੫੫. ਆਸਵਕ੍ਖਯਞਾਣਨਿਦ੍ਦੇਸਵਣ੍ਣਨਾ

੧੦੭. ਆਸਵਕ੍ਖਯਞਾਣਨਿਦ੍ਦੇਸੇ ਅਨਞ੍ਞਾਤਞ੍ਞਸ੍ਸਾਮੀਤਿਨ੍ਦ੍ਰਿਯਾਦੀਨਿ ਵੁਤ੍ਤਤ੍ਥਾਨਿ. ਕਤਿ ਠਾਨਾਨਿ ਗਚ੍ਛਤੀਤਿ ਏਕੇਕਸ੍ਸ ਉਪ੍ਪਤ੍ਤਿਟ੍ਠਾਨਨਿਯਮਨਤ੍ਥਂ ਪੁਚ੍ਛਾ. ਏਕਂ ਠਾਨਂ ਗਚ੍ਛਤੀਤਿ ਏਕਸ੍ਮਿਂ ਠਾਨੇ ਉਪ੍ਪਜ੍ਜਤੀਤਿ ਵੁਤ੍ਤਂ ਹੋਤਿ. ਉਪ੍ਪਤ੍ਤਿਓਕਾਸਟ੍ਠਾਨਞ੍ਹਿ ਤਿਟ੍ਠਤਿ ਏਤ੍ਥਾਤਿ ਠਾਨਨ੍ਤਿ ਵੁਚ੍ਚਤਿ. ਛ ਠਾਨਾਨੀਤਿ ਛ ਮਗ੍ਗਫਲਕ੍ਖਣੇ. ਇਨ੍ਦ੍ਰਿਯਾਨਂ ਅਨਞ੍ਞਾਤਞ੍ਞਸ੍ਸਾਮੀਤਿਨ੍ਦ੍ਰਿਯਾਦੀਸੁ ਤੀਸੁ ਏਕੇਕਮੇਵ ਅਧਿਕਂ ਹੋਤੀਤਿ ਦਸ੍ਸਨਤ੍ਥਂ ਸਦ੍ਧਿਨ੍ਦ੍ਰਿਯਂ ਅਧਿਮੋਕ੍ਖਪਰਿਵਾਰਂ ਹੋਤੀਤਿਆਦਿ ਵੁਤ੍ਤਂ. ਯਥਾ ‘‘ਸਦ੍ਧਿਨ੍ਦ੍ਰਿਯਸ੍ਸ ਅਧਿਮੋਕ੍ਖਟ੍ਠੋ’’ਤਿਆਦੀਸੁ (ਪਟਿ. ਮ. ੧.੧੨) ਅਧਿਮੋਕ੍ਖਾਦਯੋ ਸਦ੍ਧਿਨ੍ਦ੍ਰਿਯਾਦੀਨਂ ਕਿਚ੍ਚਵਸੇਨ ਵੁਤ੍ਤਾ, ਏਵਮਿਧਾਪਿ ‘‘ਅਧਿਮੋਕ੍ਖਪਰਿਵਾਰਂ ਹੋਤੀ’’ਤਿ ਸਦ੍ਧਿਨ੍ਦ੍ਰਿਯਂ ਅਧਿਮੋਕ੍ਖਤ੍ਥੇਨ ਪਰਿਵਾਰਂ ਹੋਤੀਤਿ ਵੁਤ੍ਤਂ ਹੋਤਿ. ਏਸ ਨਯੋ ਸੇਸੇਸੁਪਿ. ਪਰਿਵਾਰਨ੍ਤਿ ਚ ਲਿਙ੍ਗਵਿਪਲ੍ਲਾਸੋ ਕਤੋ. ਪਞ੍ਞਿਨ੍ਦ੍ਰਿਯਨ੍ਤਿ ਅਨਞ੍ਞਾਤਞ੍ਞਸ੍ਸਾਮੀਤਿਨ੍ਦ੍ਰਿਯਮੇਵ ਪਜਾਨਨਸਭਾਵਦਸ੍ਸਨਤ੍ਥਂ ਵਿਸੁਂ ਕਤ੍ਵਾ ਵੁਤ੍ਤਂ. ਅਭਿਧਮ੍ਮੇਪਿ (ਵਿਭ. ੨੧੯) ਹਿ ਪਞ੍ਞਾਯ ਕਿਚ੍ਚਵਿਸੇਸਦਸ੍ਸਨਤ੍ਥਂ ਮਗ੍ਗਕ੍ਖਣੇ ਚ ਫਲਕ੍ਖਣੇ ਚ ਏਕਾਵ ਪਞ੍ਞਾ ਅਟ੍ਠਧਾ ਵਿਭਤ੍ਤਾ. ਅਭਿਸਨ੍ਦਨਪਰਿਵਾਰਨ੍ਤਿ ਨ੍ਹਾਨਿਯਚੁਣ੍ਣਾਨਂ ਉਦਕਂ ਵਿਯ ਚਿਤ੍ਤਚੇਤਸਿਕਾਨਂ ਸਿਨੇਹਨਕਿਚ੍ਚੇਨ ਪਰਿਵਾਰਂ ਹੋਤਿ. ਇਦਂ ਸੋਮਨਸ੍ਸਸਮ੍ਪਯੁਤ੍ਤਮਗ੍ਗਵਸੇਨੇਵ ਵੁਤ੍ਤਂ. ਉਪੇਕ੍ਖਾਸਮ੍ਪਯੁਤ੍ਤਮਗ੍ਗੇ ਪਨ ਸੋਮਨਸ੍ਸਿਨ੍ਦ੍ਰਿਯਟ੍ਠਾਨੇ ਉਪੇਕ੍ਖਿਨ੍ਦ੍ਰਿਯਂ ਦਟ੍ਠਬ੍ਬਂ. ਤਂ ਪਨ ਸਮ੍ਪਯੁਤ੍ਤਾਨਂ ਨਾਤਿਉਪਬ੍ਰੂਹਨਪਰਿਵਾਰਨ੍ਤਿ ਗਹੇਤਬ੍ਬਂ. ਪਵਤ੍ਤਸਨ੍ਤਤਾਧਿਪਤੇਯ੍ਯਪਰਿਵਾਰਨ੍ਤਿ ਪਵਤ੍ਤਾ ਸਨ੍ਤਤਿ ਪਵਤ੍ਤਸਨ੍ਤਤਿ, ਵਤ੍ਤਮਾਨਸਨ੍ਤਾਨਨ੍ਤਿ ਅਤ੍ਥੋ. ਅਧਿਪਤਿਭਾਵੋ ਆਧਿਪਤੇਯ੍ਯਂ, ਪਵਤ੍ਤਸਨ੍ਤਤਿਯਾ ਆਧਿਪਤੇਯ੍ਯਂ ਪਵਤ੍ਤਸਨ੍ਤਤਾਧਿਪਤੇਯ੍ਯਂ. ਵਤ੍ਤਮਾਨਜੀਵਿਤਿਨ੍ਦ੍ਰਿਯਸ੍ਸ ਉਪਰਿਪਵਤ੍ਤਿਯਾ ਚ ਪਚ੍ਚਯਤ੍ਤਾ ਪੁਬ੍ਬਾਪਰਵਸੇਨ ਪਵਤ੍ਤਸਨ੍ਤਤਿਯਾ ਅਧਿਪਤਿਭਾਵੇਨ ਅਨਞ੍ਞਾਤਞ੍ਞਸ੍ਸਾਮੀਤਿਨ੍ਦ੍ਰਿਯਸ੍ਸ ਪਰਿਵਾਰਂ ਹੋਤਿ.

ਸੋਤਾਪਤ੍ਤਿਮਗ੍ਗਕ੍ਖਣੇ ਜਾਤਾ ਧਮ੍ਮਾਤਿਆਦਿ ਸਬ੍ਬੇਸਂ ਮਗ੍ਗਸਮ੍ਪਯੁਤ੍ਤਕਾਨਂ ਵਣ੍ਣਭਣਨਤ੍ਥਂ ਵੁਤ੍ਤਂ. ਤਤ੍ਥ ਮਗ੍ਗਕ੍ਖਣੇ ਜਾਤਾਤਿ ਮਗ੍ਗਸਮੁਟ੍ਠਿਤਾ ਏਵ, ਨ ਅਞ੍ਞੇ. ਯਸ੍ਮਾ ਪਨ ਮਗ੍ਗਸਮੁਟ੍ਠਿਤਮ੍ਪਿ ਰੂਪਂ ਕੁਸਲਾਦਿਨਾਮਂ ਨ ਲਭਤਿ, ਤਸ੍ਮਾ ਤਂ ਅਪਨੇਨ੍ਤੋ ਠਪੇਤ੍ਵਾ ਚਿਤ੍ਤਸਮੁਟ੍ਠਾਨਂ ਰੂਪਨ੍ਤਿ ਆਹ. ਸਬ੍ਬੇਵ ਹਿ ਤੇ ਧਮ੍ਮਾ ਕੁਚ੍ਛਿਤਾਨਂ ਸਲਨਾਦੀਹਿ ਅਤ੍ਥੇਹਿ ਕੁਸਲਾ. ਤੇ ਆਰਮ੍ਮਣਂ ਕਤ੍ਵਾ ਪਵਤ੍ਤਮਾਨਾ ਨਤ੍ਥਿ ਏਤੇਸਂ ਆਸਵਾਤਿ ਅਨਾਸਵਾ. ਵਟ੍ਟਮੂਲਂ ਛਿਨ੍ਦਨ੍ਤਾ ਨਿਬ੍ਬਾਨਂ ਆਰਮ੍ਮਣਂ ਕਤ੍ਵਾ ਵਟ੍ਟਤੋ ਨਿਯ੍ਯਨ੍ਤੀਤਿ ਨਿਯ੍ਯਾਨਿਕਾ. ਕੁਸਲਾਕੁਸਲਸਙ੍ਖਾਤਾ ਚਯਾ ਅਪੇਤਤ੍ਤਾ ਅਪਚਯਸਙ੍ਖਾਤਂ ਨਿਬ੍ਬਾਨਂ ਆਰਮ੍ਮਣਂ ਕਤ੍ਵਾ ਪਵਤ੍ਤਨਤੋ ਅਪਚਯਂ ਗਚ੍ਛਨ੍ਤੀਤਿ ਅਪਚਯਗਾਮਿਨੋ, ਪਵਤ੍ਤਂ ਅਪਚਿਨਨ੍ਤਾ ਵਿਦ੍ਧਂਸੇਨ੍ਤਾ ਗਚ੍ਛਨ੍ਤੀਤਿਪਿ ਅਪਚਯਗਾਮਿਨੋ. ਲੋਕੇ ਅਪਰਿਯਾਪਨ੍ਨਭਾਵੇਨ ਲੋਕਤੋ ਉਤ੍ਤਰਾ ਉਤ੍ਤਿਣ੍ਣਾਤਿ ਲੋਕੁਤ੍ਤਰਾ. ਨਿਬ੍ਬਾਨਂ ਆਰਮ੍ਮਣਂ ਏਤੇਸਨ੍ਤਿ ਨਿਬ੍ਬਾਨਾਰਮ੍ਮਣਾ.

ਇਮਾਨਿ ਅਟ੍ਠਿਨ੍ਦ੍ਰਿਯਾਨੀਤਿਆਦਿ ਪੁਬ੍ਬੇ ਵੁਤ੍ਤਪਰਿਵਾਰਭਾਵਸ੍ਸ ਚ ਤੇਨ ਸਹਗਤਾਦਿਭਾਵਸ੍ਸ ਚ ਆਦਿਵੁਤ੍ਤਆਕਾਰਾਨਞ੍ਚ ਦੀਪਨਤ੍ਥਂ ਵੁਤ੍ਤਂ. ਤਤ੍ਥ ਅਟ੍ਠਿਨ੍ਦ੍ਰਿਯਾਨੀਤਿ ਪੁਬ੍ਬੇ ਵੁਤ੍ਤਨਯੇਨ ਪਞ੍ਞਿਨ੍ਦ੍ਰਿਯੇਨ ਸਹ ਅਟ੍ਠ. ਸਹਜਾਤਪਰਿਵਾਰਾਤਿ ਅਟ੍ਠਸੁ ਏਕੇਕੇਨ ਸਹ ਇਤਰੇ ਇਤਰੇ ਸਤ੍ਤ ਸਹਜਾਤਾ ਹੁਤ੍ਵਾ ਤਸ੍ਸ ਸਹਜਾਤਪਰਿਵਾਰਾ ਹੋਨ੍ਤਿ. ਤਥੇਵ ਅਞ੍ਞਂ ਅਞ੍ਞਸ੍ਸ ਅਞ੍ਞਂ ਅਞ੍ਞਸ੍ਸਾਤਿ ਏਵਂ ਅਞ੍ਞਮਞ੍ਞਪਰਿਵਾਰਾ ਹੋਨ੍ਤਿ. ਤਥੇਵ ਅਞ੍ਞਮਞ੍ਞਂ ਨਿਸ੍ਸਯਪਰਿਵਾਰਾ ਸਮ੍ਪਯੁਤ੍ਤਪਰਿਵਾਰਾ ਚ ਹੋਨ੍ਤਿ. ਸਹਗਤਾਤਿ ਤੇਨ ਅਨਞ੍ਞਾਤਞ੍ਞਸ੍ਸਾਮੀਤਿਨ੍ਦ੍ਰਿਯੇਨ ਸਹ ਏਕੁਪ੍ਪਾਦਾਦਿਭਾਵਂ ਗਤਾ. ਸਹਜਾਤਾਤਿ ਤੇਨੇਵ ਸਹ ਜਾਤਾ. ਸਂਸਟ੍ਠਾਤਿ ਤੇਨੇਵ ਸਹ ਮਿਸ੍ਸਿਤਾ. ਸਮ੍ਪਯੁਤ੍ਤਾਤਿ ਤੇਨੇਵ ਸਮਂ ਏਕੁਪ੍ਪਾਦਾਦਿਪਕਾਰੇਹਿ ਯੁਤ੍ਤਾ. ਤੇਵਾਤਿ ਤੇ ਏਵ ਅਟ੍ਠ ਇਨ੍ਦ੍ਰਿਯਧਮ੍ਮਾ. ਤਸ੍ਸਾਤਿ ਅਨਞ੍ਞਾਤਞ੍ਞਸ੍ਸਾਮੀਤਿਨ੍ਦ੍ਰਿਯਸ੍ਸ. ਆਕਾਰਾਤਿ ਪਰਿਵਾਰਕੋਟ੍ਠਾਸਾ.

ਫਲਕ੍ਖਣੇ ਜਾਤਾ ਧਮ੍ਮਾ ਸਬ੍ਬੇਵ ਅਬ੍ਯਾਕਤਾ ਹੋਨ੍ਤੀਤਿ ਰੂਪਸ੍ਸਪਿ ਅਬ੍ਯਾਕਤਤ੍ਤਾ ਚਿਤ੍ਤਸਮੁਟ੍ਠਾਨਰੂਪੇਨ ਸਹ ਵੁਤ੍ਤਾ. ਮਗ੍ਗਸ੍ਸੇਵ ਕੁਸਲਤ੍ਤਾ ਨਿਯ੍ਯਾਨਿਕਤ੍ਤਾ ਅਪਚਯਗਾਮਿਤ੍ਤਾ ਚ ਫਲਕ੍ਖਣੇ ‘‘ਕੁਸਲਾ’’ਤਿ ਚ ‘‘ਨਿਯ੍ਯਾਨਿਕਾ’’ਤਿ ਚ ‘‘ਅਪਚਯਗਾਮਿਨੋ’’ਤਿ ਚ ਨ ਵੁਤ੍ਤਂ. ਇਤੀਤਿਆਦਿ ਵੁਤ੍ਤਪ੍ਪਕਾਰਨਿਗਮਨਂ. ਤਤ੍ਥ ਅਟ੍ਠਟ੍ਠਕਾਨੀਤਿ ਅਟ੍ਠਸੁ ਮਗ੍ਗਫਲੇਸੁ ਏਕੇਕਸ੍ਸ ਅਟ੍ਠਕਸ੍ਸ ਵਸੇਨ ਅਟ੍ਠ ਇਨ੍ਦ੍ਰਿਯਅਟ੍ਠਕਾਨਿ. ਚਤੁਸਟ੍ਠਿ ਹੋਨ੍ਤੀਤਿ ਚਤੁਸਟ੍ਠਿ ਆਕਾਰਾ ਹੋਨ੍ਤਿ. ਆਸਵਾਤਿਆਦਿ ਹੇਟ੍ਠਾ ਵੁਤ੍ਤਤ੍ਥਮੇਵ. ਇਧ ਅਰਹਤ੍ਤਮਗ੍ਗਵਜ੍ਝੇਯੇਵ ਆਸਵੇ ਅਵਤ੍ਵਾ ਸੇਸਮਗ੍ਗਤ੍ਤਯਵਜ੍ਝਾਨਮ੍ਪਿ ਵਚਨਂ ਆਸਵਕ੍ਖਯਵਚਨਸਾਮਞ੍ਞਮਤ੍ਤੇਨ ਵੁਤ੍ਤਨ੍ਤਿ ਵੇਦਿਤਬ੍ਬਂ. ਅਰਹਤ੍ਤਮਗ੍ਗਞਾਣਮੇਵ ਹਿ ਕੇਚਿ ਆਸਵੇ ਅਸੇਸੇਤ੍ਵਾ ਆਸਵਾਨਂ ਖੇਪਨਤੋ ‘‘ਖਯੇ ਞਾਣ’’ਨ੍ਤਿ ਵੁਚ੍ਚਤਿ. ਤਸ੍ਮਾਯੇਵ ਚ ਅਰਹਾਯੇਵ ਖੀਣਾਸਵੋਤਿ ਵੁਚ੍ਚਤੀਤਿ.

ਆਸਵਕ੍ਖਯਞਾਣਨਿਦ੍ਦੇਸਵਣ੍ਣਨਾ ਨਿਟ੍ਠਿਤਾ.