੪੪-੪੯. ਵਿਵਟ੍ਟਞਾਣਛਕ੍ਕਨਿਦ੍ਦੇਸਵਣ੍ਣਨਾ

੯੫. ਵਿਵਟ੍ਟਞਾਣਛਕ੍ਕਨਿਦ੍ਦੇਸੇ ਨੇਕ੍ਖਮ੍ਮਾਧਿਪਤਤ੍ਤਾ ਪਞ੍ਞਾਤਿ ਨੇਕ੍ਖਮ੍ਮਂ ਅਧਿਕਂ ਕਤ੍ਵਾ ਨੇਕ੍ਖਮ੍ਮਾਧਿਕਭਾਵੇਨ ਪਵਤ੍ਤਾ ਪਞ੍ਞਾ. ਕਾਮਚ੍ਛਨ੍ਦਤੋ ਸਞ੍ਞਾਯ ਵਿਵਟ੍ਟਤੀਤਿ ਨੇਕ੍ਖਮ੍ਮਾਧਿਪਤਿਕਤਪਞ੍ਞਾਸਮ੍ਪਯੁਤ੍ਤਸਞ੍ਞਾਯ ਹੇਤੁਭੂਤਾਯ, ਕਰਣਭੂਤਾਯ ਵਾ ਕਾਮਚ੍ਛਨ੍ਦਤੋ ਵਿਵਟ੍ਟਤਿ ਪਰਾਵਤ੍ਤਤਿ, ਪਰਮ੍ਮੁਖੀ ਹੋਤੀਤਿ ਅਤ੍ਥੋ. ਏਸ ਨਯੋ ਸੇਸੇਸੁ.

੯੬. ਕਾਮਚ੍ਛਨ੍ਦੋ ਨਾਨਤ੍ਤਨ੍ਤਿ ਕਾਮਚ੍ਛਨ੍ਦੋ ਸਨ੍ਤਵੁਤ੍ਤਿਤਾਯ ਅਭਾਵਤੋ ਨ ਏਕਸਭਾਵੋ. ਨੇਕ੍ਖਮ੍ਮਂ ਏਕਤ੍ਤਨ੍ਤਿ ਨੇਕ੍ਖਮ੍ਮਂ ਸਨ੍ਤਵੁਤ੍ਤਿਭਾਵਤੋ ਏਕਸਭਾਵੋ. ਨੇਕ੍ਖਮ੍ਮੇਕਤ੍ਤਂ ਚੇਤਯਤੋਤਿ ਕਾਮਚ੍ਛਨ੍ਦੇ ਆਦੀਨਵਦਸ੍ਸਨੇਨ ਨੇਕ੍ਖਮ੍ਮਂ ਪਵਤ੍ਤਯਤੋ. ਕਾਮਚ੍ਛਨ੍ਦਤੋ ਚਿਤ੍ਤਂ ਵਿਵਟ੍ਟਤੀਤਿ ਦਿਟ੍ਠਾਦੀਨਵਤੋ ਕਾਮਚ੍ਛਨ੍ਦਤੋ ਨੇਕ੍ਖਮ੍ਮਕ੍ਖਣੇ ਚਿਤ੍ਤਂ ਵਿਵਟ੍ਟਤਿ. ਏਸ ਨਯੋ ਸੇਸੇਸੁ.

੯੭. ਕਾਮਚ੍ਛਨ੍ਦਂ ਪਜਹਨ੍ਤੋਤਿ ਨੇਕ੍ਖਮ੍ਮਪਵਤ੍ਤਿਕ੍ਖਣੇ ਕਾਮਚ੍ਛਨ੍ਦਂ ਵਿਕ੍ਖਮ੍ਭਨਪ੍ਪਹਾਨੇਨ ਪਜਹਨ੍ਤੋ. ਨੇਕ੍ਖਮ੍ਮਵਸੇਨ ਚਿਤ੍ਤਂ ਅਧਿਟ੍ਠਾਤੀਤਿ ਪਟਿਲਦ੍ਧਸ੍ਸ ਨੇਕ੍ਖਮ੍ਮਸ੍ਸ ਵਸੇਨ ਤਂਸਮ੍ਪਯੁਤ੍ਤਚਿਤ੍ਤਂ ਅਧਿਤਿਟ੍ਠਤਿ ਅਧਿਕਂ ਕਰੋਨ੍ਤੋ ਤਿਟ੍ਠਤਿ, ਪਵਤ੍ਤੇਤੀਤਿ ਅਤ੍ਥੋ. ਏਸ ਨਯੋ ਸੇਸੇਸੁ.

੯੮. ਚਕ੍ਖੁ ਸੁਞ੍ਞਂ ਅਤ੍ਤੇਨ ਵਾਤਿ ਬਾਲਜਨਪਰਿਕਪ੍ਪਿਤਸ੍ਸ ਕਾਰਕਵੇਦਕਸਙ੍ਖਾਤਸ੍ਸ ਅਤ੍ਤਨੋ ਅਭਾਵਾ ਚਕ੍ਖੁ ਅਤ੍ਤੇਨ ਚ ਸੁਞ੍ਞਂ. ਯਞ੍ਹਿ ਯਤ੍ਥ ਨ ਹੋਤਿ, ਤੇਨ ਤਂ ਸੁਞ੍ਞਂ ਨਾਮ ਹੋਤਿ. ਅਤ੍ਤਨਿਯੇਨ ਵਾਤਿ ਅਤ੍ਤਨੋ ਅਭਾਵੇਨੇਵ ਅਤ੍ਤਨੋ ਸਨ੍ਤਕਸ੍ਸਪਿ ਅਭਾਵਾ ਅਤ੍ਤਨੋ ਸਨ੍ਤਕੇਨ ਚ ਸੁਞ੍ਞਂ. ਲੋਕਸ੍ਸ ਅਤ੍ਤਾਤਿ ਚ ਅਤ੍ਤਨਿਯਨ੍ਤਿ ਚ ਉਭਯਥਾ ਗਾਹਸਮ੍ਭਵਤੋ ਤਦੁਭਯਗਾਹਪਟਿਸੇਧਨਤ੍ਥਂ ਅਤ੍ਤਾਭਾਵੋ ਚ ਅਤ੍ਤਨਿਯਾਭਾਵੋ ਚ ਵੁਤ੍ਤੋ. ਨਿਚ੍ਚੇਨ ਵਾਤਿ ਭਙ੍ਗਂ ਅਤਿਕ੍ਕਮਿਤ੍ਵਾ ਤਿਟ੍ਠਨ੍ਤਸ੍ਸ ਕਸ੍ਸਚਿ ਅਭਾਵਤੋ ਨਿਚ੍ਚੇਨ ਚ ਸੁਞ੍ਞਂ. ਧੁਵੇਨ ਵਾਤਿ ਪਵਤ੍ਤਿਕ੍ਖਣੇਪਿ ਥਿਰਸ੍ਸ ਕਸ੍ਸਚਿ ਅਭਾਵਤੋ ਧੁਵੇਨ ਚ ਸੁਞ੍ਞਂ. ਸਸ੍ਸਤੇਨ ਵਾਤਿ ਸਬ੍ਬਕਾਲੇਪਿ ਵਿਜ੍ਜਮਾਨਸ੍ਸ ਕਸ੍ਸਚਿ ਅਭਾਵਤੋ ਸਸ੍ਸਤੇਨ ਚ ਸੁਞ੍ਞਂ. ਅਵਿਪਰਿਣਾਮਧਮ੍ਮੇਨ ਵਾਤਿ ਜਰਾਭਙ੍ਗਵਸੇਨ ਦ੍ਵਿਧਾ ਅਪਰਿਵਤ੍ਤਮਾਨਪਕਤਿਕਸ੍ਸ ਕਸ੍ਸਚਿ ਅਭਾਵਤੋ ਅਵਿਪਰਿਣਾਮਧਮ੍ਮੇਨ ਚ ਸੁਞ੍ਞਂ. ਅਥ ਵਾ ਨਿਚ੍ਚਭਾਵੇਨ ਚ ਧੁਵਭਾਵੇਨ ਚ ਸਸ੍ਸਤਭਾਵੇਨ ਚ ਅਵਿਪਰਿਣਾਮਧਮ੍ਮਭਾਵੇਨ ਚ ਸੁਞ੍ਞਨ੍ਤਿ ਅਤ੍ਥੋ. ਸਮੁਚ੍ਚਯਤ੍ਥੋ ਵਾ-ਸਦ੍ਦੋ. ਯਥਾਭੂਤਂ ਜਾਨਤੋ ਪਸ੍ਸਤੋਤਿ ਇਚ੍ਚੇਵਂ ਅਨਤ੍ਤਾਨੁਪਸ੍ਸਨਾਞਾਣੇਨ ਯਥਾਸਭਾਵੇਨ ਜਾਨਨ੍ਤਸ੍ਸ ਚਕ੍ਖੁਨਾ ਵਿਯ ਚ ਪਸ੍ਸਨ੍ਤਸ੍ਸ. ਚਕ੍ਖਾਭਿਨਿਵੇਸਤੋ ਞਾਣਂ ਵਿਵਟ੍ਟਤੀਤਿ ਚਕ੍ਖੁ ਅਤ੍ਤਾਤਿ ਵਾ ਅਤ੍ਤਨਿਯਨ੍ਤਿ ਵਾ ਪਵਤ੍ਤਮਾਨਤੋ ਦਿਟ੍ਠਾਭਿਨਿਵੇਸਤੋ ਤਦਙ੍ਗਪ੍ਪਹਾਨਵਸੇਨ ਞਾਣਂ ਵਿਵਟ੍ਟਤਿ. ਏਸ ਨਯੋ ਸੇਸੇਸੁ.

੯੯. ਨੇਕ੍ਖਮ੍ਮੇਨ ਕਾਮਚ੍ਛਨ੍ਦਂ ਵੋਸਜ੍ਜਤੀਤਿ ਨੇਕ੍ਖਮ੍ਮਲਾਭੀ ਪੁਗ੍ਗਲੋ ਨੇਕ੍ਖਮ੍ਮੇਨ ਤਪ੍ਪਟਿਪਕ੍ਖਂ ਕਾਮਚ੍ਛਨ੍ਦਂ ਪਰਿਚ੍ਚਜਤਿ. ਵੋਸਗ੍ਗੇ ਪਞ੍ਞਾਤਿ ਕਾਮਚ੍ਛਨ੍ਦਸ੍ਸ ਵੋਸਗ੍ਗਭੂਤੇ ਨੇਕ੍ਖਮ੍ਮੇ ਤਂਸਮ੍ਪਯੁਤ੍ਤਾ ਪਞ੍ਞਾ. ਏਸ ਨਯੋ ਸੇਸੇਸੁ. ਪੀਲ਼ਨਟ੍ਠਾਦਯੋ ਹੇਟ੍ਠਾ ਵੁਤ੍ਤਤ੍ਥਾ ਏਵ. ਪਰਿਜਾਨਨ੍ਤੋ ਵਿਵਟ੍ਟਤੀਤਿ ਪੁਗ੍ਗਲਾਧਿਟ੍ਠਾਨਾ ਦੇਸਨਾ, ਮਗ੍ਗਸਮਙ੍ਗੀਪੁਗ੍ਗਲੋ ਦੁਕ੍ਖਸ੍ਸ ਚਤੁਬ੍ਬਿਧਂ ਅਤ੍ਥਂ ਕਿਚ੍ਚਵਸੇਨ ਪਰਿਜਾਨਨ੍ਤੋ ਦੁਭਤੋ ਵੁਟ੍ਠਾਨਵਸੇਨ ਵਿਵਟ੍ਟਤਿ, ਞਾਣਵਿਵਟ੍ਟਨੇਪਿ ਞਾਣਸਮਙ੍ਗੀ ਵਿਵਟ੍ਟਤੀਤਿ ਵੁਤ੍ਤੋ.

੧੦੦. ਤਥਟ੍ਠੇ ਪਞ੍ਞਾਤਿ ਏਤਸ੍ਸ ਪੁਗ੍ਗਲਸ੍ਸੇਵ ਤਥਟ੍ਠੇ ਵਿਵਟ੍ਟਨਾ ਪਞ੍ਞਾ. ਏਸ ਨਯੋ ਸੇਸੇਸੁ. ਇਦਾਨਿ ਮਗ੍ਗਕ੍ਖਣੇ ਏਵ ਕਿਚ੍ਚਵਸੇਨ ਆਕਾਰਨਾਨਤ੍ਤਤੋ ਛ ਵਿਵਟ੍ਟਞਾਣਾਨਿ ਦਸ੍ਸੇਤੁਂ ਸਞ੍ਞਾਵਿਵਟ੍ਟੋਤਿਆਦਿਮਾਤਿਕਂ ਠਪੇਤ੍ਵਾ ਤਂ ਅਤ੍ਥਤੋ ਵਿਭਜਨ੍ਤੋ ਸਞ੍ਜਾਨਨ੍ਤੋ ਵਿਵਟ੍ਟਤੀਤਿਆਦਿਮਾਹ. ਤਤ੍ਥ ਸਞ੍ਜਾਨਨ੍ਤੋ ਵਿਵਟ੍ਟਤੀਤਿ ਸਞ੍ਞਾਵਿਵਟ੍ਟੋਤਿ ਯਸ੍ਮਾ ਪੁਬ੍ਬਭਾਗੇ ਨੇਕ੍ਖਮ੍ਮਾਦਿਂ ਅਧਿਪਤਿਤੋ ਸਞ੍ਜਾਨਨ੍ਤੋ ਯੋਗੀ ਪਚ੍ਛਾ ਨੇਕ੍ਖਮ੍ਮਸਮ੍ਪਯੁਤ੍ਤਞਾਣੇਨ ਕਾਮਚ੍ਛਨ੍ਦਾਦਿਤੋ ਵਿਵਟ੍ਟਤਿ, ਤਸ੍ਮਾ ਤਂ ਞਾਣਂ ਸਞ੍ਞਾਵਿਵਟ੍ਟੋ ਨਾਮਾਤਿ ਅਤ੍ਥੋ. ਚੇਤਯਨ੍ਤੋ ਵਿਵਟ੍ਟਤੀਤਿ ਚੇਤੋਵਿਵਟ੍ਟੋਤਿ ਯਸ੍ਮਾ ਯੋਗੀ ਨੇਕ੍ਖਮ੍ਮੇਕਤ੍ਤਾਦੀਨਿ ਚੇਤਯਨ੍ਤੋ ਸਮ੍ਪਯੁਤ੍ਤਞਾਣੇਨ ਕਾਮਚ੍ਛਨ੍ਦਾਦਿਤੋ ਵਿਵਟ੍ਟਤਿ, ਤਸ੍ਮਾ ਤਂ ਞਾਣਂ ਚੇਤੋਵਿਵਟ੍ਟੋ ਨਾਮਾਤਿ ਅਤ੍ਥੋ. ਵਿਜਾਨਨ੍ਤੋ ਵਿਵਟ੍ਟਤੀਤਿ ਚਿਤ੍ਤਵਿਵਟ੍ਟੋਤਿ ਯਸ੍ਮਾ ਯੋਗੀ ਨੇਕ੍ਖਮ੍ਮਾਦਿਵਸੇਨ ਚਿਤ੍ਤਾਧਿਟ੍ਠਾਨੇਨ ਵਿਜਾਨਨ੍ਤੋ ਤਂਸਮ੍ਪਯੁਤ੍ਤਞਾਣੇਨ ਕਾਮਚ੍ਛਨ੍ਦਾਦਿਤੋ ਵਿਵਟ੍ਟਤਿ, ਤਸ੍ਮਾ ਤਂ ਞਾਣਂ ਚਿਤ੍ਤਵਿਵਟ੍ਟੋ ਨਾਮਾਤਿ ਅਤ੍ਥੋ. ਞਾਣਂ ਕਰੋਨ੍ਤੋ ਵਿਵਟ੍ਟਤੀਤਿ ਞਾਣਵਿਵਟ੍ਟੋਤਿ ਯਸ੍ਮਾ ਯੋਗੀ ਛਬ੍ਬਿਧਂ ਅਜ੍ਝਤ੍ਤਿਕਾਯਤਨਂ ਅਨਤ੍ਤਾਨੁਪਸ੍ਸਨਾਞਾਣੇਨ ਸੁਞ੍ਞਤੋ ਵਿਦਿਤਂ ਕਰੋਨ੍ਤੋ ਤੇਨੇਵ ਞਾਣੇਨ ਦਿਟ੍ਠਾਭਿਨਿਵੇਸਤੋ ਵਿਵਟ੍ਟਤਿ, ਤਸ੍ਮਾ ਤਂ ਞਾਣਂ ਞਾਣਵਿਵਟ੍ਟੋ ਨਾਮਾਤਿ ਅਤ੍ਥੋ. ਵੋਸਜ੍ਜਨ੍ਤੋ ਵਿਵਟ੍ਟਤੀਤਿ ਵਿਮੋਕ੍ਖਵਿਵਟ੍ਟੋਤਿ ਯਸ੍ਮਾ ਯੋਗੀ ਨੇਕ੍ਖਮ੍ਮਾਦੀਹਿ ਕਾਮਚ੍ਛਨ੍ਦਾਦੀਨਿ ਵੋਸਜ੍ਜਨ੍ਤੋ ਤਂਸਮ੍ਪਯੁਤ੍ਤਞਾਣੇਨ ਕਾਮਚ੍ਛਨ੍ਦਾਦਿਤੋ ਵਿਵਟ੍ਟਤਿ, ਤਸ੍ਮਾ ਤਂ ਞਾਣਂ ਵਿਮੋਕ੍ਖਵਿਵਟ੍ਟੋ ਨਾਮਾਤਿ ਅਤ੍ਥੋ. ਤਥਟ੍ਠੇ ਵਿਵਟ੍ਟਤੀਤਿ ਸਚ੍ਚਵਿਵਟ੍ਟੋਤਿ ਯਸ੍ਮਾ ਯੋਗੀ ਚਤੁਬ੍ਬਿਧੇ ਤਥਟ੍ਠੇ ਦੁਭਤੋ ਵੁਟ੍ਠਾਨਵਸੇਨ ਵਿਵਟ੍ਟਤਿ, ਤਸ੍ਮਾ ਮਗ੍ਗਞਾਣਂ ਸਚ੍ਚਵਿਵਟ੍ਟੋ ਨਾਮਾਤਿ ਅਤ੍ਥੋ. ਮਗ੍ਗਞਾਣਮੇਵ ਵਾ ਤਥਟ੍ਠੇ ਦੁਭਤੋ ਵੁਟ੍ਠਾਨਭਾਵੇਨ ਵਿਵਟ੍ਟਤੀਤਿ ਸਚ੍ਚਵਿਵਟ੍ਟੋਤਿ ਅਤ੍ਥੋ.

ਯਤ੍ਥ ਸਞ੍ਞਾਵਿਵਟ੍ਟੋਤਿਆਦਿ ਸਚ੍ਚਵਿਵਟ੍ਟਞਾਣਨਿਦ੍ਦੇਸੇ ਵੁਤ੍ਤਤ੍ਤਾ ਸਚ੍ਚਵਿਵਟ੍ਟਞਾਣਕ੍ਖਣਮੇਵ ਸਨ੍ਧਾਯ ਵੁਤ੍ਤਨ੍ਤਿ ਵੇਦਿਤਬ੍ਬਂ. ਮਗ੍ਗਕ੍ਖਣੇਯੇਵ ਹਿ ਸਬ੍ਬਾਨਿ ਯੁਜ੍ਜਨ੍ਤਿ. ਕਥਂ? ਞਾਣਵਿਵਟ੍ਟੇ ਞਾਣਞ੍ਹਿ ਵਜ੍ਜੇਤ੍ਵਾ ਸੇਸੇਸੁ ਅਰਿਯਮਗ੍ਗੋ ਸਰੂਪੇਨੇਵ ਆਗਤੋ. ਵਿਪਸ੍ਸਨਾਕਿਚ੍ਚਸ੍ਸ ਪਨ ਮਗ੍ਗੇਨੇਵ ਸਿਜ੍ਝਨਤੋ ਵਿਪਸ੍ਸਨਾਕਿਚ੍ਚਸਿਦ੍ਧਿਵਸੇਨ ਞਾਣਵਿਵਟ੍ਟਞਾਣਮ੍ਪਿ ਮਗ੍ਗਕ੍ਖਣੇ ਯੁਜ੍ਜਤਿ. ਮਗ੍ਗਞਾਣੇਨੇਵ ਵਾ ‘‘ਚਕ੍ਖੁ ਸੁਞ੍ਞ’’ਨ੍ਤਿਆਦਿ ਕਿਚ੍ਚਵਸੇਨ ਪਟਿਵਿਦ੍ਧਮੇਵ ਹੋਤੀਤਿ ਮਗ੍ਗਕ੍ਖਣੇ ਤਂ ਞਾਣਂ ਵਤ੍ਤੁਂ ਯੁਜ੍ਜਤਿਯੇਵ. ਅਤ੍ਥਯੋਜਨਾ ਪਨੇਤ੍ਥ ‘‘ਯਤ੍ਥ ਮਗ੍ਗਕ੍ਖਣੇ ਸਞ੍ਞਾਵਿਵਟ੍ਟੋ, ਤਤ੍ਥ ਚੇਤੋਵਿਵਟ੍ਟੋ. ਯਤ੍ਥ ਮਗ੍ਗਕ੍ਖਣੇ ਚੇਤੋਵਿਵਟ੍ਟੋ, ਤਤ੍ਥ ਸਞ੍ਞਾਵਿਵਟ੍ਟੋ’’ਤਿ ਏਵਮਾਦਿਨਾ ਨਯੇਨ ਸਬ੍ਬਸਂਸਨ੍ਦਨੇਸੁ ਯੋਜਨਾ ਕਾਤਬ੍ਬਾ. ਅਥ ਵਾ ਸਞ੍ਞਾਵਿਵਟ੍ਟਚੇਤੋਵਿਵਟ੍ਟਚਿਤ੍ਤਵਿਵਟ੍ਟਵਿਮੋਕ੍ਖਵਿਵਟ੍ਟੇਸੁ ਚਤੁਨ੍ਨਂ ਅਰਿਯਮਗ੍ਗਾਨਂ ਆਗਤਤ੍ਤਾ ਸਚ੍ਚਵਿਵਟ੍ਟੋ ਆਗਤੋਯੇਵ ਹੋਤਿ. ਞਾਣਵਿਵਟ੍ਟੋ ਚ ਸਚ੍ਚਵਿਵਟ੍ਟੇਨੇਵ ਕਿਚ੍ਚਵਸੇਨ ਸਿਦ੍ਧੋ ਹੋਤਿ. ਸਞ੍ਞਾਚੇਤੋਚਿਤ੍ਤਵਿਮੋਕ੍ਖਵਿਵਟ੍ਟੇਸ੍ਵੇਵ ਚ ਪੇਯ੍ਯਾਲੇ ਵਿਤ੍ਥਾਰਿਯਮਾਨੇ ‘‘ਅਨਤ੍ਤਾਨੁਪਸ੍ਸਨਾਧਿਪਤਤ੍ਤਾ ਪਞ੍ਞਾ ਅਭਿਨਿਵੇਸਤੋ ਸਞ੍ਞਾਯ ਵਿਵਟ੍ਟਤੀਤਿ ਅਧਿਪਤਤ੍ਤਾ ਪਞ੍ਞਾ ਸਞ੍ਞਾਵਿਵਟ੍ਟੇ ਞਾਣ’’ਨ੍ਤਿ ਚ, ‘‘ਅਭਿਨਿਵੇਸੋ ਨਾਨਤ੍ਤਂ, ਅਨਤ੍ਤਾਨੁਪਸ੍ਸਨਾ ਏਕਤ੍ਤਂ. ਅਨਤ੍ਤਾਨੁਪਸ੍ਸਨੇਕਤ੍ਤਂ ਚੇਤਯਤੋ ਅਭਿਨਿਵੇਸਤੋ ਚਿਤ੍ਤਂ ਵਿਵਟ੍ਟਤੀਤਿ ਨਾਨਤ੍ਤੇ ਪਞ੍ਞਾ ਚੇਤੋਵਿਵਟ੍ਟੇ ਞਾਣ’’ਨ੍ਤਿ ਚ, ‘‘ਅਭਿਨਿਵੇਸਂ ਪਜਹਨ੍ਤੋ ਅਨਤ੍ਤਾਨੁਪਸ੍ਸਨਾਵਸੇਨ ਚਿਤ੍ਤਂ ਅਧਿਟ੍ਠਾਤੀਤਿ ਅਧਿਟ੍ਠਾਨੇ ਪਞ੍ਞਾ ਚਿਤ੍ਤਵਿਵਟ੍ਟੇ ਞਾਣ’’ਨ੍ਤਿ ਚ, ‘‘ਅਨਤ੍ਤਾਨੁਪਸ੍ਸਨਾਯ ਅਭਿਨਿਵੇਸਂ ਵੋਸਜ੍ਜਤੀਤਿ ਵੋਸਗ੍ਗੇ ਪਞ੍ਞਾ ਵਿਮੋਕ੍ਖਵਿਵਟ੍ਟੇ ਞਾਣ’’ਨ੍ਤਿ ਚ ਪਾਠਸਮ੍ਭਵਤੋ ਞਾਣਵਿਵਟ੍ਟੇ ਞਾਣਮ੍ਪਿ ਤੇਸੁ ਆਗਤਮੇਵ ਹੋਤਿ. ਞਾਣਵਿਵਟ੍ਟੇ ਚ ਅਨਤ੍ਤਾਨੁਪਸ੍ਸਨਾਯ ਵੁਟ੍ਠਾਯ ਅਰਿਯਮਗ੍ਗਂ ਪਟਿਲਦ੍ਧਸ੍ਸ ਕਿਚ੍ਚਵਸੇਨ ‘‘ਚਕ੍ਖੁ ਸੁਞ੍ਞਂ ਅਤ੍ਤੇਨ ਵਾ ਅਤ੍ਤਨਿਯੇਨ ਵਾ’’ਤਿਆਦਿਯੁਜ੍ਜਨਤੋ ਸਚ੍ਚਵਿਵਟ੍ਟੋ ਲਬ੍ਭਤਿ, ਤਸ੍ਮਾ ਏਕੇਕਸ੍ਮਿਂ ਵਿਵਟ੍ਟੇ ਸੇਸਾ ਪਞ੍ਚ ਪਞ੍ਚ ਵਿਵਟ੍ਟਾ ਲਬ੍ਭਨ੍ਤਿ. ਤਸ੍ਮਾ ਏਵਂ ‘‘ਯਤ੍ਥ ਸਞ੍ਞਾਵਿਵਟ੍ਟੋ, ਤਤ੍ਥ ਚੇਤੋਵਿਵਟ੍ਟੋ’’ਤਿਆਦਿਕਾਨਿ ਸਂਸਨ੍ਦਨਾਨਿ ਵੁਤ੍ਤਾਨੀਤਿ ਵੇਦਿਤਬ੍ਬਂ.

ਵਿਵਟ੍ਟਞਾਣਛਕ੍ਕਨਿਦ੍ਦੇਸਵਣ੍ਣਨਾ ਨਿਟ੍ਠਿਤਾ.