੫੧. ਸੋਤਧਾਤੁਵਿਸੁਦ੍ਧਿਞਾਣਨਿਦ੍ਦੇਸਵਣ੍ਣਨਾ
੧੦੩. ਸੋਤਧਾਤੁਵਿਸੁਦ੍ਧਿਞਾਣਨਿਦ੍ਦੇਸੇ ਦੂਰੇਪਿ ਸਦ੍ਦਾਨਨ੍ਤਿਆਦਿ ਦਿਬ੍ਬਸੋਤਂ ਉਪ੍ਪਾਦੇਤੁਕਾਮਸ੍ਸ ਆਦਿਕਮ੍ਮਿਕਸ੍ਸ ਭਿਕ੍ਖੁਨੋ ਉਪਾਯਸਨ੍ਦਸ੍ਸਨਤ੍ਥਂ ਵੁਤ੍ਤਂ. ਤਤ੍ਥ ਦੂਰੇਪਿ ਸਦ੍ਦਾਨਂ ਸਦ੍ਦਨਿਮਿਤ੍ਤਨ੍ਤਿ ਦੂਰੇ ਸਦ੍ਦਾਨਂ ਅਨ੍ਤਰੇ ਸਦ੍ਦਂ. ਸਦ੍ਦੋਯੇਵ ਹਿ ਨਿਮਿਤ੍ਤਕਰਣਵਸੇਨ ਸਦ੍ਦਨਿਮਿਤ੍ਤਂ. ‘‘ਦੂਰੇ’’ਤਿ ਵੁਤ੍ਤੇਪਿ ਪਕਤਿਸੋਤਸ੍ਸ ਆਪਾਥਟ੍ਠਾਨੇਯੇਵ. ਓਲ਼ਾਰਿਕਾਨਨ੍ਤਿ ਥੂਲਾਨਂ. ਸੁਖੁਮਾਨਨ੍ਤਿ ਅਣੂਨਂ. ਸਣ੍ਹਸਣ੍ਹਾਨਨ੍ਤਿ ਸਣ੍ਹਤੋਪਿ ਸਣ੍ਹਾਨਂ, ਅਤਿਸਣ੍ਹਾਨਨ੍ਤਿ ਅਤ੍ਥੋ. ਏਤੇਨ ਪਰਮਸੁਖੁਮਾ ਸਦ੍ਦਾ ਵੁਤ੍ਤਾ ਹੋਨ੍ਤਿ. ਇਮਂ ਞਾਣਂ ਉਪ੍ਪਾਦੇਤੁਕਾਮੇਨ ਆਦਿਕਮ੍ਮਿਕੇਨ ਝਾਯਿਨਾ ਅਭਿਞ੍ਞਾਪਾਦਕਜ੍ਝਾਨਂ ਸਮਾਪਜ੍ਜਿਤ੍ਵਾ ਵੁਟ੍ਠਾਯ ਪਰਿਕਮ੍ਮਸਮਾਧਿਚਿਤ੍ਤੇਨ ਪਠਮਤਰਂ ਪਕਤਿਸੋਤਪਥੇ ਦੂਰੇ ਓਲ਼ਾਰਿਕੋ ਅਰਞ੍ਞੇ ਸੀਹਾਦੀਨਂ ਸਦ੍ਦੋ ਆਵਜ੍ਜਿਤਬ੍ਬੋ. ਵਿਹਾਰੇ ਘਣ੍ਡਿਸਦ੍ਦੋ ਭੇਰਿਸਦ੍ਦੋ ਸਙ੍ਖਸਦ੍ਦੋ ਸਾਮਣੇਰਦਹਰਭਿਕ੍ਖੂਨਂ ਸਬ੍ਬਥਾਮੇਨ ਸਜ੍ਝਾਯਨ੍ਤਾਨਂ ਸਜ੍ਝਾਯਨਸਦ੍ਦੋ ਪਕਤਿਕਥਂ ਕਥੇਨ੍ਤਾਨਂ ‘‘ਕਿਂ, ਭਨ੍ਤੇ, ਕਿਂ, ਆਵੁਸੋ’’ਤਿਆਦਿਸਦ੍ਦੋ ਸਕੁਣਸਦ੍ਦੋ ਵਾਤਸਦ੍ਦੋ ਪਦਸਦ੍ਦੋ ਪਕ੍ਕੁਥਿਤਉਦਕਸ੍ਸ ਚਿਚ੍ਚਿਟਾਯਨਸਦ੍ਦੋ ਆਤਪੇ ਸੁਸ੍ਸਮਾਨਤਾਲਪਣ੍ਣਸਦ੍ਦੋ ਕੁਨ੍ਥਕਿਪਿਲ੍ਲਿਕਾਦਿਸਦ੍ਦੋਤਿ ਏਵਂ ਸਬ੍ਬੋਲ਼ਾਰਿਕਤੋ ਪਭੁਤਿ ਯਥਾਕ੍ਕਮੇਨ ਸੁਖੁਮਸੁਖੁਮਸਦ੍ਦਾ ਆਵਜ੍ਜਿਤਬ੍ਬਾ.
ਏਵਂ ਕਰੋਨ੍ਤੇਨ ਚ ਪੁਰਤ੍ਥਿਮਾਦੀਸੁ ਦਸਸੁ ਦਿਸਾਸੁ ਕਮੇਨ ਏਕੇਕਿਸ੍ਸਾ ਦਿਸਾਯ ਸਦ੍ਦਨਿਮਿਤ੍ਤਂ ਵੁਤ੍ਤਨਯੇਨ ਮਨਸਿ ਕਾਤਬ੍ਬਂ. ਮਨਸਿ ਕਰੋਨ੍ਤੇਨ ਚ ਯੇ ਸਦ੍ਦਾ ਪਕਤਿਸੋਤਸ੍ਸ ਸੁਯ੍ਯਨ੍ਤਿ, ਤੇਸੁ ਪਕਤਿਸੋਤਮੋਧਾਯ ਮਨੋਦ੍ਵਾਰਿਕੇਨ ਚਿਤ੍ਤੇਨ ਮਨਸਿ ਕਾਤਬ੍ਬਂ. ਤਸ੍ਸ ਤੇ ਸਦ੍ਦਾ ਪਕਤਿਚਿਤ੍ਤਸ੍ਸਾਪਿ ਪਾਕਟਾ ਹੋਨ੍ਤਿ, ਪਰਿਕਮ੍ਮਸਮਾਧਿਚਿਤ੍ਤਸ੍ਸ ਪਨ ਅਤਿਵਿਯ ਪਾਕਟਾ ਹੋਨ੍ਤਿ. ਤਸ੍ਸੇਵਂ ਸਦ੍ਦਨਿਮਿਤ੍ਤਂ ਮਨਸਿਕਰੋਤੋ ਇਦਾਨਿ ਦਿਬ੍ਬਸੋਤਧਾਤੁ ਉਪ੍ਪਜ੍ਜਿਸ੍ਸਤੀਤਿ ਤੇਸੁ ਸਦ੍ਦੇਸੁ ਅਞ੍ਞਤਰਂ ਆਰਮ੍ਮਣਂ ਕਤ੍ਵਾ ਮਨੋਦ੍ਵਾਰਾਵਜ੍ਜਨਂ ਉਪ੍ਪਜ੍ਜਤਿ, ਤਸ੍ਮਿਂ ਨਿਰੁਦ੍ਧੇ ਚਤ੍ਤਾਰਿ ਪਞ੍ਚ ਵਾ ਜਵਨਾਨਿ ਜਵਨ੍ਤਿ. ਯੇਸਂ ਪੁਰਿਮਾਨਿ ਤੀਣਿ ਚਤ੍ਤਾਰਿ ਵਾ ਪਰਿਕਮ੍ਮੋਪਚਾਰਾਨੁਲੋਮਗੋਤ੍ਰਭੁਨਾਮਕਾਨਿ ਕਾਮਾਵਚਰਾਨਿ, ਚਤੁਤ੍ਥਂ ਪਞ੍ਚਮਂ ਵਾ ਅਪ੍ਪਨਾਚਿਤ੍ਤਂ ਰੂਪਾਵਚਰਚਤੁਤ੍ਥਜ੍ਝਾਨਿਕਂ. ਤਤ੍ਥ ਯਂ ਤੇਨ ਅਪ੍ਪਨਾਚਿਤ੍ਤੇਨ ਸਦ੍ਧਿਂ ਉਪ੍ਪਨ੍ਨਂ ਞਾਣਂ, ਅਯਂ ਦਿਬ੍ਬਸੋਤਧਾਤੁ. ਤਂ ਥਾਮਗਤਂ ਕਰੋਨ੍ਤੇਨ ‘‘ਏਤ੍ਥਨ੍ਤਰੇ ਸਦ੍ਦਂ ਸੁਣਾਮੀ’’ਤਿ ਏਕਙ੍ਗੁਲਮਤ੍ਤਂ ਪਰਿਚ੍ਛਿਨ੍ਦਿਤ੍ਵਾ ਵਡ੍ਢੇਤਬ੍ਬਂ, ਤਤੋ ਦ੍ਵਙ੍ਗੁਲਚਤੁਰਙ੍ਗੁਲਅਟ੍ਠਙ੍ਗੁਲਵਿਦਤ੍ਥਿਰਤਨਅਨ੍ਤੋਗਬ੍ਭਪਮੁਖ- ਪਾਸਾਦਪਰਿਵੇਣਸਙ੍ਘਾਰਾਮਗੋਚਰਗਾਮਜਨਪਦਾਦਿਵਸੇਨ ਯਾਵ ਚਕ੍ਕਵਾਲ਼ਂ, ਤਤੋ ਵਾ ਭਿਯ੍ਯੋਪਿ ਪਰਿਚ੍ਛਿਨ੍ਦਿਤ੍ਵਾ ਪਰਿਚ੍ਛਿਨ੍ਦਿਤ੍ਵਾ ਵਡ੍ਢੇਤਬ੍ਬਂ. ਏਵਂ ਅਧਿਗਤਾਭਿਞ੍ਞੋ ਏਸ ਪਾਦਕਜ੍ਝਾਨਾਰਮ੍ਮਣੇਨ ਫੁਟ੍ਠੋਕਾਸਬ੍ਭਨ੍ਤਰਗਤੇ ਸਦ੍ਦੇ ਪੁਨ ਪਾਦਕਜ੍ਝਾਨਂ ਅਸਮਾਪਜ੍ਜਿਤ੍ਵਾਪਿ ਅਭਿਞ੍ਞਾਞਾਣੇਨ ਸੁਣਾਤਿਯੇਵ. ਏਵਂ ਸੁਣਨ੍ਤੋ ਚ ਸਚੇਪਿ ਯਾਵਬ੍ਰਹ੍ਮਲੋਕਾ ਸਙ੍ਖਭੇਰਿਪਣਵਾਦਿਸਦ੍ਦੇਹਿ ਏਕਕੋਲਾਹਲਂ ਹੋਤਿ, ਪਾਟਿਯੇਕ੍ਕਂ ਵਵਤ੍ਥਾਪੇਤੁਕਾਮਤਾਯ ਸਤਿ ‘‘ਅਯਂ ਸਙ੍ਖਸਦ੍ਦੋ, ਅਯਂ ਭੇਰਿਸਦ੍ਦੋ’’ਤਿ ਵਵਤ੍ਥਾਪੇਤੁਂ ਸਕ੍ਕੋਤਿਯੇਵ. ਅਭਿਞ੍ਞਾਞਾਣੇਨ ਸੁਤੇ ਸਾਤ੍ਥਕੇ ਸਦ੍ਦੇ ਪਚ੍ਛਾ ਕਾਮਾਵਚਰਚਿਤ੍ਤੇਨ ਅਤ੍ਥਂ ਜਾਨਾਤਿ. ਦਿਬ੍ਬਸੋਤਂ ਪਕਤਿਸੋਤਵਤੋਯੇਵ ਉਪ੍ਪਜ੍ਜਤਿ, ਨੋ ਬਧਿਰਸ੍ਸ. ਪਚ੍ਛਾ ਪਕਤਿਸੋਤੇ ਵਿਨਟ੍ਠੇਪਿ ਦਿਬ੍ਬਸੋਤਂ ਨ ਵਿਨਸ੍ਸਤੀਤਿ ਵਦਨ੍ਤਿ.
ਸੋ ਦਿਬ੍ਬਾਯ ਸੋਤਧਾਤੁਯਾਤਿ ਏਤ੍ਥ ਦਿਬ੍ਬਸਦਿਸਤ੍ਤਾ ਦਿਬ੍ਬਾ. ਦੇਵਾਨਞ੍ਹਿ ਸੁਚਰਿਤਕਮ੍ਮਾਭਿਨਿਬ੍ਬਤ੍ਤਾ ਪਿਤ੍ਤਸੇਮ੍ਹਰੁਧਿਰਾਦੀਹਿ ਅਪਲਿਬੁਦ੍ਧਾ ਉਪਕ੍ਕਿਲੇਸਵਿਮੁਤ੍ਤਤਾਯ ਦੂਰੇਪਿ ਆਰਮ੍ਮਣਸਮ੍ਪਟਿਚ੍ਛਨਸਮਤ੍ਥਾ ਦਿਬ੍ਬਾ ਪਸਾਦਸੋਤਧਾਤੁ ਹੋਤਿ. ਅਯਞ੍ਚਾਪਿ ਇਮਸ੍ਸ ਭਿਕ੍ਖੁਨੋ ਵੀਰਿਯਭਾਵਨਾਬਲਨਿਬ੍ਬਤ੍ਤਾ ਞਾਣਸੋਤਧਾਤੁ ਤਾਦਿਸਾਯੇਵਾਤਿ ਦਿਬ੍ਬਸਦਿਸਤ੍ਤਾ ਦਿਬ੍ਬਾ. ਅਪਿਚ ਦਿਬ੍ਬਵਿਹਾਰਵਸੇਨ ਪਟਿਲਦ੍ਧਤ੍ਤਾ, ਅਤ੍ਤਨਾ ਚ ਦਿਬ੍ਬਵਿਹਾਰਸਨ੍ਨਿਸ੍ਸਿਤਤ੍ਤਾਪਿ ਦਿਬ੍ਬਾ, ਸਵਨਟ੍ਠੇਨ ਨਿਜ੍ਜੀਵਟ੍ਠੇਨ ਚ ਸੋਤਧਾਤੁ, ਸੋਤਧਾਤੁਕਿਚ੍ਚਕਰਣੇਨ ਚ ਸੋਤਧਾਤੁ ਵਿਯਾਤਿਪਿ ਸੋਤਧਾਤੁ. ਤਾਯ ਦਿਬ੍ਬਾਯ ਸੋਤਧਾਤੁਯਾ. ਵਿਸੁਦ੍ਧਾਯਾਤਿ ਪਰਿਸੁਦ੍ਧਾਯ ਨਿਰੁਪਕ੍ਕਿਲੇਸਾਯ. ਅਤਿਕ੍ਕਨ੍ਤਮਾਨੁਸਿਕਾਯਾਤਿ ਮਨੁਸ੍ਸੂਪਚਾਰਂ ਅਤਿਕ੍ਕਮਿਤ੍ਵਾ ਸਦ੍ਦਸਵਨੇਨ ਮਾਨੁਸਿਕਂ ਮਂਸਸੋਤਧਾਤੁਂ ਅਤਿਕ੍ਕਨ੍ਤਾਯ ਵੀਤਿਵਤ੍ਤਿਤ੍ਵਾ ਠਿਤਾਯ. ਉਭੋ ਸਦ੍ਦੇ ਸੁਣਾਤੀਤਿ ਦ੍ਵੇ ਸਦ੍ਦੇ ਸੁਣਾਤਿ. ਕਤਮੇ ਦ੍ਵੇ? ਦਿਬ੍ਬੇ ਚ ਮਾਨੁਸੇ ਚ, ਦੇਵਾਨਞ੍ਚ ਮਨੁਸ੍ਸਾਨਞ੍ਚ ਸਦ੍ਦੇਤਿ ਵੁਤ੍ਤਂ ਹੋਤਿ. ਏਤੇਨ ਪਦੇਸਪਰਿਯਾਦਾਨਂ ਵੇਦਿਤਬ੍ਬਂ. ਯੇ ਦੂਰੇ ਸਨ੍ਤਿਕੇ ਚਾਤਿ ਯੇ ਸਦ੍ਦਾ ਦੂਰੇ ਪਰਚਕ੍ਕਵਾਲ਼ੇਪਿ, ਯੇ ਚ ਸਨ੍ਤਿਕੇ ਅਨ੍ਤਮਸੋ ਸਦੇਹਸਨ੍ਨਿਸ੍ਸਿਤਪਾਣਕਸਦ੍ਦਾਪਿ, ਤੇ ਸੁਣਾਤੀਤਿ ਵੁਤ੍ਤਂ ਹੋਤਿ. ਏਤੇਨ ਨਿਪ੍ਪਦੇਸਪਰਿਯਾਦਾਨਂ ਵੇਦਿਤਬ੍ਬਨ੍ਤਿ.
ਸੋਤਧਾਤੁਵਿਸੁਦ੍ਧਿਞਾਣਨਿਦ੍ਦੇਸਵਣ੍ਣਨਾ ਨਿਟ੍ਠਿਤਾ.