੪੩. ਪਦੇਸਵਿਹਾਰਞਾਣਨਿਦ੍ਦੇਸਵਣ੍ਣਨਾ

੯੪. ਪਦੇਸਵਿਹਾਰਞਾਣਨਿਦ੍ਦੇਸੇ ਯੇਨਾਕਾਰੇਨ ਮਾਤਿਕਾਯ ਉਦ੍ਦਿਟ੍ਠੋ ਪਦੇਸੋ ਪਚ੍ਚਵੇਕ੍ਖਿਤਬ੍ਬੋ, ਤਂ ਦਸ੍ਸੇਨ੍ਤੋ ਮਿਚ੍ਛਾਦਿਟ੍ਠਿਪਚ੍ਚਯਾਪਿ ਵੇਦਯਿਤਨ੍ਤਿਆਦਿਮਾਹ. ਤਤ੍ਥ ਮਿਚ੍ਛਾਦਿਟ੍ਠਿਪਚ੍ਚਯਾਤਿ ਦਿਟ੍ਠਿਸਮ੍ਪਯੁਤ੍ਤਵੇਦਨਾਪਿ ਵਟ੍ਟਤਿ ਦਿਟ੍ਠਿਂ ਉਪਨਿਸ੍ਸਯਂ ਕਤ੍ਵਾ ਉਪ੍ਪਨ੍ਨਾ ਕੁਸਲਾਕੁਸਲਵੇਦਨਾਪਿ ਵਿਪਾਕਵੇਦਨਾਪਿ. ਤਤ੍ਥ ਮਿਚ੍ਛਾਦਿਟ੍ਠਿਸਮ੍ਪਯੁਤ੍ਤਾ ਅਕੁਸਲਾਵ ਹੋਤਿ, ਦਿਟ੍ਠਿਂ ਪਨ ਉਪਨਿਸ੍ਸਾਯ ਕੁਸਲਾਪਿ ਉਪ੍ਪਜ੍ਜਨ੍ਤਿ ਅਕੁਸਲਾਪਿ. ਮਿਚ੍ਛਾਦਿਟ੍ਠਿਕਾ ਹਿ ਦਿਟ੍ਠਿਂ ਉਪਨਿਸ੍ਸਾਯ ਪਕ੍ਖਦਿਵਸੇਸੁ ਯਾਗੁਭਤ੍ਤਾਦੀਨਿ ਦੇਨ੍ਤਿ, ਅਨ੍ਧਕੁਟ੍ਠਿਆਦੀਨਂ ਵਤ੍ਤਂ ਪਟ੍ਠਪੇਨ੍ਤਿ, ਚਤੁਮਹਾਪਥੇ ਸਾਲਂ ਕਰੋਨ੍ਤਿ, ਪੋਕ੍ਖਰਣਿਂ ਖਣਾਪੇਨ੍ਤਿ, ਪੁਪ੍ਫਾਰਾਮਂ ਫਲਾਰਾਮਂ ਰੋਪੇਨ੍ਤਿ, ਨਦੀਵਿਦੁਗ੍ਗੇਸੁ ਸੇਤੁਂ ਅਤ੍ਥਰਨ੍ਤਿ, ਵਿਸਮਂ ਸਮਂ ਕਰੋਨ੍ਤਿ. ਇਤਿ ਤੇਸਂ ਕੁਸਲਾ ਵੇਦਨਾ ਉਪ੍ਪਜ੍ਜਤਿ. ਮਿਚ੍ਛਾਦਿਟ੍ਠਿਂ ਪਨ ਨਿਸ੍ਸਾਯ ਸਮ੍ਮਾਦਿਟ੍ਠਿਕੇ ਅਕ੍ਕੋਸਨ੍ਤਿ ਪਰਿਭਾਸਨ੍ਤਿ ਵਧਬਨ੍ਧਾਦੀਨਿ ਕਰੋਨ੍ਤਿ, ਪਾਣਂ ਵਧਿਤ੍ਵਾ ਦੇਵਤਾਨਂ ਉਪਹਰਨ੍ਤਿ. ਇਤਿ ਨੇਸਂ ਅਕੁਸਲਾ ਵੇਦਨਾ ਉਪ੍ਪਜ੍ਜਤਿ. ਵਿਪਾਕਵੇਦਨਾ ਪਨ ਭਵਨ੍ਤਰਗਤਾਨਂ ਹੋਤਿ. ਸਾ ਪਨ ਮਿਚ੍ਛਾਦਿਟ੍ਠਿ ਸਹਜਾਤਾਯ ਵੇਦਨਾਯ ਸਹਜਾਤਅਞ੍ਞਮਞ੍ਞਨਿਸ੍ਸਯਸਮ੍ਪਯੁਤ੍ਤਅਤ੍ਥਿਅਵਿਗਤਪਚ੍ਚਯੇਹਿ ਪਚ੍ਚਯੋ ਹੋਤਿ, ਸਮਨਨ੍ਤਰਨਿਰੁਦ੍ਧਾ ਮਿਚ੍ਛਾਦਿਟ੍ਠਿ ਪਚ੍ਚੁਪ੍ਪਨ੍ਨਮਿਚ੍ਛਾਦਿਟ੍ਠਿਸਮ੍ਪਯੁਤ੍ਤਾਯ ਵੇਦਨਾਯ ਅਨਨ੍ਤਰਸਮਨਨ੍ਤਰੂਪਨਿਸ੍ਸਯਆਸੇਵਨਨਤ੍ਥਿਵਿਗਤਪਚ੍ਚਯੇਹਿ ਪਚ੍ਚਯੋ ਹੋਤਿ, ਮਿਚ੍ਛਾਦਿਟ੍ਠਿਂ ਗਰੁਂ ਕਤ੍ਵਾ ਅਭਿਨਨ੍ਦਨ੍ਤਸ੍ਸ ਲੋਭਸਹਗਤਵੇਦਨਾਯ ਆਰਮ੍ਮਣਆਰਮ੍ਮਣਾਧਿਪਤਿਆਰਮ੍ਮਣੂਪਨਿਸ੍ਸਯਪਚ੍ਚਯੇਹਿ ਪਚ੍ਚਯੋ ਹੋਤਿ, ਸਬ੍ਬਾਕੁਸਲੇਹਿ ਮਿਚ੍ਛਾਦਿਟ੍ਠਿਂ ਆਰਮ੍ਮਣਮਤ੍ਤਂ ਕਰੋਨ੍ਤਸ੍ਸ ਸਬ੍ਬਾਕੁਸਲਵੇਦਨਾਯ ਮਿਚ੍ਛਾਦਿਟ੍ਠਿਂ ਪਚ੍ਚਵੇਕ੍ਖਨ੍ਤਸ੍ਸ ਵਿਪਸ੍ਸਨ੍ਤਸ੍ਸ ਕੁਸਲਾਬ੍ਯਾਕਤਵੇਦਨਾਯ ਆਰਮ੍ਮਣਪਚ੍ਚਯੇਨ ਪਚ੍ਚਯੋ ਹੋਤਿ, ਮਿਚ੍ਛਾਦਿਟ੍ਠਿਪਚ੍ਚਯੇਨ ਉਪ੍ਪਜ੍ਜਮਾਨਾਨਂ ਕੁਸਲਾਕੁਸਲਵੇਦਨਾਨਂ ਭਵਨ੍ਤਰੇ ਵਿਪਾਕਵੇਦਨਾਨਞ੍ਚ ਉਪਨਿਸ੍ਸਯਪਚ੍ਚਯੇਨ ਪਚ੍ਚਯੋ ਹੋਤਿ.

ਮਿਚ੍ਛਾਦਿਟ੍ਠਿਵੂਪਸਮਪਚ੍ਚਯਾਤਿ ਮਿਚ੍ਛਾਦਿਟ੍ਠਿਵੂਪਸਮੋ ਨਾਮ ਸਮ੍ਮਾਦਿਟ੍ਠਿ, ਤਸ੍ਮਾ ਯਂ ਸਮ੍ਮਾਦਿਟ੍ਠਿਪਚ੍ਚਯਾ ਵੇਦਯਿਤਂ ਵੁਤ੍ਤਂ, ਤਦੇਵ ‘‘ਮਿਚ੍ਛਾਦਿਟ੍ਠਿਵੂਪਸਮਪਚ੍ਚਯਾ’’ਤਿ ਵੇਦਿਤਬ੍ਬਂ. ਕੇਚਿ ਪਨ ‘‘ਮਿਚ੍ਛਾਦਿਟ੍ਠਿਵੂਪਸਮੋ ਨਾਮ ਵਿਪਸ੍ਸਨਾਕ੍ਖਣੇ ਸੋਤਾਪਤ੍ਤਿਮਗ੍ਗਕ੍ਖਣੇ ਚਾ’’ਤਿ ਵਦਨ੍ਤਿ.

ਸਮ੍ਮਾਦਿਟ੍ਠਿਪਚ੍ਚਯਾਪਿ ਵੇਦਯਿਤਨ੍ਤਿ ਏਤ੍ਥਾਪਿ ਸਮ੍ਮਾਦਿਟ੍ਠਿਸਮ੍ਪਯੁਤ੍ਤਵੇਦਨਾਪਿ ਵਟ੍ਟਤਿ ਸਮ੍ਮਾਦਿਟ੍ਠਿਂ ਉਪਨਿਸ੍ਸਯਂ ਕਤ੍ਵਾ ਉਪ੍ਪਨ੍ਨਾ ਕੁਸਲਾਕੁਸਲਵੇਦਨਾਪਿ ਵਿਪਾਕਵੇਦਨਾਪਿ. ਤਤ੍ਥ ਸਮ੍ਮਾਦਿਟ੍ਠਿਸਮ੍ਪਯੁਤ੍ਤਾ ਕੁਸਲਾਵ ਹੋਤਿ, ਸਮ੍ਮਾਦਿਟ੍ਠਿਂ ਪਨ ਉਪਨਿਸ੍ਸਾਯ ਬੁਦ੍ਧਪੂਜਾ ਦੀਪਮਾਲਾਰੋਪਨਂ ਮਹਾਧਮ੍ਮਸ੍ਸਵਨਂ ਅਪ੍ਪਤਿਟ੍ਠਿਤੇ ਦਿਸਾਭਾਗੇ ਚੇਤਿਯਪਤਿਟ੍ਠਾਪਨਨ੍ਤਿ ਏਵਮਾਦੀਨਿ ਪੁਞ੍ਞਾਨਿ ਕਰੋਨ੍ਤਿ. ਇਤਿ ਨੇਸਂ ਕੁਸਲਾ ਵੇਦਨਾ ਉਪ੍ਪਜ੍ਜਤਿ. ਸਮ੍ਮਾਦਿਟ੍ਠਿਮੇਵ ਨਿਸ੍ਸਾਯ ਮਿਚ੍ਛਾਦਿਟ੍ਠਿਕੇ ਅਕ੍ਕੋਸਨ੍ਤਿ ਪਰਿਭਾਸਨ੍ਤਿ, ਅਤ੍ਤਾਨਂ ਉਕ੍ਕਂਸਨ੍ਤਿ, ਪਰਂ ਵਮ੍ਭੇਨ੍ਤਿ. ਇਤਿ ਨੇਸਂ ਅਕੁਸਲਾ ਵੇਦਨਾ ਉਪ੍ਪਜ੍ਜਤਿ. ਵਿਪਾਕਵੇਦਨਾ ਪਨ ਭਵਨ੍ਤਰਗਤਾਨਂਯੇਵ ਹੋਤਿ. ਸਾ ਪਨ ਸਮ੍ਮਾਦਿਟ੍ਠਿ ਸਹਜਾਤਾਯ ਸਮਨਨ੍ਤਰਨਿਰੁਦ੍ਧਾਯ ਪਚ੍ਚੁਪ੍ਪਨ੍ਨਾਯ ਵੇਦਨਾਯ ਮਿਚ੍ਛਾਦਿਟ੍ਠਿਯਾ ਵੁਤ੍ਤਪਚ੍ਚਯੇਹੇਵ ਪਚ੍ਚਯੋ ਹੋਤਿ, ਲੋਕਿਕਸਮ੍ਮਾਦਿਟ੍ਠਿ ਪਚ੍ਚਵੇਕ੍ਖਣਸਮ੍ਪਯੁਤ੍ਤਾਯ ਵਿਪਸ੍ਸਨਾਸਮ੍ਪਯੁਤ੍ਤਾਯ ਨਿਕਨ੍ਤਿਸਮ੍ਪਯੁਤ੍ਤਾਯ ਚ ਵੇਦਨਾਯ ਆਰਮ੍ਮਣਪਚ੍ਚਯੇਨ ਪਚ੍ਚਯੋ ਹੋਤਿ, ਮਿਚ੍ਛਾਦਿਟ੍ਠਿਯਾ ਵੁਤ੍ਤਨਯੇਨੇਵ ਉਪਨਿਸ੍ਸਯਪਚ੍ਚਯੇਨ ਪਚ੍ਚਯੋ ਹੋਤਿ, ਮਗ੍ਗਫਲਸਮ੍ਮਾਦਿਟ੍ਠਿ ਪਚ੍ਚਵੇਕ੍ਖਣਸਮ੍ਪਯੁਤ੍ਤਾਯ ਵੇਦਨਾਯ ਆਰਮ੍ਮਣਆਰਮ੍ਮਣਾਧਿਪਤਿਆਰਮ੍ਮਣੂਪਨਿਸ੍ਸਯਪਚ੍ਚਯਵਸੇਨ ਪਚ੍ਚਯੋ ਹੋਤਿ.

ਸਮ੍ਮਾਦਿਟ੍ਠਿਵੂਪਸਮਪਚ੍ਚਯਾਪਿ ਵੇਦਯਿਤਨ੍ਤਿ ਸਮ੍ਮਾਦਿਟ੍ਠਿਵੂਪਸਮੋ ਨਾਮ ਮਿਚ੍ਛਾਦਿਟ੍ਠਿ, ਤਸ੍ਮਾ ਯਂ ਮਿਚ੍ਛਾਦਿਟ੍ਠਿਪਚ੍ਚਯਾ ਵੇਦਯਿਤਂ ਵੁਤ੍ਤਂ, ਤਦੇਵ ‘‘ਸਮ੍ਮਾਦਿਟ੍ਠਿਵੂਪਸਮਪਚ੍ਚਯਾ’’ਤਿ ਵੇਦਿਤਬ੍ਬਂ. ਮਿਚ੍ਛਾਸਙ੍ਕਪ੍ਪਪਚ੍ਚਯਾ ਮਿਚ੍ਛਾਸਙ੍ਕਪ੍ਪਵੂਪਸਮਪਚ੍ਚਯਾਤਿਆਦੀਸੁਪਿ ਏਸੇਵ ਨਯੋ. ਯਸ੍ਸ ਯਸ੍ਸ ਹਿ ‘‘ਵੂਪਸਮਪਚ੍ਚਯਾ’’ਤਿ ਵੁਚ੍ਚਤਿ, ਤਸ੍ਸ ਤਸ੍ਸ ਪਟਿਪਕ੍ਖਧਮ੍ਮਪਚ੍ਚਯਾਵ ਤਂ ਤਂ ਵੇਦਯਿਤਂ ਅਧਿਪ੍ਪੇਤਂ. ਮਿਚ੍ਛਾਞਾਣਾਦੀਸੁ ਪਨ ਮਿਚ੍ਛਾਞਾਣਂ ਨਾਮ ਪਾਪਕਿਰਿਯਾਸੁ ਉਪਾਯਚਿਨ੍ਤਾ. ਅਥ ਵਾ ਮਿਚ੍ਛਾਞਾਣਂ ਮਿਚ੍ਛਾਪਚ੍ਚਵੇਕ੍ਖਣਞਾਣਂ. ਸਮ੍ਮਾਞਾਣਂ ਨਾਮ ਵਿਪਸ੍ਸਨਾਸਮ੍ਮਾਦਿਟ੍ਠਿਂ ਲੋਕੁਤ੍ਤਰਸਮ੍ਮਾਦਿਟ੍ਠਿਞ੍ਚ ਠਪੇਤ੍ਵਾ ਅਵਸੇਸਕੁਸਲਾਬ੍ਯਾਕਤਂ ਞਾਣਂ. ਮਿਚ੍ਛਾਵਿਮੁਤ੍ਤਿ ਨਾਮ ਪਾਪਾਧਿਮੁਤ੍ਤਿਤਾ. ਅਥ ਵਾ ਅਯਾਥਾਵਵਿਮੁਤ੍ਤਿ ਅਨਿਯ੍ਯਾਨਿਕਵਿਮੁਤ੍ਤਿ ਅਵਿਮੁਤ੍ਤਸ੍ਸੇਵ ਸਤੋ ਵਿਮੁਤ੍ਤਿਸਞ੍ਞੀਤਿ. ਸਮ੍ਮਾਵਿਮੁਤ੍ਤਿ ਨਾਮ ਕਲ੍ਯਾਣਾਧਿਮੁਤ੍ਤਿਤਾ ਫਲਵਿਮੁਤ੍ਤਿ ਚ. ਸਮ੍ਮਾਦਿਟ੍ਠਿਆਦਯੋ ਹੇਟ੍ਠਾ ਵੁਤ੍ਤਤ੍ਥਾਯੇਵ.

ਛਨ੍ਦਪਚ੍ਚਯਾਪੀਤਿਆਦੀਸੁ ਪਨ ਛਨ੍ਦੋ ਨਾਮ ਲੋਭੋ, ਛਨ੍ਦਪਚ੍ਚਯਾ ਅਟ੍ਠਲੋਭਸਹਗਤਚਿਤ੍ਤਸਮ੍ਪਯੁਤ੍ਤਵੇਦਨਾ ਵੇਦਿਤਬ੍ਬਾ. ਛਨ੍ਦਵੂਪਸਮਪਚ੍ਚਯਾ ਪਠਮਜ੍ਝਾਨਵੇਦਨਾਵ. ਵਿਤਕ੍ਕਪਚ੍ਚਯਾ ਪਠਮਜ੍ਝਾਨਵੇਦਨਾ. ਵਿਤਕ੍ਕਵੂਪਸਮਪਚ੍ਚਯਾ ਦੁਤਿਯਜ੍ਝਾਨਵੇਦਨਾ. ਸਞ੍ਞਾਪਚ੍ਚਯਾ ਠਪੇਤ੍ਵਾ ਪਠਮਜ੍ਝਾਨਂ ਸੇਸਾ ਛ ਸਮਾਪਤ੍ਤਿਵੇਦਨਾ. ਸਞ੍ਞਾਵੂਪਸਮਪਚ੍ਚਯਾ ਨੇਵਸਞ੍ਞਾਨਾਸਞ੍ਞਾਯਤਨਵੇਦਨਾ.

ਛਨ੍ਦੋ ਚ ਅਵੂਪਸਨ੍ਤੋ ਹੋਤੀਤਿਆਦੀਸੁ ਸਚੇ ਛਨ੍ਦਵਿਤਕ੍ਕਸਞ੍ਞਾ ਅਵੂਪਸਨ੍ਤਾ ਹੋਨ੍ਤੀਤਿ ਅਤ੍ਥੋ. ਤਪ੍ਪਚ੍ਚਯਾਤਿ ਸੋ ਛਨ੍ਦਵਿਤਕ੍ਕਸਞ੍ਞਾਨਂ ਅਵੂਪਸਮੋ ਏਵ ਪਚ੍ਚਯੋ ਤਪ੍ਪਚ੍ਚਯੋ, ਤਸ੍ਮਾ ਤਪ੍ਪਚ੍ਚਯਾ. ਛਨ੍ਦਵਿਤਕ੍ਕਸਞ੍ਞਾਅਵੂਪਸਮਪਚ੍ਚਯਾ ਵੇਦਨਾ ਹੋਤੀਤਿ ਅਤ੍ਥੋ. ਸਾ ਅਟ੍ਠਲੋਭਸਹਗਤਚਿਤ੍ਤਸਮ੍ਪਯੁਤ੍ਤਵੇਦਨਾ ਹੋਤਿ. ਸਚੇ ਛਨ੍ਦੋ ਵੂਪਸਨ੍ਤੋ ਵਿਤਕ੍ਕਸਞ੍ਞਾ ਅਵੂਪਸਨ੍ਤਾ. ਤਪ੍ਪਚ੍ਚਯਾਤਿ ਸੋ ਛਨ੍ਦਸ੍ਸ ਵੂਪਸਮੋ ਵਿਤਕ੍ਕਸਞ੍ਞਾਨਂ ਅਵੂਪਸਮੋ ਏਵ ਪਚ੍ਚਯੋ ਤਪ੍ਪਚ੍ਚਯੋ, ਤਸ੍ਮਾ ਤਪ੍ਪਚ੍ਚਯਾ. ਸਾ ਪਠਮਜ੍ਝਾਨਵੇਦਨਾਵ. ਸਚੇ ਛਨ੍ਦਵਿਤਕ੍ਕਾ ਵੂਪਸਨ੍ਤਾ ਸਞ੍ਞਾ ਅਵੂਪਸਨ੍ਤਾ. ਤਪ੍ਪਚ੍ਚਯਾਤਿ ਸੋ ਛਨ੍ਦਵਿਤਕ੍ਕਾਨਂ ਵੂਪਸਮੋ ਸਞ੍ਞਾਯ ਅਵੂਪਸਮੋ ਏਵ ਪਚ੍ਚਯੋ ਤਪ੍ਪਚ੍ਚਯੋ, ਤਸ੍ਮਾ ਤਪ੍ਪਚ੍ਚਯਾ. ਸਾ ਦੁਤਿਯਜ੍ਝਾਨਵੇਦਨਾਵ. ਸਚੇ ਛਨ੍ਦਵਿਤਕ੍ਕਸਞ੍ਞਾ ਵੂਪਸਨ੍ਤਾ. ਤਪ੍ਪਚ੍ਚਯਾਤਿ ਸੋ ਛਨ੍ਦਵਿਤਕ੍ਕਸਞ੍ਞਾਨਂ ਵੂਪਸਮੋ ਏਵ ਪਚ੍ਚਯੋ ਤਪ੍ਪਚ੍ਚਯੋ, ਤਸ੍ਮਾ ਤਪ੍ਪਚ੍ਚਯਾ. ਸਾ ਨੇਵਸਞ੍ਞਾਨਾਸਞ੍ਞਾਯਤਨਵੇਦਨਾਵ. ਕੇਚਿ ਪਨ ‘‘ਛਨ੍ਦੋ ਨਾਮ ਅਪ੍ਪਨਂ ਪਾਪੁਣਿਸ੍ਸਾਮੀਤਿ ਪੁਬ੍ਬਭਾਗੇ ਧਮ੍ਮਚ੍ਛਨ੍ਦੋ, ਅਪ੍ਪਨਾਪ੍ਪਤ੍ਤਸ੍ਸ ਸੋ ਛਨ੍ਦੋ ਵੂਪਸਨ੍ਤੋ ਹੋਤਿ. ਪਠਮਜ੍ਝਾਨੇ ਵਿਤਕ੍ਕੋ ਹੋਤਿ, ਦੁਤਿਯਜ੍ਝਾਨਪ੍ਪਤ੍ਤਸ੍ਸ ਵਿਤਕ੍ਕੋ ਵੂਪਸਨ੍ਤੋ ਹੋਤਿ. ਸਤ੍ਤਸੁ ਸਮਾਪਤ੍ਤੀਸੁ ਸਞ੍ਞਾ ਹੋਤਿ, ਨੇਵਸਞ੍ਞਾਨਾਸਞ੍ਞਾਯਤਨਂ ਸਮਾਪਨ੍ਨਸ੍ਸ ਚ ਨਿਰੋਧਂ ਸਮਾਪਨ੍ਨਸ੍ਸ ਚ ਸਞ੍ਞਾ ਵੂਪਸਨ੍ਤਾ ਹੋਤੀ’’ਤਿ ਏਵਂ ਵਣ੍ਣਯਨ੍ਤਿ. ਇਧ ਪਨ ਨਿਰੋਧਸਮਾਪਤ੍ਤਿ ਨ ਯੁਜ੍ਜਤਿ. ਅਪ੍ਪਤ੍ਤਸ੍ਸ ਪਤ੍ਤਿਯਾਤਿ ਅਰਹਤ੍ਤਫਲਸ੍ਸ ਪਤ੍ਤਤ੍ਥਾਯ. ਅਤ੍ਥਿ ਆਯਵਨ੍ਤਿ ਅਤ੍ਥਿ ਵੀਰਿਯਂ. ਆਯਾਵਨ੍ਤਿਪਿ ਪਾਠੋ. ਤਸ੍ਮਿਮ੍ਪਿ ਠਾਨੇ ਅਨੁਪ੍ਪਤ੍ਤੇਤਿ ਤਸ੍ਸ ਵੀਰਿਯਾਰਮ੍ਭਸ੍ਸ ਵਸੇਨ ਤਸ੍ਮਿਂ ਅਰਹਤ੍ਤਫਲਸ੍ਸ ਕਾਰਣੇ ਅਰਿਯਮਗ੍ਗੇ ਅਨੁਪ੍ਪਤ੍ਤੇ. ਤਪ੍ਪਚ੍ਚਯਾਪਿ ਵੇਦਯਿਤਨ੍ਤਿ ਅਰਹਤ੍ਤਸ੍ਸ ਠਾਨਪਚ੍ਚਯਾ ਵੇਦਯਿਤਂ. ਏਤੇਨ ਚਤੁਮਗ੍ਗਸਹਜਾਤਾ ਨਿਬ੍ਬਤ੍ਤਿਤਲੋਕੁਤ੍ਤਰਵੇਦਨਾ ਗਹਿਤਾ. ਕੇਚਿ ਪਨ ‘‘ਆਯਵਨ੍ਤਿ ਪਟਿਪਤ੍ਤਿ. ਤਸ੍ਮਿਮ੍ਪਿ ਠਾਨੇ ਅਨੁਪ੍ਪਤ੍ਤੇਤਿ ਤਸ੍ਸਾ ਭੂਮਿਯਾ ਪਤ੍ਤਿਯਾ’’ਤਿ ਵਣ੍ਣਯਨ੍ਤਿ.

ਪਦੇਸਵਿਹਾਰਞਾਣਨਿਦ੍ਦੇਸਵਣ੍ਣਨਾ ਨਿਟ੍ਠਿਤਾ.