੮. ਵਿਪਲ੍ਲਾਸਕਥਾ

ਵਿਪਲ੍ਲਾਸਕਥਾਵਣ੍ਣਨਾ

੨੩੬. ਇਦਾਨਿ ਤਸ੍ਸ ਕਮ੍ਮਸ੍ਸ ਪਚ੍ਚਯਭੂਤੇ ਵਿਪਲ੍ਲਾਸੇ ਦਸ੍ਸੇਨ੍ਤੇਨ ਕਥਿਤਾਯ ਸੁਤ੍ਤਨ੍ਤਪੁਬ੍ਬਙ੍ਗਮਾਯ ਵਿਪਲ੍ਲਾਸਕਥਾਯ ਅਪੁਬ੍ਬਤ੍ਥਾਨੁਵਣ੍ਣਨਾ. ਸੁਤ੍ਤਨ੍ਤੇ ਤਾਵ ਸਞ੍ਞਾਵਿਪਲ੍ਲਾਸਾਤਿ ਸਞ੍ਞਾਯ ਵਿਪਲ੍ਲਤ੍ਥਭਾਵਾ ਵਿਪਰੀਤਭਾਵਾ, ਵਿਪਰੀਤਸਞ੍ਞਾਤਿ ਅਤ੍ਥੋ. ਸੇਸਦ੍ਵਯੇਸੁਪਿ ਏਸੇਵ ਨਯੋ. ਚਿਤ੍ਤਕਿਚ੍ਚਸ੍ਸ ਦੁਬ੍ਬਲਟ੍ਠਾਨੇ ਦਿਟ੍ਠਿਵਿਰਹਿਤਾਯ ਅਕੁਸਲਸਞ੍ਞਾਯ ਸਕਕਿਚ੍ਚਸ੍ਸ ਬਲਵਕਾਲੇ ਸਞ੍ਞਾਵਿਪਲ੍ਲਾਸੋ. ਦਿਟ੍ਠਿਵਿਰਹਿਤਸ੍ਸੇਵ ਅਕੁਸਲਚਿਤ੍ਤਸ੍ਸ ਸਕਕਿਚ੍ਚਸ੍ਸ ਬਲਵਕਾਲੇ ਚਿਤ੍ਤਵਿਪਲ੍ਲਾਸੋ. ਦਿਟ੍ਠਿਸਮ੍ਪਯੁਤ੍ਤੇ ਚਿਤ੍ਤੇ ਦਿਟ੍ਠਿਵਿਪਲ੍ਲਾਸੋ. ਤਸ੍ਮਾ ਸਬ੍ਬਦੁਬ੍ਬਲੋ ਸਞ੍ਞਾਵਿਪਲ੍ਲਾਸੋ, ਤਤੋ ਬਲਵਤਰੋ ਚਿਤ੍ਤਵਿਪਲ੍ਲਾਸੋ, ਸਬ੍ਬਬਲਵਤਰੋ ਦਿਟ੍ਠਿਵਿਪਲ੍ਲਾਸੋ. ਅਜਾਤਬੁਦ੍ਧਿਦਾਰਕਸ੍ਸ ਕਹਾਪਣਦਸ੍ਸਨਂ ਵਿਯ ਹਿ ਸਞ੍ਞਾ ਆਰਮ੍ਮਣਸ੍ਸ ਉਪਟ੍ਠਾਨਾਕਾਰਮਤ੍ਤਗ੍ਗਹਣਤੋ. ਗਾਮਿਕਪੁਰਿਸਸ੍ਸ ਕਹਾਪਣਦਸ੍ਸਨਂ ਵਿਯ ਚਿਤ੍ਤਂ ਲਕ੍ਖਣਪਟਿਵੇਧਸ੍ਸਾਪਿ ਸਮ੍ਪਾਪਨਤੋ. ਕਮ੍ਮਾਰਸ੍ਸ ਮਹਾਸਣ੍ਡਾਸੇਨ ਅਯੋਗਹਣਂ ਵਿਯ ਦਿਟ੍ਠਿ ਅਭਿਨਿਵਿਸ੍ਸ ਪਰਾਮਸਨਤੋ. ਅਨਿਚ੍ਚੇ ਨਿਚ੍ਚਨ੍ਤਿ ਸਞ੍ਞਾਵਿਪਲ੍ਲਾਸੋਤਿ ਅਨਿਚ੍ਚੇ ਵਤ੍ਥੁਸ੍ਮਿਂ ‘‘ਨਿਚ੍ਚਂ ਇਦ’’ਨ੍ਤਿ ਏਵਂ ਗਹੇਤ੍ਵਾ ਉਪ੍ਪਜ੍ਜਨਕਸਞ੍ਞਾ ਸਞ੍ਞਾਵਿਪਲ੍ਲਾਸੋ. ਇਮਿਨਾ ਨਯੇਨ ਸਬ੍ਬਪਦੇਸੁ ਅਤ੍ਥੋ ਵੇਦਿਤਬ੍ਬੋ. ਨ ਸਞ੍ਞਾਵਿਪਲ੍ਲਾਸੋ ਨ ਚਿਤ੍ਤਵਿਪਲ੍ਲਾਸੋ ਨ ਦਿਟ੍ਠਿਵਿਪਲ੍ਲਾਸੋਤਿ ਚਤੂਸੁ ਵਤ੍ਥੂਸੁ ਦ੍ਵਾਦਸਨ੍ਨਂ ਵਿਪਲ੍ਲਾਸਗ੍ਗਾਹਾਨਂ ਅਭਾਵਾ ਯਾਥਾਵਗ੍ਗਹਣਂ ਵੁਤ੍ਤਂ.

ਗਾਥਾਸੁ ਅਨਤ੍ਤਨਿ ਚ ਅਤ੍ਤਾਤਿ ਅਨਤ੍ਤਨਿ ਅਤ੍ਤਾਤਿ ਏਵਂਸਞ੍ਞਿਨੋਤਿ ਅਤ੍ਥੋ. ਮਿਚ੍ਛਾਦਿਟ੍ਠਿਹਤਾਤਿ ਨ ਕੇਵਲਂ ਸਞ੍ਞਿਨੋਵ, ਸਞ੍ਞਾਯ ਵਿਯ ਉਪ੍ਪਜ੍ਜਮਾਨਾਯ ਮਿਚ੍ਛਾਦਿਟ੍ਠਿਯਾਪਿ ਹਤਾ. ਖਿਤ੍ਤਚਿਤ੍ਤਾਤਿ ਸਞ੍ਞਾਦਿਟ੍ਠੀਹਿ ਵਿਯ ਉਪ੍ਪਜ੍ਜਮਾਨੇਨ ਖਿਤ੍ਤੇਨ ਵਿਬ੍ਭਨ੍ਤੇਨ ਚਿਤ੍ਤੇਨ ਸਮਨ੍ਨਾਗਤਾ. ਵਿਸਞ੍ਞਿਨੋਤਿ ਦੇਸਨਾਮਤ੍ਤਮੇਤਂ, ਵਿਪਰੀਤਸਞ੍ਞਾਚਿਤ੍ਤਦਿਟ੍ਠਿਨੋਤਿ ਅਤ੍ਥੋ. ਅਥ ਵਾ ਸਞ੍ਞਾਪੁਬ੍ਬਙ੍ਗਮਤ੍ਤਾ ਦਿਟ੍ਠਿਯਾ ਪਠਮਂ ਚਤੂਹਿ ਪਦੇਹਿ ਸਞ੍ਞਾਵਿਪਲ੍ਲਾਸੋ ਵੁਤ੍ਤੋ, ਤਤੋ ਮਿਚ੍ਛਾਦਿਟ੍ਠਿਹਤਾਤਿ ਦਿਟ੍ਠਿਵਿਪਲ੍ਲਾਸੋ, ਖਿਤ੍ਤਚਿਤ੍ਤਾਤਿ ਚਿਤ੍ਤਵਿਪਲ੍ਲਾਸੋ. ਵਿਸਞ੍ਞਿਨੋਤਿ ਤੀਹਿ ਵਿਪਲ੍ਲਾਸਗ੍ਗਾਹੇਹਿ ਪਕਤਿਸਞ੍ਞਾਵਿਰਹਿਤਾ ਮੋਹਂ ਗਤਾ ‘‘ਮੁਚ੍ਛਿਤੋ ਵਿਸਵੇਗੇਨ, ਵਿਸਞ੍ਞੀ ਸਮਪਜ੍ਜਥਾ’’ਤਿਏਤ੍ਥ (ਜਾ. ੨.੨੨.੩੨੮) ਵਿਯ. ਤੇ ਯੋਗਯੁਤ੍ਤਾ ਮਾਰਸ੍ਸਾਤਿ ਤੇ ਜਨਾ ਸਤ੍ਤਾ ਮਾਰਸ੍ਸ ਯੋਗੇ ਯੁਤ੍ਤਾ ਨਾਮ ਹੋਨ੍ਤਿ. ਅਯੋਗਕ੍ਖੇਮਿਨੋਤਿ ਚਤੂਹਿ ਯੋਗੇਹਿ ਈਤੀਹਿ ਖੇਮਂ ਨਿਬ੍ਬਾਨਂ ਅਪ੍ਪਤ੍ਤਾ. ਸਤ੍ਤਾ ਗਚ੍ਛਨ੍ਤਿ ਸਂਸਾਰਨ੍ਤਿ ਤੇਯੇਵ ਪੁਗ੍ਗਲਾ ਸਂਸਾਰਂ ਸਂਸਰਨ੍ਤਿ. ਕਸ੍ਮਾ? ਜਾਤਿਮਰਣਗਾਮਿਨੋ ਹਿ ਤੇ, ਤਸ੍ਮਾ ਸਂਸਰਨ੍ਤੀਤਿ ਅਤ੍ਥੋ. ਬੁਦ੍ਧਾਤਿ ਚਤੁਸਚ੍ਚਬੁਦ੍ਧਾ ਸਬ੍ਬਞ੍ਞੁਨੋ. ਕਾਲਤ੍ਤਯਸਾਧਾਰਣਵਸੇਨ ਬਹੁਵਚਨਂ. ਲੋਕਸ੍ਮਿਨ੍ਤਿ ਓਕਾਸਲੋਕੇ. ਪਭਙ੍ਕਰਾਤਿ ਲੋਕਸ੍ਸ ਪਞ੍ਞਾਲੋਕਂ ਕਰਾ. ਇਮਂ ਧਮ੍ਮਂ ਪਕਾਸੇਨ੍ਤੀਤਿ ਵਿਪਲ੍ਲਾਸਪ੍ਪਹਾਨਂ ਧਮ੍ਮਂ ਜੋਤੇਨ੍ਤਿ. ਦੁਕ੍ਖੂਪਸਮਗਾਮਿਨਨ੍ਤਿ ਦੁਕ੍ਖਵੂਪਸਮਂ ਨਿਬ੍ਬਾਨਂ ਗਚ੍ਛਨ੍ਤਂ. ਤੇਸਂ ਸੁਤ੍ਵਾਨਾਤਿ ਤੇਸਂ ਬੁਦ੍ਧਾਨਂ ਧਮ੍ਮਂ ਸੁਤ੍ਵਾਨ. ਸਪ੍ਪਞ੍ਞਾਤਿ ਭਬ੍ਬਭੂਤਾ ਪਞ੍ਞਵਨ੍ਤੋ. ਸਚਿਤ੍ਤਂ ਪਚ੍ਚਲਦ੍ਧੂਤਿ ਵਿਪਲ੍ਲਾਸਵਜ੍ਜਿਤਂ ਸਕਚਿਤ੍ਤਂ ਪਟਿਲਭਿਤ੍ਵਾ. ਪਟਿਅਲਦ੍ਧੂਤਿ ਪਦਚ੍ਛੇਦੋ. ਅਥ ਵਾ ਪਟਿਲਭਿਂਸੁ ਪਟਿਅਲਦ੍ਧੁਨ੍ਤਿ ਪਦਚ੍ਛੇਦੋ. ਅਨਿਚ੍ਚਤੋ ਦਕ੍ਖੁਨ੍ਤਿ ਅਨਿਚ੍ਚਵਸੇਨੇਵ ਅਦ੍ਦਸਂਸੁ. ਅਨਤ੍ਤਨਿ ਅਨਤ੍ਤਾਤਿ ਅਨਤ੍ਤਾਨਂ ਅਨਤ੍ਤਾਤਿ ਅਦ੍ਦਕ੍ਖੁਂ. ਅਥ ਵਾ ਅਨਤ੍ਤਨਿ ਵਤ੍ਥੁਸ੍ਮਿਂ ਅਤ੍ਤਾ ਨਤ੍ਥੀਤਿ ਅਦ੍ਦਕ੍ਖੁਂ. ਸਮ੍ਮਾਦਿਟ੍ਠਿਸਮਾਦਾਨਾਤਿ ਗਹਿਤਸਮ੍ਮਾਦਸ੍ਸਨਾ. ਸਬ੍ਬਂ ਦੁਕ੍ਖਂ ਉਪਚ੍ਚਗੁਨ੍ਤਿ ਸਕਲਂ ਵਟ੍ਟਦੁਕ੍ਖਂ ਸਮਤਿਕ੍ਕਨ੍ਤਾ.

ਪਹੀਨਾਪਹੀਨਪੁਚ੍ਛਾਯ ਦਿਟ੍ਠਿਸਮ੍ਪਨ੍ਨਸ੍ਸਾਤਿ ਸੋਤਾਪਨ੍ਨਸ੍ਸ. ਦੁਕ੍ਖੇ ਸੁਖਨ੍ਤਿ ਸਞ੍ਞਾ ਉਪ੍ਪਜ੍ਜਤਿ. ਚਿਤ੍ਤਂ ਉਪ੍ਪਜ੍ਜਤੀਤਿ ਮੋਹਕਾਲੁਸ੍ਸਿਯਸ੍ਸ ਅਪ੍ਪਹੀਨਤ੍ਤਾ ਸਞ੍ਞਾਮਤ੍ਤਂ ਵਾ ਚਿਤ੍ਤਮਤ੍ਤਂ ਵਾ ਉਪ੍ਪਜ੍ਜਤਿ, ਅਨਾਗਾਮਿਸ੍ਸਪਿ ਉਪ੍ਪਜ੍ਜਤਿ, ਕਿਂ ਪਨ ਸੋਤਾਪਨ੍ਨਸ੍ਸ. ਇਮੇ ਦ੍ਵੇ ਅਰਹਤੋਯੇਵ ਪਹੀਨਾ. ਅਸੁਭੇ ਸੁਭਨ੍ਤਿ ਸਞ੍ਞਾ ਉਪ੍ਪਜ੍ਜਤਿ. ਚਿਤ੍ਤਂ ਉਪ੍ਪਜ੍ਜਤੀਤਿ ਸਕਦਾਗਾਮਿਸ੍ਸਪਿ ਉਪ੍ਪਜ੍ਜਤਿ, ਕਿਂ ਪਨ ਸੋਤਾਪਨ੍ਨਸ੍ਸ. ਇਮੇ ਦ੍ਵੇ ਅਨਾਗਾਮਿਸ੍ਸ ਪਹੀਨਾਤਿ ਅਟ੍ਠਕਥਾਯਂ ਵੁਤ੍ਤਂ. ਤਸ੍ਮਾ ਇਦਂ ਦ੍ਵਯਂ ਸੋਤਾਪਨ੍ਨਸਕਦਾਗਾਮਿਨੋ ਸਨ੍ਧਾਯ ਵੁਤ੍ਤਨ੍ਤਿ ਵੇਦਿਤਬ੍ਬਂ. ਅਨਾਗਾਮਿਨੋ ਕਾਮਰਾਗਸ੍ਸ ਪਹੀਨਤ੍ਤਾ ‘‘ਅਸੁਭੇ ਸੁਭ’’ਨ੍ਤਿ ਸਞ੍ਞਾਚਿਤ੍ਤਵਿਪਲ੍ਲਾਸਾਨਞ੍ਚ ਪਹਾਨਂ ਵੁਤ੍ਤਨ੍ਤਿ ਵੇਦਿਤਬ੍ਬਂ. ਦ੍ਵੀਸੁ ਵਤ੍ਥੂਸੂਤਿਆਦੀਹਿ ਪਦੇਹਿ ਪਹੀਨਾਪਹੀਨੇ ਨਿਗਮੇਤ੍ਵਾ ਦਸ੍ਸੇਤਿ. ਤਤ੍ਥ ‘‘ਅਨਿਚ੍ਚੇ ਨਿਚ੍ਚ’’ਨ੍ਤਿ, ‘‘ਅਨਤ੍ਤਨਿ ਅਤ੍ਤਾ’’ਤਿ ਇਮੇਸੁ ਦ੍ਵੀਸੁ ਵਤ੍ਥੂਸੁ ਛ ਵਿਪਲ੍ਲਾਸਾ ਪਹੀਨਾ. ‘‘ਦੁਕ੍ਖੇ ਸੁਖ’’ਨ੍ਤਿ, ‘‘ਅਸੁਭੇ ਸੁਭ’’ਨ੍ਤਿ ਇਮੇਸੁ ਦ੍ਵੀਸੁ ਵਤ੍ਥੂਸੁ ਦ੍ਵੇ ਦਿਟ੍ਠਿਵਿਪਲ੍ਲਾਸਾ ਪਹੀਨਾ. ਕੇਸੁਚਿ ਪੋਤ੍ਥਕੇਸੁ ਦ੍ਵੇਤਿ ਪਠਮਂ ਲਿਖਿਤਂ, ਪਚ੍ਛਾ ਛਾਤਿ. ਚਤੂਸੁ ਵਤ੍ਥੂਸੂਤਿ ਚਤ੍ਤਾਰਿ ਏਕਤੋ ਕਤ੍ਵਾ ਵੁਤ੍ਤਂ. ਅਟ੍ਠਾਤਿ ਦ੍ਵੀਸੁ ਛ, ਦ੍ਵੀਸੁ ਦ੍ਵੇਤਿ ਅਟ੍ਠ. ਚਤ੍ਤਾਰੋਤਿ ਦੁਕ੍ਖਾਸੁਭਵਤ੍ਥੂਸੁ ਏਕੇਕਸ੍ਮਿਂ ਦ੍ਵੇ ਦ੍ਵੇ ਸਞ੍ਞਾਚਿਤ੍ਤਵਿਪਲ੍ਲਾਸਾਤਿ ਚਤ੍ਤਾਰੋ. ਕੇਸੁਚਿ ਪੋਤ੍ਥਕੇਸੁ ‘‘ਛ ਦ੍ਵੀਸੂ’’ਤਿ ਵੁਤ੍ਤਟ੍ਠਾਨੇਸੁਪਿ ਏਵਮੇਵ ਲਿਖਿਤਨ੍ਤਿ.

ਵਿਪਲ੍ਲਾਸਕਥਾਵਣ੍ਣਨਾ ਨਿਟ੍ਠਿਤਾ.