੩. ਸਮਾਧਿਭਾਵਨਾਮਯਞਾਣਨਿਦ੍ਦੇਸਵਣ੍ਣਨਾ
੪੩. ਸਮਾਧਿਭਾਵਨਾਮਯਞਾਣਨਿਦ੍ਦੇਸੇ ਆਦਿਤੋ ਤਾਵ ਏਕਕਤੋ ਪਟ੍ਠਾਯ ਯਾਵ ਦਸਕਾ ਸਮਾਧਿਪ੍ਪਭੇਦਂ ਦਸ੍ਸੇਨ੍ਤੋ ਏਕੋ ਸਮਾਧੀਤਿਆਦਿਮਾਹ. ਤਤ੍ਥ ਚਿਤ੍ਤਸ੍ਸ ਏਕਗ੍ਗਤਾਤਿ ਨਾਨਾਰਮ੍ਮਣਵਿਕ੍ਖੇਪਾਭਾਵਤੋ ਏਕਂ ਆਰਮ੍ਮਣਂ ਅਗ੍ਗਂ ਉਤ੍ਤਮਂ ਅਸ੍ਸਾਤਿ ਏਕਗ੍ਗੋ, ਏਕਗ੍ਗਸ੍ਸ ਭਾਵੋ ਏਕਗ੍ਗਤਾ. ਸਾ ਪਨ ਏਕਗ੍ਗਤਾ ਚਿਤ੍ਤਸ੍ਸ, ਨ ਸਤ੍ਤਸ੍ਸਾਤਿ ਦਸ੍ਸਨਤ੍ਥਂ ‘‘ਚਿਤ੍ਤਸ੍ਸਾ’’ਤਿ ਵੁਤ੍ਤਂ. ਦੁਕੇ ਲੋਕਿਯੋਤਿ ਲੋਕੋ ਵੁਚ੍ਚਤਿ ਲੁਜ੍ਜਨਪਲੁਜ੍ਜਨਟ੍ਠੇਨ ਵਟ੍ਟਂ, ਤਸ੍ਮਿਂ ਪਰਿਯਾਪਨ੍ਨਭਾਵੇਨ ਲੋਕੇ ਨਿਯੁਤ੍ਤੋਤਿ ਲੋਕਿਯੋ. ਲੋਕੁਤ੍ਤਰੋਤਿ ਉਤ੍ਤਿਣ੍ਣੋਤਿ ਉਤ੍ਤਰੋ, ਲੋਕੇ ਅਪਰਿਯਾਪਨ੍ਨਭਾਵੇਨ ਲੋਕਤੋ ਉਤ੍ਤਰੋਤਿ ਲੋਕੁਤ੍ਤਰੋ. ਤਿਕੇ ਸਵਿਤਕ੍ਕੋ ਚ ਸੋ ਸਵਿਚਾਰੋ ਚਾਤਿ ਸਵਿਤਕ੍ਕਸਵਿਚਾਰੋ. ਏਵਂ ਅਵਿਤਕ੍ਕਅਵਿਚਾਰੋ. ਵਿਤਕ੍ਕਵਿਚਾਰੇਸੁ ਵਿਚਾਰੋਵ ਮਤ੍ਤਾ ਪਮਾਣਂ ਏਤਸ੍ਸਾਤਿ ਵਿਚਾਰਮਤ੍ਤੋ, ਵਿਚਾਰਤੋ ਉਤ੍ਥਰਿ ਵਿਤਕ੍ਕੇਨ ਸਦ੍ਧਿਂ ਸਮ੍ਪਯੋਗਂ ਨ ਗਚ੍ਛਤੀਤਿ ਅਤ੍ਥੋ. ਅਵਿਤਕ੍ਕੋ ਚ ਸੋ ਵਿਚਾਰਮਤ੍ਤੋ ਚਾਤਿ ਅਵਿਤਕ੍ਕਵਿਚਾਰਮਤ੍ਤੋ. ਤੀਸੁਪਿ ਵਿਚ੍ਛੇਦਂ ਕਤ੍ਵਾਪਿ ਪਠਨ੍ਤਿ. ਚਤੁਕ੍ਕਪਞ੍ਚਕਾ ਵੁਤ੍ਤਤ੍ਥਾ. ਛਕ੍ਕੇ ਪੁਨਪ੍ਪੁਨਂ ਉਪ੍ਪਜ੍ਜਨਤੋ ਸਤਿਯੇਵ ਅਨੁਸ੍ਸਤਿ, ਪਵਤ੍ਤਿਤਬ੍ਬਟ੍ਠਾਨਮ੍ਹਿਯੇਵ ਵਾ ਪਵਤ੍ਤਤ੍ਤਾ ਸਦ੍ਧਾਪਬ੍ਬਜਿਤਸ੍ਸ ਕੁਲਪੁਤ੍ਤਸ੍ਸ ਅਨੁਰੂਪਾ ਸਤੀਤਿਪਿ ਅਨੁਸ੍ਸਤਿ, ਬੁਦ੍ਧਂ ਆਰਬ੍ਭ ਉਪ੍ਪਨ੍ਨਾ ਅਨੁਸ੍ਸਤਿ ਬਉਦ੍ਧਾਨੁਸ੍ਸਤਿ. ਅਰਹਤਾਦਿਬੁਦ੍ਧਗੁਣਾਰਮ੍ਮਣਾਯ ਸਤਿਯਾ ਏਤਂ ਅਧਿਵਚਨਂ. ਤਸ੍ਸਾ ਬੁਦ੍ਧਾਨੁਸ੍ਸਤਿਯਾ ਵਸੇਨ ਚਿਤ੍ਤਸ੍ਸ ਏਕਗ੍ਗਤਾਯੇਵ ਉਦ੍ਧਚ੍ਚਸਙ੍ਖਾਤਸ੍ਸ ਵਿਕ੍ਖੇਪਸ੍ਸ ਪਟਿਪਕ੍ਖਭਾਵਤੋ ਨ ਵਿਕ੍ਖੇਪੋਤਿ ਅਵਿਕ੍ਖੇਪੋ. ਧਮ੍ਮਂ ਆਰਬ੍ਭ ਉਪ੍ਪਨ੍ਨਾ ਅਨੁਸ੍ਸਤਿ ਧਮ੍ਮਾਨੁਸ੍ਸਤਿ. ਸ੍ਵਾਕ੍ਖਾਤਤਾਦਿਧਮ੍ਮਗੁਣਾਰਮ੍ਮਣਾਯ ਸਤਿਯਾ ਏਤਂ ਅਧਿਵਚਨਂ. ਸਙ੍ਘਂ ਆਰਬ੍ਭ ਉਪ੍ਪਨ੍ਨਾ ਅਨੁਸ੍ਸਤਿ ਸਙ੍ਘਾਨੁਸ੍ਸਤਿ. ਸੁਪ੍ਪਟਿਪਨ੍ਨਤਾਦਿਸਙ੍ਘਗੁਣਾਰਮ੍ਮਣਾਯ ਸਤਿਯਾ ਏਤਂ ਅਧਿਵਚਨਂ. ਸੀਲਂ ਆਰਬ੍ਭ ਉਪ੍ਪਨ੍ਨਾ ਅਨੁਸ੍ਸਤਿ ਸੀਲਾਨੁਸ੍ਸਤਿ. ਅਤ੍ਤਨੋ ਅਖਣ੍ਡਤਾਦਿਸੀਲਗੁਣਾਰਮ੍ਮਣਾਯ ਸਤਿਯਾ ਏਤਂ ਅਧਿਵਚਨਂ. ਚਾਗਂ ਆਰਬ੍ਭ ਉਪ੍ਪਨ੍ਨਾ ਅਨੁਸ੍ਸਤਿ ਚਾਗਾਨੁਸ੍ਸਤਿ. ਅਤ੍ਤਨੋ ਮੁਤ੍ਤਚਾਗਤਾਦਿਚਾਗਗੁਣਾਰਮ੍ਮਣਾਯ ਸਤਿਯਾ ਏਤਂ ਅਧਿਵਚਨਂ. ਦੇਵਤਾ ਆਰਬ੍ਭ ਉਪ੍ਪਨ੍ਨਾ ਅਨੁਸ੍ਸਤਿ ਦੇਵਤਾਨੁਸ੍ਸਤਿ. ਦੇਵਤਾ ਸਕ੍ਖਿਟ੍ਠਾਨੇ ਠਪੇਤ੍ਵਾ ਅਤ੍ਤਨੋ ਸਦ੍ਧਾਦਿਗੁਣਾਰਮ੍ਮਣਾਯ ਸਤਿਯਾ ਏਤਂ ਅਧਿਵਚਨਂ.
ਸਤ੍ਤਕੇ ਸਮਾਧਿਕੁਸਲਤਾਤਿ ਏਕਵਿਧਾਦਿਭੇਦੇਨ ਅਨੇਕਭੇਦੇ ਸਮਾਧਿਮ੍ਹਿ ‘‘ਅਯਮੇਵਂਵਿਧੋ ਸਮਾਧਿ, ਅਯਮੇਵਂਵਿਧੋ ਸਮਾਧੀ’’ਤਿ ਛੇਕਭਾਵੋ. ਸਮਾਧਿਪਰਿਚ੍ਛੇਦਕਪਞ੍ਞਾਯੇਤਂ ਅਧਿਵਚਨਂ. ਸਮਾਧਿਉਪ੍ਪਾਦਨਵਿਧਾਨੇਪਿ ਛੇਕਭਾਵੋ ਸਮਾਧਿਕੁਸਲਤਾ.
ਸਮਾਧਿਸ੍ਸ ਸਮਾਪਤ੍ਤਿਕੁਸਲਤਾਤਿ ਉਪ੍ਪਾਦਿਤਸ੍ਸ ਸਮਾਧਿਸ੍ਸ ਸਮਾਪਜ੍ਜਨੇ ਛੇਕਭਾਵੋ. ਏਤੇਨ ਸਮਾਪਜ੍ਜਨਵਸਿਤਾ ਵੁਤ੍ਤਾ ਹੋਤਿ.
ਸਮਾਧਿਸ੍ਸ ਠਿਤਿਕੁਸਲਤਾਤਿ ਸਮਾਪਨ੍ਨਸ੍ਸ ਸਮਾਧਿਸ੍ਸ ਸਨ੍ਤਤਿਵਸੇਨ ਯਥਾਰੁਚਿ ਠਪਨੇ ਛੇਕਭਾਵੋ. ਏਤੇਨ ਅਧਿਟ੍ਠਾਨਵਸਿਤਾ ਵੁਤ੍ਤਾ ਹੋਤਿ. ਅਥ ਵਾ ਨਿਮਿਤ੍ਤਗ੍ਗਹਣੇਨ ਚਸ੍ਸ ਪੁਨ ਤੇ ਆਕਾਰੇ ਸਮ੍ਪਾਦਯਤੋ ਅਪ੍ਪਨਾਮਤ੍ਤਮੇਵ ਇਜ੍ਝਤਿ, ਨ ਚਿਰਟ੍ਠਾਨਂ. ਚਿਰਟ੍ਠਾਨਂ ਪਨ ਸਮਾਧਿਪਰਿਪਨ੍ਥਾਨਂ ਧਮ੍ਮਾਨਂ ਸੁਵਿਸੋਧਿਤਤ੍ਤਾ ਹੋਤਿ. ਯੋ ਹਿ ਭਿਕ੍ਖੁ ਕਾਮਾਦੀਨਵਪਚ੍ਚਵੇਕ੍ਖਣਾਦੀਹਿ ਕਾਮਚ੍ਛਨ੍ਦਂ ਨ ਸੁਟ੍ਠੁ ਵਿਕ੍ਖਮ੍ਭੇਤ੍ਵਾ, ਕਾਯਪਸ੍ਸਦ੍ਧਿਵਸੇਨ ਕਾਯਦੁਟ੍ਠੁਲ੍ਲਂ ਨ ਸੁਪ੍ਪਟਿਪ੍ਪਸ੍ਸਦ੍ਧਂ ਕਤ੍ਵਾ, ਆਰਮ੍ਭਧਾਤੁਮਨਸਿਕਾਰਾਦਿਵਸੇਨ ਥਿਨਮਿਦ੍ਧਂ ਨ ਸੁਟ੍ਠੁ ਪਟਿਵਿਨੋਦੇਤ੍ਵਾ, ਸਮਥਨਿਮਿਤ੍ਤਮਨਸਿਕਾਰਾਦਿਵਸੇਨ ਉਦ੍ਧਚ੍ਚਕੁਕ੍ਕੁਚ੍ਚਂ ਨ ਸੁਟ੍ਠੁ ਸਮੂਹਤਂ ਕਤ੍ਵਾ, ਅਞ੍ਞੇਪਿ ਸਮਾਧਿਪਰਿਪਨ੍ਥੇ ਧਮ੍ਮੇ ਨ ਸੁਟ੍ਠੁ ਵਿਸੋਧੇਤ੍ਵਾ ਝਾਨਂ ਸਮਾਪਜ੍ਜਤਿ, ਸੋ ਅਵਿਸੋਧਿਤਂ ਆਸਯਂ ਪਵਿਟ੍ਠਭਮਰੋ ਵਿਯ, ਅਸੁਦ੍ਧਂ ਉਯ੍ਯਾਨਂ ਪਵਿਟ੍ਠਰਾਜਾ ਵਿਯ ਚ ਖਿਪ੍ਪਮੇਵ ਨਿਕ੍ਖਮਤਿ. ਯੋ ਪਨ ਸਮਾਧਿਪਰਿਪਨ੍ਥੇ ਧਮ੍ਮੇ ਸੁਟ੍ਠੁ ਵਿਸੋਧੇਤ੍ਵਾ ਝਾਨਂ ਸਮਾਪਜ੍ਜਤਿ, ਸੋ ਸੁਵਿਸੋਧਿਤਂ ਆਸਯਂ ਪਵਿਟ੍ਠਭਮਰੋ ਵਿਯ, ਸੁਪਰਿਸੁਦ੍ਧਂ ਉਯ੍ਯਾਨਂ ਪਵਿਟ੍ਠਰਾਜਾ ਵਿਯ ਚ ਸਕਲਮ੍ਪਿ ਦਿਵਸਭਾਗਂ ਅਨ੍ਤੋਸਮਾਪਤ੍ਤਿਯਂਯੇਵ ਹੋਤਿ. ਤੇਨਾਹੁ ਪੋਰਾਣਾ –
‘‘ਕਾਮੇਸੁ ਛਨ੍ਦਂ ਪਟਿਘਂ ਵਿਨੋਦਯੇ, ਉਦ੍ਧਚ੍ਚਥੀਨਂ ਵਿਚਿਕਿਚ੍ਛਪਞ੍ਚਮਂ;
ਵਿਵੇਕਪਾਮੋਜ੍ਜਕਰੇਨ ਚੇਤਸਾ, ਰਾਜਾਵ ਸੁਦ੍ਧਨ੍ਤਗਤੋ ਤਹਿਂ ਰਮੇ’’ਤਿ .
ਤਸ੍ਮਾ ‘‘ਚਿਰਟ੍ਠਿਤਿਕਾਮੇਨ ਪਾਰਿਪਨ੍ਥਿਕਧਮ੍ਮੇ ਸੋਧੇਤ੍ਵਾ ਝਾਨਂ ਸਮਾਪਜ੍ਜਿਤਬ੍ਬ’’ਨ੍ਤਿ ਵੁਤ੍ਤਤ੍ਤਾ ਤਂ ਵਿਧਿਂ ਸਮ੍ਪਾਦੇਤ੍ਵਾ ਸਮਾਧਿਸ੍ਸ ਚਿਰਟ੍ਠਿਤਿਕਰਣੇ ਛੇਕਭਾਵੋਤਿ ਵੁਤ੍ਤਂ ਹੋਤਿ.
ਸਮਾਧਿਸ੍ਸ ਵੁਟ੍ਠਾਨਕੁਸਲਤਾਤਿ ਸਨ੍ਤਤਿਵਸੇਨ ਯਥਾਰੁਚਿ ਪਵਤ੍ਤਸ੍ਸ ਸਮਾਧਿਸ੍ਸ ਯਥਾਪਰਿਚ੍ਛਿਨ੍ਨਕਾਲੇਯੇਵ ਵੁਟ੍ਠਾਨੇਨ ਸਮਾਧਿਸ੍ਸ ਵੁਟ੍ਠਾਨੇ ਛੇਕਭਾਵੋ. ‘‘ਯਸ੍ਸ ਹਿ ਧਮ੍ਮਂ ਪੁਰਿਸੋ ਵਿਜਞ੍ਞਾ’’ਤਿਆਦੀਸੁ (ਜਾ. ੧.੧੦.੧੫੨) ਵਿਯ ਨਿਸ੍ਸਕ੍ਕਤ੍ਥੇ ਵਾ ਸਾਮਿਵਚਨਂ ਕਤਨ੍ਤਿ ਵੇਦਿਤਬ੍ਬਨ੍ਤਿ. ਏਤੇਨ ਵੁਟ੍ਠਾਨਵਸਿਤਾ ਵੁਤ੍ਤਾ ਹੋਤਿ.
ਸਮਾਧਿਸ੍ਸ ਕਲ੍ਲਤਾਕੁਸਲਤਾਤਿ ਅਗਿਲਾਨਭਾਵੋ ਅਰੋਗਭਾਵੋ ਕਲ੍ਲਤਾ. ਗਿਲਾਨੋ ਹਿ ਅਕਲ੍ਲਕੋਤਿ ਵੁਚ੍ਚਤਿ. ਵਿਨਯੇਪਿ ਵੁਤ੍ਤਂ ‘‘ਨਾਹਂ, ਭਨ੍ਤੇ, ਅਕਲ੍ਲਕੋ’’ਤਿ (ਪਾਰਾ. ੧੫੧). ਅਨਙ੍ਗਣਸੁਤ੍ਤਵਤ੍ਥਸੁਤ੍ਤੇਸੁ (ਮ. ਨਿ. ੧.੫੭ ਆਦਯੋ, ੭੦ ਆਦਯੋ) ਵੁਤ੍ਤਾਨਂ ਝਾਨਪਟਿਲਾਭਪਚ੍ਚਨੀਕਾਨਂ ਪਾਪਕਾਨਂ ਇਚ੍ਛਾਵਚਰਾਨਂ ਅਭਾਵੇਨ ਚ ਅਭਿਜ੍ਝਾਦੀਨਂ ਚਿਤ੍ਤਸ੍ਸ ਉਪਕ੍ਕਿਲੇਸਾਨਂ ਵਿਗਮੇਨ ਚ ਸਮਾਧਿਸ੍ਸ ਅਗਿਲਾਨਭਾਵਕਰਣੇ ਛੇਕਭਾਵੋ ਸਮਾਧਿਸ੍ਸ ਕਲ੍ਲਤਾਕੁਸਲਤਾ, ਕਿਲੇਸਗੇਲਞ੍ਞਰਹਿਤਭਾਵੇ ਕੁਸਲਤਾਤਿ ਵੁਤ੍ਤਂ ਹੋਤਿ. ਅਥ ਵਾ ਕਲ੍ਲਤਾਤਿ ਕਮ੍ਮਞ੍ਞਤਾ ਕਮ੍ਮਞ੍ਞਤਾਪਰਿਯਾਯਤ੍ਤਾ ਕਲ੍ਲਵਚਨਸ੍ਸ. ‘‘ਯਾ ਚਿਤ੍ਤਸ੍ਸ ਅਕਲ੍ਲਤਾ ਅਕਮ੍ਮਞ੍ਞਤਾ’’ਤਿ (ਧ. ਸ. ੧੧੬੨) ਹਿ ਵੁਤ੍ਤਂ ‘‘ਕਲ੍ਲਚਿਤ੍ਤਂ ਮੁਦੁਚਿਤ੍ਤਂ ਵਿਨੀਵਰਣਚਿਤ੍ਤ’’ਨ੍ਤਿ (ਦੀ. ਨਿ. ੧.੨੯੮; ਮ. ਨਿ. ੨.੩੯੫; ਮਹਾਵ. ੨੬) ਚ. ਏਤ੍ਥ ਕਲ੍ਲਸਦ੍ਦੋ ਕਮ੍ਮਞ੍ਞਤ੍ਥੋ. ਤਸ੍ਮਾ ਕਸਿਣਾਨੁਲੋਮਤੋ ਕਸਿਣਪਟਿਲੋਮਤੋ ਕਸਿਣਾਨੁਲੋਮਪਟਿਲੋਮਤੋ ਝਾਨਾਨੁਲੋਮਤੋ ਝਾਨਪਟਿਲੋਮਤੋ ਝਾਨਾਨੁਲੋਮਪਟਿਲੋਮਤੋ ਝਾਨੁਕ੍ਕਨ੍ਤਿਕਤੋ ਕਸਿਣੁਕ੍ਕਨ੍ਤਿਕਤੋ ਝਾਨਕਸਿਣੁਕ੍ਕਨ੍ਤਿਕਤੋ ਅਙ੍ਗਸਙ੍ਕਨ੍ਤਿਤੋ ਆਰਮ੍ਮਣਸਙ੍ਕਨ੍ਤਿਤੋ ਅਙ੍ਗਾਰਮ੍ਮਣਸਙ੍ਕਨ੍ਤਿਤੋ ਅਙ੍ਗਵਵਤ੍ਥਾਨਤੋ ਆਰਮ੍ਮਣਵਵਤ੍ਥਾਨਤੋਤਿ ਇਮੇਹਿ ਚੁਦ੍ਦਸਹਿ ਆਕਾਰੇਹਿ, ਅਙ੍ਗਾਰਮ੍ਮਣਵਵਤ੍ਥਾਨਤੋਤਿ ਇਮਿਨਾ ਸਹ ਪਞ੍ਚਦਸਹਿ ਵਾ ਆਕਾਰੇਹਿ ਚਿਤ੍ਤਪਰਿਦਮਨੇਨ ਸਮਾਧਿਸ੍ਸ ਕਮ੍ਮਞ੍ਞਭਾਵਕਰਣੇ ਕੁਸਲਭਾਵੋਤਿ ਵੁਤ੍ਤਂ ਹੋਤਿ.
ਸਮਾਧਿਸ੍ਸ ਗੋਚਰਕੁਸਲਤਾਤਿ ਸਮਾਧਿਸ੍ਸ ਗੋਚਰੇਸੁ ਕਸਿਣਾਦੀਸੁ ਆਰਮ੍ਮਣੇਸੁ ਤਂ ਤਂ ਝਾਨਂ ਸਮਾਪਜ੍ਜਿਤੁਕਾਮਤਾਯ ਯਥਾਰੁਚਿ ਆਵਜ੍ਜਨਕਰਣਵਸੇਨ ਤੇਸੁ ਆਰਮ੍ਮਣੇਸੁ ਛੇਕਭਾਵੋ. ਏਤੇਨ ਕਸਿਣਾਵਜ੍ਜਨਵਸੇਨ ਆਵਜ੍ਜਨਵਸਿਤਾ ਵੁਤ੍ਤਾ ਹੋਤਿ. ਅਥ ਵਾ ਤਸ੍ਮਿਂ ਤਸ੍ਮਿਂ ਦਿਸਾਭਾਗੇ ਕਸਿਣਫਰਣਵਸੇਨ ਏਵਂ ਫੁਟ੍ਠਸ੍ਸ ਕਸਿਣਸ੍ਸ ਚਿਰਟ੍ਠਾਨਵਸੇਨ ਚ ਸਮਾਧਿਸ੍ਸ ਗੋਚਰੇਸੁ ਛੇਕਭਾਵੋ.
ਸਮਾਧਿਸ੍ਸ ਅਭਿਨੀਹਾਰਕੁਸਲਤਾਤਿ ਏਕਤ੍ਤਨਯੇਨ ਹੇਟ੍ਠਾਹੇਟ੍ਠਾਸਮਾਧਿਂ ਉਪਰੂਪਰਿਸਮਾਧਿਭਾਵੂਪਨਯਨੇਨ ਅਭਿਨੀਹਰਣੇ ਅਭਿਨਿਨ੍ਨਾਮਨੇ ਛੇਕਭਾਵੋ. ਉਪਚਾਰਜ੍ਝਾਨਞ੍ਹਿ ਵਸਿਪ੍ਪਤ੍ਤਂ ਪਠਮਜ੍ਝਾਨਤ੍ਥਾਯ ਵਿਪਸ੍ਸਨਤ੍ਥਾਯ ਵਾ ਅਭਿਨੀਹਰਤਿ, ਏਵਂ ਪਠਮਜ੍ਝਾਨਾਦੀਨਿ ਦੁਤਿਯਜ੍ਝਾਨਾਦਿਅਤ੍ਥਾਯ ਵਿਪਸ੍ਸਨਤ੍ਥਾਯ ਵਾ, ਚਤੁਤ੍ਥਜ੍ਝਾਨਂ ਅਰੂਪਸਮਾਪਤ੍ਤਤ੍ਥਾਯ ਅਭਿਞ੍ਞਤ੍ਥਾਯ ਵਿਪਸ੍ਸਨਤ੍ਥਾਯ ਵਾ, ਆਕਾਸਾਨਞ੍ਚਾਯਤਨਾਦਯੋ ਵਿਞ੍ਞਾਣਞ੍ਚਾਯਤਨਾਦਿਅਤ੍ਥਾਯ ਵਿਪਸ੍ਸਨਤ੍ਥਾਯ ਵਾ ਅਭਿਨੀਹਰਤੀਤਿ ਏਵਂ ਸਮਾਧਿਸ੍ਸ ਤਤ੍ਥ ਤਤ੍ਥ ਅਭਿਨੀਹਾਰਕੁਸਲਤਾ. ਯਸ੍ਮਾ ਪਨ ਕੁਸਲਤਾ ਨਾਮ ਪਞ੍ਞਾ, ਸਾ ਸਮਾਧਿ ਨ ਹੋਤਿ, ਤਸ੍ਮਾ ਸਮਾਧਿਪਰਿਣਾਯਕਪਞ੍ਞਾਵਸੇਨ ਸਤ੍ਤਵਿਧੋ ਸਮਾਧਿ ਵੁਤ੍ਤੋਤਿ ਵੇਦਿਤਬ੍ਬੋ.
ਕੇਚਿ ਪਨ ਆਚਰਿਯਾ ‘‘ਸਮਾਧਿਕੁਸਲਤਾਤਿ ਯੇਨ ਮਨਸਿਕਾਰੇਨ ਚਿਤ੍ਤਂ ਨ ਵਿਕ੍ਖਿਪਤਿ, ਤਤ੍ਥ ਕੁਸਲਤਾ. ਸਮਾਪਤ੍ਤਿਕੁਸਲਤਾਤਿ ਯੇਨ ਮਨਸਿਕਾਰੇਨ ਸਮਾਪਜ੍ਜਨ੍ਤਸ੍ਸ ਝਾਨਙ੍ਗਾਨਿ ਪਾਤੁਭਵਨ੍ਤਿ, ਤਤ੍ਥ ਕੁਸਲਤਾ. ਠਿਤਿਕੁਸਲਤਾਤਿ ਯੇਨ ਮਨਸਿਕਾਰੇਨ ਅਪ੍ਪਿਤੋ ਸਮਾਧਿ ਨ ਵਿਕ੍ਖਿਪਤਿ, ਤਤ੍ਥ ਕੁਸਲਤਾ. ਵੁਟ੍ਠਾਨਕੁਸਲਤਾਤਿ ਨੀਵਰਣਵੁਟ੍ਠਾਨਂ ਜਾਨਾਤਿ ਪਠਮਜ੍ਝਾਨੇ, ਅਙ੍ਗਵੁਟ੍ਠਾਨਂ ਜਾਨਾਤਿ ਤੀਸੁ ਝਾਨੇਸੁ, ਆਰਮ੍ਮਣਵੁਟ੍ਠਾਨਂ ਜਾਨਾਤਿ ਅਰੂਪਸਮਾਪਤ੍ਤੀਸੁ, ਵਿਕ੍ਖੇਪਵੁਟ੍ਠਾਨਂ ਜਾਨਾਤਿ ਵਿਸਯਾਧਿਮਤ੍ਤੇਸੁ, ਸਚ੍ਛਨ੍ਦਵੁਟ੍ਠਾਨਂ ਜਾਨਾਤਿ ਪਰਿਯਨ੍ਤਕਾਲੇ ਚ ਅਵਸਾਨਕਰਣੀਯਕਾਲੇ ਚ. ਕਲ੍ਲਤਾਕੁਸਲਤਾਤਿ ਚਿਤ੍ਤਫਾਸੁਤਾਯ ਸਰੀਰਫਾਸੁਤਾਯ ਆਹਾਰਫਾਸੁਤਾਯ ਸੇਨਾਸਨਫਾਸੁਤਾਯ ਪੁਗ੍ਗਲਫਾਸੁਤਾਯ ਚ ਸਮਾਧਿਸ੍ਸ ਕਲ੍ਲਤਾ ਹੋਤੀਤਿ ਜਾਨਾਤਿ. ਗੋਚਰਕੁਸਲਤਾਤਿ ਆਰਮ੍ਮਣਸ੍ਸ ਪਰਿਚ੍ਛੇਦਂ ਕਾਤੁਂ ਜਾਨਾਤਿ, ਦਿਸਾਫਰਣਂ ਕਾਤੁਂ ਜਾਨਾਤਿ, ਵਡ੍ਢੇਤੁਂ ਜਾਨਾਤਿ. ਅਭਿਨੀਹਾਰਕੁਸਲਤਾਤਿ ਤਤ੍ਥ ਤਤ੍ਥ ਸਮ੍ਮਾ ਮਨਸਿਕਾਰੇਨ ਚਿਤ੍ਤਂ ਅਭਿਨੀਹਰਤਿ ਅਭਿਨਿਨ੍ਨਾਮੇਤਿ, ਉਪਚਾਰੇ ਵਸਿਪ੍ਪਤ੍ਤੇ ਪਠਮਜ੍ਝਾਨੇ ਅਭਿਨੀਹਰਤਿ, ਏਵਂ ਉਪਰੂਪਰਿਝਾਨੇਸੁ ਅਭਿਞ੍ਞਾਸੁ ਅਰੂਪਸਮਾਪਤ੍ਤੀਸੁ ਵਿਪਸ੍ਸਨਾਸੁ ਚ ਅਭਿਨੀਹਰਤਿ. ਏਵਂ ਤਤ੍ਥ ਤਤ੍ਥ ਅਭਿਨੀਹਾਰਕੁਸਲਤਾ’’ਤਿ ਏਵਮੇਤੇਸਂ ਪਦਾਨਂ ਅਤ੍ਥਂ ਵਣ੍ਣਯਨ੍ਤਿ.
ਅਟ੍ਠਕਂ ਵੁਤ੍ਤਤ੍ਥਮੇਵ. ਨਵਕੇ ਰੂਪਾਵਚਰੋਤਿ ‘‘ਕਤਮੇ ਧਮ੍ਮਾ ਰੂਪਾਵਚਰਾ? ਹੇਟ੍ਠਤੋ ਬ੍ਰਹ੍ਮਪਾਰਿਸਜ੍ਜਂ ਪਰਿਯਨ੍ਤਂ ਕਰਿਤ੍ਵਾ ਉਪਰਿਤੋ ਅਕਨਿਟ੍ਠੇ ਦੇਵੇ ਅਨ੍ਤੋਕਰਿਤ੍ਵਾ’’ਤਿਆਦਿਨਾ (ਧ. ਸ. ੧੨੮੯) ਨਯੇਨ ਵੁਤ੍ਤੇਸੁ ਰੂਪਾਵਚਰਧਮ੍ਮੇਸੁ ਪਰਿਯਾਪਨ੍ਨੋ. ਤਤ੍ਰਾਯਂ ਵਚਨਤ੍ਥੋ – ਰੂਪਕ੍ਖਨ੍ਧਸਙ੍ਖਾਤਂ ਰੂਪਂ ਏਤ੍ਥ ਅਵਚਰਤਿ, ਨ ਕਾਮੋਤਿ ਰੂਪਾਵਚਰੋ. ਰੂਪਕ੍ਖਨ੍ਧੋਪਿ ਹਿ ਰੂਪਨ੍ਤਿ ਵੁਚ੍ਚਤਿ ‘‘ਰੂਪਕ੍ਖਨ੍ਧੋ ਰੂਪ’’ਨ੍ਤਿਆਦੀਸੁ (ਯਮ. ੧.ਖਨ੍ਧਯਮਕ.੨) ਵਿਯ. ਸੋ ਪਨ ਬ੍ਰਹ੍ਮਪਾਰਿਸਜ੍ਜਬ੍ਰਹ੍ਮਪੁਰੋਹਿਤਮਹਾਬ੍ਰਹ੍ਮਾਨਂ ਪਰਿਤ੍ਤਾਭਅਪ੍ਪਮਾਣਾਭਆਭਸ੍ਸਰਾਨਂ ਪਰਿਤ੍ਤਸੁਭਅਪ੍ਪਮਾਣਸੁਭਸੁਭਕਿਣ੍ਹਾਨਂ ਅਸਞ੍ਞਸਤ੍ਤਵੇਹਪ੍ਫਲਾਨਂ ਅਵਿਹਾਤਪ੍ਪਸੁਦਸ੍ਸਸੁਦਸ੍ਸੀਅਕਨਿਟ੍ਠਾਨਞ੍ਚ ਵਸੇਨ ਸੋਲ਼ਸਵਿਧੋ ਪਦੇਸੋ. ਸੋ ਰੂਪਾਵਚਰਸਙ੍ਖਾਤੋ ਪਦੇਸੋ ਉਤ੍ਤਰਪਦਲੋਪਂ ਕਤ੍ਵਾ ‘‘ਰੂਪ’’ਨ੍ਤਿ ਵੁਚ੍ਚਤਿ, ਤਸ੍ਮਿਂ ਰੂਪੇ ਅਵਚਰਤੀਤਿ ਰੂਪਾਵਚਰੋ. ਰੂਪਭਵੋ ਵਾ ਰੂਪਂ, ਤਸ੍ਮਿਂ ਅਵਚਰਤੀਤਿ ਰੂਪਾਵਚਰਂ. ਕਿਞ੍ਚਾਪਿ ਹਿ ਏਸੋ ਸਮਾਧਿ ਕਾਮਭਵੇਪਿ ਅਵਚਰਤਿ, ਯਥਾ ਪਨ ਸਙ੍ਗਾਮੇ ਅਵਚਰਣਤੋ ਸਙ੍ਗਾਮਾਵਚਰੋਤਿ ਲਦ੍ਧਨਾਮੋ ਨਾਗੋ ਨਗਰੇ ਚਰਨ੍ਤੋਪਿ ਸਙ੍ਗਾਮਾਵਚਰੋਤਿ ਵੁਚ੍ਚਤਿ, ਥਲਚਰਾ ਜਲਚਰਾ ਚ ਪਾਣਿਨੋ ਅਥਲੇ ਅਜਲੇ ਚ ਠਿਤਾਪਿ ਥਲਚਰਾ ਜਲਚਰਾਤਿ ਵੁਚ੍ਚਨ੍ਤਿ, ਏਵਮਯਂ ਅਞ੍ਞਤ੍ਥ ਅਵਚਰਨ੍ਤੋਪਿ ਰੂਪਾਵਚਰੋਤਿ ਵੁਤ੍ਤੋ. ਅਪਿਚ ਰੂਪਭਵਸਙ੍ਖਾਤੇ ਰੂਪੇ ਪਟਿਸਨ੍ਧਿਂ ਅਵਚਾਰੇਤੀਤਿਪਿ ਰੂਪਾਵਚਰੋ. ਹੀਨੋਤਿ ਲਾਮਕੋ. ਹੀਨੁਤ੍ਤਮਾਨਂ ਮਜ੍ਝੇ ਭਵੋ ਮਜ੍ਝੋ. ਮਜ੍ਝਿਮੋਤਿਪਿ ਪਾਠੋ, ਸੋਯੇਵਤ੍ਥੋ. ਪਧਾਨਭਾਵਂ ਨੀਤੋ ਪਣੀਤੋ, ਉਤ੍ਤਮੋਤਿ ਅਤ੍ਥੋ. ਏਤੇ ਪਨ ਆਯੂਹਨਵਸੇਨ ਵੇਦਿਤਬ੍ਬਾ. ਯਸ੍ਸ ਹਿ ਆਯੂਹਨਕ੍ਖਣੇ ਛਨ੍ਦੋ ਵਾ ਹੀਨੋ ਹੋਤਿ ਵੀਰਿਯਂ ਵਾ ਚਿਤ੍ਤਂ ਵਾ ਵੀਮਂਸਾ ਵਾ, ਸੋ ਹੀਨੋ ਨਾਮ. ਯਸ੍ਸ ਤੇ ਧਮ੍ਮਾ ਮਜ੍ਝਿਮਾ, ਸੋ ਮਜ੍ਝਿਮੋ. ਯਸ੍ਸ ਪਣੀਤਾ, ਸੋ ਪਣੀਤੋ. ਉਪ੍ਪਾਦਿਤਮਤ੍ਤੋ ਵਾ ਹੀਨੋ, ਨਾਤਿਸੁਭਾਵਿਤੋ ਮਜ੍ਝਿਮੋ, ਅਤਿਸੁਭਾਵਿਤੋ ਵਸਿਪ੍ਪਤ੍ਤੋ ਪਣੀਤੋ. ਅਰੂਪਾਵਚਰੋ ਰੂਪਾਵਚਰੇ ਵੁਤ੍ਤਨਯਾਨੁਸਾਰੇਨ ਵੇਦਿਤਬ੍ਬੋ.
ਸੁਞ੍ਞਤੋ ਸਮਾਧੀਤਿਆਦੀਸੁ ‘‘ਸਬ੍ਬੇ ਸਙ੍ਖਾਰਾ ਅਨਿਚ੍ਚਾ ਦੁਕ੍ਖਾ ਅਨਤ੍ਤਾ’’ਤਿ ਵਿਪਸ੍ਸਨਾਪਟਿਪਾਟਿਯਾ ਵਿਪਸ੍ਸਨ੍ਤਸ੍ਸ ਅਨਤ੍ਤਾਨੁਪਸ੍ਸਨਾਯ ਮਗ੍ਗਵੁਟ੍ਠਾਨੇ ਜਾਤੇ ਯਸ੍ਮਾ ਸਾ ਵਿਪਸ੍ਸਨਾ ਅਤ੍ਤਵਿਰਹਿਤੇਸੁ ਸਙ੍ਖਾਰੇਸੁ ਸੁਞ੍ਞਤੋ ਪਵਤ੍ਤਾ, ਤਸ੍ਮਾ ਸੁਞ੍ਞਤਾ ਨਾਮ ਹੋਤਿ. ਤਾਯ ਸਿਦ੍ਧੋ ਅਰਿਯਮਗ੍ਗਸਮਾਧਿ ਸੁਞ੍ਞਤੋ ਸਮਾਧਿ ਨਾਮ ਹੋਤਿ, ਸੁਞ੍ਞਤਵਸੇਨ ਪਵਤ੍ਤਸਮਾਧੀਤਿ ਅਤ੍ਥੋ. ਵਿਪਸ੍ਸਨਾਯ ਪਵਤ੍ਤਾਕਾਰੇਨ ਹਿ ਸੋ ਪਵਤ੍ਤਤਿ. ਅਨਿਚ੍ਚਾਨੁਪਸ੍ਸਨਾਯ ਮਗ੍ਗਵੁਟ੍ਠਾਨੇ ਜਾਤੇ ਯਸ੍ਮਾ ਸਾ ਵਿਪਸ੍ਸਨਾ ਨਿਚ੍ਚਨਿਮਿਤ੍ਤਪਟਿਪਕ੍ਖਵਸੇਨ ਪਵਤ੍ਤਾ, ਤਸ੍ਮਾ ਅਨਿਮਿਤ੍ਤਾ ਨਾਮ ਹੋਤਿ. ਤਾਯ ਸਿਦ੍ਧੋ ਅਰਿਯਮਗ੍ਗਸਮਾਧਿ ਅਨਿਮਿਤ੍ਤੋ ਸਮਾਧਿ ਨਾਮ ਹੋਤਿ, ਨਿਚ੍ਚਨਿਮਿਤ੍ਤਵਿਰਹਿਤੋ ਸਮਾਧੀਤਿ ਅਤ੍ਥੋ. ਵਿਪਸ੍ਸਨਾਯ ਪਵਤ੍ਤਾਕਾਰੇਨ ਹਿ ਸੋ ਪਵਤ੍ਤਤਿ. ਦੁਕ੍ਖਾਨੁਪਸ੍ਸਨਾਯ ਮਗ੍ਗਵੁਟ੍ਠਾਨੇ ਜਾਤੇ ਯਸ੍ਮਾ ਸਾ ਵਿਪਸ੍ਸਨਾ ਪਣਿਧਿਪਟਿਪਕ੍ਖਵਸੇਨ ਪਵਤ੍ਤਾ, ਤਸ੍ਮਾ ਅਪ੍ਪਣਿਹਿਤਾ ਨਾਮ ਹੋਤਿ. ਤਾਯ ਸਿਦ੍ਧੋ ਅਰਿਯਮਗ੍ਗਸਮਾਧਿ ਅਪ੍ਪਣਿਹਿਤੋ ਸਮਾਧਿ ਨਾਮ ਹੋਤਿ, ਪਣਿਧਿਵਿਰਹਿਤੋ ਸਮਾਧੀਤਿ ਅਤ੍ਥੋ. ਵਿਪਸ੍ਸਨਾਯ ਪਵਤ੍ਤਾਕਾਰੇਨ ਹਿ ਸੋ ਪਵਤ੍ਤਤਿ. ਤਾਦਿਸਾ ਏਵ ਤਯੋ ਫਲਸਮਾਧਯੋਪਿ ਏਤੇਹਿਯੇਵ ਤੀਹਿ ਸਮਾਧੀਹਿ ਗਹਿਤਾ ਹੋਨ੍ਤੀਤਿ ਵੇਦਿਤਬ੍ਬਾ. ਲੋਕੁਤ੍ਤਰਸਮਾਧੀਨਂ ਪਨ ਪਣੀਤਤ੍ਤਾ ਹੀਨਾਦਿਭੇਦੋ ਨ ਉਦ੍ਧਟੋ.
ਦਸਕੇ ਉਦ੍ਧੁਮਾਤਕਸਞ੍ਞਾਵਸੇਨਾਤਿਆਦੀਸੁ ਭਸ੍ਤਾ ਵਿਯ ਵਾਯੁਨਾ ਉਦ੍ਧਂ ਜੀਵਿਤਪਰਿਯਾਦਾਨਾ ਯਥਾਨੁਕ੍ਕਮਂ ਸਮੁਗ੍ਗਤੇਨ ਸੂਨਭਾਵੇਨ ਉਦ੍ਧੁਮਾਤਤ੍ਤਾ ਉਦ੍ਧੁਮਾਤਂ, ਉਦ੍ਧੁਮਾਤਮੇਵ ਉਦ੍ਧੁਮਾਤਕਂ, ਪਟਿਕੂਲਤ੍ਤਾ ਵਾ ਕੁਚ੍ਛਿਤਂ ਉਦ੍ਧੁਮਾਤਨ੍ਤਿ ਉਦ੍ਧੁਮਾਤਕਂ. ਤਥਾਰੂਪਸ੍ਸ ਛਵਸਰੀਰਸ੍ਸੇਤਂ ਅਧਿਵਚਨਂ. ਵਿਨੀਲਂ ਵੁਚ੍ਚਤਿ ਵਿਪਰਿਭਿਨ੍ਨਵਣ੍ਣਂ, ਵਿਨੀਲਮੇਵ ਵਿਨੀਲਕਂ, ਪਟਿਕੂਲਤ੍ਤਾ ਵਾ ਕੁਚ੍ਛਿਤਂ ਵਿਨੀਲਨ੍ਤਿ ਵਿਨੀਲਕਂ. ਮਂਸੁਸ੍ਸਦਟ੍ਠਾਨੇਸੁ ਰਤ੍ਤਵਣ੍ਣਸ੍ਸ, ਪੁਬ੍ਬਸਨ੍ਨਿਚਯਟ੍ਠਾਨੇਸੁ ਸੇਤਵਣ੍ਣਸ੍ਸ, ਯੇਭੁਯ੍ਯੇਨ ਚ ਨੀਲਵਣ੍ਣਸ੍ਸ ਨੀਲਟ੍ਠਾਨੇ ਨੀਲਸਾਟਕਪਾਰੁਤਸ੍ਸੇਵ ਛਵਸਰੀਰਸ੍ਸੇਤਂ ਅਧਿਵਚਨਂ. ਪਰਿਭਿਨ੍ਨਟ੍ਠਾਨੇਸੁ ਵਿਸ੍ਸਨ੍ਦਮਾਨਪੁਬ੍ਬਂ ਵਿਪੁਬ੍ਬਂ, ਵਿਪੁਬ੍ਬਮੇਵ ਵਿਪੁਬ੍ਬਕਂ, ਪਟਿਕੂਲਤ੍ਤਾ ਵਾ ਕੁਚ੍ਛਿਤਂ ਵਿਪੁਬ੍ਬਨ੍ਤਿ ਵਿਪੁਬ੍ਬਕਂ. ਤਥਾਰੂਪਸ੍ਸ ਛਵਸਰੀਰਸ੍ਸੇਤਂ ਅਧਿਵਚਨਂ. ਵਿਚ੍ਛਿਦ੍ਦਂ ਵੁਚ੍ਚਤਿ ਦ੍ਵਿਧਾ ਛਿਨ੍ਦਨੇਨ ਅਪਧਾਰਿਤਂ, ਵਿਚ੍ਛਿਦ੍ਦਮੇਵ ਵਿਚ੍ਛਿਦ੍ਦਕਂ, ਪਟਿਕੂਲਤ੍ਤਾ ਵਾ ਕੁਚ੍ਛਿਤਂ ਵਿਚ੍ਛਿਦ੍ਦਨ੍ਤਿ ਵਿਚ੍ਛਿਦ੍ਦਕਂ. ਵੇਮਜ੍ਝੇ ਛਿਨ੍ਨਸ੍ਸ ਛਵਸਰੀਰਸ੍ਸੇਤਂ ਅਧਿਵਚਨਂ. ਇਤੋ ਚ ਏਤ੍ਤੋ ਚ ਵਿਵਿਧਾਕਾਰੇਨ ਸੋਣਸਿਙ੍ਗਾਲਾਦੀਹਿ ਖਾਯਿਤਨ੍ਤਿ ਵਿਕ੍ਖਾਯਿਤਂ, ਵਿਖਾਯਿਤਨ੍ਤਿ ਵਤ੍ਤਬ੍ਬੇ ਵਿਕ੍ਖਾਯਿਤਨ੍ਤਿ ਵੁਤ੍ਤਂ. ਵਿਕ੍ਖਾਯਿਤਮੇਵ ਵਿਕ੍ਖਾਯਿਤਕਂ, ਪਟਿਕੂਲਤ੍ਤਾ ਵਾ ਕੁਚ੍ਛਿਤਂ ਵਿਕ੍ਖਾਯਿਤਨ੍ਤਿ ਵਿਕ੍ਖਾਯਿਤਕਂ. ਤਥਾਰੂਪਸ੍ਸ ਛਵਸਰੀਰਸ੍ਸੇਤਂ ਅਧਿਵਚਨਂ. ਵਿਵਿਧਂ ਖਿਤ੍ਤਂ ਵਿਕ੍ਖਿਤ੍ਤਂ, ਵਿਕ੍ਖਿਤ੍ਤਮੇਵ ਵਿਕ੍ਖਿਤ੍ਤਕਂ, ਪਟਿਕੂਲਤ੍ਤਾ ਵਾ ਕੁਚ੍ਛਿਤਂ ਵਿਕ੍ਖਿਤ੍ਤਨ੍ਤਿ ਵਿਕ੍ਖਿਤ੍ਤਕਂ. ਅਞ੍ਞੇਨ ਹਤ੍ਥਂ ਅਞ੍ਞੇਨ ਪਾਦਂ ਅਞ੍ਞੇਨ ਸੀਸਨ੍ਤਿ ਏਵਂ ਤਤੋ ਤਤੋ ਖਿਤ੍ਤਸ੍ਸ ਛਵਸਰੀਰਸ੍ਸੇਤਂ ਅਧਿਵਚਨਂ. ਹਤਞ੍ਚ ਤਂ ਪੁਰਿਮਨਯੇਨੇਵ ਵਿਕ੍ਖਿਤ੍ਤਕਞ੍ਚਾਤਿ ਹਤਵਿਕ੍ਖਿਤ੍ਤਕਂ. ਕਾਕਪਦਾਕਾਰੇਨ ਅਙ੍ਗਪਚ੍ਚਙ੍ਗੇਸੁ ਸਤ੍ਥੇਨ ਹਨਿਤ੍ਵਾ ਵੁਤ੍ਤਨਯੇਨ ਵਿਕ੍ਖਿਤ੍ਤਸ੍ਸ ਛਵਸਰੀਰਸ੍ਸੇਤਂ ਅਧਿਵਚਨਂ. ਲੋਹਿਤਂ ਕਿਰਤਿ ਵਿਕ੍ਖਿਪਤਿ ਇਤੋ ਚਿਤੋ ਚ ਪਗ੍ਘਰਤੀਤਿ ਲੋਹਿਤਕਂ. ਪਗ੍ਘਰਿਤਲੋਹਿਤਮਕ੍ਖਿਤਸ੍ਸ ਛਵਸਰੀਰਸ੍ਸੇਤਂ ਅਧਿਵਚਨਂ. ਪੁਲ਼ਵਾ ਵੁਚ੍ਚਨ੍ਤਿ ਕਿਮਯੋ, ਪੁਲ਼ਵੇ ਕਿਰਤੀਤਿ ਪੁਲ਼ਵਕਂ. ਕਿਮਿਪਰਿਪੁਣ੍ਣਸ੍ਸ ਛਵਸਰੀਰਸ੍ਸੇਤਂ ਅਧਿਵਚਨਂ. ਅਟ੍ਠਿਯੇਵ ਅਟ੍ਠਿਕਂ, ਪਟਿਕੂਲਤ੍ਤਾ ਵਾ ਕੁਚ੍ਛਿਤਂ ਅਟ੍ਠੀਤਿ ਅਟ੍ਠਿਕਂ. ਅਟ੍ਠਿਸਙ੍ਖਲਿਕਾਯਪਿ ਏਕਟ੍ਠਿਕਸ੍ਸਪਿ ਏਤਂ ਅਧਿਵਚਨਂ. ਇਮਾਨਿ ਚ ਪਨ ਉਦ੍ਧੁਮਾਤਕਾਦੀਨਿ ਨਿਸ੍ਸਾਯ ਉਪ੍ਪਨ੍ਨਨਿਮਿਤ੍ਤਾਨਮ੍ਪਿ ਨਿਮਿਤ੍ਤੇਸੁ ਪਟਿਲਦ੍ਧਜ੍ਝਾਨਾਨਮ੍ਪਿ ਏਤਾਨੇਵ ਨਾਮਾਨਿ. ਇਧ ਪਨ ਉਦ੍ਧੁਮਾਤਕਨਿਮਿਤ੍ਤੇ ਪਟਿਕੂਲਾਕਾਰਗਾਹਿਕਾ ਅਪ੍ਪਨਾਵਸੇਨ ਉਪ੍ਪਨ੍ਨਾ ਸਞ੍ਞਾ ਉਦ੍ਧੁਮਾਤਕਸਞ੍ਞਾ, ਤਸ੍ਸਾ ਉਦ੍ਧੁਮਾਤਕਸਞ੍ਞਾਯ ਵਸੇਨ ਉਦ੍ਧੁਮਾਤਕਸਞ੍ਞਾਵਸੇਨ. ਸੇਸੇਸੁਪਿ ਏਸੇਵ ਨਯੋ. ਪਞ੍ਚਪਞ੍ਞਾਸ ਸਮਾਧੀਤਿ ਏਕਕਾਦਿਵਸੇਨ ਵੁਤ੍ਤਾ.
੪੪. ਏਵਂ ਏਕਕਾਦਿਵਸੇਨ ਸਮਾਧਿਪ੍ਪਭੇਦਂ ਦਸ੍ਸੇਤ੍ਵਾ ਇਦਾਨਿ ਅਞ੍ਞੇਨਪਿ ਪਰਿਯਾਯੇਨ ਸਮਾਧਿਂ ਦਸ੍ਸੇਤੁਕਾਮੋ ਅਪਿਚਾਤਿ ਅਞ੍ਞਂ ਪਰਿਯਾਯਾਰਮ੍ਭਂ ਦਸ੍ਸੇਤ੍ਵਾ ਪਞ੍ਚਵੀਸਤੀਤਿਆਦਿਮਾਹ. ਤਤ੍ਥ ਸਮਾਧਿਸ੍ਸ ਸਮਾਧਿਟ੍ਠਾਤਿ ਸਮਾਧਿਸ੍ਸ ਸਮਾਧਿਭਾਵੇ ਸਭਾਵਾ, ਯੇਹਿ ਸਭਾਵੇਹਿ ਸੋ ਸਮਾਧਿ ਹੋਤਿ, ਤੇ ਤਸ੍ਮਿਂ ਅਤ੍ਥਾ ਨਾਮ. ਪਰਿਗ੍ਗਹਟ੍ਠੇਨ ਸਮਾਧੀਤਿ ਸਦ੍ਧਾਦੀਹਿ ਇਨ੍ਦ੍ਰਿਯੇਹਿ ਪਰਿਗ੍ਗਹਿਤਤ੍ਤਾ ਤਸ੍ਮਾ ਪਰਿਗ੍ਗਹਿਤਸਭਾਵੇਨ ਸਮਾਧਿ. ਤਾਨੇਵ ਚ ਇਨ੍ਦ੍ਰਿਯਾਨਿ ਅਞ੍ਞਮਞ੍ਞਪਰਿਵਾਰਾਨਿ ਹੋਨ੍ਤਿ, ਭਾਵਨਾਪਾਰਿਪੂਰਿਯਾ ਪਰਿਪੁਣ੍ਣਾਨਿ ਚ ਹੋਨ੍ਤਿ. ਤਸ੍ਮਾ ਪਰਿਵਾਰਟ੍ਠੇਨ ਪਰਿਪੂਰਟ੍ਠੇਨ ਸਮਾਧਿ. ਤੇਸਂਯੇਵ ਸਮਾਧਿਵਸੇਨ ਏਕਾਰਮ੍ਮਣਮਪੇਕ੍ਖਿਤ੍ਵਾ ਏਕਗ੍ਗਟ੍ਠੇਨ, ਨਾਨਾਰਮ੍ਮਣਵਿਕ੍ਖੇਪਾਭਾਵਮਪੇਕ੍ਖਿਤ੍ਵਾ ਅਵਿਕ੍ਖੇਪਟ੍ਠੇਨ, ਲੋਕੁਤ੍ਤਰਸ੍ਸੇਵ ਮਹਤਾ ਵੀਰਿਯਬਲਪਗ੍ਗਹੇਨ ਪਤ੍ਤਬ੍ਬਤ੍ਤਾ ਲੋਕੁਤ੍ਤਰਮਗ੍ਗਸ੍ਸੇਵ ਚ ਪਰਿਹਾਨਿਵਸੇਨ ਵਿਸਾਰਾਭਾਵਤੋ ਹੇਟ੍ਠਾ ਗਹਿਤਪਗ੍ਗਹਟ੍ਠਅਵਿਸਾਰਟ੍ਠਾ ਇਧ ਨ ਗਹਿਤਾਤਿ ਵੇਦਿਤਬ੍ਬਾ. ਕਿਲੇਸਕਾਲੁਸ੍ਸਿਯਸ੍ਸਾਭਾਵੇਨ ਅਨਾਵਿਲਟ੍ਠੇਨ ਸਮਾਧਿ. ਅਵਿਕਮ੍ਪਤ੍ਤਾ ਅਨਿਞ੍ਜਨਟ੍ਠੇਨ ਸਮਾਧਿ. ਵਿਕ੍ਖਮ੍ਭਨਵਸੇਨ ਸਮੁਚ੍ਛੇਦਵਸੇਨ ਵਾ ਕਿਲੇਸੇਹਿ ਵਿਮੁਤ੍ਤਤ੍ਤਾ ਆਰਮ੍ਮਣੇ ਚ ਅਧਿਮੁਤ੍ਤਤ੍ਤਾ ਵਿਮੁਤ੍ਤਟ੍ਠੇਨ ਸਮਾਧਿ.
ਏਕਤ੍ਤੁਪਟ੍ਠਾਨਵਸੇਨ ਚਿਤ੍ਤਸ੍ਸ ਠਿਤਤ੍ਤਾਤਿ ਸਮਾਧਿਯੋਗੇਨੇਵ ਏਕਾਰਮ੍ਮਣੇ ਭੁਸਂ ਪਤਿਟ੍ਠਾਨਵਸੇਨ ਚਿਤ੍ਤਸ੍ਸ ਆਰਮ੍ਮਣੇ ਨਿਚ੍ਚਲਭਾਵੇਨ ਪਤਿਟ੍ਠਿਤਤ੍ਤਾ. ਅਟ੍ਠਸੁ ਯੁਗਲੇਸੁ ਏਸਤਿ ਨੇਸਤਿ, ਆਦਿਯਤਿ ਨਾਦਿਯਤਿ, ਪਟਿਪਜ੍ਜਤਿ ਨ ਪਟਿਪਜ੍ਜਤੀਤਿ ਇਮਾਨਿ ਤੀਣਿ ਯੁਗਲਾਨਿ ਅਪ੍ਪਨਾਵੀਥਿਤੋ ਪੁਬ੍ਬਭਾਗੇ ਉਪਚਾਰਸ੍ਸ ਮੁਦੁਮਜ੍ਝਾਧਿਮਤ੍ਤਤਾਵਸੇਨ ਵੁਤ੍ਤਾਨੀਤਿ ਵੇਦਿਤਬ੍ਬਾਨਿ, ਝਾਯਤਿ ਝਾਪੇਤੀਤਿ ਇਦਂ ਅਪ੍ਪਨਾਵੀਥਿਯਂ ਉਪਚਾਰਵਸੇਨ ਵੇਦਿਤਬ੍ਬਂ. ਏਸਿਤਤ੍ਤਾ ਨੇਸਿਤਤ੍ਤਾ, ਆਦਿਨ੍ਨਤ੍ਤਾ ਅਨਾਦਿਨ੍ਨਤ੍ਤਾ, ਪਟਿਪਨ੍ਨਤ੍ਤਾ ਨਪ੍ਪਟਿਪਨ੍ਨਤ੍ਤਾ, ਝਾਤਤ੍ਤਾ ਨ ਝਾਪਿਤਤ੍ਤਾਤਿ ਇਮਾਨਿ ਚਤ੍ਤਾਰਿ ਯੁਗਲਾਨਿ ਅਪ੍ਪਨਾਵਸੇਨ ਵੁਤ੍ਤਾਨੀਤਿ ਵੇਦਿਤਬ੍ਬਾਨਿ.
ਤਤ੍ਥ ਸਮਂ ਏਸਤੀਤਿ ਸਮਾਧੀਤਿਆਦੀਸੁ ਸਮਨ੍ਤਿ ਅਪ੍ਪਨਂ. ਸਾ ਹਿ ਪਚ੍ਚਨੀਕਧਮ੍ਮੇ ਸਮੇਤਿ ਨਾਸੇਤੀਤਿ ਸਮਾ, ਪਚ੍ਚਨੀਕਵਿਸਮਾਭਾਵਤੋ ਵਾ ਸਮਭੂਤਾਤਿ ਸਮਾ. ਤਂ ਸਮਂ ਏਸਤਿ ਅਜ੍ਝਾਸਯਵਸੇਨ ਗਵੇਸਤਿ. ਇਤਿਸਦ੍ਦੋ ਕਾਰਣਤ੍ਥੋ, ਯਸ੍ਮਾ ਸਮਂ ਏਸਤਿ, ਤਸ੍ਮਾ ਸਮਾਧੀਤਿ ਅਤ੍ਥੋ. ਵਿਸਮਂ ਨੇਸਤੀਤਿ ਤਂ ਤਂ ਝਾਨਪਚ੍ਚਨੀਕਸਙ੍ਖਾਤਂ ਵਿਸਮਂ ਨ ਏਸਤਿ. ਮੁਦੁਭੂਤੋ ਹਿ ਪੁਬ੍ਬਭਾਗਸਮਾਧਿ ਆਦਿਭੂਤਤ੍ਤਾ ਸਮਂ ਏਸਤਿ, ਵਿਸਮਂ ਨੇਸਤਿ ਨਾਮ. ਮਜ੍ਝਿਮਭੂਤੋ ਥਿਰਭੂਤਤ੍ਤਾ ਸਮਂ ਆਦਿਯਤਿ, ਵਿਸਮਂ ਨਾਦਿਯਤਿ ਨਾਮ. ਅਧਿਮਤ੍ਤਭੂਤੋ ਅਪ੍ਪਨਾਵੀਥਿਯਾ ਆਸਨ੍ਨਭੂਤਤ੍ਤਾ ਸਮਂ ਪਟਿਪਜ੍ਜਤਿ, ਵਿਸਮਂ ਨਪ੍ਪਟਿਪਜ੍ਜਤਿ ਨਾਮ. ਸਮਂ ਝਾਯਤੀਤਿ ਭਾਵਨਪੁਂਸਕਵਚਨਂ, ਸਮਂ ਹੁਤ੍ਵਾ ਝਾਯਤਿ, ਸਮੇਨ ਵਾ ਆਕਾਰੇਨ ਝਾਯਤੀਤਿ ਅਤ੍ਥੋ. ਅਪ੍ਪਨਾਵੀਥਿਯਞ੍ਹਿ ਸਮਾਧਿ ਪਚ੍ਚਨੀਕਧਮ੍ਮਵਿਗਮੇਨ ਸਨ੍ਤਤ੍ਤਾ, ਸਨ੍ਤਾਯ ਅਪ੍ਪਨਾਯ ਅਨੁਕੂਲਭਾਵੇਨ ਚ ਠਿਤਤ੍ਤਾ ਸਮੇਨਾਕਾਰੇਨ ਪਵਤ੍ਤਤਿ. ਝਾਯਤੀਤਿ ਚ ਪਜ੍ਜਲਤੀਤਿ ਅਤ੍ਥੋ ‘‘ਏਤੇ ਮਣ੍ਡਲਮਾਲ਼ੇ ਦੀਪਾ ਝਾਯਨ੍ਤਿ (ਦੀ. ਨਿ. ੧.੧੫੯) ਸਬ੍ਬਰਤ੍ਤਿਂ, ਸਬ੍ਬਰਤ੍ਤਿਯੋ ਚ ਤੇਲਪ੍ਪਦੀਪੋ ਝਾਯਤਿ, ਤੇਲਪ੍ਪਦੀਪੋ ਚੇਤ੍ਥ ਝਾਯੇਯ੍ਯਾ’’ਤਿਆਦੀਸੁ (ਸਂ. ਨਿ. ੪.੨੫੫-੨੫੬) ਵਿਯ. ਸਮਂ ਜਾਯਤੀਤਿਪਿ ਪਾਠੋ, ਸਮੇਨਾਕਾਰੇਨ ਉਪ੍ਪਜ੍ਜਤੀਤਿ ਅਤ੍ਥੋ. ਝਾਯਤਿ ਝਾਪੇਤੀਤਿ ਯੁਗਲਤ੍ਤਾ ਪਨ ਪੁਰਿਮਪਾਠੋਵ ਸੁਨ੍ਦਰਤਰੋ. ਝਾਪੇਤੀਤਿ ਚ ਦਹਤੀਤਿ ਅਤ੍ਥੋ. ਸੋ ਹਿ ਸਮਾਧਿਪਚ੍ਚਨੀਕਧਮ੍ਮੇ ਦੂਰਤਰਕਰਣੇਨ ਦਹਤਿ ਨਾਮ. ਏਸਨਾਨੇਸਨਾਦੀਨਂ ਪਨ ਅਪ੍ਪਨਾਯ ਸਿਦ੍ਧਤ੍ਤਾ ‘‘ਏਸਿਤਤ੍ਤਾ ਨੇਸਿਤਤ੍ਤਾ’’ਤਿਆਦੀਹਿ ਅਪ੍ਪਨਾਸਮਾਧਿ ਵੁਤ੍ਤੋ. ਸਮਂ ਝਾਤਤ੍ਤਾਤਿ ਸਮਂ ਜਲਿਤਤ੍ਤਾ. ਸਮਂ ਜਾਤਤ੍ਤਾਤਿਪਿ ਪਾਠੋ. ਇਤਿ ਇਮੇਸਂ ਅਟ੍ਠਨ੍ਨਂ ਯੁਗਲਾਨਂ ਵਸੇਨ ਸੋਲ਼ਸ, ਪੁਰਿਮਾ ਚ ਨਵਾਤਿ ਇਮੇ ਪਞ੍ਚਵੀਸਤਿ ਸਮਾਧਿਸ੍ਸ ਸਮਾਧਿਟ੍ਠਾ.
ਸਮੋ ਚ ਹਿਤੋ ਚ ਸੁਖੋ ਚਾਤਿ ਸਮਾਧੀਤਿ ਇਦਂ ਪਨ ਪਞ੍ਚਵੀਸਤਿਯਾ ਆਕਾਰੇਹਿ ਸਾਧਿਤਸ੍ਸ ਸਮਾਧਿਸ੍ਸ ਅਤ੍ਥਸਾਧਨਤ੍ਥਂ ਵੁਤ੍ਤਂ. ਤਤ੍ਥ ਸਮੋਤਿ ਸਮਸਦ੍ਦਸ੍ਸ, ਸਂਸਦ੍ਦਸ੍ਸ ਵਾ ਅਤ੍ਥੋ. ਸੋ ਹਿ ਪਚ੍ਚਨੀਕਕ੍ਖੋਭਵਿਸਮਵਿਰਹਿਤਤ੍ਤਾ ਸਮੋ. ਹਿਤੋਤਿ ਆਧਿਸਦ੍ਦਸ੍ਸ ਅਤ੍ਥੋ, ਆਰਮ੍ਮਣੇ ਆਹਿਤੋ ਨਿਚ੍ਚਲਭਾਵਕਰਣੇਨ ਪਤਿਟ੍ਠਾਪਿਤੋਤਿ ਅਧਿਪ੍ਪਾਯੋ. ਉਭਯੇਨ ਸਮੋ ਚ ਆਹਿਤੋ ਚਾਤਿ ਸਮਾਧੀਤਿ ਵੁਤ੍ਤਂ ਹੋਤਿ. ਸੁਖੋਤਿ ਸਨ੍ਤਟ੍ਠੇਨ ਸੁਖੋ. ‘‘ਯਾਯਂ, ਭਨ੍ਤੇ, ਅਦੁਕ੍ਖਮਸੁਖਾ ਵੇਦਨਾ, ਸਨ੍ਤਸ੍ਮਿਂ ਏਸਾ ਪਣੀਤੇ ਸੁਖੇ ਵੁਤ੍ਤਾ ਭਗਵਤਾ’’ਤਿ (ਮ. ਨਿ. ੨.੮੮) ਚ ‘‘ਉਪੇਕ੍ਖਾ ਪਨ ਸਨ੍ਤਤ੍ਤਾ, ਸੁਖਮਿਚ੍ਚੇਵ ਭਾਸਿਤਾ’’ਤਿ ਚ ਵੁਤ੍ਤਤ੍ਤਾ ਤੇਨ ਸਨ੍ਤਤ੍ਥੇਨ ਸੁਖਸਦ੍ਦੇਨ ਉਪੇਕ੍ਖਾਸਹਗਤਸਮਾਧਿਪਿ ਗਹਿਤੋ ਹੋਤਿ. ਅਨਿਯਾਮੇਨ ਹਿ ਸਬ੍ਬਸਮਾਧਯੋ ਇਧ ਵੁਚ੍ਚਨ੍ਤਿ. ਤੇਨ ਚ ਸੁਖਸਦ੍ਦੇਨ ਆਹਿਤਭਾਵਸ੍ਸ ਕਾਰਣਂ ਵੁਤ੍ਤਂ ਹੋਤਿ. ਯਸ੍ਮਾ ਸਨ੍ਤੋ, ਤਸ੍ਮਾ ਏਕਾਰਮ੍ਮਣੇ ਆਹਿਤੋਤਿ ਅਧਿਪ੍ਪਾਯੋ ਵੇਦਿਤਬ੍ਬੋਤਿ.
ਸਮਾਧਿਭਾਵਨਾਮਯਞਾਣਨਿਦ੍ਦੇਸਵਣ੍ਣਨਾ ਨਿਟ੍ਠਿਤਾ.