੨੫-੨੮. ਪਟਿਸਮ੍ਭਿਦਾਞਾਣਨਿਦ੍ਦੇਸਵਣ੍ਣਨਾ

੭੬. ਪਟਿਸਮ੍ਭਿਦਾਞਾਣਨਿਦ੍ਦੇਸੇ ਯਸ੍ਮਾ ਧਮ੍ਮੇ ਅਵੁਤ੍ਤੇ ਤਸ੍ਸ ਕਿਚ੍ਚਂ ਨ ਸਕ੍ਕਾ ਵਤ੍ਤੁਂ, ਤਸ੍ਮਾ ਉਦ੍ਦਿਟ੍ਠਾਨਂ ਪਟਿਪਾਟਿਂ ਅਨਾਦਿਯਿਤ੍ਵਾ ਪਠਮਂ ਧਮ੍ਮਾ ਨਿਦ੍ਦਿਟ੍ਠਾ. ਧਮ੍ਮਾਦੀਨਂ ਅਤ੍ਥਾ ਵੁਤ੍ਤਾਯੇਵ. ਸਦ੍ਧਿਨ੍ਦ੍ਰਿਯਂ ਧਮ੍ਮੋਤਿਆਦੀਹਿ ਧਮ੍ਮਸਦ੍ਦਪਰਿਯਾਪਨ੍ਨੇ ਧਮ੍ਮੇ ਵਤ੍ਵਾ ਨਾਨਤ੍ਤਸਦ੍ਦਸ੍ਸ ਅਤ੍ਥਂ ਦਸ੍ਸੇਨ੍ਤੋ ਅਞ੍ਞੋ ਸਦ੍ਧਿਨ੍ਦ੍ਰਿਯਂ ਧਮ੍ਮੋਤਿਆਦਿਮਾਹ. ‘‘ਅਞ੍ਞੋ ਧਮ੍ਮੋ’’ਤਿ ਹਿ ਵੁਤ੍ਤੇ ਧਮ੍ਮਾਨਂ ਨਾਨਤ੍ਤਂ ਦਸ੍ਸਿਤਂ ਹੋਤਿ. ਪਟਿਵਿਦਿਤਾਤਿ ਅਭਿਮੁਖਭਾਵੇਨ ਵਿਦਿਤਾ ਪਾਕਟਾ ਨਾਮ ਹੋਨ੍ਤਿ. ਤੇਨ ਪਟਿਸਮ੍ਭਿਦਾਪਦਸ੍ਸ ਅਤ੍ਥੋ ਵੁਤ੍ਤੋ. ਅਧਿਮੋਕ੍ਖਟ੍ਠੋ ਅਤ੍ਥੋਤਿਆਦੀਹਿ ਤੇਸਂ ਸਦ੍ਧਾਦੀਨਂ ਅਧਿਮੁਚ੍ਚਨਾਦਿਕਿਚ੍ਚਂ ਅਤ੍ਥੋ ਨਾਮਾਤਿ ਦਸ੍ਸੇਤਿ. ਸਨ੍ਦਸ੍ਸੇਤੁਨ੍ਤਿ ਪਰਂ ਞਾਪੇਤੁਕਾਮਸ੍ਸ ਪਰਂ ਸਨ੍ਦਸ੍ਸੇਤੁਂ. ਪਰਸ੍ਸ ਪਨ ਵਚਨਂ ਸੁਣਨ੍ਤਸ੍ਸਾਪਿ ਲਬ੍ਭਤਿਯੇਵ. ਬ੍ਯਞ੍ਜਨਨਿਰੁਤ੍ਤਾਭਿਲਾਪਾਤਿ ਨਾਮਬ੍ਯਞ੍ਜਨਂ ਨਾਮਨਿਰੁਤ੍ਤਿ ਨਾਮਾਭਿਲਾਪੋ. ਨਾਮਞ੍ਹਿ ਅਤ੍ਥਂ ਬ੍ਯਞ੍ਜਯਤੀਤਿ ਬ੍ਯਞ੍ਜਨਂ, ‘‘ਸਙ੍ਖਤਮਭਿਸਙ੍ਖਰੋਨ੍ਤੀਤਿ ਖੋ, ਭਿਕ੍ਖਵੇ, ਤਸ੍ਮਾ ਸਙ੍ਖਾਰਾਤਿ ਵੁਚ੍ਚਨ੍ਤੀ’’ਤਿ (ਸਂ. ਨਿ. ੩.੭੯) ਏਵਂ ਨਿਦ੍ਧਾਰੇਤ੍ਵਾ ਸਹੇਤੁਕਂ ਕਤ੍ਵਾ ਵੁਚ੍ਚਮਾਨਤ੍ਤਾ ਨਿਰੁਤ੍ਤਿ, ਅਭਿਲਪੀਯਤਿ ਏਤੇਨ ਅਤ੍ਥੋਤਿ ਅਭਿਲਾਪੋਤਿ ਵੁਚ੍ਚਤਿ.

ਨਾਮਞ੍ਚ ਨਾਮੇਤਂ ਚਤੁਬ੍ਬਿਧਂ – ਸਾਮਞ੍ਞਨਾਮਂ, ਗੁਣਨਾਮਂ, ਕਿਤ੍ਤਿਮਨਾਮਂ, ਓਪਪਾਤਿਕਨਾਮਨ੍ਤਿ. ਤਤ੍ਥ ਪਠਮਕਪ੍ਪਿਕੇਸੁ ਮਹਾਜਨੇਨ ਸਮ੍ਮਨ੍ਨਿਤ੍ਵਾ ਠਪਿਤਤ੍ਤਾ ‘‘ਮਹਾਸਮ੍ਮਤੋ’’ਤਿ ਰਞ੍ਞੋ ਨਾਮਂ ਸਾਮਞ੍ਞਨਾਮਂ. ਯਂ ਸਨ੍ਧਾਯ ਵੁਤ੍ਤਂ ‘‘ਮਹਾਜਨਸਮ੍ਮਤੋਤਿ ਖੋ, ਵਾਸੇਟ੍ਠ, ‘ਮਹਾਸਮ੍ਮਤੋ ਮਹਾਸਮ੍ਮਤੋ’ਤ੍ਵੇਵ ਪਠਮਂ ਅਕ੍ਖਰਂ ਉਪਨਿਬ੍ਬਤ੍ਤ’’ਨ੍ਤਿ (ਦੀ. ਨਿ. ੩.੧੩੧). ‘‘ਧਮ੍ਮਕਥਿਕੋ ਪਂਸੁਕੂਲਿਕੋ ਵਿਨਯਧਰੋ ਤਿਪਿਟਕਧਰੋ ਸਦ੍ਧੋ ਸਤੋ’’ਤਿ ਏਵਰੂਪਂ ਗੁਣਤੋ ਆਗਤਨਾਮਂ ਗੁਣਨਾਮਂ. ‘‘ਭਗਵਾ ਅਰਹਂ ਸਮ੍ਮਾਸਮ੍ਬੁਦ੍ਧੋ’’ਤਿਆਦੀਨਿਪਿ ਤਥਾਗਤਸ੍ਸ ਅਨੇਕਾਨਿ ਨਾਮਸਤਾਨਿ ਗੁਣਨਾਮਾਨੇਵ. ਤੇਨ ਵੁਤ੍ਤਂ –

‘‘ਅਸਙ੍ਖ੍ਯੇਯ੍ਯਾਨਿ ਨਾਮਾਨਿ, ਸਗੁਣੇਨ ਮਹੇਸਿਨੋ;

ਗੁਣੇਹਿ ਨਾਮਮੁਦ੍ਧੇਯ੍ਯਂ, ਅਪਿ ਨਾਮਸਹਸ੍ਸਤੋ’’ਤਿ.

ਯਂ ਪਨ ਜਾਤਸ੍ਸ ਕੁਮਾਰਕਸ੍ਸ ਨਾਮਗ੍ਗਹਣਦਿਵਸੇ ਦਕ੍ਖਿਣੇਯ੍ਯਾਨਂ ਸਕ੍ਕਾਰਂ ਕਤ੍ਵਾ ਸਮੀਪੇ ਠਿਤਾ ਞਾਤਕਾ ਕਪ੍ਪੇਤ੍ਵਾ ਪਕਪ੍ਪੇਤ੍ਵਾ ‘‘ਅਯਂ ਅਸੁਕੋ ਨਾਮਾ’’ਤਿ ਨਾਮਂ ਕਰੋਨ੍ਤਿ, ਇਦਂ ਕਿਤ੍ਤਿਮਨਾਮਂ. ਯਾ ਪਨ ਪੁਰਿਮਪਞ੍ਞਤ੍ਤਿ ਅਪਰਪਞ੍ਞਤ੍ਤਿਯਂ ਪਤਤਿ, ਪੁਰਿਮਵੋਹਾਰੋ ਪਚ੍ਛਿਮਵੋਹਾਰੇ ਪਤਤਿ. ਸੇਯ੍ਯਥਿਦਂ, ਪੁਰਿਮਕਪ੍ਪੇਪਿ ਚਨ੍ਦੋ ਚਨ੍ਦੋਯੇਵ ਨਾਮ, ਏਤਰਹਿਪਿ ਚਨ੍ਦੋਯੇਵ. ਅਤੀਤੇ ਸੂਰਿਯੋ, ਸਮੁਦ੍ਦੋ, ਪਥਵੀ, ਪਬ੍ਬਤੋ ਪਬ੍ਬਤੋਯੇਵ ਨਾਮ, ਏਤਰਹਿਪਿ ਪਬ੍ਬਤੋਯੇਵਾਤਿ, ਇਦਂ ਓਪਪਾਤਿਕਨਾਮਂ. ਇਦਂ ਚਤੁਬ੍ਬਿਧਮ੍ਪਿ ਨਾਮਂ ਏਕਂ ਨਾਮਮੇਵ ਹੋਤਿ, ਤਂ ਲੋਕਸਙ੍ਕੇਤਮਤ੍ਤਸਿਦ੍ਧਂ ਪਰਮਤ੍ਥਤੋ ਅਵਿਜ੍ਜਮਾਨਂ. ਅਞ੍ਞੇ ਪਨ ‘‘ਨਾਮਂ ਨਾਮ ਅਤ੍ਥਜੋਤਕੋ ਸਦ੍ਦੋ’’ਤਿ ਵਦਨ੍ਤਿ. ਬਲਬੋਜ੍ਝਙ੍ਗਮਗ੍ਗਙ੍ਗਾਨਂ ਵੁਤ੍ਤਨਯਾਨੁਸਾਰੇਨੇਵ ਅਤ੍ਥੋ ਵੇਦਿਤਬ੍ਬੋ.

ਪਟਿਸਮ੍ਭਿਦਾਞਾਣਨਿਦ੍ਦੇਸਵਣ੍ਣਨਾ ਨਿਟ੍ਠਿਤਾ.