੧੦. ਮਣ੍ਡਪੇਯ੍ਯਕਥਾ

ਮਣ੍ਡਪੇਯ੍ਯਕਥਾਵਣ੍ਣਨਾ

੨੩੮. ਇਦਾਨਿ ਤਸ੍ਸ ਮਗ੍ਗਸ੍ਸ ਮਣ੍ਡਪੇਯ੍ਯਤ੍ਤਂ ਦਸ੍ਸੇਨ੍ਤੇਨ ਕਥਿਤਾਯ ਭਗਵਤੋ ਵਚਨੇਕਦੇਸਪੁਬ੍ਬਙ੍ਗਮਾਯ ਮਣ੍ਡਪੇਯ੍ਯਕਥਾਯ ਅਪੁਬ੍ਬਤ੍ਥਾਨੁਵਣ੍ਣਨਾ. ਤਤ੍ਥ ਮਣ੍ਡਪੇਯ੍ਯਨ੍ਤਿ ਯਥਾ ਸਮ੍ਪਨ੍ਨਂ ਨਿਮ੍ਮਲਂ ਵਿਪ੍ਪਸਨ੍ਨਂ ਸਪ੍ਪਿ ਸਪ੍ਪਿਮਣ੍ਡੋਤਿ ਵੁਚ੍ਚਤਿ, ਏਵਂ ਵਿਪ੍ਪਸਨ੍ਨਟ੍ਠੇਨ ਮਣ੍ਡੋ, ਪਾਤਬ੍ਬਟ੍ਠੇਨ ਪੇਯ੍ਯਂ. ਯਞ੍ਹਿ ਪਿਵਿਤ੍ਵਾ ਅਨ੍ਤਰਵੀਥਿਯਂ ਪਤਿਤਾ ਵਿਸਞ੍ਞਿਨੋ ਅਤ੍ਤਨੋ ਸਾਟਕਾਦੀਨਮ੍ਪਿ ਅਸ੍ਸਾਮਿਕਾ ਹੋਨ੍ਤਿ, ਤਂ ਪਸਨ੍ਨਮ੍ਪਿ ਨ ਪਾਤਬ੍ਬਂ. ਮਯ੍ਹਂ ਪਨ ਇਦਂ ਸਿਕ੍ਖਤ੍ਤਯਸਙ੍ਗਹਿਤਂ ਸਾਸਨਬ੍ਰਹ੍ਮਚਰਿਯਂ ਸਮ੍ਪਨ੍ਨਤ੍ਤਾ ਨਿਮ੍ਮਲਤ੍ਤਾ ਵਿਪ੍ਪਸਨ੍ਨਤ੍ਤਾ ਮਣ੍ਡਞ੍ਚ ਹਿਤਸੁਖਾਵਹਤ੍ਤਾ ਪੇਯ੍ਯਞ੍ਚਾਤਿ ਮਣ੍ਡਪੇਯ੍ਯਨ੍ਤਿ ਦੀਪੇਤਿ. ਮਣ੍ਡੋ ਪੇਯ੍ਯੋ ਏਤ੍ਥਾਤਿ ਮਣ੍ਡਪੇਯ੍ਯਂ. ਕਿਂ ਤਂ? ਸਾਸਨਬ੍ਰਹ੍ਮਚਰਿਯਂ. ਕਸ੍ਮਾ ਸਿਕ੍ਖਤ੍ਤਯਂ ਬ੍ਰਹ੍ਮਚਰਿਯਂ ਨਾਮ? ਉਤ੍ਤਮਟ੍ਠੇਨ ਨਿਬ੍ਬਾਨਂ ਬ੍ਰਹ੍ਮਂ ਨਾਮ, ਸਿਕ੍ਖਤ੍ਤਯਂ ਨਿਬ੍ਬਾਨਤ੍ਥਾਯ ਪਵਤ੍ਤਨਤੋ ਬ੍ਰਹ੍ਮਤ੍ਥਾਯ ਚਰਿਯਾਤਿ ਬ੍ਰਹ੍ਮਚਰਿਯਨ੍ਤਿ ਵੁਚ੍ਚਤਿ. ਸਾਸਨਬ੍ਰਹ੍ਮਚਰਿਯਨ੍ਤਿ ਤਂਯੇਵ. ਸਤ੍ਥਾ ਸਮ੍ਮੁਖੀਭੂਤੋਤਿ ਇਦਮੇਤ੍ਥ ਕਾਰਣਵਚਨਂ. ਯਸ੍ਮਾ ਪਨ ਸਤ੍ਥਾ ਸਮ੍ਮੁਖੀਭੂਤੋ, ਤਸ੍ਮਾ ਵੀਰਿਯਪਯੋਗਂ ਕਤ੍ਵਾ ਪਿਵਥੇਤਂ ਮਣ੍ਡਂ. ਬਾਹਿਰਕਞ੍ਹਿ ਭੇਸਜ੍ਜਮਣ੍ਡਂ ਵੇਜ੍ਜਸ੍ਸ ਅਸਮ੍ਮੁਖਾ ਪਿਵਨ੍ਤਾਨਂ ਪਮਾਣਂ ਵਾ ਉਗ੍ਗਮਨਨਿਗ੍ਗਮਨਂ ਵਾ ਨ ਜਾਨਾਮਾਤਿ ਆਸਙ੍ਕਾ ਹੋਤਿ. ਵੇਜ੍ਜਸ੍ਸ ਸਮ੍ਮੁਖਾ ਪਨ ਵੇਜ੍ਜੋ ਜਾਨਿਸ੍ਸਤੀਤਿ ਨਿਰਾਸਙ੍ਕਾ ਪਿਵਨ੍ਤਿ. ਏਵਮੇਵਂ ਅਮ੍ਹਾਕਞ੍ਚ ਧਮ੍ਮਸ੍ਸਾਮੀ ਸਤ੍ਥਾ ਸਮ੍ਮੁਖੀਭੂਤੋਤਿ ਵੀਰਿਯਂ ਕਤ੍ਵਾ ਪਿਵਥਾਤਿ ਮਣ੍ਡਪਾਨੇ ਸਨ੍ਨਿਯੋਜੇਤਿ. ਦਿਟ੍ਠਧਮ੍ਮਿਕਸਮ੍ਪਰਾਯਿਕਪਰਮਤ੍ਥੇਹਿ ਯਥਾਰਹਂ ਅਨੁਸਾਸਤੀਤਿ ਸਤ੍ਥਾ. ਅਪਿਚ ‘‘ਸਤ੍ਥਾ ਭਗਵਾ ਸਤ੍ਥਵਾਹੋ’’ਤਿਆਦਿਨਾ (ਮਹਾਨਿ. ੧੯੦) ਨਿਦ੍ਦੇਸਨਯੇਨਪੇਤ੍ਥ ਅਤ੍ਥੋ ਵੇਦਿਤਬ੍ਬੋ. ਸਨ੍ਦਿਸ੍ਸਮਾਨੋ ਮੁਖੋ ਭੂਤੋਤਿ ਸਮ੍ਮੁਖੀਭੂਤੋ.

ਮਣ੍ਡਪੇਯ੍ਯਨਿਦ੍ਦੇਸੇ ਤਿਧਤ੍ਤਮਣ੍ਡੋਤਿ ਤਿਧਾਭਾਵੋ ਤਿਧਤ੍ਤਂ. ਤਿਧਤ੍ਤੇਨ ਮਣ੍ਡੋ ਤਿਧਤ੍ਤਮਣ੍ਡੋ, ਤਿਵਿਧੇਨ ਮਣ੍ਡੋਤਿ ਅਤ੍ਥੋ. ਸਤ੍ਥਰਿ ਸਮ੍ਮੁਖੀਭੂਤੇਤਿ ਇਦਂ ਸਬ੍ਬਾਕਾਰਪਰਿਪੁਣ੍ਣਮਣ੍ਡਤ੍ਤਯਦਸ੍ਸਨਤ੍ਥਂ ਵੁਤ੍ਤਂ. ਪਰਿਨਿਬ੍ਬੁਤੇਪਿ ਪਨ ਸਤ੍ਥਰਿ ਏਕਦੇਸੇਨ ਮਣ੍ਡਤ੍ਤਯਂ ਪਵਤ੍ਤਤਿਯੇਵ. ਤੇਨੇਵ ਚਸ੍ਸ ਨਿਦ੍ਦੇਸੇ ‘‘ਸਤ੍ਥਰਿ ਸਮ੍ਮੁਖੀਭੂਤੇ’’ਤਿ ਅਵਤ੍ਵਾ ਕਤਮੋ ਦੇਸਨਾਮਣ੍ਡੋਤਿਆਦਿ ਵੁਤ੍ਤਨ੍ਤਿ ਵੇਦਿਤਬ੍ਬਂ.

ਦੇਸਨਾਮਣ੍ਡੋਤਿ ਧਮ੍ਮਦੇਸਨਾ ਏਵ ਮਣ੍ਡੋ. ਪਟਿਗ੍ਗਹਮਣ੍ਡੋਤਿ ਦੇਸਨਾਪਟਿਗ੍ਗਾਹਕੋ ਏਵ ਮਣ੍ਡੋ. ਬ੍ਰਹ੍ਮਚਰਿਯਮਣ੍ਡੋਤਿ ਮਗ੍ਗਬ੍ਰਹ੍ਮਚਰਿਯਮੇਵ ਮਣ੍ਡੋ.

ਆਚਿਕ੍ਖਨਾਤਿ ਦੇਸੇਤਬ੍ਬਾਨਂ ਸਚ੍ਚਾਦੀਨਂ ਇਮਾਨਿ ਨਾਮਾਨੀਤਿ ਨਾਮਵਸੇਨ ਕਥਨਾ. ਦੇਸਨਾਤਿ ਦਸ੍ਸਨਾ. ਪਞ੍ਞਾਪਨਾਤਿ ਜਾਨਾਪਨਾ, ਞਾਣਮੁਖੇ ਠਪਨਾ ਵਾ. ਆਸਨਂ ਠਪੇਨ੍ਤੋ ਹਿ ‘‘ਆਸਨਂ ਪਞ੍ਞਾਪੇਤੀ’’ਤਿ ਵੁਚ੍ਚਤਿ. ਪਟ੍ਠਪਨਾਤਿ ਪਞ੍ਞਾਪਨਾ, ਪਵਤ੍ਤਨਾਤਿ ਅਤ੍ਥੋ, ਞਾਣਮੁਖੇ ਠਪਨਾ ਵਾ. ਵਿਵਰਣਾਤਿ ਵਿਵਟਕਰਣਂ, ਵਿਵਰਿਤ੍ਵਾ ਦਸ੍ਸਨਾਤਿ ਅਤ੍ਥੋ. ਵਿਭਜਨਾਤਿ ਵਿਭਾਗਕਿਰਿਯਾ, ਵਿਭਾਗਤੋ ਦਸ੍ਸਨਾਤਿ ਅਤ੍ਥੋ. ਉਤ੍ਤਾਨੀਕਮ੍ਮਨ੍ਤਿ ਪਾਕਟਭਾਵਕਰਣਂ. ਅਥ ਵਾ ਆਚਿਕ੍ਖਨਾਤਿ ਦੇਸਨਾਦੀਨਂ ਛਨ੍ਨਂ ਪਦਾਨਂ ਮੂਲਪਦਂ. ਦੇਸਨਾਦੀਨਿ ਛ ਪਦਾਨਿ ਤਸ੍ਸ ਅਤ੍ਥਵਿਵਰਣਤ੍ਥਂ ਵੁਤ੍ਤਾਨਿ. ਤਤ੍ਥ ਦੇਸਨਾਤਿ ਉਗ੍ਘਟਿਤਞ੍ਞੂਨਂ ਵਸੇਨ ਸਙ੍ਖੇਪਤੋ ਪਠਮਂ ਉਦ੍ਦੇਸਵਸੇਨ ਦੇਸਨਾ. ਉਗ੍ਘਟਿਤਞ੍ਞੂ ਹਿ ਸਙ੍ਖੇਪੇਨ ਵੁਤ੍ਤਂ ਪਠਮਂ ਵੁਤ੍ਤਞ੍ਚ ਪਟਿਵਿਜ੍ਝਨ੍ਤਿ. ਪਞ੍ਞਾਪਨਾਤਿ ਵਿਪਞ੍ਚਿਤਞ੍ਞੂਨਂ ਵਸੇਨ ਤੇਸਂ ਚਿਤ੍ਤਤੋਸਨੇਨ ਬੁਦ੍ਧਿਨਿਸਾਨੇਨ ਚ ਪਠਮਂ ਸਙ੍ਖਿਤ੍ਤਸ੍ਸ ਵਿਤ੍ਥਾਰਤੋ ਨਿਦ੍ਦੇਸਵਸੇਨ ਪਞ੍ਞਾਪਨਾ. ਪਟ੍ਠਪਨਾਤਿ ਤੇਸਂਯੇਵ ਨਿਦ੍ਦਿਟ੍ਠਸ੍ਸ ਨਿਦ੍ਦੇਸਸ੍ਸ ਪਟਿਨਿਦ੍ਦੇਸਵਸੇਨ ਵਿਤ੍ਥਾਰਤਰਵਚਨੇਨ ਪਞ੍ਞਾਪਨਾ. ਵਿਵਰਣਾਤਿ ਨਿਦ੍ਦਿਟ੍ਠਸ੍ਸਾਪਿ ਪੁਨਪ੍ਪੁਨਂ ਵਚਨੇਨ ਵਿਵਰਣਾ. ਵਿਭਜਨਾਤਿ ਪੁਨਪ੍ਪੁਨਂ ਵੁਤ੍ਤਸ੍ਸਾਪਿ ਵਿਭਾਗਕਰਣੇਨ ਵਿਭਜਨਾ. ਉਤ੍ਤਾਨੀਕਮ੍ਮਨ੍ਤਿ ਵਿਵਟਸ੍ਸ ਵਿਤ੍ਥਾਰਤਰਵਚਨੇਨ, ਵਿਭਤ੍ਤਸ੍ਸ ਚ ਨਿਦਸ੍ਸਨਵਚਨੇਨ ਉਤ੍ਤਾਨੀਕਰਣਂ. ਅਯਂ ਦੇਸਨਾ ਨੇਯ੍ਯਾਨਮ੍ਪਿ ਪਟਿਵੇਧਾਯ ਹੋਤਿ. ਯੇਵਾਪਨਞ੍ਞੇਪਿ ਕੇਚੀਤਿ ਪਿਯਙ੍ਕਰਮਾਤਾਦਿਕਾ ਵਿਨਿਪਾਤਿਕਾ ਗਹਿਤਾ. ਵਿਞ੍ਞਾਤਾਰੋਤਿ ਪਟਿਵੇਧਵਸੇਨ ਲੋਕੁਤ੍ਤਰਧਮ੍ਮਂ ਵਿਞ੍ਞਾਤਾਰੋ. ਏਤੇ ਹਿ ਭਿਕ੍ਖੁਆਦਯੋ ਪਟਿਵੇਧਵਸੇਨ ਧਮ੍ਮਦੇਸਨਂ ਪਟਿਗ੍ਗਣ੍ਹਨ੍ਤੀਤਿ ਪਟਿਗ੍ਗਹਾ. ਅਯਮੇਵਾਤਿਆਦੀਨਿ ਪਠਮਞਾਣਨਿਦ੍ਦੇਸੇ ਵੁਤ੍ਤਤ੍ਥਾਨਿ. ਅਰਿਯਮਗ੍ਗੋ ਨਿਬ੍ਬਾਨੇਨ ਸਂਸਨ੍ਦਨਤੋ ਬ੍ਰਹ੍ਮਤ੍ਥਾਯ ਚਰਿਯਾਤਿ ਬ੍ਰਹ੍ਮਚਰਿਯਨ੍ਤਿ ਵੁਚ੍ਚਤਿ.

੨੩੯. ਇਦਾਨਿ ਅਧਿਮੋਕ੍ਖਮਣ੍ਡੋਤਿਆਦੀਹਿ ਤਸ੍ਮਿਂ ਮਗ੍ਗਕ੍ਖਣੇ ਵਿਜ੍ਜਮਾਨਾਨਿ ਇਨ੍ਦ੍ਰਿਯਬਲਬੋਜ੍ਝਙ੍ਗਮਗ੍ਗਙ੍ਗਾਨਿ ਮਣ੍ਡਪੇਯ੍ਯਵਿਧਾਨੇ ਯੋਜੇਤ੍ਵਾ ਦਸ੍ਸੇਤਿ. ਤਤ੍ਥ ਅਧਿਮੋਕ੍ਖਮਣ੍ਡੋਤਿ ਅਧਿਮੋਕ੍ਖਸਙ੍ਖਾਤੋ ਮਣ੍ਡੋ. ਕਸਟੋਤਿ ਪਸਾਦਵਿਰਹਿਤੋ ਆਵਿਲੋ. ਛਡ੍ਡੇਤ੍ਵਾਤਿ ਸਮੁਚ੍ਛੇਦਵਸੇਨ ਪਹਾਯ. ਸਦ੍ਧਿਨ੍ਦ੍ਰਿਯਸ੍ਸ ਅਧਿਮੋਕ੍ਖਮਣ੍ਡਂ ਪਿਵਤੀਤਿ ਮਣ੍ਡਪੇਯ੍ਯਨ੍ਤਿ ਸਦ੍ਧਿਨ੍ਦ੍ਰਿਯਤੋ ਅਧਿਮੋਕ੍ਖਮਣ੍ਡਸ੍ਸ ਅਨਞ੍ਞਤ੍ਤੇਪਿ ਸਤਿ ਅਞ੍ਞਂ ਵਿਯ ਕਤ੍ਵਾ ਵੋਹਾਰਵਸੇਨ ਵੁਚ੍ਚਤਿ, ਯਥਾ ਲੋਕੇ ਨਿਸਦਪੋਤਕੋ ਨਿਸਦਪੋਤਸਰੀਰਸ੍ਸ ਅਨਞ੍ਞਤ੍ਤੇਪਿ ਸਤਿ ਨਿਸਦਪੋਤਸ੍ਸ ਸਰੀਰਨ੍ਤਿ ਵੁਚ੍ਚਤਿ, ਯਥਾ ਚ ਪਾਲ਼ਿਯਂ ‘‘ਫੁਸਿਤਤ੍ਤ’’ਨ੍ਤਿਆਦੀਸੁ ਧਮ੍ਮਤੋ ਅਨਞ੍ਞੋਪਿ ਭਾਵੋ ਅਞ੍ਞੋ ਵਿਯ ਵੁਤ੍ਤੋ, ਯਥਾ ਚ ਅਟ੍ਠਕਥਾਯਂ ‘‘ਫੁਸਨਲਕ੍ਖਣੋ ਫਸ੍ਸੋ’’ਤਿਆਦੀਸੁ (ਧ. ਸ. ਅਟ੍ਠ. ੧ ਧਮ੍ਮੁਦ੍ਦੇਸਵਾਰ ਫਸ੍ਸਪਞ੍ਚਮਕਰਾਸਿਵਣ੍ਣਨਾ) ਧਮ੍ਮਤੋ ਅਨਞ੍ਞਮ੍ਪਿ ਲਕ੍ਖਣਂ ਅਞ੍ਞਂ ਵਿਯ ਵੁਤ੍ਤਂ, ਏਵਮਿਦਨ੍ਤਿ ਵੇਦਿਤਬ੍ਬਂ. ਪਿਵਤੀਤਿ ਚੇਤ੍ਥ ਤਂਸਮਙ੍ਗਿਪੁਗ੍ਗਲੋਤਿ ਵੁਤ੍ਤਂ ਹੋਤਿ. ਤਂਸਮਙ੍ਗਿਪੁਗ੍ਗਲੋ ਤਂ ਮਣ੍ਡਂ ਪਿਵਤੀਤਿ ਕਤ੍ਵਾ ਤੇਨ ਪੁਗ੍ਗਲੇਨ ਸੋ ਮਣ੍ਡੋ ਪਾਤਬ੍ਬਤੋ ਮਣ੍ਡਪੇਯ੍ਯਂ ਨਾਮ ਹੋਤੀਤਿ ਵੁਤ੍ਤਂ ਹੋਤਿ. ‘‘ਮਣ੍ਡਪੇਯ੍ਯੋ’’ਤਿ ਚ ਵਤ੍ਤਬ੍ਬੇ ‘‘ਮਣ੍ਡਪੇਯ੍ਯ’’ਨ੍ਤਿ ਲਿਙ੍ਗਵਿਪਲ੍ਲਾਸੋ ਕਤੋ. ਸੇਸਾਨਮ੍ਪਿ ਇਮਿਨਾ ਨਯੇਨ ਅਤ੍ਥੋ ਵੇਦਿਤਬ੍ਬੋ. ਅਪੁਬ੍ਬੇਸੁ ਪਨ ਪਰਿਲ਼ਾਹੋਤਿ ਪੀਣਨਲਕ੍ਖਣਾਯ ਪੀਤਿਯਾ ਪਟਿਪਕ੍ਖੋ ਕਿਲੇਸਸਨ੍ਤਾਪੋ. ਦੁਟ੍ਠੁਲ੍ਲਨ੍ਤਿ ਉਪਸਮਪਟਿਪਕ੍ਖੋ ਕਿਲੇਸਵਸੇਨ ਓਲ਼ਾਰਿਕਭਾਵੋ ਅਸਨ੍ਤਭਾਵੋ. ਅਪ੍ਪਟਿਸਙ੍ਖਾਤਿ ਪਟਿਸਙ੍ਖਾਨਪਟਿਪਕ੍ਖੋ ਕਿਲੇਸਵਸੇਨ ਅਸਮਵਾਹਿਤਭਾਵੋ.

੨੪੦. ਪੁਨ ਅਞ੍ਞੇਨ ਪਰਿਯਾਯੇਨ ਮਣ੍ਡਪੇਯ੍ਯਵਿਧਿਂ ਨਿਦ੍ਦਿਸਿਤੁਕਾਮੋ ਅਤ੍ਥਿ ਮਣ੍ਡੋਤਿਆਦਿਮਾਹ. ਤਤ੍ਥ ਤਤ੍ਥਾਤਿ ਤਸ੍ਮਿਂ ਸਦ੍ਧਿਨ੍ਦ੍ਰਿਯੇ. ਅਤ੍ਥਰਸੋਤਿਆਦੀਸੁ ਸਦ੍ਧਿਨ੍ਦ੍ਰਿਯਸ੍ਸ ਅਧਿਮੁਚ੍ਚਨਂ ਅਤ੍ਥੋ, ਸਦ੍ਧਿਨ੍ਦ੍ਰਿਯਂ ਧਮ੍ਮੋ, ਤਦੇਵ ਨਾਨਾਕਿਲੇਸੇਹਿ ਵਿਮੁਤ੍ਤਤ੍ਤਾ ਵਿਮੁਤ੍ਤਿ, ਤਸ੍ਸ ਅਤ੍ਥਸ੍ਸ ਸਮ੍ਪਤ੍ਤਿ ਅਤ੍ਥਰਸੋ. ਤਸ੍ਸ ਧਮ੍ਮਸ੍ਸ ਸਮ੍ਪਤ੍ਤਿ ਧਮ੍ਮਰਸੋ. ਤਸ੍ਸਾ ਵਿਮੁਤ੍ਤਿਯਾ ਸਮ੍ਪਤ੍ਤਿ ਵਿਮੁਤ੍ਤਿਰਸੋ. ਅਥ ਵਾ ਅਤ੍ਥਪਟਿਲਾਭਰਤਿ ਅਤ੍ਥਰਸੋ, ਧਮ੍ਮਪਟਿਲਾਭਰਤਿ ਧਮ੍ਮਰਸੋ, ਵਿਮੁਤ੍ਤਿਪਟਿਲਾਭਰਤਿ ਵਿਮੁਤ੍ਤਿਰਸੋ. ਰਤੀਤਿ ਚ ਤਂਸਮ੍ਪਯੁਤ੍ਤਾ, ਤਦਾਰਮ੍ਮਣਾ ਵਾ ਪੀਤਿ. ਇਮਿਨਾ ਨਯੇਨ ਸੇਸਪਦੇਸੁਪਿ ਅਤ੍ਥੋ ਵੇਦਿਤਬ੍ਬੋ. ਇਮਸ੍ਮਿਂ ਪਰਿਯਾਯੇ ਮਣ੍ਡਸ੍ਸ ਪੇਯ੍ਯਂ ਮਣ੍ਡਪੇਯ੍ਯਨ੍ਤਿ ਅਤ੍ਥੋ ਵੁਤ੍ਤੋ ਹੋਤਿ.

ਏਵਂ ਇਨ੍ਦ੍ਰਿਯਾਦਿਬੋਧਿਪਕ੍ਖਿਯਧਮ੍ਮਪਟਿਪਾਟਿਯਾ ਇਨ੍ਦ੍ਰਿਯਬਲਬੋਜ੍ਝਙ੍ਗਮਗ੍ਗਙ੍ਗਾਨਂ ਵਸੇਨ ਮਣ੍ਡਪੇਯ੍ਯਂ ਦਸ੍ਸੇਤ੍ਵਾ ਪੁਨ ਅਨ੍ਤੇ ਠਿਤਂ ਬ੍ਰਹ੍ਮਚਰਿਯਮਣ੍ਡਂ ਦਸ੍ਸੇਨ੍ਤੋ ਮਗ੍ਗਸ੍ਸ ਪਧਾਨਤ੍ਤਾ ਮਗ੍ਗਂ ਪੁਬ੍ਬਙ੍ਗਮਂ ਕਤ੍ਵਾ ਉਪ੍ਪਟਿਪਾਟਿਵਸੇਨ ਮਗ੍ਗਙ੍ਗਬੋਜ੍ਝਙ੍ਗਬਲਇਨ੍ਦ੍ਰਿਯਾਨਿ ਦਸ੍ਸੇਸਿ. ਆਧਿਪਤੇਯ੍ਯਟ੍ਠੇਨ ਇਨ੍ਦ੍ਰਿਯਾ ਮਣ੍ਡੋਤਿਆਦਯੋ ਯਥਾਯੋਗਂ ਲੋਕਿਯਲੋਕੁਤ੍ਤਰਾ ਮਣ੍ਡਾ. ਤਂ ਹੇਟ੍ਠਾ ਵੁਤ੍ਤਨਯੇਨ ਵੇਦਿਤਬ੍ਬਂ. ਤਥਟ੍ਠੇਨ ਸਚ੍ਚਾ ਮਣ੍ਡੋਤਿ ਏਤ੍ਥ ਪਨ ਦੁਕ੍ਖਸਮੁਦਯਾਨਂ ਮਣ੍ਡਤ੍ਤਾਭਾਵਾ ਮਹਾਹਤ੍ਥਿਪਦਸੁਤ੍ਤੇ (ਮ. ਨਿ. ੧.੩੦੦) ਵਿਯ ਸਚ੍ਚਞਾਣਾਨਿ ਸਚ੍ਚਾਤਿ ਵੁਤ੍ਤਨ੍ਤਿ ਵੇਦਿਤਬ੍ਬਂ.

ਸਦ੍ਧਮ੍ਮਪ੍ਪਕਾਸਿਨਿਯਾ ਪਟਿਸਮ੍ਭਿਦਾਮਗ੍ਗ-ਅਟ੍ਠਕਥਾਯ

ਮਣ੍ਡਪੇਯ੍ਯਕਥਾਵਣ੍ਣਨਾ ਨਿਟ੍ਠਿਤਾ.

ਨਿਟ੍ਠਿਤਾ ਚ ਮਹਾਵਗ੍ਗਵਣ੍ਣਨਾ.