੯. ਮਗ੍ਗਕਥਾ

ਮਗ੍ਗਕਥਾਵਣ੍ਣਨਾ

੨੩੭. ਇਦਾਨਿ ਤੇਸਂ ਤਿਣ੍ਣਂ ਵਿਪਲ੍ਲਾਸਾਨਂ ਪਹਾਨਕਰਂ ਅਰਿਯਮਗ੍ਗਂ ਦਸ੍ਸੇਨ੍ਤੇਨ ਕਥਿਤਾਯ ਮਗ੍ਗਕਥਾਯ ਅਪੁਬ੍ਬਤ੍ਥਾਨੁਵਣ੍ਣਨਾ. ਤਤ੍ਥ ਮਗ੍ਗੋਤਿ ਕੇਨਟ੍ਠੇਨ ਮਗ੍ਗੋਤਿ ਯੋ ਬੁਦ੍ਧਸਾਸਨੇ ਮਗ੍ਗੋਤਿ ਵੁਚ੍ਚਤਿ, ਸੋ ਕੇਨਟ੍ਠੇਨ ਮਗ੍ਗੋ ਨਾਮ ਹੋਤੀਤਿ ਅਤ੍ਥੋ. ਮਿਚ੍ਛਾਦਿਟ੍ਠਿਯਾ ਪਹਾਨਾਯਾਤਿਆਦੀਸੁ ਦਸਸੁ ਪਰਿਯਾਯੇਸੁ ਪਠਮੋ ਪਠਮੋ ਤਸ੍ਸ ਤਸ੍ਸ ਮਗ੍ਗਙ੍ਗਸ੍ਸ ਉਜੁਵਿਪਚ੍ਚਨੀਕਵਸੇਨ ਵੁਤ੍ਤੋ. ਮਗ੍ਗੋ ਚੇਵ ਹੇਤੁ ਚਾਤਿ ਤਸ੍ਸ ਤਸ੍ਸ ਕਿਚ੍ਚਸ੍ਸ ਕਰਣਾਯ ਪਟਿਪਦਟ੍ਠੇਨ ਮਗ੍ਗੋ, ਸਮ੍ਪਾਪਕਟ੍ਠੇਨ ਹੇਤੁ. ਤੇਨ ਮਗ੍ਗਸ੍ਸ ਪਟਿਪਦਟ੍ਠੋ ਸਮ੍ਪਾਪਕਟ੍ਠੋ ਚ ਵੁਤ੍ਤੋ ਹੋਤਿ. ‘‘ਅਯਂ ਮਗ੍ਗੋ ਅਯਂ ਪਟਿਪਦਾ’’ਤਿਆਦੀਸੁ (ਸਂ. ਨਿ. ੫.੫, ੪੮) ਹਿ ਪਟਿਪਦਾ ਮਗ੍ਗੋ, ‘‘ਮਗ੍ਗਸ੍ਸ ਨਿਯ੍ਯਾਨਟ੍ਠੋ ਹੇਤੁਟ੍ਠੋ’’ਤਿਆਦੀਸੁ (ਪਟਿ. ਮ. ੨.੮) ਸਮ੍ਪਾਪਕੋ ਹੇਤੁ. ਏਵਂ ਦ੍ਵੀਹਿ ਦ੍ਵੀਹਿ ਪਦੇਹਿ ‘‘ਮਗ੍ਗੋਤਿ ਕੇਨਟ੍ਠੇਨ ਮਗ੍ਗੋ’’ਤਿ ਪੁਚ੍ਛਾਯ ਵਿਸ੍ਸਜ੍ਜਨਂ ਕਤਂ ਹੋਤਿ. ਸਹਜਾਤਾਨਂ ਧਮ੍ਮਾਨਂ ਉਪਤ੍ਥਮ੍ਭਨਾਯਾਤਿ ਅਤ੍ਤਨਾ ਸਹਜਾਤਾਨਂ ਅਰੂਪਧਮ੍ਮਾਨਂ ਸਹਜਾਤਅਞ੍ਞਮਞ੍ਞਨਿਸ੍ਸਯਾਦਿਭਾਵੇਨ ਉਪਤ੍ਥਮ੍ਭਨਭਾਵਾਯ. ਕਿਲੇਸਾਨਂ ਪਰਿਯਾਦਾਨਾਯਾਤਿ ਤਂਤਂਮਗ੍ਗਵਜ੍ਝਾਨਂ ਵੁਤ੍ਤਾਵਸੇਸਕਿਲੇਸਾਨਂ ਖੇਪਨਾਯ. ਪਟਿਵੇਧਾਦਿਵਿਸੋਧਨਾਯਾਤਿ ਏਤ੍ਥ ਯਸ੍ਮਾ ‘‘ਕੋ ਚਾਦਿ ਕੁਸਲਾਨਂ ਧਮ੍ਮਾਨਂ, ਸੀਲਞ੍ਚ ਸੁਵਿਸੁਦ੍ਧਂ ਦਿਟ੍ਠਿ ਚ ਉਜੁਕਾ’’ਤਿ (ਸਂ. ਨਿ. ੫.੩੬੯, ੩੮੧) ਵਚਨਤੋ ਸੀਲਞ੍ਚ ਦਿਟ੍ਠਿ ਚ ਸਚ੍ਚਪਟਿਵੇਧਸ੍ਸ ਆਦਿ. ਸੋ ਚ ਆਦਿਮਗ੍ਗਕ੍ਖਣੇ ਵਿਸੁਜ੍ਝਤਿ. ਤਸ੍ਮਾ ‘‘ਪਟਿਵੇਧਾਦਿਵਿਸੋਧਨਾਯਾ’’ਤਿ ਵੁਤ੍ਤਂ. ਚਿਤ੍ਤਸ੍ਸ ਅਧਿਟ੍ਠਾਨਾਯਾਤਿ ਸਮ੍ਪਯੁਤ੍ਤਚਿਤ੍ਤਸ੍ਸ ਸਕਕਿਚ੍ਚੇ ਪਤਿਟ੍ਠਾਨਾਯ. ਚਿਤ੍ਤਸ੍ਸ ਵੋਦਾਨਾਯਾਤਿ ਚਿਤ੍ਤਸ੍ਸ ਪਰਿਸੁਦ੍ਧਭਾਵਾਯ. ਵਿਸੇਸਾਧਿਗਮਾਯਾਤਿ ਲੋਕਿਯਤੋ ਵਿਸੇਸਪਟਿਲਾਭਾਯ. ਉਤ੍ਤਰਿ ਪਟਿਵੇਧਾਯਾਤਿ ਲੋਕਿਯਤੋ ਉਤ੍ਤਰਿ ਪਟਿਵਿਜ੍ਝਨਤ੍ਥਾਯ. ਸਚ੍ਚਾਭਿਸਮਯਾਯਾਤਿ ਚਤੁਨ੍ਨਂ ਸਚ੍ਚਾਨਂ ਏਕਾਭਿਸਮਯਾਯ ਕਿਚ੍ਚਨਿਪ੍ਫਤ੍ਤਿਵਸੇਨ ਏਕਪਟਿਵੇਧਾਯ. ਨਿਰੋਧੇ ਪਤਿਟ੍ਠਾਪਨਾਯਾਤਿ ਚਿਤ੍ਤਸ੍ਸ ਵਾ ਪੁਗ੍ਗਲਸ੍ਸ ਵਾ ਨਿਬ੍ਬਾਨੇ ਪਤਿਟ੍ਠਾਪਨਤ੍ਥਾਯ. ਸਕਦਾਗਾਮਿਮਗ੍ਗਕ੍ਖਣਾਦੀਸੁ ਅਟ੍ਠ ਮਗ੍ਗਙ੍ਗਾਨਿ ਏਕਤੋ ਕਤ੍ਵਾ ਤਂਤਂਮਗ੍ਗਵਜ੍ਝਕਿਲੇਸਪ੍ਪਹਾਨਂ ਵੁਤ੍ਤਂ. ਏਵਂ ਵਚਨੇ ਕਾਰਣਂ ਹੇਟ੍ਠਾ ਵੁਤ੍ਤਮੇਵ. ਯਸ੍ਮਾ ਉਪਰੂਪਰਿਮਗ੍ਗੇਨਾਪਿ ਸੁਟ੍ਠੁ ਆਦਿਵਿਸੋਧਨਾ ਸੁਟ੍ਠੁ ਚਿਤ੍ਤਵੋਦਾਨਞ੍ਚ ਹੋਤਿ, ਤਸ੍ਮਾ ਤਾਨਿਪਿ ਪਦਾਨਿ ਵੁਤ੍ਤਾਨਿ.

ਦਸ੍ਸਨਮਗ੍ਗੋਤਿਆਦੀਹਿ ਯਾਵ ਪਰਿਯੋਸਾਨਾ ਤਸ੍ਸ ਧਮ੍ਮਸ੍ਸ ਲਕ੍ਖਣਵਸੇਨ ਮਗ੍ਗਟ੍ਠੋ ਵੁਤ੍ਤੋ. ਤਾਨਿ ਸਬ੍ਬਾਨਿਪਿ ਪਦਾਨਿ ਅਭਿਞ੍ਞੇਯ੍ਯਨਿਦ੍ਦੇਸੇ ਵੁਤ੍ਤਤ੍ਥਾਨੇਵ. ਏਵਮੇਤ੍ਥ ਯਥਾਸਮ੍ਭਵਂ ਲੋਕਿਯਲੋਕੁਤ੍ਤਰੋ ਮਗ੍ਗੋ ਨਿਦ੍ਦਿਟ੍ਠੋ. ਹੇਤੁਟ੍ਠੇਨ ਮਗ੍ਗੋਤਿ ਚ ਅਟ੍ਠਙ੍ਗਿਕੋ ਮਗ੍ਗੋ ਨਿਦ੍ਦਿਟ੍ਠੋ. ਨਿਪ੍ਪਰਿਯਾਯਮਗ੍ਗਤ੍ਤਾ ਚਸ੍ਸ ਪੁਨ ‘‘ਮਗ੍ਗੋ’’ਤਿ ਨ ਵੁਤ੍ਤਂ. ਆਧਿਪਤੇਯ੍ਯਟ੍ਠੇਨ ਇਨ੍ਦ੍ਰਿਯਾਤਿ ਆਦੀਨਿ ਚ ਇਨ੍ਦ੍ਰਿਯਾਦੀਨਂ ਅਤ੍ਥਵਸੇਨ ਵੁਤ੍ਤਾਨਿ, ਨ ਮਗ੍ਗਟ੍ਠਵਸੇਨ. ਸਚ੍ਚਾਨੀਤਿ ਚੇਤ੍ਥ ਸਚ੍ਚਞਾਣਾਨਿ. ਸਬ੍ਬੇਪਿ ਤੇ ਧਮ੍ਮਾ ਨਿਬ੍ਬਾਨਸ੍ਸ ਪਟਿਪਦਟ੍ਠੇਨ ਮਗ੍ਗੋ. ਅਨ੍ਤੇ ਵੁਤ੍ਤਂ ਨਿਬ੍ਬਾਨਂ ਪਨ ਸਂਸਾਰਦੁਕ੍ਖਾਭਿਭੂਤੇਹਿ ਦੁਕ੍ਖਨਿਸ੍ਸਰਣਤ੍ਥਿਕੇਹਿ ਸਪ੍ਪੁਰਿਸੇਹਿ ਮਗ੍ਗੀਯਤਿ ਗਵੇਸੀਯਤੀਤਿ ਮਗ੍ਗੋਤਿ ਵੁਤ੍ਤਨ੍ਤਿ ਵੇਦਿਤਬ੍ਬਨ੍ਤਿ.

ਮਗ੍ਗਕਥਾਵਣ੍ਣਨਾ ਨਿਟ੍ਠਿਤਾ.