੪. ਧਮ੍ਮਟ੍ਠਿਤਿਞਾਣਨਿਦ੍ਦੇਸਵਣ੍ਣਨਾ
੪੫. ਧਮ੍ਮਟ੍ਠਿਤਿਞਾਣਨਿਦ੍ਦੇਸੇ ਅਵਿਜ੍ਜਾਸਙ੍ਖਾਰਾਨਂ ਉਪ੍ਪਾਦਟ੍ਠਿਤੀਤਿਆਦੀਸੁ ਤਿਟ੍ਠਨ੍ਤਿ ਏਤਾਯ ਸਙ੍ਖਾਰਾਤਿ ਠਿਤਿ. ਕਾ ਸਾ? ਅਵਿਜ੍ਜਾ. ਸਾ ਹਿ ਸਙ੍ਖਾਰਾਨਂ ਉਪ੍ਪਾਦਾਯ ਨਿਬ੍ਬਤ੍ਤਿਯਾ ਠਿਤਿ ਕਾਰਣਨ੍ਤਿ ਉਪ੍ਪਾਦਟ੍ਠਿਤਿ. ਉਪ੍ਪਨ੍ਨਾਨਂ ਪਵਤ੍ਤਿਯਾਪਿ ਕਾਰਣਨ੍ਤਿ ਪਵਤ੍ਤਟ੍ਠਿਤਿ. ਕਿਞ੍ਚਾਪਿ ਹਿ ਜਨਕਪਚ੍ਚਯਸ੍ਸ ਜਨਨਕ੍ਖਣੇਯੇਵ ਕਿਚ੍ਚਾਨੁਭਾਵੋ ਹੋਤਿ, ਤੇਨ ਪਨ ਜਨਿਤਾਨਂਯੇਵ ਪਵਤ੍ਤਤ੍ਤਾ ਸਕਕ੍ਖਣੇ ਪਵਤ੍ਤਿਯਾਪਿ ਕਾਰਣਂ ਨਾਮ ਹੋਤਿ, ਸਨ੍ਤਤਿਵਸੇਨ ਵਾ ਪਵਤ੍ਤਿਯਾ ਕਾਰਣਨ੍ਤਿ ਅਤ੍ਥੋ. ਪਵਤ੍ਤਨ੍ਤਿ ਚ ਨਪੁਂਸਕੇ ਭਾਵਵਚਨਮੇਤਂ, ਤਸ੍ਮਾ ਪਵਤ੍ਤਂ ਪਵਤ੍ਤੀਤਿ ਅਤ੍ਥਤੋ ਏਕਂ. ਪਵਤ੍ਤਿਸਦ੍ਦਸ੍ਸ ਪਨ ਪਾਕਟਤ੍ਤਾ ਤੇਨ ਯੋਜੇਤ੍ਵਾ ਅਤ੍ਥੋ ਵੁਤ੍ਤੋ. ਭਾਵੇਪਿ ਠਿਤਿਸਦ੍ਦਸ੍ਸ ਸਿਜ੍ਝਨਤੋ ਨ ਇਧ ਭਾਵੇ ਠਿਤਿਸਦ੍ਦੋ, ਕਾਰਣੇ ਠਿਤਿਸਦ੍ਦੋਤਿ ਦਸ੍ਸਨਤ੍ਤਂ ਨਿਮਿਤ੍ਤਟ੍ਠਿਤੀਤਿ ਵੁਤ੍ਤਂ, ਨਿਮਿਤ੍ਤਭੂਤਾ ਠਿਤੀਤਿ ਅਤ੍ਥੋ, ਕਾਰਣਭੂਤਾਤਿ ਵੁਤ੍ਤਂ ਹੋਤਿ. ਨ ਕੇਵਲਂ ਨਿਮਿਤ੍ਤਮਤ੍ਤਂ ਹੋਤਿ, ਅਥ ਖੋ ਸਙ੍ਖਾਰਜਨਨੇ ਸਬ੍ਯਾਪਾਰਾ ਵਿਯ ਹੁਤ੍ਵਾ ਆਯੂਹਤਿ ਵਾਯਮਤੀਤਿ ਪਚ੍ਚਯਸਮਤ੍ਥਤਂ ਦਸ੍ਸੇਨ੍ਤੋ ਆਯੂਹਨਟ੍ਠਿਤੀਤਿ ਆਹ, ਆਯੂਹਨਭੂਤਾ ਠਿਤੀਤਿ ਅਤ੍ਥੋ. ਯਸ੍ਮਾ ਅਵਿਜ੍ਜਾ ਸਙ੍ਖਾਰੇ ਉਪ੍ਪਾਦਯਮਾਨਾ ਉਪ੍ਪਾਦੇ ਸਂਯੋਜੇਤਿ ਨਾਮ, ਘਟੇਤੀਤਿ ਅਤ੍ਥੋ. ਸਙ੍ਖਾਰੇ ਪਵਤ੍ਤਯਮਾਨਾ ਪਵਤ੍ਤਿਯਂ ਪਲਿਬੁਨ੍ਧਤਿ ਨਾਮ, ਬਨ੍ਧਤੀਤਿ ਅਤ੍ਥੋ. ਤਸ੍ਮਾ ਸਞ੍ਞੋਗਟ੍ਠਿਤਿ ਪਲਿਬੋਧਟ੍ਠਿਤੀਤਿ ਵੁਤ੍ਤਾ. ਸਞ੍ਞੋਗਭੂਤਾ ਠਿਤਿ, ਪਲਿਬੋਧਭੂਤਾ ਠਿਤੀਤਿ ਅਤ੍ਥੋ. ਯਸ੍ਮਾ ਅਵਿਜ੍ਜਾਵ ਸਙ੍ਖਾਰੇ ਉਪ੍ਪਾਦਯਮਾਨਾ ਉਪ੍ਪਾਦਾਯ ਪਵਤ੍ਤਿਯਾ ਚ ਮੂਲਕਾਰਣਟ੍ਠੇਨ ਸਮੁਦਯੋ ਨਾਮ, ਸਮੁਦਯਭੂਤਾ ਠਿਤੀਤਿ ਸਮੁਦਯਟ੍ਠਿਤਿ, ਮੂਲਕਾਰਣਭੂਤਾ ਠਿਤੀਤਿ ਅਤ੍ਥੋ. ਅਵਿਜ੍ਜਾਵ ਸਙ੍ਖਾਰਾਨਂ ਉਪ੍ਪਾਦੇ ਜਨਕਪਚ੍ਚਯਤ੍ਤਾ, ਪਵਤ੍ਤਿਯਂ ਉਪਤ੍ਥਮ੍ਭਕਪਚ੍ਚਯਤ੍ਤਾ ਹੇਤੁਟ੍ਠਿਤਿ ਪਚ੍ਚਯਟ੍ਠਿਤੀਤਿ ਵੁਤ੍ਤਾ, ਹੇਤੁਭੂਤਾ ਠਿਤਿ, ਪਚ੍ਚਯਭੂਤਾ ਠਿਤੀਤਿ ਅਤ੍ਥੋ. ਜਨਕਪਚ੍ਚਯੋ ਹਿ ਹੇਤੂਤਿ, ਉਪਤ੍ਥਮ੍ਭਕੋ ਪਚ੍ਚਯੋਤਿ ਵੁਚ੍ਚਤਿ. ਏਵਂ ਸੇਸੇਸੁਪਿ ਯੋਜੇਤਬ੍ਬਂ.
ਭਵੋ ਜਾਤਿਯਾ, ਜਾਤਿ ਜਰਾਮਰਣਸ੍ਸਾਤਿ ਏਤ੍ਥ ਪਨ ਉਪ੍ਪਾਦਟ੍ਠਿਤਿ ਸਞ੍ਞੋਗਟ੍ਠਿਤਿ ਹੇਤੁਟ੍ਠਿਤੀਤਿ ਉਪ੍ਪਾਦਵਸੇਨ ਯੋਜਿਤਾਨਿ ਪਦਾਨਿ ਜਾਤਿਜਰਾਮਰਣਵਨ੍ਤਾਨਂ ਖਨ੍ਧਾਨਂ ਵਸੇਨ ਪਰਿਯਾਯੇਨ ਵੁਤ੍ਤਾਨੀਤਿ ਵੇਦਿਤਬ੍ਬਾਨਿ. ਕੇਚਿ ਪਨ ‘‘ਉਪ੍ਪਾਦਾਯ ਠਿਤਿ ਉਪ੍ਪਾਦਟ੍ਠਿਤੀ’’ਤਿ ਏਵਮਾਦਿਨਾ ਨਯੇਨੇਤ੍ਥ ਅਤ੍ਥਂ ਵਣ੍ਣਯਨ੍ਤਿ. ਅਵਿਜ੍ਜਾ ਪਚ੍ਚਯੋਤਿ ਅਵਿਜ੍ਜਾਯ ਸਙ੍ਖਾਰਾਨਂ ਪਚ੍ਚਯਭਾਵਂ ਅਪੇਕ੍ਖਿਤ੍ਵਾ ਵੁਤ੍ਤਂ. ਅਵਿਜ੍ਜਾਯਪਿ ਪਚ੍ਚਯਸਮ੍ਭੂਤਤ੍ਤਾ ਤਸ੍ਸਾ ਅਪਿ ਪਚ੍ਚਯਪਰਿਗ੍ਗਹਣਦਸ੍ਸਨਤ੍ਥਂ ਉਭੋਪੇਤੇ ਧਮ੍ਮਾ ਪਚ੍ਚਯਸਮੁਪ੍ਪਨ੍ਨਾਤਿ ਪਚ੍ਚਯਪਰਿਗ੍ਗਹੇ ਪਞ੍ਞਾਤਿ ਵੁਤ੍ਤਂ. ਏਵਂ ਸੇਸੇਸੁਪਿ ਯੋਜੇਤਬ੍ਬਂ. ਜਾਤਿ ਪਚ੍ਚਯੋ, ਜਰਾਮਰਣਂ ਪਚ੍ਚਯਸਮੁਪ੍ਪਨ੍ਨਨ੍ਤਿ ਪਨ ਪਰਿਯਾਯੇਨ ਵੁਤ੍ਤਂ. ਅਤੀਤਮ੍ਪਿ ਅਦ੍ਧਾਨਨ੍ਤਿ ਅਤਿਕ੍ਕਨ੍ਤਮ੍ਪਿ ਕਾਲਂ. ਅਨਾਗਤਮ੍ਪਿ ਅਦ੍ਧਾਨਨ੍ਤਿ ਅਪ੍ਪਤ੍ਤਮ੍ਪਿ ਕਾਲਂ. ਉਭਯਤ੍ਥਾਪਿ ਅਚ੍ਚਨ੍ਤਸਂਯੋਗਤ੍ਥੇ ਉਪਯੋਗਵਚਨਂ.
੪੬. ਇਦਾਨਿ ਨਵਾਕਾਰਵਾਰਾਨਨ੍ਤਰਂ ਤੇ ਨਵਾਕਾਰੇ ਵਿਹਾਯ ਹੇਤੁਪਟਿਚ੍ਚਪਚ੍ਚਯਪਦੇਹੇਵ ਯੋਜੇਤ੍ਵਾ ਅਵਿਜ੍ਜਾ ਹੇਤੁ, ਸਙ੍ਖਾਰਾ ਹੇਤੁਸਮੁਪ੍ਪਨ੍ਨਾਤਿਆਦਯੋ ਤਯੋ ਵਾਰਾ ਨਿਦ੍ਦਿਟ੍ਠਾ. ਨਵਾਕਾਰਵਾਰੇ ਜਨਕਉਪਤ੍ਥਮ੍ਭਕਵਸੇਨ ਪਚ੍ਚਯੋ ਵੁਤ੍ਤੋ. ਇਧ ਪਨ ਹੇਤੁਵਾਰਸ੍ਸ ਪਚ੍ਚਯਵਾਰਸ੍ਸ ਚ ਵਿਸੁਂ ਆਗਤਤ੍ਤਾ ਹੇਤੂਤਿ ਜਨਕਪਚ੍ਚਯਤ੍ਤਂ, ਪਚ੍ਚਯੋਤਿ ਉਪਤ੍ਥਮ੍ਭਕਪਚ੍ਚਯਤ੍ਤਂ ਵੇਦਿਤਬ੍ਬਂ ਏਕੇਕਸ੍ਸਾਪਿ ਅਵਿਜ੍ਜਾਦਿਕਸ੍ਸ ਪਚ੍ਚਯਸ੍ਸ ਉਭਯਥਾ ਸਮ੍ਭਵਤੋ. ਪਟਿਚ੍ਚਵਾਰੇ ਅਵਿਜ੍ਜਾ ਪਟਿਚ੍ਚਾਤਿ ਅਤ੍ਤਨੋ ਉਪ੍ਪਾਦੇ ਸਙ੍ਖਾਰਾਨਂ ਅਵਿਜ੍ਜਾਪੇਕ੍ਖਤ੍ਤਾ ਸਙ੍ਖਾਰੇਹਿ ਅਵਿਜ੍ਜਾ ਪਟਿਮੁਖਂ ਏਤਬ੍ਬਾ ਗਨ੍ਤਬ੍ਬਾਤਿ ਪਟਿਚ੍ਚਾ. ਏਤੇਨ ਅਵਿਜ੍ਜਾਯ ਸਙ੍ਖਾਰੁਪ੍ਪਾਦਨਸਮਤ੍ਥਤਾ ਵੁਤ੍ਤਾ ਹੋਤਿ. ਸਙ੍ਖਾਰਾ ਪਟਿਚ੍ਚਸਮੁਪ੍ਪਨ੍ਨਾਤਿ ਸਙ੍ਖਾਰਾ ਅਵਿਜ੍ਜਂ ਪਟਿਚ੍ਚ ਤਦਭਿਮੁਖਂ ਪਵਤ੍ਤਨਤੋ ਪਟਿਮੁਖਂ ਕਤ੍ਵਾ ਨ ਵਿਹਾਯ ਸਮਂ ਉਪ੍ਪਨ੍ਨਾ. ਏਵਂ ਸੇਸੇਸੁਪਿ ਲਿਙ੍ਗਾਨੁਰੂਪੇਨ ਯੋਜੇਤਬ੍ਬਂ. ਅਵਿਜ੍ਜਾ ਪਟਿਚ੍ਚਾਤਿ ਉਸ੍ਸੁਕ੍ਕਵਸੇਨ ਵਾ ਪਾਠੋ, ਅਤ੍ਥੋ ਪਨੇਤ੍ਥ ਅਵਿਜ੍ਜਾ ਅਤ੍ਤਨੋ ਪਚ੍ਚਯੇ ਪਟਿਚ੍ਚ ਪਵਤ੍ਤਾਤਿ ਪਾਠਸੇਸਵਸੇਨ ਯੋਜੇਤਬ੍ਬੋ. ਏਵਂ ਸੇਸੇਸੁਪਿ. ਚਤੂਸੁਪਿ ਚ ਏਤੇਸੁ ਵਾਰੇਸੁ ਦ੍ਵਾਦਸਨ੍ਨਂ ਪਟਿਚ੍ਚਸਮੁਪ੍ਪਾਦਙ੍ਗਾਨਂ ਪਚ੍ਚਯਸ੍ਸੇਵ ਵਸੇਨ ਧਮ੍ਮਟ੍ਠਿਤਿਞਾਣਸ੍ਸ ਨਿਦ੍ਦਿਸਿਤਬ੍ਬਤ੍ਤਾ ਅਵਿਜ੍ਜਾਦੀਨਂ ਏਕਾਦਸਨ੍ਨਂਯੇਵ ਅਙ੍ਗਾਨਂ ਵਸੇਨ ਧਮ੍ਮਟ੍ਠਿਤਿਞਾਣਂ ਨਿਦ੍ਦਿਟ੍ਠਂ, ਜਰਾਮਰਣਸ੍ਸ ਪਨ ਅਨ੍ਤੇ ਠਿਤਤ੍ਤਾ ਤਸ੍ਸ ਵਸੇਨ ਨ ਨਿਦ੍ਦਿਟ੍ਠਂ. ਜਰਾਮਰਣਸ੍ਸਾਪਿ ਸੋਕਪਰਿਦੇਵਦੁਕ੍ਖਦੋਮਨਸ੍ਸੁਪਾਯਾਸਾਨਂ ਪਚ੍ਚਯਤ੍ਤਾ ਜਰਾਮਰਣਂ ਤੇਸਂ ਪਚ੍ਚਯਂ ਕਤ੍ਵਾ ਉਪਪਰਿਕ੍ਖਮਾਨਸ੍ਸ ਤਸ੍ਸਾਪਿ ਜਰਾਮਰਣਸ੍ਸ ਵਸੇਨ ਧਮ੍ਮਟ੍ਠਿਤਿਞਾਣਂ ਯੁਜ੍ਜਤੇਵ.
੪੭. ਇਦਾਨਿ ਤਾਨੇਵ ਦ੍ਵਾਦਸ ਪਟਿਚ੍ਚਸਮੁਪ੍ਪਾਦਙ੍ਗਾਨਿ ਵੀਸਤਿਆਕਾਰਵਸੇਨ ਵਿਭਜਿਤ੍ਵਾ ਚਤੁਸਙ੍ਖੇਪਤਿਯਦ੍ਧਤਿਸਨ੍ਧਿਯੋ ਦਸ੍ਸੇਤ੍ਵਾ ਧਮ੍ਮਟ੍ਠਿਤਿਞਾਣਂ ਨਿਦ੍ਦਿਸਿਤੁਕਾਮੋ ਪੁਰਿਮਕਮ੍ਮਭਵਸ੍ਮਿਨ੍ਤਿਆਦਿਮਾਹ. ਤਤ੍ਥ ਪੁਰਿਮਕਮ੍ਮਭਵਸ੍ਮਿਨ੍ਤਿ ਪੁਰਿਮੇ ਕਮ੍ਮਭਵੇ, ਅਤੀਤਜਾਤਿਯਂ ਕਮ੍ਮਭਵੇ ਕਰਿਯਮਾਨੇਤਿ ਅਤ੍ਥੋ. ਮੋਹੋ ਅਵਿਜ੍ਜਾਤਿ ਯੋ ਤਦਾ ਦੁਕ੍ਖਾਦੀਸੁ ਮੋਹੋ, ਯੇਨ ਮੂਲ਼੍ਹੋ ਕਮ੍ਮਂ ਕਰੋਤਿ, ਸਾ ਅਵਿਜ੍ਜਾ. ਆਯੂਹਨਾ ਸਙ੍ਖਾਰਾਤਿ ਤਂ ਕਮ੍ਮਂ ਕਰੋਨ੍ਤਸ੍ਸ ਪੁਰਿਮਚੇਤਨਾਯੋ, ਯਥਾ ‘‘ਦਾਨਂ ਦਸ੍ਸਾਮੀ’’ਤਿ ਚਿਤ੍ਤਂ ਉਪ੍ਪਾਦੇਤ੍ਵਾ ਮਾਸਮ੍ਪਿ ਸਂਵਚ੍ਛਰਮ੍ਪਿ ਦਾਨੂਪਕਰਣਾਨਿ ਸਜ੍ਜੇਨ੍ਤਸ੍ਸ ਉਪ੍ਪਨ੍ਨਾ ਪੁਰਿਮਚੇਤਨਾਯੋ. ਪਟਿਗ੍ਗਾਹਕਾਨਂ ਪਨ ਹਤ੍ਥੇ ਦਕ੍ਖਿਣਂ ਪਤਿਟ੍ਠਾਪਯਤੋ ਚੇਤਨਾ ਭਵੋਤਿ ਵੁਚ੍ਚਤਿ. ਏਕਾਵਜ੍ਜਨੇਸੁ ਵਾ ਛਸੁ ਜਵਨੇਸੁ ਚੇਤਨਾ ਆਯੂਹਨਾ ਸਙ੍ਖਾਰਾ ਨਾਮ, ਸਤ੍ਤਮਜਵਨੇ ਚੇਤਨਾ ਭਵੋ. ਯਾ ਕਾਚਿ ਵਾ ਪਨ ਚੇਤਨਾ ਭਵੋ, ਤਂਸਮ੍ਪਯੁਤ੍ਤਾ ਆਯੂਹਨਾ ਸਙ੍ਖਾਰਾ ਨਾਮ.
ਨਿਕਨ੍ਤਿ ਤਣ੍ਹਾਤਿ ਯਾ ਕਮ੍ਮਂ ਕਰੋਨ੍ਤਸ੍ਸ ਤਸ੍ਸ ਫਲੇ ਉਪਪਤ੍ਤਿਭਵੇ ਨਿਕਾਮਨਾ ਪਤ੍ਥਨਾ, ਸਾ ਤਣ੍ਹਾ ਨਾਮ. ਉਪਗਮਨਂ ਉਪਾਦਾਨਨ੍ਤਿ ਯਂ ਕਮ੍ਮਭਵਸ੍ਸ ਪਚ੍ਚਯਭੂਤਂ ‘‘ਇਮਸ੍ਮਿਂ ਨਾਮ ਕਮ੍ਮੇ ਕਤੇ ਕਾਮਾ ਸਮ੍ਪਜ੍ਜਨ੍ਤੀ’’ਤਿ ਵਾ ‘‘ਇਦਂ ਕਤ੍ਵਾ ਅਸੁਕਸ੍ਮਿਂ ਨਾਮ ਠਾਨੇ ਕਾਮੇ ਸੇਵਿਸ੍ਸਾਮੀ’’ਤਿ ਵਾ ‘‘ਅਤ੍ਤਾ ਉਚ੍ਛਿਨ੍ਨੋ ਸੁਉਚ੍ਛਿਨ੍ਨੋ ਹੋਤੀ’’ਤਿ ਵਾ ‘‘ਸੁਖੀ ਹੋਤਿਂ ਵਿਗਤਪਰਿਲ਼ਾਹੋ’’ਤਿ ਵਾ ‘‘ਸੀਲਬ੍ਬਤਂ ਸੁਖੇਨ ਪਰਿਪੂਰਤੀ’’ਤਿ ਵਾ ਪਵਤ੍ਤਂ ਉਪਗਮਨਂ ਦਲ਼੍ਹਗਹਣਂ, ਇਦਂ ਉਪਾਦਾਨਂ ਨਾਮ. ਚੇਤਨਾ ਭਵੋਤਿ ਆਯੂਹਨਾਵਸਾਨੇ ਵੁਤ੍ਤਾ ਚੇਤਨਾ ਭਵੋ ਨਾਮ. ਪੁਰਿਮਕਮ੍ਮਭਵਸ੍ਮਿਨ੍ਤਿ ਅਤੀਤਜਾਤਿਯਾ ਕਮ੍ਮਭਵੇ ਕਰਿਯਮਾਨੇ ਪਵਤ੍ਤਾ. ਇਧ ਪਟਿਸਨ੍ਧਿਯਾ ਪਚ੍ਚਯਾਤਿ ਪਚ੍ਚੁਪ੍ਪਨ੍ਨਪਟਿਸਨ੍ਧਿਯਾ ਪਚ੍ਚਯਭੂਤਾ.
ਇਧ ਪਟਿਸਨ੍ਧਿ ਵਿਞ੍ਞਾਣਨ੍ਤਿ ਯਂ ਪਚ੍ਚੁਪ੍ਪਨ੍ਨਭਵਸ੍ਸ ਭਵਨ੍ਤਰਪਟਿਸਨ੍ਧਾਨਵਸੇਨ ਉਪ੍ਪਨ੍ਨਤ੍ਤਾ ਪਟਿਸਨ੍ਧੀਤਿ ਵੁਚ੍ਚਤਿ, ਤਂ ਵਿਞ੍ਞਾਣਂ. ਓਕ੍ਕਨ੍ਤਿ ਨਾਮਰੂਪਨ੍ਤਿ ਯਾ ਗਬ੍ਭੇ ਰੂਪਾਰੂਪਧਮ੍ਮਾਨਂ ਓਕ੍ਕਨ੍ਤਿ ਆਗਨ੍ਤ੍ਵਾ ਪਵਿਸਨਂ ਵਿਯ, ਇਦਂ ਨਾਮਰੂਪਂ. ਪਸਾਦੋ ਆਯਤਨਨ੍ਤਿ ਯੋ ਪਸਨ੍ਨਭਾਵੋ, ਇਦਂ ਆਯਤਨਂ. ਜਾਤਿਗ੍ਗਹਣੇਨ ਏਕਵਚਨਂ ਕਤਂ. ਏਤੇਨ ਚਕ੍ਖਾਦੀਨਿ ਪਞ੍ਚਾਯਤਨਾਨਿ ਵੁਤ੍ਤਾਨਿ. ‘‘ਪਭਸ੍ਸਰਮਿਦਂ, ਭਿਕ੍ਖਵੇ, ਚਿਤ੍ਤਂ, ਤਞ੍ਚ ਖੋ ਆਗਨ੍ਤੁਕੇਹਿ ਉਪਕ੍ਕਿਲੇਸੇਹਿ ਉਪਕ੍ਕਿਲਿਟ੍ਠ’’ਨ੍ਤਿ (ਅ. ਨਿ. ੧.੪੯) ਏਤ੍ਥ ਭਵਙ੍ਗਚਿਤ੍ਤਂ ਅਧਿਪ੍ਪੇਤਨ੍ਤਿ ਵਚਨਤੋ ਇਧਾਪਿ ਮਨਾਯਤਨਸ੍ਸ ਵਿਪਾਕਭੂਤਤ੍ਤਾ, ਤਸ੍ਸ ਚ ਕਿਲੇਸਕਾਲੁਸ੍ਸਿਯਾਭਾਵੇਨ ਪਸਨ੍ਨਤ੍ਤਾ ਪਸਾਦਵਚਨੇਨ ਮਨਾਯਤਨਮ੍ਪਿ ਵੁਤ੍ਤਨ੍ਤਿ ਵੇਦਿਤਬ੍ਬਂ. ਫੁਟ੍ਠੋ ਫਸ੍ਸੋਤਿ ਯੋ ਆਰਮ੍ਮਣਂ ਫੁਟ੍ਠੋ ਫੁਸਨ੍ਤੋ ਉਪ੍ਪਨ੍ਨੋ, ਅਯਂ ਫਸ੍ਸੋ. ਵੇਦਯਿਤਂ ਵੇਦਨਾਤਿ ਯਂ ਪਟਿਸਨ੍ਧਿਵਿਞ੍ਞਾਣੇਨ ਵਾ ਸਲ਼ਾਯਤਨਪਚ੍ਚਯੇਨ ਵਾ ਫਸ੍ਸੇਨ ਸਹ ਉਪ੍ਪਨ੍ਨਂ ਵਿਪਾਕਵੇਦਯਿਤਂ, ਅਯਂ ਵੇਦਨਾ. ਇਧੁਪਪਤ੍ਤਿਭਵਸ੍ਮਿਂ ਪੁਰੇਕਤਸ੍ਸ ਕਮ੍ਮਸ੍ਸ ਪਚ੍ਚਯਾਤਿ ਪਚ੍ਚੁਪ੍ਪਨ੍ਨੇ ਵਿਪਾਕਭਵੇ ਅਤੀਤਜਾਤਿਯਂ ਕਤਸ੍ਸ ਕਮ੍ਮਸ੍ਸ ਪਚ੍ਚਯੇਨ ਪਵਤ੍ਤਨ੍ਤੀਤਿ ਅਤ੍ਥੋ.
ਇਧ ਪਰਿਪਕ੍ਕਤ੍ਤਾ ਆਯਤਨਾਨਨ੍ਤਿ ਪਰਿਪਕ੍ਕਾਯਤਨਸ੍ਸ ਕਮ੍ਮਕਰਣਕਾਲੇ ਮੋਹਾਦਯੋ ਦਸ੍ਸਿਤਾ. ਆਯਤਿਂ ਪਟਿਸਨ੍ਧਿਯਾਤਿ ਅਨਾਗਤੇ ਪਟਿਸਨ੍ਧਿਯਾ. ਆਯਤਿਂ ਪਟਿਸਨ੍ਧਿ ਵਿਞ੍ਞਾਣਨ੍ਤਿਆਦੀਨਿ ਵੁਤ੍ਤਤ੍ਥਾਨਿ.
ਕਥਂ ਪਨ ਦ੍ਵਾਦਸਹਿ ਪਟਿਚ੍ਚਸਮੁਪ੍ਪਾਦਙ੍ਗੇਹਿ ਇਮੇ ਵੀਸਤਿ ਆਕਾਰਾ ਗਹਿਤਾ ਹੋਨ੍ਤੀਤਿ? ਅਵਿਜ੍ਜਾ ਸਙ੍ਖਾਰਾਤਿ ਇਮੇ ਦ੍ਵੇ ਅਤੀਤਹੇਤੁਯੋ ਸਰੂਪਤੋ ਵੁਤ੍ਤਾ. ਯਸ੍ਮਾ ਪਨ ਅਵਿਦ੍ਵਾ ਪਰਿਤਸ੍ਸਤਿ, ਪਰਿਤਸ੍ਸਿਤੋ ਉਪਾਦਿਯਤਿ, ਤਸ੍ਸੁਪਾਦਾਨਪਚ੍ਚਯਾ ਭਵੋ, ਤਸ੍ਮਾ ਤੇਹਿ ਦ੍ਵੀਹਿ ਗਹਿਤੇਹਿ ਤਣ੍ਹੁਪਾਦਾਨਭਵਾਪਿ ਗਹਿਤਾਵ ਹੋਨ੍ਤਿ. ਪਚ੍ਚੁਪ੍ਪਨ੍ਨੇ ਵਿਞ੍ਞਾਣਨਾਮਰੂਪਸਲ਼ਾਯਤਨਫਸ੍ਸਵੇਦਨਾ ਸਰੂਪਤੋ ਵੁਤ੍ਤਾਯੇਵ. ਤਣ੍ਹੁਪਾਦਾਨਭਵਾ ਪਚ੍ਚੁਪ੍ਪਨ੍ਨਹੇਤੁਯੋ ਸਰੂਪਤੋ ਵੁਤ੍ਤਾ. ਭਵੇ ਪਨ ਗਹਿਤੇ ਤਸ੍ਸ ਪੁਬ੍ਬਭਾਗਾ ਤਂਸਮ੍ਪਯੁਤ੍ਤਾ ਵਾ ਸਙ੍ਖਾਰਾ ਗਹਿਤਾਵ ਹੋਨ੍ਤਿ, ਤਣ੍ਹੁਪਾਦਾਨਗ੍ਗਹਣੇਨ ਚ ਤਂਸਮ੍ਪਯੁਤ੍ਤਾ. ਯਾਯ ਵਾ ਮੂਲ਼੍ਹੋ ਕਮ੍ਮਂ ਕਰੋਤਿ, ਸਾ ਅਵਿਜ੍ਜਾ ਗਹਿਤਾਵ ਹੋਤਿ. ਅਨਾਗਤੇ ਜਾਤਿ ਜਰਾਮਰਣਨ੍ਤਿ ਦ੍ਵੇ ਸਰੂਪੇਨ ਵੁਤ੍ਤਾਨਿ, ਜਾਤਿਜਰਾਮਰਣਗ੍ਗਹਣੇਨੇਵ ਪਨ ਵਿਞ੍ਞਾਣਾਦੀਨਿ ਪਞ੍ਚ ਅਨਾਗਤਫਲਾਨਿ ਗਹਿਤਾਨੇਵ ਹੋਨ੍ਤਿ. ਤੇਸਂਯੇਵ ਹਿ ਜਾਤਿਜਰਾਮਰਣਾਨੀਤਿ ਏਵਂ ਦ੍ਵਾਦਸਹਿ ਅਙ੍ਗੇਹਿ ਵੀਸਤਿ ਆਕਾਰਾ ਗਹਿਤਾ ਹੋਨ੍ਤਿ.
‘‘ਅਤੀਤੇ ਹੇਤਵੋ ਪਞ੍ਚ, ਇਦਾਨਿ ਫਲਪਞ੍ਚਕਂ;
ਇਦਾਨਿ ਹੇਤਵੋ ਪਞ੍ਚ, ਆਯਤਿਂ ਫਲਪਞ੍ਚਕ’’ਨ੍ਤਿ. –
ਗਾਥਾਯ ਅਯਮੇਵਤ੍ਥੋ ਵੁਤ੍ਤੋ. ਇਤਿਮੇਤਿ ਇਤਿ ਇਮੇ. ਇਤਿ ਇਮੇਤਿ ਵਾ ਪਾਠੋ.
ਚਤੁਸਙ੍ਖੇਪੇਤਿ ਚਤੁਰੋ ਰਾਸੀ. ਅਤੀਤੇ ਪਞ੍ਚ ਹੇਤੁਧਮ੍ਮਾ ਏਕੋ ਹੇਤੁਸਙ੍ਖੇਪੋ, ਪਚ੍ਚੁਪ੍ਪਨ੍ਨੇ ਪਞ੍ਚ ਫਲਧਮ੍ਮਾ ਏਕੋ ਫਲਸਙ੍ਖੇਪੋ, ਪਚ੍ਚੁਪ੍ਪਨ੍ਨੇ ਪਞ੍ਚ ਹੇਤੁਧਮ੍ਮਾ ਏਕੋ ਹੇਤੁਸਙ੍ਖੇਪੋ, ਅਨਾਗਤੇ ਪਞ੍ਚ ਫਲਧਮ੍ਮਾ ਏਕੋ ਫਲਸਙ੍ਖੇਪੋ.
ਤਯੋ ਅਦ੍ਧੇਤਿ ਤਯੋ ਕਾਲੇ. ਪਠਮਪਞ੍ਚਕਵਸੇਨ ਅਤੀਤਕਾਲੋ, ਦੁਤਿਯਤਤਿਯਪਞ੍ਚਕਵਸੇਨ ਪਚ੍ਚੁਪ੍ਪਨ੍ਨਕਾਲੋ, ਚਤੁਤ੍ਥਪਞ੍ਚਕਵਸੇਨ ਅਨਾਗਤਕਾਲੋ ਵੇਦਿਤਬ੍ਬੋ.
ਤਿਸਨ੍ਧਿਨ੍ਤਿ ਤਯੋ ਸਨ੍ਧਯੋ ਅਸ੍ਸਾਤਿ ਤਿਸਨ੍ਧਿ, ਤਂ ਤਿਸਨ੍ਧਿਂ. ਅਤੀਤਹੇਤੁਪਚ੍ਚੁਪ੍ਪਨ੍ਨਫਲਾਨਮਨ੍ਤਰਾ ਏਕੋ ਹੇਤੁਫਲਸਨ੍ਧਿ, ਪਚ੍ਚੁਪ੍ਪਨ੍ਨਫਲਅਨਾਗਤਹੇਤੂਨਮਨ੍ਤਰਾ ਏਕੋ ਫਲਹੇਤੁਸਨ੍ਧਿ, ਪਚ੍ਚੁਪ੍ਪਨ੍ਨਹੇਤੁਅਨਾਗਤਫਲਾਨਮਨ੍ਤਰਾ ਏਕੋ ਹੇਤੁਫਲਸਨ੍ਧਿ.
ਪਟਿਚ੍ਚਸਮੁਪ੍ਪਾਦਪਾਲ਼ਿਯਂ ਸਰੂਪਤੋ ਆਗਤਵਸੇਨ ਪਨ ਅਵਿਜ੍ਜਾਸਙ੍ਖਾਰਾ ਏਕੋ ਸਙ੍ਖੇਪੋ, ਵਿਞ੍ਞਾਣਨਾਮਰੂਪਸਲ਼ਾਯਤਨਫਸ੍ਸਵੇਦਨਾ ਦੁਤਿਯੋ, ਤਣ੍ਹੁਪਾਦਾਨਭਵਾ ਤਤਿਯੋ, ਜਾਤਿਜਰਾਮਰਣਂ ਚਤੁਤ੍ਥੋ. ਅਵਿਜ੍ਜਾਸਙ੍ਖਾਰਾਤਿ ਦ੍ਵੇ ਅਙ੍ਗਾਨਿ ਅਤੀਤਕਾਲਾਨਿ, ਵਿਞ੍ਞਾਣਾਦੀਨਿ ਭਵਾਵਸਾਨਾਨਿ ਅਟ੍ਠ ਪਚ੍ਚੁਪ੍ਪਨ੍ਨਕਾਲਾਨਿ, ਜਾਤਿਜਰਾਮਰਣਨ੍ਤਿ ਦ੍ਵੇ ਅਨਾਗਤਕਾਲਾਨਿ. ਸਙ੍ਖਾਰਵਿਞ੍ਞਾਣਾਨਂ ਅਨ੍ਤਰਾ ਏਕੋ ਹੇਤੁਫਲਸਨ੍ਧਿ, ਵੇਦਨਾਤਣ੍ਹਾਨਮਨ੍ਤਰਾ ਏਕੋ ਫਲਹੇਤੁਸਨ੍ਧਿ, ਭਵਜਾਤੀਨਮਨ੍ਤਰਾ ਏਕੋ ਹੇਤੁਫਲਸਨ੍ਧਿ.
ਵੀਸਤਿਯਾ ਆਕਾਰੇਹੀਤਿ ਵੀਸਤਿਯਾ ਕੋਟ੍ਠਾਸੇਹਿ. ਚਤੁਸਙ੍ਖੇਪੇ ਚ ਤਯੋ ਅਦ੍ਧੇ ਚ ਤਿਸਨ੍ਧਿਂ ਪਟਿਚ੍ਚਸਮੁਪ੍ਪਾਦਞ੍ਚ ਵੀਸਤਿਯਾ ਆਕਾਰੇਹਿ ਜਾਨਾਤੀਤਿ ਸਮ੍ਬਨ੍ਧੋ.
ਜਾਨਾਤੀਤਿ ਸੁਤਾਨੁਸਾਰੇਨ ਭਾਵਨਾਰਮ੍ਭਞਾਣੇਨ ਜਾਨਾਤਿ. ਪਸ੍ਸਤੀਤਿ ਞਾਤਮੇਵ ਚਕ੍ਖੁਨਾ ਦਿਟ੍ਠਂ ਵਿਯ ਹਤ੍ਥਤਲੇ ਆਮਲਕਂ ਵਿਯ ਚ ਫੁਟਂ ਕਤ੍ਵਾ ਞਾਣੇਨੇਵ ਪਸ੍ਸਤਿ. ਅਞ੍ਞਾਤੀਤਿ ਦਿਟ੍ਠਮਰਿਯਾਦੇਨੇਵ ਆਸੇਵਨਂ ਕਰੋਨ੍ਤੋ ਞਾਣੇਨੇਵ ਜਾਨਾਤਿ. ਮਰਿਯਾਦਤ੍ਥੋ ਹਿ ਏਤ੍ਥ ਆਕਾਰੋ. ਪਟਿਵਿਜ੍ਝਤੀਤਿ ਭਾਵਨਾਪਾਰਿਪੂਰਿਯਾ ਨਿਟ੍ਠਂ ਪਾਪੇਨ੍ਤੋ ਞਾਣੇਨੇਵ ਪਟਿਵੇਧਂ ਕਰੋਤਿ. ਸਲਕ੍ਖਣਵਸੇਨ ਵਾ ਜਾਨਾਤਿ, ਸਰਸਵਸੇਨ ਪਸ੍ਸਤਿ, ਪਚ੍ਚੁਪਟ੍ਠਾਨਵਸੇਨ ਅਞ੍ਞਾਤਿ, ਪਦਟ੍ਠਾਨਵਸੇਨ ਪਟਿਵਿਜ੍ਝਤਿ.
ਤਤ੍ਥ ਪਟਿਚ੍ਚਸਮੁਪ੍ਪਾਦੋਤਿ ਪਚ੍ਚਯਧਮ੍ਮਾ ਵੇਦਿਤਬ੍ਬਾ. ਪਟਿਚ੍ਚਸਮੁਪ੍ਪਨ੍ਨਾ ਧਮ੍ਮਾਤਿ ਤੇਹਿ ਤੇਹਿ ਪਚ੍ਚਯੇਹਿ ਨਿਬ੍ਬਤ੍ਤਧਮ੍ਮਾ. ਕਥਮਿਦਂ ਜਾਨਿਤਬ੍ਬਨ੍ਤਿ ਚੇ? ਭਗਵਤੋ ਵਚਨੇਨ. ਭਗਵਤਾ ਹਿ ਪਟਿਚ੍ਚਸਮੁਪ੍ਪਾਦਪਟਿਚ੍ਚਸਮੁਪ੍ਪਨ੍ਨਧਮ੍ਮਦੇਸਨਾਸੁਤ੍ਤੇ –
‘‘ਕਤਮੋ ਚ, ਭਿਕ੍ਖਵੇ, ਪਟਿਚ੍ਚਸਮੁਪ੍ਪਾਦੋ, ਜਾਤਿਪਚ੍ਚਯਾ, ਭਿਕ੍ਖਵੇ, ਜਰਾਮਰਣਂ, ਉਪ੍ਪਾਦਾ ਵਾ ਤਥਾਗਤਾਨਂ ਅਨੁਪ੍ਪਾਦਾ ਵਾ ਤਥਾਗਤਾਨਂ ਠਿਤਾਵ ਸਾ ਧਾਤੁ ਧਮ੍ਮਟ੍ਠਿਤਤਾ ਧਮ੍ਮਨਿਯਾਮਤਾ ਇਦਪ੍ਪਚ੍ਚਯਤਾ, ਤਂ ਤਥਾਗਤੋ ਅਭਿਸਮ੍ਬੁਜ੍ਝਤਿ ਅਭਿਸਮੇਤਿ, ਅਭਿਸਮ੍ਬੁਜ੍ਝਿਤ੍ਵਾ ਅਭਿਸਮੇਤ੍ਵਾ ਆਚਿਕ੍ਖਤਿ ਦੇਸੇਤਿ ਪਞ੍ਞਾਪੇਤਿ ਪਟ੍ਠਪੇਤਿ ਵਿਵਰਤਿ ਵਿਭਜਤਿ ਉਤ੍ਤਾਨੀਕਰੋਤਿ ‘ਪਸ੍ਸਥਾ’ਤਿ ਚਾਹ. ਜਾਤਿਪਚ੍ਚਯਾ, ਭਿਕ੍ਖਵੇ, ਜਰਾਮਰਣਂ, ਭਵਪਚ੍ਚਯਾ, ਭਿਕ੍ਖਵੇ, ਜਾਤਿ…ਪੇ… ਅਵਿਜ੍ਜਾਪਚ੍ਚਯਾ, ਭਿਕ੍ਖਵੇ, ਸਙ੍ਖਾਰਾ. ਉਪ੍ਪਾਦਾ ਵਾ ਤਥਾਗਤਾਨਂ…ਪੇ… ਉਤ੍ਤਾਨੀਕਰੋਤਿ ‘ਪਸ੍ਸਥਾ’ਤਿ ਚਾਹ. ਅਵਿਜ੍ਜਾਪਚ੍ਚਯਾ, ਭਿਕ੍ਖਵੇ, ਸਙ੍ਖਾਰਾ. ਇਤਿ ਖੋ, ਭਿਕ੍ਖਵੇ, ਯਾ ਤਤ੍ਰਤ ਥਤਾ ਅਵਿਤਥਤਾ ਅਨਞ੍ਞਥਤਾ ਇਦਪ੍ਪਚ੍ਚਯਤਾ. ਅਯਂ ਵੁਚ੍ਚਤਿ, ਭਿਕ੍ਖਵੇ, ਪਟਿਚ੍ਚਸਮੁਪ੍ਪਾਦੋ’’ਤਿ (ਸਂ. ਨਿ. ੨.੨੦) –
ਏਵਂ ਪਟਿਚ੍ਚਸਮੁਪ੍ਪਾਦਂ ਦੇਸੇਨ੍ਤੇਨ ਤਥਤਾਦੀਹਿ ਵੇਵਚਨੇਹਿ ਪਚ੍ਚਯਧਮ੍ਮਾਵ ਪਟਿਚ੍ਚਸਮੁਪ੍ਪਾਦੋਤਿ ਵੁਤ੍ਤਾ. ਤਸ੍ਮਾ ਜਰਾਮਰਣਾਦੀਨਂ ਪਚ੍ਚਯਲਕ੍ਖਣੋ ਪਟਿਚ੍ਚਸਮੁਪ੍ਪਾਦੋ, ਦੁਕ੍ਖਾਨੁਬਨ੍ਧਨਰਸੋ ਕੁਮ੍ਮਗ੍ਗਪਚ੍ਚੁਪਟ੍ਠਾਨੋ, ਅਯਮ੍ਪਿ ਸਪਚ੍ਚਯਤ੍ਤਾ ਅਤ੍ਤਨੋ ਵਿਸੇਸਪਚ੍ਚਯਪਦਟ੍ਠਾਨੋ.
ਉਪ੍ਪਾਦਾ ਵਾ ਅਨੁਪ੍ਪਾਦਾ ਵਾਤਿ ਉਪ੍ਪਾਦੇ ਵਾ ਅਨੁਪ੍ਪਾਦੇ ਵਾ, ਤਥਾਗਤੇਸੁ ਉਪ੍ਪਨ੍ਨੇਸੁਪਿ ਅਨੁਪ੍ਪਨ੍ਨੇਸੁਪੀਤਿ ਅਤ੍ਥੋ. ਠਿਤਾਵ ਸਾ ਧਾਤੂਤਿ ਠਿਤੋਵ ਸੋ ਪਚ੍ਚਯਸਭਾਵੋ, ਨ ਕਦਾਚਿ ਜਾਤਿਜਰਾਮਰਣਸ੍ਸ ਪਚ੍ਚਯੋ ਨ ਹੋਤੀਤਿ ਅਤ੍ਥੋ. ਧਮ੍ਮਟ੍ਠਿਤਤਾ ਧਮ੍ਮਨਿਯਾਮਤਾ ਇਦਪ੍ਪਚ੍ਚਯਤਾਤਿ ਜਾਤਿਪਚ੍ਚਯੋਯੇਵ. ਜਾਤਿਪਚ੍ਚਯੇਨ ਹਿ ਜਰਾਮਰਣਸਙ੍ਖਾਤੋ ਪਚ੍ਚਯਸਮੁਪ੍ਪਨ੍ਨਧਮ੍ਮੋ ਤਦਾਯਤ੍ਤਤਾਯ ਤਿਟ੍ਠਤਿ, ਜਾਤਿਪਚ੍ਚਯੋਵ ਜਰਾਮਰਣਧਮ੍ਮਂ ਨਿਯਮੇਤਿ, ਤਸ੍ਮਾ ਜਾਤਿ ‘‘ਧਮ੍ਮਟ੍ਠਿਤਤਾ ਧਮ੍ਮਨਿਯਾਮਤਾ’’ਤਿ ਵੁਚ੍ਚਤਿ. ਜਾਤਿਯੇਵ ਇਮਸ੍ਸ ਜਰਾਮਰਣਸ੍ਸ ਪਚ੍ਚਯੋਤਿ ਇਦਪ੍ਪਚ੍ਚਯੋ, ਇਦਪ੍ਪਚ੍ਚਯੋਵ ਇਦਪ੍ਪਚ੍ਚਯਤਾ. ਤਨ੍ਤਿ ਤਂ ਪਚ੍ਚਯਂ. ਅਭਿਸਮ੍ਬੁਜ੍ਝਤੀਤਿ ਞਾਣੇਨ ਅਭਿਸਮ੍ਬੁਜ੍ਝਤਿ. ਅਭਿਸਮੇਤੀਤਿ ਞਾਣੇਨ ਅਭਿਸਮਾਗਚ੍ਛਤਿ. ਆਚਿਕ੍ਖਤੀਤਿ ਕਥੇਤਿ. ਦੇਸੇਤੀਤਿ ਦਸ੍ਸੇਤਿ. ਪਞ੍ਞਾਪੇਤੀਤਿ ਜਾਨਾਪੇਤਿ. ਪਟ੍ਠਪੇਤੀਤਿ ਞਾਣਮੁਖੇ ਠਪੇਤਿ. ਵਿਵਰਤੀਤਿ ਵਿਵਰਿਤ੍ਵਾ ਦਸ੍ਸੇਤਿ. ਵਿਭਜਤੀਤਿ ਵਿਭਾਗਤੋ ਦਸ੍ਸੇਤਿ. ਉਤ੍ਤਾਨੀਕਰੋਤੀਤਿ ਪਾਕਟਂ ਕਰੋਤਿ. ਇਤਿ ਖੋਤਿ ਏਵਂ ਖੋ. ਯਾ ਤਤ੍ਰਾਤਿ ਯਾ ਤੇਸੁ ‘‘ਜਾਤਿਪਚ੍ਚਯਾ ਜਰਾਮਰਣ’’ਨ੍ਤਿਆਦੀਸੁ. ਸੋ ਪਨਾਯਂ ਪਟਿਚ੍ਚਸਮੁਪ੍ਪਾਦੋ ਤੇਹਿ ਤੇਹਿ ਪਚ੍ਚਯੇਹਿ ਅਨੂਨਾਧਿਕੇਹੇਵ ਤਸ੍ਸ ਤਸ੍ਸ ਧਮ੍ਮਸ੍ਸ ਸਮ੍ਭਵਤੋ ਤਥਤਾਤਿ, ਸਾਮਗ੍ਗਿਂ ਉਪਗਤੇਸੁ ਪਚ੍ਚਯੇਸੁ ਮੁਹੁਤ੍ਤਮ੍ਪਿ ਤਤੋ ਨਿਬ੍ਬਤ੍ਤਨਧਮ੍ਮਾਨਂ ਅਸਮ੍ਭਵਾਭਾਵਤੋ ਅਵਿਤਥਤਾਤਿ, ਅਞ੍ਞਧਮ੍ਮਪਚ੍ਚਯੇਹਿ ਅਞ੍ਞਧਮ੍ਮਾਨੁਪ੍ਪਤ੍ਤਿਤੋ ਅਨਞ੍ਞਥਤਾਤਿ, ਯਥਾਵੁਤ੍ਤਾਨਂ ਏਤੇਸਂ ਜਰਾਮਰਣਾਦੀਨਂ ਪਚ੍ਚਯਤੋ ਵਾ ਪਚ੍ਚਯਸਮੂਹਤੋ ਵਾ ਇਦਪ੍ਪਚ੍ਚਯਤਾਤਿ ਵੁਤ੍ਤੋ. ਤਤ੍ਰਾਯਂ ਵਚਨਤ੍ਥੋ – ਇਮੇਸਂ ਪਚ੍ਚਯਾ ਇਦਪ੍ਪਚ੍ਚਯਾ, ਇਦਪ੍ਪਚ੍ਚਯਾ ਏਵ ਇਦਪ੍ਪਚ੍ਚਯਤਾ, ਇਦਪ੍ਪਚ੍ਚਯਾਨਂ ਵਾ ਸਮੂਹੋ ਇਦਪ੍ਪਚ੍ਚਯਤਾ. ਲਕ੍ਖਣਂ ਪਨੇਤ੍ਥ ਸਦ੍ਦਸਤ੍ਥਤੋ ਵੇਦਿਤਬ੍ਬਨ੍ਤਿ.
ਧਮ੍ਮਟ੍ਠਿਤਿਞਾਣਨਿਦ੍ਦੇਸਵਣ੍ਣਨਾ ਨਿਟ੍ਠਿਤਾ.