤ੍ਵਾ ਪਾਨੀਯਂ ਯਾਚਨ੍ਤੀ –

੩੩੩. ‘‘ਪਞ੍ਚਪਣ੍ਣਾਸ ਵਸ੍ਸਾਨਿ, ਯਤੋ ਕਾਲਕਤਾ ਅਹਂ;

ਨਾਭਿਜਾਨਾਮਿ ਭੁਤ੍ਤਂ ਵਾ, ਪੀਤਂ ਵਾ ਪਨ ਪਾਨਿਯਂ;

ਦੇਹਿ ਤ੍ਵਂ ਪਾਨਿਯਂ ਭਨ੍ਤੇ, ਤਸਿਤਾ ਪਾਨਿਯਾਯ ਮੇ’’ਤਿ. – ਇਮਂ ਗਾਥਮਾਹ;

੩੩੩. ਤਤ੍ਥ ਨਾਭਿਜਾਨਾਮਿ ਭੁਤ੍ਤਂ ਵਾਤਿ ਏਵਂ ਦੀਘਮਨ੍ਤਰੇ ਕਾਲੇ ਭੋਜਨਂ ਭੁਤ੍ਤਂ ਵਾ ਪਾਨੀਯਂ ਪੀਤਂ ਵਾ ਨਾਭਿਜਾਨਾਮਿ, ਨ ਭੁਤ੍ਤਂ ਨ ਪੀਤਨ੍ਤਿ ਅਤ੍ਥੋ. ਤਸਿਤਾਤਿ ਪਿਪਾਸਿਤਾ. ਪਾਨਿਯਾਯਾਤਿ ਪਾਨੀਯਤ੍ਥਾਯ ਆਹਿਣ੍ਡਨ੍ਤਿਯਾ ਮੇ ਪਾਨੀਯਂ ਦੇਹਿ, ਭਨ੍ਤੇਤਿ ਯੋਜਨਾ.

ਇਤੋ ਪਰਂ –

੩੩੪. ‘‘ਅਯਂ ਸੀਤੋਦਿਕਾ ਗਙ੍ਗਾ, ਹਿਮਵਨ੍ਤਤੋ ਸਨ੍ਦਤਿ;

ਪਿਵ ਏਤ੍ਤੋ ਗਹੇਤ੍ਵਾਨ, ਕਿਂ ਮਂ ਯਾਚਸਿ ਪਾਨਿਯਂ.

੩੩੫. ‘‘ਸਚਾਹਂ ਭਨ੍ਤੇ ਗਙ੍ਗਾਯ, ਸਯਂ ਗਣ੍ਹਾਮਿ ਪਾਨਿਯਂ;

ਲੋਹਿਤਂ ਮੇ ਪਰਿਵਤ੍ਤਤਿ, ਤਸ੍ਮਾ ਯਾਚਾਮਿ ਪਾਨਿਯਂ.

੩੩੬. ‘‘ਕਿਂ ਨੁ ਕਾਯੇਨ ਵਾਚਾਯ, ਮਨਸਾ ਦੁਕ੍ਕਟਂ ਕਤਂ;

ਕਿਸ੍ਸਕਮ੍ਮਵਿਪਾਕੇਨ, ਗਙ੍ਗਾ ਤੇ ਹੋਤਿ ਲੋਹਿਤਂ.

੩੩੭. ‘‘ਪੁਤ੍ਤੋ ਮੇ ਉਤ੍ਤਰੋ ਨਾਮ, ਸਦ੍ਧੋ ਆਸਿ ਉਪਾਸਕੋ;

ਸੋ ਚ ਮਯ੍ਹਂ ਅਕਾਮਾਯ, ਸਮਣਾਨਂ ਪਵੇਚ੍ਛਤਿ.

੩੩੮. ‘‘ਚੀਵਰਂ ਪਿਣ੍ਡਪਾਤਞ੍ਚ, ਪਚ੍ਚਯਂ ਸਯਨਾਸਨਂ;

ਤਮਹਂ ਪਰਿਭਾਸਾਮਿ, ਮਚ੍ਛੇਰੇਨ ਉਪਦ੍ਦੁਤਾ.

੩੩੯. ‘‘ਯਂ ਤ੍ਵਂ ਮਯ੍ਹਂ ਅਕਾਮਾਯ, ਸਮਣਾਨਂ ਪਵੇਚ੍ਛਸਿ;

ਚੀਵਰਂ ਪਿਣ੍ਡਪਾਤਞ੍ਚ, ਪਚ੍ਚਯਂ ਸਯਨਾਸਨਂ.

੩੪੦. ‘‘ਏਤਂ ਤੇ ਪਰਲੋਕਸ੍ਮਿਂ, ਲੋਹਿਤਂ ਹੋਤੁ ਉਤ੍ਤਰ;

ਤਸ੍ਸਕਮ੍ਮਵਿਪਾਕੇਨ, ਗਙ੍ਗਾ ਮੇ ਹੋਤਿ ਲੋਹਿਤ’’ਨ੍ਤਿ. –

ਇਮਾ ਥੇਰਸ੍ਸ ਚ ਪੇਤਿਯਾ ਚ ਵਚਨਪਟਿਵਚਨਗਾਥਾ.

੩੩੪. ਤਤ੍ਥ ਹਿਮਵਨ੍ਤਤੋਤਿ ਮਹਤੋ ਹਿਮਸ੍ਸ ਅਤ੍ਥਿਤਾਯ ‘‘ਹਿਮਵਾ’’ਤਿ ਲਦ੍ਧਨਾਮਤੋ ਪਬ੍ਬਤਰਾਜਤੋ. ਸਨ੍ਦਤੀਤਿ ਪਵਤ੍ਤਤਿ. ਏਤ੍ਤੋਤਿ ਇਤੋ ਮਹਾਗਙ੍ਗਾਤੋ. ਕਿਨ੍ਤਿ ਕਸ੍ਮਾ ਮਂ ਯਾਚਸਿ ਪਾਨੀਯਂ, ਗਙ੍ਗਾਨਦਿਂ ਓਤਰਿਤ੍ਵਾ ਯਥਾਰੁਚਿ ਪਿਵਾਤਿ ਦਸ੍ਸੇਤਿ.

੩੩੫. ਲੋਹਿਤਂ ਮੇ ਪਰਿਵਤ੍ਤਤੀਤਿ ਉਦਕਂ ਸਨ੍ਦਮਾਨਂ ਮਯ੍ਹਂ ਪਾਪਕਮ੍ਮਫਲੇਨ ਲੋਹਿਤਂ ਹੁਤ੍ਵਾ ਪਰਿਵਤ੍ਤਤਿ ਪਰਿਣਮਤਿ, ਤਾਯ ਗਹਿਤਮਤ੍ਤਂ ਉਦਕਂ ਲੋਹਿਤਂ ਜਾਯਤਿ.

੩੩੭-੪੦. ਮਯ੍ਹਂ ਅਕਾਮਾਯਾਤਿ ਮਮ ਅਨਿਚ੍ਛਨ੍ਤਿਯਾ. ਪਵੇਚ੍ਛਤੀਤਿ ਦੇਤਿ. ਪਚ੍ਚਯਨ੍ਤਿ ਗਿਲਾਨਪਚ੍ਚਯਂ. ਏਤਨ੍ਤਿ ਯਂ ਏਤਂ ਚੀਵਰਾਦਿਕਂ ਪਚ੍ਚਯਜਾਤਂ ਸਮਣਾਨਂ ਪਵੇਚ੍ਛਸਿ ਦੇਸਿ, ਏਤਂ ਤੇ ਪਰਲੋਕਸ੍ਮਿਂ ਲੋਹਿਤਂ ਹੋਤੁ ਉਤ੍ਤਰਾਤਿ ਅਭਿਸਪਨਵਸੇਨ ਕਤਂ ਪਾਪਕਮ੍ਮਂ, ਤਸ੍ਸ ਵਿਪਾਕੇਨਾਤਿ ਯੋਜਨਾ.

ਅਥਾਯਸ੍ਮਾ ਰੇਵਤੋ ਤਂ ਪੇਤਿਂ ਉਦ੍ਦਿਸ੍ਸ ਭਿਕ੍ਖੁਸਙ੍ਘਸ੍ਸ ਪਾਨੀਯਂ ਅਦਾਸਿ, ਪਿਣ੍ਡਾਯ ਚਰਿਤ੍ਵਾ ਭਤ੍ਤਂ ਗਹੇਤ੍ਵਾ ਭਿਕ੍ਖੂਨਮਦਾਸਿ, ਸਙ੍ਕਾਰਕੂਟਾਦਿਤੋ ਪਂਸੁਕੂਲਂ ਗਹੇਤ੍ਵਾ ਧੋਵਿਤ੍ਵਾ ਭਿਸਿਞ੍ਚ ਚਿਮਿਲਿਕਞ੍ਚ ਕਤ੍ਵਾ ਭਿਕ੍ਖੂਨਂ ਅਦਾਸਿ, ਤੇਨ ਚਸ੍ਸਾ ਪੇਤਿਯਾ ਦਿਬ੍ਬਸਮ੍ਪਤ੍ਤਿਯੋ ਅਹੇਸੁਂ. ਸਾ ਥੇਰਸ੍ਸ ਸਨ੍ਤਿਕਂ ਗਨ੍ਤ੍ਵਾ ਅਤ੍ਤਨਾ ਲਦ੍ਧਦਿਬ੍ਬਸਮ੍ਪਤ੍ਤਿਂ ਥੇਰਸ੍ਸ ਦਸ੍ਸੇਸਿ. ਥੇਰੋ ਤਂ ਪਵਤ੍ਤਿਂ ਅਤ੍ਤਨੋ ਸਨ੍ਤਿਕਂ ਉਪਗਤਾਨਂ ਚਤੁਨ੍ਨਂ ਪਰਿਸਾਨਂ ਪਕਾਸੇਤ੍ਵਾ ਧਮ੍ਮਕਥਂ ਕਥੇਸਿ. ਤੇਨ ਮਹਾਜਨੋ ਸਞ੍ਜਾਤਸਂਵੇਗੋ ਵਿਗਤਮਲਮਚ੍ਛੇਰੋ ਹੁਤ੍ਵਾ ਦਾਨਸੀਲਾਦਿਕੁਸਲਧਮ੍ਮਾਭਿਰਤੋ ਅਹੋਸੀਤਿ. ਇਦਂ ਪਨ ਪੇਤਵਤ੍ਥੁ ਦੁਤਿਯਸਙ੍ਗੀਤਿਯਂ ਸਙ੍ਗਹਂ ਆਰੁਲ਼੍ਹਨ੍ਤਿ ਦਟ੍ਠਬ੍ਬਂ.

ਉਤ੍ਤਰਮਾਤੁਪੇਤਿਵਤ੍ਥੁਵਣ੍ਣਨਾ ਨਿਟ੍ਠਿਤਾ.