੨੯-੩੧. ਞਾਣਤ੍ਤਯਨਿਦ੍ਦੇਸਵਣ੍ਣਨਾ

੭੮. ਞਾਣਤ੍ਤਯਨਿਦ੍ਦੇਸੇ ਨਿਮਿਤ੍ਤਨ੍ਤਿ ਸਙ੍ਖਾਰਨਿਮਿਤ੍ਤਂ. ਅਨਿਮਿਤ੍ਤੇਤਿ ਸਙ੍ਖਾਰਨਿਮਿਤ੍ਤਪਟਿਪਕ੍ਖੇ ਨਿਬ੍ਬਾਨੇ. ਅਧਿਮੁਤ੍ਤਤ੍ਤਾਤਿ ਤਨ੍ਨਿਨ੍ਨਭਾਵੇਨ ਚਿਤ੍ਤਸ੍ਸ ਵਿਸ੍ਸਟ੍ਠਤ੍ਤਾ. ਫੁਸ੍ਸ ਫੁਸ੍ਸ ਵਯਂ ਪਸ੍ਸਤੀਤਿ ਸਙ੍ਖਾਰਨਿਮਿਤ੍ਤਂ ਞਾਣੇਨ ਫੁਸਿਤ੍ਵਾ ਫੁਸਿਤ੍ਵਾ ਤਸ੍ਸ ਭਙ੍ਗਂ ਵਿਪਸ੍ਸਨਾਞਾਣੇਨੇਵ ਪਸ੍ਸਤਿ. ਏਤੇਨ ਭਙ੍ਗਾਨੁਪਸ੍ਸਨਾ ਸਿਦ੍ਧਾ. ਸਾ ਅਨਿਚ੍ਚਾਨੁਪਸ੍ਸਨਂ ਸਾਧੇਤਿ, ਅਨਿਚ੍ਚਸ੍ਸ ਦੁਕ੍ਖਤ੍ਤਾ ਸਾ ਦੁਕ੍ਖਾਨੁਪਸ੍ਸਨਂ, ਦੁਕ੍ਖਸ੍ਸ ਅਨਤ੍ਤਤ੍ਤਾ ਸਾ ਅਨਤ੍ਤਾਨੁਪਸ੍ਸਨਨ੍ਤਿ ਏਵਮੇਤ੍ਥ ਤਿਸ੍ਸੋ ਅਨੁਪਸ੍ਸਨਾ ਵੁਤ੍ਤਾ ਹੋਨ੍ਤਿ. ਅਨਿਮਿਤ੍ਤੋ ਵਿਹਾਰੋਤਿ ਨਿਮਿਤ੍ਤਂ ਭਯਤੋ ਦਿਟ੍ਠਤ੍ਤਾ ਸੋ ਵਿਪਸ੍ਸਨਤ੍ਤਯਵਿਹਾਰੋ ਅਨਿਮਿਤ੍ਤਵਿਹਾਰੋ ਨਾਮ ਹੋਤਿ. ਪਣਿਧਿਨ੍ਤਿ ਤਣ੍ਹਂ. ਅਪ੍ਪਣਿਹਿਤੇਤਿ ਤਣ੍ਹਾਪਟਿਪਕ੍ਖੇ ਨਿਬ੍ਬਾਨੇ. ਅਭਿਨਿਵੇਸਨ੍ਤਿ ਅਤ੍ਤਾਭਿਨਿਵੇਸਂ. ਸੁਞ੍ਞਤੇਤਿ ਅਤ੍ਤਵਿਰਹਿਤੇ ਨਿਬ੍ਬਾਨੇ. ਸੁਞ੍ਞਤੋਤਿ ਸੁਞ੍ਞਂਯੇਵ ਸੁਞ੍ਞਤੋ. ਪਵਤ੍ਤਂ ਅਜ੍ਝੁਪੇਕ੍ਖਿਤ੍ਵਾਤਿ ਵਿਪਾਕਪ੍ਪਵਤ੍ਤਂ ਸਙ੍ਖਾਰੁਪੇਕ੍ਖਾਯ ਅਜ੍ਝੁਪੇਕ੍ਖਿਤ੍ਵਾ. ਸੁਗਤਿਸਙ੍ਖਾਤਵਿਪਾਕਪ੍ਪਵਤ੍ਤਾਭਿਨਨ੍ਦਿਨੋ ਹਿ ਸਤ੍ਤਾ. ਅਯਂ ਪਨ ਫਲਸਮਾਪਤ੍ਤਿਂ ਸਮਾਪਜ੍ਜਿਤੁਕਾਮੋ ਤਂ ਪਵਤ੍ਤਂ, ਸਬ੍ਬਞ੍ਚ ਸਙ੍ਖਾਰਗਤਂ ਅਨਿਚ੍ਚਾਦਿਤੋ ਪਸ੍ਸਿਤ੍ਵਾ ਅਜ੍ਝੁਪੇਕ੍ਖਤਿਯੇਵ. ਏਵਞ੍ਹਿ ਦਿਟ੍ਠੇ ਫਲਸਮਾਪਤ੍ਤਿਂ ਸਮਾਪਜ੍ਜਿਤੁਂ ਸਕ੍ਕੋਤਿ, ਨ ਅਞ੍ਞਥਾ. ਆਵਜ੍ਜਿਤ੍ਵਾਤਿ ਆਵਜ੍ਜਨੇਨ ਆਵਜ੍ਜਿਤ੍ਵਾ. ਸਮਾਪਜ੍ਜਤੀਤਿ ਫਲਸਮਾਪਤ੍ਤਿਂ ਪਟਿਪਜ੍ਜਤਿ. ਅਨਿਮਿਤ੍ਤਾ ਸਮਾਪਤ੍ਤੀਤਿ ਨਿਮਿਤ੍ਤਂ ਭਯਤੋ ਦਿਸ੍ਵਾ ਸਮਾਪਨ੍ਨਤ੍ਤਾ ਅਨਿਮਿਤ੍ਤਾ ਸਮਾਪਤ੍ਤਿ ਨਾਮ. ਅਨਿਮਿਤ੍ਤਵਿਹਾਰਸਮਾਪਤ੍ਤੀਤਿ ਵਿਪਸ੍ਸਨਾਵਿਹਾਰਵਸੇਨ ਚ ਫਲਸਮਾਪਤ੍ਤਿਵਸੇਨ ਚ ਤਦੁਭਯਂ ਨਾਮ ਹੋਤਿ.

੭੯. ਇਦਾਨਿ ਸਙ੍ਖਾਰਨਿਮਿਤ੍ਤਮੇਵ ਵਿਭਜਿਤ੍ਵਾ ਦਸ੍ਸੇਨ੍ਤੋ ਰੂਪਨਿਮਿਤ੍ਤਨ੍ਤਿਆਦਿਮਾਹ. ਜਰਾਮਰਣਗ੍ਗਹਣੇ ਵਤ੍ਤਬ੍ਬਂ ਪੁਬ੍ਬੇ ਵੁਤ੍ਤਮੇਵ. ‘‘ਅਞ੍ਞੋ ਅਨਿਮਿਤ੍ਤਵਿਹਾਰੋ’’ਤਿਆਦੀਹਿ ਵੁਤ੍ਤੇਯੇਵ ਨਿਗਮੇਤ੍ਵਾ ਦਸ੍ਸੇਤਿ. ਸਙ੍ਖੇਪੇਨ ਵਿਹਾਰਟ੍ਠੇ ਞਾਣਂ ਨਾਮ ਫਲਸਮਾਪਤ੍ਤਿਯਾ ਪੁਬ੍ਬਭਾਗੇ ਸਙ੍ਖਾਰੁਪੇਕ੍ਖਾਞਾਣੇ ਠਿਤਸ੍ਸ ਵਿਪਸ੍ਸਨਾਵਿਹਾਰਨਾਨਤ੍ਤੇ ਞਾਣਂ ਸਮਾਪਤ੍ਤਟ੍ਠੇ ਞਾਣਂ ਨਾਮ ਫਲਸਮਾਪਤ੍ਤਿਨਾਨਤ੍ਤੇ ਞਾਣਂ. ਵਿਹਾਰਸਮਾਪਤ੍ਤਟ੍ਠੇ ਞਾਣਂ ਨਾਮ ਤਦੁਭਯਨਾਨਤ੍ਤੇ ਞਾਣਂ. ਵਿਪਸ੍ਸਨਾਵਿਹਾਰੇਨੇਵ ਵੀਤਿਨਾਮੇਤੁਕਾਮੋ ਵਿਪਸ੍ਸਨਾਵਿਹਾਰਮੇਵ ਪਵਤ੍ਤੇਤਿ, ਫਲਸਮਾਪਤ੍ਤਿਵਿਹਾਰੇਨੇਵ ਵੀਤਿਨਾਮੇਤੁਕਾਮੋ ਵਿਪਸ੍ਸਨਾਪਟਿਪਾਟਿਯਾ ਉਸ੍ਸਕ੍ਕਿਤ੍ਵਾ ਫਲਸਮਾਪਤ੍ਤਿਵਿਹਾਰਮੇਵ ਪਵਤ੍ਤੇਤਿ, ਤਦੁਭਯੇਨ ਵੀਤਿਨਾਮੇਤੁਕਾਮੋ ਤਦੁਭਯਂ ਪਵਤ੍ਤੇਤਿ. ਏਵਂ ਪੁਗ੍ਗਲਾਧਿਪ੍ਪਾਯਵਸੇਨ ਤਿਵਿਧਂ ਜਾਤਂ. ਸੇਸਮੇਤ੍ਥ ਵਤ੍ਤਬ੍ਬਂ ਸਙ੍ਖਾਰੁਪੇਕ੍ਖਾਞਾਣਵਣ੍ਣਨਾਯਂ ਵੁਤ੍ਤਮੇਵ.

ਞਾਣਤ੍ਤਯਨਿਦ੍ਦੇਸਵਣ੍ਣਨਾ ਨਿਟ੍ਠਿਤਾ.